Bojxona ombori, erkin ombor va boj olinmaydigan savdo doʻkoni faoliyatini litsenziyalash yuzasidan davlat xizmatlarini koʻrsatishning maʼmuriy reglamentlarini tasdiqlash toʻgʻrisida (210-son)

09.04.2020

Oʻzbekiston Respublikasi Vazirlar Mahkamasining

qarori

“Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonuniga hamda Oʻzbekiston Respublikasi Prezidentining “Tadbirkorlik subyektlariga davlat xizmatlarini koʻrsatish mexanizmlarini takomillashtirishga doir qoʻshimcha chora-tadbirlar toʻgʻrisida” 2017-yil 1-fevraldagi PQ-2750-son qaroriga muvofiq, shuningdek, bojxona ombori, erkin ombor va boj olinmaydigan savdo doʻkoni faoliyatini litsenziyalash tartib-taomillarini yanada soddalashtirish maqsadida Vazirlar Mahkamasi qaror qiladi:

1. Quyidagilar:

bojxona ombori faoliyatini litsenziyalash boʻyicha davlat xizmatlarini koʻrsatish, shu jumladan bojxona ombori faoliyatini amalga oshirish uchun litsenziya berish toʻgʻrisida soʻrovnoma taqdim etish, soʻrovnomani koʻrib chiqish hamda uning yakunlari yuzasidan qaror qabul qilish, litsenziya talablari va shartlariga rioya etilishini nazorat qilish, litsenziyaning amal qilishini toʻxtatib turish, tugatish, litsenziyani bekor qilish, litsenziyalar reyestrini yuritish tartibini, shuningdek, litsenziya shartlari va talablariga rioya etmaganlik uchun litsenziatning javobgarligini nazarda tutuvchi Bojxona ombori faoliyatini litsenziyalash yuzasidan davlat xizmatlarini koʻrsatishning maʼmuriy reglamenti 1-ilovaga muvofiq;

erkin ombor faoliyatini litsenziyalash boʻyicha davlat xizmatlarini koʻrsatish, shu jumladan erkin ombor faoliyatini amalga oshirish uchun litsenziya berish toʻgʻrisida soʻrovnoma taqdim etish, soʻrovnomani koʻrib chiqish hamda uning yakunlari yuzasidan qaror qabul qilish, litsenziya talablari va shartlariga rioya etilishini nazorat qilish, litsenziyaning amal qilishini toʻxtatib turish, tugatish, litsenziyani bekor qilish, litsenziyalar reyestrini yuritish tartibini, shuningdek, litsenziya shartlari va talablariga rioya etmaganlik uchun litsenziatning javobgarligini nazarda tutuvchi Erkin ombor faoliyatini litsenziyalash yuzasidan davlat xizmatlarini koʻrsatishning maʼmuriy reglamenti 2-ilovaga muvofiq;

boj olinmaydigan savdo doʻkoni faoliyatini litsenziyalash boʻyicha davlat xizmatlarini koʻrsatish, shu jumladan boj olinmaydigan savdo doʻkoni faoliyatini amalga oshirish uchun litsenziya berish toʻgʻrisida soʻrovnoma taqdim etish, soʻrovnomani koʻrib chiqish hamda uning yakunlari yuzasidan qaror qabul qilish, litsenziya talablari va shartlariga rioya etilishini nazorat qilish, litsenziyaning amal qilishini toʻxtatib turish, tugatish, litsenziyani bekor qilish, litsenziyalar reyestrini yuritish tartibini, shuningdek, litsenziya shartlari va talablariga rioya etmaganlik uchun litsenziatning javobgarligini nazarda tutuvchi Boj olinmaydigan savdo doʻkoni faoliyatini litsenziyalash yuzasidan davlat xizmatlarini koʻrsatishning maʼmuriy reglamenti 3-ilovaga muvofiq tasdiqlansin.

2. Ushbu qaror bilan tasdiqlangan maʼmuriy reglamentlarga muvofiq yuridik shaxslar koʻrsatiladigan davlat xizmatlaridan foydalanish uchun maxsus elektron tizim yoki Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) orqali murojaat qiladi.

3. Oʻzbekiston Respublikasi Prezidenti huzuridagi Loyiha boshqaruvi milliy agentligi qoshidagi “Elektron hukumat va raqamli iqtisodiyot loyihalarini boshqarish markazi” DUK hamda Adliya vazirligi huzuridagi Davlat xizmatlari agentligi Oʻzbekiston Respublikasi Davlat bojxona qoʻmitasi bilan birgalikda ikki oy muddatda:

davlat xizmatlarini koʻrsatishda ishtirok etuvchi tuzilmalarning YIDXPga ulanishini taʼminlasin;

davlat xizmatlarini koʻrsatishning har bir bosqichida yuridik shaxslar murojaatlari koʻrib chiqilishini YIDXPda kuzatib borish tartibini joriy etsin.

4. Oʻzbekiston Respublikasi Davlat bojxona qoʻmitasi YIDXPda davlat xizmatlarini joriy qilish boʻyicha texnik hujjatni bir oy muddatda ishlab chiqsin hamda belgilangan tartibda kelishish uchun Oʻzbekiston Respublikasi Prezidenti huzuridagi Loyiha boshqaruvi milliy agentligi qoshidagi “Elektron hukumat va raqamli iqtisodiyot loyihalarini boshqarish markazi” DUKka kiritsin.

5. Belgilansinki, davlat xizmatlarini koʻrsatuvchi davlat organlari va boshqa tashkilotlar hamda Oʻzbekiston Respublikasi Adliya vazirligi huzuridagi Davlat xizmatlari agentligi rahbarlari ushbu qarorda nazarda tutilgan vazifalarning oʻz vaqtida, toʻliq va sifatli bajarilishi uchun shaxsan masʼul hisoblanadi.

6. Oʻzbekiston Respublikasi Adliya vazirligi huzuridagi Davlat xizmatlari agentligi:

davlat organlari va boshqa tashkilotlar tomonidan davlat xizmatlari koʻrsatilishining belgilangan tartibi bajarilishi yuzasidan ularning faoliyati boʻyicha, shu jumladan YIDXP orqali doimiy nazorat oʻrnatsin;

ushbu qaror bilan tasdiqlangan davlat xizmatlarini koʻrsatish boʻyicha maʼmuriy reglamentlarning talablarini buzganlik uchun davlat organlari va boshqa tashkilotlar mansabdor shaxslariga nisbatan belgilangan tartibda maʼmuriy jazolarni qoʻllasin.

7. Oʻzbekiston Respublikasi Hukumatining 4-ilovaga muvofiq ayrim qarorlari oʻz kuchini yoʻqotgan deb hisoblansin.

8. Oʻzbekiston Respublikasi Davlat bojxona qoʻmitasi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

9. Mazkur qarorning bajarilishini nazorat qilish Oʻzbekiston Respublikasi Davlat bojxona qoʻmitasi raisi M.B. Azimov va Oʻzbekiston Respublikasi adliya vaziri R.K. Davletov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2020-yil 9-aprel,

210-son

Vazirlar Mahkamasining 2020-yil 9-apreldagi 210-son qaroriga 1-ILOVA

Bojxona ombori faoliyatini litsenziyalash yuzasidan davlat xizmatlarini koʻrsatishning maʼmuriy reglamenti

1-bob. Umumiy qoidalar

1. Ushbu Reglament bojxona ombori faoliyatini litsenziyalash yuzasidan davlat xizmatlarini koʻrsatish tartibini belgilaydi.

2. Ushbu Reglamentda quyidagi asosiy tushunchalardan foydalaniladi:

bojxona ombori — maxsus jihozlangan va belgilangan joy boʻlib, binolarning hududini va (yoki) ochiq maydonchalarni oʻz ichiga olgan hamda tovarlarni bojxona nazorati ostida saqlashga moʻljallangan. Bojxona ombori ochiq yoki yopiq turda boʻlishi mumkin;

ochiq turdagi bojxona ombori — har qanday shaxslar foydalanishi mumkin boʻlgan bojxona ombori;

yopiq turdagi bojxona ombori — litsenziat tovarlarini saqlashga moʻljallangan bojxona ombori, qonunchilikda nazarda tutilgan holatlar bundan mustasno. Yopiq turdagi bojxona omboriga litsenziat tovarlaridan tashqari uning tarkibiy tuzilmalari tovarlari ham joylashtirilishi mumkin;

talabgor — litsenziyalovchi organga bojxona ombori faoliyatini amalga oshirish uchun litsenziya berish toʻgʻrisidagi soʻrovnoma bilan murojaat etgan yuridik shaxs — Oʻzbekiston Respublikasi rezidenti;

litsenziya — litsenziyalovchi organ tomonidan berilgan, litsenziya talablari va shartlariga soʻzsiz rioya etgan holda bojxona ombori faoliyatini amalga oshirish uchun ruxsatnoma (huquq);

litsenziyalovchi organ — Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasining Qoraqalpogʻiston Respublikasi, viloyatlar, Toshkent shahar boʻyicha boshqarmalari, “Toshkent-AERO” ixtisoslashtirilgan bojxona kompleksi;

litsenziat — bojxona ombori faoliyatini amalga oshirishga litsenziyasi boʻlgan yuridik shaxs — Oʻzbekiston Respublikasi rezidenti;

bojxona omboriga bevosita tutash bojxona nazorati zonasi — bojxona ombori atrofida joylashgan va (yoki) bojxona omboriga tutashib ketadigan joydagi tashuvchi transport vositalariga tovarlar ortiladigan (tushiriladigan) bojxona nazorati zonasi;

ombor oʻrni — bitta bojxona yuk deklaratsiyasi boʻyicha bojxona omboriga joylashtirilgan tovarlarni yoki bitta bojxona yuk deklaratsiyasi boʻyicha boshqa bojxona rejimiga joylashtirishga ariza berilgan tovarlarni (bojxona omboridan tovarlarni chiqarishda) saqlash uchun bojxona ombori maydonining bir qismi;

maxsus elektron tizim — litsenziyalashda vakolatli organlarning idoralararo elektron hamkorlik qilishi, shuningdek litsenziya talablari hamda shartlari bajarilishining monitoringini oʻtkazish jarayonlarini qamrab oladigan, jismoniy va yuridik shaxslar uchun ochiq boʻlgan “Litsenziya” axborot tizimi;

soʻrovnoma — litsenziyalash faoliyati yuzasidan yuridik shaxsning ariza koʻrinishidagi litsenziyalovchi organga murojaati.

3. Bojxona omborida:

Oʻzbekiston Respublikasiga olib kelish va Oʻzbekiston Respublikasidan olib chiqish taqiqlangan tovarlarni (bojxona organlari tomonidan olib qoʻyilgan va bojxona organlari tomonidan taʼsis etilgan bojxona omboriga joylashtirilgan tovarlar bundan mustasno);

Oʻzbekiston Respublikasi hududida aylanishi va sotilishi taqiqlangan tovarlarni;

vakolatli davlat organlari tomonidan olib qoʻyilgan va davlat daromadiga oʻtkaziladigan mol-mulkni saqlashga ruxsat berilmaydi.

4. Bojxona omborining normal faoliyat koʻrsatishini taʼminlash uchun foydalaniladigan tovarlar (masalan, ortish-tushirish texnikasi, sovutish uskunasi, kompyuter texnikasi, maxsus kiyim-bosh va boshqalar) bojxona ombori va vaqtincha saqlash bojxona rejimlari ostida joylashtirilmaydi.

5. Tez buziladigan tovarlar bojxona omborida bunday tovarlardan oʻz maqsadiga koʻra foydalanish imkonini beruvchi va ularning sifati saqlanib qolishi muddati doirasida, biroq tanlangan bojxona rejimiga muvofiq belgilangan muddatdan ortiq boʻlmagan muddatda saqlanishi mumkin.

6. Boshqa tovarlarga zarar yetkazishi mumkin boʻlgan yoki alohida sharoitlarda saqlashni talab etadigan tovarlar Oʻzbekiston Respublikasi qonun hujjatlariga muvofiq belgilangan majburiy talablarga rioya qilingan holda, bojxona omborining bir qismi hisoblangan va bunday tovarlarni saqlash uchun maxsus moslashtirilgan omborlarda yoxud alohida binolarda saqlanishi kerak.

7. Bojxona omborida va unga tutash hududda tovarlar bilan ishlab chiqarish operatsiyalari hamda boshqa tijorat operatsiyalari amalga oshirilishiga yoʻl qoʻyilmaydi, tegishli bojxona rejimida nazarda tutilgan operatsiyalar bundan mustasno.

8. Bojxona omborida saqlanayotgan tovarlarning bojxona rasmiylashtiruvi ariza berilgan bojxona rejimlariga muvofiq tegishli bojxona rejimlari uchun Oʻzbekiston Respublikasi qonun hujjatlarida belgilangan tartibda amalga oshiriladi.

Bojxona omborida saqlashni nazarda tutmaydigan oʻzgacha bojxona rejimi ostida saqlashga ariza berilgan tovarlar bojxona omboridan tanlangan bojxona rejimiga muvofiq bunday tovarlar chiqarilishi paytidan boshlab, uch ish kunidan kechikmay olib chiqilishi kerak.

9. Litsenziya litsenziyalovchi organ tomonidan amal qilish muddati cheklanmagan holda, ombor hududiga (bojxona ombori sifatida foydalanish moʻljallanayotgan binolar va (yoki) ochiq maydonchalar, shuningdek, bojxona nazorati zonasi) ega boʻlgan talabgorga talabgor, bojxona ombori hududi, binolar hamda bojxona nazorati zonasi ushbu Reglament talablari va shartlariga muvofiq boʻlishi sharti bilan beriladi.

Talabgorga tegishli boʻlgan, bir yuridik manzilda va (yoki) bir bojxona nazorati zonasida joylashgan bir nechta bino va (yoki) ochiq maydonlar uchun bitta litsenziya beriladi.

10. Oʻzbekiston Respublikasi bojxona organlari tomonidan taʼsis etiladigan bojxona omborlari ochiq turdagi bojxona omborlari hisoblanadi.

Agar bojxona ombori bojxona organi tomonidan taʼsis etilsa, litsenziya olish talab qilinmaydi. Bunday bojxona omborini taʼsis etish va unda tovarlarni saqlash tartibi mazkur Reglamentda belgilangan talablar va shartlarga muvofiq Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi tomonidan belgilanadi.

11. Bojxona ombori faoliyatini amalga oshirish uchun ushbu Reglamentga 1-ilovaga muvofiq namunaviy (oddiy) litsenziya rasmiylashtiriladi.

12. Litsenziyaning amal qilishi litsenziya berilgan kundan boshlab, hisoblanadi.

Yuklarni litsenziya bilan taʼminlanmagan omborlardan foydalangan holda tijorat asosida saqlashga yoʻl qoʻyilmaydi, qonunchilikda nazarda tutilgan holatlar bundan mustasno. Bunday holatlar yuzasidan qonun hujjatlarida nazarda tutilgan huquqiy taʼsir choralari qoʻllaniladi.

13. Quyidagilar:

talabgorning soʻrovnomasiga koʻra litsenziyalovchi organ qaroriga koʻra — faoliyat turi uchun litsenziya;

mazkur Reglamentning 5-bobida nazarda tutilgan holatlarda oʻzgartirilgan talabgorning soʻrovnomasiga koʻra — oʻzgartirilgan litsenziya;

mazkur Reglamentning 5-bobida nazarda tutilgan holatlarda qayta rasmiylashtirilgan talabgorning soʻrovnomasiga koʻra — qayta rasmiylashtirilgan litsenziya beriladi.

Ushbu bandda belgilangan har bir holatda talabgor (yoki litsenziat) bojxona ombori bino va (yoki) ochiq maydonlarining mulk huquqi, ashyoviy huquqlar yoki ijara asosida tegishliligi toʻgʻrisidagi maʼlumotlarni soʻrovnomada koʻrsatadi.

14. Litsenziya boʻyicha huquqlarni boshqa shaxslarga berish taqiqlanadi.

2-bob. Litsenziya talablari va shartlari

15. Bojxona ombori hududi bojxona nazorati zonasi hisoblanadi.

Bojxona ombori hududiga qoʻriqlanadigan va mazkur Reglamentning 20-bandida qayd etilgan tartibda belgilab olingan, tovarlarni bojxona nazorati ostida yetkazib berishni yakunlash uchun zarur boʻlgan vaqtda tovarlarni tashiyotgan transport vositalari toʻxtab turishi uchun jihozlangan hudud tutashgan boʻlishi kerak. Koʻrsatib oʻtilgan hudud ham bojxona nazorati zonasi hisoblanadi. Bojxona nazorati ostidagi tovarlarni tashiydigan transport vositalari ushbu bojxona nazorati zonasiga sutkaning istalgan vaqtida kirishi mumkin.

Temir yoʻl va avtomobil transport uzellari hamda transport magistrallaridan olib boruvchi, transport vositalari harakati uchun yetarli kenglikka ega boʻlgan yoʻl boʻylab bojxona omborigacha boʻlgan masofa 3 km.dan oshmasligi kerak.

16. Bojxona ombori sifatida foydalanish uchun moʻljallangan binolar va (yoki) ochiq maydonchalar saqlanayotgan tovarlar va transport vositalariga nisbatan bojxona nazorati amalga oshirilishi, ularning saqlanishi taʼminlanadigan tarzda joylashtirilishi, jihozlanishi va asbob-uskunalar bilan taʼminlanishi kerak hamda quyidagilarni istisno etishi lozim:

bojxona ombori hududiga bojxona nazorati zonasiga va tovarlarga begona shaxslarning (ombor xodimlari boʻlmagan, tovarlarga nisbatan vakolatga ega boʻlmagan) yaqinlashishini;

tovarlarning bojxona nazoratini chetlab olib kirilishini va olib chiqilishini.

Agar binoning yoki inshootning yoxud ochiq maydonning bir qismi bojxona ombori hisoblansa, unga borish yoʻllari va tutashib ketadigan butun hudud bojxona nazorati ostidagi tovarlarga begona shaxslarning yaqinlashishini istisno etadigan qilib jihozlanishi kerak.

17. Bojxona ombori binolari va (yoki) ochiq maydonchalari:

yer ustidagi imoratlarda yoki inshootlarda joylashtirilishi;

qoʻriqlash va yongʻin nazorati signalizatsiyalari, sodir boʻlayotgan voqealar boʻyicha har tomondan olingan video maʼlumotlarni uch oy davomida koʻrsatish imkoniga ega boʻlgan, litsenziyalovchi organ tomonidan belgilangan joylarda oʻrnatilgan, kunu-tun ishlaydigan videokuzatuv vositalari bilan jihozlangan boʻlishi;

yongʻin xavfsizligi talablariga mos boʻlgan yongʻinni oʻchirish tizimi va vositalariga ega boʻlishi kerak.

18. Talabgor:

bojxona ombori sifatida foydalanish uchun moʻljallangan binolar hajmini va (yoki) ochiq hududning hamda bojxona nazorati zonasining umumiy maydonini;

bojxona omboriga bevosita tutash hududni;

bojxona omborida saqlashga moʻljallangan tovarlar nomenklaturasini belgilaydi.

Bunda bojxona ombori hududi va binolar maydoni hamda bojxona nazorati zonasi mazkur Reglamentda nazarda tutilgan talab va shartlar hisobga olingan holda ajratilishi kerak.

19. Ombor oʻrni litsenziat tomonidan maxsus ajratiladi va belgilanadi.

Har bir ombor oʻrnida unda saqlanayotgan tovarlar toʻgʻrisida quyidagi maʼlumotlar aks ettirilgan maʼlumotnoma mavjud boʻlishi lozim:

bojxona yuk deklaratsiyasining roʻyxat raqami;

bojxona rejimi;

yuk qabul qiluvchining nomi;

tovarlarning nomi va miqdori;

tovarlar qiymati;

tovarlarni saqlash muddati.

20. Bojxona omboriga bevosita tutashib ketgan va bojxona nazorati zonasi hisoblangan hudud quyidagi talablarga muvofiq:

bojxona omboriga tutashib ketgan butun hudud perimetri boʻyicha balandligi 2 mdan kam boʻlmagan qatʼiy oʻrnatilgan yaxlit toʻsiqlar (uzluksiz temir panjara yoki devor) bilan aylantirib toʻsilgan;

ichkarisida bojxona omborining qismi hisoblanmagan oʻzga imoratlar va inshootlarga ega boʻlmasligi;

ogʻir yukli transportning manyovr (toʻsiqqa chap berish uchun oʻz yoʻnalishini oʻzgartirib bajariladigan harakatlari — qayta tizilish, burilish, qayrilib olish, ortga harakat, aylanib oʻtish) qilish imkoniyatini taʼminlashi;

bojxona ombori imoratiga eshiklari tomonidan bevosita tutashib ketgan boʻlishi;

barcha kirish (chiqish) va (yoki) chiqish (kirish) joylarida oʻzbek, rus va ingliz tillarida “bojxona nazorati zonasi” belgisi qoʻyilgan, olingan tasvirlarni uch oy davomida koʻrsatish hamda bojxona organlariga onlayn uzatish imkoniga ega boʻlgan, kun-u-tun ishlaydigan avtotransport vositasining davlat raqami belgisini va temir yoʻl transporti vositasining raqamini aniqlash tizimi bilan jihozlangan nazorat-oʻtkazish punktlari boʻlishi;

tovarlarni bojxona omboriga joylashtirish va ombordan olib chiqish faqat bojxona nazorati zonasi orqali amalga oshiriladigan tarzda jihozlanishi lozim.

21. Bojxona ombori va bojxona nazorati zonasi hisoblangan, bojxona omboriga bevosita tutashib ketgan hudud:

umumiy perimetr boʻyicha bir-biridan ajralmagan;

balandligi 2 mdan kam boʻlmagan qatʼiy oʻrnatilgan yaxlit toʻsiqlar bilan aylantirib toʻsilgan va barcha kirish (chiqish) va (yoki) chiqish (kirish) joylarida oʻzbek, rus va ingliz tillarida “bojxona ombori” belgisi qoʻyilgan holda nazorat-oʻtkazish punktlariga ega boʻlishi kerak.

22. Bojxona ombori sifatida ishlatish uchun moʻljallangan binolar va (yoki) ochiq maydonchalar yoxud bojxona omboriga bevosita tutashib ketgan hudud quyidagilarni inobatga olgan holda, bittadan kam boʻlmagan usti yopiq koʻrik maydonchasiga ega boʻlishi kerak:

bojxona ombori eshiklari tomonidan joylashishi;

40 m²dan kam boʻlmagan maydonga ega boʻlishi;

elektr yorugʻi bilan jihozlanishi;

sodir boʻlayotgan voqealar boʻyicha har tomondan olingan video maʼlumotlarni uch oy davomida koʻrsatish imkoniga ega boʻlgan, litsenziyalovchi organ tomonidan belgilangan joylarda oʻrnatilgan, kunu-tun ishlaydigan videokuzatuv vositalari bilan jihozlangan boʻlishi;

tovarlarni tushirish-ortish uchun koʻchma va (yoki) yerdagi estakada (yuklash-tushirish ishlarini amalga oshirish uchun yer yuzasidan maʼlum balandlikda quriladigan yoki oʻrnatiladigan toʻsinsimon konstruksiyalardan iborat koʻpriksimon inshoot) boʻlishi.

Bojxona omborida tovarlarning ortilishi, tushirilishi va qayta yuklanishi faqat koʻrik maydonchasida amalga oshiriladi.

Bunda havo sharoiti keskin yomonlashgan holatlarda amalga oshiriladigan harakatlarni har tomondan uzluksiz videokuzatuvga olish imkonini yaratgan holda, tovarlarning ortilishi, tushirilishi va qayta yuklanishini bojxona ombori binosida amalga oshirishga yoʻl qoʻyiladi.

23. Bojxona ombori doimiy ravishda soz, ishchi holatda va uning normal faoliyat koʻrsatishi uchun quyidagilar yetarli boʻlishi kerak:

ortish-tushirish va transport vositalari;

ombor asbob-uskunalari;

oʻlchov asboblari, aniqligi va oʻlchash chegaralari bojxona omborida saqlashga moʻljallanayotgan tovarlar xususiyatiga muvofiq boʻlgan tovarlarning ogʻirligini oʻlchash vositalari;

bojxona organlarining dasturiy taʼminotiga mos keladigan tovarlar hisobini yuritadigan avtomatlashtirilgan tizim;

bojxona ombori sifatida ishlatish uchun moʻljallangan binolarni, ochiq maydonchalarni, bojxona omboriga bevosita tutashib ketgan butun hududni toʻliq nazorat qilish hamda bojxona organlariga video maʼlumotlarni uzatish, shuningdek, ushbu maʼlumotlarni uch oy davomida saqlash imkoniga ega boʻlgan uzluksiz ishlovchi videokuzatuv tizimi;

koʻrik oʻtkazish uchun stol;

aptechka (birinchi tibbiy yordam koʻrsatish uchun tibbiyot qutichasi);

termometr (dori vositalarini saqlashga moʻljallangan binolar uchun);

aloqa vositalari (shu jumladan telefon, maʼlumot uzatish tarmogʻi, Internet);

tashkiliy texnika;

mebel.

24. Korxonalar hududidagi va yoki ishlab chiqarish faoliyatini amalga oshiruvchi shaxslar egasi boʻlgan yopiq turdagi bojxona omborlariga nisbatan transport uzellari va transport magistrallaridan boʻlgan masofa boʻyicha talab qoʻllanilmaydi.

Maxsus (rejimli) obyektlarda joylashgan yopiq turdagi bojxona omborlariga litsenziya talablari va shartlarini qoʻllashda alohida teng kuchga ega yoki yuqori turuvchi normativ-huquqiy hujjat talablari eʼtiborga olinadi.

25. Bojxona omborida va bojxona nazorati zonalari hisoblangan bojxona omboriga bevosita tutashib ketgan hududda har qanday turdagi chiqindilar va boshqa maishiy axlat toʻplanishi mumkin emas.

26. Bojxona organi xodimlari uchun bojxona omborida yoki bojxona nazorati zonasida bojxona nazorati va bojxona rasmiylashtiruvini amalga oshirish uchun quyidagilarga javob beradigan bino ajratilishi kerak:

6 m²dan kam boʻlmagan maydonga va 20 m³dan kam boʻlmagan hajmga ega;

mavsumiy isitish va sovitish tizimiga ega;

doimiy soz holatdagi, bojxona organlarining dasturiy taʼminoti bilan ishlash imkoniga ega boʻlgan kompyuter, printer va nusxa koʻchiradigan apparat, aloqa vositalari (shu jumladan telefon, Internet) bilan jihozlangan;

mebel jihozlari bilan taʼminlangan;

bojxona omboriga oʻrnatilgan videokuzatuv tizimiga ulangan.

27. Bojxona omborining taʼsis etilishi va uning faoliyat koʻrsatishi Oʻzbekiston Respublikasining atrof-tabiiy muhitni muhofaza qilish toʻgʻrisidagi qonun hujjatlari talablariga rioya qilingan holda amalga oshirilishi kerak.

28. Bojxona omborini qoʻshimcha ravishda asbob-uskunalar bilan taʼminlash (qoʻshimcha ravishda jihozlash), tartibga keltirish, qoʻriqlash hamda oʻtkazish rejimini taʼminlash litsenziyalovchi organ bilan kelishgan holda litsenziat tomonidan va uning hisobidan amalga oshiriladi.

29. Mazkur Reglamentning 20 — 26-bandlarida belgilangan talablar bojxona omborini taʼsis etish uchun berilgan soʻrovnomani koʻrib chiqish bosqichida bojxona organi tomonidan belgilanishi va bojxona omboridan foydalanish tartib-qoidasida aks ettirilishi kerak.

