Oʻzbekiston Respublikasi bilan Tojikiston Respublikasi oʻrtasida strategik sherikchilikni yanada kengaytirish va mustahkamlash chora-tadbirlari toʻgʻrisida (PQ-3923-son)

28.08.2018

Oʻzbekiston Respublikasi Prezidentining

Qarori

Tojikiston Respublikasi Prezidentining 2018-yil 17-18-avgust kunlari Oʻzbekiston Respublikasiga qilgan birinchi Davlat tashrifi Oʻzbekiston va Tojikiston xalqlari oʻrtasidagi oʻzaro munosabatlar tarixida prinsipial yangi sahifani ochdi, birodar xalqlar oʻrtasidagi koʻpyoqlama hamkorlikni rivojlantirish hamda doʻstlik, strategik sherikchilik, hamjihatlik va yaxshi qoʻshnichilikni yanada mustahkamlash uchun kuchli turtki boʻldi.

Ochiq, doʻstona va konstruktiv muhitda boʻlib oʻtgan oliy darajadagi samarali muzokaralar, parlament, hukumat, ishbilarmon doiralar va jamoatchilik vakillari bilan oʻtkazilgan uchrashuvlar ikki mamlakat xalqlarining uzoq muddatli va tub manfaatlariga javob beradigan, Oʻzbekiston va Tojikiston oʻrtasidagi oʻzaro munosabatlarni har tomonlama rivojlantirishga boʻlgan mustahkam intilishlarini yana bir bor tasdiqladi.

Siyosiy, savdo-iqtisodiy, investitsion, transport-kommunikatsiya, harbiy-texnik, suv-energetik, madaniy-gumanitar va boshqa sohalarda hamkorlikni har tomonlama rivojlantirish masalalari muhokama etildi va ular boʻyicha qoʻshma qarorlar qabul qilindi.

Oʻzbekiston Respublikasi Prezidenti Shavkat Mirziyoyev hamda Tojikiston Respublikasi Prezidenti Emomali Raxmonning doʻstlik va yaxshi qoʻshnichilikni mustahkamlash toʻgʻrisidagi Qoʻshma bayonoti imzolandi.

Ikki davlat Rahbarlari tomonidan Oʻzbekiston Respublikasi bilan Tojikiston Respublikasi oʻrtasida Strategik sherikchilik toʻgʻrisidagi shartnomaning imzolanishi tarixiy voqea boʻldi.

Oʻzbekiston Respublikasi hamda Tojikiston Respublikasi oʻrtasida siyosiy, savdo-iqtisodiy, transport-kommunikatsiya va madaniy-gumanitar hamkorlikni yanada kengaytirish boʻyicha imzolangan ikki tomonlama bitimlar hamda erishilgan ahdlashuvlarning soʻzsiz va toʻliq hajmda amalga oshirilishini taʼminlash maqsadida:

1. Tojikiston Respublikasi Prezidentining 2018-yil 17-18-avgust kunlari Oʻzbekiston Respublikasiga boʻlgan Davlat tashrifi chogʻida hamkorlikni yanada kengaytirish boʻyicha imzolangan ikki tomonlama bitimlar va erishilgan kelishuvlarni amalga oshirish yuzasidan 1-ilovaga* muvofiq amaliy monitoring va qattiq nazorat oʻrnatilsin.

2. Quyidagilar:

Tojikiston Respublikasi Prezidentining Oʻzbekiston Respublikasiga boʻlgan Davlat tashrifi chogʻida imzolangan ikki tomonlama hujjatlarni amalga oshirish boʻyicha amaliy chora-tadbirlar rejasi (“Yoʻl xaritasi”) 2-ilovaga* muvofiq;

Tojikiston Respublikasi Prezidentining Oʻzbekiston Respublikasiga boʻlgan Davlat tashrifi chogʻida imzolangan savdo bitimlari va shartnomalar boʻyicha amaliy chora-tadbirlar rejasi (“Yoʻl xaritasi”) 3-ilovaga* muvofiq;

2018-2019-yillarda Oʻzbekiston Respublikasi hamda Tojikiston Respublikasi oʻrtasidagi koʻpyoqlama hamkorlikni yanada kengaytirishga oid kelishuvlarni amalga oshirish boʻyicha amaliy chora-tadbirlar rejasi (“Yoʻl xaritasi”) 4-ilovaga* muvofiq tasdiqlansin.

