2017-yil boshoqli don ekinlari hosilini yigʻishtirib olishga doir tashkiliy chora-tadbirlar toʻgʻrisida (PP-2974-son)

18.05.2017

Oʻzbekiston Respublikasi Prezidentining

Qarori

2017-yil hosilini qisqa muddatlarda oʻz vaqtida va sifatli yigʻib-terib olish hamda fermer xoʻjaliklari tomonidan davlat resurslariga gʻalla sotish boʻyicha tuzilgan shartnomalarning soʻzsiz bajarilishini taʼminlash maqsadida:

1. Qayd etilsinki, 2016-yilda Jizzax, Namangan, Sirdaryo va Fargʻona viloyatlarining 16 ta tumanida yakka tartibdagi fermer xoʻjaliklari tomonidan davlat resurslariga gʻalla sotish boʻyicha kontraktatsiya shartnomalarini bajarishda jiddiy qoidabuzarliklarga yoʻl qoʻyilgan. Yuqorida qayd etilgan kamchiliklar uchun 15 nafar mansabdor shaxsga nisbatan maʼmuriy jazo qoʻllanilgan, 700 dan ortiq fermer xoʻjaligi shartnoma majburiyatlarini bajarmaganligi uchun sud tartibida javobgarlikka tortilganligi maʼlumot uchun qabul qilinsin.

2017-yil hosilini oʻz vaqtida va sifatli yigʻib-terib olish ishlarini tashkil etish va oʻtkazish, gʻalla oʻrim-yigʻim mashinalaridan samarali foydalanish, shuningdek, tuzilgan kontraktatsiya shartnomalarini soʻzsiz bajarish uchun Qoraqalpogʻiston Respublikasi Vazirlar Kengashi, viloyatlar hokimlari, Oʻzbekiston Respublikasi qishloq va suv xoʻjaligi vazirligi “Oʻzdonmahsulot” aksiyadorlik kompaniyasi va don mahsulotlari korxonalari, “Oʻzagroservis” aksiyadorlik jamiyati va uning hududiy filiallari rahbarlari zimmasiga yuklatilsin.

2. Quyidagilar Qoraqalpogʻiston Respublikasi Vazirlar Kengashi, viloyatlar hokimlari, Oʻzbekiston Respublikasi Qishloq va suv xoʻjaligi vazirligi, Oʻzbekiston fermer xoʻjaliklari kengashi, “Oʻzagroservis” aksiyadorlik jamiyati va uning hududiy boʻlinmalari, Oʻzbekiston avtomobil va daryo transporti agentligi, “Oʻzdonmahsulot” aksiyadorlik jamiyati va don mahsulotlari korxonalarining eng muhim vazifalari deb hisoblansin:

fermer xoʻjaliklari tomonidan davlat resurslariga gʻalla sotish boʻyicha tuzilgan kontraktatsiya shartnomalarning soʻzsiz bajarilishini taʼminlash;

gʻalla oʻrim-yigʻim mashinalarini, gʻalla tashishda foydalaniladigan barcha turdagi avtotransport vositalarini, shuningdek, gʻalla xirmonlari va platformalarini, gʻalla tozalash mashinalarini va donni birlamchi qayta ishlash uchun boshqa moddiy-texnik bazalarni tayyorlashni joriy yilning 22-mayiga qadar yakunlash boʻyicha tashkiliy-iqtisodiy chora-tadbirlar kompleksini amalga oshirish;

tayyorlov korxonalari va fermer xoʻjaliklaridan donni faqat majburiy dastlabki tozalashdan soʻng, ifloslanishi va namligi normativ-huquqiy hujjatlarda va standartlashtirish boʻyicha normativ hujjatlarda belgilangan talablardan oshmaydigan ogʻishlar bilan qabul qilishni tashkil etish;

Oʻzbekiston Respublikasi Vazirlar Mahkamasi huzuridagi davlat ehtiyojlari uchun xarid qilinadigan qishloq xoʻjaligi mahsulotlari uchun hisob-kitoblar jamgʻarmasi bilan birgalikda davlat ehtiyojlari uchun xarid qilinadigan don uchun fermer xoʻjaliklari, qishloq xoʻjaligi ishlab chiqaruvchilaridan don mahsulotlari korxonalariga don tashish boʻyicha koʻrsatilgan xizmatlar uchun transport tashkilotlari, mashina-traktor parklari va operatorlari, gʻalla terish kombaynlari koʻrsatilgan mexanizatsiyalashgan xizmatlar uchun mehnatiga haq toʻlash boʻyicha oʻz vaqtida hisob-kitoblar oʻtkazish.