30. Litsenziat quyidagilarga majbur:

vaqtincha saqlash bojxona rejimi va bojxona ombori bojxona rejimi shartlariga muvofiq tovarlar bojxona nazorati ostida saqlanishini tartibga soluvchi qonun hujjatlariga rioya qilish;

bojxona organlarining ruxsatisiz bojxona omboriga kelib tushgan tovarlarning chiqarib yuborilishiga yoʻl qoʻymaslik;

berilgan litsenziya shartlariga, shu jumladan bojxona omborini jihozlash va uni asbob-uskunalar bilan taʼminlash talablariga oid qismiga rioya qilish;

litsenziya talablari va shartlari asosida jihozlangan videokuzatuv tizimlari yordamida olingan vaqt boʻyicha uzluksiz videoyozuvlarning uch oy davomida saqlanishini taʼminlash, shuningdek ularga oʻzgartirish kiritish, ustiga yozish, oʻchirish, nusxa olish, koʻchirib olish kabi harakatlarni bajarishning va boshqa maqsadlarda foydalanishning oldini olish;

videokuzatuv tizimini bojxona nazorati ostida tovarlarni tashiyotgan transport vositasining bojxona ombori hududiga kirib kelishidan tovarlar bilan amalga oshiriladigan har bir yuk va boshqa operatsiyalarni hamda ularning bojxona omborlariga joylashtirilishi va chiqarib yuborilishi boʻyicha ketma-ketlikda olingan videoyozuvlarni taʼminlaydigan qilib oʻrnatish;

videokuzatuvni toʻliq amalga oshirish imkonini beradigan yoritish tizimi bilan taʼminlash;

videoyozuvlarning uzluksizligini va axborot tizimining muntazam ishlashini taʼminlash uchun muqobil elektr manbasi (qurilmalari)ga ega boʻlishi;

bojxona ombori sifatida foydalanish uchun moʻljallangan va belgilangan talablarga javob beradigan binolar va (yoki) ochiq maydonchalarga egalik qilish (oʻz mulkida boʻlishi, xoʻjalik yuritishida, operativ boshqaruvida boʻlishi yoki ijaraga olgan boʻlishi);

Oʻzbekiston Respublikasi Bojxona kodeksiga muvofiq bojxona toʻlovlari toʻlanishini taʼminlash;

mazkur Reglamentda belgilangan litsenziya talablari va shartlariga rioya etilishini taʼminlash;

bojxona omboriga joylashtirilgan tovarlarni faqat bojxona ombori sifatida foydalanish uchun moʻljallangan ochiq maydonchalarda va (yoki) binolarda saqlash;

bojxona omboriga joylashtiriladigan tovarlardan ularni saqlashdan boshqa maqsadlarda foydalanish imkoniyatini istisno etish va koʻrsatib oʻtilgan tovarlar bilan ariza berilgan bojxona rejimiga muvofiq operatsiyalar sodir etilishini taʼminlash;

bojxona nazoratini amalga oshirishda bojxona organlari xodimlariga yordam berish;

bojxona omboriga kelib tushayotgan va bojxona omboridan olib chiqilayotgan tovarlar boʻyicha Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasining axborot tizimida ushbu tovarlarning olib kirilishi va olib chiqilishi toʻgʻrisida belgi qoʻygan holda, avtomatlashtirilgan hisobni yuritish;

bojxona organining talabiga muvofiq bojxona omboridagi tovarlarni bojxona organining mansabdor shaxsi ishtirokida xatlovdan oʻtkazish;

sanitariya yongʻin va sanoat xavfsizligi qoidalariga, omborga joylashtirish normalariga, tovarlarning yonma-yon qoʻyilishi qoidalariga va saqlash rejimiga, davlat standartlarining majburiy talablariga rioya qilish, Oʻzbekiston Respublikasining bojxona ishi sohasidagi munosabatlarni tartibga soluvchi qonun hujjatlarida belgilangan boshqa talablar va shartlarni bajarish;

vaqtincha saqlash bojxona rejimi va bojxona ombori bojxona rejimi amal qilishi tugagandan keyin ahamiyatli boʻlishi mumkin boʻlgan bojxona omborida saqlanayotgan tovarlar bilan yuz bergan oʻzgarishlar toʻgʻrisida bojxona organiga imkon qadar qisqa muddatlarda maʼlum qilish;

bojxona omborida saqlanayotgan tovarlar bilan amalga oshirilishi moʻljallanayotgan operatsiyalar toʻgʻrisida bojxona organini barvaqt xabardor qilish;

bojxona omborida saqlanayotgan isteʼmol tovarlariga maxsus marka yopishtirish uchun shart-sharoitlar yaratish;

mazkur Reglamentning 84-bandida belgilangan holatlarda bojxona toʻlovlari toʻlash;

taʼsis hujjatlariga oʻzgartirish va qoʻshimchalar kiritilganligi, shu jumladan qayta tashkil etilganligi, nomi yoki joylashgan joyi (pochta manzili) oʻzgarganligi toʻgʻrisida litsenziyalovchi organni oʻz vaqtida xabardor qilish;

bojxona omboriga kirish uchun ruxsat berilgan hamda belgilangan tartibda tibbiy koʻrikdan oʻtgan (oziq-ovqat mahsulotlari bilan ishlovchi xodimlar uchun) xodimlarning (F.I.Sh. va lavozimini koʻrsatgan holda) roʻyxatining mavjudligini taʼminlash;

bojxona ombori tugatilgan taqdirda, unda turgan tovarlarning saqlanishini taʼminlash, Oʻzbekiston Respublikasi Bojxona kodeksiga muvofiq belgilangan muddatda ularni boshqa bojxona omboriga oʻtkazilishi yoxud boshqa bojxona rejimiga joylashtirilishi boʻyicha choralar koʻrish;

Oʻzbekiston Respublikasi bojxona organlarining qonuniy talablarini bajarish, shu jumladan bojxona organlari mansabdor shaxslarining bojxona omborida saqlanayotgan tovarlar turgan joyga kirishini taʼminlash;

bojxona nazorati va bojxona rasmiylashtiruvini amalga oshirish uchun bojxona omboridagi jihozlangan binolar va aloqa vositalarini bojxona organlari xodimlariga bepul taqdim etish;

yonish va portlash xavfi yuqori boʻlgan kimyoviy moddalarni (mahsulotlarni) faqat Favqulodda vaziyatlar vazirligining yonish va portlash xavfi yuqori boʻlgan kimyoviy moddalarni (mahsulotlarni) saqlash uchun obyektning (omborning) yongʻin va sanoat xavfsizligi talablariga muvofiqligi yuzasidan xulosasi mavjud boʻlganda saqlash;

bojxona omborida dori vositalari va tibbiy buyumlarni faqat “Zarur saqlash amaliyoti — GSP” talablariga muvofiqligi boʻyicha sertifikat mavjud boʻlganda saqlash.

31. Litsenziatning tovarlarni saqlash uchun joylashtiradigan shaxslar bilan munosabatlari shartnoma asosida amalga oshiriladi.

3-bob. Litsenziya olish uchun zarur hujjatlar

32. Litsenziya olish uchun talabgor maxsus elektron tizim yoki Yagona interaktiv davlat xizmatlari portali (keyingi oʻrinlarda — YIDXP) orqali quyidagi hujjatlarni taqdim etadi:

talabgor ega boʻlgan va bojxona ombori sifatida foydalanish uchun moʻljallangan binolar va (yoki) ochiq maydonchalar, ularning oʻlchamlari, hajmi va (yoki) maydoni, ular joylashgan joy, ularning jihozlanishi, videokuzatuv tizimi, asbob-uskunalar va moddiy-texnika bilan taʼminlanganligi hamda mulk huquqi, ashyoviy huquqlar yoki muddatlarini koʻrsatgan holda ijara asosida tegishliligi toʻgʻrisidagi maʼlumotlar;

avtomobil va temir yoʻllar koʻrsatilgan holda, bojxona ombori uchun moʻljallangan hudud (shuningdek, yondosh) hamda binolar va (yoki) ochiq maydonchalarning sifatli chizmasi (oʻlchamlari koʻrsatilgan bojxona nazorati zonasi, qoʻriqlanadigan hudud bilan birga) va kadastr yigʻma jildidagi tarhi;

Oʻzbekiston Respublikasi Bojxona kodeksiga muvofiq bojxona toʻlovlari toʻlanganini tasdiqlovchi hujjat.

Talabgordan ushbu Reglamentda nazarda tutilmagan hujjatlarni taqdim etishni talab qilishga yoʻl qoʻyilmaydi.

Litsenziyalovchi organ litsenziya berish uchun boshqa vakolatli organlarda mavjud boʻlgan zarur hujjatlar va axborotlarni belgilangan tartibda oʻzaro axborot hamkorligi yoʻli bilan, shu jumladan elektron tarzda mustaqil ravishda oladi, ushbu bandda nazarda tutilgan hujjatlar va axborotlar bundan mustasno.

33. Notoʻgʻri yoki ishonchli boʻlmagan maʼlumotlarni taqdim etganligi uchun talabgor qonunga muvofiq javobgar boʻladi.

4-bob. Davlat xizmatlari koʻrsatish tartibi

34. Davlat xizmatlari koʻrsatish jarayoni ushbu Reglamentga 2-ilovadagi sxemaga muvofiq amalga oshiriladi.

35. Talabgor davlat xizmatlaridan elektron tarzda maxsus elektron tizim yoki YIDXP orqali foydalanadi.

36. Talabgor mazkur Reglamentga 3-ilovadagi 1-shaklga muvofiq bojxona ombori faoliyatiga litsenziya berish boʻyicha davlat xizmatlaridan foydalanish uchun soʻrovnomani elektron toʻldiradi.

37. Talabgor hujjatlarni rasmiylashtirib, soʻrovnomaga kiritgandan soʻng uni oʻz elektron raqamli imzosi (keyingi oʻrinlarda — ERI) bilan tasdiqlaydi.

38.Soʻrovnoma avtomatik tarzda litsenziyalovchi organga kelib tushadi.

Soʻrovnomada notoʻgʻri maʼlumotlar koʻrsatilishi davlat xizmati koʻrsatishni rad etish uchun asos hisoblanadi.

Talabgor tomonidan kiritilgan hujjatlar Bojxona ombori faoliyatini litsenziyalash pasportining 14-bandida belgilangan kelishiladigan organlarga bir vaqtning oʻzida yuboriladi.

Tegishli xulosani taqdim etish uchun obyektlarni joyiga chiqib oʻrganish talab etilgan hollarda, kelishiladigan organlar faqat oʻz faoliyat yoʻnalishi boʻyicha oʻrganish oʻtkazishi mumkin.

Kelishiladigan organlar belgilangan muddatlarda xulosa taqdim etmagan taqdirda ariza ushbu organlar bilan kelishilgan, xulosalar esa ijobiy deb hisoblanadi.

Bunday hollarda kelishiladigan organlar yuzaga kelishi mumkin boʻlgan barcha oqibatlar uchun javobgar hisoblanadi. Bunda kelishiladigan organlarning tegishli xulosalarisiz litsenziya berish imkoni boʻlmaganda, talabgorning arizasini koʻrib chiqish muddati va tartibi buzilganligi uchun kelishiladigan organlar javobgardir.

39. Reglament talablari asosida maxsus elektron tizim yoki YIDXP orqali hujjatlar toʻliq kiritilmasa, soʻrovnomani tasdiqlash va litsenziyalovchi organga yuborish avtomatik tarzda rad etiladi.

Talabgor tomonidan taqdim etilgan hujjatlarning toʻliqligi litsenziyalovchi organ tomonidan oʻrganib chiqiladi.

Talabgorning hujjatlar toʻliq boʻlmagan murojaati litsenziyalovchi organ tomonidan davlat xizmati koʻrsatilmasdan rad etiladi.

41. Litsenziya berish yoki litsenziya berishni rad etish toʻgʻrisidagi qaror talabgorning soʻrovnomasi barcha zarur hujjatlar bilan birgalikda kelib tushgan kundan boshlab, yigirma ish kunidan ortiq boʻlmagan muddatda qabul qilinadi.

42. Litsenziya berish toʻgʻrisidagi hujjatlarni koʻrib chiqish, ular boʻyicha xulosalar tayyorlash uchun litsenziyalovchi organda ekspert komissiyalari tashkil etiladi. Ekspert komissiyasining tarkibi va komissiya toʻgʻrisidagi nizom Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi tomonidan tasdiqlanadi.

43. Talabgorning soʻrovnomasi barcha zarur hujjatlar bilan birgalikda ular kelib tushgan kunda koʻrib chiqish uchun ekspert komissiyasiga kiritiladi.

Ekspert komissiyasi oʻn besh ish kunidan ortiq boʻlmagan muddatda taqdim etilgan hujjatlarni litsenziya talablari va shartlariga rioya etilishini oʻrganish uchun bevosita bojxona omborini tashkil etish joyiga borgan holda koʻrib chiqadi va ular boʻyicha talabgorning litsenziya talablari va shartlariga muvofiqligi toʻgʻrisida ekspert xulosasini tayyorlaydi.

44. Litsenziyalovchi organda tashkil etilgan ekspert komissiyasi xulosa tayyorlash jarayonida obyekt (bino, inshootlar va (yoki) hudud) boʻyicha quyidagi maʼlumotlarni elektron hamkorlik yoʻli bilan yoxud elektron soʻrov orqali oladi va uning natijalarini xulosaga qoʻshadi:

Oʻzbekiston Respublikasi Vazirlar Mahkamasi huzuridagi Soliq qoʻmitasidan — ijara shartnomasi toʻgʻrisida;

Oʻzbekiston Respublikasi Iqtisodiyot va moliya vazirligi huzuridagi Kadastr agentligidan — koʻchmas mulkka boʻlgan huquq toʻgʻrisida.

Vakolatli davlat organlari obyekt (bino, inshootlar va (yoki) hududning) sanitariya va yongʻin qoidalari boʻyicha tadbirlar talablariga muvofiqligini taʼminlash maqsadida tadbirkorlik subyektlariga malakali kadrlarni izlash, hujjatlar va dasturlarni qayta ishlash uchun mutaxassislarni jalb qilish hamda litsenziyalar va ruxsat etish xususiyatiga ega boʻlgan boshqa hujjatlarni olish uchun zarur shart-sharoitlarni yaratishda yordam beradi, talabgorning taklif etilgan yordamni rad qilish hollari bundan mustasno.

45. Litsenziyalovchi organ uch ish kunida ekspert komissiyasi xulosasi asosida litsenziya berish yoki litsenziya berishni rad etish toʻgʻrisida qaror qabul qiladi.

Qabul qilingan qaror toʻgʻrisida bir ish kunida talabgorga maxsus elektron tizim yoki YIDXP orqali:

litsenziya berish toʻgʻrisida qaror qabul qilinganda, bank hisobvaragʻi rekvizitlari va litsenziya berish uchun davlat bojini toʻlash muddati toʻgʻrisida;

litsenziya berishni rad etish toʻgʻrisida qaror qabul qilinganda, rad etishning sabablari va talabgor koʻrsatilgan sabablarni bartaraf qilib, hujjatlarni koʻrib chiqish uchun takror taqdim etishi mumkin boʻlgan muddat koʻrsatilgan va litsenziyalovchi organ vakolatli shaxsining ERIsi bilan tasdiqlangan xabarnomani yuboradi.

Litsenziya berishni rad etish haqidagi xabarnomada koʻrsatilgan muddat kamchiliklarni bartaraf etish uchun zarur boʻlgan vaqtga mutanosib boʻlishi lekin ushbu muddat oʻttiz ish kunidan ortiq boʻlmasligi kerak.

46. Litsenziya berish “Litsenziyalash, ruxsat berish va xabardor qilish tartib-taomillari toʻgʻrisida”gi Oʻzbekiston Respublikasi Qonunining 29-moddasida nazarda tutilgan asoslar boʻyicha rad etilishi mumkin.

47. Talabgor litsenziya berish rad etilishi toʻgʻrisidagi qaror, shuningdek, litsenziyalovchi organ mansabdor shaxslarining hatti-harakati (harakatsizligi) boʻyicha qonun hujjatlarida belgilangan tartibda shikoyat qilish huquqiga ega.

48. Agar litsenziyalovchi organ litsenziya berish toʻgʻrisidagi soʻrovnomani koʻrib chiqish muddati mobaynida litsenziya berish yoki uni berishni rad etish haqida qabul qilingan qaror toʻgʻrisida talabgorga maxsus elektron tizim yoki YIDXP orqali xabarnoma yubormasa, talabgor ushbu Reglamentning 41-bandida koʻrsatib oʻtilgan muddat tamom boʻlgandan keyin bojxona ombori faoliyatini amalga oshirish huquqiga, bu haqda litsenziyalovchi organni maxsus elektron tizim yoki YIDXP vositasida elektron shaklda xabardor qilgan holda, ega boʻladi.

49. Litsenziya berish rad etilishiga asos boʻlgan sabablar bartaraf etilgan taqdirda, litsenziya olish uchun talabgor tomonidan taqdim etilgan maʼlumotlar talabgorning rad etish sabablari bartaraf etilgani toʻgʻrisidagi maʼlumotnomasi va ularni tasdiqlovchi hujjatlar kiritilgan soʻrovnoma maxsus elektron tizim yoki YIDXP orqali kelib tushgandan soʻng ushbu Reglamentning 34 — 46-bandlarida koʻrsatilgan tartibda, biroq besh ish kunidan ortiq boʻlmagan muddatda takroran koʻrib chiqiladi.

Bunda:

talabgorning takroriy soʻrovnomasiga asosan ekspert komissiyasi ikki ish kunidan ortiq boʻlmagan muddatda taqdim etilgan hujjatlarni, litsenziya berishni rad etish sabablari bartaraf etilganligini oʻrganish uchun bevosita bojxona omborini tashkil etish joyiga borgan holda koʻrib chiqadi va ular boʻyicha talabgorning litsenziya talablari va shartlariga muvofiqligi toʻgʻrisida ekspert xulosasini tayyorlaydi;

tayyorlangan xulosa asosida ushbu Reglamentning 45-bandida koʻrsatilgan tadbirlar bajarilishi taʼminlanadi.

50. Talabgorning soʻrovnomasini takroran koʻrib chiqishda litsenziya berishni rad etish haqidagi xabarnomada litsenziyalovchi organ tomonidan talabgorga ilgari bayon qilinmagan rad etish sabablari koʻrsatilishiga yoʻl qoʻyilmaydi. Rad etish sabablari bartaraf etilganini tasdiqlovchi hujjatlar bilan bogʻliq boʻlgan rad etish sabablarini koʻrsatish bundan mustasno.

Litsenziya berish rad etilganligi toʻgʻrisidagi xabarnomada koʻrsatilgan muddat oʻtganidan keyin berilgan soʻrovnoma yangidan berilgan deb hisoblanadi.

52. Litsenziyalovchi organ davlat boji toʻlangandan soʻng uch ish kunida QR-kod (matrik shtrixli kod) qoʻyilgan elektron litsenziyani rasmiylashtiradi hamda litsenziyalovchi organ vakolatli shaxsining ERIsi bilan tasdiqlab, talabgorga maxsus elektron tizim yoki YIDXP orqali elektron ravishda yuboradi.

53. Litsenziyada quyidagilar boʻlishi kerak:

litsenziyaning tartib raqami;

amalga oshirayotgan faoliyat turi;

litsenziatning nomi, joylashgan joyi (pochta manzili), tashkiliy-huquqiy shakli va STIR raqami;

binolar va (yoki) ochiq maydonchalar hajmi va maydoni hamda egalik shakli va amal qilish muddati;

bojxona toʻlovlarini taʼminlash miqdorlari, ularni toʻlashni taʼminlash shakli va amal qilish muddati toʻgʻrisidagi maʼlumotlar;

bojxona omborining turi;

bojxona ombori joylashgan joy;

litsenziya berilgan sana.

54. Agar talabgor tomonidan unga litsenziya berish toʻgʻrisidagi qaror qabul qilingani haqidagi xabarnoma yuborilgan paytdan eʼtiboran oʻttiz kundan ortiq boʻlmagan muddatda maxsus elektron tizim yoki YIDXP orqali litsenziyani berish uchun axborot-kommunikatsiya tizimlari yordamida davlat boji toʻlanganligi toʻgʻrisida xabarnoma yuborilmagan taqdirda, litsenziyalovchi organ mazkur litsenziyani bekor qiladi.

55. Litsenziyani berish uchun davlat boji belgilangan muddatda toʻlanmagan taqdirda, talabgor litsenziyani berish yuzasidan umumiy tartibda qayta murojaat qilishga haqli.

56. Talabgor davlat xizmatidan undan foydalanishning har qanday bosqichida bosh tortishga haqlidir.

Talabgor davlat xizmatidan foydalanishdan bosh tortgan taqdirda, uning soʻrovnomasi koʻrib chiqilmaydi va davlat xizmatlari koʻrsatganlik uchun toʻlangan yigʻimlar miqdori qaytarilmaydi.

5-bob. Litsenziyani qayta rasmiylashtirish va oʻzgartirish

57. Litsenziat oʻzgartirilgan, uning nomi yoki joylashgan joyi (pochta manzili) oʻzgargan taqdirda, litsenziat yoki uning huquqiy vorisi qayta roʻyxatdan oʻtkazilgandan keyin besh ish kuni ichida litsenziyalovchi organga koʻrsatib oʻtilgan maʼlumotlarni tasdiqlovchi tegishli hujjatlarni kiritgan holda, ushbu Reglamentning 35 — 37-bandlarida koʻrsatilgan tartibda litsenziyani qayta rasmiylashtirish toʻgʻrisida maxsus elektron tizim yoki YIDXP orqali murojaat qilishi shart.

Bunda talabgor mazkur Reglamentga 3-ilovadagi 2-shaklga muvofiq bojxona ombori faoliyatiga litsenziya berish boʻyicha davlat xizmatlaridan foydalanish uchun soʻrovnoma toʻldiradi.

Litsenziya qayta rasmiylashtirilguniga qadar litsenziat litsenziyani qayta rasmiylashtirish toʻgʻrisidagi arizasi asosida unda koʻrsatilgan faoliyatni amalga oshiradi.

Litsenziyalovchi organ litsenziyani qayta rasmiylashtirish toʻgʻrisida tegishli hujjatlar kiritilgan soʻrovnomani olgan kundan eʼtiboran besh ish kunida litsenziyani qayta rasmiylashtiradi.

Litsenziyani qayta rasmiylashtirish uchun mazkur Reglamentning 78-bandida koʻrsatilgan miqdorda yigʻim undiriladi.

58. Litsenziya litsenziatning maxsus elektron tizim yoki YIDXP orqali murojaatiga asosan quyidagi hollarda oʻzgartirilishi mumkin:

litsenziatning faoliyatni amalga oshirish manzili oʻzgarganda;

bojxona ombori binolarining hajmi va (yoki) ochiq maydonchalari kengaytirilganda va (yoki) qisqartirilganda;

bojxona omborining turi oʻzgarganda.

Litsenziyani oʻzgartirishda litsenziyani berish uchun nazarda tutilgan tartiblarga amal qilinadi.

Litsenziya oʻzgartirilganda, mazkur Reglamentning 76-bandida koʻrsatilgan miqdorda davlat boji va 78-bandida koʻrsatilgan miqdorda yigim undiriladi.

59. Litsenziyalovchi organ litsenziyani qayta rasmiylashtirishda va (yoki) oʻzgartirishda, litsenziyalar reyestriga tegishli oʻzgartirishlar kiritadi.

6-bob. Litsenziya talablari va shartlariga rioya etilishini nazorat qilish

60. Litsenziya talablari hamda shartlariga rioya etilishini litsenziyalovchi organ tomonidan nazorat qilish ushbu Reglament boʻyicha “xavfni tahlil qilish” tizimi natijalari hamda jismoniy va yuridik shaxslarning qonunchilik buzilishi faktlari toʻgʻrisidagi murojaatlari asosida amalga oshiriladi.

61. Litsenziya talablari va shartlariga rioya etilishi yuzasidan nazoratni amalga oshirishda litsenziyalovchi organ oʻz vakolatlari doirasida quyidagi huquqlarga ega:

litsenziat tomonidan ushbu Reglamentda belgilangan litsenziya talablari va shartlariga rioya etilishini tekshirishni Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil bilan kelishilgan, qonunchilikda belgilangan tartibda joyiga chiqqan holda oʻtkazish;

litsenziya talablari va shartlariga rioya etilishini tekshirish davomida paydo boʻladigan masalalar yuzasidan litsenziatdan zarur maʼlumotlarni soʻrash va olish;

tekshirishlar natijalari asosida litsenziat tomonidan litsenziya talablari va shartlarining aniq buzilishlarini koʻrsatgan holda, dalolatnomalar (maʼlumotnomalar) tuzish;

litsenziatga aniqlangan buzilishlarni bartaraf etish majburiyatini yuklovchi qarorlar chiqarish, bunday buzilishlarni bartaraf etish muddatlarini belgilash;

litsenziyaning amal qilishini toʻxtatib turish yoki litsenziyani bekor qilish toʻgʻrisida qonun hujjatlarida belgilangan tartibda qaror chiqarish yoxud sudga murojaat qilish.

Bojxona omborida bojxona nazorati ostida boʻlgan tovarlarga Oʻzbekiston Respublikasi Bojxona kodeksiga muvofiq, bojxona nazorat shakllarini qoʻllash Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil bilan kelishishni talab etmaydi.

611. Bojxona omborlarida bojxona nazorati ostidagi tovarlar va transport vositalari ning bojxona nazoratini amalga oshirish jarayonida litsenziya talablari va shartlari boʻyicha nomuvofiqliklar kuzatilganda, bojxona organi bojxona nazorati ostidagi tovarlar va transport vositalariga nisbatan bojxona nazoratining qonun hujjatlariga muvofiq amalga oshirilishini taʼminlash chorasini koʻrgan holda, litsenziya talablari va shartlari buzilganligi holati boʻyicha shu kunning oʻzida litsenziyalovchi organni xabardor qiladi.

62. Litsenziya talablari va shartlariga rioya etilishi ustidan davlat nazorati “Litsenziyalash, ruxsat berish va xabardor qilish tartib-taomillari toʻgʻrisida”gi Oʻzbekiston Respublikasi Qonunida belgilangan tartibda amalga oshiriladi.

Litsenziyaning bekor qilinishiga asos boʻladigan qoʻpol qoidabuzarliklarning roʻyxati ushbu Reglamentning 4-ilovasida belgilangan Bojxona ombori faoliyatini litsenziyalash pasportida nazarda tutiladi.

63. Davlat yongʻin nazorati organlari tomonidan belgilangan tartibda davlat yongʻin nazorati olib borilganda, bojxona omborida yongʻin xavfsizligi talablari buzilganligi holatlari aniqlanganda, aniqlangan holatlar toʻgʻrisida litsenziyalovchi organga xabar beriladi.

64. Oʻzbekiston Respublikasi Sogʻliqni saqlash vazirligi huzuridagi Sanitariya-epidemiologik osoyishtalik va jamoat salomatligi qoʻmitasi organlari tomonidan belgilangan tartibda sanitariya-epidemiologiya xizmati olib borilganda, bojxona ombori hududi va binolarining ariza berilgan tovarlarni, shu jumladan oziq-ovqat tovarlarini saqlash shart-sharoitlarining nomuvofiqligi holati aniqlanganda, aniqlangan holatlar toʻgʻrisida litsenziyalovchi organga xabar beriladi.

