2020-2022-yillarda Surxondaryo viloyatining Denov tumani va uning markazini kompleks ijtimoiy-iqtisodiy rivojlantirish toʻgʻrisida (PQ-4667-son)

09.04.2020

Oʻzbekiston Respublikasi Prezidentining

Qarori

Bugungi kunda Respublikamiz hududlarida mahalliy mineral xom ashyo resurslarini chuqur qayta ishlash asosida yuqori qoʻshilgan qiymatga ega raqobatbardosh eksportbop mahsulotlar ishlab chiqarishni taʼminlaydigan zamonaviy sanoat korxonalarini tashkil etish, hududlarning ishlab chiqarish salohiyatidan samarali foydalanish uchun investitsiyalarni keng jalb qilish muhim oʻrin tutmoqda.

Tarixdan maʼlumki, hozirgi Denov tumani hududida joylashgan koʻhna Chagʻoniyon qadimgi davrlardan buyon yirik iqtisodiy-madaniy markaz sifatida muhim ahamiyatga ega boʻlgan. Bu yerda turli xalqlar oʻrtasida madaniy-iqtisodiy aloqalar jadal rivojlangan, savdo-sotiq, hunarmandchilik, dehqonchilik va chorvachilik mahsulotlarini ishlab chiqarish keng yoʻlga qoʻyilgan.

Oʻtgan yillar davomida Surxondaryo viloyatining Denov tumanini ijtimoiy-iqtisodiy rivojlantirish borasida bir qator ishlar amalga oshirilgan boʻlsa-da, aholi uchun dolzarb boʻlgan muammoli masalalar toʻliq hal etilmayapti.

Viloyatning eng koʻp aholisi istiqomat qilayotgan Denov tumanining Bosh rejasiga oʻz vaqtida urbanizatsiya nuqtai nazardan yondashilmaganligi sababli ayrim yirik sanoat korxonalari, dehqon va buyum bozorlari tuman markazi Denov shahrida joylashtirilgan. Natijada aholi eng gavjum boʻladigan mazkur hududlarga kirish va chiqish uchun yoʻllarning torligi, avtomobillar uchun toʻxtash joylari va infratuzilma tarmoqlari yetarli emasligi jiddiy muammolar tugʻdirmoqda. Ayniqsa shahardagi dehqon bozori atrofi butunlay izdan chiqqan va aholiga juda katta noqulayliklar keltirib chiqarmoqda.

Tumanda ishlab chiqarishni diversifikatsiya qilish, yer va suv resurslaridan samarali foydalanish, qulay agrobiznes muhitini hamda kooperatsiya munosabatlarini rivojlantirish borasidagi ishlarni tizimli tashkil etish talab etiladi.

Denov tumanining ishlab chiqarish va mehnat salohiyatidan oqilona foydalangan holda, hududda uzoq yillar davomida shakllangan hunarmandchilik va tadbirkorlik, sanoat, turizm, xizmat koʻrsatish va agrar sohani rivojlantirish, tuman markazining meʼmoriy qiyofasini tubdan oʻzgartirish, uning tarixiy qismini rekonstruksiya qilish va obodonlashtirish ishlarini samarali tashkil etish maqsadida:

1. 2020 — 2022-yillarda Denov tumani va uning markazini kompleks ijtimoiy-iqtisodiy rivojlantirish chora-tadbirlari dasturining (keyingi oʻrinlarda — Dastur) maqsadli parametrlari va moliyalashtirish manbalari 1-ilovaga muvofiq tasdiqlansin.

2. Dasturni amalga oshirishning asosiy ustuvor yoʻnalishlari etib quyidagilar belgilansin:

tumanning Bosh rejasini tanqidiy oʻrganib, yoʻl-transport infratuzilmasi, shoh koʻchalar, koʻp qavatli uylar qurilishi, istirohat bogʻlari, sayilgohlar, zamonaviy savdo markazlari, infratuzilma obyektlari va sanoat zonalarini joylashtirish masalalarini muhandislik tarmoqlari bilan birgalikda koʻrib chiqib, takliflarni tayyorlash hamda yaqin va oʻrta istiqboldagi shaharsozlik vazifalarini belgilab olish;

tuman markazining meʼmoriy qiyofasini tubdan oʻzgartirish, tarixiy qismini rekonstruksiya qilish, koʻp qavatli uy-joy fondini sifat jihatdan yaxshilash, kommunal xizmat koʻrsatish tizimini yanada takomillashtirish;

