Transport sohasida kadrlar tayyorlash tizimini tubdan takomillashtirish chora-tadbirlari toʻgʻrisida (PQ-4703-son)

04.05.2020

Oʻzbekiston Respublikasi Prezidentining

Qarori

Respublika transport sohasi uchun yuqori malakali kadrlarni tayyorlash tizimini ilgʻor xorijiy tajriba va xalqaro standartlar asosida tubdan takomillashtirish, oʻquv jarayoniga oʻqitishning innovatsion shakl va metodlari hamda zamonaviy pedagogik va axborot texnologiyalarini keng joriy etish, shuningdek, tarmoq taʼlim muassasalarining moddiy-texnika bazasini mustahkamlash va ilmiy salohiyatini yanada oshirish maqsadida:

1. Oʻzbekiston Respublikasi Transport vazirligi, Oliy va oʻrta maxsus taʼlim vazirligi hamda “Oʻzbekiston temir yoʻllari” aksiyadorlik jamiyatining Toshkent temir yoʻl muhandislari instituti, Toshkent avtomobil yoʻllarini loyihalash, qurish va ekspluatatsiyasi instituti hamda Toshkent davlat texnika universitetining aviakosmik texnologiyalari fakulteti negizida Toshkent davlat transport universitetini (keyingi oʻrinlarda — Universitet) tashkil etish toʻgʻrisidagi taklifi maʼqullansin.

2. Belgilab qoʻyilsinki, Universitet:

transport sohasi uchun oliy maʼlumotli mutaxassislar va ilmiy kadrlarni tayyorlash, qayta tayyorlash va ularning malakasini oshirish boʻyicha tayanch oliy taʼlim muassasasi hisoblanadi;

ilgʻor xalqaro taʼlim standartlari hamda oʻquv dasturlariga muvofiq 2020/2021 oʻquv yilidan boshlab taʼlimning kredit-modul tizimini bosqichma-bosqich joriy etadi;

Toshkent avtomobil yoʻllarini loyihalash, qurish va ekspluatatsiyasi instituti hamda Toshkent temir yoʻl muhandislari institutining barcha huquq va majburiyatlari hamda Toshkent davlat texnika universitetining aviakosmik texnologiyalari fakultetiga oid huquq va majburiyatlar boʻyicha huquqiy voris hisoblanadi;

Oʻzbekiston Respublikasi Transport vazirligiga idoraviy jihatdan boʻysunadi.

Universitet hamda Toshkent avtomobil yoʻllarini loyihalash, qurish va ekspluatatsiyasi instituti huzuridagi Belorussiya davlat texnika universiteti bilan birgalikda tashkil etilgan qoʻshma Oʻzbekiston-Belorussiya fakulteti Toshkent shahar, Mirobod tumani, Adilxodjayev koʻchasi, 1-uy manzili boʻyicha tekin foydalanish huquqi asosida joylashtirilsin.

3. Quyidagilar Universitetning asosiy vazifalari va faoliyati yoʻnalishlari etib belgilansin:

transport sohasi ehtiyojlaridan kelib chiqib, mehnat bozoridagi raqobatbardosh oliy maʼlumotli mutaxassislar va ilmiy-pedagogik kadrlarni, shuningdek, ommaviy kasb mutaxassislarini tayyorlash, qayta tayyorlash va ularning malakasini oshirish;

transport sohasini rivojlantirishning dolzarb masalalari boʻyicha fundamental, amaliy va innovatsion izlanish va tadqiqotlar olib borish, ularning natijalarini, shu jumladan raqamli va boshqa zamonaviy texnologiyalarni keng joriy etish boʻyicha takliflar ishlab chiqish;

qoʻshma taʼlim dasturlari va ilmiy loyihalarni amalga oshirish, Universitet professor-oʻqituvchilarining malakasini oshirishni hamda bitiruvchilarni chet elda magistratura va doktorantura dasturlari boʻyicha tahsil olishlarini tashkil etish maqsadida yetakchi xorijiy oliy taʼlim va ilmiy muassasalar bilan hamkorlikni rivojlantirish;

transport sohasi uchun kadrlar tayyorlashning uzluksiz tizimini yaratish, tizimdagi akademik litsey hamda sohaning professional taʼlim muassasalari taʼlim dasturlarining uzluksizligi va uzviyligini taʼminlash;

oʻquv jarayonida nazariy tayyorgarlikning amaliyot bilan uzviy bogʻliqligini taʼminlash maqsadida transport sohasidagi tashkilotlar bilan birgalikda talabalarning amaliyotlarini tegishli soha tashkilotlarida tashkil etish, bitiruvchilarni ish bilan taʼminlash boʻyicha maqsadli hamkorlikni yoʻlga qoʻyish.

4. Belgilansinki, Universitetda oʻquv jarayoni 2020/2021 oʻquv yilidan boshlanadi hamda talabalarni qabul qilish soni har yili tasdiqlanadigan respublika oliy taʼlim muassasalariga oʻqishga qabul qilishning davlat buyurtmasi parametrlaridan kelib chiqqan holda aniqlanadi.

5. Oʻzbekiston Respublikasi Transport vazirligi ikki oy muddatda Universitetni strategik rivojlantirish masalalari boʻyicha rektorning birinchi oʻrinbosari lavozimiga malakali xorijiy mutaxassis tayinlanishini taʼminlasin.

6. Quyidagilar:

2020 — 2023-yillarda Toshkent davlat transport universitetida kadrlar tayyorlash tizimini tashkil etish hamda ilmiy salohiyatni rivojlantirish chora-tadbirlari dasturi 1-ilovaga muvofiq;

Toshkent davlat transport universitetiga operativ boshqaruv huquqi asosida tekin beriladigan hamda tegishli kommunal va foydalanish xarajatlarini qoplagan holda “nol” stavkadagi ijara toʻlovi asosida beriladigan obyektlar roʻyxati 2 va 3-ilovalarga muvofiq;

Toshkent temir yoʻl muhandislari institutidan Toshkent davlat texnika universitetiga koʻchiriladigan taʼlim yoʻnalishlari roʻyxati 4-ilovaga muvofiq;

Toshkent davlat transport universitetining Vasiylik kengashi tarkibi 5-ilovaga muvofiq tasdiqlansin.

