Toshkent viloyatining Boʻstonliq tumanida tajriba tariqasida jismoniy shaxslarning soliq solish obyektlari hisobga qoʻyilganligi toʻgʻrisida guvohnoma berish, yagona elektron platformani yuritish va unga koʻchmas mulk obyektlari ijaraga berilganligi toʻgʻrisidagi maʼlumotlarni kiritish tartibi haqida vaqtinchalik nizomni tasdiqlash toʻgʻrisida (3243-son)
12.06.2020
Oʻzbekiston Respublikasi Davlat soliq qoʻmitasining
Qarori
[Oʻzbekiston Respublikasi Adliya vazirligi tomonidan 2020-yil 12-iyunda roʻyxatidan oʻtkazildi, roʻyxat raqami 3243]
Oʻzbekiston Respublikasi Vazirlar Mahkamasining 2020-yil 20-fevraldagi “Toshkent viloyatining Boʻstonliq tumanida tajriba tariqasida soliq solish obyektlarini hisobga olish va soliq maʼmuriyatchiligining alohida tartibini joriy etish toʻgʻrisida”gi 107-son qaroriga muvofiq Oʻzbekiston Respublikasi Davlat soliq qoʻmitasi qaror qiladi:
1. Toshkent viloyatining Boʻstonliq tumanida tajriba tariqasida jismoniy shaxslarning soliq solish obyektlari hisobga qoʻyilganligi toʻgʻrisida guvohnoma berish, yagona elektron platformani yuritish va unga koʻchmas mulk obyektlari ijaraga berilganligi toʻgʻrisidagi maʼlumotlarni kiritish tartibi haqida vaqtinchalik nizom ilovaga muvofiq tasdiqlansin.
2. Mazkur qaror rasmiy eʼlon qilingan kundan eʼtiboran kuchga kiradi.
3. Mazkur qaror 2021-yil 1-mayga qadar amal qiladi.
Davlat soliq qoʻmitasi raisi Sh. KUDBIYEV
Toshkent sh.,
2020-yil 25-may,
2020-20-son
Oʻzbekiston Respublikasi Davlat soliq qoʻmitasining 2020-yil 25-maydagi 2020-20-son qaroriga ILOVA
Toshkent viloyatining Boʻstonliq tumanida tajriba tariqasida jismoniy shaxslarning soliq solish obyektlari hisobga qoʻyilganligi toʻgʻrisida guvohnoma berish, yagona elektron platformani yuritish va unga koʻchmas mulk obyektlari ijaraga berilganligi toʻgʻrisidagi maʼlumotlarni kiritish tartibi haqida
VAQTINChALIK NIZOM
Mazkur Vaqtinchalik nizom (bundan buyon matnda Nizom deb yuritiladi) Oʻzbekiston Respublikasi Vazirlar Mahkamasining 2020-yil 20-fevraldagi 107-son “Toshkent viloyatining Boʻstonliq tumanida tajriba tariqasida soliq solish obyektlarini hisobga olish va soliq maʼmuriyatchiligining alohida tartibini joriy etish toʻgʻrisida”gi qaroriga muvofiq Toshkent viloyatining Boʻstonliq tumanida tajriba tariqasida jismoniy shaxslarning soliq solish obyektlarini hisobga qoʻyilganligi toʻgʻrisida guvohnomani berish, Oʻzbekiston Respublikasi Davlat soliq qoʻmitasining yagona elektron platformasini (bundan buyon matnda elektron platforma deb yuritiladi) yuritish va unga koʻchmas mulk obyektlari, shuningdek ayrim mol-mulk turlarining ijaraga berilganligi toʻgʻrisidagi maʼlumotlarni kiritish tartibini belgilaydi.
1-bob. Umumiy qoidalar
1. Tajriba davrida jismoniy shaxslar tomonidan dam olish uylari, dala hovli, yakka tartibda qurilgan uy-joylar va yashash uchun moʻljallangan boshqa turar joylar (bundan buyon matnda koʻchmas mulk obyektlari deb yuritiladi), shuningdek ayrim mol-mulk turlari (bundan buyon matnda ayrim mol-mulklar deb yuritiladi) soliq organlarida hisobga qoʻyilganligi toʻgʻrisidagi guvohnoma asosida ijaraga beriladi.
2. Jismoniy shaxslar tomonidan koʻchmas mulk obyektlari soliq organlarida hisobga qoʻyilganligi toʻgʻrisidagi guvohnoma asosida ijaraga berilgan taqdirda, Koʻchmas mulk ijara shartnomalarini davlat soliq xizmati organlarida majburiy hisobga qoʻyish tartibi toʻgʻrisida nizomga (roʻyxat raqami 3077, 2018-yil 11-oktabr) asosan koʻchmas mulk ijara shartnomasini tuzish va uni soliq organlarida majburiy hisobga qoʻyish talab etilmaydi.
