Oʻzbekiston Respublikasi Raqamli texnologiyalar vazirligi tizimidagi ayrim tashkilotlarning faoliyatini tashkil etish chora-tadbirlari toʻgʻrisida (409-son)

25.06.2020

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Raqamli iqtisodiyot va elektron hukumatni keng joriy etish chora-tadbirlari toʻgʻrisida” 2020-yil 28-apreldagi PQ-4699-son qarori ijrosini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Raqamli iqtisodiyot va elektron hukumatni keng joriy etish chora-tadbirlari toʻgʻrisida” 2020-yil 28-apreldagi PQ-4699-son qaroriga muvofiq “Elektron hukumat loyihalarini boshqarish markazi”, shuningdek, Oʻzbekiston Respublikasi Prezidentining “Sunʼiy intellekt texnologiyalarini 2030-yilga qadar rivojlantirish strategiyasini tasdiqlash toʻgʻrisida” 2024-yil 14-oktabrdagi PQ-358-son qarori bilan “Sunʼiy intellekt va raqamli iqtisodiyotni rivojlantirish markazi” davlat muassasasi (keyingi oʻrinlarda — Markazlar) tashkil etilganligi va ularning asosiy vazifalari belgilanganligi maʼlumot uchun qabul qilinsin.

2. Markazlarning asosiy vazifalaridan kelib chiqqan holda:

a) “Raqamli hukumat loyihalarini boshqarish markazi” davlat muassasasining funksiyalari etib quyidagilar belgilansin:

elektron hukumat va raqamli iqtisodiyot loyihalarini amalga oshirishda yagona texnologik yondashuvni taʼminlash, shu jumladan loyihaviy-texnik hujjatlarni kompleks ekspertizadan oʻtkazish;

axborot texnologiyalaridan foydalanishning samaradorligi va elektron davlat xizmatlarini joriy etishni tahlil qilish orqali davlat organlari va tashkilotlarida raqamli rivojlanishning ustuvor yoʻnalishlarini ishlab chiqish;

raqamli iqtisodiyot va elektron hukumatni rivojlantirish boʻyicha davlat organlari va tashkilotlarga uslubiy-amaliy yordam koʻrsatish;

davlat organlari va tashkilotlarida ijro intizomining idoralararo yagona elektron tizimini, idoralararo axborot tizimlarini, manbalar va boshqa dasturiy mahsulotlarni joriy etish;

elektron hukumat va raqamli iqtisodiyot sohasidagi loyihalarni samarali amalga oshirish uchun normativ-huquqiy bazani takomillashtirish boʻyicha takliflar tayyorlash;

elektron hukumat va raqamli iqtisodiyot sohasidagi loyihalarni amalga oshirish bosqichlarini muvofiqlashtirish, shuningdek davlat organlari va tashkilotlari faoliyatida axborot texnologiyalarining joriy etilishini monitoring qilish va baholash;

elektron hukumat va raqamli iqtisodiyot sohasidagi loyihalarni amaliyotga tatbiq etish boʻyicha maqsadli indikatorlar va samaradorlik koʻrsatkichlarini ishlab chiqish;

elektron hukumat infratuzilmasini yanada rivojlantirishni taʼminlash, shu jumladan Yagona interaktiv davlat xizmatlari portali, davlat xizmatlari va boshqa elektron hukumat axborot tizimlari xizmatlarini koʻrsatganlik uchun toʻlangan davlat boji va yigʻimlar miqdorini hisobga olishning yagona billing tizimini rivojlantirish;

“Digital office” tizimini texnik jihatdan qoʻllab-quvvatlash, uzluksiz ishlashi va axborot xavfsizligini taʼminlash;