aholining ish bilan bandligini oshirish hamda ishsizlik darajasini pasaytirish maqsadida tadbirkorlarni jalb etgan holda, sanoat va xizmat koʻrsatish sohalarini, qishloq xoʻjaligi mahsulotlarini qayta ishlash tarmogʻini jadal rivojlantirish;

sanoat tarmoqlarini rivojlantirish uchun toʻgʻridan-toʻgʻri xorijiy investitsiyalarni jalb etish hajmlarini keskin oshirish, mahalliy xomashyodan eksportbop mahsulotlar ishlab chiqarishni yoʻlga qoʻyish orqali tuman iqtisodiyotiga valyuta tushumini koʻpaytirish borasida samarali ishlarni tashkil etish;

muhandislik-kommunikatsiya, xususan, ichimlik suv va kanalizatsiya tarmoqlarini qurish, avtomobil yoʻllari va ichki koʻchalar holatini yaxshilash, tuman markazidagi massivlarda zamonaviy tungi yoritish uskunalari va chiroqlarini oʻrnatish;

ichki va tumanlararo yoʻnalishlarda harakatlanuvchi jamoat transportining yangi yoʻnalishlarini ochib, aholiga sifatli va qulay transport xizmatlari koʻrsatishni tashkil etish;

oliy taʼlim xizmatlari koʻrsatish sifati va koʻlamini kengaytirish, zamonaviy texnika va texnologiyalarning rivojlanish tendensiyalarini hisobga olgan holda, tadbirkorlik, texnologiyalar, raqamli iqtisodiyot hamda mehnat bozorida ehtiyoj yuqori boʻlgan boshqa sohalar boʻyicha yuqori malakali kadrlarni tayyorlash;

ijtimoiy soha muassasalari holatini yaxshilash, binolarini taʼmirlash, jihozlarini yangilash, hududlarini obodonlashtirish, mutaxassislar malakasini va xizmat koʻrsatish madaniyatini oshirish hamda bu sohada xususiy sektor ulushini koʻpaytirish;

zamonaviy tibbiy xizmat koʻrsatish klinikalari va tashxis markazlarini barpo etish;

sugʻoriladigan yerlarning meliorativ holatini yaxshilash, qishloq xoʻjaligi mahsulotlari yetishtirishni jadal rivojlantirish;

soliqqa tortish bazasini kengaytirish orqali mahalliy budjetga daromadlar tushumini oshirish.

3. Oʻzbekiston Respublikasi Vazirlar Mahkamasi bir hafta muddatda Dasturni amalga oshirishning asosiy ustuvor yoʻnalishlarini inobatga olgan holda, 2020 — 2022-yillarda Denov tumani va uning markazini kompleks ijtimoiy-iqtisodiy rivojlantirish dasturining maqsadli parametrlari va moliyalashtirish manbalari asosida “2020 — 2022-yillarda Denov tumani va uning markazini kompleks ijtimoiy-iqtisodiy rivojlantirish chora-tadbirlarining manzilli dasturi”ni ishlab chiqib, tasdiqlasin.

4. 2020 — 2022-yillarda Surxondaryo viloyatining Denov tumani va uning markazini kompleks ijtimoiy-iqtisodiy rivojlantirish chora-tadbirlari dasturini amalga oshirish boʻyicha Respublika ishchi guruhi (keyingi oʻrinlarda — Respublika ishchi guruhi) tarkibi 2-ilovaga muvofiq tasdiqlansin.

Respublika ishchi guruhining asosiy vazifalari etib quyidagilar belgilansin:

Dastur doirasida har bir loyihaning oʻz muddatida va sifatli amalga oshirilishini masʼul rahbarlar ishtirokida taʼminlash;

Dastur doirasida belgilangan loyihalarning amalga oshirilishi boʻyicha monitoring olib borish, loyihalarning oʻz muddatida va sifatli bajarilishiga toʻsqinlik qiluvchi muammolarni bartaraf etish yuzasidan tezkor va amaliy choralar koʻrish;

Dasturga kiritilgan loyihalarning bajarilishini muntazam ravishda har oyda bir marta Denov tumanida, har chorakda bir marta Respublika darajasida muhokama qilib borish va muammoli loyihalar yechimi yuzasidan zarur va tezkor chora-tadbirlarni amalga oshirish;

tumandagi kambagʻallikka oid real ahvolni oʻrganish, kambagʻallikni qisqartirish va bartaraf etish boʻyicha zarur chora-tadbirlarni belgilash;