3. Jismoniy shaxslarning daromad manbai sifatida soliq organlarida hisobga qoʻyiladigan ayrim mol-mulklarga quyidagilar kiradi:
suv transporti (motorli va motorsiz, shu jumladan shishiriladigan);
suv mototsikllari (skutyerlar va boshqalar);
qorda yuradigan texnika vositalari (qor avtoulovi);
kvadratsikllar;
paraplanlar va deltaplanlar;
supa, soʻri, topchanlar va shunga oʻxshash dam olish uchun moʻljallangan.
4. Jismoniy shaxslar tomonidan guvohnoma asosida ijaraga berilgan soliq solish obyektlari haqidagi maʼlumotlar elektron platformaga mobil ilova yoki veb-sayt orqali kiritilishi lozim.
5. Mazkur Nizom talablari tadbirkorlik subyekti sifatida davlat roʻyxatidan oʻtgan mehmonxona xizmati bilan shugʻullanadigan yuridik shaxslarga, oilaviy mehmon uyi xizmatlari koʻrsatadigan yuridik va jismoniy shaxslarga, shuningdek ushbu Nizomda koʻrsatilmagan mol-mulklarni ijaraga berish bilan shugʻullanadigan jismoniy shaxslarga nisbatan tatbiq etilmaydi.
2-bob. Soliq solish obyektlarini soliq organlarida hisobga qoʻyilganligi toʻgʻrisida guvohnoma berish
6. Jismoniy shaxs yoki uning ishonchli vakili ijaraga beriladigan soliq solish obyektini hisobga qoʻyilganligi toʻgʻrisidagi guvohnomani olish uchun soliq organiga quyidagi hujjatlarni elektron platforma orqali yuboradi:
mazkur Nizomning 1-ilovasiga muvofiq shaklda koʻchmas mulk obyektini hisobga qoʻyish haqida yoki 2-ilovasiga muvofiq shaklda ayrim mol-mulkni hisobga qoʻyish haqida ariza;
jismoniy shaxsning shaxsini yoki uning ishonchli vakili vakolatini tasdiqlovchi hujjat nusxasi.
7. Ikki va undan ortiq soliq solish obyektlarini hisobga qoʻyish istagini bildirgan jismoniy shaxslar ushbu soliq solish obyektlari toʻgʻrisidagi maʼlumotlarni soliq solish obyektlarini hisobga qoʻyish haqidagi arizalarida qoʻshimcha ravishda koʻrsatishlari mumkin.
8. Jismoniy shaxslardan mazkur Nizomning 6-bandida koʻrsatilgan hujjatlardan tashqari boshqa qoʻshimcha hujjatlar talab qilinishiga yoʻl qoʻyilmaydi.
9. Ijaraga beriladigan soliq solish obyektini hisobga qoʻyish bilan bogʻliq mazkur Nizomning 6-bandida nazarda tutilgan hujjatlar ijaraga beruvchi yoki uning ishonchli vakili xohishiga koʻra Toshkent viloyatining Boʻstonliq tumani Gʻazalkent shahri, Doʻstlik, Sijjak va Novobod mahalla fuqarolar yigʻinlari hududlarida tashkil etiladigan soliq tayanch punktlariga (bundan buyon matnda Soliq tayanch punkti deb yuritiladi) qogʻoz shaklida taqdim etilishi mumkin.
10. Koʻchmas mulk obyektlari va ayrim mol-mulklarni hisobga qoʻyish jismoniy shaxs tomonidan ariza elektron platforma orqali elektron tarzda taqdim etilganda real vaqt rejimida, Soliq tayanch punktlariga qogʻoz shaklida taqdim etilganda esa, oʻsha vaqtning oʻzida amalga oshiriladi.
11. Ijaraga beriladigan soliq solish obyektlarining hisobga qoʻyilganligi toʻgʻrisidagi guvohnoma jismoniy shaxs tomonidan ariza elektron tarzda taqdim etilganda elektron platforma orqali yoki qogʻoz shaklida taqdim etilganda Soliq tayanch punktlari tomonidan ushbu Nizomning 3-ilovasiga muvofiq shaklda bepul beriladi.
12. Ikki va undan ortiq soliq solish obyektlariga ega boʻlgan jismoniy shaxslarga bitta umumiy soliq solish obyektini hisobga qoʻyilganligi toʻgʻrisida guvohnoma beriladi. Guvohnomaning orqa tomonida QR-kod orqali har bir qoʻshimcha soliq solish obyektlari alohida koʻrsatiladi. Bunda supa, soʻri, topchanlar va shunga oʻxshash dam olish uchun moʻljallangan joylarga guvohnoma berishda soliq solish obyektining nomi bilan birga uning soni ham koʻrsatiladi.