7-bob. Litsenziyaning amal qilishini toʻxtatib turish, tugatish, litsenziyani bekor qilish

65. Litsenziyaning amal qilishini toʻxtatib turish, tugatish va litsenziyani bekor qilish “Litsenziyalash, ruxsat berish va xabardor qilish tartib-taomillari toʻgʻrisida”gi Oʻzbekiston Respublikasi Qonunining 32 — 34-moddalarida nazarda tutilgan holatlarda va tartibda amalga oshiriladi.

66. Litsenziyaning amal qilish muddati toʻxtatilgan yoki tugatilgan sanadan boshlab, bojxona omboriga tovarlarning yangi turkumlarini joylashtirishga yoʻl qoʻyilmaydi.

67. Bojxona omborini tugatish toʻgʻrisida qaror qabul qilgan sanadan boshlab, bojxona ombori bojxona rejimi ostida joylashtirilgan va bunday omborda saqlanayotgan tovarlarga vaqtincha saqlash bojxona rejimida saqlanayotgan tovarlar sifatida qaraladi.

Tugatilayotgan bojxona omborida tovarlar va transport vositalarining vaqtincha saqlash rejimida boʻlishining umumiy muddati uni tugatish sanasidan eʼtiboran oltmish kalendar kundan ortiq boʻlishi mumkin emas.

68. Litsenziat sudning litsenziya amal qilishi tugatilishi yoki uning bekor qilinishi toʻgʻrisidagi qarorini olgan sanadan boshlab, uch kun muddatda litsenziyalovchi organga litsenziya bekor qilinadigan yoki amal qilishi tugatiladigan kunda, tugatilayotgan bojxona omborida saqlanayotgan tovarlar toʻgʻrisida Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi tomonidan tasdiqlangan shaklda toʻliq hisobot taqdim etadi.

69. Litsenziyalovchi organ litsenziyaning amal qilishi tugatilgan yoki litsenziya bekor qilingan sanadan boshlab, yetti kun muddatdan kechikmay, tugatilayotgan bojxona omborida saqlanayotgan tovarlarni xatlovdan oʻtkazadi.

70. Bojxona ombori tugatilgan taqdirda, unda saqlanayotgan tovarlar boshqa bojxona omboriga oʻtkazilishi yoki tovarni bojxona omboriga joylashtirgan shaxs yoxud uning vakolatli shaxsi tomonidan:

litsenziya bekor qilinganda — tovarlar bojxona omboriga joylashtirilgan sanadan boshlab;

boshqa holatlarda — tugatilgan sanadan boshlab, boshqa bojxona rejimiga joylashtirilishi kerak.

71. Litsenziyaning amal qilishi tugatilishi munosabati bilan bojxona ombori tugatilgan taqdirda, litsenziatdan tugatish sanasidan eʼtiboran bojxona organlari tomonidan taʼsis etilgan bojxona omborlari uchun belgilangan va tovarlar saqlanganligi uchun bojxona yigʻimlari undiriladi.

Litsenziya bekor qilinganligi munosabati bilan bojxona ombori tugatilgan taqdirda litsenziat tomonidan olib kirilgan, shu jumladan chiqarib yuborilgan tovarlar turgan butun davrga bojxona organlari tomonidan taʼsis etilgan bojxona omborlari uchun belgilangan va tovarlar saqlanganligi uchun bojxona yigʻimlarini toʻlashi shart.

72. Litsenziyalovchi organning litsenziya amal qilishini toʻxtatib turish va litsenziyani bekor qilish toʻgʻrisidagi qarori yuzasidan sudga shikoyat qilish mumkin.

Sud litsenziyaning amal qilishini toʻxtatib turish va litsenziyani bekor qilishni asossiz deb topgan taqdirda, litsenziyalovchi organ litsenziat oldida unga yetkazilgan zarar miqdorida javobgar boʻladi.

8-bob. Litsenziyalar reyestrini yuritish

73. Litsenziyalovchi organ berilgan litsenziyalar reyestrini elektron koʻrinishda yuritadi.

Litsenziyalar reyestrida quyidagilar koʻrsatiladi:

yuridik shaxs — litsenziatning nomi, tashkiliy-huquqiy shakli, pochta manzili, STIR raqami, rahbarining F.I.Sh., telefon (faks);

amalga oshirayotgan faoliyat turi;

litsenziyaning berilgan sanasi va tartib raqami;

bojxona ombori joylashgan joy;

binolar va (yoki) ochiq maydonchalar hajmi va maydoni hamda egalik shakli va amal qilish muddati;

bojxona toʻlovlarini taʼminlash miqdori, shakli va amal qilish muddati;

bojxona ombori biriktirilgan bojxona organining tashqi iqtisodiy faoliyat bojxona posti;

litsenziyalarni qayta rasmiylashtirish, toʻxtatib turish, qayta tiklash, tugatish, ularni bekor qilish asoslari hamda sanalari;

bojxona omborida yonish va portlash xavfi yuqori boʻlgan kimyoviy moddalarni (mahsulotlarni) saqlash uchun obyektning (omborning) yongʻin va sanoat xavfsizligi talablariga muvofiqligi yuzasidan olingan xulosa raqami va sanasi;

bojxona omborida dori vositalari va tibbiy buyumlarni saqlash uchun berilgan (“Zarur saqlash amaliyoti — GSP” talablari) sertifikatning raqami hamda sanasi;

Bojxona organlari egasi hisoblangan bojxona omborlari litsenziyalar reyestriga kiritilmaydi.

74. Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi har yarim yilda kamida bir marta oʻz rasmiy veb-saytida litsenziyalar yigʻma reyestri hamda bojxona organlari egasi hisoblangan bojxona omborlarining roʻyxati eʼlon qilinishini taʼminlaydi.

75. Litsenziyalar reyestrida mavjud boʻlgan maʼlumotlar tanishib chiqish uchun ochiq boʻladi.

9-bob. Davlat bojini va davlat xizmati koʻrsatilgani uchun yigʻimni toʻlash tartibi

76. Faoliyat turiga litsenziya berilganligi uchun “Davlat boji toʻgʻrisida”gi Oʻzbekiston Respublikasining Qonuni bilan tasdiqlangan Davlat boji stavkalarining miqdorlari 22-bandiga muvofiq davlat boji undiriladi.

Bojxona ombori binolarining hajmi va (yoki) ochiq maydonchalari kengayishi, qisqarishi, uning turi, tashkil etilgan hududdagi (manzildagi) joylashgan joyi oʻzgarishi munosabati bilan litsenziya oʻzgartirilganda, davlat boji mazkur bandning birinchi xatboshisida koʻrsatilgan toʻlanadigan summaning ellik foizi miqdorida undiriladi.

Litsenziya qayta rasmiylashtirilayotganda, davlat boji undirilmaydi.

77. Litsenziat oʻzgartirilganda, uning nomi yoki joylashgan joyi (pochta manzili) oʻzgarganda, litsenziat yoki uning huquqiy vorisi qayta roʻyxatdan oʻtkazilishi munosabati bilan litsenziyani qayta rasmiylashtirishda davlat boji undirilmaydi.

78. Litsenziya berish toʻgʻrisidagi arizani koʻrib chiqqanlik uchun bazaviy hisoblash miqdorining ellik foizi miqdorida yigʻim undiriladi.

Litsenziya qayta rasmiylashtirilayotganda va (yoki) oʻzgartirilayotganda, litsenziya berish toʻgʻrisidagi arizani koʻrib chiqqanlik uchun toʻlanadigan summaning ellik foizi miqdorida yigʻim undiriladi.

79. Davlat bojlari va yigʻimlar summasi quyidagi tartibda taqsimlanadi:

10 foizi — Oʻzbekiston Respublikasi Adliya vazirligining Davlat xizmatlarini rivojlantirish jamgʻarmasining shaxsiy hisobvaragʻiga;

11,25 foizi — Axborot-kommunikatsiya texnologiyalarini rivojlantirish jamgʻarmasining elektron hukumat va raqamli iqtisodiyotning idoralararo loyihalarini moliyalashtirish boʻyicha maxsus hisobvaragʻiga;

qolgan davlat boji summasi — toʻliq miqdorda Oʻzbekiston Respublikasi Davlat budjetiga;

qolgan yigʻimlar summasi — toʻliq miqdorda Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasining maxsus jamgʻarmasiga oʻtkaziladi.

80. Litsenziya berilgani uchun davlat boji va davlati xizmati koʻrsatilgani uchun yigʻim toʻlanganligi axborot-kommunikatsiya tizimlari orqali tasdiqlanadi.

Litsenziya berish uchun davlat bojini va davlat xizmatlari koʻrsatish uchun yigʻimni toʻlamaslik davlat xizmati koʻrsatishni rad etish uchun asos hisoblanadi.

10-bob. Litsenziatning javobgarligi. Bojxona toʻlovlari toʻlanishini taʼminlash

81. Litsenziat bojxona omborida tovarlarni saqlash talablari va shartlariga rioya etilishi boʻyicha tovar bojxona omborida saqlash uchun qabul qilib olingan paytdan boshlab javob beradi, bu omborxona hujjatini (ombor guvohnomasi, tovarlarni qabul qilish-topshirish dalolatnomasi va boshqalarni) rasmiylashtirish hamda tovarning bojxona omboriga qabul qilib olinganligi toʻgʻrisidagi axborotni Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasining axborot tizimiga kiritish orqali tasdiqlanadi.

82. Bojxona omborida yongʻin xavfsizligi va sanitariya talablariga rioya etilishi uchun litsenziat javobgar hisoblanadi.

83. Bojxona omborida saqlanayotgan tovarlarga nisbatan Oʻzbekiston Respublikasi Bojxona kodeksiga muvofiq bojxona toʻlovlarining toʻlanishi uchun litsenziat javobgar hisoblanadi.

84. Litsenziat tomonidan bojxona toʻlovlari toʻlanishini taʼminlash belgilangan talablarga muvofiq boʻlishi va quyidagi holatlarda bojxona toʻlovlari toʻlanishi taʼminlanishini nazarda tutishi kerak:

bojxona omborida saqlanayotgan tovarlarning bojxona organining ruxsatisiz berib yuborilishi yoki yoʻqolishi;

litsenziatning xohishiga koʻra yoxud litsenziya bekor qilingach yoki litsenziyaning amal qilishi tugatilgan bojxona omborining tugatilishi;

bojxona toʻlovlari toʻlanishi uchun litsenziat javobgar boʻladigan, bojxona haqidagi qonun hujjatlarida nazarda tutiladigan boshqa holatlar.

85. Bojxona ombori sifatida ochiq maydoncha yoki binoning foydali hajmi uchun soʻrovnoma berilsa, bojxona toʻlovlari toʻlanishini taʼminlash summasi maydonchadan kelib chiqib, 1 m² maydon uchun bazaviy hisoblash miqdorining 15 baravari miqdorida yoki 1 m³ bino hajmi uchun bazaviy hisoblash miqdorining 3 baravari miqdorida, tegishli ravishda bazaviy hisoblash miqdorining 6000 baravaridan kam boʻlmagan miqdorda hisoblab chiqiladi.

Bunda binoning foydali hajmi talabgor yoki litsenziat tomonidan yaxlit toʻsiq bilan ajratiladi va litsenziyalovchi organ tomonidan litsenziyalash vaqtida belgilanadi.

Litsenziat bojxona ombori boʻyicha taqdim etilgan bojxona toʻlovlari toʻlanishini taʼminlovchi hujjatning amal qilish muddati tugashidan bir oy oldin yoki bazaviy hisoblash miqdori oshgan taqdirda, ushbu miqdor oshgan kundan eʼtiboran bir oy muddatda mazkur Reglamentga 3-ilovadagi 3-shaklga muvofiq bojxona toʻlovlari toʻlanishini taʼminlovchi hujjat kiritilgan soʻrovnomani toʻldirish orqali maxsus elektron tizim yoki YIDXP orqali bojxona toʻlovlari toʻlanishini taʼminlash summasiga tegishli tuzatishlar kiritish boʻyicha murojaat qilishi shart.

Litsenziyalovchi organ bojxona toʻlovlari toʻlanishini taʼminlovchi hujjat kiritilgan soʻrovnomani olgan kundan eʼtiboran oʻn kun muddatda ushbu hujjatni bojxona toʻlovlari toʻlanishini taʼminlash vositasi sifatida qabul qiladi yoki rad etadi va bu haqida xabarnoma yuboradi.

Kuyidagi hollarda bojxona toʻlovlari toʻlanishini taʼminlovchi hujjatning bojxona toʻlovlari toʻlanishini taʼminlash vositasi sifatida qabul qilinishi rad etiladi:

bojxona toʻlovlari toʻlanishini taʼminlovchi hujjatda notoʻgʻri maʼlumotlar koʻrsatilganda;

bojxona toʻlovlari toʻlanishini taʼminlovchi hujjatni rasmiylashtirishga asos boʻlgan shartnoma taqdim etilmaganda;

bojxona toʻlovlari toʻlanishini taʼminlovchi hujjatda koʻrsatilgan summa miqdori Bojxona kodeksining 338-moddasida koʻrsatilgan miqdordan kam boʻlganda;

bojxona toʻlovlari toʻlanishini taʼminlovchi hujjat shartlari Bojxona kodeksining 344 va 345-moddalarida belgilangan, toʻlanishi lozim boʻlgan bojxona toʻlovlarining summasi va foizlar qonun hujjatlariga muvofiq bojxona organi tomonidan soʻzsiz tartibda undirib olinishi talablariga zid boʻlganda.

86. Litsenziat, agar tovarlar faqat yengib boʻlmas kuch taʼsiri oqibatida yoki saqlash va sotishning normal sharoitlarida tabiiy kamayish tufayli yoxud qaytarib boʻlmaydigan tarzda tabiiy ravishda yoʻqolgan taqdirdagina, bojxona toʻlovlari toʻlanishi uchun javob bermaydi.

11-bob. Yakunlovchi qoidalar

87. Litsenziyalovchi organ oʻz faoliyatini amalga oshirishi natijasida olingan maʼlumotlarning sir saqlanishini taʼminlaydi.

88. Oʻzbekiston Respublikasi Adliya vazirligi huzuridagi Davlat xizmatlari agentligi Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi bilan birgalikda ushbu Reglament talablari ijrosi boʻyicha davlat organlari va boshqa tashkilotlarning faoliyati yuzasidan, shu jumladan maxsus elektron tizim yoki YIDXP orqali doimiy nazoratni amalga oshiradi va monitoring olib boradi.

89. Litsenziya daʼvogari davlat organlari va boshqa tashkilotlar xodimlarining hatti-harakatlari yuzasidan qonun hujjatlarida belgilangan tartibda shikoyat qilishlari mumkin.

90. Mazkur Reglament talablarining buzilishida aybdor boʻlgan shaxslar qonun hujjatlarida belgilangan tartibda javobgar boʻladilar.

Bojxona ombori faoliyatini litsenziyalash yuzasidan davlat xizmatlarini koʻrsatishning maʼmuriy reglamentiga 1-ILOVA

(1-ilovaning matni Oʻzbekiston Respublikasi Vazirlar Mahkamasining 2023-yil 4-sentabrdagi 443-sonli qarori tahririda — Qonunchilik maʼlumotlari milliy bazasi, 05.09.2023-y., 09/23/443/0677-son — 2023-yil 6-dekabrdan kuchga kiradi)

Bojxona ombori faoliyatini litsenziyalash yuzasidan davlat xizmatlarini koʻrsatishning maʼmuriy reglamentiga 2-ILOVA

Bojxona ombori faoliyatini litsenziyalash jarayonida axborot-kommunikatsiya texnologiyalarini qoʻllagan holda, litsenziyani elektron shaklda rasmiylashtirish ishlarini amalga oshirish

SXEMASI

Bosqichlar Subyektlar Tadbirlar Bajarish muddatlari 1-bosqich Talabgor Litsenziya olish uchun maxsus elektron tizim yoki Yagona interaktiv davlat xizmatlari portali orqali soʻrovnoma toʻldiradi. Xohishiga koʻra 2-bosqich Maxsus elektron tizim yoki Yagona interaktiv davlat xizmatlari portali Soʻrovnomani litsenziyalovchi organga (Iqtisodiyot va moliya vazirligi huzuridagi Bojxona qoʻmitasining Qoraqalpogʻiston Respublikasi, viloyatlar, Toshkent shahar boʻyicha boshqarmalari, “Toshkent-AERO” ixtisoslashtirilgan bojxona kompleksiga) yuboradi. Avtomatik tarzda 3-bosqich Litsenziyalovchi organ Hujjatlarni koʻrib chiqish uchun ekspert komissiyasiga kiritadi. Hujjatlar qabul qilingan kunda 4-bosqich Ekspert komissiyasi Hujjatlarni litsenziyalash talablari va shartlariga rioya etilishini oʻrganish uchun bevosita bojxona omborini tashkil etish joyiga chiqqan holda koʻrib chiqadi, talabgorning litsenziyalash talablari va shartlariga mosligi toʻgʻrisida ekspert xulosasini tayyorlaydi. 1. Hujjatlar qabul qilingʻan kundan boshlab 15 ish kunidan ortiq boʻlmagan muddatda 2. Hujjat takroran taqdim etilganda, 2 ish kuni ichida 5-bosqich Litsenziyalovchi organ 1. Ekspert komissiyasining xulosasi asosida litsenziya berish yoki litsenziya berishni rad etish toʻgʻrisida qaror qabul qiladi. 1. 3 ish kuni ichida 2. Qabul qilingan qaror toʻgʻrisida talabgorga maxsus elektron tizim yoki Yagona interaktiv davlat xizmatlari portali orqali: litsenziya berish toʻgʻrisida qaror qabul qilinganda, davlat bojini amalga oshirish toʻgʻrisida; litsenziya berishni rad etish toʻgʻrisida qaror qabul qilinganda, rad etishning sabablari va talabgor koʻrsatilgan sabablarni bartaraf qilib, hujjatlarni koʻrib chiqish uchun takroran taqdim etishi mumkin boʻlgan muddat koʻrsatilgan xabarnomani yuboradi. 2. Qaror qabul qilingandan soʻng 1 ish kun ichida 6-bosqich Talabgor Litsenziya berish haqidagi xabarnoma kelib tushgandan soʻng litsenziya uchun davlat bojini toʻlaydi. 30 kun mobaynida 7-bosqich Litsenziyalovchi organ 1. Davlat boji toʻlanmagan taqdirda, litsenziyalovchi organ litsenziyani bekor qilish toʻgʻrisida qaror qabul qilishga haqlidir. 1. Litsenziya berish toʻgʻrisidagi xabarnoma yuborilgan paytdan eʼtiboran 30 kun oʻtgach 2. Ijobiy qaror mavjudligi va litsenziya berish uchun davlat boji toʻlangandan soʻng QR-kod bilan himoyalangan litsenziyani elektron raqamli imzo bilan tasdiqlab rasmiylashtiradi va litsenziyani talabgorga maxsus elektron tizim yoki Yagona interaktiv davlat xizmatlari portali orqali yuboradi. 2. 3 ish kunida

Bojxona ombori faoliyatini litsenziyalash yuzasidan davlat xizmatlarini koʻrsatishning maʼmuriy reglamentiga 3-ILOVA

(3-ilovaning matni Oʻzbekiston Respublikasi Vazirlar Mahkamasining 2022-yil 5-sentabrdagi 487-sonli qarori tahririda — Qonunchilik maʼlumotlari milliy bazasi, 05.09.2022-y., 09/22/487/0794-son)

Bojxona ombori faoliyatini litsenziyalash yuzasidan davlat xizmatlarini koʻrsatishning maʼmuriy reglamentiga 4-ILOVA