Dastur doirasida tadbirkorlik subyektlariga investitsiya loyihalarini amalga oshirish hamda Denov tumani va uning markazida shaharsozlik talablari asosida koʻp qavatli uy-joylar qurish uchun ajratiladigan yer maydonlarini belgilash, tuman markazini kengaytirish bilan bogʻliq masalalarni koʻrib chiqish;

zaruratga koʻra, loyihalarning qiymati va ish oʻrinlari sonini saqlab qolish sharti bilan hamda tayyorlangan loyiha hujjatlari mavjud boʻlgan taqdirda, Dasturning manzilli roʻyxatiga qoʻshimcha va oʻzgartirishlar kiritish.

5. Dasturda belgilangan vazifalarni oʻz vaqtida va sifatli bajarish, shu jumladan, tuman markazining meʼmoriy qiyofasini tubdan oʻzgartirish, yirik sanoat korxonalarini tuman markazidan tashqariga koʻchirish hamda kommunal xizmat koʻrsatish tizimini yanada takomillashtirish maqsadida Denov tumani hokimligi tuzilmasida Denov shahrini kompleks rivojlantirish masalalari boʻyicha hokimning birinchi oʻrinbosari lavozimi joriy etilsin.

Denov tumani hokimligi boshqaruv apparatining namunaviy tuzilmasi 3-ilovaga muvofiq tasdiqlansin.

6. Oʻzbekiston Respublikasi Qurilish vazirligi Iqtisodiy taraqqiyot va kambagʻallikni qisqartirish vazirligi, Yer resurslari, geodeziya, kartografiya va davlat kadastri davlat qoʻmitasi, Surxondaryo viloyati hokimligi bilan birgalikda bir oy muddatda Denov tumanining Bosh rejasiga muvofiq tuman markazida joylashgan dehqon bozori va uning atrofidagi xizmat koʻrsatish obyektlarini amaldagi tartib asosida quriladigan zamonaviy bozorga koʻchirish bilan bogʻliq tashkiliy masalalarni oʻrganib chiqib, Vazirlar Mahkamasiga asoslangan taklif kiritsin.

7. Denov tumani hokimligi Respublika ishchi guruhi bilan kelishgan holda, tadbirkorlik faoliyatini amalga oshirish, shu jumladan, savdo, ijtimoiy-maishiy xizmat koʻrsatish obyektlarini qurish hamda tuman markazida shaharsozlik talablari asosida koʻp qavatli uy-joylar qurish uchun yer uchastkalarini elektron onlayn-auksion savdolariga chiqarilishini taʼminlasin.

8. Shunday tartib oʻrnatilsinki, unga muvofiq Denov tumanida yer uchastkalarini tadbirkorlik faoliyatini amalga oshirish uchun elektron onlayn-auksion orqali sotishdan tushadigan barcha mablagʻlar (tuman qurilish boʻlimining bank hisob raqamiga tushadigan mablagʻlar bundan mustasno), istisno tariqasida, tuman mahalliy budjetiga Dastur doirasida Denov shahrida amalga oshiriladigan infratuzilma loyihalarini moliyalashtirish uchun yoʻnaltiriladi.

9. Surxondaryo viloyati hokimligi:

a) Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi, Davlat aktivlarini boshqarish agentligi, Qurilish vazirligi va Moliya vazirligi bilan birgalikda bir oy muddatda Denov markazidagi yirik sanoat korxonalarini xatlovdan oʻtkazsin va xatlov natijalariga koʻra, ularni zarur iqtisodiy hisob-kitoblar asosida tuman markazidan koʻchirish masalasi boʻyicha Vazirlar Mahkamasiga taklif kiritsin;

b) Davlat aktivlarini boshqarish agentligi va Qurilish vazirligi bilan birgalikda tadbirkorlik subyektlarini jalb qilgan holda, Denov tumani markazidagi “Nurli manzil” mahallasi hududida joylashgan sobiq “Pivo-konserva ishlab chiqarish zavodi” bino va inshootlari oʻrnida zamonaviy koʻp qavatli uy-joylar qurish choralarini koʻrsin;

