Sayyor soliq tekshiruvini oʻtkazish tartibi toʻgʻrisidagi nizomni tasdiqlash haqida (3247-son)

18.06.2020

Oʻzbekiston Respublikasi Davlat soliq qoʻmitasining

Qarori

[Oʻzbekiston Respublikasi Adliya vazirligi tomonidan 2020-yil 18-iyunda roʻyxatdan oʻtkazildi, roʻyxat raqami 3247]

Oʻzbekiston Respublikasi Soliq kodeksining 139-moddasiga muvofiq Oʻzbekiston Respublikasi Davlat soliq qoʻmitasi qaror qiladi:

1. Sayyor soliq tekshiruvini oʻtkazish tartibi toʻgʻrisidagi nizom ilovaga muvofiq tasdiqlansin.

2. Ushbu qaror rasmiy eʼlon qilingan kundan eʼtiboran kuchga kiradi.

Davlat soliq qoʻmitasi raisi Sh. KUDBIYEV

Toshkent sh.,

2020-yil 18-may,

2020-16-son

Oʻzbekiston Respublikasi Davlat soliq qoʻmitasining 2020-yil 18-maydagi 2020-16-son qaroriga ILOVA

Sayyor soliq tekshiruvini oʻtkazish tartibi toʻgʻrisidagi

NIZOM

Mazkur Nizom Oʻzbekiston Respublikasining Soliq kodeksiga (bundan buyon matnda Soliq kodeksi deb yuritiladi) muvofiq sayyor soliq tekshiruvini oʻtkazish tartibini belgilaydi.

1-bob. Umumiy qoidalar

1. Ushbu Nizomda quyidagi asosiy tushunchalardan foydalaniladi:

sayyor soliq tekshiruvi — soliq toʻlovchilarning soliqlar va yigʻimlarni hisoblab chiqarish hamda toʻlash sohasidagi ayrim majburiyatlarini, shuningdek, soliq toʻgʻrisidagi qonunchilik hujjatlarida belgilangan boshqa majburiyatlarini bajarilishini tekshirish;

xronometraj kuzatuvi — xronometraj oʻtkaziladigan davrda tushumlarning haqiqiy hajmlarini, pul tushumi summalarini, ishlab chiqarish va tovarlarni (xizmatlarni) realizatsiya qilish hajmlarini aniqlash maqsadida amalga oshiriladigan, tovarlarni (xizmatlarni) haqiqiy realizatsiya hajmlarini aniqlashga doir tadbir.

2. Soliq organlari sayyor soliq tekshiruvi doirasida quyidagilarni amalga oshiradi:

soliq solish obyektlarini aniqlash;

xronometraj kuzatuvlarini oʻtkazish;

nazorat-kassa texnikasi va hisob-kitob terminallari qoʻllanilishini tekshirish;

soliq toʻlovchi xodimlarining hisobotdagi va haqiqiy soni muvofiqligi yuzasidan monitoringni amalga oshirish;

bozorlar, savdo komplekslari, ularga tutash boʻlgan avtomobil vositalarining toʻxtash joylarida soliq qonunchiligiga rioya etilishini tekshirish;

savdo va xizmat koʻrsatish qoidalariga rioya etilishini tekshirish;

soliq toʻlovchidan asosiy vositalar, tovar-moddiy boyliklar, pul mablagʻlari va hisob-kitoblarni soliq toʻlovchi (soliq agentlari) tomonidan xatlovdan oʻtkazishni talab qilish.

3. Sayyor soliq tekshiruvida hisobga olish hujjatlarining, tovar-moddiy boyliklar va pul mablagʻlari harakatining, shuningdek, soliq toʻlovchining faoliyati bilan bogʻliq boʻlgan boshqa axborotning tahlili oʻtkaziladi.

Sayyor soliq tekshiruvini oʻtkazishda soliq toʻlovchilardan sayyor soliq tekshiruvi predmetiga aloqasi boʻlmagan hujjatlarni (axborotni) talab qilishga yoʻl qoʻyilmaydi.

4. Sayyor soliq tekshiruvi oʻn ish kunigacha boʻlgan muddatda oʻtkaziladi.

5. Sayyor soliq tekshiruvi natijasi boʻyicha soliq organlari tomonidan soliqlar va yigʻimlarni hisoblash amalga oshirilmaydi.

Bunda, sayyor soliq tekshiruvi natijasi boʻyicha olingan hujjatlar va axborotlar kameral soliq tekshiruvini oʻtkazishda foydalanilishi mumkin.

6. Sayyor soliq tekshiruvi quyidagi asoslar boʻlganda oʻtkaziladi:

“Tahlika-tahlil” dasturiy mahsuloti natijasiga koʻra aniqlangan, yuqori darajadagi tavakkalchilik toifasiga mansub boʻlmagan soliq toʻlovchilar (soliq agentlari) faoliyatidagi soliqqa oid huquqbuzarliklar toʻgʻrisida maʼlumotlar mavjud boʻlganda;

jismoniy va yuridik shaxslardan, shuningdek, sud va huquqni muhofaza qiluvchi organlardan soliq toʻlovchilar faoliyatida soliq toʻgʻrisidagi qonunchilik hujjatlari buzilishi holatlari toʻgʻrisida murojaatlar kelib tushganda, bundan anonim murojaatlar mustasno;

ommaviy axborot vositalarida soliqqa oid huquqbuzarliklar toʻgʻrisidagi maʼlumotlar eʼlon qilinganda;

kameral soliq tekshiruvi jarayonida aniqlangan tafovut va xatolarni soliq organi joylashgan joydan tashqarida oʻrganish zarurati yuzaga kelganda.

7. Sayyor soliq tekshiruvi soliq organi rahbarining (oʻrinbosarining) buyrugʻi asosida oʻtkaziladi. Buyruqda soliq toʻlovchining nomi, tekshiruvchi shaxslarning familiyasi, ismi, otasining ismi hamda lavozimi, tekshiruvni oʻtkazish muddati va maqsadi koʻrsatiladi.

Sayyor soliq tekshiruvi oʻtkazish uchun soliq organining ikki yoki undan ortiq mansabdor shaxslari jalb etilgan taqdirda, buyruqda bir nafar xodim tekshirishda vazifalarni taqsimlash boʻyicha guruh rahbari etib belgilanadi.

8. Oʻtkaziladigan sayyor soliq tekshiruvlari Tekshiruvlarni elektron roʻyxatga olish yagona tizimi orqali Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil bilan kelishilgan holda “Tekshiruvlarni roʻyxatga olish kitobi” toʻldirilganidan soʻng oʻtkaziladi.