“Elektron hukumat” tizimining maʼlumotlarni qayta ishlash markazi faoliyatini muvofiqlashtirish, davlat axborot tizimlari va resurslarini joylashtirish, saqlash va qayta ishlash;

b) “Sunʼiy intellekt va raqamli iqtisodiyotni rivojlantirish markazi” davlat muassasasining funksiyalari etib quyidagilar belgilansin:

har tomonlama tahliliy va amaliy tadqiqotlar asosida raqamlashtirish jarayonlarining ishlab chiqarish va iqtisodiyot tarmoqlariga taʼsirini baholash hamda kelgusida mamlakat iqtisodiyotining raqamli transformatsiyasini kengaytirish boʻyicha takliflar ishlab chiqish;

davlat organlari va iqtisodiyot tarmoqlari faoliyatida raqamli iqtisodiyotni keng joriy etishda yuzaga keladigan muammolarni oʻrganish, tahlil qilish va ularning yechimlari boʻyicha har tomonlama asoslangan takliflar tayyorlash;

ekspertlar hamjamiyati bilan birgalikda davlat organlari va tashkilotlarining faoliyatiga raqamli iqtisodiyot va elektron hukumat sohalaridagi yangi yoʻnalish va zamonaviy texnologiyalarni chuqur oʻrganish orqali keng joriy etish boʻyicha takliflar ishlab chiqish;

raqamli iqtisodiyot va elektron hukumatning rivojlanganlik darajasi boʻyicha yetakchi mamlakatlar tajribasini oʻrganish hamda ularni davlat organlari, tashkilotlar va iqtisodiyot tarmoqlariga tatbiq etish yuzasidan takliflar tayyorlash;

“aqlli” va boshqa istiqbolli texnologiyalarni, shuningdek iqtisodiyotning turli sohalarida katta hajmdagi maʼlumotlarni qayta ishlash texnologiyalarini joriy qilishning konseptual va uslubiy asoslarini shakllantirish;

raqamli texnologiyalarni joriy etishning ustuvor yoʻnalishlari boʻyicha ilmiy-texnik va tadqiqot faoliyatini amalga oshirishga asoslangan elektron hukumat va raqamli iqtisodiyotni rivojlantirishning uzoq muddatli istiqbollarini ishlab chiqish;

sunʼiy intellekt texnologiyalarini joriy etish va raqamli iqtisodiyotni rivojlantirish, shu jumladan, normativ-huquqiy bazani shakllantirish, xalqaro standartlar va metodologiyalarni joriy etish boʻyicha yagona texnologik yondashuvni taʼminlash;

maʼlumotlarni qayta ishlash uchun texnologik infratuzilmani rivojlantirish hamda ijtimoiy va iqtisodiy sohalarida sunʼiy intellekt texnologiyalari asosida ustuvor loyihalarni amalga oshirish;

sunʼiy intellekt texnologiyalari asosida raqobatbardosh dasturiy mahsulotlar ishlab chiqarishni ragʻbatlantirish hamda ularning tashqi bozorlarga chiqishini qoʻllab-quvvatlash boʻyicha takliflar tayyorlash;

elektron davlat xizmatlarini koʻrsatish tizimida sunʼiy intellekt texnologiyalarini joriy etishning ustuvor yoʻnalishlarini belgilash yuzasidan takliflarni ishlab chiqish;

sunʼiy intellekt sohasida kadrlar salohiyatini rivojlantirish, aholini sunʼiy intellekt imkoniyatlaridan amaliy foydalanishga keng oʻrgatish, shuningdek, ushbu yoʻnalishda ilmiy salohiyatni rivojlantirish boʻyicha takliflar ishlab chiqish.

3. Quyidagilar:

Oʻzbekiston Respublikasi Raqamli texnologiyalar vazirligi huzuridagi “Raqamli hukumat loyihalarini boshqarish markazi” davlat muassasasining tuzilmasi 1-ilovaga muvofiq;

Oʻzbekiston Respublikasi Raqamli texnologiyalar vazirligi huzuridagi “Sunʼiy intellekt va raqamli iqtisodiyotni rivojlantirish markazi” davlat muassasasining tuzilmasi 2-ilovaga muvofiq tasdiqlansin.

Oʻzbekiston Respublikasi Raqamli texnologiyalar vaziriga Markazlarning tuzilmalariga xodimlarning belgilangan umumiy cheklangan soni doirasida oʻzgartirishlar kiritish huquqi berilsin.

4. Oʻzbekiston Respublikasi Raqamli texnologiyalar vazirligi huzurida davlat muassasasi shaklida “Binolardan foydalanish va kapital qurilish direksiyasi” (keyingi oʻrinlarda — Direksiya) tashkil etilsin.

