2018-yil uchun demokratik islohotlar va oʻzgarishlarning yangi yoʻnalishini samarali amalga oshirishning dolzarb masalalarini muhokama qilish yuzasidan xalqaro konferensiyalar, davra suhbatlari va seminarlarni tashkil etish va oʻtkazish chora-tadbirlari toʻgʻrisida (PQ-3602-son)

13.03.2018

Oʻzbekiston Respublikasi Prezidentining

Qarori

Oʻzbekiston Respublikasi Prezidentining 2018-yil 22-yanvardagi “2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini “Faol tadbirkorlik, innovatsion gʻoyalar va texnologiyalarni qoʻllab-quvvatlash yili”da amalga oshirishga oid davlat Dasturi hamda Oʻzbekiston Respublikasi Prezidentining Oʻzbekiston Respublikasi Oliy Majlisiga Murojaatnomasida belgilangan vazifalar ijrosini taʼminlash, ommaviy axborot vositalari, ilmiy-tadqiqot muassasalari tomonidan 2018-yil uchun demokratik islohotlar va oʻzgarishlarning yangi yoʻnalishini samarali amalga oshirishning dolzarb masalalarini muhokama qilish maqsadida tegishli davlat va boshqaruv organlari, jamoat tashkilotlari, ommaviy axborot vositalari, ilmiy-tadqiqot muassasalarining xalqaro konferensiyalar, davra suhbatlari va seminarlarni tashkil etish va oʻtkazish boʻyicha takliflari qoʻllab-quvvatlansin.

1. Quyidagilar xalqaro tadbirlarni oʻtkazishning asosiy maqsad va vazifalari etib belgilansin:

2017 — 2021-yillarda Oʻzbekiston Respublikasining rivojlanishining beshta ustuvor yoʻnalishi boʻyicha Harakatlar strategiyasi doirasida mamlakatda amalga oshirilayotgan islohotlarning maqsad va vazifalari, Oʻzbekiston Respublikasi Prezidentining Oliy Majlisga Murojaatnomasida belgilangan vazifalar hamda BMT, SHHT, MDH va IHT kabi xalqaro tashkilotlar doirasida ilgari surilgan Oʻzbekiston tashabbuslari haqida jahon hamjamiyatini xabardor qilish, uning xalqaro maydondagi yangi ijobiy imidjini shakllantirish va mustahkamlash;

yangilangan ichki va tashqi siyosatning ustuvor yoʻnalishlarini tushuntirish, jumladan, davlat boshqaruvi tizimini takomillashtirish, fuqarolik jamiyati institutlari va ommaviy axborot vositalarini har tomonlama qoʻllab-quvvatlash, inson huquqlari boʻyicha konstitutsiyaviy kafolatlarni yanada mustahkamlash, iqtisodiyotni modernizatsiya qilish va investitsiyaviy muhitni yaxshilash, tadbirkorlikni rivojlantirish, innovatsion gʻoya va texnologiyalarni joriy etish, kuchli ijtimoiy siyosat yuritish, ochiq va faol tashqi siyosiy hamda tashqi iqtisodiy faoliyatni amalga oshirish;

nufuzli xorijiy ilmiy, taʼlim, tahliliy, ilmiy-tadqiqot muassasalari, shuningdek, xorijiy davlatlarning parlamentlari, ijtimoiy-siyosiy doiralari va xalqaro tashkilotlari bilan oʻzaro manfaatli va konstruktiv aloqalarni oʻrnatish va kengaytirish;

xorijiy davlatlarning ilgʻor tajribasini oʻrganish va mamlakatni yanada isloh qilish bilan bogʻliq qonunchilik bazasini takomillashtirish, davlat va boshqaruv organlari, jamoat tashkilotlari va xoʻjalik birlashmalari amaliyotiga innovatsion rivojlanishning zamonaviy modellari, ilgʻor gʻoyalar, nou-xau va “smart” texnologiyalarni joriy etish boʻyicha takliflar ishlab chiqish;

xalqaro tadbirlar maydonidan Oʻzbekistonning iqtisodiy, investitsiyaviy va turistik salohiyati, shuningdek, madaniy-tarixiy merosini keng tarzda namoyish etish uchun samarali foydalanish.