Sayyor soliq tekshiruvi dalolatnomasiga “Tekshiruvlarni roʻyxatga olish kitobi”ning toʻldirilgan shakli (qogʻoz shakli toʻldirilganda — elektron shakli toʻldirilmaganligi sababi) yoki kitob taqdim etilmaganda — uning taqdim etilmaganligi toʻgʻrisida tekshiruvchi tomonidan tegishli yozuv kiritiladi.

Sayyor soliq tekshiruvini oʻtkazuvchi mansabdor shaxs “Tekshiruvlarni roʻyxatga olish kitobi”ni toʻldirishdan bosh tortgan taqdirda, soliq toʻlovchi oʻzining sayyor soliq tekshiruvidan oʻtkazilishiga yoʻl qoʻymaslikka haqli.

Oʻtkazilgan tekshiruvlarning natijalari soliq organlari tomonidan tekshiruv tamomlangandan keyin uch kun ichida Tekshiruvlarni elektron roʻyxatga olish yagona tizimiga kiritiladi.

9. Sayyor soliq tekshiruvini oʻtkazish toʻgʻrisidagi buyruqda koʻrsatilgan sana ushbu tekshiruvni oʻtkazish muddatining boshlanishi deb hisoblanadi.

10. Sayyor soliq tekshiruvi jarayonida soliq organi Soliq kodeksining 145 va 148-moddalarida belgilangan tartibda soliq toʻlovchining binolari va hududlarni koʻzdan kechirishga hamda hujjatlar va buyumlarni olib qoʻyishga haqli. Bunda, ushbu tadbirlar xolislar ishtirokida amalga oshiriladi.

Soliq organlarining xodimlari xolislar sifatida ishtirok etishiga yoʻl qoʻyilmaydi.

2-bob. Sayyor soliq tekshiruvini oʻtkazishda soliq organi mansabdor shaxsining hamda soliq toʻlovchining huquq va majburiyatlari

11. Soliq organlarining mansabdor shaxslari quyidagi huquqlarga ega:

soliq toʻlovchining sayyor soliq tekshiruviga taalluqli maʼlumotlari va hujjatlarini oʻrganish hamda ushbu hujjatlardan soliq organi hisobidan nusxa olish;

soliq toʻlovchi tomonidan buxgalteriya, tovarlar (xizmatlar) harakati hisobini yuritishda foydalanilayotgan dasturiy taʼminotlardagi maʼlumotlar bilan tanishish va soliqqa oid huquqbuzarliklar aniqlangan hollarda ulardan soliq organi hisobidan nusxa olish;

soliq toʻlovchining hududini, ishlab chiqarish, omborxona, savdo binolarini va boshqa binolarini, shu jumladan, soliq toʻlovchi daromad olish uchun foydalanadigan yoki soliq solish obyektlarini saqlash bilan bogʻliq joylarni koʻzdan kechirish hamda foto va videotasvirga tushirish;

mol-mulklarni xatlovdan oʻtkazish;

tekshiruvga mutaxassislar, ekspertlar, tarjimon, xolislarni jalb etish hamda ulardan tegishli xulosalar, tarjimalar va koʻrsatmalar olish;

ishlab chiqarilayotgan hamda realizatsiya qilinayotgan tovarlarning (xizmatlarning) haqiqiy hajmlarini aniqlash;

hisob-kitoblarni amalga oshirishda savdo va xizmat koʻrsatish qoidalariga rioya etilishini, shuningdek, nazorat-kassa texnikasi va hisob-kitob terminallarining qoʻllanilishini tekshirish;

soliq toʻlovchi tomonidan soliq organlarining mansabdor shaxslarini sayyor soliq tekshiruvi oʻtkazilayotgan hudud va (yoki) binoga (bundan turar joylar mustasno) kirishiga toʻsqinlik qilinganda, soliq toʻlovchining banklardagi hisobvaraqlar boʻyicha operatsiyalarni toʻxtatib turish choralarini koʻrish;

soliq toʻlovchining faoliyatiga taalluqli hujjatlarga (axborotga) ega boʻlgan kontragentdan yoki boshqa shaxslardan ushbu hujjatlarni (axborotni) talab qilib olish.

12. Soliq organlarining mansabdor shaxslari quyidagi majburiyatlarga ega:

soliq tekshiruvi boshlanguniga qadar (nazorat kassa texnikasi va hisob-kitob terminallari qoʻllanilishini tekshirishda — tekshiruv jarayonida) soliq toʻlovchini yoki uning vakilini sayyor soliq tekshiruvini oʻtkazish toʻgʻrisidagi buyruq bilan tanishtirish va buyruq nusxasini uni olganligini tasdiqlovchi imzo qoʻydirgan holda taqdim etish;

soliq toʻlovchini yoki uning vakilini tekshiruv maqsadi bilan tanishtirish, unga oʻz xizmat guvohnomasi va tekshiruv oʻtkazish huquqini beruvchi maxsus guvohnomasini koʻrsatish;

tadbirkorlik subyektida “Tekshiruvlarni roʻyxatga olish kitobi” mavjud boʻlgan hollarda, uning elektron yoki qogʻoz shaklini toʻldirish;

sayyor soliq tekshiruvini oʻtkazish vaqtida soliq toʻlovchilarga ularning huquq va majburiyatlarini, shu jumladan, tekshiruv ustidan jamoatchilik nazoratini amalga oshirish uchun Oʻzbekiston Respublikasi Savdo-sanoat palatasi yoki tadbirkorlik subyektlarining boshqa tegishli birlashmalarini jalb qilishga haqli ekanligini tushuntirish;

oʻtkazilgan tekshiruv natijalari bilan soliq toʻlovchini tanishtirish;

tadbirkorlik subyektlari faoliyatida oʻtkazilgan tekshiruvlarning natijalari tekshiruv tamomlangandan keyin uch kun ichida Tekshiruvlarni elektron roʻyxatga olish yagona tizimiga kiritilishini taʼminlash;

oʻz vakolatlari va tekshiruv buyrugʻida belgilangan tekshiruv maqsadlari doirasidan chiqmaslik.

Soliq organlarining zimmasida qonunchilik hujjatlariga muvofiq boshqa majburiyatlar ham boʻlishi mumkin.