v) Madaniyat vazirligi va Moliya vazirligi bilan birgalikda kelishilgan loyihalar asosida Denov tumanidagi “Xoja Alouddin Attor” meʼmoriy obidasini taʼmirlash va obodonlashtirish hamda “Said-Otaliq” madrasasi majmuasini taʼmirlash-tiklash ishlarini amalga oshirsin;

g) Qurilish vazirligi va Oʻzbekiston Musulmonlar idorasi bilan birgalikda tumandagi markaziy jome masjidini tuman markazidan tashqariga koʻchirish boʻyicha taklif tayyorlasin;

d) Transport vazirligi huzuridagi Avtomobil yoʻllari qoʻmitasi, Iqtisodiy taraqqiyot va kambagʻallikni qisqartirish vazirligi, Moliya vazirligi bilan birgalikda Denov shahriga kirish qismida qurilayotgan yangi bozorga tutash hududda shaharning Bosh rejasiga asosan 4r-108 “Denov aylanma yoʻli” va M-41 “Bishkek-Termiz-Dushanbe” avtomobil yoʻlini bogʻlovchi temir yoʻl ustidan oʻtuvchi hamda Denov tumani markazidagi “Guliston” va “Lolazor” mahallalarini bogʻlovchi Qizilsuv daryosi ustidan oʻtuvchi yangi koʻprik qurilishini taʼminlasin;

e) Iqtisodiy taraqqiyot va kambagʻallikni qisqartirish vazirligi, Investitsiyalar va tashqi savdo vazirligi bilan birgalikda:

davlat boshqaruvi organlari, xoʻjalik birlashmalari hamda mahalliy ijro etuvchi hokimlik organlari tomonidan Dastur doirasidagi chora-tadbirlarning belgilangan muddatlarda amalga oshirilishini tahlil qilib borsin va muvofiqlashtirsin;

Dasturning barcha parametrlari bajarilishi boʻyicha monitoring olib borilishini tashkil etsin va har oyda tizimli ravishda muammoli masalalarni koʻrib chiqib, ularni hal etish yuzasidan tezkor amaliy choralar koʻrsin;

j) Dastur doirasida amalga oshirilayotgan ishlar yuzasidan Respublika Ishchi guruhiga axborot kiritib borsin.

10. Oʻzbekiston Respublikasi Bandlik va mehnat munosabatlari vazirligi Surxondaryo viloyati hokimligi, Iqtisodiy taraqqiyot va kambagʻallikni qisqartirish vazirligi, Davlat aktivlarini boshqarish agentligi bilan birgalikda 2020-yil 1-sentabrga qadar Denov tumanida mavjud boʻsh turgan bino va inshootlar negizida “Ishga marhamat” monomarkazi va kasbga tayyorlash markazlarini tashkil etib, ularda birinchi navbatda ishsizlar va kambagʻal oilalar aʼzolarining tadbirkorlik asoslari boʻyicha hamda kasbga oʻqitilishini taʼminlasin.

11. Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi, Moliya vazirligi, Surxondaryo viloyati hokimligi:

Davlat aktivlarini boshqarish agentligi bilan birgalikda aholining bandligini taʼminlash maqsadida tadbirkorlik yaxshi rivojlangan va aholi zich joylashgan hududlar atrofida qishloq xoʻjaligiga moʻljallanmagan va boʻsh turgan yer maydonlarida 2020-yil 1-iyulga qadar kamida 3 ta kichik sanoat zonasini belgilangan tartibda tashkil etsin va tegishli infratuzilma bilan taʼminlasin;

Mahalla va oilani qoʻllab-quvvatlash vazirligi hamda tegishli vazirlik va idoralar bilan birgalikda bir oy muddatda Denov tumanidagi oʻrtacha kambagʻallik darajasiga nisbatan ushbu koʻrsatkich yuqori boʻlgan mahallalarga alohida eʼtibor bergan holda, aholini faol tadbirkorlikka va mehnatga jalb qilish asosida kambagʻallikdan chiqarish chora-tadbirlari rejasini ishlab chiqib, uning ijrosini amalga oshirsin;

Denov tumanida ichimlik suv taʼminotini yaxshilash, ichki yoʻllar, maktabgacha taʼlim tashkilotlari va umumtaʼlim maktablarini qurish, rekonstruksiya qilish va taʼmirlash hamda kichik sanoat zonalariga kommunikatsiya tarmoqlarini oʻtkazish maqsadida Inqirozga qarshi kurashish jamgʻarmasi hisobidan 50 mlrd soʻm mablagʻlar yoʻnaltirilishini taʼminlasin.

