“Ezgu maqsad” xalqaro xayriya jamoat fondini tashkil etish toʻgʻrisida (PQ-3135-son)

14.07.2017

Oʻzbekiston Respublikasi Prezidentining

Qarori

Oʻzbekistonda “Islohot — islohot uchun emas, inson manfaatlari uchun” tamoyili eʼlon qilingan va amaliyotga joriy etilmoqda. Shu maqsadda fuqarolarni ijtimoiy muhofaza qilish, jamiyatning himoyaga muhtoj qatlamlarini, yetim bolalar va ota-ona qaramogʻidan mahrum boʻlgan bolalarni, imkoniyati cheklangan shaxslarni qoʻllab-quvvatlash boʻyicha izchil va manzilli davlat siyosatini amalga oshirish masalalariga alohida eʼtibor qaratilmoqda.

Bugungi kunda Oʻzbekiston Respublikasi Davlat budjetining qariyb 60 foizi ijtimoiy sohaga yoʻnaltirilmoqda. Sogʻliqni saqlash va fuqarolarni ijtimoiy muhofaza qilishning yangi tizimini shakllantirish, nogironlarga tibbiy xizmat koʻrsatish va ularni reabilitatsiya qilish darajasini oshirishga, jamiyatning yetarlicha himoya qilinmagan va ehtiyojmand qatlamlarini davlat tomonidan maqsadli koʻllab-quvvatlash, ularga ixtisoslashtirilgan, yuqori texnologiyali tibbiy yordam koʻrsatish va taqdim etilayotgan ijtimoiy xizmatlar sifatini yanada yaxshilashga yoʻnaltirilgan kompleks ishlar amalga oshirilmoqda.

Davlat ijtimoiy dasturlarining amalga oshirilishi natijasida oʻtgan davrda aholi salomatligi sezilarli darajada mustahkamlandi, onalar oʻlimi — 3,2, bolalar oʻlimi — 3,4 barobar kamaydi, oʻrtacha umr koʻrish darajasi 66 yoshdan 74 yoshgacha, ayollar oʻrtasida esa 76 yoshgacha uzaydi.

Mamlakatimizda kuchli ijtimoiy siyosatni amalga oshirishda davlat muassasalari bilan birgalikda “Mahalla”, “Nuroniy”, “Sogʻlom avlod uchun” jamgʻarmalari, Oʻzbekiston Xotin-qizlar qoʻmitasi va boshqa koʻplab nodavlat notijorat tashkilotlari ijtimoiy sheriklik mexanizmlari asosida muvaffaqiyatli faoliyat yuritmoqda.

Ular jamiyat va davlatning barqaror, izchil rivojlanishi, aholi farovonligini oshirish hamda hayot sifatini yaxshilash, oila salomatligini mustahkamlash, onalik va bolalikni muhofaza qilish, aholining himoyaga muhtoj qatlamlarining sifatli tibbiy xizmatlardan foydalanish imkoniyatlarini kengaytirish, fuqarolar, jumladan, imkoniyati cheklangan shaxslarga ijtimoiy xizmat koʻrsatish tizimini yaxshilash, kam taʼminlangan oilalarni moddiy koʻllab-quvvatlashga koʻmaklashmoqda.

Aholining himoyaga muhtoj qatlamlarini ijtimoiy muhofaza qilish tizimini yanada takomillashtirish, ularning mamlakat ijtimoiy-siyosiy hayotida toʻlaqonli ishtirok etishlari uchun zarur shart-sharoitlar yaratish maqsadida, insonparvarlik tamoyillari, shuningdek, 2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini Xalq bilan muloqot va inson manfaatlari yilida amalga oshirishga oid Davlat dasturida belgilangan vazifalardan kelib chiqib:

1. “Xorazm shakar” aksiyadorlik jamiyati, “Angren shakar” masʼuliyati cheklangan jamiyati va qator xorijiy kompaniyalarning “Ezgu maqsad” xalqaro xayriya jamoat fondini (keyingi oʻrinlarda — Fond) tashkil etish toʻgʻrisidagi tashabbusi qoʻllab-quvvatlansin.