13. Soliq toʻlovchilar quyidagi huquqlarga ega:

sayyor soliq tekshiruvini oʻtkazish toʻgʻrisidagi buyruq nusxasini olish, xodimlarning xizmat guvohnomasi va tekshiruv oʻtkazish huquqini beruvchi maxsus guvohnomasi bilan tanishish;

sayyor soliq tekshiruvini oʻtkazish jarayonida vakil orqali yoki shaxsan ishtirok etish;

sayyor soliq tekshiruvini oʻtkazuvchi mansabdor shaxsdan “Tekshiruvlarni roʻyxatga olish kitobi”ning elektron yoki qogʻoz shaklini toʻldirishni talab qilish, toʻldirishdan bosh tortgan taqdirda esa — oʻzining hududi va binolariga kirishga yoʻl qoʻymaslik;

sayyor soliq tekshiruvi jarayonini foto va videotasvirga olish;

sayyor soliq tekshiruvi materiallari bilan tanishish va nusxa olish;

sayyor soliq tekshiruvini amalga oshirayotgan soliq organlari mansabdor shaxslarining noqonuniy xatti-harakatlari yuzasidan shikoyat qilish;

sayyor soliq tekshiruvi materiallarini koʻrib chiqish jarayonida ishtirok etish;

oʻz manfaatlarini shaxsan, soliq maslahatchilari tashkiloti yoki boshqa vakillari orqali himoya qilish.

Soliq toʻlovchilar Soliq kodeksi va soliq toʻgʻrisidagi boshqa qonunchilik hujjatlarida belgilangan oʻzga huquqlarga ham ega boʻlishi mumkin.

14. Soliq toʻlovchilar quyidagi majburiyatlarga ega:

sayyor soliq tekshiruvini oʻtkazayotgan soliq organlarining mansabdor shaxslariga tekshiruv bilan bogʻliq hujjatlar, shuningdek, elektron manbalarda saqlanadigan tegishli axborot bilan tanishish imkoniyatini taʼminlash;

soliq organlarining tekshirish bilan bogʻliq qonuniy talablarini bajarish, ular mansabdor shaxslarning qonuniy faoliyatiga toʻsqinlik qilmaslik.

Soliq toʻlovchilarning zimmasida qonunchilik hujjatlariga muvofiq boshqa majburiyatlar ham boʻlishi mumkin.

3-bob. Soliq solish obyektlarini aniqlash

15. Soliq solish obyektlarini aniqlash soliq organlarida mavjud boʻlgan soliq solish obyektlari va soliq solish bilan bogʻliq obyektlar toʻgʻrisidagi axborotni aniqlashtirish maqsadida oʻtkaziladi.

16. Soliq solish obyektlarini aniqlash boʻyicha quyidagilar tekshiriladi:

davlat roʻyxatidan oʻtganligi toʻgʻrisidagi hujjatlar, faoliyat turi va joyining qonunchilik hujjatlari talablariga muvofiqligi;

koʻchmas mulkka va yer uchastkalariga boʻlgan huquqni tasdiqlovchi hujjatlar, shu jumladan, kadastr hujjatlari, ijara shartnomalari mavjudligi.

17. Soliq solish obyektlarini aniqlash boʻyicha oʻtkazilgan tekshiruv natijasida olingan maʼlumotlar sayyor soliq tekshiruvi dalolatnomasida qayd etiladi.

4-bob. Xronometraj kuzatuvlarini oʻtkazish

18. Xronometraj kuzatuvlari soliq toʻlovchilarning ayrim toifalari yoki faoliyat turlari boʻyicha tadbirkorlik faoliyatini amalga oshirish bilan bogʻliq haqiqatdagi daromadlari hamda ularning shakllanish manbalari va (yoki) xarajatlari, shuningdek, soliq rejimini aniqlash maqsadida oʻtkaziladi.

19. Xronometraj kuzatuvi soliq toʻlovchining faoliyatini toʻxtatmasdan kunlik ish rejimini toʻliq qamrab olgan holda, joylashgan joyidan qatʼi nazar barcha obyektlarida bir vaqtning oʻzida oʻtkaziladi.

Xronometraj kuzatuvi solik toʻlovchi (vakili) ishtirokida oʻtkaziladi.

20. Xronometraj kuzatuvi soliq toʻlovchilarning tekshiruvgacha tasdiqlangan ish rejimidan kelib chiqib, yetti ish kunidan kam boʻlmagan muddatda oʻtkaziladi.

21. Soliq organi soliq toʻlovchining boshqa hududlardagi obyektlarida xronometraj kuzatuvi oʻtkazish yuzasidan obyekt joylashgan hududiy soliq organiga xronometraj kuzatuvi boshlanishidan kamida bir kun oldin oʻtkaziladigan xronometraj kuzatuvining aniq sanasini koʻrsatgan holda yozma xabarnoma yuboradi.

Bunda, xronometraj kuzatuvi natijasi boʻyicha rasmiylashtirilgan maʼlumotlar kuzatuv yakunlanganidan soʻng soliq toʻlovchi joylashgan hududiy soliq organiga bir ish kuni ichida yuborilishi shart.

22. Xronometraj kuzatuvi jarayonida soliq toʻlovchining amaldagi daromadlari va xarajatlarini hamda soliq rejimini aniqlash maqsadida mutaxassislar jalb etilishi mumkin.

23. Xronometraj kuzatuvi quyidagi tartibda amalga oshiriladi:

a) chakana savdo, umumiy ovqatlanish va xizmat koʻrsatish sohasida:

xronometraj kuzatuvi boshlanishida soliq toʻlovchining pulli hisob-kitoblarni amalga oshirishdan tushgan pullarni saqlash uchun moʻljallangan kassalaridagi (bundan buyon matnda soliq toʻlovchining kassalari deb yuritiladi) mavjud naqd pul qoldigʻini nazorat-kassa texnikasining kunlik hisoboti bilan solishtirish va ijobiy farq summasini soliq toʻlovchi (uning vakili) tomonidan nazorat-kassa texnikasining xotirasiga kiritilishini talab qilish;

savdo va (yoki) xizmat koʻrsatishdan tushgan pul mablagʻlarining toʻliq nazorat-kassa texnikasi xotirasiga kiritilishi yoki toʻlov terminallaridan toʻliq foydalanilishi, xaridorlarga (mijozlarga) xarid cheki berilishini nazorat qilib borish;

realizatsiya qilingan tovarlar va xizmatlarning haqiqiy hajmini aniqlash hamda kunlik pul mablagʻlari tushumini kuzatish va qayd etish;

xronometraj kuzatuvi yakunida nazorat-kassa texnikasidan “Z” hisobot chiqarish va maʼlumotnomaga ilova qilish;

