Buyuk allomalar, adib va mutafakkirlarimiz ijodiy merosini keng oʻrganish va targʻib qilish maqsadida yoshlar oʻrtasida kitobxonlik tanlovlarini tashkil etish toʻgʻrisida (PQ-3721-son)

12.05.2018

Oʻzbekiston Respublikasi Prezidentining

Qarori

Bugungi kunda mamlakatimizda 2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasi asosida barcha soha va tarmoqlarda ulkan oʻzgarishlar amalga oshirilmoqda. Bu borada jamiyat hayotida ezgu qadriyat va anʼanalarni chuqur qaror toptirishga, xususan, xalqimiz, ayniqsa, yosh avlodning maʼnaviy-intellektual salohiyati, ongu tafakkuri va dunyoqarashini yuksaltirish, ularning qalbida ona Vatanimiz hamda xalqimizga muhabbat va sadoqat tuygʻusini kuchaytirish, barkamol shaxsni tarbiyalashda beqiyos ahamiyatga ega boʻlgan kitobxonlik madaniyatini oshirishga alohida eʼtibor qaratilmoqda.

Qadimiy va betakror diyorimizdan yetishib chiqqan buyuk alloma, adib va mutafakkirlarimizning yuksak gumanistik gʻoyalarga asoslangan boy maʼnaviy merosi umumbashariy sivilizatsiya va madaniyat, dunyoviy va diniy ilm-fan taraqqiyotiga ulkan hissa boʻlib qoʻshilgani dunyo jamoatchiligi tomonidan haqli ravishda eʼtirof etiladi.

Ulugʻ ajdodlarimizning aql-zakovati va badiiy dahosi bilan yaratilgan noyob asarlar, xususan, matematika, mineralogiya, astronomiya, kimyo, tibbiyot, farmatsevtika, meʼmorlik, tarix, adabiyot, sanʼat, ilohiyot, falsafa va boshqa sohalarga oid manbalar nafaqat bizning xalqimiz, balki jahon ahlining bebaho boyligi hisoblanadi.

Ana shunday beqiyos merosimiz asosida tashkil etilgan “Yosh kitobxon” tanlovida 250 ming nafarga yaqin yosh ishtirok etib, tanlov gʻoliblariga “Prezident sovgʻasi” — yengil avtomashina topshirilgani yoshlar oʻrtasida kitobxonlik madaniyati rivojlanishiga muhim taʼsir oʻtkazdi.

Buyuk adib va mutafakkirlarimizning nodir merosi, ibratli hayoti va ijtimoiy faoliyatini har tomonlama chuqur oʻrganish va targʻib etish, yoshlarimizni oʻzlikni anglash, milliy va umuminsoniy qadriyatlarga hurmat ruhida tarbiyalash, ular oʻrtasida kitobxonlik madaniyatini keng ommalashtirish maqsadida:

1. Oʻzbekiston yoshlar ittifoqi, Oʻzbekiston Matbuot va axborot agentligi, Oʻzbekiston Respublikasi Oliy va oʻrta maxsus taʼlim vazirligi, Xalq taʼlimi vazirligi, Oʻzbekiston Yozuvchilar uyushmasi, Respublika Maʼnaviyat va maʼrifat markazi hamda jamoatchilik vakillarining mamlakatimiz yoshlari oʻrtasida oʻtkazilgan kitobxonlik tanlovlarini ijobiy baholagan holda, ushbu tanlovlarni oʻtkazish tizimini yanada takomillashtirish toʻgʻrisidagi takliflari maʼqullansin.

2. Buyuk alloma, adib va mutafakkirlarimiz ijodiy merosini keng oʻrganish va targʻib qilish maqsadida yoshlar oʻrtasida “Yosh kitobxon” tanlovini (keyingi oʻrinlarda tanlov deb ataladi) oʻtkazish boʻyicha tashkiliy qoʻmita tarkibi ilovaga muvofiq tasdiqlansin.

3. Belgilab qoʻyilsinki:

a) tanlovni oʻtkazish bilan bogʻliq xarajatlar Oʻzbekiston yoshlar ittifoqining rivojlantirish jamgʻarmasi mablagʻlari va qonun hujjatlarida taqiqlanmagan boshqa manbalar hisobidan moliyalashtiriladi;

b) tanlovni yuqori saviyada oʻtkazish uchun:

Oʻzbekiston Matbuot va axborot agentligi, Oʻzbekiston yoshlar ittifoqi, Oʻzbekiston Respublikasi Oliy va oʻrta maxsus taʼlim vazirligi, Xalq taʼlimi vazirligi tashkiliy-amaliy ishlar boʻyicha;

Oʻzbekiston Yozuvchilar uyushmasi, Respublika Maʼnaviyat va maʼrifat markazi, Alisher Navoiy nomidagi Toshkent davlat oʻzbek tili va adabiyoti universiteti ilmiy-ijodiy ishlar boʻyicha masʼul tashkilotlar hisoblanadi.