7. Toshkent shahri, Mirobod tumani, Mehrjon koʻchasi, 12-uyda joylashgan Yoshlar markazining binosi (sobiq Toshkent temir yoʻl muhandislari instituti qoshidagi 2-son akademik litsey) Oʻzbekiston Respublikasi Xalq taʼlimi vazirligiga operativ boshqaruv huquqi asosida tekin berilsin.

8. Universitet Vasiylik kengashining asosiy vazifalari etib quyidagilar belgilansin:

Universitetning moddiy-texnika bazasini rivojlantirish va samarali faoliyatini taʼminlash uchun moliyaviy yordam tashkil etish, budjetdan tashqari mablagʻlarni jalb etish;

bitiruvchilarning kasbiy tayyorgarligini oshirish va ish bilan taʼminlash boʻyicha kadrlar buyurtmachilari bilan samarali hamkorlikni yoʻlga qoʻyish;

taʼlim va ilm sohasida xalqaro hamkorlikni rivojlantirish va amalga oshirishda koʻmaklashish;

oliy taʼlimni rivojlantirishga qaratilgan yangi shakl va dasturlarni qoʻllab-quvvatlash va ilmiy-tadqiqot ishlari natijalarini amaliyotga joriy etishni rivojlantirish;

binolarni qurish-taʼmirlash va jihozlash ishlarini amalga oshirish uchun zarur moliyaviy mablagʻlar jalb etilishini, zamonaviy oʻquv-laboratoriya jihozlari, kompyuter va boshqa tashkiliy texnika, kutubxona fondi bilan jihozlanishini taʼminlash.

9. Universitetga quyidagi huquqlar berilsin:

Oʻzbekiston Respublikasi Oliy va oʻrta maxsus taʼlim vazirligi hamda Transport vazirligi bilan kelishilgan holda taʼlim yoʻnalishlariga oʻzgartirish kiritish;

Oʻzbekiston Respublikasi Oliy va oʻrta maxsus taʼlim vazirligi bilan kelishilgan holda, oʻquv rejalari va dasturlarini, bitiruvchilarga qoʻyiladigan malaka talablarini oʻquv jarayonining transport sohasini rivojlantirish boʻyicha ustuvor yoʻnalishlar bilan uzluksiz bogʻliqligi taʼminlanishini hisobga olgan holda, mustaqil ishlab chiqish va tasdiqlash;

kredit-modul tizimini oʻquv jarayoniga joriy etish borasida professor-oʻqituvchilar oʻquv yuklamasini mustaqil meʼyorlashtirish, shuningdek, pedagog xodimlar tomonidan oʻquv-uslubiy, ilmiy-tadqiqot ishlari, “ustoz-shogird” tizimi boʻyicha ishlarning bajarilishini ragʻbatlantirib borish;

Universitet professor-oʻqituvchilarining Scopus va Web of Science kabi maʼlumotlar bazasiga kirgan xalqaro ilmiy jurnallarda ilmiy maqolalar chop etish sarf-xarajatlarini moliyalashtirish;

Universitet faoliyati yoʻnalishlari boʻyicha maslahat va ekspert-tahliliy xizmatlarni shartnoma asosida koʻrsatish, shuningdek, Vasiylik kengashi bilan kelishilgan holda taqdim etiladigan xizmatlarni samarali amalga oshirish maqsadida ilmiy-tadqiqot va innovatsion xizmatlar tuzilmalarini shakllantirish;

bakalavriat, magistratura va doktorantura yoʻnalishlari boʻyicha yetakchi xorijiy oliy taʼlim muassasalari bilan hamkorlikdagi qoʻshma taʼlim dasturlari asosida kadrlar tayyorlashni tashkil etish;

ish beruvchilar talablarini inobatga olgan holda oʻquv rejalaridagi nazariy taʼlim ulushini qisqartirish hisobiga amaliy mashgʻulotlar hajmini oshirish, haftada bir kunlik amaliyot tajribasini qoʻllash;

xorijiy mutaxassislarni konsultant, maslahatchi va oʻqituvchilar sifatida jalb qilish va ularga mehnat bozorining amaldagi konyunkturasini hisobga olgan holda Universitetning budjetdan tashqari mablagʻlari hisobidan oylik maosh hamda boshqa toʻlovlarni belgilash va toʻlash;

Universitetda besh yil davomida ishlab berish sharti bilan iqtidorli talabalar va yetakchi professor-oʻqituvchilarning xorijiy oliy taʼlim muassasalarida oʻqishi va stajirovka oʻtashi bilan bogʻliq xarajatlarni Universitetning budjetdan tashqari mablagʻlari hisobidan qoplash;

Universitet hududida joylashgan bino va inshootlarni ijaraga berish va undan tushadigan mablagʻlarni elektron savdo maydonchasi operatoriga toʻlangan toʻlov chegirilgandan keyin Universitetning budjetdan tashqari jamgʻarmasiga toʻliq yoʻnaltirish.

10. Oʻzbekiston Respublikasi Vazirlar Mahkamasi Toshkent temir yoʻl muhandislari institutidan Toshkent davlat texnika universitetiga koʻchirilayotgan 4-ilovadagi taʼlim yoʻnalishlari boʻyicha tahsil olayotgan talabalarning oʻqishi Universitet yoki Toshkent davlat texnika universitetining mos yoxud turdosh taʼlim yoʻnalishlariga 2019/2020 oʻquv yili yakunlangandan soʻng belgilangan tartibda koʻchirilishini taʼminlasin.