xronometraj kuzatuvi yakunida soliq toʻlovchining kassalaridagi mavjud kunlik pul tushumi bilan qayd etish varaqasidagi tushumlar miqdori oʻrtasidagi ijobiy farq summasini nazorat-kassa texnikasining xotirasiga kiritilishini talab qilish;

mahsulotlarning hisob hujjatlaridagi (hisobvaraq-fakturalar, yuk xatlari, nazorat-kassa texnikasi cheki yoki unga tenglashtirilgan boshqa hujjatlar) narxlari hamda sotish narxlarini taqqoslash;

soliq toʻlovchining daromadlari va xarajatlarini tahlil qilish;

b) ishlab chiqarish sohasida:

ishlab chiqarish uchun sarflanayotgan tovar xomashyolar (yarim tayyor mahsulotlar) hajmini, ishlab chiqarish uskunalarining sonini va ularning quvvatlarini qayd etish;

ishlab chiqarish quvvatlari uchun sarflanayotgan tabiiy resurslar (gaz, elektr energiyasi, suv, yoqilgʻi-moylash materiallari) hajmining ishlab chiqarish hajmiga muvofiqligini aniqlash;

ishlab chiqarilayotgan mahsulotlar turi va miqdorini aniqlash;

ishlab chiqarilgan mahsulotlarni realizatsiya qilish usullarini aniqlash va jarayonini qayd etish;

ishlab chiqarilayotgan mahsulotlarning tannarxi, sotish narxi, sotilgan hajmi hamda omborxonalaridagi tayyor mahsulotlar miqdorini aniqlash;

xronometraj koʻzatuvi natijasida aniqlangan soliq toʻlovchining haqiqatdagi daromadlari, ularning shakllanish manbalari va xarajatlarini qayd etish.

24. Xronometraj kuzatuvi natijasi boʻyicha ushbu Nizomning 1-ilovasiga muvofiq ikki nusxada bayonnoma rasmiylashtiriladi. Bayonnomaning bir nusxasi soliq toʻlovchiga bayonnoma nusxasini olganligini tasdiqlovchi imzo qoʻydirgan holda beriladi. Bunda bayonnomaga imzolashdan va (yoki) uning bir nusxasini olishdan soliq toʻlovchi bosh tortgan hollarda, sayyor soliq tekshiruvini oʻtkazuvchi mansabdor shaxs tomonidan bayonnomaga bu haqda tegishli yozuv kiritiladi.

5-bob. Nazorat kassa texnikasi va hisob-kitob terminallari qoʻllanilishini tekshirish

25. Nazorat-kassa texnikasi va hisob-kitob terminallari qoʻllanilishini tekshirish nazorat xaridini amalga oshirish yoʻli bilan va (yoki) savdo, umumiy ovqatlanish yoki xizmat koʻrsatish shoxobchasida bevosita tekshiruv oʻtkazish yoʻli bilan amalga oshiriladi.

26. Nazorat xaridi nazorat-kassa texnikalari va (yoki) hisob-kitob terminallaridan xaridorlarga kassa cheki berilishi, bank kartalari orqali toʻlovlar qabul qilinishi hamda naqd pul mablagʻlari va bank kartalari orqali amalga oshiriladigan toʻlovlar shakliga qarab narxlar sunʼiy ravishda oshirilishi yoki pasaytirilishi holatlari mavjudligini tekshirish maqsadida amalga oshiriladi.

27. Nazorat xaridini amalga oshirishda quyidagilar jalb qilinishi mumkin:

soliqqa oid huquqbuzarlik sodir etilganligi toʻgʻrisida murojaat etgan jismoniy shaxs (yuridik shaxsning ishonchli vakili);

“Xolis xaridor” xizmatini koʻrsatuvchi yuridik shaxs vakillari;

Isteʼmolchilar huquqlarini himoya qilish jamiyatlari federatsiyasi vakillari.

28. Nazorat xaridini amalga oshirgan shaxslar tomonidan nazorat xaridida kuzatilgan holatlar boʻyicha maʼlumotlar (hujjatlar, predmetlar) xarid yakunlanishi bilan sayyor soliq tekshiruvini oʻtkazuvchi mansabdor shaxsga taqdim etiladi.

29. Oʻtkazilgan nazorat xaridi natijasi boʻyicha mazkur Nizomning 2-ilovasiga muvofiq shaklda bayonnoma rasmiylashtiriladi va sayyor soliq tekshiruvini oʻtkazuvchi mansabdor shaxs, nazorat xaridini amalga oshirgan shaxs va soliq toʻlovchi tomonidan imzolanadi.

Nazorat xaridini oʻtkazish bayonnomasining bir nusxasi soliq toʻlovchiga bayonnoma nusxasini olganligini tasdiqlovchi imzo qoʻydirgan holda beriladi. Bunda nazorat xaridini oʻtkazish bayonnomasini imzolashdan va (yoki) uning bir nusxasini olishdan bosh tortgan hollarda, sayyor soliq tekshiruvini oʻtkazuvchi mansabdor shaxs tomonidan bayonnomaga bu haqda tegishli yozuv kiritiladi.

30. Nazorat xaridini oʻtkazishda foydalanish uchun naqd pul mablagʻlari Oʻzbekiston Respublikasi Davlat soliq qoʻmitasining Moddiy yordam, ijtimoiy himoya, soliq organlarini rivojlantirish va koʻzda tutilmagan xarajatlar maxsus jamgʻarmasi mablagʻlari, shuningdek, qonunchilik hujjatlarida taqiqlanmagan boshqa mablagʻlar hisobidan ajratiladi.

Sayyor soliq tekshiruvini oʻtkazuvchi mansabdor shaxs nazorat xaridini oʻtkazish uchun naqd pul mablagʻlarini tegishli soliq organi kassasidan oladi.

Naqd pul mablagʻlarini sayyor tekshiruvini oʻtkazish uchun mansabdor shaxsga berishda ularning qiymati, banknota seriyasi va raqamlari alohida varaqda qayd etilib, chiqim kassa orderiga ilova qilinadi. Bunda pul mablagʻlarining qiymati, banknota seriyasi va raqamlari yozilgan varaqcha nusxasi sayyor soliq tekshiruvini oʻtkazuvchi mansabdor shaxsga beriladi.

31. Sayyor soliq tekshiruvi yakunlangandan soʻng, nazorat xaridini oʻtkazishda foydalanish uchun olingan naqd pul mablagʻlari bir ish kuni ichida tegishli soliq organi kassasiga toʻliq topshiriladi. Pul mablagʻlarining qiymati, banknota seriyasi va raqamlari yozilgan varaqcha nusxasi kirim kassa orderiga ilova qilinadi.

