Iqtisodiyot tarmoqlarida fuqaro aviatsiyasining uchuvchisiz uchish apparatlaridan maqsadli va samarali foydalanish chora-tadbirlari toʻgʻrisida (PQ-3639-son)

29.03.2018

Oʻzbekiston Respublikasi Prezidentining

Qarori

Keyingi yillar amaliyoti fuqaro aviatsiyasining uchuvchisiz uchish apparatlaridan maqsadli foydalanish davlat va xoʻjalik boshqaruvi organlari oldida turgan vazifalar samarali bajarilishiga, shu jumladan, yer fondining operativ monitoringini olib borish va yerdan, uzoqqa choʻzilgan obyektlardan (temir yoʻllar, quvurlar va shu kabilardan) nooqilona foydalanish holatlarini aniqlash sohalarida, qurilish ishlarini va boshqa ishlarni bajarishda xavfsizlik talablarini taʼminlashda sezilarli darajada koʻmaklashishini koʻrsatdi, shaharsozlikda ishlarni va geoaxborot xaritalarini yaratishni optimallashtiradi. Favqulodda vaziyatlarning oldini olish va oqibatlarini bartaraf etishda uchuvchisiz uchish apparatlari katta ahamiyat kasb etadi.

Shu bilan birga uchuvchisiz uchish apparatlarining keng koʻlamli turlarini ishlab chiqarish, qoʻyilgan vazifalarga muvofiq foydalanilayotgan modellar va ixtisoslashtirilgan funksiyalarning xilma-xilligi uchuvchisiz uchish apparatlarining narxiga jiddiy taʼsir koʻrsatmoqda. Uchuvchisiz uchish apparatlari narxlari shakllanishini tahlil qilish narxning asosiy ulushi konstruktiv elementlarga emas, balki intellektual qismga (dasturiy taʼminotga) toʻgʻri kelishini koʻrsatmoqda. Uchuvchisiz uchish apparatlari ishlab chiqarishni mahalliylashtirish ularning qiymatini pasaytirish imkonini beribgina qolmay, balki valyuta mablagʻlarini tejash imkoniyatini ham beradi.

Bugungi kunda uchuvchisiz uchish apparatlaridan foydalanishni tartibga soluvchi bir qator normativ-huquqiy hujjatlar, shu jumladan, Oʻzbekiston Respublikasi Vazirlar Mahkamasining “Oʻzbekiston Respublikasining samoviy hududida uchuvchisiz uchish apparatlaridan ruxsatsiz foydalanishning oldini olish chora-tadbirlari toʻgʻrisida” 2014-yil 26-noyabrdagi 322-sonli va “Oʻzbekiston Respublikasi fuqaro va davlat aviatsiyasining uchuvchisiz uchish apparatlaridan foydalanish tartibi toʻgʻrisidagi Nizomni tasdiqlash haqida” 2016-yil 31-avgustdagi 287-sonli qarorlari qabul qilingan. Ayrim tashkilotlar tomonidan qishloq xoʻjaligi va shaharsozlik maqsadlari uchun uchuvchisiz uchish apparatlari olib kelingan va ulardan samarali foydalanilmoqda.

Ilmiy-tadqiqot va tajriba-konstruktorlik ishlarini yanada rivojlantirish, konstruktiv elementlarni bosqichma-bosqich mahalliylashtirish va fuqaro aviatsiyasiga tegishli boʻlgan uchuvchisiz uchish apparatlaridan foydalanish uchun dasturiy taʼminotni ishlab chiqish, shuningdek, iqtisodiyot tarmoqlaridagi maqsadli vazifalarni hal etish uchun ularni tizimli qoʻllash maqsadida:

1. Quyidagilar:

Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi huzurida Oʻzbekiston Respublikasi Mudofaa vazirligining Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi hamda “Geoinnovatsiya markazi” davlat unitar korxonasini (keyingi oʻrinlarda Markaz deb ataladi) tashkil etish haqidagi taklifi;

“Geoinnovatsiya markazi” davlat unitar korxonasi ijro etuvchi apparatining boshqaruv xodimlari cheklangan umumiy soni 40 nafardan iborat tuzilmasi 1-ilovaga muvofiq maʼqullansin.

Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasining raisiga, zarur hollarda, Markazning ijro etuvchi apparati tuzilmasiga boshqaruv xodimlarining belgilangan umumiy shtat soni doirasida oʻzgartirishlar kiritish huquqi berilsin.

2. Quyidagilar Markaz faoliyatining asosiy yoʻnalishlari etib belgilansin:

uchuvchisiz uchish apparatlarining funksional va texnik imkoniyatlarini takomillashtirish boʻyicha ilmiy-tadqiqot va tajriba-konstruktorlik ishlarini tashkil etish;

iqtisodiyot tarmoqlarida uchuvchisiz uchish apparatlarini qoʻllash va ulardan foydalanish boʻyicha metodik tavsiyalar ishlab chiqish;

fazoviy maʼlumotlarni standartlash boʻyicha ishlarni tashkil etish;

kadastr sohasida ilmiy darajali kadrlarni tayyorlash boʻyicha tayanch doktorantura faoliyatini yuritish;

uchuvchisiz uchish apparatlarini qoʻllash orqali olingan maʼlumotlarni qonun hujjatlarida belgilangan tartibda toʻplash, tahlil qilish, qayta ishlash va saqlash;

uchuvchisiz uchish apparatlari uchun konstruktiv elementlar ishlab chiqarishni va dasturiy taʼminotni ishlab chiqishni bosqichma-bosqich mahalliylashtirish;

uchuvchisiz uchish apparatlarini ishlab chiqarishda va ulardan foydalanishda eng yangi texnologiyalarni va xorijiy tajribani joriy etish;

uchuvchisiz uchish apparatlarini boshqarish sohasida mutaxassislar tayyorlashga koʻmaklashish;

uchuvchisiz uchish apparatlarini manfaatdor tashkilotlarga ijaraga berish;

uchuvchisiz uchish apparatlarini taʼmirlash xizmatlari va texnik xizmat koʻrsatish.