11. Quyidagilar Universitet faoliyatini moliyalashtirish manbalari etib belgilansin:

a) joriy saqlash bilan bogʻliq qismi boʻyicha:

Oʻzbekiston Respublikasi Davlat budjeti mablagʻlari;

toʻlov-kontrakt asosida oʻqitishdan tushadigan mablagʻlar;

xoʻjalik faoliyati va shartnoma asosida xizmatlar koʻrsatishdan tushgan tushumlar;

jismoniy va yuridik shaxslarning homiylik xayriyalari;

xalqaro moliya tashkilotlarining grantlari;

qonun hujjatlarida taqiqlanmagan boshqa manbalar;

b) qurilish ishlari qismi boʻyicha har yilgi Investitsiya dasturida belgilangan tartibda yoʻnaltiriladigan mablagʻlar.

12. Oʻzbekiston Respublikasi Transport vazirligi, Iqtisodiy taraqqiyot va kambagʻallikni qisqartirish vazirligining Universitet joylashgan hududda 2020 — 2022-yillarda yangi oʻquv binosi, talabalar turar joyi va axborot-resurs markazi binolarini (keyingi oʻrinlarda — Universitet binolari) qurish toʻgʻrisidagi taklifi maʼqullansin.

Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi Moliya vazirligi bilan birgalikda:

a) joriy yilda Universitet binolari loyiha-smeta hujjatlarini ishlab chiqish va qurish ishlarini boshlash uchun:

2020-yilgi Investitsiya dasturi doirasida Toshkent avtomobil yoʻllarini loyihalash, qurish va ekspluatatsiyasi instituti uchun nazarda tutilgan mablagʻlar institutda joriy yilning 1-yanvar holatiga koʻra bajarilgan qurilish-taʼmirlash ishlari boʻyicha yakuniy hisob-kitoblar amalga oshirilgandan soʻng yoʻnaltirilishini taʼminlasin;

qoʻshimcha talab etiladigan mablagʻlar boʻyicha 2020-yilgi Investitsiya dasturi doirasida markazlashgan kapital qoʻyilmalarning iqtisod qilingan qismini qayta taqsimlash yuzasidan Vazirlar Mahkamasiga taklif kiritsin;

b) 2021-yil va kelgusi yillarga moʻljallangan Investitsiya dasturini shakllantirishda ishlab chiqilgan loyiha-smeta hujjatlariga asosan Universitet binolarini qurish ishlari uchun markazlashgan kapital qoʻyilmalar limitlari ajratilishini taʼminlasin.

13. Universitet binolarini qurish ishlari boʻyicha:

Toshkent shahar hokimligining “Yagona buyurtmachi xizmati” injiniring kompaniyasi — buyurtmachi etib belgilansin;

bosh loyihachi va bosh pudratchi tashkilotlar qonunchilikda belgilangan tartibda tender (tanlov) savdolari orqali aniqlansin.

14. Belgilab qoʻyilsinki, Universitet faoliyatini Oʻzbekiston Respublikasi Davlat budjeti mablagʻlari hisobidan moliyalashtirish 2020-yilda Oʻzbekiston Respublikasining respublika budjetidan birinchi darajali budjet mablagʻlarini taqsimlovchi sifatida Oʻzbekiston Respublikasi Oliy va oʻrta maxsus taʼlim vazirligi va Transport vazirligiga ajratiladigan mablagʻlar doirasida, 2021-yildan boshlab esa Oʻzbekiston Respublikasi Davlat budjeti parametrlarida nazarda tutiladi.

15. Toshkent temir yoʻl muhandislari instituti hamda Toshkent avtomobil yoʻllarini loyihalash, qurish va ekspluatatsiyasi institutining akademik litseylari negizida Toshkent davlat transport universitetining akademik litseyi tashkil etilsin.

Belgilansinki, Akademik litsey:

Toshkent shahar, Chilonzor tumani, Guliston mavzesi, 21a-uy manzilida tekin foydalanish huquqi asosida joylashtiriladi;

faoliyati Oʻzbekiston Respublikasi Davlat budjeti hisobidan moliyalashtiriladi.

16. Kelgusida mehnat faoliyati xususiyatlari va oʻquv amaliyoti, transport vositasi harakati hamda insonlar hayoti xavfsizligini taʼminlash bilan bogʻliq boʻlgan taʼlim yoʻnalishlari boʻyicha Universitetga oʻqishga hujjat topshirishdan oldin abituriyent va talabalarni temir yoʻl transporti yoʻnalishi boʻyicha “Oʻzbekiston temir yoʻllari” aksiyadorlik jamiyatining hududlardagi temir yoʻl poliklinikalarida tashkil etilgan ixtisoslashtirilgan tibbiyot komissiyasida, shuningdek, havodagi harakatni boshqarish yoʻnalishi boʻyicha “Uzbekistan Airports” aksiyadorlik jamiyati tibbiy-sanitariya boʻlimining vrachlik-uchuvchilik ekspert komissiyasida koʻrikdan oʻtkazish tartibi saqlab qolinsin.

17. Universitet xodimlarining tashabbuskorligi va moddiy manfaatdorligini oshirish maqsadida Universitetda yuridik shaxs maqomiga ega boʻlmagan budjetdan tashqari jamgʻarma (keyingi oʻrinlarda — Jamgʻarma) tashkil etilsin.