Bojxona ombori faoliyatini litsenziyalash

PASPORTI*

1. Litsenziya nomi Bojxona ombori faoliyatini amalga oshirish uchun litsenziya. 2. Litsenziyalanadigan faoliyat turi Bojxona ombori faoliyati. 3. Amalga oshirish mexanizmini tartibga soluvchi normativ-huquqiy hujjat Oʻzbekiston Respublikasi Vazirlar Mahkamasining “Bojxona ombori, erkin ombor va boj olinmaydigan savdo doʻkoni faoliyatini litsenziyalash yuzasidan davlat xizmatlarini koʻrsatishning maʼmuriy reglamentlarini tasdiqlash toʻgʻrisida” 2020-yil 9-apreldagi 210-son qarori. 4. Ariza beruvchilar toifasi Yuridik shaxs — Oʻzbekiston Respublikasi rezidenti. 5. Litsenziyalovchi organ Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasining Qoraqalpogʻiston Respublikasi, viloyatlar, Toshkent shahar boʻyicha boshqarmalari, “Toshkent-AERO” ixtisoslashtirilgan bojxona kompleksi. 6. Hujjatlarni topshirish tartibi “Litsenziya” axborot tizimi yoki Yagona interaktiv davlat xizmatlari portali orqali. 7. Litsenziyani olish uchun taqdim qilinadigan hujjatlar Litsenziya olish uchun quyidagi hujjatlar taqdim etiladi: talabgor ega boʻlgan va bojxona ombori sifatida foydalanish uchun moʻljallangan binolar va (yoki) ochiq maydonchalar, ularning oʻlchamlari, hajmi va (yoki) maydoni, ular joylashgan joy, ularning jihozlanishi, videokuzatuv tizimi, asbob-uskunalar va moddiy-texnika bilan taʼminlanganligi hamda mulk huquqi, ashyoviy huquqlar yoki muddatlarini koʻrsatgan holda ijara asosida tegishliligi toʻgʻrisidagi maʼlumotlar; avtomobil va temir yoʻllar koʻrsatilgan holda, bojxona ombori uchun moʻljallangan hudud (shuningdek, yondosh) hamda binolar va (yoki) ochiq maydonchalarning sifatli chizmasi (oʻlchamlari koʻrsatilgan bojxona nazorati zonasi, qoʻriqlanadigan hudud bilan birga) va kadastr yigʻma jildidagi tarhi; Oʻzbekiston Respublikasi Bojxona kodeksiga muvofiq bojxona toʻlovlari toʻlanganini tasdiqlovchi hujjat. 8. Arizani koʻrib chiqish uchun toʻlanadigan yigʻim miqdori Koʻrib chiqqanlik uchun bazaviy hisoblash miqdorining 50 foizi. Litsenziya qayta rasmiylashtirilayotganda va (yoki) oʻzgartirilayotganda, litsenziya berish toʻgʻrisidagi arizani koʻrib chiqqanlik uchun toʻlanadigan summaning 50 foizi miqdorida. 9. Litsenziya berilganligi uchun davlat boji miqdori Bazaviy hisoblash miqdorining 5 baravari. Litsenziya oʻzgartirilganda, litsenziya berilganligi uchun toʻlanadigan bojning ellik foizi miqdorida. Litsenziya qayta rasmiylashtirilayotganda, davlat boji undirilmaydi. 10. Arizani koʻrib chiqish va qaror qabul qilish muddatlari Talabgorning soʻrovnomasi barcha zarur hujjatlar bilan birgalikda kelib tushgan kundan boshlab, 20 ish kuni. 11. Litsenziya talablari va shartlari a) Bojxona ombori hududi bojxona nazorati zonasi hisoblanadi. Bojxona ombori hududiga qoʻriqlanadigan va mazkur Reglamentning 20-bandida qayd etilgan tartibda belgilab olingan, tovarlarni bojxona nazorati ostida yetkazib berishni yakunlash uchun zarur boʻlgan vaqtda tovarlarni tashiyotgan transport vositalari toʻxtab turishi uchun jihozlangan hudud tutashgan boʻlishi kerak. Koʻrsatib oʻtilgan hudud ham bojxona nazorati zonasi hisoblanadi. Bojxona nazorati ostidagi tovarlarni tashiydigan transport vositalari ushbu bojxona nazorati zonasiga sutkaning istalgan vaqtida kirishi mumkin. Temir yoʻl va avtomobil transport uzellari hamda transport magistrallaridan olib boruvchi, transport vositalari harakati uchun yetarli kenglikka ega boʻlgan yoʻl boʻylab bojxona omborigacha boʻlgan masofa 3 km.dan oshmasligi kerak. b) Bojxona ombori sifatida foydalanish uchun moʻljallangan binolar va (yoki) ochiq maydonchalar saqlanayotgan tovarlar va transport vositalariga nisbatan bojxona nazorati amalga oshirilishi, ularning saqlanishi taʼminlanadigan tarzda joylashtirilishi, jihozlanishi va asbob-uskunalar bilan taʼminlanishi kerak hamda quyidagilarni istisno etishi lozim: bojxona ombori hududiga bojxona nazorati zonasiga va tovarlarga begona shaxslarning (ombor xodimlari boʻlmagan, tovarlarga nisbatan vakolatga ega boʻlmagan) yaqinlashishini; tovarlarning bojxona nazoratini chetlab olib kirilishini va olib chiqilishini. Agar binoning yoki inshootning bir qismi bojxona ombori hisoblansa, unga borish yoʻllari va tutashib ketadigan tushirish maydonchalari bojxona nazorati ostidagi tovarlarga begona shaxslarning yaqinlashishini istisno etadigan qilib jihozlanishi kerak. v) Bojxona ombori binolari va (yoki) ochiq maydonchalari: yer ustidagi imoratlarda yoki inshootlarda joylashtirilishi; qoʻriqlash va yongʻin nazorati signalizatsiyalari, sodir boʻlayotgan voqealar boʻyicha har tomondan olingan video maʼlumotlarni uch oy davomida koʻrsatish imkoniga ega boʻlgan, litsenziyalovchi organ tomonidan belgilangan joylarda oʻrnatilgan, kunu-tun ishlaydigan videokuzatuv vositalari bilan jihozlangan boʻlishi; yongʻin xavfsizligi talablariga mos boʻlgan yongʻinni oʻchirish tizimi va vositalariga ega boʻlishi kerak. g) Bojxona omboriga bevosita tutashib ketgan va bojxona nazorati zonasi hisoblangan hudud quyidagi talablarga muvofiq: bojxona omboriga tutashib ketgan butun hudud perimetri boʻyicha balandligi 2 mdan kam boʻlmagan qatʼiy oʻrnatilgan yaxlit toʻsiqlar (uzluksiz temir panjara yoki devor) bilan aylantirib toʻsilgan; ichkarisida bojxona omborining qismi hisoblanmagan oʻzga imoratlar va inshootlarga ega boʻlmasligi; ogʻir yukli transportning manyovr (toʻsiqqa chap berish uchun oʻz yoʻnalishini oʻzgartirib bajariladigan harakatlari — qayta tizilish, burilish, qayrilib olish, ortga harakat, aylanib oʻtish) qilish imkoniyatini taʼminlashi; bojxona ombori imoratiga eshiklari tomonidan bevosita tutashib ketgan boʻlishi; barcha kirish (chiqish) va (yoki) chiqish (kirish) joylarida oʻzbek, rus va ingliz tillarida “bojxona nazorati zonasi” belgisi qoʻyilgan, olingan tasvirlarni uch oy davomida koʻrsatish hamda bojxona organlariga onlayn uzatish imkoniga ega boʻlgan, kun-u-tun ishlaydigan avtotransport vositasining davlat raqami belgisini va temir yoʻl transporti vositasining raqamini aniqlash tizimi bilan jihozlangan nazorat-oʻtkazish punktlari boʻlishi; tovarlarni bojxona omboriga joylashtirish va ombordan olib chiqish faqat bojxona nazorati zonasi orqali amalga oshiriladigan tarzda jihozlanishi lozim. d) Bojxona ombori va bojxona nazorati zonasi hisoblangan, bojxona omboriga bevosita tutashib ketgan hudud: umumiy perimetr boʻyicha bir-biridan ajralmagan; balandligi 2 metrdan kam boʻlmagan qatʼiy oʻrnatilgan yaxlit toʻsiqlar bilan aylantirib toʻsilgan va barcha kirish (chiqish) va (yoki) chiqish (kirish) joylarida oʻzbek, rus va ingliz tillarida “bojxona ombori” belgisi qoʻyilgan holda nazorat-oʻtkazish punktlariga ega boʻlishi kerak. e) Bojxona ombori sifatida ishlatish uchun moʻljallangan binolar va (yoki) ochiq maydonchalar yoxud bojxona omboriga bevosita tutashib ketgan hudud quyidagilarni inobatga olgan holda, bittadan kam boʻlmagan usti yopiq koʻrik maydonchasiga ega boʻlishi kerak: bojxona ombori eshiklari tomonidan joylashishi; 40 m²dan kam boʻlmagan maydonga ega boʻlishi; elektr yorugʻi bilan jihozlanishi; sodir boʻlayotgan voqealar boʻyicha har tomondan olingan video maʼlumotlarni uch oy davomida koʻrsatish imkoniga ega boʻlgan, litsenziyalovchi organ tomonidan belgilangan joylarda oʻrnatilgan, kunu-tun ishlaydigan videokuzatuv vositalari bilan jihozlangan boʻlishi; tovarlarni tushirish-ortish uchun koʻchma va (yoki) yerdagi estakada (yuklash-tushirish ishlarini amalga oshirish uchun yer yuzasidan maʼlum balandlikda quriladigan yoki oʻrnatiladigan toʻsinsimon konstruksiyalardan iborat koʻpriksimon inshoot) boʻlishi. yo) Bojxona ombori doimiy ravishda soz, ishchi holatda va uning normal faoliyat koʻrsatishi uchun quyidagilar yetarli boʻlishi kerak: ortish-tushirish va transport vositalari; ombor asbob-uskunalari; oʻlchov asboblari, aniqligi va oʻlchash chegaralari bojxona omborida saqlashga moʻljallanayotgan tovarlar xususiyatiga muvofiq boʻlgan tovarlarning ogʻirligini oʻlchash vositalari; bojxona organlarining dasturiy taʼminotiga mos keladigan tovarlar hisobini yuritadigan avtomatlashtirilgan tizim; bojxona ombori sifatida ishlatish uchun moʻljallangan binolarni, ochiq maydonchalarni, bojxona omboriga bevosita tutashib ketgan butun hududni toʻliq nazorat qilish hamda bojxona organlariga video maʼlumotlarni uzatish, shuningdek, ushbu maʼlumotlarni uch oy davomida saqlash imkoniga ega boʻlgan uzluksiz ishlovchi videokuzatuv tizimi; koʻrik oʻtkazish uchun stol; aptechka (birinchi tibbiy yordam koʻrsatish uchun tibbiyot qutichasi); termometr (dori vositalarini saqlashga moʻljallangan binolar uchun); aloqa vositalari (shu jumladan telefon, maʼlumot uzatish tarmogʻi, Internet); tashkiliy texnika; mebel. j) Bojxona omborida va bojxona nazorati zonalari hisoblangan bojxona omboriga bevosita tutashib ketgan hududda har qanday turdagi chiqindilar va boshqa maishiy axlat toʻplanishi mumkin emas. z) Bojxona organi xodimlari uchun bojxona omborida yoki bojxona nazorati zonasida bojxona nazorati va bojxona rasmiylashtiruvini amalga oshirish uchun quyidagilarga javob beradigan bino ajratilishi kerak: 6 m²dan kam boʻlmagan maydonga va 20 m³dan kam boʻlmagan hajmga ega; mavsumiy isitish va sovitish tizimiga ega; doimiy soz holatdagi, bojxona organlarining dasturiy taʼminoti bilan ishlash imkoniga ega boʻlgan kompyuter, printer va nusxa koʻchiradigan apparat, aloqa vositalari (shu jumladan telefon, Internet) bilan jihozlangan; mebel jihozlari bilan taʼminlangan; bojxona omboriga oʻrnatilgan videokuzatuv tizimiga ulangan. Litsenziat tomonidan ushbu Reglament va qonunchilik hujjatlari talablarining buzilishi natijasida bojxona nazorati ostida boʻlgan tovarlarning yoʻqolishiga yoki boshqacha tarzda shikast yetkazilishiga olib kelsa yoxud boshqa shaxslarga berib yuborilsa, bunday hollarda qoʻpol qoidabuzarlik sodir etilgan deb hisoblanadi. 12. Nazorat tartibi Litsenziya talablari hamda shartlariga rioya etilishini litsenziyalovchi organ tomonidan nazorat qilish ushbu Reglament boʻyicha “xavfni tahlil qilish” tizimi natijalari hamda jismoniy va yuridik shaxslarning qonunchilik buzilishi faktlari toʻgʻrisidagi murojaatlari asosida amalga oshiriladi. Litsenziya talablari va shartlariga rioya etilishi yuzasidan nazoratni amalga oshirishda litsenziyalovchi organ oʻz vakolatlari doirasida quyidagi huquqlarga ega: litsenziat tomonidan ushbu Reglamentda belgilangan litsenziya talablari va shartlariga rioya etilishini tekshirishni Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil bilan kelishilgan, qonunchilikda belgilangan tartibda joyiga chiqqan holda oʻtkazish; litsenziya talablari va shartlariga rioya etilishini tekshirish davomida paydo boʻladigan masalalar yuzasidan litsenziatdan zarur maʼlumotlarni soʻrash va olish; tekshirishlar natijalari asosida litsenziat tomonidan litsenziya talablari va shartlarining aniq buzilishlarini koʻrsatgan holda, dalolatnomalar (maʼlumotnomalar) tuzish; litsenziatga aniqlangan buzilishlarni bartaraf etish majburiyatini yuklovchi qarorlar chiqarish, bunday buzilishlarni bartaraf etish muddatlarini belgilash; litsenziyaning amal qilishini toʻxtatib turish yoki litsenziyani bekor qilish toʻgʻrisida qonun hujjatlarida belgilangan tartibda qaror chiqarish yoxud sudga murojaat qilish. Bojxona omborida bojxona nazorati ostida boʻlgan tovarlarga Oʻzbekiston Respublikasi Bojxona kodeksiga muvofiq, bojxona nazorat shakllarini qoʻllash Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil bilan kelishishni talab etmaydi. 13. Bojxona toʻlovlari toʻlanishini taʼminlash Bojxona toʻlovlari toʻlanishini taʼminlash summasi 1 m² ochiq maydon uchun bazaviy hisoblash miqdorining (keyingi oʻrinlarda — BHM) 15 baravari miqdorida yoki 1 m³ bino hajmi uchun BHMning 3 baravari miqdorida, lekin BHMning 6 000 baravaridan kam boʻlmagan miqdorda hisoblanadi. Litsenziat taqdim etilgan bojxona toʻlovlari toʻlanishini taʼminlovchi hujjatning amal qilish muddati tugashidan bir oy oldin yoki BHM oshgan kundan bir oy muddatda bojxona toʻlovlari toʻlanishini taʼminlash summasiga tegishli tuzatishlar kiritish boʻyicha murojaat qilishi shart. 14. Litsenziya berishda kelishiladigan organlar 1. Oʻzbekiston Respublikasi Favqulodda vaziyatlar vazirligidan: bojxona omborining hududi yongʻin xavfsizligi talablariga muvofiqligi toʻgʻrisidagi xulosa (10 ish kuni ichida); agar bojxona omborida yonish va portlash xavfi yuqori boʻlgan kimyoviy moddalarni (mahsulotlarni) saqlash koʻzda tutilsa, obyektning (omborning) yongʻin va sanoat xavfsizligi talablariga muvofiqligi yuzasidan xulosa (10 ish kuni ichida). 2. Oʻzbekiston Respublikasi Sogʻliqni saqlash vazirligi huzuridagi Sanitariya-epidemiologik osoyishtalik va jamoat salomatligi qoʻmitasidan — bojxona ombori hududining sanitariya-epidemiologik normalariga muvofiqligi toʻgʻrisidagi xulosa (10 ish kuni ichida). 3. Oʻzbekiston Respublikasi Sogʻliqni saqlash vazirligi huzuridagi Farmatsevtika tarmogʻini rivojlantirish agentligining “Zarur amaliyotlar markazi” DMdan — agar bojxona omborida dori vositalari va tibbiy buyumlarni (TIF TNning 30 guruhi) saqlash koʻzda tutilsa, “Zarur saqlash amaliyoti — GSP” sertifikati talablariga muvofiqligi yuzasidan xulosa (10 ish kuni ichida) 15. Litsenziyaning amal qilish muddati Cheklanmagan.

Izoh

* Bojxona ombori faoliyatini litsenziyalash pasporti mazkur faoliyatni tartibga soluvchi qonunchilik hujjatlarida belgilangan boshqa norma va qoidalarning talabgor va litsenziat tomonidan bajarilishini istisno etmaydi.

Vazirlar Mahkamasining 2020-yil 9-apreldagi 210-son qaroriga 2-ILOVA

Erkin ombor faoliyatini litsenziyalash yuzasidan davlat xizmatlarini koʻrsatishning maʼmuriy reglamenti

1-bob. Umumiy qoidalar

1. Ushbu Reglament erkin ombor faoliyatini litsenziyalash yuzasidan davlat xizmatlarini koʻrsatish tartibini belgilaydi.

2. Ushbu Reglamentda quyidagi asosiy tushunchalardan foydalaniladi:

erkin ombor — maxsus jihozlangan va belgilangan joy boʻlib, binolarning hududini va (yoki) ochiq maydonchalarni oʻz ichiga oladi hamda tovarlarni erkin ombor rejimida bojxona nazorati ostida saqlashga moʻljallangan;

talabgor — litsenziyalovchi organga erkin ombor faoliyatini amalga oshirish uchun litsenziya berish toʻgʻrisidagi soʻrovnoma bilan murojaat etgan yuridik shaxs — Oʻzbekiston Respublikasi rezidenti;

litsenziya — litsenziyalovchi organ tomonidan berilgan, litsenziya talablari va shartlariga soʻzsiz rioya etgan holda erkin ombor faoliyatini amalga oshirish uchun ruxsatnoma (huquq);

litsenziyalovchi organ — Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasining Qoraqalpogʻiston Respublikasi, viloyatlar, Toshkent shahar boʻyicha boshqarmalari, “Toshkent-AERO” ixtisoslashtirilgan bojxona kompleksi;

litsenziat — erkin ombor faoliyatini amalga oshirish uchun litsenziyasi boʻlgan yuridik shaxs — Oʻzbekiston Respublikasi rezidenti;

erkin omborga bevosita tutashib ketgan bojxona nazorati zonasi — erkin ombor atrofida joylashgan va (yoki) erkin omborga tutashib ketadigan joydagi tovarlarni tashuvchi transport vositalariga tovarlar ortiladigan (tushiriladigan) bojxona nazorati zonasi;

ombor oʻrni — bitta bojxona yuk deklaratsiyasi boʻyicha erkin omborga joylashtirilgan tovarlarni yoki bitta bojxona yuk deklaratsiyasi boʻyicha boshqa bojxona rejimiga joylashtirishga ariza berilgan tovarlarni (erkin ombordan tovarlarni chiqarishda) saqlash uchun erkin ombor maydonining bir qismi;

maxsus elektron tizim — litsenziyalashda vakolatli organlarning idoralararo elektron hamkorlik qilishi, shuningdek litsenziya talablari hamda shartlari bajarilishining monitoringini oʻtkazish jarayonlarini qamrab oladigan, jismoniy va yuridik shaxslar uchun ochiq boʻlgan “Litsenziya” axborot tizimi;

soʻrovnoma — litsenziyalash faoliyati yuzasidan yuridik shaxsning ariza koʻrinishidagi murojaati.

3. Oʻzbekiston Respublikasidan olib chiqish va Oʻzbekiston Respublikasiga olib kirish taqiqlangan tovarlarni erkin omborda saqlashga ruxsat berilmaydi.

4. Erkin omborning normal faoliyat koʻrsatishini taʼminlash uchun foydalaniladigan tovarlar (masalan, ortish-tushirish texnikasi, sovutish uskunasi, kompyuter texnikasi, maxsus kiyim-bosh va boshqalar) bojxona rejimi ostida joylashtirilmaydi.

5. Boshqa tovarlarga zarar yetkazishi mumkin boʻlgan yoki alohida sharoitlarda saqlashni talab etadigan tovarlar Oʻzbekiston Respublikasi qonun hujjatlariga muvofiq belgilangan majburiy talablarga rioya qilingan holda, erkin omborning bir qismi hisoblangan va bunday tovarlarni saqlash uchun maxsus moslashtirilgan omborlarda yoxud alohida binolarda saqlanishi kerak.

6. Erkin omborlarda tovarlar bilan chakana savdo operatsiyalarini amalga oshirishga yoʻl qoʻyilmaydi.

7. Erkin omborda saqlanayotgan tovarlarning bojxona rasmiylashtiruvi ariza berilgan bojxona rejimlariga muvofiq tegishli bojxona rejimlari uchun Oʻzbekiston Respublikasi qonun hujjatlarida belgilangan tartibda amalga oshiriladi.

Erkin omborda saqlashni nazarda tutmaydigan oʻzgacha bojxona rejimi ostida saqlashga ariza berilgan tovarlar erkin ombordan tanlangan bojxona rejimiga muvofiq bunday tovarlar chiqarilishi paytidan boshlab, uch ish kunidan kechikmay olib chiqilishi kerak.

8. Litsenziya litsenziyalovchi organ tomonidan amal qilish muddati cheklanmagan holda, ombor hududiga (erkin ombor sifatida foydalanish moʻljallanayotgan binolar va (yoki) ochiq maydonchalar, shuningdek, bojxona nazorati zonasi) ega boʻlgan litsenziya talabgoriga litsenziya talabgori, erkin ombor hududi, binolar hamda bojxona nazorati zonasi ushbu Reglament talablari va shartlariga muvofiq boʻlishi sharti bilan beriladi.

Talabgorga tegishli boʻlgan, bir yuridik manzilda va (yoki) bir bojxona nazorati zonasida joylashgan bir nechta bino va (yoki) ochiq maydonlar uchun bitta litsenziya beriladi.

9. Erkin ombor faoliyatini amalga oshirish uchun ushbu Reglamentga 1-ilovaga muvofiq namunaviy (oddiy) litsenziya rasmiylashtiriladi.

10. Litsenziyaning amal qilishi litsenziya berilgan kundan boshlab hisoblanadi.

Litsenziya bilan taʼminlanmagan omborlardan foydalangan holda tijorat asosida yuklarni saqlashga yoʻl qoʻyilmaydi. Bunday holatlar yuzasidan qonun hujjatlarida nazarda tutilgan huquqiy taʼsir choralari qoʻllaniladi.

11. Quyidagilar:

talabgorning soʻrovnomasiga koʻra litsenziyalovchi organ qaroriga binoan — faoliyat turi uchun litsenziya;

mazkur Reglamentning 5-bobida nazarda tutilgan holatlarda oʻzgartirilgan talabgorning soʻrovnomasiga koʻra — oʻzgartirilgan litsenziya;

mazkur Reglamentning 5-bobida nazarda tutilgan holatlarda qayta rasmiylashtirilgan talabgorning soʻrovnomasiga koʻra — qayta rasmiylashtirilgan litsenziya beriladi.

Ushbu bandda belgilangan har bir holatda talabgor (yoki litsenziat) erkin ombor bino va (yoki) ochiq maydonlarining mulk huquqi, ashyoviy huquqlar yoki ijara asosida tegishliligi toʻgʻrisidagi maʼlumotlarni soʻrovnomada koʻrsatadi.

12. Litsenziya boʻyicha huquqlarni boshqa shaxslarga berish taqiqlanadi.

2-bob. Litsenziya talablari va shartlari

13. Erkin ombor hududi bojxona nazorati zonasi hisoblanadi.

Erkin ombor hududiga qoʻriqlanadigan va mazkur Reglamentning 19-bandida belgilangan tartibda belgilab olingan, tovarlarni bojxona nazorati ostida yetkazib berishni tugallash uchun zarur boʻlgan vaqtda tovarlarni tashiyotgan transport vositalari toʻxtab turishi uchun jihozlangan hudud tutashgan boʻlishi kerak. Koʻrsatib oʻtilgan hudud ham bojxona nazorati zonasi hisoblanadi. Bojxona nazorati ostidagi tovarlarni tashiydigan transport vositalari ushbu bojxona nazorati zonasiga sutkaning istalgan vaqtida kirishi mumkin.

Temir yoʻl va avtomobil transport uzellari va transport magistrallaridan olib boruvchi, transport vositalari harakati uchun yetarli kenglikka ega boʻlgan yoʻl boʻylab erkin omborgacha boʻlgan masofa 3 km.dan oshmasligi kerak.

14. Erkin ombor sifatida foydalanish uchun moʻljallangan binolar va (yoki) ochiq maydonchalar saqlanayotgan tovarlar va transport vositalariga nisbatan bojxona nazorati amalga oshirilishi, ularning saqlanishi taʼminlanadigan tarzda joylashtirilishi, jihozlanishi va asbob-uskunalar bilan taʼminlanishi kerak hamda quyidagilarni istisno etishi lozim:

erkin ombor hududiga bojxona nazorati zonasiga va tovarlarga begona shaxslarning (ombor xodimlari boʻlmagan, tovarlarga nisbatan vakolatga ega boʻlmagan) yaqinlashishini;

tovarlarning bojxona nazoratini chetlab olib kirilishini va olib chiqilishini.

Agar binoning yoki inshootning yoxud ochiq maydonning bir qismi erkin ombor hisoblansa, unga borish yoʻllari va tutashib ketadigan butun hudud bojxona nazorati ostidagi tovarlarga begona shaxslarning yaqinlashishini istisno etadigan tarzda jihozlanishi kerak.

15. Erkin ombor hududi va binolar maydoni mazkur Reglamentda nazarda tutilgan talablar hisobga olingan holda, erkin omborning normal faoliyat koʻrsatishi uchun yetarli boʻlishi kerak.

16. Erkin ombor binolari va (yoki) ochiq maydonchalari:

yer ustidagi imoratlarda yoki inshootlarda joylashtirilishi;

qoʻriqlash va yongʻin nazorati signalizatsiyalari, sodir boʻlayotgan voqealar boʻyicha har tomondan olingan video maʼlumotlarni uch oy davomida koʻrsatish imkoniga ega boʻlgan, litsenziyalovchi organ tomonidan belgilangan joylarda oʻrnatilgan, kunu-tun ishlaydigan videokuzatuv vositalari bilan jihozlangan boʻlishi;

yongʻin xavfsizligi talablariga mos boʻlgan yongʻinni oʻchirish tizimi va vositalariga ega boʻlishi kerak.

17. Talabgor:

erkin ombor sifatida foydalanish uchun moʻljallangan binolar hajmini va (yoki) ochiq hududning hamda bojxona nazorati zonasining umumiy maydonini;

erkin omborga bevosita tutashib ketgan hududni;

erkin omborda saqlashga moʻljallangan tovarlar nomenklaturasini belgilaydi.

Bunda erkin ombor hududi va binolar maydoni hamda bojxona nazorati zonasi mazkur Reglamentda nazarda tutilgan talablar va shartlar hisobga olingan holda ajratilishi kerak.

18. Ombor oʻrni litsenziat tomonidan maxsus ajratiladi va belgilanadi.

Har bir ombor oʻrnida unda saqlanayotgan tovarlar toʻgʻrisida quyidagi maʼlumotlar aks ettirilgan maʼlumotnoma mavjud boʻlishi lozim:

bojxona yuk deklaratsiyasining roʻyxat raqami;

bojxona rejimi;

yuk qabul qiluvchining nomi;

tovarlar nomi va miqdori;

tovarlar qiymati.

19. Erkin omborga bevosita tutashib ketgan va bojxona nazorati zonasi hisoblangan hudud quyidagi talablarga muvofiq boʻlishi kerak:

erkin omborga tutashib ketgan butun hudud perimetri boʻyicha balandligi 2 m dan kam boʻlmagan qatʼiy oʻrnatilgan yaxlit toʻsiqlar (uzluksiz temir panjara yoki devor) bilan aylantirib toʻsilgan;

ichkarisida erkin omborning qismi hisoblanmagan oʻzga imoratlar va inshootlarga ega boʻlmasligi;

ogʻir yukli transportning manyovr (toʻsiqqa chap berish uchun oʻz yoʻnalishini oʻzgartirib bajariladigan harakatlari — qayta tizilish, burilish, qayrilib olish, ortga harakat, aylanib oʻtish) qilish imkoniyatini taʼminlashi;

erkin ombor imoratiga eshiklari tomonidan bevosita tutashib ketgan boʻlishi;

barcha kirish (chiqish) va (yoki) chiqish (kirish) joylarida oʻzbek, rus va ingliz tillarida “bojxona nazorati zonasi” belgisi qoʻyilgan, olingan tasvirlarni uch oy davomida koʻrsatish hamda bojxona organlariga onlayn uzatish imkoniga ega boʻlgan, kun-u-tun ishlaydigan avtotransport vositasining davlat raqami belgisini va temir yoʻl transporti vositasining raqamini aniqlash tizimi bilan jihozlangan nazorat-oʻtkazish punktlari boʻlishi;

tovarlarni erkin omborga joylashtirish va undan olib chiqish faqat bojxona nazorati zonasi orqali amalga oshiriladigan tarzda jihozlanishi lozim.

20. Erkin ombor va bojxona nazorati zonasi hisoblangan, erkin omborga bevosita tutashib ketgan hudud:

umumiy perimetr boʻyicha bir-biridan ajralmagan;

balandligi 2 m dan kam boʻlmagan qatʼiy oʻrnatilgan yaxlit toʻsiqlar bilan aylantirib toʻsilgan va barcha kirish (chiqish) va (yoki) chiqish (kirish) joylarida oʻzbek, rus va ingliz tillarida “erkin ombor” belgisi qoʻyilgan holda nazorat-oʻtkazish punktlariga ega boʻlishi kerak.

21. Erkin ombor sifatida ishlatish uchun moʻljallangan binolar va (yoki) ochiq maydonchalar yoxud erkin omborga bevosita tutashib ketgan hudud quyidagilarni inobatga olgan holda, bittadan kam boʻlmagan usti yopiq koʻrik maydonchasiga ega boʻlishi kerak:

erkin ombor eshiklari tomonidan joylashishi;

40 m2 dan kam boʻlmagan maydonga ega boʻlishi;

elektr yorugʻi bilan jihozlanishi;

sodir boʻlayotgan voqealar boʻyicha har tomondan olingan video maʼlumotlarni uch oy davomida koʻrsatish imkoniga ega boʻlgan, litsenziyalovchi organ tomonidan belgilangan joylarda oʻrnatilgan, kunu-tun ishlaydigan videokuzatuv vositalari bilan jihozlangan boʻlishi;

tovarlarni tushirish-ortish uchun koʻchma va (yoki) yerdagi estakada (yuklash-tushirish ishlarini amalga oshirish uchun yer yuzasidan maʼlum balandlikda quriladigan yoki oʻrnatiladigan toʻsinsimon konstruksiyalardan iborat koʻpriksimon inshoot) boʻlishi.

Erkin omborda tovarlarning ortilishi, tushirilishi va qayta yuklanishi faqat koʻrik maydonchasida amalga oshiriladi.

Bunda havo sharoiti keskin yomonlashgan holatlarda amalga oshiriladigan harakatlarni har tomondan uzluksiz videokuzatish imkonini yaratgan holda, tovarlarning ortilishi, tushirilishi va qayta yuklanishi erkin omborning binosida amalga oshirilishiga yoʻl qoʻyiladi.

22. Erkin ombor doimiy ravishda soz, ishchi holatdagi va uning normal faoliyat koʻrsatish uchun quyidagilar yetarli boʻlishi kerak:

ortish-tushirish va transport vositalari;

ombor asbob-uskunalari;

oʻlchov asboblari, aniqligi va oʻlchash chegaralari erkin omborda saqlashga moʻljallanayotgan tovarlar xususiyatiga muvofiq boʻlgan tovarlarning ogʻirligini oʻlchash vositalari;

bojxona organlarining dasturiy taʼminoti bilan mos keladigan tovarlar hisobini yuritadigan avtomatlashtirilgan tizim;

erkin ombor sifatida ishlatish uchun moʻljallangan binolarni, ochiq maydonchalarni, erkin omborga bevosita tutashib ketgan butun hududni toʻliq nazorat qilish hamda bojxona organlariga video maʼlumotlarni uzatish, shuningdek, ushbu maʼlumotlarni uch oy davomida saqlash imkoniga ega boʻlgan uzluksiz ishlovchi videokuzatuv tizimi;

koʻrik oʻtkazish uchun stol;

aptechka (birinchi tibbiy yordam koʻrsatish uchun tibbiyot qutichasi);

aloqa vositalari (shu jumladan telefon, maʼlumot uzatish tarmogʻi, Internet);

tashkiliy texnika;

mebel.

23. Erkin omborda va bojxona nazorati zonalari hisoblangan erkin omborga bevosita tutashib ketgan hududda har qanday turdagi chiqindilar va boshqa maishiy axlat toʻplanishi mumkin emas.

24. Bojxona organi xodimlari uchun erkin omborda yoki bojxona nazorati zonasida bojxona nazorati va bojxona rasmiylashtiruvini amalga oshirish uchun quyidagilarga javob beradigan bino ajratilishi kerak:

6 m2 dan kam boʻlmagan maydonga va 20 m3 dan kam boʻlmagan hajmga ega boʻlishi;

mavsumiy isitish va sovitish tizimiga ega;

doimiy soz holatdagi, bojxona organlarining dasturiy taʼminoti bilan ishlash imkoniga ega boʻlgan kompyuter, printer va nusxa koʻchiradigan apparat, aloqa vositalari (shu jumladan telefon, Internet) bilan jihozlangan;

mebel jihozlari bilan taʼminlangan;

erkin omborga oʻrnatilgan videokuzatuv tizimiga ulangan.

25. Erkin omborning taʼsis etilishi va uning faoliyat koʻrsatishi Oʻzbekiston Respublikasining atrof-tabiiy muhitni muhofaza qilish toʻgʻrisidagi qonun hujjatlari talablariga rioya qilingan holda amalga oshirilishi kerak.

26. Erkin omborni qoʻshimcha ravishda asbob-uskunalar bilan taʼminlash (qoʻshimcha ravishda jihozlash), tartibga keltirish, qoʻriqlash hamda oʻtkazish rejimini taʼminlash litsenziyalovchi organ bilan kelishgan holda litsenziat tomonidan va uning hisobidan amalga oshiriladi.

27. Mazkur Reglamentning 19 — 24-bandlarida belgilangan talablar erkin omborni taʼsis etish uchun berilgan soʻrovnomani koʻrib chiqish bosqichida bojxona organi tomonidan belgilanishi va erkin ombordan foydalanish tartib-qoidasida aks ettirilishi kerak.