4. Oʻzbekiston Matbuot va axborot agentligi Oʻzbekiston yoshlar ittifoqi, Oʻzbekiston Respublikasi Oliy va oʻrta maxsus taʼlim vazirligi, Xalq taʼlimi vazirligi, Oʻzbekiston Yozuvchilar uyushmasi, Respublika Maʼnaviyat va maʼrifat markazi bilan birgalikda oʻn kun muddatda “Yosh kitobxon” tanlovini oʻtkazish tartibi toʻgʻrisidagi nizomni ishlab chiqsin va belgilangan tartibda tasdiqlasin.

5. Mazkur Nizomda:

buyuk alloma, adib va mutafakkirlarimizning merosini chuqur oʻrganish maqsadida alohida nominatsiyalar boʻyicha tanlovlar tashkil etish;

2018-yilgi tanlovlarni Vatanimiz tarixi va xalqimizning maʼnaviy hayotida beqiyos oʻrin tutadigan Abu Rayhon Beruniy, Abu Ali ibn Sino, Mirzo Ulugʻbek, Alisher Navoiy, Zahiriddin Muhammad Bobur, Muhammad Rizo Ogahiy, Berdaq singari buyuk mutafakkirlarimiz ijodi va faoliyati, jahon adabiyotining durdona asarlari, shuningdek, “Alpomish”, “Goʻroʻgʻli”, “Kuntugʻmish” kabi xalq dostonlari boʻyicha oʻtkazish;

keyingi tanlovlarni davrlashtirgan holda davom ettirish uchun tegishli roʻyxatlarni shakllantirish;

tanlov gʻoliblarini mukofotlash va ragʻbatlantirishning aniq mexanizmlarini ishlab chiqish, xususan, respublika bosqichida birinchi oʻrinni egallagan qatnashchilarni yengil avtomobillar bilan taqdirlash, ikkinchi va uchinchi oʻrin sohiblari va faol ishtirokchilarni ham munosib ragʻbatlantirish choralari nazarda tutilsin.

6. Oʻzbekiston Matbuot va axborot agentligi tanlov nominatsiyalarida belgilangan buyuk alloma, adib va mutafakkirlarimizning asarlarini, ularning hayoti va faoliyatiga oid kitob va risolalarni nashrga tayyorlash, chop etish hamda taʼlim muassasalari kutubxonalariga, tegishli veb-saytlarga, axborot-resurs markazlari va keng oʻquvchilar ommasiga yetkazish choralarini koʻrsin.

7. Oʻzbekiston Milliy teleradiokompaniyasi, Oʻzbekiston Milliy axborot agentligi va boshqa ommaviy axborot vositalariga ushbu qaror ijrosi bilan bogʻliq tadbirlarni keng yoritish tavsiya etilsin.

8. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov, Oʻzbekiston Respublikasi Prezidentining Davlat maslahatchilari X.M. Sultonov va Q.K. Quranboyev zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2018-yil 12-may,

PQ-3721-son

Oʻzbekiston Respublikasi Prezidentining 2018-yil 12-maydagi PQ-3721-son qaroriga ILOVA

Buyuk allomalar, adib va mutafakkirlarimiz ijodiy merosini keng oʻrganish va targʻib qilish maqsadida yoshlar oʻrtasida “Yosh kitobxon” tanlovlarini oʻtkazish boʻyicha tashkiliy qoʻmita

TARKIBI

1. A. Aripov — Oʻzbekiston Respublikasining Bosh vaziri, tashkiliy qoʻmita raisi 2. X. Sultonov — Oʻzbekiston Respublikasi Prezidentining Davlat maslahatchisi, tashkiliy qoʻmita raisi oʻrinbosari 3. Q. Quranbayev — Oʻzbekiston Respublikasi Prezidentining Davlat maslahatchisi — Oʻzbekiston Yoshlar ittifoqi Markaziy kengashi raisi, tashkiliy qoʻmita raisi oʻrinbosari 4. I. Majidov — Oʻzbekiston Respublikasi Oliy va oʻrta maxsus taʼlim vaziri 5. U. Inoyatov — Oʻzbekiston Respublikasi Xalq taʼlimi vaziri 6. B. Sayfullayev — Oʻzbekiston Respublikasi Madaniyat vaziri 7. L. Tangriyev — Oʻzbekiston Matbuot va axborot agentligi bosh direktori 8. A. Xadjayev — Oʻzbekiston Milliy teleradiokompaniyasi raisi vazifasini bajaruvchi 9. A. Koʻchimov — Oʻzbekiston Milliy axborot agentligi bosh direktori 10. Sh. Sirojiddinov — A. Navoiy nomidagi Toshkent davlat oʻzbek tili va adabiyoti universiteti rektori 11. S. Saidov — Oʻzbekiston Yozuvchilar uyushmasi raisi 12. A. Qodirov — Respublika Maʼnaviyat va maʼrifat markazi rahbari 13. O. Tadjiyev — Oʻzbekiston Yoshlar ittifoqi Markaziy kengashi raisining birinchi oʻrinbosari

Izoh: Tashkiliy qoʻmita aʼzolari boshqa ishga oʻtganda uning tarkibiga ushbu lavozimga yangidan tayinlangan yoki zimmasiga tegishli vazifalarni bajarish yuklangan shaxslar kiritiladi.