18. Belgilansinki:

a) Jamgʻarma mablagʻlari toʻlov-kontrakt asosida oʻqitishdan tushadigan mablagʻlar, shuningdek, Oʻzbekiston Respublikasi Transport vazirligi va Transport vazirligi huzuridagi Avtomobil yoʻllari qoʻmitasining budjetdan tashqari mablagʻlari hamda “Oʻzbekiston temir yoʻllari”, “Uzbekistan Airways” va “Uzbekistan Airports” aksiyadorlik jamiyatlarining homiylik xayriyalari hisobidan shakllantiriladi;

b) Jamgʻarma mablagʻlari Universitet professor-oʻqituvchilari, shu jumladan oʻrindoshlik asosida ishlovchi professor-oʻqituvchilari, boshqaruv, ilmiy, oʻquv-yordamchi, texnik va xizmat koʻrsatuvchi xodimlariga ularning mehnatiga haq toʻlash fondining 200 foizigacha miqdorida har oylik ustamalarni toʻlashga yoʻnaltiriladi;

v) Jamgʻarma mablagʻlarini shakllantirish va ulardan foydalanish tartibi, shu jumladan har oylik ustamalarni belgilash mezonlari Vasiylik kengashi bilan kelishilgan holda Universitet rektori tomonidan belgilanadi;

g) Universitetning boshqaruv, professor-oʻqituvchilari, ilmiy, oʻquv-yordamchi, texnik va xizmat koʻrsatuvchi xodimlariga Oʻzbekiston Respublikasi Davlat budjeti hisobidan koʻp yillik mehnati uchun ragʻbatlantirish koeffitsiyentini hisobga olgan holda, lavozim maoshiga belgilangan koeffitsiyentlarda quyidagi hajmlarda har oyda qoʻshimcha pul toʻlanadi:

3 yildan 5 yilgacha — 0,15;

5 yildan 10 yilgacha — 0,2;

10 yildan 15 yilgacha — 0,3;

15 yildan ortiq — 0,4.

19. Oʻzbekiston Respublikasi Transport vazirligi hamda Oliy va oʻrta maxsus taʼlim vazirligi manfaatdor vazirlik va idoralar bilan birgalikda ikki oy muddatda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

20. Mazkur qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari A.J. Ramatov va Oʻzbekiston Respublikasi transport vaziri E.M. Ganiyev zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2020-yil 4-may,

PQ-4703-son

Oʻzbekiston Respublikasi Prezidentining 2020-yil 4-maydagi PQ-4703-son qaroriga 1-ILOVA

2020 — 2023-yillarda Toshkent davlat transport universitetida kadrlar tayyorlash tizimini tashkil etish hamda ilmiy salohiyatni rivojlantirish