3. Oʻzbekiston Respublikasi Vazirlar Mahkamasi mazkur qarorning 3-ilovasiga* kiritilgan, Oʻzbekiston Respublikasi bilan Tojikiston Respublikasi oʻrtasida savdo-iqtisodiy hamkorlik sohasidagi ikki tomonlama hujjatlarni amalga oshirishning tarmoq jadvallarini uch kun muddatda tasdiqlasin.

4. Tojikiston Respublikasi Prezidentining 2018-yil 17-18-avgust kunlari Oʻzbekiston Respublikasiga boʻlgan birinchi Davlat tashrifi chogʻida siyosiy, savdo-iqtisodiy, transport-kommunikatsiya, suv-energetik, madaniy-gumanitar sohalardagi hamkorlikni yanada kengaytirish boʻyicha imzolangan ikki tomonlama bitimlar va erishilgan kelishuvlarni oʻz vaqtida va soʻzsiz amalga oshirishni nazorat qilish boʻyicha Maxsus komissiya 5-ilovaga* muvofiq tuzilsin.

Ilovalar rus tilidagi matnda berilgan.

5. Maxsus komissiya (A. Aripov):

Tojikiston Respublikasi Prezidentining 2018-yil 17-18-avgustda Oʻzbekiston Respublikasiga boʻlgan birinchi Davlat tashrifi chogʻida siyosiy, savdo-iqtisodiy, transport-kommunikatsiya va madaniy-gumanitar sohalardagi hamkorlikni yanada kengaytirish boʻyicha alohida hujjatlar hamda erishilgan kelishuvlarning kuchga kirishiga oid ichki davlat tartib- taomillari oʻz vaqtida bajarilishini hisobga olgan holda, imzolangan ikki tomonlama bitimlarning qatʼiy va sifatli ijro etilishi ustidan doimiy va tizimli monitoringni tashkil etishni;

mazkur qaror bilan tasdiqlangan “Yoʻl xaritalari”ni soʻzsiz amalga oshirish boʻyicha masʼul ijrochilar -vazirliklar, idoralar va boshqa tashkilotlar rahbarlarining, ular tomonidan koʻrilayotgan amaliy chora-tadbirlar toʻgʻrisidagi hisobotlari muntazam tinglab borilishini;

siyosiy, savdo-iqtisodiy, transport-kommunikatsiya va madaniy-gumanitar sohalardagi hamkorlikni yanada kengaytirish boʻyicha imzolangan ikki tomonlama bitimlar va erishilgan kelishuvlarni amalga oshirish bilan bogʻliq masalalarni muvofiqlashtirish, shuningdek, Tojikiston tomoni bilan yuqorida koʻrsatilgan masalalar yuzasidan, shu jumladan, Ikki tomonlama hamkorlik boʻyicha hukumatlararo qoʻshma komissiyasi faoliyati doirasida muntazam va samarali bahamjihat harakatlarni tashkil etishni;

tashkilotlar — masʼul ijrochilar tomonidan savdo-iqtisodiy hamkorlik sohasida ikki tomonlama hujjatlarni amalga oshirishning tasdiqlangan tarmoq jadvallariga qatʼiy rioya qilinishini taʼminlasin.

6. Oʻzbekiston Respublikasi Vazirlar Mahkamasi komplekslari, vazirliklar, idoralar va boshqa tashkilotlar rahbarlari — masʼul ijrochilar mazkur qaror bilan tasdiqlangan chora-tadbirlar hamda loyihalarning oʻz vaqtida va sifatli ijro etilishini taʼminlasin hamda Oʻzbekiston Respublikasi Vazirlar Mahkamasi va Tashqi ishlar vazirligiga har oyda ularning amalga oshirilishi yuzasidan axborot berib tursin.

7. Oʻzbekiston Respublikasi Vazirlar Mahkamasi va Tashqi ishlar vazirligi ushbu qaror va tasdiqlangan “Yoʻl xaritalari” amalga oshirilishining tanqidiy tahlilini har oyda Oʻzbekiston Respublikasi Prezidenti huzuridagi Xavfsizlik kengashi apparati hamda Oʻzbekiston Respublikasi Prezidentining Ijro etuvchi apparatiga taqdim etib borsin.

8. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov, Oʻzbekiston Respublikasi Prezidenti huzuridagi Xavfsizlik kengashi Kotibi V.V. Maxmudov va Oʻzbekiston Respublikasi Prezidenti maslahatchisi — Ijro etuvchi apparati rahbari Z.Sh. Nizomiddinov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2018-yil 28-avgust,

PQ-3923-son