Sayyor soliq tekshiruvi jarayonida soliq toʻlovchiga tegishli shoxobcha kassalarida mavjud naqd pul qoldigʻi sanoqdan oʻtkazilib, nazorat-kassa texnikasi xotirasiga kiritilgan naqd pul summasi bilan solishtiriladi va natijasi boʻyicha ushbu Nizomning 3-ilovasiga muvofiq naqd pul qoldigʻini sanoqdan oʻtkazish dalolatnomasi tuziladi.

32. Nazorat xaridi oʻtkazilib, oʻzaro hisob-kitoblar yakunlangach, nazorat xaridini oʻtkazishda foydalanilgan pul mablagʻlari tekshirilgan soliq toʻlovchi (uning vakili) tomonidan sayyor soliq tekshiruvini oʻtkazuvchi mansabdor shaxsga, xarid qilingan tovarlar va koʻrsatilgan xizmatlarning natijalari (nazorat xaridi predmetlari) esa, sayyor soliq tekshiruvini oʻtkazuvchi mansabdor shaxs tomonidan soliq toʻlovchiga (uning vakili) qaytarib berilishi shart, bundan qaytarish imkoni boʻlmagan hamda qonunchilik hujjatlariga muvofiq olib qoʻyilishi lozim boʻlgan nazorat xaridi predmetlari mustasno.

33. Soliq organlari nazorat-kassa texnikalari va hisob-kitob terminallari qoʻllanilishini savdo, umumiy ovqatlanish yoki xizmat koʻrsatish shoxobchasida bevosita tekshirishi mumkin. Bunda tekshirish quyidagilarni aniqlash maqsadida oʻtkaziladi:

qonunchilik hujjatlariga muvofiq nazorat-kassa texnikasi va hisob-kitob terminali bilan jihozlanganligi, shu jumladan, ularning soliq toʻlovchi nomiga va obyekt manzili boʻyicha rasmiylashtirilganligi;

nazorat-kassa texnikalari tegishliligi boʻyicha Oʻzbekiston Respublikasi hududida qoʻllanishi ruxsat etilgan fiskal xotiraga ega boʻlgan nazorat-kassa mashinalarining davlat reyestriga hamda Oʻzbekiston Respublikasi hududida qoʻllanilishi ruxsat etilgan onlayn nazorat-kassa mashinalari va virtual kassalarning davlat reyestriga kiritilganligi;

nazorat-kassa texnikasining texnik talablarga muvofiqligi;

nazorat-kassa texnikasi va hisob-kitob terminallarini qoʻllash qoidalariga rioya etilishi.

34. Nazorat-kassa texnikalari va hisob-kitob terminallari qoʻllanilishini savdo, umumiy ovqatlanish yoki xizmat koʻrsatish shoxobchasida bevosita oʻtkazilgan tekshirish natijalari sayyor soliq tekshiruvi dalolatnomasida qayd etiladi.

Soliq toʻlovchi tomonidan boshqa soliq toʻlovchiga tegishli nazorat-kassa texnikalari va (yoki) hisob-kitob terminallaridan foydalanish holati aniqlangan taqdirda, sayyor soliq tekshiruvi dalolatnomasiga ulardan olingan xarid cheki nusxasi, hisob-kitob terminalining rusumi va zavod raqami toʻgʻrisidagi maʼlumot ham kiritiladi.

Texnik talablarga javob bermaydigan, qonunchilik hujjatlarida belgilangan tartibda Oʻzbekiston Respublikasi hududida qoʻllanishi ruxsat etilgan fiskal xotiraga ega boʻlgan nazorat-kassa mashinalarining davlat reyestriga yoki Oʻzbekiston Respublikasi hududida qoʻllanilishi ruxsat etilgan onlayn nazorat-kassa mashinalari va virtual kassalarning davlat reyestriga kiritilmagan yoxud boshqa soliq toʻlovchiga tegishli boʻlgan, shuningdek, fiskal xotiraga xizmat koʻrsatuvchi dasturiy mahsuloti (versiya) buzilgan nazorat-kassa texnikasi mavjudligi aniqlangan taqdirda, sayyor soliq tekshiruvini oʻtkazuvchi mansabdor shaxs tomonidan bayonnoma tuziladi hamda ushbu nazorat-kassa texnikasi vaqtincha olib qoʻyiladi.

6-bob. Soliq toʻlovchi xodimlarining hisobotdagi va haqiqiy soni muvofiqligi yuzasidan monitoringni amalga oshirish

35. Soliq toʻlovchi xodimlarining hisobotdagi va haqiqiy soni muvofiqligi yuzasidan monitoringni amalga oshirish quyidagilardan iborat:

barcha obyekt va hududlarda haqiqatda faoliyat yuritayotgan xodimlarni aniqlash;

mazkur Nizomning 4-ilovasiga muvofiq shaklda aniqlangan xodimlarning roʻyxatini (bundan buyon matnda roʻyxat deb yuritiladi) tuzish.

Soliq toʻlovchi xodimlarining hisobotdagi va haqiqiy soni muvofiqligi yuzasidan monitoring soliq toʻlovchining (vakilining) ishtirokida amalga oshiriladi.

36. Roʻyxatda koʻrsatilgan xodimlar soliq toʻlovchi tomonidan taqdim etilgan soliq hisobotida koʻrsatilgan maʼlumotlar bilan solishtiriladi.

Bunda, roʻyxatning tegishli ustuniga xodimlarning soliq toʻlovchi tomonidan taqdim etilgan soliq hisobotida “mavjud” yoki “mavjud emas” belgisi kiritib boriladi.

37. Solishtirish natijasida sayyor soliq tekshiruvini oʻtkazuvchi mansabdor shaxs roʻyxatga kiritilgan va soliq toʻlovchi tomonidan taqdim etilgan soliq hisobotida mavjud boʻlmagan xodimlar, ularning ishlash davri hamda olayotgan ish haqi toʻgʻrisida soliq toʻlovchidan tushuntirishlar oladi.

38. Roʻyxat sayyor soliq tekshiruvini oʻtkazuvchi mansabdor shaxs va soliq toʻlovchi tomonidan imzolanadi. Soliq toʻlovchi roʻyxatni imzolashdan bosh tortgan hollarda, sayyor soliq tekshiruvini oʻtkazuvchi mansabdor shaxs tomonidan roʻyxatning pastki qismiga bu haqida yozuv kiritiladi.