13. Guvohnomaning haqiqiyligi QR-kodni maxsus mobil ilova orqali tekshirib koʻrish bilan aniqlanadi.
3-bob. Yagona elektron platformani yuritish va unga ijaraga beriladigan obyektlar toʻgʻrisidagi maʼlumotlarni kiritish
14. Elektron platformada soliq organlari tomonidan jismoniy shaxslarning ijaraga berilgan koʻchmas mulk obyektlari va ayrim mol-mulklarning hisobi yuritiladi.
Bunda, elektron platforma barcha foydalanuvchilar (ijaraga beruvchilar, ijaraga oluvchilar va soliq organlari) uchun yagona tizim doirasida oʻzaro uygʻunlikda, undan foydalanuvchilar guruhlarga ajratilgan va bir-biriga taʼsir koʻrsatmagan holda mustaqil ishlash imkoniyatiga ega boʻladi.
15. Elektron platformada koʻchmas mulk obyektlari va ayrim mol-mulklarni ijaraga olish istagini bildirgan shaxslar ijaraga beruvchi jismoniy shaxslarning soliq solish obyektlari toʻgʻrisidagi maʼlumotlari asosida tanlashlari, ularni onlayn band qilishlari va toʻlovlarni amalga oshirishlari mumkin.
16. Koʻchmas mulk obyektlari va ayrim mol-mulklarni ijaraga berish soliq organlarida hisobga olinadigan maxsus cheklarni taqdim etish orqali amalga oshiriladi.
17. Jismoniy shaxslar koʻchmas mulk obyektlarini ijaraga berilgan vaqtda hamda ayrim mol-mulklarni ijaraga berilgan kun yakuniga qadar ijaraga oluvchilar soni va maxsus cheklar orqali qabul qilingan ijara toʻlovi miqdori toʻgʻrisidagi maʼlumotlarni mobil ilova yoki veb-sayt orqali elektron platformaga kiritadilar.
Bunda, ikki va undan ortiq soliq solish obyektlari hisobga qoʻyilgan jismoniy shaxslar tomonidan maʼlumotlar elektron platformaga har bir soliq solish obyekti boʻyicha alohida kiritilishi lozim.
18. Jismoniy shaxslar tomonidan ijaraga berilgan soliq solish obyektlari uchun taqdim etiladigan maxsus cheklar Oʻzbekiston Respublikasi Soliq kodeksining 22-moddasiga muvofiq tovarlarni (xizmatlarni) realizatsiya qilishda xaridorga beriladigan cheklar yoki ularni oʻrnini bosuvchi boshqa hujjatlarga tenglashtiriladi.
4-bob. Soliq solish obyektlarining hisobga qoʻyilganligi toʻgʻrisidagi guvohnomani bekor qilish
19. Soliq solish obyektlarining hisobga qoʻyilganligi toʻgʻrisidagi guvohnomaning amal qilish muddati tajriba davri tugaganidan keyin tugatiladi.
20. Jismoniy shaxslar yoki ularning ishonchli vakillari koʻchmas mulk obyektlari va ayrim mol-mulklar boshqa shaxs egaligiga oʻtganda yoki buzilganda (yaroqsiz holatga kelganda) soliq solish obyektining hisobga qoʻyilganligi toʻgʻrisidagi guvohnomani bekor qilish haqida mazkur Nizomning 4-ilovasiga muvofiq shakldagi ariza bilan elektron platforma orqali soliq organlariga yoki qogʻoz shaklda Soliq tayanch punktiga murojaat qilishlari mumkin.
Bunda, ikki va undan ortiq soliq solish obyektlarining hisobga qoʻyilganligini bekor qilish istagini bildirgan jismoniy shaxslar arizaga tegishli soliq solish obyektlari toʻgʻrisidagi qoʻshimcha maʼlumotlarni kiritadi.
21. Soliq solish obyektlarining hisobga qoʻyilganligi toʻgʻrisidagi guvohnomani bekor qilish jismoniy shaxs tomonidan ariza soliq organiga elektron platforma orqali taqdim etilganda real vaqt rejimida, Soliq tayanch punktlarida qogʻoz shaklida taqdim etilganda esa oʻsha vaqtning oʻzida amalga oshiriladi.
22. Soliq solish obyektlarining hisobga qoʻyilganligi toʻgʻrisidagi guvohnomani bekor qilinganligi haqida mazkur Nizomning 5-ilovasiga muvofiq shaklda QR-kodi mavjud boʻlgan bildirishnoma elektron tarzda elektron platforma orqali yoki qogʻoz shaklida Soliq tayanch punkti orqali ijaraga beruvchi jismoniy shaxsga yoxud uning ishonchli vakiliga taqdim etiladi.
Bunda, hisobga qoʻyilganligi bekor qilingan soliq solish obyekti QR-kodi tekshirilganda “Bunday obyekt mavjud emas” yozuvi elektron shaklda havola qilinadi.
