“OʻzDEUbank” Oʻzbekiston-Koreya qoʻshma bankini tashkil etish toʻgʻrisida (359-son)

17.10.1996

Oʻzbekiston Respublikasi Vazirlar Mahkamasining

qarori

Oʻzbekiston Respublikasi iqtisodiyotiga xorijiy investitsiyalarni jalb etish maqsadida Vazirlar Mahkamasi qaror qiladi:

1. “DEU Sikyuritiz” kompaniyasi, Koreyaning “Koram bank” banki, Oʻzbekiston Respublikasi Tashqi iqtisodiy faoliyat milliy banki va “Turon” konsolidatsiya aksionerlik-tijorat bankining “OʻzDEUbank” Oʻzbekiston — Koreya qoʻshma bankini tashkil etish toʻgʻrisidagi taklifi qabul qilinsin.

2. “OʻzDEUbank”ning ustav sarmoyasi 20 mln. AQSh dollariga teng summada, shu jumladan xorijiy tomonning ulushi — 90 foiz (“DEU Sikyuritiz” — 55%, “Koram bank” — 10%, YTTB — 25%) va Oʻzbekiston tomoni ulushi — 10 foiz (Tashqi iqtisodiy faoliyat milliy banki — 5%, “Turon” banki — 5%) miqdorida belgilanganligi maʼlumot uchun qabul qilinsin.

3. Belgilab qoʻyilsinki, “OʻzDEUbank” Oʻzbekiston Respublikasining yuridik shaxsi hisoblanadi hamda oʻz faoliyatini Oʻzbekiston Respublikasi qonun hujjatlariga va Oʻzbekiston Respublikasi Markaziy bankining normativ hujjatlariga muvofiq amalga oshiradi.

4. “OʻzDEUbank” muassislari Oʻzbekiston Respublikasi Markaziy bankining litsenziyasi olingan paytgacha bankning ustav sarmoyasiga taʼsis badallari toʻlasinlar.

5. “OʻzDEUbank” 1997-yil 31-dekabrgacha foydadan olinadigan soliqni toʻlashdan ozod qilinsin.

6. Oʻzbekiston Respublikasi Markaziy bankiga va Toshkent shahar hokimiga bankning tashkil etilishi, joylashtirilishi, faoliyat koʻrsatishi va uni malakali mutaxassislar bilan taʼminlash bilan bogʻliq masalalarni hal etishda amaliy yordam koʻrsatish tavsiya etilsin.

7. Oʻzbekiston Respublikasi Vazirlar Mahkamasining “OʻzDEUbank” Oʻzbekiston — Koreya qoʻshma bankini tashkil etish toʻgʻrisida” 1995-yil 27-iyundagi 238-son qarori oʻz kuchini yoʻqotgan deb hisoblansin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.S. Hamidov va Oʻzbekiston Respublikasi Markaziy banki raisi F.M. Mullajonov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1996-yil 17-oktabr,

359-son