chora-tadbirlari dasturi

T/r Chora-tadbirlar Amalga oshirish mexanizmi Moliyalashtirish manbalari Bajarish muddatlari Ijro uchun masʼullar I. Transport tizimini rivojlantirish ehtiyojlarini hisobga olgan holda, Toshkent davlat transport universitet tashkiliy tuzilmasi, taʼlim yoʻnalishlari va mutaxassisliklarini optimallashtirish, talabalarning ishlab chiqarish va boshqa tashkilotlarda amaliyotini tashkil qilish 1. Toshkent davlat transport universitetining (keyingi oʻrinlarda — Universitet) tashkiliy tuzilmasini shakllantirish va tasdiqlash. 1. Universitet oldiga qoʻyilgan yangi maqsadlar va vazifalar, transport fani va taʼlimi borasida nufuzli xorijiy oliy taʼlim muassasalari tajribalarini tahlil qilish. 2. Fakultetlar, umumkasbiy va mutaxassislik kafedralari hamda funksional boʻlimlar tarkibini qaytadan koʻrib chiqqan holda, Universitetning takomillashtirilgan tashkiliy tuzilmasini tasdiqlash. — 2020-yil may Universitet, Transport vazirligi 2. Universitetning kadrlar tayyorlash boʻyicha asosiy taʼlim yoʻnalishlari va mutaxassisliklarini belgilash Transport tizimini kompleks rivojlantirish istiqbollari, ehtiyojlar, rivojlangan xorijiy davlatlar tajribasi, amalga oshirilayotgan hududiy va tarmoq dasturlari hamda kadrlar tayyorlash boʻyicha xalqaro klassifikatorlarni hisobga olgan holda mazmun jihatdan yaqin boʻlgan ijtimoiy va iqtisodiy taʼlim yoʻnalishlarini qisqartirish orqali texnika sohalari taʼlim yoʻnalishlarini kengaytirish, magistratura mutaxassisliklarini kengaytirish va ilmiy faoliyatni tor sohalar boʻyicha amalga oshirishni tashkil etish. — 2020-yil may Transport vazirligi, Oliy va oʻrta maxsus taʼlim vazirligi, Universitet 3. Oʻquv-meʼyoriy bazani yaratish Kadrlar buyurtmachilari tomonidan transport sohasining tarmoq kvalifikatsiya ramkasi, har bir kasb va lavozimi boʻyicha professional standartlarni ishlab chiqish va ular asosida 2020/2021 oʻquv yiliga qadar davlat taʼlim standartlari, malaka talablari, oʻquv-reja va fan dasturlarini takomillashtirish hamda tasdiqlash. — 2020 — 2023-yillar Transport vazirligi, Oliy va oʻrta maxsus taʼlim vazirligi, Universitet 4. Rivojlangan mamlakatlar oliy taʼlim muassasalari bilan hamkorlikda kadrlar tayyorlashni yoʻlga qoʻyish Sohaga oid yetakchi xorijiy oliy taʼlim markazlari va ilmiy markazlar bilan yaqin hamkorlik aloqalarini oʻrnatish, bakalavriat va magistratura yoʻnalishlari boʻyicha “qoʻshma diplom”, akademik mobillik hamda yozgi maktablar boʻyicha integratsiyalashgan innovatsion taʼlim dasturlarini tashkil etish. Transport universiteti mablagʻlari hisobidan 2020 — 2023-yillar Transport vazirligi, Universitet, Oliy va oʻrta maxsus taʼlim vazirligi, Innovatsion rivojlanish vazirligi 5. Oʻquv va amaliyot jarayonlarida tarmoq korxonalari ishtirokini kengaytirish asosida kadrlar tayyorlash sifatini oshirish 1. Universitet professor-oʻqituvchilarining ilmiy-tadqiqot ishlari va amaliy mashgʻulotlar olib borishlari, talabalarning malakaviy amaliyotlarini oʻtashlari uchun zarur shart-sharoitlarni yaratish maqsadida soha korxonalarida oʻquv-amaliyot markazlarini (mutaxassislik kafedralari filiallarini) tashkil etish. 2. 2020/2021 oʻquv yilidan boshlab Germaniya tajribasi asosida oʻquv-amaliyot markazlari va ishlab chiqarish obyektlarida talabalarning amaliy darslari va malakaviy amaliyotlarini nazariy oʻquv jarayonidan uzilmagan holda, dars jadvaliga koʻra oʻtkazish mexanizmini joriy etish. Bunda dars jadvaliga asosan haftaning bir kunini amaliyot kuni deb belgilash orqali talabalar ishlab chiqarish amaliyotini samarali tashkil etish. 3. Talabalarni buyurtmachi tashkilotlarga biriktirish hamda oʻqishni yakunlagunga qadar mazkur tashkilotlarda malakaviy amaliyotni boʻlajak ish joylarida oʻtash tizimini yoʻlga qoʻyish. Transport universiteti mablagʻlari hisobidan 2020-2021-yillar Transport vazirligi, Universitet, Oliy va oʻrta maxsus taʼlim vazirligi, “Oʻzbekiston temir yoʻllari” AJ, “Uzbekistan Airways” AJ, “Uzbekistan Airports” AJ II. Taʼlim jarayonini ilgʻor pedagogik texnologiyalar va oʻqitish usullarini joriy qilishning xalqaro amaliyotiga muvofiq rejalashtirish, tashkil etish va uning sifatini oshirish 6. Raqamli texnologiyalar asosida pedagogik faoliyat samaradorligini baholash va ragʻbatlantirish tizimini yaratish 1. Ilgʻor xorijiy tajriba asosida kafedra, fakultet va oliy taʼlim muassasasi kesimida oʻquv-uslubiy, ilmiy va “ustoz-shogird” faoliyati samaradorligini baholashning asosiy koʻrsatkich va mezonlarini shakllantirish va avtomatlashtirilgan monitoring tizimini joriy etish. 2. Professor-oʻqituvchilar tomonidan oʻquv jarayoniga ilgʻor pedagogik va axborot texnologiyalarini qoʻllash samaradorligini oshirish maqsadida ragʻbatlantirish va tanqidiy baholash mexanizmini joriy etish. Transport universiteti mablagʻlari hisobidan 2020-2021-yillar Transport vazirligi, Universitet, Oliy va oʻrta maxsus taʼlim vazirligi, Axborot texnologiyalari va kommunikatsiyalarini rivojlantirish vazirligi 7. Transport sohasidagi kadrlarni tayyorlash taʼlim yoʻnalishlari xususiyatidan kelib chiqqan holda, oʻquv fanlari va yuklamalarini optimallashtirish 1. 2020/2021 oʻquv yili oʻquv rejasidanomutaxassislik oʻquv fanlari sonini qisqartirish va mutaxassislik hamda mustaqil taʼlim soatlari salmogʻini oshirish. 