23. Soliq solish obyektlarining hisobga qoʻyilganligi toʻgʻrisidagi guvohnomani bekor qilinganligi haqidagi bildirishnomaning haqiqiyligi QR-kodni maxsus mobil ilova orqali tekshirib koʻrish orqali aniqlanadi. Bildirishnomaning QR-kodi tekshirilganda hisobga qoʻyilgan soliq solish obyektlari haqidagi maʼlumotlar elektron shaklda havola qilinadi.
5-bob. Yakuniy qoidalar
24. Mazkur Nizom talablarining buzilishida aybdor boʻlgan shaxslar qonun hujjatlarida belgilangan tartibda javobgarlikka tortiladilar.
25. Ushbu Nizom Oʻzbekiston Respublikasi Moliya vazirligi, Axborot texnologiyalari va kommunikatsiyalarini rivojlantirish vazirligi, Turizmni rivojlantirish davlat qoʻmitasi va Savdo-sanoat palatasi bilan kelishilgan.
Moliya vaziri T. IShMETOV
2020-yil 25-may
Axborot texnologiyalari va kommunikatsiyalarini rivojlantirish vaziri Sh. SADIKOV
2020-yil 25-may
Turizmni rivojlantirish davlat qoʻmitasi raisi A. ABDUXAKIMOV
2020-yil 25-may
Savdo-sanoat palatasi raisi A. IKRAMOV
2020-yil 25-may
Toshkent viloyatining Boʻstonliq tumanida tajriba tariqasida jismoniy shaxslarning soliq solish obyektlari hisobga qoʻyilganligi toʻgʻrisida guvohnoma berish, yagona elektron platformani yuritish va unga koʻchmas mulk obyektlari ijaraga berilganligi toʻgʻrisidagi maʼlumotlarni kiritish tartibi haqida vaqtinchalik nizomga 1-ILOVA
* Koʻchmas mulkning mavjud imkoniyatlari ixtiyoriy ravishda kiritiladi. Bunda koʻchmas mulkning imkoniyatlari tegishliligi boʻyicha soni koʻrsatiladi, mavjud boʻlsa “+” yoki mavjud boʻlmasa “—” belgilari qoʻyiladi.
Toshkent viloyatining Boʻstonliq tumanida tajriba tariqasida jismoniy shaxslarning soliq solish obyektlari hisobga qoʻyilganligi toʻgʻrisida guvohnoma berish, yagona elektron platformani yuritish va unga koʻchmas mulk obyektlari ijaraga berilganligi toʻgʻrisidagi maʼlumotlarni kiritish tartibi haqida vaqtinchalik nizomga 2-ILOVA
* Mol-mulk turining mavjud imkoniyatlari ixtiyoriy ravishda kiritiladi. Bunda mol-mulk turining imkoniyatlari tegishliligi boʻyicha raqami koʻrsatiladi, mavjud boʻlsa “+” yoki mavjud boʻlmasa “—” belgilari qoʻyiladi.
Toshkent viloyatining Boʻstonliq tumanida tajriba tariqasida jismoniy shaxslarning soliq solish obyektlari hisobga qoʻyilganligi toʻgʻrisida guvohnoma berish, yagona elektron platformani yuritish va unga koʻchmas mulk obyektlari ijaraga berilganligi toʻgʻrisidagi maʼlumotlarni kiritish tartibi haqida vaqtinchalik nizomga 3-ILOVA
Izoh: Mazkur guvohnoma faqat Boʻstonliq tumanida amal qiladi.
Toshkent viloyatining Boʻstonliq tumanida tajriba tariqasida jismoniy shaxslarning soliq solish obyektlari hisobga qoʻyilganligi toʻgʻrisida guvohnoma berish, yagona elektron platformani yuritish va unga koʻchmas mulk obyektlari ijaraga berilganligi toʻgʻrisidagi maʼlumotlarni kiritish tartibi haqida vaqtinchalik nizomga 4-ILOVA
Toshkent viloyatining Boʻstonliq tumanida tajriba tariqasida jismoniy shaxslarning soliq solish obyektlari hisobga qoʻyilganligi toʻgʻrisida guvohnoma berish, yagona elektron platformani yuritish va unga koʻchmas mulk obyektlari ijaraga berilganligi toʻgʻrisidagi maʼlumotlarni kiritish tartibi haqida vaqtinchalik nizomga 5-ILOVA
Izoh: Mazkur hujjatning haqiqiyligini tekshirish uchun QR-kodni maxsus mobil ilova orqali tekshirib koʻrishingiz yoki ushbu havolaga (koʻchmas mulk obyektining kadastr hujjati va ayrim mol-mulkning texnik pasporti elektron shakliga havola) kirib koʻrishingiz mumkin.