Belgilansinki, donni don qabul qilish korxonalariga yetkazib berish uchun transport xarajatlari transport tashkilotlari, qishloq xoʻjaligi ishlab chiqaruvchilari va don mahsulotlari ishlab chiqaruvchi korxonalar oʻrtasida tuzilgan shartnomalarga muvofiq “Oʻzdonmahsulot” aksiyadorlik jamiyati tomonidan toʻlanadi.

3. Shunday tartib oʻrnatilsinki, unga koʻra gʻalla yetishtiruvchi fermer xoʻjaliklari birinchi navbatda davlat ehtiyojlari uchun gʻalla sotish kontraktatsiya shartnomalari boʻyicha oʻz majburiyatlarini bajarishlari shart.

Fermer xoʻjaliklari tuzilgan kontraktatsiya shartnomalari boʻyicha oʻz majburiyatlarini bajarmagan taqdirda, ularga qonunchilik hujjatlarida nazarda tutilgan javobgarlik choralari, shu jumladan fermer xoʻjaliklarining yer uchastkalarini qayta tashkil etish va ularning oʻlchamlarini optimallashtirish choralari qoʻllaniladi.

Oʻzbekiston Respublikasi Bosh prokuraturasi va uning hududiy boʻlinmalari fermer xoʻjaliklari tomonidan davlat ehtiyojlari uchun gʻalla yetishtirish va sotish kontraktatsiya shartnomalari boʻyicha oʻz majburiyatlarini soʻzsiz bajarishi ustidan qatʼiy nazorat oʻrnatsin.

4. Oʻzbekiston Respublikasi Qishloq va suv xoʻjaligi vazirligi, Qoraqalpogʻiston Respublikasi Vazirlar Kengashi, viloyatlar va tumanlar hokimliklari, “Oʻzdonmahsulot” aksiyadorlik kompaniyasi va uning joylardagi boʻlinmalari rahbarlari, “Oʻzstandart” agentligi va “Oʻzdavlatnoninspeksiya” 2018-yil hosili uchun boshoqli don ekinlari urugʻ fondini oʻz vaqtida va sifatli tashkil etishni taʼminlasin.

Davlat resurslariga bugʻdoy donini sotishning umumiy hajmida urugʻlik don topshirish, shuningdek, bugʻdoy donidan urugʻlik maqsadlarida foydalanish taqiqlansin.

5. “Oʻzdonmahsulot” AK Oʻzdavlatnoninspeksiya va Oʻzdavzaxiraqoʻmitasi bilan birgalikda “Oʻzdonmahsulot” AK tizimidagi elevatorlar va don qabul qiluvchi korxonalarda “nol” tozalash ishlarini amalga oshirilishini taʼminlasin va joriy yilning 15-iyuniga qadar oziq-ovqat bugʻdoyini inventarizatsiyadan oʻtkazish natijalarini Vazirlar Mahkamasiga taqdim etsin.

6. Oʻzbekiston Respublikasi Davlat statistika qoʻmitasi Qishloq va suv xoʻjaligi vazirligi, Iqtisodiyot vazirligi, “Oʻzdonmahsulot” AJ bilan birgalikda gʻalla yetishtirish va davlat resurslariga sotish hajmlari boʻyicha statistik hisobotlarning toʻgʻriligi ustidan qatʼiy nazorat oʻrnatsin. Hisobot maʼlumotlarini buzib koʻrsatish faktlari aniqlansa, aybdor shaxslarga nisbatan qonunchilik hujjatlariga muvofiq javobgarlik choralarini koʻrsin.