12. Oʻzbekiston Respublikasi Turizmni rivojlantirish davlat qoʻmitasi va Surxondaryo viloyati hokimligi:

Qishloq xoʻjaligi vazirligi bilan birgalikda agroturizm yoʻnalishini rivojlantirish maqsadida ikki oy muddatda tumandagi meva-sabzavot mahsulotlarini yetishtirish va qayta ishlash bilan shugʻullanuvchi fermer xoʻjaliklari va klasterlar tomonidan turistlarni qabul qilishga moʻljallangan oilaviy mehmon uylarini tashkil qilish;

ikki oy muddatda “Oʻzbekiston turizm magistrali” turizm transport koridorida barpo etilayotgan obyektlar loyihasi asosida tumanda avtomagistral yoʻli boʻylab turizm xizmatlarini yoʻlga qoʻyishni koʻzda tutuvchi yoʻlboʻyi infratuzilma obyekti majmuasini tashkil etish choralarini koʻrsin.

13. Oʻzbekiston Respublikasi Sogʻliqni saqlash vazirligi Surxondaryo viloyati hokimligi, Turizmni rivojlantirish davlat qoʻmitasi bilan birgalikda uch oy muddatda Denov tumanida tibbiyot turizmini rivojlantirish maqsadida davlat-xususiy sheriklik asosida mahalliy aholi bilan bir qatorda qoʻshni davlatlar fuqarolarini qabul qilishga ixtisoslashgan diagnostika markazi, statsionar davolanish, joylashtirish vositalari, ovqatlanish punktlari, avtoturargoh, dam olish joylari va boshqalarni oʻz ichiga oluvchi tibbiyot kompleksini tashkil qilish choralarini koʻrsin.

14. Oʻzbekiston Respublikasi Energetika vazirligi, Uy-joy kommunal xizmat koʻrsatish vazirligi, Surxondaryo viloyati hokimligi bilan birgalikda aholini elektr energiyasi, tabiiy va suyultirilgan gaz, ichimlik suv va kanalizatsiya tizimi bilan taʼminlash boʻyicha muhandislik-kommunikatsiya infratuzilmasini rivojlantirish, shuningdek, Dastur doirasida amalga oshiriladigan investitsiya loyihalari asosida ishlab chiqarish korxonalarining muhandislik-kommunikatsiya tarmoqlariga oʻz vaqtida ulanishini hamda ularga mavjud resurs va texnik imkoniyatlardan kelib chiqib, talab etiladigan tabiiy gaz va elektr energiyasi yetkazib berilishini taʼminlash choralarini koʻrsin.

15. Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi, Moliya vazirligi hamda Investitsiyalar va tashqi savdo vazirligi Dastur doirasida amalga oshiriladigan markazlashtirilgan manbalar hisobiga moliyalashtiriladigan loyihalarni Oʻzbekiston Respublikasining 2020 — 2022-yilgi Investitsiya dasturining 2020-yil uchun tasdiqlangan parametrlari doirasida amalga oshirsin hamda kelgusi yillar uchun asosiy koʻrsatkichlarni aniqlashtirib va yangilab borgan holda, Investitsiya dasturini shakllantirish jarayonida inobatga olsin.

16. Surxondaryo viloyati hokimligi:

tegishli davlat boshqaruvi organlari, xoʻjalik birlashmalari, tijorat banklari hamda loyiha tashabbuskorlari bilan birgalikda bir oy muddatda Dasturdagi koʻrsatkichlardan kelib chiqqan holda, tarmoq jadvallarini ishlab chiqib, tasdiqlanishini;

Oʻzbekiston Respublikasi Transport vazirligi huzuridagi Avtomobil yoʻllari qoʻmitasi bilan birgalikda Denov tumani markazidagi Sharof Rashidov va Mustaqillik koʻchalari yoqasida belgilangan masofalarda shaharsozlik talablari asosida zamonaviy “aqlli bekat”lar qurilishini;

har chorak yakuniga koʻra Dasturdagi tadbirlarning oʻz vaqtida va sifatli bajarilishi boʻyicha masʼul ijrochilar faoliyatining natijadorligi xalq deputatlari Surxondaryo viloyati va Denov tumani Kengashlari yigʻilishlarida muhokama qilinishini hamda amalga oshirilgan ishlar toʻgʻrisida Oʻzbekiston Respublikasi Prezidenti Administratsiyasiga axborot kiritib borilishini taʼminlasin;

manfaatdor vazirlik va idoralar bilan birgalikda bir oy muddatda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