28. Litsenziat quyidagilarga majbur:

erkin omborning bojxona rejimi shartlariga muvofiq tovarlar bojxona nazorati ostida saqlanishini tartibga soluvchi qonun hujjatlariga rioya qilish;

bojxona organlarining ruxsatisiz erkin omborga kelib tushgan tovarlarning chiqarib yuborilishiga yoʻl qoʻymaslik;

berilgan litsenziya shartlariga, shu jumladan erkin omborni jihozlash va uni asbob-uskunalar bilan taʼminlash talablariga oid qismiga rioya qilish;

litsenziya talablari va shartlari asosida jihozlangan videokuzatuv tizimlari yordamida olingan vaqt boʻyicha uzluksiz videoyozuvlarning uch oy davomida saqlanishini taʼminlash, shuningdek ularga oʻzgartirish kiritish, ustiga yozish, oʻchirish, nusxa olish, koʻchirib olish kabi harakatlarni bajarishning va boshqa maqsadlarda foydalanishning oldini olish;

videokuzatuv tizimini bojxona nazorati ostida tovarlarni tashiyotgan transport vositasining erkin ombor hududiga kirib kelishidan tovarlar bilan amalga oshiriladigan har bir yuk va boshqa operatsiyalarni hamda ularning erkin omborlarga joylashtirilishi va chiqarib yuborilishi boʻyicha ketma-ketlikda olingan videoyozuvlarni taʼminlaydigan qilib oʻrnatish;

videokuzatuvni toʻliq amalga oshirish imkonini beradigan yoritish tizimi bilan taʼminlash;

videoyozuvlarning uzluksizligini va axborot tizimining muntazam ishlashini taʼminlash uchun muqobil elektr manbasi (qurilmalari)ga ega boʻlishi;

erkin ombor sifatida foydalanish uchun moʻljallangan va belgilangan talablarga javob beradigan binolar va (yoki) ochiq maydonchalarga egalik qilish (oʻz mulkida boʻlishi, xoʻjalik yuritishida, operativ boshqaruvida boʻlishi yoki ijaraga olgan boʻlishi);

Oʻzbekiston Respublikasi Bojxona kodeksiga muvofiq bojxona toʻlovlari toʻlanishini taʼminlash;

mazkur Reglament bilan belgilangan talablar va shartlarga rioya etilishini taʼminlash;

erkin omborga joylashtirilgan tovarlarni faqat erkin ombor sifatida foydalanish uchun moʻljallangan ochiq maydonchalarda va (yoki) binolar hajmida saqlash;

erkin omborga joylashtiriladigan tovarlardan saqlashdan boshqa maqsadlarda foydalanish imkoniyatini istisno etish va koʻrsatib oʻtilgan tovarlar bilan erkin omborning bojxona rejimiga muvofiq operatsiyalar amalga oshirilishini taʼminlash;

bojxona nazoratini amalga oshirishda bojxona organlari xodimlariga yordam berish;

erkin omborga kelib tushayotgan va erkin ombordan olib chiqilayotgan tovarlar boʻyicha Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasining axborot tizimida ushbu tovarlarning olib kirilishi va olib chiqilishi toʻgʻrisida belgi qoʻygan holda, avtomatlashtirilgan hisobni yuritish;

bojxona organining talabiga muvofiq erkin ombordagi tovarlarni bojxona organining mansabdor shaxsi ishtirokida xatlovdan oʻtkazish;

sanitariya yongʻin va sanoat xavfsizligi qoidalariga, omborga joylashtirish normalariga, tovarlarning yonma-yon qoʻyilishi qoidalariga va saqlash rejimiga, davlat standartlarining majburiy talablariga rioya qilish, Oʻzbekiston Respublikasining bojxona ishi sohasidagi munosabatlarni tartibga soluvchi qonun hujjatlarida belgilangan boshqa talablar va shartlarni bajarish;

erkin ombor bojxona rejimining amal qilishi tugagandan keyin ahamiyatli boʻlishi mumkin boʻlgan erkin omborda saqlanayotgan tovarlar bilan yuz bergan oʻzgarishlar toʻgʻrisida bojxona organiga imkon qadar qisqa muddatlarda maʼlum qilish;

erkin omborda saqlanayotgan tovarlar bilan amalga oshirilishi moʻljallanayotgan operatsiyalar toʻgʻrisida bojxona organini barvaqt xabardor qilish;

mazkur Reglamentning 82-bandida belgilangan holatlarda bojxona toʻlovlarini toʻlash;

taʼsis hujjatlariga oʻzgartirish va qoʻshimchalar kiritilganligi, shu jumladan qayta tashkil etilganligi, nomi yoki joylashgan joyi (pochta manzili) oʻzgarganligi toʻgʻrisida litsenziyalovchi organni oʻz vaqtida xabardor qilish;

erkin omborga kirish uchun ruxsat berilgan hamda belgilangan tartibda tibbiy koʻrikdan oʻtgan (oziq-ovqat mahsulotlari bilan ishlovchi xodimlar uchun) xodimlarning (F.I.Sh. va lavozimini koʻrsatgan holda) roʻyxati mavjudligini taʼminlash;

erkin ombor tugatilgan taqdirda, unda turgan tovarlarning saqlanishini taʼminlash, ularning boshqa erkin omborga oʻtkazilishi yoxud Oʻzbekiston Respublikasi Bojxona kodeksida belgilangan muddatda boshqa bojxona rejimiga joylashtirilishi boʻyicha choralar koʻrish;

Oʻzbekiston Respublikasi bojxona organlarining qonuniy talablarini bajarish, shu jumladan bojxona organlari mansabdor shaxslarining erkin omborda saqlanayotgan tovarlar turgan joyga kirishini taʼminlash;

bojxona nazorati va bojxona rasmiylashtiruvini amalga oshirish uchun erkin ombordagi jihozlangan binolar va aloqa vositalarini bojxona organlari xodimlariga bepul taqdim etish;

yonish va portlash xavfi yuqori boʻlgan kimyoviy moddalarni (mahsulotlarni) faqat Favqulodda vaziyatlar vazirligining yonish va portlash xavfi yuqori boʻlgan kimyoviy moddalarni (mahsulotlarni) saqlash uchun obyektning (omborning) yongʻin va sanoat xavfsizligi talablariga muvofiqligi yuzasidan xulosasi mavjud boʻlganda saqlash;

erkin omborda dori vositalari va tibbiy buyumlarni faqat “Zarur saqlash amaliyoti — GSP” talablariga muvofiqligi boʻyicha sertifikat mavjud boʻlganda saqlash.

29. Litsenziatning tovarlarni saqlash uchun joylashtiradigan shaxslar bilan munosabatlari shartnoma asosida amalga oshiriladi.

3-bob. Litsenziya olish uchun zarur hujjatlar

30. Litsenziya olish uchun talabgor maxsus elektron tizim yoki Yagona interaktiv davlat xizmatlari portali (keyingi oʻrinlarda — YIDXP) orqali quyidagi hujjatlarni taqdim etadi:

talabgor ega boʻlgan va erkin ombor sifatida foydalanish uchun moʻljallangan binolar va (yoki) ochiq maydonchalar, ularning oʻlchamlari, hajmi va (yoki) maydoni, ular joylashgan joy, ularning jihozlanishi, videokuzatuv tizimi, asbob-uskunalar va moddiy-texnika bilan taʼminlanganligi hamda mulk huquqi, ashyoviy huquqlar yoki muddatlarini koʻrsatgan holda ijara asosida tegishliligi toʻgʻrisidagi maʼlumotlar;

avtomobil va temir yoʻllar koʻrsatilgan holda, erkin ombor uchun moʻljallangan hudud (shuningdek, yondosh) hamda binolar va (yoki) ochiq maydonchalarning sifatli chizmasi (oʻlchamlari koʻrsatilgan bojxona nazorati zonasi, qoʻriqlanadigan hudud bilan birga) va kadastr yigʻmajildidagi tarhi;

Oʻzbekiston Respublikasi Bojxona kodeksiga muvofiq bojxona toʻlovlari toʻlanganini tasdiqlovchi hujjat.

Talabgordan ushbu Reglamentda nazarda tutilmagan hujjatlarni taqdim etishni talab qilishga yoʻl qoʻyilmaydi.

Litsenziyalovchi organ litsenziya berish uchun boshqa vakolatli organlarda mavjud boʻlgan zarur hujjatlar va axborotlarni belgilangan tartibda, oʻzaro axborot hamkorligi yoʻli bilan, shu jumladan elektron tarzda mustaqil ravishda oladi, ushbu bandda nazarda tutilgan hujjatlar va axborotlar bundan mustasno.

31. Notoʻgʻri yoki buzib koʻrsatilgan maʼlumotlarni taqdim etganligi uchun talabgor qonunga muvofiq javob beradi.

4-bob. Davlat xizmatlari koʻrsatish tartibi

32. Davlat xizmatlari koʻrsatish jarayoni ushbu Reglamentga 2-ilovadagi sxemaga muvofiq amalga oshiriladi.

33. Talabgor davlat xizmatlaridan elektron tarzda maxsus elektron tizim yoki YIDXP orqali foydalanadi.

34. Talabgor mazkur Reglamentga 3-ilovadagi 1-shaklga muvofiq erkin ombor faoliyatiga litsenziya berish boʻyicha davlat xizmatlaridan foydalanish uchun soʻrovnomani elektron toʻldiradi.

35. Talabgor hujjatlarni rasmiylashtirgandan va soʻrovnomaga kiritgandan soʻng uni oʻz elektron raqamli imzosi (keyingi oʻrinlarda — ERI) bilan tasdiqlaydi.

36. Soʻrovnoma avtomatik tarzda litsenziyalovchi organga kelib tushadi.

Soʻrovnomada notoʻgʻri maʼlumotlar koʻrsatilishi davlat xizmati koʻrsatishni rad etish uchun asos hisoblanadi.

Talabgor tomonidan kiritilgan hujjatlar Erkin ombor faoliyatini litsenziyalash pasportining 14-bandida belgilangan kelishiladigan organlarga bir vaqtning oʻzida yuboriladi.

Tegishli kelishuvni yoki xulosani taqdim etish uchun obyektlarni joyiga chiqib oʻrganish talab etilgan hollarda, kelishiladigan organlar faqat oʻz faoliyat yoʻnalishi boʻyicha oʻrganish oʻtkazishi mumkin.

Kelishiladigan organlar belgilangan muddatlarda xulosa taqdim etmagan taqdirda ariza ushbu organlar bilan kelishilgan, xulosalar esa ijobiy deb hisoblanadi.

Bunday hollarda kelishiladigan organlar yuzaga kelishi mumkin boʻlgan barcha oqibatlar uchun javobgar hisoblanadi. Bunda kelishiladigan organning tegishli xulosalarisiz litsenziya berish imkoni boʻlmaganda, talabgorning arizasini koʻrib chiqish muddati va tartibi buzilganligi uchun kelishiladigan organlar javobgardir.

37. Reglament talablari asosida maxsus elektron tizim yoki YIDXP orqali hujjatlar toʻliq kiritilmasa, soʻrovnomani tasdiqlash va litsenziyalovchi organga yuborish avtomatik tarzda rad etiladi.

Talabgor tomonidan taqdim etilgan hujjatlarning toʻliqligi litsenziyalovchi organ tomonidan oʻrganib chiqiladi.

Talabgorning hujjatlar toʻliq boʻlmagan murojaati litsenziyalovchi organ tomonidan davlat xizmati koʻrsatilmasdan rad etiladi.

39. Litsenziya berish yoki litsenziya berishni rad etish toʻgʻrisidagi qaror talabgorning soʻrovnomasi barcha zarur hujjatlar bilan birgalikda kelib tushgan kundan boshlab yigirma ish kunidan ortiq boʻlmagan muddatda qabul qilinadi.

40. Litsenziya berish toʻgʻrisidagi hujjatlarni koʻrib chiqish, ular boʻyicha xulosalar tayyorlash uchun litsenziyalovchi organda ekspert komissiyasi tashkil etiladi. Ekspert komissiyasining tarkibi va komissiya toʻgʻrisidagi nizom Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi tomonidan tasdiqlanadi.

41. Talabgorning soʻrovnomasi barcha zarur hujjatlar bilan birgalikda ular kelib tushgan kunda koʻrib chiqish uchun ekspert komissiyasiga kiritiladi.

Ekspert komissiyasi oʻn besh ish kunidan ortiq boʻlmagan muddatda taqdim etilgan hujjatlarni, litsenziya talablari va shartlariga rioya etilishini oʻrganish uchun bevosita erkin omborni tashkil etish joyiga borgan holda koʻrib chiqadi va ular boʻyicha talabgorning litsenziya talablari va shartlariga muvofiqligi toʻgʻrisida ekspert xulosasini tayyorlaydi.

42. Litsenziyalovchi organda tashkil etilgan ekspert komissiyasi xulosa tayyorlash jarayonida obyekt (bino, inshootlar va (yoki) hudud) boʻyicha quyidagi maʼlumotlarni elektron hamkorlik yoʻli bilan yoxud elektron soʻrov orqali oladi va uning natijalarini xulosaga qoʻshadi:

Oʻzbekiston Respublikasi Vazirlar Mahkamasi huzuridagi Soliq qoʻmitasidan — ijara shartnomasi toʻgʻrisida;

Oʻzbekiston Respublikasi Iqtisodiyot va moliya vazirligi huzuridagi Kadastr agentligidan — koʻchmas mulkka boʻlgan huquq toʻgʻrisida.

Vakolatli davlat organlari obyektning (bino, inshootlar va (yoki) hududning) sanitariya va yongin qoidalari boʻyicha tadbirlar talablariga muvofiqligini taʼminlash maqsadida tadbirkorlik subyektlariga malakali kadrlarni izlash, hujjatlar va dasturlarni qayta ishlash uchun mutaxassislarni jalb qilish hamda litsenziyalar va ruxsat etish xususiyatiga ega boʻlgan boshqa hujjatlarni olish uchun zarur shart-sharoitlarni yaratishda yordam beradi, talabgorning taklif etilgan yordamni rad qilish hollari bundan mustasno.

43. Litsenziyalovchi organ uch ish kunida ekspert komissiyasi xulosasi asosida litsenziya berish yoki litsenziya berishni rad etish toʻgʻrisida qaror qabul qiladi.

Qabul qilingan qaror toʻgʻrisida bir ish kunida talabgoriga maxsus elektron tizim yoki YIDXP orqali:

litsenziya berish toʻgʻrisida qaror qabul qilinganda, bank hisobvaragʻi rekvizitlari va litsenziya berish uchun davlat bojini toʻlash muddati toʻgʻrisida;

litsenziya berishni rad etish toʻgʻrisida qaror qabul qilinganda, rad etishning sabablari va talabgor koʻrsatilgan sabablarni bartaraf qilib, hujjatlarni koʻrib chiqish uchun takror taqdim etishi mumkin boʻlgan muddat koʻrsatilgan va litsenziyalovchi organ vakolatli shaxsining ERIsi bilan tasdiqlangan xabarnoma yuboradi.

Litsenziya berishni rad etish haqidagi xabarnomada koʻrsatilgan muddat kamchiliklarni bartaraf etish uchun zarur boʻlgan vaqtga mutanosib boʻlishi lekin ushbu muddat oʻttiz ish kunidan ortiq boʻlmasligi kerak.

44. Litsenziya berish “Litsenziyalash, ruxsat berish va xabardor qilish tartib-taomillari toʻgʻrisida”gi Oʻzbekiston Respublikasi Qonunining 29-moddasida nazarda tutilgan asoslar boʻyicha rad etilishi mumkin.

45. Talabgor litsenziya berish rad etilishi toʻgʻrisidagi qaror, shuningdek, litsenziyalovchi organ mansabdor shaxslarining xatti-harakati (harakatsizligi) yuzasidan qonun hujjatlarida belgilangan tartibda shikoyat qilish huquqiga ega.

46. Agar litsenziyalovchi organ litsenziya berish toʻgʻrisidagi soʻrovnomani koʻrib chiqish muddati mobaynida litsenziya berish yoki uni berishni rad etish haqida qabul qilingan qaror toʻgʻrisida talabgorga maxsus elektron tizim yoki YIDXP orqali xabarnoma yubormasa, talabgor ushbu Reglamentning 39-bandida koʻrsatib oʻtilgan muddat tamom boʻlgandan keyin erkin ombor faoliyatini amalga oshirish huquqiga, bu haqda litsenziyalovchi organni maxsus elektron tizim yoki YIDXP vositasida elektron shaklda xabardor qilgan holda, ega boʻladi.

47. Litsenziya berish rad etilishiga asos boʻlgan sabablar bartaraf etilgan taqdirda, litsenziya olish uchun talabgor tomonidan taqdim etilgan maʼlumotlar talabgorning rad etish sabablari bartaraf etilgani toʻgʻrisidagi maʼlumotnomasi va ularni tasdiqlovchi hujjatlar kiritilgan soʻrovnoma maxsus elektron tizim yoki YIDXP orqali kelib tushgandan soʻng ushbu Reglamentning 32 — 44-bandlarida koʻrsatilgan tartibda, biroq besh ish kunidan ortiq boʻlmagan muddatda takroran koʻrib chiqiladi.

Bunda:

talabgorning takroriy soʻrovnomasiga asosan ekspert komissiyasi ikki ish kunidan ortiq boʻlmagan muddatda taqdim etilgan hujjatlarni, litsenziya berishni rad etish sabablari bartaraf etilganligini oʻrganish uchun bevosita erkin omborni tashkil etish joyiga borgan holda koʻrib chiqadi va ular boʻyicha talabgorning litsenziya talablari va shartlariga muvofiqligi toʻgʻrisida ekspert xulosasini tayyorlaydi.

Tayyorlangan xulosa asosida ushbu Reglamentning 43-bandida koʻrsatilgan tadbirlar bajarilishi taʼminlanadi.

48. Talabgorning soʻrovnomasini takroran koʻrib chiqishda litsenziya berishni rad etish haqidagi xabarnomada litsenziyalovchi organ tomonidan talabgorga ilgari bayon qilinmagan rad etish sabablari koʻrsatilishiga yoʻl qoʻyilmaydi. Rad etish sabablari bartaraf etilganini tasdiqlovchi hujjatlar bilan bogʻliq boʻlgan rad etish sabablarini koʻrsatish bundan mustasno.

Litsenziya berish rad etilganligi toʻgʻrisidagi xabarnomada koʻrsatilgan muddat oʻtganidan keyin berilgan soʻrovnoma yangidan berilgan deb hisoblanadi.

50. Litsenziyalovchi organ davlat boji toʻlangandan soʻng uch ish kunida QR-kod (matrik shtrixli kod) qoʻyilgan elektron litsenziyani rasmiylashtiradi hamda litsenziyalovchi organ vakolatli shaxsining ERIsi bilan tasdiqlab, talabgorga maxsus elektron tizim yoki YIDXP orqali elektron ravishda yuboradi.

51. Litsenziyada quyidagilar boʻlishi kerak:

litsenziyaning tartib raqami;

amalga oshirayotgan faoliyat turi;

litsenziatning nomi, joylashgan joyi (pochta manzili), uning tashkiliy-huquqiy shakli va STIR raqami;

binolar va (yoki) ochiq maydonchalar hajmi va maydoni hamda egalik shakli va amal qilish muddati;

bojxona toʻlovlarini taʼminlash miqdorlari, ularni toʻlashni taʼminlash shakli va amal qilish muddati toʻgʻrisidagi maʼlumotlar;

erkin ombor joylashgan joy;

litsenziya berilgan sana.

52. Agar talabgor tomonidan unga litsenziya berish toʻgʻrisidagi qaror qabul qilingani haqidagi xabarnoma yuborilgan paytdan eʼtiboran oʻttiz kundan ortiq boʻlmagan muddatda maxsus elektron tizim yoki YIDXP orqali litsenziyani berish uchun axborot-kommunikatsiya tizimlari yordamida davlat boji toʻlanganligi toʻgʻrisida xabarnoma yuborilmagan taqdirda, litsenziyalovchi organ mazkur litsenziyani bekor qiladi.

53. Litsenziyani berish uchun davlat boji belgilangan muddatda toʻlanmagan taqdirda, talabgor litsenziyani berish yuzasidan umumiy tartibda qayta murojaat qilishga haqli.

54. Talabgor davlat xizmatidan undan foydalanishning har qanday bosqichida bosh tortishga haqlidir.

Talabgor davlat xizmatidan foydalanishdan bosh tortgan taqdirda, uning soʻrovnomasi koʻrib chiqilmaydi va davlat xizmatlari koʻrsatganlik uchun toʻlangan yigʻimlar miqdori qaytarilmaydi.

5-bob. Litsenziyani qayta rasmiylashtirish va oʻzgartirish

55. Litsenziat oʻzgartirilgan, uning nomi yoki joylashgan joyi (pochta manzili) oʻzgargan taqdirda, litsenziat yoki uning huquqiy vorisi qayta roʻyxatdan oʻtkazilgandan keyin besh ish kuni ichida litsenziyalovchi organga koʻrsatib oʻtilgan maʼlumotlarni tasdiqlovchi tegishli hujjatlarni kiritgan holda, ushbu Reglamentning 35 — 37-bandlarida koʻrsatilgan tartibda litsenziyani qayta rasmiylashtirish toʻgʻrisida maxsus elektron tizim yoki YIDXP orqali murojaat qilishi shart.

Bunda, talabgor mazkur Reglamentga 3-ilovadagi 2-shaklga muvofiq bojxona ombori faoliyatiga litsenziya berish boʻyicha davlat xizmatlaridan foydalanish uchun soʻrovnoma toʻldiradi.

Litsenziya qayta rasmiylashtirilguniga qadar litsenziat litsenziyani qayta rasmiylashtirish toʻgʻrisidagi arizasi asosida unda koʻrsatilgan faoliyatni amalga oshiradi.

Litsenziyalovchi organ litsenziyani qayta rasmiylashtirish toʻgʻrisida tegishli hujjatlar kiritilgan soʻrovnomani olgan kundan eʼtiboran besh ish kunida litsenziyani qayta rasmiylashtiradi.

Litsenziya qayta rasmiylashtirish uchun mazkur Reglamentning 76-bandida koʻrsatilgan miqdorda yigʻim undiriladi.

56. Litsenziya litsenziatning maxsus elektron tizim yoki YIDXP orqali murojaatiga asosan quyidagi hollarda oʻzgartirilishi mumkin:

litsenziatning faoliyatni amalga oshirish manzili oʻzgarganda;

erkin ombor binolarining hajmi va (yoki) ochiq maydonchalari kengaytirilganda va (yoki) qisqartirilganda.

Litsenziyani oʻzgartirishda, litsenziyani berish uchun nazarda tutilgan tartiblarga amal qilinadi.

Litsenziya oʻzgartirilganda, mazkur Reglamentning 74-bandida koʻrsatilgan miqdorda davlat boji va 76-bandida koʻrsatilgan miqdorda yigʻim undiriladi.

57. Litsenziyalovchi organ litsenziyani qayta rasmiylashtirishda va (yoki) oʻzgartirishda, litsenziyalar reyestriga tegishli oʻzgartirishlar kiritadi.

6-bob. Litsenziya talablari va shartlariga rioya etilishini nazorat qilish

58. Litsenziya talablari hamda shartlariga rioya etilishini litsenziyalovchi organ tomonidan nazorat qilish ushbu Reglament boʻyicha “xavfni tahlil qilish” tizimi natijalari hamda jismoniy va yuridik shaxslarning qonunchilik buzilishi faktlari toʻgʻrisidagi murojaatlari asosida amalga oshiriladi.

59. Litsenziya talablari va shartlariga rioya etilishi yuzasidan nazoratni amalga oshirishda litsenziyalovchi organ oʻz vakolatlari doirasida quyidagi huquqlarga ega:

litsenziat tomonidan ushbu Reglamentda belgilangan litsenziya talablari va shartlariga rioya etilishini tekshirishni Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil bilan kelishilgan, qonunchilikda belgilangan tartibda joyiga chiqqan holda oʻtkazish;

litsenziya talablari va shartlariga rioya etilishini tekshirish chogʻida paydo boʻladigan masalalar yuzasidan litsenziatdan zarur maʼlumotlarni soʻrash va olish;

tekshirishlar natijalari asosida litsenziat tomonidan litsenziya talablari va shartlarining aniq buzilishlarini koʻrsatgan holda, dalolatnomalar (maʼlumotnomalar) tuzish;

litsenziatga aniqlangan buzilishlarni bartaraf etish majburiyatini yuklovchi qarorlar chiqarish, bunday buzilishlarni bartaraf etish muddatlarini belgilash;

litsenziyaning amal qilishini toʻxtatib turish yoki litsenziyani bekor qilish toʻgʻrisida qonun hujjatlarida belgilangan tartibda qaror chiqarish yoxud sudga murojaat qilish;

Erkin omborda bojxona nazorati ostida boʻlgan tovarlarga Oʻzbekiston Respublikasi Bojxona kodeksiga muvofiq, bojxona nazorat shakllarini qoʻllash Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil bilan kelishishni talab etmaydi.

591. Erkin omborlarda bojxona nazorati ostidagi tovarlar va transport vositalarining bojxona nazoratini amalga oshirish jarayonida litsenziya talablari va shartlari boʻyicha nomuvofiqliklar kuzatilganda, bojxona organi bojxona nazorati ostidagi tovar va transport vositalariga nisbatan bojxona nazoratining qonun hujjatlariga muvofiq amalga oshirilishini taʼminlash chorasini koʻrgan holda, litsenziya talablari va shartlari buzilganligi holati boʻyicha shu kunning oʻzida litsenziyalovchi organni xabardor qiladi.

60. Litsenziya talablari va shartlariga rioya etilishi ustidan davlat nazorati “Litsenziyalash, ruxsat berish va xabardor qilish tartib-taomillari toʻgʻrisida”gi Oʻzbekiston Respublikasi Qonunida belgilangan tartibda amalga oshiriladi.

Litsenziyaning bekor qilinishiga asos boʻladigan qoʻpol qoidabuzarliklarning roʻyxati ushbu Reglamentning 4-ilovasida belgilangan Erkin ombor faoliyatini litsenziyalash pasportida nazarda tutiladi.

61. Davlat yongʻin nazorati organlari tomonidan belgilangan tartibda davlat yongʻin nazorati olib borilganda, erkin omborda yongʻin xavfsizligi talablari buzilganligi holatlari aniqlanganda, aniqlangan holatlar boʻyicha litsenziyalovchi organga xabar beriladi.

62. Litsenziyaning amal qilishini toʻxtatib turish, tugatish va litsenziyani bekor qilish “Litsenziyalash, ruxsat berish va xabardor qilish tartib-taomillari toʻgʻrisida”gi Oʻzbekiston Respublikasi Qonunining 32 — 34-moddalarida nazarda tutilgan holatlarda va tartibda amalga oshiriladi.

7-bob. Litsenziyaning amal qilishini toʻxtatib turish, tugatish va litsenziyani bekor qilish

63. Litsenziyaning amal qilishini toʻxtatib turish, tugatish va litsenziyani bekor qilish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 22 — 24-moddalarida nazarda tutilgan holatlarda va tartibda amalga oshiriladi.

64. Litsenziyaning amal qilish muddati toʻxtatilgan yoki tugatilgan sanadan boshlab, erkin omborga tovarlarning yangi turkumlarini joylashtirishga yoʻl qoʻyilmaydi.

65. Erkin omborni tugatish toʻgʻrisida qaror qabul qilgan sanadan boshlab, erkin ombor bojxona rejimi ostida joylashtirilgan va bunday omborda saqlanayotgan tovarlar vaqtincha saqlash bojxona rejimida saqlanayotgan tovarlar sifatida qaraladi.

Tugatilayotgan erkin omborda tovarlar va transport vositalarining vaqtincha saqlash rejimida boʻlishining umumiy muddati u tugatilayotgan sanadan boshlab, bir yuz sakson kalendar kunidan ortiq boʻlishi mumkin emas.