39. Yakka tartibdagi tadbirkorlar tomonidan yollangan xodimlarning soliq organlarida roʻyxatga olinganligi toʻgʻrisidagi guvohnoma mavjudligini tekshirish natijasida aniqlangan holatlar sayyor soliq tekshiruvi dalolatnomasida qayd etiladi.

7-bob. Bozorlar, savdo komplekslari, ularga tutash boʻlgan avtomobil vositalarining toʻxtash joylarida soliq qonunchiligiga rioya etilishini tekshirish

40. Bozorlar, savdo komplekslari, ularga tutash boʻlgan avtomobil vositalarining toʻxtash joylarida soliq toʻgʻrisidagi qonunchilik hujjatlariga rioya etilishini tekshirish quyidagilardan iborat:

bir martalik yigʻimlar undirilishi, undirilgan yigʻimlarning nazorat-kassa texnikasi xotirasiga kiritilishi va bankka topshirilishini nazorat qilish;

bozorlar, savdo komplekslari va ularning filiallarida sotuvchi va xaridorlarga koʻrsatilgan xizmatlar uchun toʻlovlarning hamda bino va inshootlarni, shuningdek, buyumlarni ijaraga berish boʻyicha ijara toʻlovlarining oʻz vaqtida va toʻliq undirilishini tekshirish;

savdo va xizmat koʻrsatish qoidalarining bajarilishini tekshirish.

41. Bozorlar, savdo komplekslari, ularga tutash boʻlgan avtomobil vositalarining toʻxtash joylarida soliq toʻgʻrisidagi qonunchilik hujjatlariga rioya etilishini tekshirish natijasi boʻyicha aniqlangan holatlar, shu jumladan, soliqqa oid huquqbuzarlik holatlari sayyor soliq tekshiruvi dalolatnomasida qayd etiladi.

8-bob. Savdo va xizmat koʻrsatish qoidalariga rioya etilishini tekshirish

42. Soliq toʻlovchida savdo va xizmat koʻrsatish qoidalariga rioya etilishini tekshirish quyidagilarni aniqlash maqsadida oʻtkaziladi:

alkogol va tamaki mahsulotlarini sotish hamda markirovka qilish qoidalariga rioya etilganligi;

alkogol va tamaki mahsulotlarini sotish joylarida ularni 20 yoshga toʻlmagan shaxslarga sotishga yoʻl qoʻyilmasligi, shuningdek, alkogol va tamaki mahsulotlarining inson sogʻligʻiga salbiy taʼsiri toʻgʻrisidagi ogohlantiruvchi yozuv joylashtirilganligi;

savdo shoxobchasida sotuvchi — yuridik shaxs toʻgʻrisidagi maʼlumotlar, yaʼni korxonaning nomi, uning joylashgan joyi (pochta manzili va ish rejimi), agar sotuvchi yakka tartibdagi tadbirkor boʻlsa, uning davlat roʻyxatidan oʻtkazilganlik va roʻyxatdan oʻtkazgan organning nomi toʻgʻrisidagi maʼlumotlar xaridorlar tanishishi uchun qulay tarzda joylashtirilganligi;

agar sotuvchi amalga oshiradigan faoliyat litsenziyalanishi kerak boʻlsa, u litsenziyaning tartib raqami va amal qilish muddati toʻgʻrisidagi, shuningdek, uni bergan organ haqidagi maʼlumotlar xaridorlar tanishishi uchun qulay tarzda joylashtirilganligi;

sotuvchi tovarning nomi, uning sorti, markasi, modeli, tipi, tovarning ogʻirligi, oʻlchami yoki birligiga narxi koʻrsatilgan holda sotiladigan tovarlarning yagona namunadagi va aniq rasmiylashtirilgan narxnomalari boʻlishini taʼminlaganligi;

qimmatbaho metallar va qimmatbaho toshlardan yasalgan zargarlik hamda boshqa buyumlar bilan savdo amalga oshiradigan sotuvchi tomonidan qimmatbaho metallar va qimmatbaho toshlardan yasalgan buyumlarni sotish qoidalariga rioya etilishi, zargarlik buyumlarining asillik darajasi belgilanganligi va tamgʻalanganligi, shuningdek, kirim qilinmagan kontrafakt mahsulotlarning sotilishi holatlari mavjud emasligi;

qimmatbaho metallar va qimmatbaho toshlardan yasalgan zargarlik buyumlari parchalarini, ulardan tayyorlangan buyumlarni, shuningdek, qimmatbaho va yarim qimmatbaho toshlarni sotib olish punktlarida qimmatbaho metallar va qimmatbaho toshlardan yasalgan zargarlik va boshqa buyumlar, qimmatbaho va yarim qimmatbaho toshlarning chakana savdosi bilan shugʻullanish huquqi uchun berilgan roʻyxatdan oʻtkazish guvohnomasi mavjudligi, tovarlarni hisobga olish va pul operatsiyalarini yuritish boʻyicha qonunchilik hujjatlariga rioya qilinishi;

maishiy elektr priborlarining texnik hujjatlarida, markirovkasida va etiketkalarida energiya samaradorligining tegishli klassi toʻgʻrisidagi axborotlarning mavjudligi;

sotiladigan tovarlarning narxi koʻrsatilgan narxnomalarga egaligi;

umumiy ovqatlanish mahsulotlarini (xizmatlarni) ishlab chiqarish va sotish qoidalariga rioya etilishi;

chakana savdo va (yoki) umumiy ovqatlanish shoxobchasida alkogol mahsulotlari savdosi uchun ruxsat guvohnomalari mavjudligi va shoxobchaning ruxsat berish shartlariga muvofiqligi.

43. Savdo va xizmat koʻrsatish qoidalariga rioya etilishini tekshirish natijalari sayyor soliq tekshiruvi dalolatnomasida qayd etiladi.

9-bob. Soliq toʻlovchidan asosiy vositalar, tovar-moddiy boyliklar, pul mablagʻlari va hisob-kitoblarni soliq toʻlovchi (soliq agentlari) tomonidan xatlovdan oʻtkazishni talab qilish

44. Asosiy vositalar, tovar-moddiy boyliklar, pul mablagʻlari va hisob-kitoblarni soliq toʻlovchi (soliq agentlari) tomonidan xatlovdan oʻtkazish “Inventarizatsiyani tashkil etish va oʻtkazish” Oʻzbekiston Respublikasi Buxgalteriya hisobining milliy standarti 19-sonli BHMSga (roʻyxat raqami 833, 1999-yil 2-noyabr) muvofiq amalga oshiriladi.