Quyidagilar Direksiyaning asosiy vazifalari etib belgilansin:

Oʻzbekiston Respublikasi Raqamli texnologiyalar vazirligi (keyingi oʻrinlarda — Vazirlik) va uning tizimidagi tashkilotlarning bino va inshootlarini qurish, rekonstruksiya qilish va kapital taʼmirlash ishlariga buyurtmachi vazifasini bajarish;

Vazirlik va uning tarkibidagi tashkilotlarning bino va inshootlaridan foydalanish va ularga xizmat koʻrsatish;

Vazirlik va uning tarkibidagi tashkilotlarni transport xizmati bilan taʼminlash hamda ularning moddiy-texnik taʼminotini tashkil qilish.

5. Quyidagilar:

a) “Raqamli hukumat loyihalarini boshqarish markazi” davlat muassasasining faoliyatini moliyalashtirish manbalari etib belgilansin:

Raqamli texnologiyalarni rivojlantirish jamgʻarmasining mobil aloqa xizmatlarini koʻrsatuvchi yuridik shaxslar (uyali aloqa kompaniyalari) tomonidan abonent raqamidan foydalanganlik uchun toʻlanadigan toʻlov summasining taqsimlanguniga qadar boʻlgan 35 foizidan shakllantiriladigan maxsus hisobvaragʻiga kelib tushgan mablagʻlar;

Yagona interaktiv davlat xizmatlari portali orqali davlat xizmatlarini koʻrsatganlik uchun toʻlangan davlat bojlari, yigʻimlar va barcha turdagi toʻlovlarning 11,75 foizi (shundan 0,5 foizi — Yagona billing tizimi orqali davlat xizmatlari koʻrsatilganda) — Raqamli texnologiyalar vazirligi huzuridagi “Raqamli hukumat loyihalarini boshqarish markazi” davlat muassasasining Iqtisodiyot va moliya vazirligi huzuridagi Gʻaznachilik xizmati qoʻmitasidagi maxsus hisobvaragʻiga kelib tushgan mablagʻlar;

xalqaro moliya institutlari va boshqa institutlar, xorijiy tashkilotlarning grantlari;

qonunchilik hujjatlari bilan taqiqlanmagan boshqa manbalar;

b) “Sunʼiy intellekt va raqamli iqtisodiyotni rivojlantirish markazi” davlat muassasasining faoliyatini moliyalashtirish manbalari etib belgilansin:

Raqamli texnologiyalarni rivojlantirish jamgʻarmasi;

xoʻjalik shartnomalari doirasida koʻrsatilgan xizmatlar hamda loyihalarni amalga oshirishdan tushgan mablagʻlar;

zarur texnik infratuzilmani taqdim etish evaziga shartnomaviy asosda startap-loyihalardagi oʻz ulushlarini sotishdan tushgan mablagʻlar;

xalqaro moliya institutlari va boshqa institutlar, xorijiy tashkilotlarning grantlari;

qonunchilik hujjatlari bilan taqiqlanmagan boshqa manbalar;

v) Direksiyaning faoliyatini moliyalashtirish manbalari etib belgilansin:

Raqamli texnologiyalarni rivojlantirish jamgʻarmasi hamda Vazirlik tizimidagi tashkilotlar mablagʻlari;

xoʻjalik faoliyatidan olingan mablagʻlar;

qonunchilik hujjatlari bilan taqiqlanmagan boshqa manbalar.

51. Belgilab qoʻyilsinki, 2030-yil 1-yanvardan boshlab “Sunʼiy intellekt va raqamli iqtisodiyotni rivojlantirish markazi” davlat muassasasi oʻzi koʻrsatgan xizmatlar doirasidagi tushumlar hisobidan bosqichma-bosqich mustaqil moliyalashtirishga oʻtadi.

6. Belgilansinki, Markazlar va Direksiya xodimlarining mehnatini moddiy ragʻbatlantirish, Vazirlik bilan kelishilgan holda, Markazlar va Direksiya tomonidan tasdiqlanadigan tegishli nizomlarga muvofiq xarajatlar smetalari doirasida amalga oshiriladi.

Bunda, Markazlar va Direksiya xodimlarining mehnatini ragʻbatlantirish toʻgʻrisidagi nizomlarda ularning lavozim maoshlariga 100 foiz qoʻshimcha oylik ustama qoʻllanilishi nazarda tutiladi.

