Oʻzbekiston Respublikasining davlat mulkini respublika va maʼmuriy-hududiy tuzilmalarning mulkiga (kommunal mulkka) boʻlish tartibini tasdiqlash toʻgʻrisida (355-son)

29.07.1992

Oʻzbekiston Respublikasi Prezidenti huzuridagi Vazirlar Mahkamasining

qarori

Davlat mulkiga egalik qilishda, foydalanishda va uni tasarruf etishda respublika va hududiy boshqaruv organlarining vakolatlarini cheklash zarurati munosabati bilan Vazirlar Mahkamasi qaror qiladi:

1. Oʻzbekiston Respublikasining davlat mulkini respublika va maʼmuriy-hududiy tuzilmalarning mulkiga (kommunal mulkka) boʻlishning ilova qilinayotgan tartibi tasdiqlansin.

2. Qoraqalpogʻiston Respublikasi Vazirlar Kengashi, viloyatlar va Toshkent shahar hokimlari bir oy muddat ichida korxonalar va tashkilotlarni maʼmuriy-hududiy tuzilmalarning mulkiga (kommunal mulkka) berish toʻgʻrisida vazirliklar, idoralar, konsernlar va uyushmalar bilan kelishilgan takliflarni Oʻzbekiston Respublikasi davlat mulkini boshqarish va xususiylashtirish qoʻmitasiga kiritsinlar.

Davlat mulkini boshqarish va xususiylashtirish qoʻmitasi Oʻzbekiston Respublikasi Davlat statistika qoʻmitasi bilan birgalikda materiallarni olgandan keyin maʼmuriy-hududiy tuzilmalarning mulkiga (kommunal mulkka) tegishli boʻlgan obyektlarning roʻyxati boʻyicha takliflarni tayyorlasin va bir oy muddat ichida Vazirlar Mahkamasiga kiritsin.

3. Mazkur qarorning bajarilishini nazorat qilish Bosh vazir oʻrinbosarlari zimmasiga yuklatilsin.

Vazirlar Mahkamasi Raisining birinchi oʻrinbosari I. JOʻRABEKOV

Toshkent sh.,

1992-yil 29-iyul,

355-son

Vazirlar Mahkamasining 1992-yil 29-iyuldagi Z55-son qaroriga ILOVA

Oʻzbekiston Respublikasining davlat mulkini respublika va maʼmuriy-hududiy tuzilmalar mulkiga (kommunal mulkka) boʻlish

TARTIBI

Mazkur Tartib Oʻzbekiston Respublikasining “Mulk toʻgʻrisida” hamda “Mulkni davlat tasarrufidan chiqarish va xususiylashtirish toʻgʻrisida”gi qonunlariga muvofiq Oʻzbekiston Respublikasining davlat mulkini respublika va maʼmuriy-hududiy tuzilmalarning mulkiga boʻlish tartibini belgilaydi.

1. Oʻzbekiston Respublikasining davlat mulkini respublika va maʼmuriy-hududiy tuzilmalarning mulkiga boʻlish mol-mulkni Oʻzbekiston Respublikasining balansidan Qoraqalpogʻiston Respublikasi va xalq deputatlari mahalliy Kengashlarining balansiga bepul oʻtkazish asosida amalga oshiriladi.

2. Oʻzbekiston Respublikasining davlat mulkini respublika va maʼmuriy-hududiy tuzilmalarning mulkiga boʻlish toʻgʻrisidagi qarorini Oʻzbekiston Respublikasi Oliy Kengashi qabul qiladi.

Oʻzbekiston Respublikasining davlat mulkini boʻlish boʻyicha materiallarni tayyorlashni va bu ishlarni oʻtkazishni Oʻzbekiston Respublikasi davlat mulkini boshqarish va xususiylashtirish qoʻmitasi amalga oshiradi.

3. Oʻzbekiston Respublikasining “Mulk toʻgʻrisida”gi Qonunining 21-moddasida nazarda tutilgan obyektlar boʻlinmaydi.

4. Boʻlish vaqtida Qoraqalpogʻiston Respublikasi hokimiyat va boshqaruv organlari, viloyatlar, Toshkent shahar hokimliklari va boshqa maʼmuriy-hududiy tuzilmalarning balansida boʻlgan obyektlar shak-shubhasiz tartibda ularning mulki boʻlib qoladi.

5. Mazkur Tartibning 3, 4-bandlarida koʻrsatilmagan davlat mulki obyektlari Oʻzbekiston Respublikasining davlat mulkida boʻladi va Qoraqalpogʻiston Respublikasi va maʼmuriy-hududiy tuzilmalarning mulki qilib berilishi mumkin.