Bunda, soliq toʻlovchining saqlanayotgan va savdo obyektlarida savdoga chiqarilgan tovarlarning kirim hujjatlari (hisobvaraq-fakturalar, yuk xatlari, nazorat-kassa texnikasi cheki yoki unga tenglashtirilgan boshqa hujjatlar) mavjudligi tekshiriladi.

45. Sayyor soliq tekshiruvi jarayonida, shuningdek, soliq organida mavjud maʼlumotlarga asosan asosiy vositalar, tovar-moddiy boyliklar, pul mablagʻlari va hisob-kitoblar mavjud emasligi aniqlanib, bu soliq toʻlovchining tilxati bilan tasdiqlanganda xatlovdan oʻtkazish amalga oshirilmaydi.

10-bob. Hujjatlar va buyumlarni olib qoʻyish

46. Hujjatlar va (yoki) buyumlarni olib qoʻyish sayyor soliq tekshiruvini oʻtkazuvchi mansabdor shaxsning mazkur Nizomning 5-ilovasiga muvofiq shaklda qabul qilingan qaror asosida amalga oshiriladi.

47. Sayyor soliq tekshiruvi jarayonida hujjatlar va (yoki) buyumlarni olib qoʻyish quyidagi hollarda amalga oshirilishi mumkin:

a) buyumlarni olib qoʻyish — tegishli ruxsatnomalarsiz, qalbaki aksiz markasi bilan yoki aksiz markasiz ishlab chiqarilgan yoki sotilayotgan alkogol va tamaki mahsulotlari aniqlangan taqdirda;

b) hujjatlarni olib qoʻyish:

sayyor soliq tekshiruvini oʻtkazishda talab qilingan hujjatlar soliq toʻlovchi tomonidan taqdim etilishi rad etilganda yoki belgilangan muddatlarda taqdim etilmaganda;

hujjatlarning koʻchirma nusxalari yetarli boʻlmasa hamda soliq organlarida hujjatlarning asl nusxalari yoʻq qilinishi, yashirilishi, oʻzgartirilishi yoki almashtirib qoʻyilishi mumkinligi toʻgʻrisida taxmin qilish uchun yetarlicha asoslar mavjud boʻlsa.

Hujjat va buyumlarni olib qoʻyish jarayoni videotasvirga tushiriladi.

Mazkur bandda nazarda tutilmagan hollarda buyumlarni olib qoʻyish taqiqlanadi.

48. Soliq toʻlovchi faoliyatining toʻxtab qolishiga olib keladigan hujjatlar va buyumlarni olib qoʻyish faqat sudning qarori asosida amalga oshiriladi.

49. Sayyor soliq tekshiruvi jarayonida olib qoʻyilgan buyumlarning oʻzgartirilishiga (tovar turi, hajmi, miqdori, qiymati va boshqa oʻziga xos belgilari) yoʻl qoʻyilmaydi.

50. Sayyor soliq tekshiruvi jarayonida hujjatlar va (yoki) buyumlarni tungi paytda (soat 23-00 dan 06-00 ga qadar boʻlgan vaqt oraligʻida) olib qoʻyishga yoʻl qoʻyilmaydi.

51. Sayyor soliq tekshiruvi jarayonida hujjatlar va buyumlarni olib qoʻyish xolislar hamda hujjatlari va buyumlarini olib qoʻyish amalga oshirilayotgan shaxslar ishtirokida oʻtkaziladi.

Zarur boʻlgan hollarda, olib qoʻyishni amalga oshirishda ishtirok etish uchun mutaxassis taklif etilishi mumkin.

52. Hujjatlar va buyumlarni olib qoʻyish boshlanguniga qadar sayyor soliq tekshiruvini oʻtkazuvchi mansabdor shaxs soliq toʻlovchiga hujjatlar va buyumlarni olib qoʻyishni amalga oshirish toʻgʻrisidagi qarorni taqdim etadi hamda uning huquq va majburiyatlarini tushuntiradi.

53. Sayyor soliq tekshiruvini oʻtkazuvchi mansabdor shaxs hujjatlar va (yoki) buyumlarini olib qoʻyish amalga oshirilayotgan shaxsga ularni oʻz ixtiyori bilan topshirishni taklif etadi, taklif rad etilgan taqdirda esa, olib qoʻyishni majburiy tarzda amalga oshiradi.

Oʻziga nisbatan olib qoʻyish amalga oshirilayotgan shaxs olib qoʻyilishi lozim boʻlgan hujjatlar va buyumlar saqlanishi mumkin boʻlgan binolarni yoki boshqa joylarni ochishdan bosh tortganda, sayyor soliq tekshiruvini oʻtkazuvchi mansabdor shaxs tambalarga, eshiklarga va boshqa buyumlarga zarurat sababli yuzaga kelmagan shikast yetkazishdan qochib olib qoʻyishni mustaqil tarzda bajarishga haqli.

54. Sayyor soliq tekshiruvi jarayonida hujjatlar va buyumlarni olishda ushbu Nizomning 6-ilovasiga muvofiq shaklda ikki nusxada hujjatlar va buyumlarni olib qoʻyish toʻgʻrisida bayonnoma rasmiylashtiriladi.

Hujjatlar va buyumlarni olib qoʻyish toʻgʻrisidagi bayonnomaning bir nusxasi soliq toʻlovchiga imzo qoʻydirib topshiriladi.

Soliq toʻlovchi hujjatlar va buyumlarni olib qoʻyish toʻgʻrisidagi bayonnomani imzolash va (yoki) olishdan bosh tortgan hollarda ushbu haqida bayonnomaga tegishli yozuv kiritiladi va soliq toʻlovchiga pochta orqali buyurtma xat bilan yuboriladi.

55. Soliq toʻlovchi talab qilingan hujjatlar va buyumlarni taqdim etishdan, binolarni yoki boshqa joylarni ochishdan bosh tortgan taqdirda, bu haqda sayyor soliq tekshiruvini oʻtkazuvchi mansabdor shaxs tomonidan tuzilgan hujjatlar va buyumlarni olib qoʻyish toʻgʻrisida bayonnomada yozuv kiritiladi.

