Respublikada kassa amallarini tartibga solishning kechiktirib boʻlmaydigan chora-tadbirlari toʻgʻrisida (346-son)

24.07.1992

Oʻzbekiston Respublikasi Prezidenti huzuridagi Vazirlar Mahkamasining

qarori

Naqd pulni gʻayriqonuniy tarzda toʻlashga hamda pulning qadrsizlanishi kuchayishiga olib boradigan pul mablagʻlarini mijozlarning hisobiga soxta bank hujjatlari boʻyicha oʻtkazishning oldini olish maqsadida Vazirlar Mahkamasi qaror qiladi:

1. Respublika xoʻjalik yurituvchi subyektlarining bank hisobiga Oʻzbekiston tashqarisidan oʻtkazilayotgan soxta bank hujjatlari boʻyicha pul mablagʻlarini oʻtkazishga yoʻl qoʻyganlik masʼuliyati Oʻzbekiston Respublikasi Markaziy banki zimmasiga yuklatilsin.

Oʻzbekiston Respublikasi Markaziy bank tijorat banklarining korrespondentlik hisobiga mablagʻlarni “soʻm” mintaqasiga kiruvchi davlatlarning markaziy (milliy) bank muassasalarining tamgʻali muhri bilan tasdiqlangan hujjatlar boʻyicha va ularni puxta tekshirgandan soʻng oʻtkazsin.

3. Oʻzbekiston Respublikasi Markaziy banki naqd pullarni berishni Vazirlar Mahkamasining “Pul muomalasini barqarorlashtirishga doir kechiktirib boʻlmaydigan chora-tadbirlar toʻgʻrisida” 1992-yil 6-apreldagi 166-son qaroriga qatʼiy muvofiq ravishda amalga oshirsin.

4. Oʻzbekiston dehqonchilik sanoati banki va Oʻzbekiston sanoat-qurilish banki shu yilning 1-sentabriga qadar ular bank tizimini qayta tashkil etish davrida sobiq SSSR davlat bankidan 1988-yilning 1-yanvarigacha boʻlgan holatda qabul qilib olgan xizmat binolari va asbob-anjomlarni Oʻzbekiston Respublikasi Markaziy bankiga topshirsin.

Respublika tijorat banklari kassa xizmati koʻrsatish boʻlimlarini ochish uchun oʻzining binolaridan va ijaraga olgan binolaridan shartnoma asosida Oʻzbekiston Respublikasi Markaziy bankiga joy bersin.

5. Oʻzbekiston Respublikasi Markaziy bankining 1992-yil 1-oktabrga qadar Markaziy bank, tijorat banklari va ularning joylardagi boʻlimlari rahbar xodimlarini (ularning egallab turgan lavozimiga mos yoki mos emasligi toʻgʻrisida qaror qabul qilish huquqi bilan) ishlab chiqilgan Nizomga muvofiq attestatsiyadan oʻtkazish toʻgʻrisidagi taklifi qabul qilinsin.

6. Oʻzbekiston Respublikasi Markaziy bankiga ikki hafta muddat ichida, mulkchilik shaklidan qatʼi nazar, barcha muassasalar, korxonalar va tashkilotlarga xalq xoʻjaligida kassa aʼmollarini yuritishning yangi tartibini yetkazish tavsiya qilinsin.

Muassasalar, korxonalar va tashkilotlarning rahbarlari kassa aʼmollarini yuritishning belgilangan tartibi qatʼiy bajarilishini taʼminlasinlar.

7. Respublika Adliya vazirligi Moliya vazirligi, Davlat soliq bosh boshqarmasi hamda Oʻzbekiston Respublikasi Markaziy banki bilan birgalikda Oʻzbekiston Respublikasi Markaziy banki tasdiqlagan kassa aʼmollarini yuritish tartibini buzganlik uchun korxonalar, tashkilotlar va muassasalarning rahbarlari va bosh buxgalterlarining javobgarligi toʻgʻrisidagi takliflarni tayyorlasin va Oʻzbekiston Respublikasi Oliy Kengashiga taqdim etsin.

8. Oʻzbekiston Respublikasi Markaziy banki, Moliya vazirligi, Oʻzbekiston jamgʻarmalar banki, Oʻzbekiston sanoat-qurilish banki, Oʻzbekiston dehqonchilik sanoati banki va Oʻzbekiston Respublikasi Tashqi iqtisodiy faoliyat milliy banki zimmasiga mulkchilikning barcha shakllaridagi korxonalar, tashkilotlar va muassasalardan pul oʻtkazish yoʻli bilan fuqarolarning shaxsiy hisobiga kelib tushayotgan mablagʻlarni hisobga olish hamda naqd pul berish tartibini uch hafta muddat ichida ishlab chiqsinlar va tasdiqlasinlar.

10. Oʻzbekiston Respublikasi Markaziy banki, Oʻzbekiston sanoat-qurilish banki “Oʻzbekiston havo yoʻllari” milliy aviakompaniyasi va Oʻrta Osiyo temir yoʻllar boshqarmasi, boshqa manfaatdor vazirliklar va idoralar bilan birgalikda xizmat safariga yuboriladigan shaxslar uchun muassasalar, korxonalar va tashkilotlarga fuqaro aviatsiyasi, temir yoʻl transporti chiptalarini naqd pulsiz hisob-kitob qilish yoʻli bilan sotishga oʻtish tartibi va muddatlari toʻgʻrisidagi kelishib olingan takliflarni ikki oy muddat ichida Vazirlar Mahkamasiga takdim etsin.

11. Oʻzbekiston Respublikasi Markaziy banki tijorat banklarining bank faoliyati bilan, shu jumladan, tashqi iqtisodiy faoliyat bilan shugʻullanishlari uchun ana shunday banklarni tegishli mintaqa hududida barpo etishga jiddiy iqtisodiy zarurat boʻlgan taqdirdagina va Oʻzbekiston Respublikasining “Banklar va bank faoliyati toʻgʻrisida”gi Qonuni talablariga qatʼiy rioya etilganidagina litsenziyalar berilsin.

12. Kredit zaxiralari va naqd pulning koʻplab yetishmayotganini hisobga olib, Oʻzbekiston Respublikasi Markaziy bankining savdo-vositachilik va savdo-xarid aʼmollarini amalga oshirish (davlat ehtiyojlarini hamda hukumat qarorlariga muvofiq ravishda aholini ijtimoiy himoyalashni taʼminlash bundan mustasnodir) uchun qarz berishni 1993-yilning 1-iyuliga qadar vaqtincha toʻxtatish toʻgʻrisidagi taklifi qabul qilinsin.

13. Mazkur qarorning bajarilishini nazorat qilish Bosh vazir oʻrinbosarlari — Vazirlar Mahkamasi komplekslarining rahbarlari zimmasiga yuklatilsin.

Vazirlar Mahkamasining Raisi I. KARIMOV

Toshkent sh.,

1992-yil 24-iyul,

346-son