Ilm-fanni rivojlantirishni va innovatsiya faoliyatini davlat yoʻli bilan qoʻllab-quvvatlash choralari toʻgʻrisida (337-son)

21.07.1992

Oʻzbekiston Respublikasi Prezidenti huzuridagi Vazirlar Mahkamasining

qarori

Oʻzbekiston Respublikasi Prezidentining “Ilm-fanni va innovatsiya faoliyatini rivojlantirishni davlat yoʻli bilan qoʻllab-quvvatlash toʻgʻrisida”gi 1992-yil 8-iyul Farmonini bajarish maqsadida va ilmiy-texnikaviy salohiyatni mustahkamlashga, ilmiy tadqiqotlarni ijtimoiy-iqtisodiy taraqqiyotning yirik muammolarini hal etishga yoʻnaltirishga, innovatsiya faoliyatini kuchaytirishga muhim ahamiyat berib, shuningdek, Oʻzbekiston Respublikasi Prezidentining Fanlar akademiyasi olimlari bilan uchrashuvida belgilangan vazifalarni amalga oshirish maqsadida Vazirlar Mahkamasi qaror qiladi:

1. Oʻzbekiston Respublikasi Fan va texnika davlat qoʻmitasi Moliya vazirligi va Bosh davlat soliq boshqarmasi bilan birgalikda qoʻshimcha qiymatga solinadigan soliqdan ozod etilishi lozim boʻlgan innovatsion hamda xoʻjalik shartnomalari asosidagi ilmiy-tadqiqot ishlarining turlarini shu yil 1-sentabrgacha va kelgusida 1995-yilgacha har yili aniqlasin va tasdiqlasin.

2. Oʻzbekiston Respublikasi Fan va texnika davlat qoʻmitasi Fanlar akademiyasi, tarmoq akademiyalari, Oliy va oʻrta maxsus taʼlim vazirligi hamda Oʻzbekistonning taraqqiyot istiqbolini belgilash qoʻmitasi bilan birgalikda 2 oy muddat ichida fan va texnikani rivojlantirishning ustuvor yoʻnalishlari roʻyxatini hamda davlat ilmiy-texnika dasturlarini, ularni amalga oshirish uchun masʼul boʻlgan bosh tashkilotlarni belgilagan holda, ishlab chiqsin va Hukumat tasdiqlashi uchun taqdim etsin.

3. Oʻzbekiston Respublikasi Fan va texnika davlat qoʻmitasi, Fanlar akademiyasi hamda Oliy va oʻrta maxsus taʼlim vazirligi:

fan va texnikaning ustuvor yoʻnalishlari boʻyicha nomzodlar va doktorlar tayyorlashning istiqbol dasturini ishlab chiqsinlar;

yoshlar orasidan kamida 20 nafar isteʼdodli olimlarning tajriba orttirish uchun har yili xorijiy markazlarga yuborilishini taʼminlasinlar.

4. Oʻzbekistonning taraqqiyot istiqbolini belgilash qoʻmitasi, Moliya vazirligi olimlarning xorijiy markazlarda tajriba orttirishi uchun zarur valyuta mablagʻlari ajratishni va ularni soʻm bilan qoplashni nazarda tutsinlar.

5. Fan va texnika davlat qoʻmitasi tarmoq vazirliklari va konsernlari bilan birgalikda 3 oy muddat ichida tugallangan ilmiy ishlanmalarni tahlil qilib, ularni amalga oshirishga doir takliflar kiritsin.

6. Fanlar akademiyasi Fan va texnika davlat qoʻmitasi, tarmoq akademiyalari hamda Oliy va oʻrta maxsus taʼlim vazirligi bilan birgalikda 2 oy muddat ichida Fanlar akademiyasining boʻlinmalari negizida ilmiy ishlanmalarni ichki va tashqi bozorda reklama qilish va sotish maqsadida ularning respublika innovatsiya-tijorat koʻrgazma markazini tashkil etsin.

7. Fan va texnika davlat qoʻmitasi, Tashqi iqtisodiy aloqalar vazirligi Fanlar akademiyasi, tarmoq akademiyalari hamda Oliy va oʻrta maxsus taʼlim vazirligi bilan birgalikda 3 oy muddat ichida xalqaro ilmiy-texnikaviy hamkorlik dasturi ishlab chiqilishini taʼminlasinlar. Bu dasturda:

ilmiy-texnika tadqiqotlari va ishlanmalarini huquqiy jihatdan himoya qilish, ularning raqobatbardoshligini oshirish, litsenziyalar va patentlarni sotish hajmini koʻpaytirish, Oʻzbekiston olimlarining yutuqlarini chet ellarda keng reklama qilish choralari;

Oʻzbekiston olimlarining ilgʻor texnologiyalari va ilmiy ishlanmalari negizida qoʻshma korxonalar venchur kompaniyalar, innovatsion dasturlar va loyihalarni yaratish koʻzda tutilsin.

8. Respublika valyuta fondlariga ajratmalar normativi Fanlar akademiyasiga qarashli ilmiy-tadqiqot hamda tajriba-konstruktorlik tashkilotlari va korxonalari mahsulotlari (ishlari, xizmatlarini eksport qilishdan olingan tushumlarning 20 foizi miqdorida belgilansin. Tushumlarning 80 foizi, shuningdek, bunda olingan qoʻshimcha mablagʻlar birinchi navbatda ilmiy-tadqiqot faoliyatining moddiy bazasini rivojlantirishga yoʻnaltirilsin.