7. Vazirlik:

bir oy muddatda Markazlarning va Direksiyaning ustavlarini ishlab chiqsin va tasdiqlasin, shuningdek ularning belgilangan tartibda davlat roʻyxatidan oʻtkazilishini taʼminlasin;

Markazlarni va Direksiyani zarur mutaxassislikka ega tajribali kadrlar bilan toʻldirish, shuningdek ularning moddiy-texnika bazasini shakllantirish choralarini koʻrsin.

8. Markazlar quyidagi manzildagi binolarda tekin foydalanish huquqi asosida joylashtirilsin:

“Raqamli hukumat loyihalarini boshqarish markazi” davlat muassasasi Toshkent shahrining, Mirzo Ulugʻbek tumani I. Moʻminova koʻchasidagi 4-uy;

“Sunʼiy intellekt va raqamli iqtisodiyotni rivojlantirish markazi” davlat muassasasi Toshkent shahrining Yashnobod tumani Maxtumquli koʻchasidagi 114A-uy.

Bunda, binolarni saqlash boʻyicha joriy xarajatlar foydalanuvchilar tomonidan qoplanadi.

9. Vazirlar Mahkamasining 2012-yil 19-dekabrdagi 356-son qarori (Oʻzbekiston Respublikasi QT, 2012-y., 12-son, 87-modda) bilan tasdiqlangan Axborot-kommunikatsiya texnologiyalarini rivojlantirish jamgʻarmasi toʻgʻrisidagi nizom 5-bandining “b” kichik bandiga quyidagi mazmundagi yigirma oltinchi xatboshi qoʻshilsin:

“elektron hukumat va raqamli iqtisodiyotning idoralararo loyihalarini moliyalashtirish maqsadida “Elektron hukumat loyihalarini boshqarish markazi” va “Raqamli iqtisodiyot tadqiqotlari markazi” davlat muassasalarining joriy taʼminoti, moddiy-texnik bazasini mustahkamlash hamda ularning xodimlari mehnatini qoʻshimcha moddiy ragʻbatlantirish boʻyicha ajratiladigan xarajatlar hamda “Binolardan foydalanish va kapital qurilish direksiyasi” davlat muassasasi faoliyatini moliyalashtirish”.

10. Vazirlik boshqa manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

11. Mazkur qarorning bajarilishini nazorat qilish Oʻzbekiston Respublikasi Bosh vazirining maslahatchisi — IT-texnologiyalar, telekommunikatsiyalar va innovatsion faoliyatni rivojlantirish masalalari departamenti boshligʻi O.M. Umarov hamda Oʻzbekiston Respublikasi axborot texnologiyalari va kommunikatsiyalarini rivojlantirish vaziri Sh.M. Sadikov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2020-yil 25-iyun,

409-son

Vazir Mahkamasining 2020-yil 25-iyundagi 409-son qaroriga 1-ILOVA

Oʻzbekiston Respublikasi Raqamli texnologiyalar vazirligi huzuridagi “Raqamli hukumat loyihalarini boshqarish markazi” davlat muassasasining