66. Litsenziat sudning litsenziya amal qilishi tugatilishi yoki uning bekor qilinishi toʻgʻrisidagi qarorini olgan sanadan boshlab, uch kun muddatda litsenziyalovchi organga litsenziya bekor qilinadigan yoki amal qilishi tugatiladigan kunda, tugatilayotgan erkin omborda saqlanayotgan tovarlar toʻgʻrisida Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi tomonidan tasdiqlangan shaklda toʻliq hisobot taqdim etadi.

67. Litsenziyalovchi organ litsenziyaning amal qilishi tugatilgan yoki litsenziya bekor qilingan sanadan boshlab, yetti kun muddatdan kechikmay tugatilayotgan erkin omborda saqlanayotgan tovarlarni xatlovdan oʻtkazadi.

68. Erkin ombor tugatilgan taqdirda, unda saqlanayotgan tovarlar boshqa erkin omborga oʻtkazilishi yoki tovarni erkin omborga joylashtirgan shaxs yoxud uning vakolatli shaxsi tomonidan:

litsenziya bekor qilinganda — tovarlar erkin omborga joylashtirilgan sanadan boshlab;

boshqa holatlarda — tugatilgan sanadan boshlab, boshqa bojxona rejimiga joylashtirilishi kerak.

69. Litsenziyaning amal qilishi tugatilishi munosabati bilan erkin ombor tugatilgan taqdirda, litsenziatdan tugatish sanasidan eʼtiboran bojxona organlari tomonidan taʼsis etilgan bojxona omborlari uchun belgilangan tovarlar saqlanganligi uchun bojxona yigʻimlari undiriladi.

Litsenziya bekor qilinganligi munosabati bilan erkin ombor tugatilgan taqdirda, litsenziat olib kirilgan, shu jumladan chiqarib yuborilgan tovarlar turgan butun davrga bojxona organlari tomonidan taʼsis etilgan bojxona omborlari uchun belgilangan tovarlar saqlanganligi uchun bojxona yigʻimlarini toʻlashi shart.

70. Litsenziyalovchi organning litsenziyaning amal qilishini toʻxtatib turish va litsenziyani bekor qilish toʻgʻrisidagi qarori yuzasidan sudga shikoyat qilish mumkin. Sud litsenziyaning amal qilishini toʻxtatib turish va litsenziyani bekor qilishni asossiz deb topgan taqdirda, litsenziyalovchi organ litsenziat oldida unga yetkazilgan zarar miqdorida javob beradi.

8-bob. Litsenziyalar reyestrini yuritish

71. Litsenziyalovchi organ berilgan litsenziyalar reyestrini elektron koʻrinishda yuritadi.

Litsenziyalar reyestrida quyidagilar koʻrsatiladi:

yuridik shaxs — litsenziatning nomi, tashkiliy-huquqiy shakli, pochta manzili, STIR raqami, rahbarining F.I.Sh., telefon (faks);

amalga oshirayotgan faoliyat turi;

litsenziyaning berilgan sanasi va tartib raqami;

erkin ombor joylashgan joy;

binolar va (yoki) ochiq maydonchalar hajmi va maydoni hamda egalik shakli va amal qilish muddati;

bojxona toʻlovlarini taʼminlash miqdori, shakli va amal qilish muddati;

erkin ombor biriktirilgan bojxona organining tashqi iqtisodiy faoliyat bojxona posti;

litsenziyalarni qayta rasmiylashtirish, toʻxtatib turish, qayta tiklash, tugatish, ularni bekor qilish asoslari hamda sanalari;

erkin omborda yonish va portlash xavfi yuqori boʻlgan kimyoviy moddalarni (mahsulotlarni) saqlash uchun obyektning (omborning) yongʻin va sanoat xavfsizligi talablariga muvofiqligi yuzasidan olingan xulosa raqami va sanasi;

erkin omborda dori vositalari va tibbiy buyumlarni saqlash uchun berilgan (“Zarur saqlash amaliyoti — GSP” talablari) sertifikatning raqami hamda sanasi.

72. Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi har yarim yilda kamida bir marta rasmiy veb-saytda litsenziyalar yigʻma reyestri eʼlon qilinishini taʼminlaydi.

73. Litsenziyalarning reyestrlarida mavjud boʻlgan maʼlumotlar tanishib chiqish uchun ochiq boʻladi.

9-bob. Davlat bojini va davlat xizmati koʻrsatilgani uchun yigʻimni toʻlash tartibi

74. Faoliyat turiga litsenziya berilganligi uchun “Davlat boji toʻgʻrisida”gi Oʻzbekiston Respublikasining Qonuni bilan tasdiqlangan Davlat boji stavkalari miqdorlarining 22-bandiga muvofiq davlat boji undiriladi.

Erkin ombor binolarining hajmi va (yoki) ochiq maydonchalari kengayishi, qisqarishi, uning tashkil etilgan hududdagi (manzildagi) joylashgan joyi oʻzgarishi munosabati bilan litsenziya oʻzgartirilganda, davlat boji mazkur bandning birinchi xatboshisida koʻrsatilgan toʻlanadigan summaning ellik foizi miqdorida undiriladi.

Litsenziya qayta rasmiylashtirilayotganda, davlat boji undirilmaydi.

75. Litsenziat oʻzgartirilgan, uning nomi yoki joylashgan joyi (pochta manzili) oʻzgarganda, litsenziat yoki uning huquqiy vorisi qayta roʻyxatdan oʻtkazilishi munosabati bilan litsenziyani qayta rasmiylashtirishda davlat boji undirilmaydi.

76. Litsenziya berish toʻgʻrisidagi arizani koʻrib chiqqanlik uchun bazaviy hisoblash miqdorining ellik foizi miqdorida yigʻim undiriladi.

Litsenziya qayta rasmiylashtirilayotganda va (yoki) oʻzgartirilayotganda, litsenziya berish toʻgʻrisidagi arizani koʻrib chiqqanlik uchun toʻlanadigan summaning ellik foizi miqdorida yigʻim undiriladi.

77. Davlat bojlari va yigʻimlar summasi quyidagi tartibda taqsimlanadi:

10 foizi — Oʻzbekiston Respublikasi Adliya vazirligining Davlat xizmatlarini rivojlantirish jamgʻarmasining shaxsiy hisobvaragʻiga;

11,25 foizi — Axborot-kommunikatsiya texnologiyalarini rivojlantirish jamgʻarmasining elektron hukumat va raqamli iqtisodiyotning idoralararo loyihalarini moliyalashtirish boʻyicha maxsus hisobvaragʻiga;

qolgan davlat boji summasi — toʻliq miqdorda Oʻzbekiston Respublikasi Davlat budjetiga;

qolgan yigʻimlar summasi — toʻliq miqdorda Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasining maxsus jamgʻarmasiga oʻtkaziladi.

78. Litsenziya berilgani uchun davlat boji va davlati xizmati koʻrsatilgani uchun yigʻim toʻlanganligini tasdiqlash axborot-kommunikatsiya tizimlari orqali amalga oshiriladi.

Litsenziya berish uchun davlat bojini va davlat xizmatlari koʻrsatish uchun yigʻimni toʻlamaslik davlat xizmati koʻrsatishni rad etish uchun asos hisoblanadi.

10-bob. Litsenziatning javobgarligi. Bojxona toʻlovlari toʻlanishini taʼminlash

79. Erkin omborda tovarlar saqlanishi talablari va shartlariga rioya etilishi uchun litsenziat tovar erkin omborda saqlash uchun qabul qilib olingan paytdan boshlab javob beradi, bu omborxona hujjatini (ombor guvohnomasi, tovarlarni qabul qilish-topshirish dalolatnomasi va boshqalarni) rasmiylashtirish hamda tovarning erkin omborga qabul qilib olinganligi toʻgʻrisidagi axborotni Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasining axborot tizimiga kiritish orqali tasdiqlanadi.

80. Erkin omborda yongʻin xavfsizligi va sanitariya talablariga rioya etilishi uchun litsenziat javob beradi.

81. Erkin ombor bojxona rejimiga joylashtirilgan va erkin omborda saqlanayotgan tovarlarga nisbatan Oʻzbekiston Respublikasi Bojxona kodeksiga muvofiq bojxona toʻlovlarining toʻlanishi uchun litsenziat javobgar hisoblanadi.

82. Litsenziat tomonidan bojxona toʻlovlari toʻlanishini taʼminlash belgilangan talablarga muvofiq boʻlishi va quyidagi holatlarda bojxona toʻlovlari toʻlanishi taʼminlanishini nazarda tutishi kerak:

erkin omborda saqlanayotgan tovarlarning bojxona organining ruxsatisiz berib yuborilishi yoki yoʻqolishi;

litsenziatning xohishiga koʻra yoxud litsenziya bekor qilingach yoki litsenziyaning amal qilishi tugatilgan erkin omborning tugatilishi;

bojxona toʻlovlari toʻlanishi uchun litsenziat javobgar boʻladigan, bojxona haqidagi qonun hujjatlarida nazarda tutiladigan boshqa holatlar.

83. Erkin ombor sifatida ochiq maydoncha yoki binoning foydali hajmi uchun soʻrovnoma berilsa, bojxona toʻlovlari toʻlanishini taʼminlash summasi maydonchadan kelib chiqib 1 m2 maydon uchun bazaviy hisoblash miqdorining 15 baravari miqdorida yoki 1m3 bino hajmi uchun bazaviy hisoblash miqdorining 3 baravari miqdorida, tegishli ravishda bazaviy hisoblash miqdorining 6000 baravaridan kam boʻlmagan miqdorda hisoblab chiqiladi.

Bunda binoning foydali hajmi talabgor yoki litsenziat tomonidan yaxlit toʻsiq bilan ajratiladi va litsenziyalovchi organ tomonidan litsenziyalash vaqtida belgilanadi.

Litsenziat erkin ombor boʻyicha taqdim etilgan bojxona toʻlovlari toʻlanishini taʼminlovchi hujjatning amal qilish muddati tugashidan bir oy oldin yoki bazaviy hisoblash miqdori oshgan taqdirda, ushbu miqdor oshgan kundan eʼtiboran bir oy muddatda mazkur Reglamentga 3-ilovadagi 3-shaklga muvofiq bojxona toʻlovlari toʻlanishini taʼminlovchi hujjat kiritilgan soʻrovnomani toʻldirish orqali maxsus elektron tizim yoki YIDXP orqali bojxona toʻlovlari toʻlanishini taʼminlash summasiga tegishli tuzatishlar kiritish boʻyicha murojaat qilishi shart.

Litsenziyalovchi organ bojxona toʻlovlari toʻlanishini taʼminlovchi hujjat kiritilgan soʻrovnomani olgan kundan eʼtiboran oʻn kun muddatda ushbu hujjatni bojxona toʻlovlari toʻlanishini taʼminlash vositasi sifatida qabul qiladi yoki rad etadi va bu haqida xabarnoma yuboradi.

Quyidagi hollarda bojxona toʻlovlari toʻlanishini taʼminlovchi hujjatning bojxona toʻlovlari toʻlanishini taʼminlash vositasi sifatida qabul qilinishi rad etiladi:

bojxona toʻlovlari toʻlanishini taʼminlovchi hujjatda notoʻgʻri maʼlumotlar koʻrsatilganda;

bojxona toʻlovlari toʻlanishini taʼminlovchi hujjatni rasmiylashtirishga asos boʻlgan shartnoma taqdim etilmaganda;

bojxona toʻlovlari toʻlanishini taʼminlovchi hujjatda koʻrsatilgan summa miqdori Bojxona kodeksining 338-moddasida koʻrsatilgan miqdordan kam boʻlganda;

bojxona toʻlovlari toʻlanishini taʼminlovchi hujjat shartlari Bojxona kodeksining 344 va 345-moddalarida belgilangan, toʻlanishi lozim boʻlgan bojxona toʻlovlarining summasi va foizlar qonun hujjatlariga muvofiq bojxona organi tomonidan soʻzsiz tartibda undirib olinishi talablariga zid boʻlganda.

84. Litsenziat, agar tovarlar faqat yengib boʻlmas kuch taʼsiri oqibatida yoki saqlash va sotishning normal sharoitlarida tabiiy kamayish tufayli yoki qaytarib boʻlmaydigan tarzda tabiiy ravishda yoʻqolgan taqdirdagina, bojxona bojlari toʻlanishi uchun javob bermaydi.

11-bob. Yakunlovchi qoidalar

85. Litsenziyalovchi organ oʻz faoliyatini amalga oshirishi natijasida olingan maʼlumotlarning sir saqlanishini taʼminlaydi.

86. Oʻzbekiston Respublikasi Adliya vazirligi huzuridagi Davlat xizmatlari agentligi Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi bilan hamkorlikda ushbu Reglament talablari ijrosi boʻyicha davlat organlari va boshqa tashkilotlarning faoliyati yuzasidan, shu jumladan maxsus elektron tizim yoki YIDXP orqali doimiy nazoratni amalga oshiradi va monitoring olib boradi.

87. Litsenziya daʼvogari davlat organlari va boshqa tashkilotlar xodimlarining xatti-harakatlari yuzasidan qonun hujjatlarida belgilangan tartibda shikoyat qilishlari mumkin.

88. Mazkur Reglament talablarining buzilishida aybdor boʻlgan shaxslar qonun hujjatlarida belgilangan tartibda javob beradilar.

Erkin ombor faoliyatini litsenziyalash yuzasidan davlat xizmatlarini koʻrsatishning maʼmuriy reglamentiga 1-ILOVA

(1-ilovaning matni Oʻzbekiston Respublikasi Vazirlar Mahkamasining 2023-yil 4-sentabrdagi 443-sonli qarori tahririda — Qonunchilik maʼlumotlari milliy bazasi, 05.09.2023-y., 09/23/443/0677-son — 2023-yil 6-dekabrdan kuchga kiradi)

Erkin ombor faoliyatini litsenziyalash yuzasidan davlat xizmatlarini koʻrsatishning maʼmuriy reglamentiga 2-ILOVA

Erkin ombor faoliyatini litsenziyalash jarayonida axborot-kommunikatsiya texnologiyalarini qoʻllagan holda, litsenziyani elektron shaklda rasmiylashtirish ishlarini amalga oshirish

SXEMASI

Bosqichlar Subyektlar Tadbirlar Bajarish muddatlari 1-bosqich Talabgor Litsenziya olish uchun maxsus elektron tizim yoki Yagona interaktiv davlat xizmatlari portali orqali soʻrovnoma toʻldiradi. Xohishiga koʻra 2-bosqich Maxsus elektron tizim yoki Yagona interaktiv davlat xizmatlari portali Soʻrovnomani litsenziyalovchi organga (Iqtisodiyot va moliya vazirligi huzuridagi Bojxona qoʻmitasining Qoraqalpogʻiston Respublikasi, viloyatlar, Toshkent shahar boʻyicha boshqarmalari, “Toshkent-AERO” ixtisoslashtirilgan bojxona kompleksiga) yuboradi. Avtomatik tarzda 3-bosqich Litsenziyalovchi organ Hujjatlarni koʻrib chiqish uchun ekspert komissiyasiga kiritadi. Hujjatlar qabul qilingan kunda 4-bosqich Ekspert komissiyasi Hujjatlarni litsenziyalash talablari va shartlariga rioya etilishini oʻrganish uchun bevosita bojxona omborini tashkil etish joyiga chiqqan holda koʻrib chiqadi, talabgorning litsenziyalash talablari va shartlariga mosligi toʻgʻrisida ekspert xulosasini tayyorlaydi. 1. Hujjatlar qabul qilingan kundan boshlab 15 ish kunidan ortiq boʻlmagan muddatda 2. Hujjat takroran taqdim egilganda, 2 ish kuni ichida 5-bosqich Litsenziyalovchi organ 1. Ekspert komissiyasining xulosasi asosida litsenziya berish yoki litsenziya berishni rad etish toʻgʻrisida qaror qabul qiladi. 1. 3 ish kuni ichida 2. Qabul qilingan qaror toʻgʻrisida talabgorga maxsus elektron tizim yoki Yagona interaktiv davlat xizmatlari portali orqali: litsenziya berish toʻgʻrisida qaror qabul qilinganda, davlat bojini amalga oshirish toʻgʻrisida; litsenziya berishni rad etish toʻgʻrisida qaror qabul qilinganda, rad etishning sabablari va talabgor koʻrsatilgan sabablarni bartaraf qilib, hujjatlarni koʻrib chiqish uchun takroran taqdim etishi mumkin boʻlgan muddat koʻrsatilgan xabarnomani yuboradi. 2. Qaror qabul qilingandan soʻng 1 ish kun ichida 6-bosqich Talabgor Litsenziya berish haqidagi xabarnoma kelib tushgandan soʻng litsenziya uchun davlat bojini toʻlaydi. 30 kun mobaynida 7-bosqich Litsenziyalovchi organ Davlat boji toʻlanmagan taqdirda, litsenziyalovchi organ litsenziyani bekor qilish toʻgʻrisida qaror qabul qilishga haqlidir. Ijobiy qaror mavjudligi va litsenziya berish uchun davlat boji toʻlangandan soʻng QR-kod bilan himoyalangan litsenziyani elektron raqamli imzo bilan tasdiqlab rasmiylashtiradi va litsenziyani talabgorga maxsus elektron tizim yoki Yagona interaktiv davlat xizmatlari portali orqali yuboradi. 1. Litsenziya berish toʻgʻrisidagi xabarnoma yuborilgan paytdan eʼtiboran 30 kun oʻtgach 2. 3 ish kunida

Erkin ombor faoliyatini litsenziyalash yuzasidan davlat xizmatlarini koʻrsatishning maʼmuriy reglamentiga 3-ILOVA

(3-ilova Oʻzbekiston Respublikasi Vazirlar Mahkamasining 2022-yil 5-sentabrdagi 487-sonli qarori tahririda — Qonunchilik maʼlumotlari milliy bazasi, 05.09.2022-y., 09/22/487/0794-son)

Erkin ombor faoliyatini litsenziyalash yuzasidan davlat xizmatlarini koʻrsatishning maʼmuriy reglamentiga 4-ILOVA

Erkin ombor faoliyatini litsenziyalash

PASPORTI*

1. Litsenziya nomi Erkin ombor faoliyatini amalga oshirish uchun litsenziya. 2. Litsenziyalanadigan faoliyat turi Erkin ombor faoliyati. 3. Amalga oshirish mexanizmini tartibga soluvchi normativ-huquqiy hujjat Oʻzbekiston Respublikasi Vazirlar Mahkamasining “Bojxona ombori, erkin ombor va boj olinmaydigan savdo doʻkoni faoliyatini litsenziyalash yuzasidan davlat xizmatlarini koʻrsatishning maʼmuriy reglamentlarini tasdiqlash toʻgʻrisida” 2020-yil 9-apreldagi 210-son qarori. 4. Ariza beruvchilar toifasi Yuridik shaxs — Oʻzbekiston Respublikasi rezidenti. 5. Litsenziyalovchi organ Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasining Qoraqalpogʻiston Respublikasi, viloyatlar, Toshkent shahar boʻyicha boshqarmalari, “Toshkent-AERO” ixtisoslashtirilgan bojxona kompleksi. 6. Hujjatlarni topshirish tartibi “Litsenziya” axborot tizimi yoki Yagona interaktiv davlat xizmatlari portali orqali. 7. Litsenziyani olish uchun taqdim qilinadigan hujjatlar Litsenziya olish uchun quyidagi hujjatlar taqdim etiladi: talabgor ega boʻlgan va erkin ombor sifatida foydalanish uchun moʻljallangan binolar va (yoki) ochiq maydonchalar, ularning oʻlchamlari, hajmi va (yoki) maydoni, ular joylashgan joy, ularning jihozlanishi, videokuzatuv tizimi, asbob-uskunalar va moddiy-texnika bilan taʼminlanganligi hamda mulk huquqi, ashyoviy huquqlar yoki muddatlarini koʻrsatgan holda ijara asosida tegishliligi toʻgʻrisidagi maʼlumotlar; avtomobil va temir yoʻllar koʻrsatilgan holda, erkin ombor uchun moʻljallangan hudud (shuningdek, yondosh) hamda binolar va (yoki) ochiq maydonchalarning sifatli chizmasi (oʻlchamlari koʻrsatilgan bojxona nazorati zonasi, qoʻriqlanadigan hudud bilan birga) va kadastr yigʻmajildidagi tarhi; Oʻzbekiston Respublikasi Bojxona kodeksiga muvofiq bojxona toʻlovlari toʻlanganini tasdiqlovchi hujjat. 8. Arizani koʻrib chiqish uchun toʻlanadigan yigʻim miqdori Koʻrib chiqqanlik uchun bazaviy hisoblash miqdorining 50 foizi. Litsenziya qayta rasmiylashtirilayotganda va (yoki) oʻzgartirilayotganda, litsenziya berish toʻgʻrisidagi arizani koʻrib chiqqanlik uchun toʻlanadigan summaning 50 foizi miqdorida. 9. Litsenziya berilganligi uchun davlat boji miqdori Bazaviy hisoblash miqdorining 5 baravari. Litsenziya oʻzgartirilganda. litsenziya berilganligi uchun toʻlanadigan bojning ellik foizi miqdorida. Litsenziya qayta rasmiylashtirilayotganda, davlat boji undirilmaydi. 10. Arizani koʻrib chiqish va qaror qabul qilish muddatlari Talabgorning soʻrovnomasi barcha zarur hujjatlar bilan birgalikda kelib tushgan kundan boshlab, 20 ish kuni. 11. Litsenziya talablari va shartlari a) Erkin ombor hududi bojxona nazorati zonasi hisoblanadi. Erkin ombor hududiga qoʻriqlanadigan va oʻrnatilgan tartibda belgilab olingan, tovarlarni bojxona nazorati ostida yetkazib berishni tugallash uchun zarur boʻlgan vaqtda tovarlarni tashiyotgan transport vositalari toʻxtab turishi uchun jihozlangan hudud tutashgan boʻlishi kerak. Koʻrsatib oʻtilgan hudud ham bojxona nazorati zonasi hisoblanadi. Bojxona nazorati ostidagi tovarlarni tashiydigan transport vositalari ushbu bojxona nazorati zonasiga sutkaning istalgan vaqtida kirishi mumkin. Temir yoʻl va avtomobil transport uzellari va transport magistrallaridan olib boruvchi, transport vositalari harakati uchun yetarli kenglikka ega boʻlgan yoʻl boʻylab erkin omborgacha boʻlgan masofa 3 km.dan oshmasligi kerak. b) Erkin ombor sifatida foydalanish uchun moʻljallangan binolar va (yoki) ochiq maydonchalar saqlanayotgan tovarlar va transport vositalariga nisbatan bojxona nazorati amalga oshirilishi, ularning saqlanishi taʼminlanadigan tarzda joylashtirilishi, jihozlanishi va asbob-uskunalar bilan taʼminlanishi kerak hamda quyidagilarni istisno etishi lozim: erkin ombor hududiga bojxona nazorati zonasiga va tovarlarga begona shaxslarning (ombor xodimlari boʻlmagan, tovarlarga nisbatan vakolatga ega boʻlmagan) yaqinlashishini; tovarlarning bojxona nazoratini chetlab olib kirilishini va olib chiqilishini. Agar binoning yoki inshootning yoxud ochiq maydonning bir qismi erkin ombor hisoblansa, unga borish yoʻllari va tutashib ketadigan butun hudud bojxona nazorati ostidagi tovarlarga begona shaxslarning yaqinlashishini istisno etadigan tarzda jihozlanishi kerak. v) Erkin ombor binolari va (yoki) ochiq maydonchalari: yer ustidagi imoratlarda yoki inshootlarda joylashtirilishi; qoʻriqlash va yongin nazorati signalizatsiyalari, sodir boʻlayotgan voqealar boʻyicha har tomondan olingan video maʼlumotlarni uch oy davomida koʻrsatish imkoniga ega boʻlgan, litsenziyalovchi organ tomonidan belgilangan joylarda oʻrnatilgan, kunu-tun ishlaydigan videokuzatuv vositalari bilan jihozlangan boʻlishi; yongʻin xavfsizligi talablariga mos boʻlgan yongʻinni oʻchirish tizimi va vositalariga ega boʻlishi kerak. g) Erkin omborga bevosita tutashib ketgan va bojxona nazorati zonasi hisoblangan hudud quyidagi talablarga muvofiq boʻlishi kerak: erkin omborga tutashib ketgan butun hudud perimetri boʻyicha balandligi 2 metrdan kam boʻlmagan qatʼiy oʻrnatilgan yaxlit toʻsiqlar (uzluksiz temir panjara yoki devor) bilan aylantirib toʻsilgan; ichkarisida erkin omborning qismi hisoblanmagan oʻzga imoratlar va inshootlarga ega boʻlmasligi; ogʻir yukli transportning manyovr (toʻsiqqa chap berish uchun oʻz yoʻnalishini oʻzgartirib bajariladigan harakatlari — qayta tizilish, burilish, qayrilib olish, ortga harakat, aylanib oʻtish) qilish imkoniyatini taʼminlashi; erkin ombor imoratiga eshiklari tomonidan bevosita tutashib ketgan boʻlishi; barcha kirish (chiqish) va (yoki) chiqish (kirish) joylarida oʻzbek, rus va ingliz tillarida “bojxona nazorati zonasi” belgisi qoʻyilgan, olingan tasvirlarni uch oy davomida koʻrsatish hamda bojxona organlariga onlayn uzatish imkoniga ega boʻlgan, kunu-tun ishlaydigan avtotransport vositasining davlat raqami belgisini va temir yoʻl transporti vositasining raqamini aniqlash tizimi bilan jihozlangan nazorat-oʻtkazish punktlari boʻlishi; tovarlarni erkin omborga joylashtirish va undan olib chiqish faqat bojxona nazorati zonasi orqali amalga oshiriladigan tarzda jihozlanishi lozim. d) Erkin ombor va bojxona nazorati zonasi hisoblangan, erkin omborga bevosita tutashib ketgan hudud: umumiy perimetr boʻyicha bir-biridan ajralmagan; balandligi 2 m dan kam boʻlmagan qatʼiy oʻrnatilgan yaxlit toʻsiqlar bilan aylantirib toʻsilgan va barcha kirish (chiqish) va (yoki) chiqish (kirish) joylarida oʻzbek, rus va ingliz tillarida “erkin ombor” belgisi qoʻyilgan holda nazorat-oʻtkazish punktlariga ega boʻlishi kerak. e) Erkin ombor sifatida ishlatish uchun moʻljallangan binolar va (yoki) ochiq maydonchalar yoxud erkin omborga bevosita tutashib ketgan hudud quyidagilarni inobatga olgan holda, bittadan kam boʻlmagan usti yopiq koʻrik maydonchasiga ega boʻlishi kerak: erkin ombor eshiklari tomonidan joylashishi; 40 m²dan kam boʻlmagan maydonga ega boʻlishi; elektr yorugʻi bilan jihozlanishi; sodir boʻlayotgan voqealar boʻyicha har tomondan olingan video maʼlumotlarni uch oy davomida koʻrsatish imkoniga ega boʻlgan, litsenziyalovchi organ tomonidan belgilangan joylarda oʻrnatilgan, kunu-tun ishlaydigan videokuzatuv vositalari bilan jihozlangan boʻlishi; tovarlarni tushirish-ortish uchun koʻchma va (yoki) yerdagi estakada (yuklash-tushirish ishlarini amalga oshirish uchun yer yuzasidan maʼlum balandlikda quriladigan yoki oʻrnatiladigan toʻsinsimon konstruksiyalardan iborat koʻpriksimon inshoot) boʻlishi. yo) Erkin ombor doimiy ravishda soz, ishchi holatdagi va uning normal faoliyat koʻrsatish uchun quyidagilar yetarli boʻlishi kerak: ortish-tushirish va transport vositalari; ombor asbob-uskunalari; oʻlchov asboblari, aniqligi va oʻlchash chegaralari erkin omborda saqlashga moʻljallanayotgan tovarlar xususiyatiga muvofiq boʻlgan tovarlarning ogʻirligini oʻlchash vositalari; bojxona organlarining dasturiy taʼminoti bilan mos keladigan tovarlar hisobini yuritadigan avtomatlashtirilgan tizim; erkin ombor sifatida ishlatish uchun moʻljallangan binolarni, ochiq maydonchalarni, erkin omborga bevosita tutashib ketgan butun hududni toʻliq nazorat qilish hamda bojxona organlariga video maʼlumotlarni uzatish, shuningdek, ushbu maʼlumotlarni uch oy davomida saqlash imkoniga ega boʻlgan uzluksiz ishlovchi videokuzatuv tizimi; koʻrik oʻtkazish uchun stol; aptechka (birinchi tibbiy yordam koʻrsatish uchun tibbiyot qutichasi); aloqa vositalari (shu jumladan telefon, maʼlumot uzatish tarmogʻi, Internet); tashkiliy texnika; mebel. j) Erkin omborda va bojxona nazorati zonalari hisoblangan erkin omborga bevosita tutashib ketgan hududda har qanday turdagi chiqindilar va boshqa maishiy axlat toʻplanishi mumkin emas. z) Bojxona organi xodimlari uchun erkin omborda yoki bojxona nazorati zonasida bojxona nazorati va bojxona rasmiylashtiruvini amalga oshirish uchun quyidagilarga javob beradigan bino ajratilishi kerak: 6 m²dan kam boʻlmagan maydonga va 20 m³dan kam boʻlmagan hajmga ega; mavsumiy isitish va sovitish tizimiga ega; doimiy soz holatdagi, bojxona organlarining dasturiy taʼminoti bilan ishlash imkoniga ega boʻlgan kompyuter, printer va nusxa koʻchiradigan apparat, aloqa vositalari (shu jumladan telefon, Internet) bilan jihozlangan; mebel jihozlari bilan taʼminlangan; erkin omborga oʻrnatilgan videokuzatuv tizimiga ulangan. Litsenziat tomonidan ushbu Reglament va qonunchilik hujjatlari talablarining buzilishi natijasida bojxona nazorati ostida boʻlgan tovarlarning yoʻqolishiga yoki boshqacha tarzda shikast yetkazilishiga olib kelsa yoxud boshqa shaxslarga berib yuborilsa, bunday hollarda qoʻpol qoidabuzarlik sodir etilgan deb hisoblanadi. 12. Nazorat tartibi Litsenziya talablari hamda shartlariga rioya etilishini litsenziyalovchi organ tomonidan nazorat qilish ushbu Reglament boʻyicha “xavfni tahlil qilish” tizimi natijalari hamda jismoniy va yuridik shaxslarning qonunchilik buzilishi faktlari toʻgʻrisidagi murojaatlari asosida amalga oshiriladi. Litsenziya talablari va shartlariga rioya etilishi yuzasidan nazoratni amalga oshirishda litsenziyalovchi organ oʻz vakolatlari doirasida quyidagi huquqlarga ega: litsenziat tomonidan ushbu Reglamentda belgilangan litsenziya talablari va shartlariga rioya etilishini tekshirishni Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil bilan kelishilgan, qonunchilikda belgilangan tartibda joyiga chiqqan holda oʻtkazish; litsenziya talablari va shartlariga rioya etilishini tekshirish davomida paydo boʻladigan masalalar yuzasidan litsenziatdan zarur maʼlumotlarni soʻrash va olish; tekshirishlar natijalari asosida litsenziat tomonidan litsenziya talablari va shartlarining aniq buzilishlarini koʻrsatgan holda, dalolatnomalar (maʼlumotnomalar) tuzish; litsenziatga aniqlangan buzilishlarni bartaraf etish majburiyatini yuklovchi qarorlar chiqarish, bunday buzilishlarni bartaraf etish muddatlarini belgilash; litsenziyaning amal qilishini toʻxtatib turish yoki litsenziyani bekor qilish toʻgʻrisida qonun hujjatlarida belgilangan tartibda qaror chiqarish yoxud sudga murojaat qilish. Erkin omborda bojxona nazorati ostida boʻlgan tovarlarga Oʻzbekiston Respublikasi Bojxona kodeksiga muvofiq, bojxona nazorat shakllarini qoʻllash Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil bilan kelishishni talab etmaydi. 13. Bojxona toʻlovlari toʻlanishini taʼminlash Bojxona toʻlovlari toʻlanishini taʼminlash summasi 1 m² ochiq maydon uchun bazaviy hisoblash miqdorining (keyingi oʻrinlarda — BHM) 15 baravari miqdorida yoki 1 m³ bino hajmi uchun BHMning 3 baravari miqdorida, lekin BHMning 6 000 baravaridan kam boʻlmagan miqdorda hisoblanadi. Litsenziat taqdim etilgan bojxona toʻlovlari toʻlanishini taʼminlovchi hujjatning amal qilish muddati tugashidan bir oy oldin yoki BHM oshgan kundan bir oy muddatda bojxona toʻlovlari toʻlanishini taʼminlash summasiga tegishli tuzatishlar kiritish boʻyicha murojaat qilishi shart. 14. Litsenziya berishda kelishiladigan organlar 1. Oʻzbekiston Respublikasi Favqulodda vaziyatlar vazirligidan: erkin ombor hududining yongʻin xavfsizligi talablariga muvofiqligi toʻgʻrisidagi xulosa (10 ish kuni ichida); agar erkin omborda yonish va portlash xavfi yuqori boʻlgan kimyoviy moddalarni (mahsulotlarni) saqlash koʻzda tutilsa, obyektning (omborning) yongʻin va sanoat xavfsizligi talablariga muvofiqligi yuzasidan xulosa (10 ish kuni ichida). 2. Oʻzbekiston Respublikasi Sogʻliqni saqlash vazirligi huzuridagi Sanitariya-epidemiologik osoyishtalik va jamoat salomatligi qoʻmitasidan — erkin ombor hududining sanitariya-epidemiologik normalariga muvofiqligi toʻgʻrisidagi xulosa (10 ish kuni ichida). 3. Oʻzbekiston Respublikasi Sogʻliqni saqlash vazirligi huzuridagi Farmatsevtika tarmogʻini rivojlantirish agentligining “Zarur amaliyotlar markazi” DMdan — agar erkin omborda dori vositalari va tibbiy buyumlarni (TIF TNning 30 guruhi) saqlash koʻzda tutilsa, “Zarur saqlash amaliyoti — GSP” sertifikati talablariga muvofiqligi yuzasidan xulosa (10 ish kuni ichida). 15. Litsenziyaning amal qilish muddati Cheklanmagan.