17. Mazkur qarorning ijrosini nazorat qilish Oʻzbekiston Respublikasi Prezidenti Administratsiyasi rahbari Z.Sh. Nizomiddinov, Oʻzbekiston Respublikasi Bosh vazirining birinchi oʻrinbosari A.J. Ramatov va Surxondaryo viloyati hokimi T.A. Bobolov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2020-yil 9-aprel,

PQ-4667-son

Oʻzbekiston Respublikasi Prezidentining 2020-yil 9-apreldagi PQ-4667-son qaroriga 1-ILOVA

2020 — 2022-yillarda Denov tumani va uning markazini kompleks ijtimoiy-iqtisodiy rivojlantirish chora-tadbirlari dasturining maqsadli parametrlari va moliyalashtirish manbalari

T/r Tadbirlar nomi Loyiha soni Jami mablagʻ, mln. soʻm moliyalashtirish manbai: respublika budjeti mablagʻlari, mln. soʻm mahalliy budjet mablagʻlari, mln. soʻm maqsadli jamgʻarma mablagʻlari, mln. soʻm tarmoq korxonalari mablagʻlari, mln. soʻm tashabbuskorlar mablagʻi, mln. soʻm bank krediti, mln. soʻm xorijiy kredit, ming doll. Xorijiy investitsiya, ming doll. xalqaro moliya institutlari mablagʻlari, ming doll. Jami: 505 3 035 631 379 888 65 859 83 779 144 775 619 979 739 945 54 035 6 450 44 450 I. Sanoat, xizmat koʻrsatish va qishloq xoʻjaligi sohalarini rivojlantirish 147 1 433 839 468 783 390 449 54 035 6 450 1. Sanoat sohasi 51 908 780 259 728 245 682 37 010 5 450 2. Xizmat koʻrsatish sohasi 46 294 917 121 707 80 300 8 780 1 000 3. Qishloq xoʻjaligi sohasi 50 230 142 87 348 64 467 8 245 II. Muhandislik-kommunikatsiya tarmoqlarini rivojlantirish 207 637 263 127 500 22 909 9 279 50 775 44 450 1. Yoʻl-transport infratuzilmasi 67 414 950 127 500 12 450 28 650 2. Ichimlik suv taʼminoti va kanalizatsiya tarmoqlari 11 171 538 10 459 9 279 15 800 3. Elektr energiya taʼminoti 105 13 880 138 80 4. Gaz taʼminoti 22 36 176 36 176 5. Axborot-kommunikatsiya texnologiyalari 2 719 719 III. Ijtimoiy soha obyektlarini qurish, taʼmirlash va jihozlash 84 294 441 227 099 12 850 24 500 14 996 14 996 1. Maktabgacha taʼlim tashkilotlari 51 81 212 47 370 3 850 14 996 14 996 2. Umumtaʼlim maktablari 17 117 329 117 329 3. Sogʻliqni saqlash obyektlari 9 30 400 30 400 4. Jismoniy tarbiya va sport obyektlari 4 41 000 32 000 9000 5. Madaniyat obyektlari 3 24 500 24 500 IV. Qurilish, obodonlashtirish va koʻkalamzorlashtirish 47 565 440 23 240 71 500 136 200 334 500 1. Tuman markazini obodonlashtirish 38 140 440 15 240 71 500 53 700 2. Koʻp qavatli uy-joylar qurish 4 417 000 82 500 334 500 3. Koʻp qavatli uy-joylarda isitish tizimini tashkil etish 5 8 000 8 000 V. Irrigatsiya va melioratsiya obyektlarini rekonstruksiya qilish, taʼmirlash va tiklash 8 18 289 16 289 2 000 VI. “Xavfsiz shahar” konsepsiyasini amalga oshirish 7 36 360 9 000 4 860 22 500 VII. Inqirozga qarshi kurashish jamgʻarmasidan amalga oshiriladigan ishlar (ichimlik suv, ichki yoʻl, maktab, bogʻcha, KSZ kommunikatsiyasi va boshqalar) 5* 50 000 50 000

* Izoh: Inqirozga qarshi kurashish jamgʻarmasidan ajratiladigan mablagʻlar hisobidan amalga oshiriladigan loyihalar soni Respublika Ishchi guruhi tomonidan aniqlanadi.