11-bob. Sayyor soliq tekshiruvi natijalarini rasmiylashtirish

56. Sayyor soliq tekshiruvida soliq toʻlovchi tomonidan sayyor soliq tekshiruvini oʻtkazuvchi mansabdor shaxsning oʻz hududi va binolariga kirishiga toʻsqinlik qilingan taqdirda, sayyor soliq tekshiruvini oʻtkazuvchi mansabdor shaxs tomonidan mazkur Nizomning 7-ilovasiga muvofiq dalolatnoma tuziladi.

Bunday dalolatnoma asosida soliq organi soliq toʻlovchi toʻgʻrisida oʻzida mavjud boʻlgan maʼlumotlar yoki xuddi shunday soliq toʻlovchilar toʻgʻrisidagi maʼlumotlar asosida toʻlanishi lozim boʻlgan soliq summasini mustaqil tarzda aniqlashga haqli.

Dalolatnoma sayyor soliq tekshiruvini oʻtkazuvchi mansabdor shaxs va soliq toʻlovchi tomonidan imzolanadi. Soliq toʻlovchi koʻrsatilgan dalolatnomani imzolashni rad etgan taqdirda, mazkur dalolatnomaga tegishli yozuv kiritiladi.

57. Sayyor soliq tekshiruvi natijalari boʻyicha sayyor soliq tekshiruvini oʻtkazuvchi mansabdor shaxs tomonidan mazkur Nizomning 8-ilovasiga muvofiq shaklda qatʼiy hisobda turadigan sayyor soliq tekshiruvi dalolatnomasi tuziladi.

58. Sayyor soliq tekshiruvi dalolatnomasi ikki nusxada tuziladi va soliq organi mansabdor shaxslari hamda soliq toʻlovchi tomonidan imzolanadi.

Sayyor soliq tekshiruvi dalolatnomasining bir nusxasi soliq toʻlovchiga dalolatnoma bilan tanishib chiqib, uni olganligi va sanasi koʻrsatilgan imzosi orqali topshiriladi.

59. Soliq toʻlovchi sayyor soliq tekshiruvi dalolatnomasini olishdan bosh tortganda, ushbu dalolatnomaga tegishli yozuv kiritiladi va uning nusxasi elektron hujjat tarzida soliq toʻlovchining shaxsiy kabinetiga yuboradi yuboriladi. Yuborilgan hujjatlar soliq toʻlovchi tomonidan oʻqib chiqilganidan keyin, lekin ushbu hujjat joʻnatilgan sanadan eʼtiboran uch kundan kechiktirmay olingan deb hisoblanadi.

Agar soliq toʻlovchida soliq toʻlovchining shaxsiy kabineti mavjud boʻlmasa, dalolatnoma pochta orqali buyurtma xat bilan yuboriladi va u joʻnatilganidan soʻng besh kundan keyin olingan deb hisoblanadi.

60. Sayyor soliq tekshiruvi dalolatnomasi soliq toʻlovchiga topshirilgan kun yoki unga yuborilgan kun soliq tekshiruvi yakunlangan kun deb hisoblanadi.

61. Sayyor soliq tekshiruvini oʻtkazish uchun asos boʻlgan hujjatlarning nusxalari, tekshiruv davomida rasmiylashtirilgan hujjatlar, ekspert va mutaxassislar xulosalari, sayyor soliq tekshiruvi davomida olingan materiallar, shuningdek, sayyor soliq tekshiruvi doirasidagi harakatlarning bajarilishini tasdiqlovchi boshqa hujjatlar sayyor soliq tekshiruvi dalolatnomasiga ilova qilinadi.

62. Sayyor soliq tekshiruvi davomida soliq toʻgʻrisidagi qonunchilik hujjatlarining buzilishi faktlari aniqlangan taqdirda, aniqlangan soliqqa oid huquqbuzarliklar boʻyicha ish yuritish Soliq kodeksida belgilangan tartibda amalga oshiriladi.

12-bob. Yakuniy qoidalar

63. Ushbu Nizomning talablarini buzganlikda aybdor shaxslar qonunchilik hujjatlarida belgilangan tartibda javobgar boʻladilar.

64. Ushbu Nizom Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil va Savdo-sanoat palatasi bilan kelishilgan.

Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil D. QOSIMOV

2020-yil 18-may

Oʻzbekiston Respublikasi Savdo-sanoat palatasi raisi A. IKRAMOV

2020-yil 18-may

Sayyor soliq tekshiruvini oʻtkazish tartibi toʻgʻrisidagi nizomga 1-ILOVA

Sayyor soliq tekshiruvini oʻtkazish tartibi toʻgʻrisidagi nizomga 2-ILOVA

Izoh:

* — bayonnomani bir nechta shaxs tuzgan boʻlsa, ularning barchasi toʻldiradi.

Sayyor soliq tekshiruvini oʻtkazish tartibi toʻgʻrisidagi nizomga 3-ILOVA

Sayyor soliq tekshiruvini oʻtkazish tartibi toʻgʻrisidagi nizomga 4-ILOVA

________________________________________ da (STIR _________________) (soliq toʻlovchining nomi) sayyor soliq tekshiruvi jarayonida aniqlangan xodimlar ROʻYXATI T/r STIR Xodimning F.I.O. Lavozimi Ish haqi miqdori (soʻmda) Pasport maʼlumoti Haqiqatda ishga qabul qilingan davri Telefon raqami Hisobotdagi holati seriyasi raqami oy yil 1. 2. 3. 4. 5. ... Roʻyxatni tuzgan soliq organi xodimi: ______________ __________________________________ (imzo) (F.I.O.) Soliq toʻlovchi: ______________ __________________________________ (imzo) (F.I.O.)

Sayyor soliq tekshiruvini oʻtkazish tartibi toʻgʻrisidagi nizomga 5-ILOVA

Sayyor soliq tekshiruvini oʻtkazish tartibi toʻgʻrisidagi nizomga 6-ILOVA

Sayyor soliq tekshiruvini oʻtkazish tartibi toʻgʻrisidagi nizomga 7-ILOVA

(7-ilovaning matni Oʻzbekiston Respublikasi adliya vazirining 2021-yil 28-iyuldagi 16-mh-sonli buyrugʻi (roʻyxat raqami 3313, 28.07.2021-y.) tahririda — Qonunchilik maʼlumotlari milliy bazasi, 28.07.2021-y., 10/21/3313/0724-son)

Sayyor soliq tekshiruvini oʻtkazish tartibi toʻgʻrisidagi nizomga 8-ILOVA

(Qonun hujjatlari maʼlumotlari milliy bazasi, 18.06.2020-y., 10/20/3247/0803-son; Qonunchilik maʼlumotlari milliy bazasi, 28.07.2021-y., 10/21/3313/0724-son)