TUZILMASI

Direktor Direktorning birinchi oʻrinbosari Direktor oʻrinbosari Direktor oʻrinbosari Direktor oʻrinbosari Direktor oʻrinbosari Nazorat va ijro intizomi boʻlimi 2 Axborot tizimlari va resurslarini rivojlantirish boshqarmasi 1 Tashqi iqtisodiy aloqalar, moliya, investitsiyalar va bank ishlari sohasida raqamli texnologiyalarni joriy etish boʻlimi 6 Transport, yoqilgʻi-energetika kompleksi va uy-joy, kommunal xoʻjalik sohasida raqamli texnologiyalarni joriy etish boʻlimi 8 Ijtimoiy, taʼlim va sogʻliqni saqlash tizimida raqamli texnologiyalarni joriy etish boʻlimi 8 Maʼlumotlar markazi infratuzilmasini qoʻllab-quvvatlash va ekspluatatsiya qilish boʻlimi 8 Yuridik boʻlim 3 Kadrlar boʻlimi 2 Markazlashgan maʼlumotlar bazalari va axborot tizimlarini rivojlantirish boʻlimi 5 Ilm-fan, yoshlar, oila va mahallani qoʻllab-quvvatlash tizimida raqamli iqtisodiyotni joriy etish boʻlimi 6 Maʼlumotlar markazining muhandislik infratuzilmasini qoʻllab-quvvatlash boʻlimi 10 Xaridlar, budjet, bojxona va soliq sohasida raqamli texnologiyalarni joriy etish boʻlimi 6 Buxgalteriya 2 Koʻchmas mulk, kadastr, geologiya va qurilish sohasida raqamli texnologiyalarni joriy etish boʻlimi 6 Maxsus ishlar boʻlimi 2 Maʼlumotlar markazining axborot va ichki xavfsizlik boʻlimi 4 Maʼlumotnomalar va tasniflagichlarni rivojlantirish boʻlimi 4 Davlat boshqaruvi va adliya organlarida raqamli texnologiyalarni joriy etish boʻlimi 6 Madaniyat, taʼlim sohasi va kutubxona ishlarida raqamli texnologiyalarni joriy etish boʻlimi 4 Xarid va shartnomalar boʻlimi 2 Qishloq va suv xoʻjaligi, oziq-ovqat xavfsizligi sohasida raqamli texnologiyalarni joriy etish boʻlimi 6 Maʼlumotlar markazi tizimlari monitoringi boʻlimi 7 Elektron davlat xizmatlarini rivojlantirish boshqarmasi 1 Ekologiya va atrof muhitni muhofaza qilish sohasida raqamli texnologiyalarni joriy etish boʻlimi 4 Elektron parlament tizimini rivojlantirish boʻlimi 4 Hududlarda raqamli texnologiyalarni joriy etishni muvofiqlashtirish boʻlimi 5 Operatsion va funksional jarayonlarni muvofiqlashtirish boʻlimi 4 Mehnat va arxiv ishi sohasida raqamli texnologiyalarni joriy etish boʻlimi 4 Yagona interaktiv davlat xizmatlari portalini rivojlantirish boʻlimi 4 Raqamli iqtisodiyot va elektron hukumat loyihalarini audit va ekspertiza qilish boʻlimi 10

Markaz xodimlarining umumiy cheklangan soni (xizmat koʻrsatuvchi xodimlardan tashqari) — 150 nafar.

Xizmat koʻrsatuvchi xodimlar soni qonunchilik hujjatlariga muvofiq belgilanadi.

Vazir Mahkamasining 2020-yil 25-iyundagi 409-son qaroriga 2-ILOVA

Oʻzbekiston Respublikasi Raqamli texnologiyalar vazirligi huzuridagi “Sunʼiy intellekt va raqamli iqtisodiyotni rivojlantirish markazi” davlat muassasasining

TUZILMASI

DirektorDirektorning birinchi oʻrinbosariDirektorning oʻrinbosariMarketing va savdolar boʻlimi2Maʼmuriy-xoʻjalik ishlari boʻyicha bosh mutaxassis1Infratuzilma boʻlimi4Strategik rivojlantirish va reytinglar boʻlimi3Buxgalteriya2Iqtisodiy ishlar boʻyicha bosh mutaxassis1Katta maʼlumotlarni shakllantirish boʻlimi4“Raqamli iqtisodiyot” ilmiy-elektron jurnali tahririyati 3Kadrlar boʻlimi2Ichki audit va korrupsiyaga qarshi kurashish boʻyicha bosh mutaxassis1Davlat va xoʻjalik sektorlariga sunʼiy intellektni joriy etish boʻlimi 4Raqamli iqtisodiyot boʻlimi3Yuridik boʻlim2Texnika xavfsizligi va mehnat muhofazasi boʻyicha bosh mutaxassis1IT-kompaniyalar va startaplar bilan ishlash boʻlimi3Sunʼiy intellekt sohasida savodxonlikni oshirish boʻlimi3Nazorat va ijro intizomi boʻlimi2Maxsus ishlar boʻyicha bosh mutaxassis1Axborot xavfsizligi boʻlimi2Xaridlar boʻyicha bosh mutaxassis1Xalqaro munosabatlar boʻyicha bosh mutaxassis1Axborot xizmati1

Izoh. Markaz xodimlarining umumiy cheklangan soni (yordamchi personal xodimlardan tashqari) — 50 nafar.

Yordamchi personal xodimlar soni qonunchilik hujjatlariga muvofiq belgilanadi.