2. Malakaviy va ishlab chiqarish amaliyotlari muddatini bir oʻquv yilida toʻrt oygacha yetkazish. 3. Haftalik oʻquv yuklama soatlarini qisqartirish. 4. Transport vazirligi bilan kelishilgan holda (idoraviy hujjat asosida), soha uchun oliy maʼlumotli va ilmiy-pedagogik kadrlar tayyorlashning oʻziga xos xususiyatlaridan kelib chiqib, professor-oʻqituvchilar oʻquv yuklamalarini optimallashtirish. — 2020-2021-yillar Transport vazirligi, Universitet, Oliy va oʻrta maxsus taʼlim vazirligi 8. Taʼlim mazmunini shakllantirishning mahalliy va xorijiy tajriba asosida oʻqi?ishning kredit-modul tizimiga bosqichma-bosqich oʻtish 2020/2021 oʻquv yilidan boshlab birinchi bosqich talabalarini oʻqitishda kredit-modul tizimini joriy etish. Vasiylik kengashi jamgʻarmasi, homiy tashkilotlar mablagʻlari hisobidan 2020/2021 oʻquv yili Transport vazirligi, Universitet, Oliy va oʻrta maxsus taʼlim vazirligi 9. Oʻquv jarayoniga raqamli texnologiyalarni joriy etishni kengaytirish 1. Zamonaviy raqamli loyihalash hamda modellashtirish dasturlarini oʻquv jarayoniga tatbiq etish maqsadida PTV VISSIM, PTV VISSUM, PTV VISTRO, CREDO, IndorCAD/Road, AutoCAD, Matlab, CATIA, SOLIDWORKS, ArchiCAD, EViews, Stata kabi litsenzion loyihalash va modellashtirish dasturlarini oʻquv jarayoniga tatbiq qilish. 2. Raqamli texnologiyalarni oʻzlashtirish boʻyicha professor-oʻqituvchilar va xodimlarni xorijiy davlatlarga maqsadli stajirovkalarga yuborish. Vasiylik kengashi jamgʻarmasi, Transport universiteti, homiy tashkilotlar mablagʻlari hisobidan 2020 — 2023-yillar Transport vazirligi, Universitet, Oliy va oʻrta maxsus taʼlim vazirligi, Axborot texnologiyalari va kommunikatsiyalarini rivojlantirish vazirligi III. Universitet rahbar xodimlari va professor-oʻqituvchilari tarkibini tanlash, ularning pedagogik mahorati hamda kasbiy darajasini oshirish 10. Kadrlarni tanlash va tayinlashning samarali mexanizmini joriy etish 1. Rektorat, fakultetlar, kafedralar, ilmiy-tadqiqot muassasalari va akademik litseylar rahbar xodimlari va professor-oʻqituvchilari tarkibini tanlash, tayinlash va ularning ish samaradorligini baholashning reyting tizimini joriy etish. 2. Universitet boshqaruv kadrlari zaxirasini tashkil etish, ularni maqsadli oʻqitish tizimini shakllantirish. — 2020/2021 oʻquv yilidan boshlab Transport vazirligi, Universitet 11. Universitet professor-oʻqituvchilarining ilmiy salohiyatini oshirish 1. Universitet professor-oʻqituvchilarining ilmiy salohiyatini yilma-yil oshirib borish, shu jumladan 2020-yilda 35 foizgacha, 2021-yilda 39 foizgacha, 2022-yilda 47 foizgacha, 2023-yilda 51 foizgacha, 2024-yilda 53 foizgacha yetkazish maqsadida universitet doktoranturasiga har yilgi qabul kvotasini koʻpaytirish (30 nafargacha) va xorijiy maqsadli doktoranturaga yuborish (10 nafargacha). 2. Har yili magistraturaning iqtidorli bitiruvchilarini tanlash va pedagogik faoliyatga faol jalb qilish. Innovatsion rivojlanish vazirligi, “El-yurt umidi” jamgʻarmasi, Vasiylik kengashi jamgʻarmasi mablagʻlari hisobidan 2020/2021 oʻquv yilidan boshlab Transport vazirligi, Universitet, Innovatsion rivojlanish vazirligi, “El-yurt umidi” jamgʻarmasi IV. Ilmiy-tadqiqot va innovatsion faoliyatni rivojlantirish, Universitetda olib boriladigan tadqiqotlarni ishlab chiqarish, akademik ilm-fan ehtiyojlari bilan integratsiyalash, ilmiy va innovatsion ishlanmalar natijadorligini taʼminlash, yoshlarni ilmiy faoliyatga keng jalb qilish 12. Universitetda olib boriladigan ilmiy-tadqiqot va innovatsion ishlanmalar natijadorligini oshirish 1. 2021-yildan boshlab, ilmiy-tadqiqot ishlari natijalarini tijoratlashtirishni har yili 20 foizga oshirib borish boʻyicha dastur ishlab chiqish. 2. Innovatsion loyihalarni amalga oshirish uchun ilmiy-tadqiqotlar zamonaviy eksperimental infratuzilmasini, oliy taʼlim muassasalari oʻrtasida ilmiy-tadqiqotlar tizimi va sharoitlarini shakllantirish. 3. Har bir fakultetda tematik ilmiy laboratoriyalar tashkil etish va ularni asbob-uskunalar bilan bosqichma-bosqich jihozlash. 4. Yoshlarni ilmiy ishlarga jalb qilish, ilmiy-tadqiqot va innovatsion faoliyatni kadrlar bilan taʼminlash tizimini shakllantirish va amalga oshirish maqsadida Universitetning akademik litseyiga iqtidorli yoshlarni tanlash va maqsadli tayyorlashning manzilli-hududiy tizimini joriy etish. Vasiylik kengashi jamgʻarmasi, Transport universiteti, homiy tashkilotlar mablagʻlari hisobidan 2020/2021 oʻquv yilidan boshlab Transport vazirligi, Universitet V. Universitetda oʻquv va ilmiy laboratoriyalarni tashkil etish va jihozlash, shuningdek, taʼlim, ilmiy va maʼmuriy faoliyatning yagona axborot makonini yaratish va axborot-kommunikatsiya texnologiyalari infratuzilmasini jihozlash, kontent bilan toʻldirish 13. Universitetda zamonaviy oʻquv va ilmiy laboratoriya majmualarini tashkil etish 1. Laboratoriya pasportlaridan kelib chiqib, asbob-uskunalarga buyurtma berish. 2. Barcha taʼlim yoʻnalishlari boʻyicha zamonaviy oʻquv va ilmiy laboratoriyalar bilan jihozlash. Vasiylik kengashi jamgʻarmasi, Transport universiteti mablagʻlari hisobidan 2020 — 2022-yillar Universitet 14. Taʼlim jarayonini axborot-kommunikatsion qoʻllab-quvvatlash tizimini takomillashtirish 1. Masofaviy taʼlim va modul tizimiga oʻtishda zarur axborot texnologiyalari jihozlari bilan taʼminlash hamda vebinar xonalar sonini 25 taga yetkazish. 