2. Quyidagilar Fondning asosiy vazifalari etib belgilanishi maʼlumot uchun qabul qilinsin:

birinchi — aholining himoyaga muhtoj qatlamlari, avvalo, bemor va nogiron bolalar salomatligini muhofaza qilish, ularga tibbiy yordam koʻrsatish sifatini oshirishni taʼminlash, ijtimoiy ahamiyatga ega kasalliklarni erta aniqlash, ularni profilaktika qilish va davolash, nogironlikni reabilitatsiya qilish va oldini olish, jamiyatda sogʻlom turmush tarzi madaniyatini rivojlantirish boʻyicha samarali ishlarni tashkil etishga koʻmaklashish;

ikkinchi — yetim bolalar va ota-ona qaramogʻidan mahrum boʻlgan yoki xavfli guruhga kiradigan bolalar, “Mehribonlik” uylari, “Gʻamxoʻrlik” markazlari, Ijtimoiy qoʻllab-quvvatlash markazlari va ixtisoslashtirilgan taʼlim muassasalari tarbiyalanuvchilariga yordam berishga yoʻnaltirilgan kompleks chora-tadbirlarni amalga oshirish, ularning ijtimoiy moslashuviga koʻmaklashish;

uchinchi — aholining ijtimoiy himoyaga muhtoj qatlamlari, koʻp bolali oilalarni koʻllab-quvvatlash, mahallalarda ijtimoiy infratuzilmani rivojlantirish, aholi genofondini yaxshilash, sogʻlom va barkamol avlodni shakllantirish borasida fuqarolarning oʻzini oʻzi boshqarish organlari va nodavlat notijorat tashkilotlari bilan oʻzaro hamkorlik qilish;

toʻrtinchi — xalqaro hamkorlikni rivojlantirish va kengaytirish, Oʻzbekiston Respublikasining yuridik va jismoniy shaxslari, xorijiy fuqarolar va tashkilotlar, fuqaroligi boʻlmagan shaxslar, xalqaro tashkilotlarning xayriya mablagʻlarini jalb etish va jamlash boʻyicha faol ishlarni amalga oshirish, Fondning asosiy vazifalariga muvofiq ulardan Fond xayriya dasturlarini (keyingi oʻrinlarda — Fond xayriya dasturlari) amalga oshirish uchun maqsadli foydalanilishini taʼminlash.

3. “Ezgu maqsad” xalqaro xayriya jamoat fondining tuzilmasi va Vasiylik kengashi tarkibi 1- va 2-ilovalarga muvofiq maʼqullansin hamda kuyidagilar Vasiylik kengashining asosiy vazifalari etib belgilansin:

aholining ijtimoiy himoyaga muhtoj qatlamlarini muhofaza qilishning normativ-huquqiy bazasi, iqtisodiy va huquqiy kafolatlarini takomillashtirish boʻyicha tavsiyalar ishlab chiqish;

Fond smetasi, buxgalteriya balansi va moliyaviy hisobotini tasdiqlash;

Fond mablagʻlari, jumladan, Fond xayriya dasturlarini moliyalashtirishga yoʻnaltiriladigan mablagʻlarini hisobga olish, samarali taqsimlashni tashkil etish va ulardan maqsadli hamda unumli foydalanilishini nazorat qilish;

Fond faoliyatining oshkoraligi, ochiqligi va shaffofligini taʼminlash;

qonun hujjatlari va Fond ustaviga muvofiq boshqa vazifalarni hal etish.

4. Fondning asosiy mablagʻlari jismoniy va yuridik shaxslar, shu jumladan, xorijiy fuqarolar va tashkilotlarning xayriya yordami hamda qonun hujjatlarida taqiqlanmagan boshqa mablagʻlar hisobidan shakllantirilishi;

Fondning bank hisob raqamlari Oʻzbekiston Respublikasining yuridik va jismoniy shaxslari, xorijiy yuridik va jismoniy shaxslar, fuqaroligi boʻlmagan shaxslar, shuningdek, xalqaro tashkilotlarning xayriya mablagʻlari uchun doimo ochiq ekanligi;

Fond ijro apparati Fondning oʻz mablagʻlari hisobidan taʼminlanishi, xayriya yordami shaklida olingan mablagʻlar bundan mustasno ekanligi maʼlumot uchun qabul qilinsin.

5. Fondga istisno tariqasida:

Fond xayriya dasturlarini amalga oshirish uchun jalb etiladigan xorijiy fuqarolar — mutaxassislarni mehmonxona va boshqa joylarda joylashtirish xizmatlari uchun toʻlovlarni milliy valyutada toʻlashga ruxsat etilsin.

6. Fond soliqlarning barcha turlari va davlat maqsadli jamgʻarmalariga majburiy ajratmalardan, Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasiga majburiy ajratmalar bundan mustasno;

Fond xayriya dasturlarini amalga oshirish doirasida belgilangan tartibda tasdiqlanadigan roʻyxatlar boʻyicha Fond tomonidan chetdan keltiriladigan tovarlar bojxona toʻlovlaridan (bojxona rasmiylashtiruvi yigʻimlari bundan mustasno) ozod qilinsin.