6. Qoraqalpogʻiston Respublikasi hokimiyat va boshqaruv organlari, viloyatlar va Toshkent shahar hokimliklari Qoraqalpogʻiston Respublikasi mulkiga va viloyatlar, nohiyalar, shaharlar va boshqa maʼmuriy-hududiy tuzilmalarning kommunal mulkiga berish taklif qilinayotgan davlat mulki boʻlgan korxonalar va tashkilotlarning vazirliklar, idoralar, konsernlar va uyushmalar bilan kelishilgan roʻyxatlarini Oʻzbekiston Respublikasi davlat mulkini boshqarish va xususiylashtirish qoʻmitasiga taqdim etadilar.

Viloyatlar va Toshkent shahar hokimlari quyi maʼmuriy-hududiy tuzilmalar hokimlarining taqdimnomasi boʻyicha hamda tomonlarning oʻzaro kelishuviga koʻra kommunal mulkka berilishi moʻljallangan mol-mulkning roʻyxatini oldindan tuzadilar.

Oʻzbekiston Respublikasi davlat mulkini boshqarish va xususiylashtirish qoʻmitasi Qoraqalpogʻiston Respublikasi hokimiyat va boshqaruv organlari, viloyatlar va Toshkent shahar hokimliklari taqdim qilgan Qoraqalpogʻiston Respublikasi va maʼmuriy-hududiy tuzilmalarning mulki qilib berilishi moʻljallangan obyektlarning roʻyxatini koʻrib chiqadi hamda Vazirlar Mahkamasiga tegishli takliflar kiritadi.

Davlat mulkining berishga moʻljallangan kelishilgan roʻyxati boʻyicha Qoraqalpogʻiston Respublikasiga, xalq deputatlari viloyat, nohiya, shahar va boshqa maʼmuriy-hududiy tuzilmalarning Kengashlariga mulkdor huquqlarini berish toʻgʻrisidagi qarorni Oʻzbekiston Respublikasi Oliy Kengashi qabul qiladi.

7. Qoraqalpogʻiston Respublikasi Oʻzbekiston Respublikasining qonunchiligiga zid kelmaydigan Qoraqalpogʻiston Respublikasining “Mulk toʻgʻrisida” Qonuniga muvofiq oʻziga tegishli boʻlgan mol-mulkka egalik qilishni, undan foydalanishni va uni tasarruf etishni amalga oshiradi.

Qoraqalpogʻiston Respublikasining mulkini uning respublika mulkiga hamda oʻz tarkibiga kiruvchi maʼmuriy-hududiy tuzilmalarning mulkiga boʻlish Qoraqalpogʻiston Respublikasining qonunchiligiga muvofiq amalga oshiriladi.

8. Oʻzbekiston Respublikasi Prezidenti huzuridagi Vazirlar Mahkamasi davlat tasarrufidan chiqariladigan va xususiylashtiriladigan davlat mulki boʻyicha zarurat boʻlganda respublika mulkida boʻlgan mol-mulkning bir qismini Oʻzbekiston Respublikasi, Qoraqalpogʻiston Respublikasi, viloyatlar, nohiyalar va shaharlarning birgalikdagi boshqaruviga berishi mumkin.

Qoraqalpogʻiston Respublikasi hokimiyat va boshqaruv organlari hamda mahalliy Kengashlar zarurat boʻlganda oʻzlariga tegishli mol-mulkning bir qismini birgalikda boshqarish uchun Oʻzbekiston Respublikasiga berishlari mumkin.

9. Oʻzbekiston Respublikasi, Qoraqalpogʻiston Respublikasi, viloyatlar, shaharlar, nohiyalar va boshqa maʼmuriy-hududiy tuzilmalar oʻrtasida mulkni taqsimlashda obyektlar tarkibi boʻyicha kelishmovchiliklarni hal qilish Oʻzbekiston Respublikasi Oliy Kengashi tomonidan amalga oshiriladi.

Qoraqalpogʻiston Respublikasi va uning maʼmuriy-hududiy tuzilmalari oʻrtasidagi mulkni taqsimlashda obyektlar tarkibi boʻyicha kelishmovchiliklarni hal qilish Qoraqalpogʻiston Respublikasining qonunchiligiga muvofiq amalga oshiriladi.

10. Qoraqalpogʻiston Respublikasining mulkini respublika mulkiga va uning tarkibiga kiruvchi maʼmuriy-hududiy tuzilmalarning mulkiga boʻlish toʻgʻrisidagi gʻayri qonuniy qabul qilingan hujjatlarni bekor qilish Qoraqalpogʻiston Respublikasining qonunchiligiga muvofiq amalga oshiriladi.

11. Oʻzbekiston Respublikasi davlat mulkini boʻlish toʻgʻrisidagi mazkur Tartib kuchga kirgunga qadar vazirliklar, idoralar, xalq deputatlari Kengashlari tomonidan qabul qilingan hamda amaldagi qonunchilikka zid boʻlgan hujjatlar qonuniy (yuridik) kuchga ega emas deb hisoblanadi.