2. Universitetdagi maʼruza, amaliy va laboratoriya mashgʻulotlarini onlayn translyatsiya qilishga hamda ularning sifatini monitoring qilishga moʻljallangan elektron platformani bosqichma-bosqich joriy etish. 3. Axborot-resurs markaziga avtomatlashtirilgan boshqaruv va monitoring tizimini bosqichma-bosqich joriy etish. 4. 2020-yilning yakuniga qadar Axborot-resurs markazi bazasidagi barcha oʻquv-metodik koʻrsatma, oʻquv qoʻllanma, darslik, monografiya va boshqa turdagi adabiyotlarni toʻliq raqamlashtirish choralarini koʻrish hamda universitet platformasiga toʻliq joylashtirish. Vasiylik kengashi jamgʻarmasi, Transport universiteti, homiy tashkilotlar mablagʻlari hisobidan 2020 — 2022-yillar Transport vazirligi, Universitet, Axborot texnologiyalari va kommunikatsiyalarini rivojlantirish vazirligi, Innovatsion rivojlanish vazirligi VI. Yetakchi xorijiy universitetlar bilan xalqaro hamkorlikni, sheriklik munosabatlarini rivojlantirish, taʼlim faoliyatiga xorijiy mutaxassislar va oʻqituvchilarni jalb qilish 15. Oʻquv jarayoniga ilgʻor xorijiy oliy taʼlim muassasalari va tajribali soha ekspertlarini jalb etish 1. AQSH, Angliya, Germaniya, Polsha, Slovakiya, Xitoy, Yaponiya, Koreya, Singapur, Rossiya, Belorussiya va boshqa davlatlarning tajribali professor-oʻqituvchilari, mutaxassislari va xalqaro ekspertlarini oʻquv jarayoniga jalb etish. 2. Xalqaro fondlar orqali jalb qilish qamrovini bosqichma-bosqich kengaytirish. Vasiylik kengashi jamgʻarmasi, Transport universiteti, homiy tashkilotlar, xalqaro tashkilotlar mablagʻlari hisobidan 2020 — 2023-yillar Transport vazirligi, Universitet 16. Xorijiy oliy taʼlim muassasalari bilan oʻzaro almashinuv amaliyotini kengaytirish 1. Professor-oʻqituvchilarni MDH va chet el davlatlari yetakchi oliy taʼlim muassasalarida stajirovkadan oʻtkazish. Buning uchun barcha professor-oʻqituvchilarni ingliz va rus tillari boʻyicha intensiv kurslarda tayyorlab, xorijiy stajirovkalarga maqsadli joʻnatish. 2. Turdosh hamkor xorijiy oliy taʼlim muassasalari yozgi maktablarining integratsiyalashgan innovatsion taʼlim dasturlarida qatnashuvchi talabalar qamrovini kengaytirish. Vasiylik kengashi jamgʻarmasi, Transport universiteti, homiy tashkilotlar, xalqaro tashkilotlar mablagʻlari hisobidan 2020 — 2023-yillar Transport vazirligi, Universitet, Oliy va oʻrta maxsus taʼlim vazirligi, Innovatsion rivojlanish vazirligi VII. Tarbiya ishlari tizimini takomillashtirish, talabalarga yuksak axloqiy va maʼnaviy-maʼrifiy fazilatlarni singdirish, yot gʻoya va mafkuralarga nisbatan immunitetni mustahkamlash, talabalarning sogʻlom turmush tarzi va dam olishini tashkil qilish uchun shart-sharoitlar yaratish 17. Oʻzbekiston Respublikasi Prezidenti tomonidan ilgari surilgan 5 tashabbusni amaliyotga keng joriy etish va bu yoʻnalishda Universitetni eng namunaviy oliy taʼlim muassasasi darajasiga olib chiqish 1. 1-tashabbus — talaba yoshlarni musiqa va sanʼatga jalb qilish, ularda estetik did va kasbiy etikani tarbiyalash maqsadida tanlovlar, koʻrgazmalar, sanʼat va madaniyat maskanlarida ochiq darslar oʻtkazish, teatr va muzeylarga tashriflarni uyushtirish, iqtidorli talabalardan tashkil topgan “Yosh havaskorlar” ashula va raqs ansamblini tuzish. 2. 2-tashabbus — sport majmualarida toʻgaraklar faoliyatini samarali tashkil etish va ularga talaba qizlarni yanada kengroq jalb qilish, talabalarning qiziqish va takliflari asosida yangi sport toʻgaraklari ochish, talabalarning “Kibersport” sport turi boʻyicha musobaqalarini tashkil etish, “Salomatlik sari mustahkam qadam” aksiyasi va sport turlari boʻyicha universitet ichki chempionatlarini oʻtkazish. 3. 3-tashabbus — talaba yoshlarda Internet jahon axborot tarmogʻidan toʻgʻri foydalanish madaniyatini rivojlantirish maqsadida ularning qiziqishlari boʻyicha klublar, kompyuter texnologiyalari, loyiha va dasturlash boʻyicha kompyuter dasturlari, internet savodxonligi toʻgaraklari, onlayn-viktorinalar, IT-olimpiadalar tashkil etish, taʼlim faoliyati bilan bogʻliq elektron dasturlar, QR-kod elektron kutubxonalar joriy etish. 4. 4-tashabbus — talaba yoshlarni badiiy adabiyotga qiziqtirish, ularda vatanparvarlik, Vatan taqdiriga daxldorlik, fidoyilik hissini tarbiyalash maqsadida “Bir talabaga — bir kitob” aksiyasi, “Eng faol kitobxon” tanlovi, “Yosh adabiyotchilar” klublarini, turli mavzulardagi tanlovlarni, talabalarning sheʼrlari, ilmiy maqolalari va sheʼriy toʻplamlarini chop etishni tashkil qilish, ommaviy axborot vositalarida yoritish. 5. 5-tashabbus — talaba qizlarning ijtimoiy faolligini oshirish maqsadida ularning boʻsh vaqtini mazmunli tashkil etish, “Biznes ledi” maktabi (biznes reja tuzishga oʻrgatish), “Tadbirkor talaba” klubi, “Oila maktabi” treninglari, tikuvchilik, kashtachilik, milliy hunarmandchilik kurslarini yoʻlga qoʻyish, qizlarni ichki salohiyatini ochishga koʻmaklashadigan ijodiy va fan toʻgaraklariga jalb etish. Transport universiteti mablagʻlari hisobidan 2020 — 2023-yillar Transport vazirligi, Universitet