3. Quyidagilar Markaz faoliyatini moliyalashtirish manbalari etib belgilansin:

uchuvchisiz uchish apparatlarini belgilangan tartibda ijaraga berishdan hamda uchuvchisiz uchish apparatlarini taʼmirlash va texnik xizmat koʻrsatishdan tushadigan mablagʻlar;

uchuvchisiz uchish apparatlarini xarid qilish yuzasidan — Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi Yer munosabatlari va davlat kadastrini rivojlantirish jamgʻarmasining budjetdan tashqari mablagʻlari;

qonun hujjatlarida taqiqlanmagan boshqa tushumlar.

4. Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi tuzilmasiga rais oʻrinbosari — zamonaviy geoinnovatsion texnologiyalarni joriy etish va rivojlantirish uchun masʼul boʻlgan “Geoinnovatsiya markazi” davlat unitar korxonasi direktori lavozimi kiritilsin.

5. Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi, Toshkent shahri hokimligi va Oʻzbekiston Respublikasi Yer resurslari, geodeziya, kartografiya davlat kadastri davlat qoʻmitasi bilan birgalikda bir oy muddatda Markazni maʼmuriy va ishlab chiqarish binolari bilan taʼminlasin.

6. Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi:

“Geoinnovatsiya markazi” davlat unitar korxonasi ustavini tasdiqlasin va uning belgilangan tartibda davlat roʻyxatidan oʻtkazilishini taʼminlasin;

Oʻzbekiston Respublikasi Innovatsion rivojlanish vazirligi, Axborot texnologiyalari va kommunikatsiyalarini rivojlantirish vazirligi, Oliy va oʻrta maxsus taʼlim vazirligi, “Toshkent mexanika zavodi” AJ, “Oʻzeltexsanoat” AK bilan birgalikda bir oy muddatda uchuvchisiz uchish apparatlarini ishlab chiqarishni bosqichma-bosqich oʻzlashtirish, ulardan foydalanishni rivojlantirish va iqtisodiyot tarmoqlarida qoʻllash boʻyicha Kompleks tadbirlar rejasi — “Yoʻl xaritasi”ni tasdiqlash uchun Oʻzbekiston Respublikasi Vazirlar Mahkamasiga kiritsin.

7. Oʻzbekiston Respublikasi Prezidentining “Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasining faoliyatini yanada takomillashtirish chora-tadbirlari toʻgʻrisida” 2017-yil 31-maydagi PQ-3024-sonli qaroriga 2-ilovaga muvofiq oʻzgartishlar kiritilsin.

8. Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi Oʻzbekiston Respublikasi Adliya vazirligi hamda boshqa manfaatdor vazirliklar va idoralar bilan birgalikda ikki oy muddatda qonun hujjatlariga ushbu qarordan kelib chiqadigan oʻzgartish va qoʻshimchalar toʻgʻrisida Vazirlar Mahkamasiga takliflar kiritsin.

9. Mazkur qarorning bajarilishini nazorat qilish Oʻzbekiston Respublikasining Bosh vaziri A.N. Aripov, Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi raisi A.X. Abdullayev va Oʻzbekiston Respublikasi Innovatsion rivojlanish vaziri I.Yu. Abdurahmonov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2018-yil 29-mart,

PQ-3639-son

Oʻzbekiston Respublikasi Prezidentining 2018-yil 29-martdagi PQ-3639-son qaroriga 1-ILOVA

“Geoinnovatsiya markazi” davlat unitar korxonasi ijro etuvchi apparatining

TUZILMASI

Direktor Direktor oʻrinbosari Direktor oʻrinbosari Ilmiy tadqiqot faoliyatini muvofiqlashtirish boʻlimi 3 Buxgalteriya 2 Ekspluatatsion-texnik boshqarma Fazoviy maʼlumotlar sohasida standartlashtirish boshqarmasi 4 Yuriskonsult Ekspluatatsiya boʻlimi 4 Strategik rejalashtirish va marketing boʻlimi 3 Tahlil-ishlab chiqarish boshqarmasi Ishlar boshqaruvchisi Axborot-kommunikatsiya texnologiyalari boʻlimi 2 Ish yurituvchi Topografiya boʻlimi 4 Texnik xizmat koʻrsatish boʻlimi 4 Maxsus boʻlim Fotogrammetriya boʻlimi 4 Kadrlar masalalari boʻyicha mutaxassis Uchuvchisiz uchish apparatlari operatorlari*

Boshqaruv xodimlarining cheklangan soni — 40 nafar.

* Kadastr agentligi tizimi xodimlari.