Biologik xilma-xillik haqidagi Konvensiyaning bioxavfsizlik boʻyicha Kartaxena protokoli (Monreal, 2000-yil 29-yanvar) qoidalarini amalga oshirish chora-tadbirlari toʻgʻrisida (275-son)

11.05.2020

Oʻzbekiston Respublikasi Vazirlar Mahkamasining

qarori

“Oʻzbekiston Respublikasining Biologik xilma-xillik haqidagi Konvensiyaning bioxavfsizlik boʻyicha Kartaxena protokoliga qoʻshilishi toʻgʻrisida (Monreal, 2000-yil 29-yanvar)”gi Oʻzbekiston Respublikasining Qonuni ijrosini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Innovatsion rivojlanish vazirligi, Fanlar akademiyasi, Sogʻliqni saqlash vazirligi, Qishloq xoʻjaligi vazirligi hamda Ekologiya va atrof-muhitni muhofaza qilish davlat qoʻmitasining Biologik xilma-xillik haqidagi Konvensiyaning bioxavfsizlik boʻyicha Kartaxena protokolida (Monreal, 2000-yil 29-yanvar) (keyingi oʻrinlarda — Kartaxena protokoli) belgilangan Milliy muvofiqlashtiruvchi markaz vazifalarini Oʻzbekiston Respublikasi Fanlar akademiyasining Genomika va bioinformatika markaziga (keyingi oʻrinlarda — Markaz) yuklash toʻgʻrisidagi taklifiga rozilik berilsin.

2. Markazga quyidagi qoʻshimcha vazifalar yuklansin:

genetik modifikatsiyalangan organizmlarning (keyingi oʻrinlarda — GMO) biologik xavfsizligi boʻyicha ilmiy tadqiqotlar natijalarini hamda boshqa maʼlumotlarni tahlil qilish va umumlashtirish;

oziq-ovqat xomashyosi, qishloq xoʻjaligi mahsulotlari hamda ozuqa va urugʻlarda GMOni aniqlash boʻyicha laboratoriya tadqiqotlari, shuningdek, xoʻjalik shartnomalari asosida tahlillarini oʻtkazish;

respublikada sinovdan oʻtkazilishi yoki ishlatilishi kutilayotgan GMO va uning asosida yaratilgan mahsulotlar xavfsizligi boʻyicha ilmiy asoslangan ekspertizalar tashkil etish;

manfaatdor vazirliklar va idoralar, yuridik va jismoniy shaxslarga hamda ommaviy axborot vositalariga biologik xavfsizlik toʻgʻrisidagi maʼlumotlarni taqdim etib borish, ilmiy, ilmiy-texnik, ekologik, huquqiy axborot va tajriba almashinuviga koʻmaklashish;

xalqaro axborot tarmoqlaridagi biologik xavfsizlik toʻgʻrisidagi maʼlumotlar asosida milliy maʼlumotlar bazasini yaratish;

xorijiy mamlakatlar biologik xavfsizlik tashkilotlari va xalqaro tashkilotlar bilan maʼlumotlar almashish;

GMOlarni aniqlash va ularni atrof-muhitga chiqarishning xavfini baholash sohasida kadrlar tayyorlash, qayta tayyorlash va malakasini oshirishda ishtirok etish;

Biologik xilma-xillik haqidagi Konvensiya kotibiyati bilan biologik xavfsizlik masalalari boʻyicha doimiy aloqada boʻlish va biologik xavfsizlik sohasida vositachilik mexanizmini joriy etish;

biologik xilma-xillikni taʼminlash sohasidagi normativ-huquqiy hujjatlarni takomillashtirish boʻyicha takliflar ishlab chiqishda ishtirok etish.

3. Oʻzbekiston Respublikasi Innovatsion rivojlanish vazirligi huzuridagi Ilgʻor texnologiyalar markaziga oziq-ovqat xomashyosi, qishloq xoʻjaligi mahsulotlari hamda ozuqa va urugʻlarda GMOni aniqlash boʻyicha referens-laboratoriya vazifasi yuklatilsin.

Belgilab qoʻyilsinki, referens-laboratoriya GMOni aniqlashning laboratoriya natijalari yuzasidan munozarali holat yuzaga kelganda “uchinchi tomon” sifatida qatnashadi.

4. Oʻzbekiston Respublikasi Fanlar akademiyasi 2020-yildan boshlab belgilangan tartibda Kartaxena protokoli qoidalarining bajarilishi yuzasidan Biologik xilma-xillik haqidagi Konvensiya kotibiyatiga hisobot berib borilishini taʼminlasin.

5. Belgilansinki, Markazning mazkur qaror 2-bandida belgilangan vazifalarni bajarish bilan bogʻliq qoʻshimcha xarajatlari:

tasdiqlangan xarajatlar smetasi asosida Oʻzbekiston Respublikasi Davlat budjeti (qoʻshimcha jalb qilingan xodimlar mehnatiga haq toʻlashdan tashqari);

xoʻjalik shartnomalaridan tushgan budjetdan tashqari mablagʻlar (qoʻshimcha jalb qilingan xodimlar mehnatiga haq toʻlash uchun) hisobidan amalga oshiriladi.

6. Oʻzbekiston Respublikasi Innovatsion rivojlanish vazirligi, Qishloq xoʻjaligi vazirligi, Sogʻliqni saqlash vazirligi, Ekologiya va atrof-muhitni muhofaza qilish davlat qoʻmitasi Kartaxena protokoli qoidalarini amalga oshirishda oʻzlariga taalluqli qismi boʻyicha masʼul vakolatli organlar etib belgilansin.

7. Oʻzbekiston Respublikasi Tashqi ishlar vazirligi Fanlar akademiyasi hamda Innovatsion rivojlanish vazirligining buyurtmanomalariga binoan Kartaxena protokoli masalalari boʻyicha tashrif buyuruvchi xorijiy mutaxassislarga Oʻzbekiston Respublikasiga kirish vizalari konsullik yigʻimlari va haqiqiy xarajatlarning oʻrnini qoplash hisobidan yigʻimlar undirilmasdan, belgilangan tartibda rasmiylashtirilishini taʼminlasin.

8. Oʻzbekiston Respublikasi Investitsiyalar va tashqi savdo vazirligi Kartaxena protokoli boʻyicha Markazga yuklangan qoʻshimcha vazifalarni samarali bajarish maqsadida xalqaro begʻaraz texnik koʻmak mablagʻlarini (grantlarni) jalb etishda koʻmaklashsin va bu borada donor mamlakatlar, xalqaro va xorijiy hukumat hamda nohukumat tashkilotlar bilan doimiy ravishda amaliy ish olib borsin.

9. Oʻzbekiston Respublikasi Innovatsion rivojlanish vazirligi:

biologik xavfsizlikni taʼminlash, oziq-ovqat, qishloq xoʻjaligi mahsulotlari hamda ozuqa va urugʻlar tarkibida GMOni tadqiq etishga qaratilgan fundamental, amaliy va innovatsion loyihalarning tanlovlar asosida shakllantirilishini taʼminlasin;

boshqa manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

10. Ushbu qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari A.J. Ramatov, Oʻzbekiston Respublikasi innovatsion rivojlanish vaziri I.Y. Abdurahmonov hamda Oʻzbekiston Respublikasi Fanlar akademiyasi prezidenti B.S. Yuldashev zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2020-yil 11-may,

275-son