Izoh

* Erkin ombor faoliyatini litsenziyalash pasporti mazkur faoliyatni tartibga soluvchi qonunchilik hujjatlarida belgilangan boshqa norma va qoidalarning talabgor va litsenziat tomonidan bajarilishini istisno etmaydi.

Vazirlar Mahkamasining 2020-yil 9-apreldagi 210-son qaroriga 3-ILOVA

Boj olinmaydigan savdo doʻkoni faoliyatini litsenziyalash yuzasidan davlat xizmatlari koʻrsatishning maʼmuriy reglamenti

1-bob. Umumiy qoidalar

1. Ushbu Reglament boj olinmaydigan savdo doʻkoni faoliyatini litsenziyalash yuzasidan davlat xizmatlari koʻrsatish tartibini belgilaydi.

2. Ushbu Reglamentda quyidagi asosiy tushunchalardan foydalaniladi:

boj olinmaydigan savdo doʻkoni — tovarlarni boj olinmaydigan savdo bojxona rejimi talablariga va shartlariga muvofiq bojxona nazorati ostida sotish uchun moʻljallangan savdo obyektidir. Boj olinmaydigan savdo doʻkonining hududi savdo zallarining, yordamchi binolarning va doʻkon omborining hududlarini oʻz ichiga oladi.

Oʻzbekiston Respublikasining Davlat chegarasini kesib oʻtadigan jismoniy shaxslar uchun boj olinmaydigan savdo doʻkoni — bojxona hududiga kirib kelayotgan va bojxona hududidan tashqariga chiqib ketayotgan jismoniy shaxslarga bojxona hududiga olib kirilgan chet el tovarlarini yoki Oʻzbekiston tovarlarini Oʻzbekiston Respublikasining milliy valyutasida va (yoki) chet el valyutasida sotishga, shu jumladan joyning oʻzida isteʼmol qilish uchun chakana sotishga moʻljallangan;

Oʻzbekiston Respublikasi Tashqi ishlar vazirligida akkreditatsiya qilingan chet ellik shaxslar uchun boj olinmaydigan savdo doʻkoni — chet davlatlarning Oʻzbekiston Respublikasi Tashqi ishlar vazirligida belgilangan tartibda akkreditatsiya qilingan diplomatik vakolatxonalari va konsullik muassasalariga, xalqaro tashkilotlarning vakolatxonalariga va ularga tenglashtirilgan vakolatxonalarga, ushbu tashkilotlarning chet ellik xodimlariga, shuningdek, ular bilan birga yashaydigan va Oʻzbekiston Respublikasi fuqarosi boʻlmagan oila aʼzolariga bojxona hududiga olib kirilgan chet el tovarlarini Oʻzbekiston Respublikasining milliy valyutasida va (yoki) chet el valyutasida realizatsiya qilishga moʻljallangan;

Oʻzbekiston Respublikasi hududida vaqtincha boʻlib turgan chet ellik shaxslar uchun boj olinmaydigan savdo doʻkoni — Oʻzbekiston Respublikasi hududida vaqtincha boʻlib turgan chet ellik shaxslar uchun boj olinmaydigan, bojxona hududiga olib kirilgan chet el tovarlarini yoki Oʻzbekiston Respublikasi tovarlarini Oʻzbekiston Respublikasining milliy valyutasida va (yoki) chet el valyutasida chakana tartibda realizatsiya qilish uchun moʻljallangan.

talabgor — litsenziyalovchi organga boj olinmaydigan savdo doʻkoni faoliyatini amalga oshirish uchun litsenziya berish toʻgʻrisidagi soʻrovnoma bilan murojaat etgan yuridik shaxs — Oʻzbekiston Respublikasi rezidenti;

litsenziya — litsenziyalovchi organ tomonidan berilgan, litsenziya talablari va shartlariga soʻzsiz rioya etgan holda boj olinmaydigan savdo doʻkoni faoliyatini amalga oshirish uchun ruxsatnoma (huquq);

litsenziyalovchi organ — Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasining Qoraqalpogʻiston Respublikasi, viloyatlar, Toshkent shahar boʻyicha boshqarmalari, “Toshkent-AERO” ixtisoslashtirilgan bojxona kompleksi;

litsenziat — boj olinmaydigan savdo doʻkoni faoliyatini amalga oshirishga litsenziyasi boʻlgan yuridik shaxs — Oʻzbekiston Respublikasi rezidenti;

maxsus elektron tizim — litsenziyalashda vakolatli organlarning idoralararo elektron hamkorlik qilishi, shuningdek litsenziya talablari hamda shartlari bajarilishining monitoringini oʻtkazish jarayonlarini qamrab oladigan, jismoniy va yuridik shaxslar uchun ochiq boʻlgan “Litsenziya” axborot tizimi;

soʻrovnoma — litsenziyalash faoliyati yuzasidan yuridik shaxsning ariza koʻrinishidagi murojaati.

3. Respublikaga jismoniy shaxslar tomonidan bojxona toʻlovlari solinmaydigan tovarlarni olib kirishning cheklangan normalari jismoniy shaxs tomonidan Oʻzbekiston Respublikasi tashqarisidan olib kiriladigan va uning tomonidan Oʻzbekiston Respublikasining bojxona hududiga kirishda boj olinmaydigan savdo doʻkonlaridan sotib olingan tovarlarning jamiga nisbatan qoʻllaniladi.

5. Oʻzbekiston Respublikasining davlat chegarasini kesib oʻtadigan jismoniy shaxslar uchun boj olinmaydigan savdo doʻkoni xalqaro aloqa uchun ochilgan aeroportlarda, portlarda va jismoniy shaxslar tomonidan chegarani kesib oʻtishga moʻljallangan Oʻzbekiston Respublikasi davlat chegarasi orqali boshqa oʻtkazish punktlarida ochilishi va faoliyat koʻrsatishi mumkin.

Oʻzbekiston Respublikasining davlat chegarasini kesib oʻtadigan jismoniy shaxslar uchun boj olinmaydigan savdo doʻkonini ochish Oʻzbekiston Respublikasining Davlat chegarasi orqali oʻtkazish punktlarida rejim belgilanishi tartibiga muvofiq va Oʻzbekiston Respublikasi Davlat xavfsizlik xizmati Chegara qoʻshinlari bilan kelishgan holda amalga oshiriladi.

Bunda kelishish talabgor tomonidan belgilangan tartibda Oʻzbekiston Respublikasi Davlat xavfsizlik xizmati Chegara qoʻshinlariga murojaati orqali amalga oshiriladi.

Oʻzbekiston Respublikasi Tashqi ishlar vazirligida akkreditatsiya qilingan chet ellik shaxslar uchun boj olinmaydigan savdo doʻkonlari Toshkent shahrida va davlat bojxona xizmati organlari tomonidan belgilanadigan joylarda ochilishi hamda faoliyat koʻrsatishi mumkin.

Oʻzbekiston Respublikasi hududida vaqtincha boʻlib turgan chet ellik shaxslar uchun boj olinmaydigan savdo doʻkonlari respublikaning tarixiy shaharlari va viloyatlarning maʼmuriy markazlarida Turizm va madaniy meros vazirligini hamda davlat bojxona xizmati organlari tomonidan belgilanadigan joylarda ochilishi hamda faoliyat koʻrsatishi mumkin.

6. Boj olinmaydigan savdo doʻkonida tovarlarni sotish boj olinmaydigan savdo bojxona rejimi shartlari va talablariga muvofiq bojxona nazorati ostida amalga oshiriladi.

Boj olinmaydigan savdo doʻkoni faoliyat koʻrsatishini taʼminlash uchun foydalaniladigan tovarlar boj olinmaydigan savdo bojxona rejimiga joylashtirilmaydi.

7. Oʻzbekiston Respublikasi hududida sotilishi cheklangan tovarlar boj olinmaydigan savdo doʻkoni rejimida qonun hujjatlarida belgilangan tartibda sotilishi mumkin.

Oʻzbekiston Respublikasi Davlat chegarasini kesib oʻtadigan jismoniy shaxslar uchun boj olinmaydigan savdo doʻkonlarida tovarlarni sotish faqat xaridorning shaxsini tasdiqlaydigan hujjat taqdim etilgandan keyin amalga oshiriladi. Bunda davlat reyestriga kiritilgan onlayn nazorat-kassa mashinalari va virtual kassalarning chekida quyidagi maʼlumotlar boʻlishi shart:

chekning tartib raqami;

onlayn-NKMning zavod raqami yoki virtual kassaning seriya raqami;

tadbirkorlik subyektining nomi;

soliq toʻlovchining identifikatsiya raqami (STIR);

pulli hisob-kitoblar amalga oshiriladigan manzil;

tovar nomi;

mahsulotlar (tovar va xizmatlar) yagona elektron milliy katalogi boʻyicha identifikatsiyalash kodi;

mahsulotlarning shtrix kodi;

tovar miqdori;

tovar narxi (qiymati);

toʻlov shakli: milliy valyuta naqd, plastik karta yoki xorijiy valyuta summasi;

toʻlovning jami summasi;

toʻlov sanasi va vaqti;

fiskal modulning takrorlanmaydigan raqami;

fiskal belgi;

berilgan kassa chekining haqiqiyligini tekshirish uchun kamida 30x30 millimetr oʻlchamdagi QR-kod;

reysning raqami va xaridorning samolyotdagi joyi raqami (havoda tashishda).

Kassa cheki maxsus oq qogʻozda yozuvlar qora rangda boʻlishi, shuningdek, chek qogʻozining kengligi 55 millimetrdan va harflar (belgilar) balandligi 2 millimetrdan kam boʻlmasligi lozim.

Oʻzbekiston Respublikasi Tashqi ishlar vazirligida akkreditatsiya qilingan chet ellik shaxslar uchun boj olinmaydigan savdo doʻkonida tovarlarni sotish faqat Oʻzbekiston Respublikasi Tashqi ishlar vazirligida belgilangan tartibda berilgan akkreditatsiya kartochkasi taqdim etilgandan keyin amalga oshiriladi.

Bunda davlat reyestriga kiritilgan onlayn nazorat-kassa mashinalari va virtual kassalarning chekida quyidagi maʼlumotlar boʻlishi shart:

chekning tartib raqami;

onlayn-NKMning zavod raqami yoki virtual kassaning seriya raqami;

litsenziat — tadbirkorlik subyektining nomi;

soliq toʻlovchining identifikatsiya raqami (STIR);

pulli hisob-kitoblar amalga oshiriladigan manzil;

tovar nomi;

Mahsulotlar (tovar va xizmatlar) yagona elektron milliy katalogi boʻyicha identifikatsiyalash kodi;

mahsulotlarning shtrix kodi;

tovar miqdori;

tovar narxi (qiymati);

toʻlov shakli: milliy valyuta naqd, plastik karta yoki xorijiy valyuta summasi;

toʻlovning jami summasi;

toʻlov sanasi va vaqti;

fiskal modulning takrorlanmaydigan raqami;

fiskal belgi;

berilgan kassa chekining haqiqiyligini tekshirish uchun kamida 30x30 millimetr oʻlchamdagi QR-kod;

Oʻzbekiston Respublikasi Tashqi ishlar vazirligida berilgan akkreditatsiya kartochkasining toifasi, raqami, xodimning yoki uning oila aʼzosining familiyasi, ismi va otasining ismi, lavozimi, kartochka kim tomonidan berilganligi va uning amal qilish muddati.

Kassa cheki maxsus oq qogʻozda yozuvlar qora rangda boʻlishi, shuningdek, chek qogʻozining kengligi 55 millimetrdan va harflar (belgilar) balandligi 2 millimetrdan kam boʻlmasligi lozim.

Oʻzbekiston Respublikasi hududida vaqtincha boʻlib turgan chet ellik shaxslar uchun boj olinmaydigan savdo doʻkonlarida tovarlarni sotish faqat xaridorning shaxsini tasdiqlaydigan hujjat va uchib ketish aviachiptasi taqdim etilgandan soʻng amalga oshiriladi.

Boj olinmaydigan savdo doʻkonlaridagi chet el tovarlarining namunalari asosida tanlab olinadi. Tanlangan tovarlar xalqaro aeroportlarda uchib ketish kuni boj olinmaydigan savdo doʻkoni orqali taqdim etiladi.

Bunda davlat reyestriga kiritilgan onlayn nazorat-kassa mashinalari va virtual kassalarning chekida quyidagi maʼlumotlar boʻlishi shart:

chekning tartib raqami;

onlayn-NKMning zavod raqami yoki virtual kassaning seriya raqami;

litsenziat — tadbirkorlik subyektining nomi;

soliq toʻlovchining identifikatsiya raqami (STIR);

pulli hisob-kitoblar amalga oshiriladigan manzil;

tovar nomi;

Mahsulotlar (tovar va xizmatlar) yagona elektron milliy katalogi boʻyicha identifikatsiyalash kodi;

mahsulotlarning shtrix kodi;

tovar miqdori;

tovar narxi (qiymati);

toʻlov shakli: milliy valyuta naqd, plastik karta yoki xorijiy valyuta summasi;

toʻlovning jami summasi;

toʻlov sanasi va vaqti;

fiskal modulning takrorlanmaydigan raqami;

fiskal belgi;

berilgan kassa chekining haqiqiyligini tekshirish uchun kamida 30x30 millimetr oʻlchamdagi QR-kod;

sotib olinayotgan tovarning xalqaro aeroportlarda uchib ketish kuni va boj olinmaydigan savdo doʻkoni orqali taqdim etish joyi.

Kassa cheki maxsus oq qogʻozda yozuvlar qora rangda boʻlishi, shuningdek, chek qogʻozining kengligi 55 millimetrdan va harflar (belgilar) balandligi 2 millimetrdan kam boʻlmasligi lozim.

8. Xorijiy davlatlarning diplomatik vakolatxonalari va konsullik muassasalari, xalqaro tashkilotlarning vakolatxonalari va ularga tenglashtirilgan vakolatxonalar boj olinmaydigan savdo doʻkonlaridan ushbu Reglamentga 2-ilovaga muvofiq shakl boʻyicha ikki nusxada tuziladigan buyurtmanomalar asosida Oʻzbekiston Respublikasi Tashqi ishlar vazirligida akkreditatsiya qilingan chet ellik shaxslar uchun tovarlarni sotib olishlari mumkin.

Buyurtmanomaning bir nusxasi boj olinmaydigan savdo doʻkonida saqlanadi, ikkinchi nusxasi xaridorga qaytariladi.

Buyurtmanomada quyidagi maʼlumotlar boʻlishi kerak:

xorijiy davlatning diplomatik vakolatxonasi yoki konsullik muassasasining, xalqaro tashkilot vakolatxonasining va unga tenglashtirilgan vakolatxonaning nomi;

tovarning nomi, miqdori, bittasining qiymati, umumiy qiymati;

buyurtmanoma tuzilgan sana;

xorijiy davlatning diplomatik vakolatxonasi yoki konsullik muassasasi, xalqaro tashkilot vakolatxonasi va unga tenglashtirilgan vakolatxona boshligʻining familiyasi, ismi, otasining ismi, imzosi;

tovarlarni sotib olish maqsadi.

9. Boj olinmaydigan savdo doʻkonida quyidagilarning sotilishiga ruxsat etilmaydi:

Oʻzbekiston Respublikasining bojxona hududiga olib kelish va undan olib chiqish taqiqlangan tovarlar, shu jumladan olib chiqilishiga litsenziya talab etiladigan tovarlar, rangli va qora metallardan tayyorlangan yuqori darajada qayta ishlangan tayyor buyumlar bundan mustasno;

chakana sotish uchun oʻralgan dori-darmon vositalari (shu jumladan provitaminlar, vitaminlar, gormonlar va antibiotiklar), agar ular vrachning retseptisiz (tayinlovisiz) sotilishi mumkin boʻlmasa;

zargarlik buyumlari ishlab chiqarish uchun litsenziyaga ega boʻlgan mahalliy ishlab chiqaruvchilarning roʻyxatdan oʻtkazilgan shaxsiy tamgʻasiga ega boʻlmagan qimmatbaho metallar va toshlardan yasalgan buyumlar;

Oʻzbekiston Respublikasi hududida aylanishi va sotilishi taqiqlangan tovarlar;

boshqa davlat organlarining nazoratidan oʻtishi kerak boʻlgan tovarlar, ushbu organlarning ruxsatnomasi mavjud boʻlmagan taqdirda;

jismoniy shaxslarning shaxsiy foydalanish yoki isteʼmol qilishi uchun moʻljallanmagan tovarlar;

vazni ogʻir tovarlar (20 kg.dan ortiq ogʻirlikda) va oʻlchami katta tovarlar (uzunligi, kengligi va balandligi oʻlchamlari jami 200 sm.dan ortiq boʻlganda).

Oʻzbekiston Respublikasi Davlat chegarasini kesib oʻtmaydigan jismoniy shaxslarga va Oʻzbekiston Respublikasi Tashqi ishlar vazirligida akkreditatsiya qilinmagan chet ellik shaxslarga boj olinmaydigan savdo doʻkonlarida tovarlar sotishga (sotib olishga) ruxsat berilmaydi.

10. Litsenziya litsenziyalovchi organ tomonidan amal qilish muddati cheklanmagan holda, boj olinmaydigan savdo doʻkoni sifatida foydalanilishi moʻljallangan va mazkur Reglament talablariga muvofiq boʻlgan savdo zallari, yordamchi binolar va ombor (mulk huquqi bilan yoki boshqa ashyoviy huquq bilan) egaligida boʻlgan talabgorga beriladi.

11. Boj olinmaydigan savdo doʻkoni faoliyatini amalga oshirish uchun ushbu Reglamentga 1-ilovaga muvofiq namunaviy (oddiy) litsenziya rasmiylashtiriladi.

12. Litsenziyaning amal qilishi litsenziya berilgan kundan boshlab hisoblanadi.

Litsenziya bilan taʼminlanmagan savdo zallari, yordamchi binolari va omborlardan foydalangan holda tijorat asosida yuklarni saqlashga yoʻl qoʻyilmaydi. Bunday holatlar yuzasidan qonun hujjatlarida nazarda tutilgan huquqiy taʼsir choralari qoʻllaniladi.

13. Quyidagilar:

talabgorning soʻrovnomasiga koʻra litsenziyalovchi organ qaroriga binoan — faoliyat turiga litsenziya;

mazkur Reglamentning 5-bobida nazarda tutilgan holatlarda oʻzgartirilgan talabgorning soʻrovnomasiga koʻra — oʻzgartirilgan litsenziya;

mazkur Reglamentning 5-bobida nazarda tutilgan holatlarda qayta rasmiylashtirilgan talabgorning soʻrovnomasiga koʻra — qayta rasmiylashtirilgan litsenziya beriladi.

Ushbu bandda belgilangan har bir holatda talabgor (yoki litsenziat) boj olinmaydigan savdo doʻkoni savdo zallari, yordamchi binolari va omborlarining mulk huquqi, ashyoviy huquqlar yoki ijara asosida tegishliligi toʻgʻrisidagi maʼlumotlarni soʻrovnomada koʻrsatadi.

14. Litsenziya boʻyicha huquqlarni boshqa shaxslarga berish taqiqlanadi.

2-bob. Litsenziya talablari va shartlari

15. Boj olinmaydigan savdo doʻkoni hududi savdo zallari hududini, yordamchi binolar va doʻkon omborini oʻz ichiga oladi hamda bojxona nazorati zonasi hisoblanadi.

16. Boj olinmaydigan savdo doʻkonining savdo zali, yordamchi binosi va ombori:

a) mazkur Reglamentda nazarda tutilgan talablar hisobga olingan holda boj olinmaydigan savdo doʻkonining normal faoliyat koʻrsatishi uchun yetarli boʻlgan maydonga ega boʻlishi;

b) bir-biriga bevosita yaqin joyga (bojxona nazorati zonasida) joylashtirilishi kerak;

v) quyidagilar bilan:

tovarlar faqat boj olinmaydigan savdo doʻkonining savdo zallarida sotilishini hamda ularga nisbatan bojxona nazorati oʻtkazish imkoniyatini taʼminlaydigan tarzda jihozlanishi;

bojxona organlarining dasturiy taʼminoti bilan mos keladigan tovarlar hisobini yuritadigan avtomatlashtirilgan tizim;

aloqa vositalari (shu jumladan telefon, maʼlumot uzatish tarmogʻi, Internet);

savdo zallari hududini, yordamchi binolar va doʻkon omborini toʻliq nazorat qilish hamda bojxona organlariga videomaʼlumotlarni uzatish, shuningdek, ushbu maʼlumotlarni uch oy davomida saqlash imkoniga ega boʻlgan uzluksiz ishlovchi videokuzatuv tizimi hamda litsenziyalovchi organ tomonidan belgilangan joylarda oʻrnatilgan, kunu-tun ishlaydigan videokuzatuv vositalari bilan jihozlanishi kerak.