2. 2018-yil uchun demokratik islohotlar va oʻzgarishlarning yangi yoʻnalishini samarali amalga oshirishning dolzarb masalalarini muhokama qilish yuzasidan xalqaro konferensiyalar, davra suhbatlari va seminarlar roʻyxati 1-ilovaga muvofiq tasdiqlansin.

3. Davlat hokimiyati va boshqaruv organlari, jamoat tashkilotlari, ilmiy-tadqiqot va taʼlim muassasalari hamda xalqaro tadbirlar boʻyicha masʼul ijrochi sifatida belgilangan xoʻjalik birlashmalariga ikki hafta muddatda xalqaro tadbirlarni tayyorlash va oʻtkazish boʻyicha tashkiliy qoʻmitalar tuzish, quyidagilarni ularning asosiy vazifalari etib belgilash topshirilsin:

xalqaro tadbirlarni tayyorlash va oʻtkazish boʻyicha amaliy chora-tadbirlar rejalarini, mazkur rejalar loyihalarida belgilangan aniq muddatlar va masʼul ijrochilarni koʻrsatgan holda ishlab chiqish va tasdiqlash;

xalqaro tadbirlarni yuqori saviyada oʻtkazishga qaratilgan tayyorgarlik va tashkiliy masalalarning toʻliq kompleksini taʼminlash boʻyicha chora-tadbirlarni oʻz vaqtida amalga oshirish;

bir oy muddatda xalqaro tadbirlarni oʻtkazish uchun aniq sanalar va joylarni ishlab chiqish va belgilash;

xalqaro tadbirlarning kun tartibi, konsepsiyalari, dasturlari, shuningdek yakuniy hujjatlari loyihalarini har tomonlama va sifatli tayyorlash;

nufuzli xorijiy va milliy mutaxassislar va ekspertlar orasidan tadbirlar ishtirokchilari tarkibini aniqlash va puxta shakllantirish;

boʻlajak tadbirlarni moliyalashtirishning qoʻshimcha manbalarini rivojlantirish, xorijiy sheriklar va xalqaro tashkilotlarning moliyaviy va texnik imkoniyatlarini jalb qilish;

dasturning xalqaro tadbirlarini oʻtkazishdan 2 oy oldin, xarajatlar smetasini hamda xalqaro konferensiyalar, davra suhbatlari va seminarlar ishtirokchilari roʻyxatini ishlab chiqish va Oʻzbekiston Respublikasi Vazirlar Mahkamasiga belgilangan tartibda tasdiqlash uchun taqdim etish;

boʻlajak xalqaro tadbirlarning maqsad va vazifalari hamda kutilayotgan natijalarni keng eʼlon qilish;

xalqaro tadbirlarni milliy va xorijiy ommaviy axborot vositalarida yoritilishini tashkil etish, xalqaro konferensiyalar, davra suhbatlari va seminarlar materiallarining chop etilishini taʼminlash;

xalqaro tadbirlarni umumlashtirish va natijalarini Oʻzbekiston Respublikasi Prezidenti huzuridagi Strategik va mintaqalararo tadqiqotlar institutiga yuborish.

4. Roʻyxatda nazarda tutilgan tadbirlarni tashkil etish uchun masʼul vazirlik va idoralarning oʻzaro hamkorligini muvofiqlashtirish va taʼminlash, ularning samaradorligi va oshirish maqsadida Oʻzbekiston Respublikasi Oliy Majlisi Senati Raisining birinchi oʻrinbosari S. Safoyev hamda Inson huquqlari boʻyicha Oʻzbekiston Respublikasi Milliy markazi direktori A.A. Saidovlar boshchiligidagi tarkibi 2-ilovaga tasdiqlangan xalqaro tadbirlarga tayyorgarlik koʻrish va ularni oʻtkazish boʻyicha Muvofiqlashtiruvchi guruh tashkil etilsin.

