Koreya Respublikasi hukumatining granti ishtirokida “Past haroratli omborxonalarni joriy qilish orqali oʻzbekistonda qishloq xoʻjaligini rivojlantirishni qoʻllab-quvvatlash” loyihasini amalga oshirish chora-tadbirlari toʻgʻrisida (PQ-2987-son)

22.05.2017

Oʻzbekiston Respublikasi Prezidentining

Qarori

Meva-sabzavot mahsulotlarini saqlash boʻyicha zamonaviy texnologiyalarni joriy etish, shuningdek, Oʻzbekiston Respublikasi va Koreya Respublikasi oʻrtasida qishloq xoʻjaligi sohasidagi hamkorlikni yanada rivojlantirish maqsadida:

1. Koreya Respublikasi Hukumati tomonidan Oʻzbekiston Respublikasi Hukumatiga “Past haroratli omborxonalarni joriy qilish orqali Oʻzbekistonda qishloq xoʻjaligini rivojlantirishni qoʻllab-quvvatlash” loyihasini (bundan keyin — loyiha) amalga oshirishni moliyalashtirish uchun 3,5 million AQSH dollari miqdorida grant ajratilishi maʼqullanganligi maʼlumot uchun qabul qilinsin. Mazkur loyiha quyidagilarni nazarda tutadi:

Toshkent viloyatining Yuqori Chirchiq tumanida joylashgan Oʻzbekiston Respublikasi Qishloq va suv xoʻjaligi vazirligining “Agroinnovatsiya” davlat unitar korxonasi hududida maxsus sovutish uskunalari, materiallar va transport vositalarini yetkazib berish, shuningdek, umumiy hajmi 1000 tonna boʻlgan sovutish omborxonalarini qurish va ulardan foydalanish;

Oʻzbekiston Respublikasi Qishloq va suv xoʻjaligi vazirligining “Agroinnovatsiya” davlat unitar korxonasi tomonidan hoʻl meva-sabzavot mahsulotlarini saqlashni tashkil etish, shuningdek, sovutish kameralari quvvatlaridan samarali foydalanish maqsadida Toshkent viloyatining tadbirkorlik subyektlari, dehqon va fermer xoʻjaliklariga meva-sabzavot mahsulotlarini saqlash boʻyicha xizmatlar koʻrsatish;

meva-sabzavot mahsulotlarini saqlash boʻyicha zamonaviy texnologik uskunalarni joriy etish va ulardan yanada samarali foydalanish doirasida Oʻzbekiston mutaxassislariga ilgʻor tajribani oʻzlashtirishda, fermer xoʻjaliklari rahbarlari va mutaxassislarini oʻqitishda koʻmaklashish.

2. Oʻzbekiston Respublikasi Qishloq va suv xoʻjaligi vazirligi loyihani amalga oshirish, shuningdek, loyiha doirasida tashkil etiladigan past haroratli omborxonalaridan samarali va maqsadli foydalanish uchun masʼul ijro etuvchi organ etib belgilansin.

3. Oʻzbekiston Respublikasi Qishloq va suv xoʻjaligi vazirligi quyidagilarni taʼminlasin:

Koreya Respublikasi bilan kelishilgan muddatlarda Koreya Respublikasi Hukumatining grantini olish uchun barcha zarur tartib-qoidalarni bajarish;

loyihani 2016-yil 8-apreldagi Koreya Respublikasi Qishloq aholi punktlarini rivojlantirish Koreya korporatsiyasi va Oʻzbekiston Respublikasi Qishloq va suv xoʻjaligi vazirligi oʻrtasidagi muzokaralar bayonnomasiga muvofiq amalga oshirish;

mablagʻlardan samarali va maqsadli foydalanish, shuningdek, Koreya Respublikasi Hukumati granti hisobiga loyiha doirasida yetkazib beriladigan asbob-uskunalar va materiallarning bus-butun saqlanishini taʼminlash.

4. Quyidagilar:

Koreya Respublikasi Hukumati granti hisobiga loyiha doirasida xarid qilinadigan tovarlar (ishlar, xizmatlar) va transport vositalari bojxona toʻlovlari (bojxona rasmiylashtiruvi yigʻimlaridan tashqari), qoʻshilgan qiymat soligʻi, davlat maqsadli jamgʻarmalariga majburiy ajratmalar va yigʻimlardan;

loyiha doirasida Oʻzbekiston Respublikasi Vazirlar Mahkamasi huzuridagi Respublika yoʻl jamgʻarmasiga majburiy toʻlovlardan yetkazib beriladigan transport vositalari;

loyihani Oʻzbekiston Respublikasida amalga oshirishda ishtirok etayotgan Koreya Respublikasi fuqarolari jismoniy shaxslardan olinadigan daromad soligʻini toʻlashdan ozod qilinsin.

5. “Oʻzbekiston havo yoʻllari” milliy aviakompaniyasi va “Oʻzbekiston temir yoʻllari” AJ Koreya Respublikasi Hukumati granti doirasida kelib tushgan tovarlar va transport vositalarining Oʻzbekiston Respublikasi aeroportlari va temir yoʻl stansiyalarida yuklarga ishlov berish va ularni saqlash uchun haq undirmasdan ortish-tushirish ishlarini hamda ularning saqlanishini taʼminlasinlar.

6. Oʻzbekiston Respublikasi Tashqi ishlar vazirligi Qishloq va suv xoʻjaligi vazirligining buyurtmanomalariga binoan loyihani amalga oshirishda qatnashuvchi xorijiy mutaxassislarga kirish vizalari konsullik va boshqa yigʻimlari undirilmasdan rasmiylashtirilishini taʼminlasin.

7. Oʻzbekiston Respublikasi Ichki ishlar vazirligi Qishloq va suv xoʻjaligi vazirligining buyurtmanomalariga binoan loyihani amalga oshirishda qatnashuvchi xorijiy mutaxassislar uchun davlat boji undirilmasdan koʻp martalik vizalar berilishini va ularning muddati uzaytirilishini, shuningdek, Oʻzbekiston Respublikasida vaqtincha roʻyxatdan oʻtkazilishini va vaqtincha roʻyxatdan oʻtkazish muddati uzaytirilishini taʼminlasin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — Qishloq va suv xoʻjaligi vaziri Z.T. Mirzayev zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2017-yil 22-may,

PQ-2987-son