7. Oʻzbekiston Respublikasi Prezidentining 1997-yil 10-oktabrdagi “Tovarlar (ishlar, xizmatlar) eksportini ragʻbatlantirishga doir qoʻshimcha chora-tadbirlar toʻgʻrisida”gi PF-1871-son Farmoniga muvofiq, boshoqli don, un va non mahsulotlarini respublikadan olib chiqish taqiqlanganligi rahbarlik uchun qabul qilinsin.

Davlat bojxona qoʻmitasi Oʻzbekiston Respublikasi Milliy xavfsizlik xizmati Davlat chegarasini himoya qilish qoʻmitasi va Ichki ishlar vazirligi bilan birgalikda don, un va non mahsulotlarini respublika chegarasi orqali noqonuniy olib oʻtish holatlarining oldini olish va ularga chek qoʻyish boʻyicha qatʼiy choralar koʻrsin.

8. Oʻzbekiston Respublikasi Ichki ishlar vazirligi joriy yilning 1-iyunidan boshlab Oʻzbekiston Respublikasi Ichki ishlar vazirligi taʼlim muassasalarining 2017-yil hosilining boshoqli don ekinlarini yigʻib-terib olishga jalb etilgan tinglovchilari va kursantlari kontingentini oʻz hududiy boʻlinmalari boʻyicha taqsimotga muvofiq hududiy ichki ishlar boshqarmasiga yuborsin.

“Oʻzbekiston temir yoʻllari” AJ va “Toshshahartransxizmat” AJ Oʻzbekiston Respublikasi Ichki ishlar vazirligining talabiga binoan tinglovchilar va kursantlarni vaqtinchalik joylashtirish joylariga va yigʻim ishlari tugallangandan soʻng orqaga qaytarish uchun zarur miqdorda avtotransport vositalari ajratilishini taʼminlasin.

Jizzax, Qashqadaryo, Sirdaryo va Toshkent viloyatlari hokimliklari:

fermer xoʻjaliklari tomonidan “Oʻzbekiston temir yoʻllari” AJ va “Toshshahartransxizmat” AJ bilan Oʻzbekiston Respublikasi Ichki ishlar vazirligining tinglovchilari va kursantlarini oʻrim-yigʻim-terim ishlari yakunlanganidan soʻng ularni vaqtincha joylashtirish joylariga va qaytarib olib ketish xizmatlarini koʻrsatish boʻyicha tegishli shartnomalar tuzish;

tinglovchilar va kursantlarni vaqtincha turar joy, shuningdek, oziq-ovqat, transport va ularni tashish uchun yonilgʻi-moylash materiallarini fermer xoʻjaliklari hisobidan taʼminlasin.

9. Qoraqalpogʻiston Respublikasi Vazirlar Kengashi va viloyatlar hokimliklari Oʻzbekiston Respublikasi Ichki ishlar vazirligi bilan birgalikda don va gʻalla oʻrim-yigʻim texnikasini tashishda yoʻl harakati xavfsizligini taʼminlash, yongʻinlar sodir boʻlishining oldini olish, 2017-yil hosilida gʻallaning oʻgʻirlanishi va yoʻqolishining oldini olish boʻyicha zarur chora-tadbirlarni koʻrsin.

10. “Oʻzbekneftgaz” milliy xolding kompaniyasi va “Oʻzneftmahsulot” aksiyadorlik jamiyati qishloq xoʻjaligi ishlab chiqaruvchilari va transport tashkilotlarini, mashina-traktor parklarini hamda gʻalla yigʻim-terimi, tashish va tayyorlash bilan shugʻullanuvchi boshqa tashkilotlarni zarur zaxiralarni yaratib, belgilangan tartibda yoqilgʻi-moylash materiallari bilan uzluksiz taʼminlashni tashkil etsin.

11. Mazkur qarorning bajarilishini nazorat qilish Oʻzbekiston Respublikasining Bosh vaziri A.N. Aripov zimmasiga yuklatilsin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2017-yil 18-may,

PQ-2974-son