5. Tashkiliy qoʻmitalarga roʻyxatda koʻrsatilmagan, biroq xalqaro konferensiyalarga tayyorgarlik koʻrish va ularni oʻtkazishda yordam berishga tayyor boʻlgan boshqa xalqaro va xorijiy tashkilotlarni hamtashkilotchi sifatida jalb qilishga ruxsat berilsin.

6. Tavsiya qilinadi:

Xalqaro press-klub tomonidan milliy va xorijiy ishtirokchilar ishtirokidagi xalqaro tadbirlardan soʻng ularning natijalarini jahon hamjamiyatiga yetkazish maqsadida matbuot anjumanlarini oʻtkazish tavsiya etilsin.

Xalqaro press-klub tomonidan milliy va xorijiy ishtirokchilar ishtirokidagi xalqaro tadbirlardan soʻng ularning natijalarini jahon hamjamiyatiga yetkazish maqsadida matbuot anjumanlarini oʻtkazish.

7. Iqtisodiyot vazirligi, Tashqi savdo vazirligi, Turizmni rivojlantirish davlat qoʻmitasi, Oʻzbekiston Respublikasi Investitsiyalar boʻyicha davlat qoʻmitasi, Savdo-sanoat palatasi va “Taraqqiyot strategiyasi” markazi xalqaro tadbirlar vaqtida tarqatish uchun tegishli taqdimot va tarqatma materiallar tayyorlanishini taʼminlasin.

8. Oʻzbekiston Respublikasi Prezidenti huzuridagi Strategik va mintaqalararo tadqiqotlar instituti:

tashkiliy qoʻmitalarga xalqaro tadbirlarning kun tartibi, konsepsiyalari, dasturlari va yakuniy hujjatlari loyihalarini sifatli tayyorlashda yordam koʻrsatilishi;

xalqaro tadbirlar materiallarini toʻplash, umumlashtirish va chuqur tahlil qilish, ularning natijalaridan mamlakatni demokratlashtirish va modernizatsiya qilish jarayonida foydalanish imkoniyati boʻyicha takliflar ishlab chiqish;

oʻzaro manfaatli hamkorlikni yoʻlga qoʻyish va rivojlantirish uchun xalqaro va xorijiy ekspertlar hamda tashkilotlarning maʼlumotlar bazasini shakllantirilishini taʼminlasin.

9. Oʻzbekiston Respublikasi Tashqi ishlar vazirligi masʼul ijrochilarga xalqaro va xorijiy tashkilotlar bilan birgalikda forumlarga tayyorgarlik koʻrish va ularni oʻtkazish masalalarini ishlab chiqishda koʻmaklashsin.

10. Mazkur qarorning ijrosini nazorat qilish Oʻzbekiston Respublikasi Prezidenti huzuridagi Xavfsizlik kengashi kotibi V.V. Mahmudov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2018-yil 13-mart,

PQ-3602-son

Oʻzbekiston Respublikasi Prezidentining 2018-yil 13-martdagi PQ-3602-son qaroriga 1-ILOVA

2018-yil uchun demokratik islohotlar va oʻzgarishlarning yangi yoʻnalishini samarali amalga oshirishning dolzarb masalalarini muhokama qilish yuzasidan xalqaro konferensiyalar, davra suhbatlari va seminarlar

ROʻYXATI

Oʻzbekiston Respublikasi Prezidentining 2018-yil 13-martdagi PQ-3602-son qaroriga 2-ILOVA

Xalqaro tadbirlarga tayyorgarlik koʻrish va ularni oʻtkazish boʻyicha muvofiqlashtiruvchi guruh

TARKIBI