Oʻzbekiston Respublikasi Prezidentining 2020-yil 4-maydagi PQ-4703-son qaroriga 2-ILOVA

Toshkent davlat transport universitetiga operativ boshqaruv huquqi asosida tekin beriladigan obyektlar

ROʻYXATI

T/r Obyekt nomi Manzili Obyektni topshiruvchi tashkilot Qabul qiluvchi tashkilot 1. Talabalar turar joyi Toshkent shahar, Uchtepa tumani, 9-daha, Lutfiy koʻchasi, 18-uy Toshkent avtomobil yoʻllarini loyihalash, qurish va ekspluatatsiyasi instituti Toshkent davlat transport universiteti 2. Talabalar turar joyi Toshkent shahar, Yunusobod tumani, 7-daha, Quloqtepa koʻchasi Toshkent avtomobil yoʻllarini loyihalash, qurish va ekspluatatsiyasi instituti Toshkent davlat transport universiteti 3. Umumiy ovqatlanish shoxobchasi Toshkent shahar, Yunusobod tumani, 9-daha, Quloqtepa koʻchasi Toshkent avtomobil yoʻllarini loyihalash, qurish va ekspluatatsiyasi instituti Toshkent davlat transport universiteti 4. Oʻquv binosi Toshkent shahri, Mirobod tumani, Alimbekov koʻchasi, 2-uy Toshkent avtomobil yoʻllarini loyihalash, qurish va ekspluatatsiyasi instituti Toshkent davlat transport universiteti 5. Oʻquv-amaliy poligoni Toshkent viloyati, Parkent tumani, “Chinorbuloq” MFY hududi Toshkent avtomobil yoʻllarini loyihalash, qurish va ekspluatatsiyasi instituti Toshkent davlat transport universiteti 6. Toshkent ixtisoslashtirilgan xotin-qizlar kasb-hunar kolleji binosi Toshkent shahri, Yashnobod tumani, Temirchi koʻchasi, 53-uy Toshkent avtomobil yoʻllarini loyihalash, qurish va ekspluatatsiyasi instituti Toshkent davlat transport universiteti 7. Toshkent shahri, Mirobod tumanida joylashgan 65-maktab (sobiq Mirobod sanoat kasb-hunar kolleji) binosi Toshkent shahri, Mirobod tumani, Sarikoʻl 3-berk koʻchasi, 1-uy Xalq taʼlimi vazirligi Toshkent davlat transport universiteti

Oʻzbekiston Respublikasi Prezidentining 2020-yil 4-maydagi PQ-4703-son qaroriga 3-ILOVA

Toshkent davlat transport universitetiga tegishli kommunal va foydalanish xarajatlarini qoplagan holda “nol” stavkadagi ijara toʻlovi asosida beriladigan obyektlar

ROʻYXATI

T/r Obyekt nomi Manzili Obyektni ijaraga beruvchi tashkilot Ijara muddati 1. Aviakosmik texnologiyalar fakulteti binosi (moddiy-texnika vositalari bilan birgalikda) Toshkent shahri, Shayxontohur tumani, Labzak koʻchasi, 107-uy Toshkent davlat texnika universiteti 2022-yil 1-iyul 2. 63-talabalar turar joyi Toshkent shahri, Olmazor tumani, Talabalar shaharchasi Toshkent davlat texnika universiteti 2022-yil 1-iyul

Oʻzbekiston Respublikasi Prezidentining 2020-yil 4-maydagi PQ-4703-son qaroriga 4-ILOVA

Toshkent temir yoʻl muhandislari institutidan Toshkent davlat texnika universitetiga koʻchiriladigan taʼlim yoʻnalishlari

roʻyxati

T/r Taʼlim yoʻnalishi shifri va nomi Talabalar soni* 1. 5311600 — Konchilik ishi (yer osti konchilik ishi) 57 2. 5311600 — Konchilik ishi (ochiq konchilik ishi) 44 3. 5314400 — Foydali qazilmalarni boyitish (koʻmir) 12 4. 5312200 — Konchilik elektromexanikasi 25 5. 5312300 — Marksheyderlik ishi 18

* Mazkur taʼlim yoʻnalishlari boʻyicha tahsil olayotgan talabalarga oʻqishni Universitetning bilim sohasi doirasidagi taʼlim yoʻnalishlariga yoki Toshkent davlat texnika universitetining mos yoki turdosh taʼlim yoʻnalishlariga koʻchirishga ruxsat beriladi.

Oʻzbekiston Respublikasi Prezidentining 2020-yil 4-maydagi PQ-4703-son qaroriga 5-ILOVA

Toshkent davlat transport universitetining Vasiylik kengashi

TARKIBI

1. A.J. Ramatov — Oʻzbekiston Respublikasi Bosh vazirining birinchi oʻrinbosari, Vasiylik kengashi raisi 2. E.M. Ganiyev — Oʻzbekiston Respublikasi transport vaziri, Vasiylik kengashi raisi oʻrinbosari 3. U.Sh. Begimqulov — Oʻzbekiston Respublikasi oliy va oʻrta maxsus taʼlim vazirining oʻrinbosari 4. X.N. Xasilov — “Oʻzbekiston temir yoʻllari” AJ boshqaruvi raisi v.b. 5. A.A. Abduvaliyev — Oʻzbekiston Respublikasi Transport vazirligi huzuridagi Avtomobil yoʻllari qoʻmitasi raisi v.b. 6. B.I. Xakimov — “Uzbekistan Airways” AJ boshqaruvi raisi v.b. 7. U.M. Kiyasov — “Uzbekistan Airways Technics” MCHJ direktori 8. R.M. Ismailov — “Uzbekistan Airports” AJ boshqaruvi raisi v.b. 9. A.U. Suvanov — “Chirchiq aviatsiya taʼmirlash zavodi” davlat korxonasi direktori 10. A.X. Ashurov — “Oʼzaeronavigatsiya” markazi” davlat unitar korxonasi direktori 11. lavozimiga koʻra — Toshkent davlat transport universiteti rektori, Vasiylik kengashi kotibi

Izoh. Kengash aʼzolari boshqa ishga oʻtgan taqdirda, Kengash tarkibiga ushbu lavozimlarga yangi tayinlangan yoki vazifalar yuklatilgan shaxslar kiritiladi.