7. Fondga uning xayriya dasturlarini amalga oshirishga koʻmaklashish davlat va xoʻjalik boshqaruvi organlari, shuningdek, joylardagi ijro hokimiyati organlari rahbarlarining fuqarolik burchi hisoblanadi.

Oʻzbekiston Respublikasi Sogʻliqni saqlash vazirligi, “Mahalla” fondi va boshqa nodavlat notijorat tashkilotlariga Fond xayriya dasturlari amalga oshirilishini taʼminlashda Fond bilan faol hamkorlik qilish tavsiya etilsin.

8. “Oʻzbekiston havo yoʻllari” MAK va “Oʻzbekiston temir yoʻllari” AJ Fond xayriya dasturlari ishtirokchilari boʻlgan shaxslarni, Fond yuklari va tovarlarini imtiyozli tariflar boʻyicha tashish va joʻnatish, shuningdek, Fond yuk va tovarlari aeroportlar xamda temir yoʻl stansiyalarida saqlash davrida toʻlov undirilmasdan saqlanishini taʼminlasin.

9. Oʻzbekiston Respublikasi Tashki ishlar vazirligi:

Fondga xalqaro munosabatlarni amalga oshirish va xorijdagi shunday fond va tashkilotlar bilan aloqa oʻrnatish, YUNISEF, Qizil Xoch, BMT Missiyalari hamda boshqa xalqaro tashkilotlarning vakolatxonalari bilan bitimlar tuzishda har tomonlama yordam koʻrsatsin;

Fond buyurtmalari asosida Fond xayriya dasturlarini amalga oshirishda ishtirok etadigan xorijiy mutaxassislarga kirish vizalari konsullik va boshqa yigʻimlar undirilmasdan rasmiylashtirilishini taʼminlasin.

10. Oʻzbekiston Respublikasi Ichki ishlar vazirligi Fond buyurtmalari asosida Fond xayriya dasturlarini amalga oshirishda ishtirok etadigan xorijiy mutaxassislarga davlat boji undirilmasdan koʻp martalik kirish vizalari berilishi va ularning muddati uzaytirilishi, shuningdek, ularning yashash joyida vaqtincha roʻyxatdan oʻtkazilishi va vaqtincha roʻyxatdan oʻtkazish muddati uzaytirilishini taʼminlasin.

11. Oʻzbekiston Respublikasi Bandlik va mehnat munosabatlari vazirligi Fond buyurtmalari asosida Fond xayriya dasturlarini amalga oshirishda ishtirok etadigan xorijiy mutaxassislarni jalb qilishga Oʻzbekiston Respublikasida mehnat faoliyati uchun ruxsatnomalarni rasmiylashtirgani uchun toʻlov undirmasdan ruxsatnomalar berilishini (uzaytirilishini) taʼminlasin.

12. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi Fondni zarur aloqa vositalari, jumladan, hukumat aloqasi bilan belgilangan tartibda taʼminlasin.

13. Ommaviy axborot vositalariga Fond faoliyatini keng yoritish tavsiya etilsin.

14. Oʻzbekiston Respublikasi Adliya vazirligi bir oy muddatda “Ezgu maqsad” xalqaro xayriya jamoat fondini qonun hujjatlarida belgilangan tartibda roʻyxatdan oʻtkazsin.

15. Mazkur qaror ijrosini nazorat qilish Oʻzbekiston Respublikasining Bosh vaziri A.N. Aripov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2017-yil 14-iyul,

PQ-3135-son

Oʻzbekiston Respublikasi Prezidentining 2017-yil 14-iyuldagi PQ-3135-sonli qaroriga 1-ILOVA

“Ezgu maqsad” xalqaro xayriya jamoat fondining

TASHKILIY TUZILMASI

Izoh: Fond tashkiliy tuzilmasi Fond ustaviga muvofiq taʼsischilarning qarori asosida oʻzgartirilishi mumkin.

Oʻzbekiston Respublikasi Prezidentining 2017-yil 14-iyuldagi PQ-3135-sonli qaroriga 2-ILOVA

“Ezgu maqsad” xalqaro xayriya jamoat fondi Vasiylik kengashining

TARKIBI

Izoh. Vasiylik kengashi aʼzolari boshqa ishga oʻtgan taqdirda uning tarkibiga ushbu lavozimlarga yangi tayinlangan yoki zimmasiga tegishli vazifalarni bajarish yuklangan shaxslar kiritiladi.