Oʻzbekiston Respublikasi Prezidentining 2020-yil 9-apreldagi PQ-4667-son qaroriga 2-ILOVA

2020 — 2022-yillarda Surxondaryo viloyatining Denov tumani va uning markazini kompleks ijtimoiy-iqtisodiy rivojlantirish chora-tadbirlari dasturini amalga oshirish boʻyicha

RESPUBLIKA ISHCHI GURUHI TARKIBI

1. Z.Sh. Nizomiddinov — Oʻzbekiston Respublikasi Prezidenti Administratsiyasi rahbari, Respublika ishchi guruhi rahbari 2. A.J. Ramatov — Oʻzbekiston Respublikasi Bosh vazirining birinchi oʻrinbosari, Respublika ishchi guruhi rahbari oʻrinbosari 3. T.A. Bobolov — Surxondaryo viloyati hokimi, Respublika ishchi guruhi rahbari oʻrinbosari 4. B.E. Zakirov — qurilish vaziri 5. M.X. Saliyev — uy-joy kommunal xizmat koʻrsatish vaziri 6. N.B. Xusanov — bandlik va mehnat munosabatlari vaziri 7. O.A. Nazarbekov — madaniyat vaziri 8. Sh.M. Sodiqov — axborot texnologiyalari va kommunikatsiyalarini rivojlantirish vaziri 9. A.J. Ortiqov — iqtisodiy taraqqiyot va kambagʻallikni qisqartirish vazirining birinchi oʻrinbosari 10. N.Q. Xolmurodov — investitsiyalar va tashqi savdo vaziri oʻrinbosari 11. Yo.E. Tursunov — moliya vaziri oʻrinbosari 12. S.S. Xodjayev — qishloq xoʻjaligi vaziri oʻrinbosari 13. D.T. Dehqonov — transport vaziri oʻrinbosari vazifasini bajaruvchi 14. S. X. Bekenov — Davlat aktivlarini boshqarish agentligi direktori 15. A.A. Abduvaliyev — Avtomobil yoʻllari qoʻmitasi raisi vazifasini bajaruvchi 16. A.X. Abdullayev — “Davergeodezkadastr” qoʻmitasi raisi 17. A.I. Ikramov — Savdo-sanoat palatasi raisi 18. U.M. Mustafoyev — “Hududiy elektr tarmoqlari” AJ boshqaruvi raisi 19. B.B. Eshmuratov — “Hududgaztaʼminot” AJ boshqaruvi raisi 20. M.M. Yunusov — “Oʻzeltexsanoat” uyushmasi raisi 21. I.Oʻ. Xaydarov — “Oʻztoʻqimachiliksanoat” uyushmasi raisi 22. B.K. Sharipov — “Oʻzbekipaksanoat” uyushmasi raisi 24. N.E. Najimov — Bogʻdorchilik va issiqxona xoʻjaligini rivojlantirish agentligi rahbari 25. Q.Z. Xoshimbekov — “Qishloqqurilishinvest” injiniring kompaniyasi raisi 26. Z.Gʻ. Narzullayev — “Oʻzshahar qurilish invest” injiniring kompaniyasi raisi 27. A.Q. Mirsoatov — Milliy bank raisi 28. S.S. Annaklichev — “Oʻzsanoatqurilishbank” ATB raisi 29. N.N. Saydullayev — “Asaka bank” ATB raisi 30. F.I. Salomov — AT “Xalq banki” raisi 31. Sh.X. Atabayev — “Ipoteka-bank” ATIB raisi 32. R.Oʻ. Mamatqulov — “Agrobank” ATB raisi 33. O.A. Boʻtayev — “Mikrokreditbank” ATB raisi 34. Ch.S. Mirzayev — “Turon bank” ATB raisi 35. K.N. Irisbekova — AT “Aloqa bank” raisi 36. A.B. Eshanqulov — “Qishloq qurilish bank” ATB raisining birinchi oʻrinbosari 37. Sh.A. Abidov — Vazirlar Mahkamasi kotibiyat mudiri, Respublika ishchi guruhi kotibi

Oʻzbekiston Respublikasi Prezidentining 2020-yil 9-apreldagi PQ-4667-son qaroriga 3-ILOVA

Denov tumani hokimligi boshqaruv apparatining namunaviy

TUZILMASI

Boshqaruv xodimlarining cheklangan soni — 30 nafar.