9. Oʻzbekiston Respublikasi Fanlar akademiyasi:

gʻoʻza va boshqa ekinlar gen-injeneriya biotexnologiyasi sohasidagi ishlarni rivojlantirsin (“Geninmar” dasturi). Buning uchun bir oy muddat ichida Fitopatologiya instituti va uning boʻlinmalarini, shu jumladan, Sirdaryo tayanch punktini (mavjud ilmiy-ishlab chiqarish va ijtimoiy bazasini) akademik O.S Sodiqov nomidagi Bioorganik kimyo institutining geninjeneriya biotexnologiya laboratoriyasi bilan birlashtirgan holda, Genetika institutini tashkil etsin;

Bioorganik kimyo institutining tajriba-eksperimental bazasida gossipol asosida feromonlar va shifobaxsh dorivorlar ishlab chiqarishni koʻpaytirsin;

shifobaxsh dorivorlar xillarini koʻpaytirib, ularni ishlab chiqarish hajmini oshirsin, 1992-yilda qand lavlagini qayta ishlashning chiqitsiz texnologiyasini hamda Oʻsimlik moddalari kimyosi institutining tajriba-eksperimental bazasida steviya oʻsimligining poyasi va barglaridan qand-shakar oʻrnini bosadigan modda ishlab chiqarish texnologiyasini ishlab chiqsin va oʻzlashtirsin.

10. 1992-yilda Fanlar akademiyasiga 9-bandda koʻrsatilgan ishlar uchun Vazirlar Mahkamasining valyuta jamgʻarmasidan 1,75 million AQSH dollari miqdorida mablagʻ ajratilsin, shundan 1,2 million dollari Oʻsimlik moddalari kimyosi institutiga, 0,25 million dollari Genetika institutyaga, shuningdek, 0,3 million dollari chet el adabiyotlarini sotib olish hamda xalqaro ilmiy uyushmalarda ishtirok etish uchun ajratilsin.

11. Moliya vazirligi 1992-yilda Fanlar akademiyasiga shifobaxsh dorivorlar ishlab chiqarish hajmini kengaytirish, texnologiyalarni ishlab chiqish va oʻzlashtirish, shuningdek, ajratilayotgan valyutani soʻm bilan qoplash uchun Vazirlar Mahkamasining zaxira jamgʻarmasidan 17,63 million soʻm, shu jumladan, Oʻsimlik moddalari kimyosi institutiga 14,39 million soʻm, Bioorganik kimyo institutiga 2,3 million soʻm va Genetika institutiga 0,43 million soʻm ajratsin.

12. Olmaliq maishiy kimyo zavodi har yili Bioorganik kimyo institutiga kamida 40 tonna hajmida “Yujniy” entomologik yelimi yetkazib berishni taʼminlasin.

13. “Oʻzoziqovqatsanoat” konserni:

Bioorganik kimyo institutiga har yili kamida 3 tonna hajmida gossipol antranilati yetkazib berishni taʼminlasin;

Fanlar akademiyasining Oʻsimlik moddalari kimyosi instituti tomonidan yetkazib beriladigan xom-ashyo hajmiga muvofiq steviyadan foydalangan holda qand-shakarning oʻrnini bosadigan mahsulotlar olish retsepturasini ishlab chiqsin va 1992-1993-yillarda uni ishlab chiqarishni oʻzlashtirsin.

14. Qishloq xoʻjaligi vazirligi Oʻsimlik moddalari kimyosi institutining talabnomasiga binoan xom ashyo (qand lavlagi va steviya poyasi) yetkazib berishni taʼminlasin.

15. Toshkent viloyati hokimligi Oʻsimlik moddalari kimyosi institutiga shifobaxsh oʻsimliklar va stevin yetishtirish uchun Qibray tumanida 2 ga yer uchastkasi ajratsin.

16. “Oʻzshartnomasavdo”, boshqa ixtisoslashtirilgan taʼminot-sotish tashkilotlari (ularga birkitilgan nomenklatura boʻyicha), shuningdek, Tashqi iqtisodiy aloqalar vazirligi belgilangan tartibga muvofiq Fanlar akademiyasi institutlari uchun, qayd etib oʻtilgan maqsadlarga ajratilgan mablagʻlar doirasida, texnologik asbob-uskunalar va xom ashyo yetkazib berishni taʼminlasinlar.

17. Tashqi iqtisodiy aloqalar vazirligi shifobaxsh dorivorlarni va respublika ilmiy-tadqiqot muassasalarining fan bilan bogʻliq mahsulotlarini chet mamlakatlarda sotish imkoniyatlarini, shuningdek, bunday mahsulotlarni ishlab chiqarish uchun qoʻshma korxonalar barpo etish imkoniyatlarini oʻrgansin.

18. Ushbu qarorning bajarilishini nazorat qilish Bosh vazirning oʻrinbosari M. Q. Qoraboyev zimmasiga yuklatilsin.

Vazirlar Mahkamasining Raisi I. KARIMOV

Toshkent sh.,

1992-yil 21-iyul,

337-son