17. Agar boj olinmaydigan savdo doʻkonining savdo zallari, yordamchi binolari va ombori mazkur Reglamentning 16-bandi talablariga rioya qilinganda bir-biridan yiroqda (500 m.dan ortiq) joylashgan boʻlsa, tovarlarni ombordan savdo zallari va yordamchi binolarga olib oʻtish Oʻzbekiston Respublikasi Bojxona kodeksida belgilangan holatlarda bojxona kuzatuvida amalga oshirilishi mumkin. Bojxona kuzatuvi uchun bojxona yigʻimlari belgilangan miqdorda undiriladi.

Tovarlarning bir boj olinmaydigan savdo doʻkonidan boshqa boj olinmaydigan savdo doʻkoniga koʻchirilishi faqat tovarlarning bir bojxona omboridan boshqa bojxona omboriga koʻchirilishi uchun nazarda tutilgan tartibda davlat bojxona xizmati organining ruxsati bilan amalga oshiriladi.

18. Oʻzbekiston Respublikasi Davlat chegarasi orqali oʻtkazish punktlaridan tashqarida joylashgan boj olinmaydigan savdo doʻkonining ombori qonun hujjatlarida bojxona omborlari uchun nazarda tutilgan tartibga muvofiq jihozlanishi kerak.

19. Boj olinmaydigan savdo doʻkonining savdo zallari shunday joylashishi va jihozlanishi kerakki, ular tovarlarni but holatda saqlanishini taʼminlashi hamda quyidagilarni:

Oʻzbekiston Respublikasi Davlat chegarasini kesib oʻtadigan jismoniy shaxslar uchun boj olinmaydigan savdo doʻkonidan sotib olingan tovarlar Oʻzbekiston Respublikasi bojxona hududida, shu jumladan ushbu hududda qolayotgan jismoniy shaxslarga berish yoʻli bilan qoldirilishini;

tovarlarning bojxona nazoratidan tashqari tushishi va olib qoʻyilishini;

tovarlarga begona shaxslarning yaqinlashishini istisno etadigan boʻlishi kerak.

20. Oʻzbekiston Respublikasi Davlat chegarasini kesib oʻtadigan jismoniy shaxslar uchun boj olinmaydigan savdo doʻkonining savdo zallari bojxona nazorati zonasida joylashtirilishi kerak (pasport nazorati chizigʻi tashqarisida bojxona nazorati chizigʻigacha alohida — Oʻzbekiston Respublikasi hududiga kirib keladigan jismoniy shaxslar uchun, shuningdek, pasport nazorati chizigʻi tashqarisida — Oʻzbekiston Respublikasi hududidan chiqib ketayotgan jismoniy shaxslar uchun).

Koʻrsatib oʻtilgan boj olinmaydigan savdo doʻkonining savdo zallari Oʻzbekiston Respublikasi Davlat chegarasini kesib oʻtmaydigan jismoniy shaxslarning ushbu zallarga kirishini istisno etadigan tarzda joylashtirilishi kerak.

Oʻzbekiston Respublikasi Tashqi ishlar vazirligida akkreditatsiya qilingan chet ellik shaxslar uchun boj olinmaydigan savdo doʻkonining savdo zallari boj olinmaydigan savdo doʻkoni joylashgan bojxona organi faoliyati zonasida boʻlishi kerak.

22. Litsenziat quyidagilarga majbur:

bojxona qonun hujjatlariga rioya qilish;

mazkur Reglamentda belgilangan talablar va shartlarga rioya etilishini taʼminlash;

litsenziya talablari va shartlari asosida jihozlangan videokuzatuv tizimlari yordamida olingan vaqt boʻyicha uzluksiz videoyozuvlarning uch oy davomida saqlanishini taʼminlash, shuningdek ularga oʻzgartirish kiritish, ustiga yozish, oʻchirish, nusxa olish, koʻchirib olish kabi harakatlarni bajarishning va boshqa maqsadlarda foydalanishning oldini olish;

videokuzatuvni toʻliq amalga oshirish imkonini beradigan yoritish tizimi bilan taʼminlash;

boj olinmaydigan savdo doʻkoniga sotish uchun tushuvchi tovarlardan boshqa maqsadlarda foydalanish imkoniyatini istisno etish;

boj olinmaydigan savdo rejimiga joylashtirilgan tovarlarni faqat yordamchi binolarda va boj olinmaydigan savdo doʻkoni omborlarida saqlash;

boj olinmaydigan savdo doʻkoniga tushuvchi va boj olinmaydigan savdo doʻkonidan olib chiqiladigan tovarlar hisobini yuritish, shu jumladan avtomatlashtirilgan hisobini yuritish;

bojxona organining talabi boʻyicha boj olinmaydigan savdo doʻkonidagi tovarlarni bojxona organining mansabdor shaxsi ishtirokida xatlovdan oʻtkazish;

bojxona nazoratini amalga oshirishda bojxona organlari xodimlariga yordam berish;

sanitariya yongʻin va sanoat xavfsizligi qoidalariga, omborga joylashtirish normalariga, tovarlarning yonma-yon qoʻyilishi qoidalariga va saqlash rejimiga, davlat standartlarining majburiy talablariga rioya qilish, mazkur Reglamentda belgilangan talablarni hisobga olgan holda Oʻzbekiston Respublikasining savdo sohasidagi munosabatlarni tartibga soluvchi qonun hujjatlarida belgilangan boshqa talablar va shartlarni bajarish;

naqd xorijiy (milliy) valyuta va xorijiy (milliy) valyutadagi bank plastik va kredit kartochkalari yoki xorijiy (milliy) valyutadagi bank oʻtkazmalari toʻlov hujjatlari bilan ishlashga muvofiq kassa operatsiyalari yuritishning amaldagi tartibi talablariga, shuningdek, Oʻzbekiston Respublikasi qonun hujjatlarida belgilangan valyuta operatsiyalarini amalga oshirishning boshqa qoidalariga rioya qilish;

faoliyatning tegishli turiga roʻyxatdan oʻtkazish yoki ruxsat berish hujjatlariga ega boʻlish, basharti ularni olish majburiyligi Oʻzbekiston Respublikasi qonun hujjatlarida, joylardagi davlat hokimiyati organlarining normativ huquqiy hujjatlarida nazarda tutilgan boʻlsa;

boj olinmaydigan savdo doʻkoni omborida tovarlarni maxsus markalash va boj olinmaydigan savdo doʻkonining savdo zallarida tovarlarni faqat ular tegishli tarzda markalangan taqdirda sotish;

mazkur Reglamentning 23-bandida belgilangan holatlarda bojxona toʻlovlarini toʻlash;

boj olinmaydigan savdo doʻkoni yopilgan taqdirda bu haqda litsenziyalovchi organni xabardor qilish;

taʼsis hujjatlariga oʻzgartirish va qoʻshimchalar kiritilganligi, shu jumladan, qayta tashkil etilganligi, nomi yoki joylashgan joyi (pochta manzili) oʻzgarganligi toʻgʻrisida litsenziyalovchi organni oʻz vaqtida xabardor qilish;

boj olinmaydigan savdo doʻkoniga kirish uchun ruxsat berilgan hamda belgilangan tartibda tibbiy koʻrikdan oʻtgan (oziq-ovqat mahsulotlari bilan ishlovchi xodimlar uchun) xodimlarning (F.I.Sh. va lavozimini koʻrsatgan holda) roʻyxati mavjudligini taʼminlash;

boj olinmaydigan savdo doʻkoni tugatilgan taqdirda, unda turgan tovarlarning saqlanishini taʼminlash, ularni boshqa bojxona omboriga oʻtkazilishi yoxud Oʻzbekiston Respublikasi Bojxona kodeksida belgilangan muddatda boshqa bojxona rejimiga joylashtirilishi boʻyicha choralar koʻrish;

Oʻzbekiston Respublikasi bojxona organlarining qonuniy talablarini bajarish, shu jumladan bojxona organlari mansabdor shaxslarining doʻkonining savdo zali binosi, yordamchi binosi va (yoki) omborida saqlanayotgan tovarlar turgan joyga kirishini taʼminlash;

yonish va portlash xavfi yuqori boʻlgan kimyoviy moddalarni (mahsulotlarni) faqat Favqulodda vaziyatlar vazirligining yonish va portlash xavfi yuqori boʻlgan kimyoviy moddalarni (mahsulotlarni) saqlash uchun obyektning (omborning) yongʻin va sanoat xavfsizligi talablariga muvofiqligi yuzasidan xulosasi mavjud boʻlganda saqlash.

23. Litsenziat:

boj olinmaydigan savdo bojxona rejimi ostida joylashtirilgan tovarlar yoʻqolgan taqdirda yoxud ulardan boj olinmaydigan savdo doʻkonida Oʻzbekiston Respublikasi bojxona hududiga kirib kelayotgan va Oʻzbekiston Respublikasi bojxona hududidan chiqib ketayotgan jismoniy shaxslarga, shuningdek, Oʻzbekiston Respublikasi Tashqi ishlar vazirligida akkreditatsiya qilinmagan chet ellik shaxslarga chakana sotishdan boshqa maqsadlarda foydalanilganda, bunday tovarlarga nisbatan qonun hujjatlarida belgilangan talab va shartlarga muvofiq bojxona toʻlovlar toʻlanishi;

boj olinmaydigan savdo bojxona rejimi ostida joylashtirilmagan tovarlar sotilishi;

boj olinmaydigan savdo doʻkonida yongʻin xavfsizligini taʼminlash hamda sanitariya meʼyorlari va talablariga rioya etilishi uchun belgilangan tartibda javob beradi.

24. Litsenziat, agar tovarlar faqat yengib boʻlmas kuch taʼsiri oqibatida yoki saqlash va sotishning normal sharoitlarida tabiiy kamayish tufayli yoki qaytarib boʻlmaydigan tarzda tabiiy ravishda yoʻqolgan taqdirdagina bojxona toʻlovlarining toʻlanishi uchun javob bermaydi.

25. Bojxona nazorati va bojxona rasmiylashtiruvini amalga oshirish uchun, zarurat boʻlganda, litsenziat tomonidan bojxona organining mansabdor shaxslariga boj olinmaydigan savdo doʻkoni omborida jihozlangan bino va aloqa vositalari beriladi.

3-bob. Litsenziya olish uchun zarur hujjatlar

26. Litsenziya olish uchun talabgor maxsus elektron tizim yoki yagona interaktiv davlat xizmatlari portali (keyingi oʻrinlarda — YIDXP) orqali quyidagi hujjatlarni taqdim etadi:

talabgorning egaligida boʻlgan va boj olinmaydigan savdo doʻkoni sifatida foydalanish uchun moʻljallangan savdo zallari, yordamchi binolari va omborlari, ularning oʻlchamlari, hajmi va (yoki) maydoni, ular joylashgan joy, ularning jihozlanishi, videokuzatuv tizimi, asbob-uskunalar va moddiy-texnika bilan taʼminlanganligi hamda mulk huquqi, ashyoviy huquqlar yoki muddatlarini koʻrsatgan holda ijara asosida tegishliligi toʻgʻrisidagi maʼlumotlar;

bojxona nazorati zonasi, aniq oʻlchamlari koʻrsatilgan holda boj olinmaydigan savdo doʻkonining savdo zallari, yordamchi binolari hamda omborlarining (shuningdek, yondosh hududlarning) sifatli chizmasi va kadastr yigʻma jildidagi tarhi;

boj olinmaydigan savdo doʻkonida sotilishi moʻljallanayotgan tovarlar roʻyxati;

Oʻzbekiston Respublikasi Bojxona kodeksiga muvofiq bojxona toʻlovlari toʻlanishi taʼminlanganligini tasdiqlovchi hujjat.

Talabgordan ushbu Reglamentda nazarda tutilmagan hujjatlarni taqdim etishni talab qilishga yoʻl qoʻyilmaydi.

Litsenziyalovchi organ litsenziya berish uchun boshqa vakolatli organlarda mavjud boʻlgan zarur hujjatlar va axborotlarni belgilangan tartibda oʻzaro axborot hamkorligi yoʻli bilan, shu jumladan elektron tarzda mustaqil ravishda oladi, ushbu bandda nazarda tutilgan hujjatlar va axborotlar bundan mustasno.

27. Notoʻgʻri yoki buzib koʻrsatilgan maʼlumotlarni taqdim etganligi uchun talabgor qonunga muvofiq javob beradi.

4-bob. Davlat xizmatlari koʻrsatish tartibi

28. Davlat xizmatlari koʻrsatish jarayoni ushbu Reglamentning 3-ilovasidagi sxemaga muvofiq amalga oshiriladi.

29. Talabgor davlat xizmatlaridan elektron tarzda maxsus elektron tizim yoki YIDXP orqali foydalanadi.

30. Talabgor mazkur Reglamentga 4-ilovadagi 1-shaklga muvofiq boj olinmaydigan savdo doʻkoni faoliyatiga litsenziya berish boʻyicha davlat xizmatlaridan foydalanish uchun soʻrovnomani elektron toʻldiradi.

31. Talabgor hujjatlarni rasmiylashtirgandan va soʻrovnomaga kiritgandan soʻng uni oʻz elektron raqamli imzosi (keyingi oʻrinlarda — ERI deb yuritiladi) bilan tasdiqlaydi.

32. Soʻrovnoma avtomatik tarzda litsenziyalovchi organga kelib tushadi.

Soʻrovnomada notoʻgʻri maʼlumotlar koʻrsatilishi davlat xizmati koʻrsatishni rad etish uchun asos hisoblanadi.

Talabgor tomonidan kiritilgan hujjatlar Boj olinmaydigan savdo doʻkoni faoliyatini litsenziyalash pasportining 14-bandida belgilangan kelishiladigan organlarga bir vaqtning oʻzida yuboriladi.

Tegishli kelishuvni yoki xulosani taqdim etish uchun obyektlarni joyiga chiqib oʻrganish talab etilgan hollarda, kelishiladigan organlar faqat oʻz faoliyat yoʻnalishi boʻyicha oʻrganish oʻtkazishi mumkin.

Kelishiladigan organlar belgilangan muddatlarda xulosa taqdim etmagan taqdirda ariza ushbu organlar bilan kelishilgan, xulosalar esa ijobiy deb hisoblanadi.

Bunday hollarda kelishiladigan organlar yuzaga kelishi mumkin boʻlgan barcha oqibatlar uchun javobgar hisoblanadi. Bunda kelishiladigan organlarning tegishli xulosalarisiz litsenziya berish imkoni boʻlmaganda, talabgorning arizasini koʻrib chiqish muddati va tartibi buzilganligi uchun kelishiladigan organlar javobgardir.

33. Reglament talablari asosida maxsus elektron tizim yoki YIDXP orqali hujjatlar toʻliq kiritilmasa, soʻrovnomani tasdiqlash va litsenziyalovchi organga yuborish avtomatik tarzda rad etiladi.

Talabgor tomonidan taqdim etilgan hujjatlarning toʻliqligi litsenziyalovchi organ tomonidan oʻrganib chiqiladi.

Talabgorning hujjatlar toʻliq boʻlmagan murojaati litsenziyalovchi organ tomonidan davlat xizmati koʻrsatilmasdan rad etiladi.

35. Litsenziya berish yoki litsenziya berishni rad etish toʻgʻrisidagi qaror talabgorning soʻrovnomasi barcha zarur hujjatlar bilan birgalikda kelib tushgan kundan boshlab yigirma ish kunidan ortiq boʻlmagan muddatda qabul qilinadi.

36. Litsenziya berish toʻgʻrisidagi hujjatlarni koʻrib chiqish, ular boʻyicha xulosalar tayyorlash uchun litsenziyalovchi organda ekspert komissiyalari tashkil etiladi. Ekspert komissiyasining tarkibi va komissiya toʻgʻrisidagi nizom Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi tomonidan tasdiqlanadi.

37. Talabgorning soʻrovnomasi barcha zarur hujjatlar bilan birgalikda, ular kelib tushgan kunda, koʻrib chiqish uchun ekspert komissiyasiga kiritiladi.

Ekspert komissiyasi oʻn besh ish kunidan ortiq boʻlmagan muddatda taqdim etilgan hujjatlarni, litsenziya talablari va shartlariga rioya etilishini oʻrganish uchun bevosita boj olinmaydigan savdo doʻkonini tashkil etish joyiga borgan holda koʻrib chiqadi va ular boʻyicha talabgorning litsenziya talablari va shartlariga muvofiqligi toʻgʻrisida ekspert xulosasini tayyorlaydi.

38. Litsenziyalovchi organda tashkil etilgan ekspert komissiyasi xulosa tayyorlash jarayonida obyekt (bino, inshootlar va (yoki) hudud) boʻyicha quyidagi maʼlumotlarni elektron hamkorlik yoʻli bilan yoxud elektron soʻrov orqali oladi va uning natijalarini xulosaga qoʻshadi:

Oʻzbekiston Respublikasi Iqtisodiyot va moliya vazirligi huzuridagi Kadastr agentligidan — koʻchmas mulkka boʻlgan huquq toʻgʻrisida;

Oʻzbekiston Respublikasi Vazirlar Mahkamasi huzuridagi Soliq qoʻmitasidan — ijara shartnomasi toʻgʻrisida.

Vakolatli davlat organlari obyektning (bino, inshootlar va (yoki) hududning) sanitariya va yongʻin qoidalari boʻyicha tadbirlar talablariga muvofiqligini taʼminlash maqsadida tadbirkorlik subyektlariga malakali kadrlarni izlash, hujjatlar va dasturlarni qayta ishlash uchun mutaxassislarni jalb qilish hamda litsenziyalar va ruxsat etish xususiyatiga ega boʻlgan boshqa hujjatlarni olish uchun zarur shart-sharoitlarni yaratishda yordam beradi, talabgorning taklif etilgan yordamni rad qilish hollari bundan mustasno.

Jismoniy shaxslar tomonidan chegarani kesib oʻtishga moʻljallangan bevosita bojxona organlari tasarrufidagi obyektlar hisoblangan Oʻzbekiston Respublikasi davlat chegarasi orqali oʻtkazish punktlarida ochilishi va faoliyat koʻrsatishi moʻljallangan boj olinmaydigan savdo doʻkoni uchun mazkur banddagi qoidalar qoʻllanilmaydi.

Bunday joylarda ochilishi moʻljallangan boj olinmaydigan savdo doʻkoni faoliyat koʻrsatishi tartibi ushbu Reglamentda belgilangan talablar va shartlarga muvofiq Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi tomonidan belgilanadi.

39. Litsenziyalovchi organ uch ish kunida ichida ekspert komissiyasi xulosasi asosida litsenziya berish yoki litsenziya berishni rad etish toʻgʻrisida qaror qabul qiladi.

Qabul qilingan qaror toʻgʻrisida bir ish kunida talabgorga maxsus elektron tizim yoki YIDXP orqali:

litsenziya berish toʻgʻrisida qaror qabul qilinganda bank hisob varagʻi rekvizitlari va litsenziya berish uchun davlat bojini toʻlash muddati toʻgʻrisida;

litsenziya berishni rad etish toʻgʻrisida qaror qabul qilinganda rad etishning sabablari va talabgor koʻrsatilgan sabablarni bartaraf qilib, hujjatlarni koʻrib chiqish uchun takror taqdim etishi mumkin boʻlgan muddat koʻrsatilgan litsenziyalovchi organ vakolatli shaxsining ERIsi bilan tasdiqlangan xabarnoma yuboradi.

Litsenziya berishni rad etish haqidagi xabarnomada koʻrsatilgan muddat kamchiliklarni bartaraf etish uchun zarur boʻlgan vaqtga mutanosib boʻlishi lekin ushbu muddat oʻttiz ish kunidan ortiq boʻlmasligi kerak.

40. Litsenziya berish “Litsenziyalash, ruxsat berish va xabardor qilish tartib-taomillari toʻgʻrisida”gi Oʻzbekiston Respublikasi Qonunining 29-moddasida nazarda tutilgan asoslar boʻyicha rad etilishi mumkin.

41. Talabgor litsenziya berish rad etilishi toʻgʻrisidagi qaror, shuningdek, litsenziyalovchi organ mansabdor shaxslarining hatti-harakati (harakatsizligi) ustidan qonun hujjatlarida belgilangan tartibda shikoyat qilish huquqiga ega.

42. Agar litsenziyalovchi organ litsenziya berish toʻgʻrisidagi soʻrovnomani koʻrib chiqish muddati mobaynida litsenziya berish yoki uni berishni rad etish haqida qabul qilingan qaror toʻgʻrisida talabgorga maxsus elektron tizim yoki YIDXP orqali xabarnoma yubormasa, talabgor ushbu Reglamentning 35-bandida koʻrsatib oʻtilgan muddat tamom boʻlgandan keyin boj olinmaydigan savdo faoliyatini amalga oshirish huquqiga, bu haqda litsenziyalovchi organni maxsus elektron tizim yoki YIDXP vositasida elektron shaklda xabardor qilgan holda, ega boʻladi.

43. Litsenziya berish rad etilishiga asos boʻlgan sabablar bartaraf etilgan taqdirda, litsenziya olish uchun talabgor tomonidan taqdim etilgan maʼlumotlar talabgor ning rad etish sabablari bartaraf etilgani toʻgʻrisidagi maʼlumotnomasi va ularni tasdiqlovchi hujjatlar kiritilgan soʻrovnoma maxsus elektron tizim yoki YIDXP orqali kelib tushgandan soʻng ushbu Reglamentning 28 — 40-bandlarida koʻrsatilgan tartibda, biroq besh ish kunidan ortiq boʻlmagan muddatda takroran koʻrib chiqiladi.

Bunda:

talabgor ning takroriy soʻrovnomasiga asosan ekspert komissiyasi ikki ish kunidan ortiq boʻlmagan muddatda taqdim etilgan hujjatlarni, litsenziya berishni rad etish sabablari bartaraf etilganligini oʻrganish uchun bevosita boj olinmaydigan savdo doʻkonini tashkil etish joyiga borgan holda koʻrib chiqadi va ular boʻyicha talabgorning litsenziya talablari va shartlariga muvofiqligi toʻgʻrisida ekspert xulosasini tayyorlaydi.

Tayyorlangan xulosa asosida ushbu Reglamentning 39-bandida koʻrsatilgan tadbirlar bajarilishi taʼminlanadi.

44. Talabgorning soʻrovnomasini takroran koʻrib chiqishda litsenziya berishni rad etish haqidagi xabarnomada litsenziyalovchi organ tomonidan talabgorga ilgari bayon qilinmagan rad etish sabablari koʻrsatilishiga yoʻl qoʻyilmaydi. Rad etish sabablari bartaraf etilganini tasdiqlovchi hujjatlar bilan bogʻliq boʻlgan rad etish sabablarini koʻrsatish bundan mustasno.

Litsenziya berish rad etilganligi toʻgʻrisidagi xabarnomada koʻrsatilgan muddat oʻtganidan keyin berilgan soʻrovnoma yangidan berilgan deb hisoblanadi.

46. Litsenziyalovchi organ davlat boji toʻlangandan soʻng uch ish kunida QR-kod (matrik shtrixli kod) qoʻyilgan elektron litsenziyani rasmiylashtiradi hamda litsenziyalovchi organ vakolatli shaxsining ERIsi bilan tasdiqlab, talabgorga maxsus elektron tizim yoki YIDXP orqali elektron ravishda yuboradi.

47. Litsenziyada quyidagilar boʻlishi kerak:

litsenziyaning tartib raqami;

amalga oshirayotgan faoliyat turi;

litsenziatning nomi, joylashgan joyi (pochta manzili), uning tashkiliy-huquqiy shakli va STIR raqami;

boj olinmaydigan savdo doʻkonining savdo zali, yordamchi binosi va ombori hajmi va maydoni hamda egalik shakli va amal qilish muddati;

bojxona toʻlovlarini taʼminlash miqdorlari, ularni toʻlashni taʼminlash shakli va amal qilish muddati toʻgʻrisidagi maʼlumotlar;

boj olinmaydigan savdo doʻkoni joylashgan joy;

litsenziyaning berilgan sanasi.

48. Agar talabgor tomonidan unga litsenziya berish toʻgʻrisidagi qaror qabul qilingani haqidagi xabarnoma yuborilgan paytdan eʼtiboran oʻttiz kundan ortiq boʻlmagan muddatda maxsus elektron tizim yoki YIDXP orqali litsenziyani berish uchun axborot-kommunikatsiya tizimlari yordamida davlat boji toʻlanganligi toʻgʻrisida xabarnoma yuborilmagan taqdirda, litsenziyalovchi organ mazkur litsenziyani bekor qiladi.

49. Litsenziyani berish uchun davlat boji belgilangan muddatda toʻlanmagan taqdirda, talabgor litsenziyani berish yuzasidan umumiy tartibda qayta murojaat qilishga haqli.

50. Talabgor davlat xizmatidan undan foydalanishning har qanday bosqichida bosh tortishga haqlidir.

Talabgor davlat xizmatidan foydalanishdan bosh tortgan taqdirda, uning soʻrovnomasi koʻrib chiqilmaydi va davlat xizmatlari koʻrsatganlik uchun toʻlangan yigʻimlar miqdori qaytarilmaydi.

5-bob. Litsenziyani qayta rasmiylashtirish va oʻzgartirish

51. Litsenziat oʻzgartirilgan, uning nomi yoki joylashgan joyi (pochta manzili) oʻzgargan taqdirda, litsenziat yoki uning huquqiy vorisi qayta roʻyxatdan oʻtkazilgandan keyin besh ish kuni ichida litsenziyalovchi organga koʻrsatib oʻtilgan maʼlumotlarni tasdiqlovchi tegishli hujjatlarni kiritgan holda, ushbu Reglamentning 29 — 31-bandlarida koʻrsatilgan tartibda litsenziyani qayta rasmiylashtirish toʻgʻrisida maxsus elektron tizim yoki YIDXP orqali murojaat qilishi shart.

Bunda talabgor mazkur Reglamentga 4-ilovadagi 2-shaklga muvofiq boj olinmaydigan savdo doʻkoni faoliyatiga litsenziya berish boʻyicha davlat xizmatlaridan foydalanish uchun soʻrovnoma toʻldiradi.

Litsenziya qayta rasmiylashtirilguniga qadar litsenziat litsenziyani qayta rasmiylashtirish toʻgʻrisidagi arizasi asosida unda koʻrsatilgan faoliyatni amalga oshiradi.

Litsenziyalovchi organ litsenziyani qayta rasmiylashtirish toʻgʻrisida tegishli hujjatlar kiritilgan soʻrovnomani olgan kundan eʼtiboran besh ish kunida litsenziyani qayta rasmiylashtiradi.

Litsenziyani qayta rasmiylashtirish uchun mazkur Reglamentning 72-bandida koʻrsatilgan miqdorda yigʻim undiriladi.

52. Litsenziya litsenziatning maxsus elektron tizim yoki YIDXP orqali murojaatiga asosan quyidagi hollarda oʻzgartirilishi mumkin:

litsenziatning faoliyatni amalga oshirish manzili oʻzgarganda;

boj olinmaydigan savdo doʻkonining savdo zallari, yordamchi binolari va omborlarining hajmi va (yoki) ochiq maydonchalari kengaytirilganda va (yoki) qisqartirilganda;

boj olinmaydigan savdo doʻkonining turi oʻzgarganda.

Litsenziyani oʻzgartirishda litsenziyani berish uchun nazarda tutilgan tartiblarga amal qilinadi.

Litsenziya oʻzgartirilganda, mazkur Reglamentning 70-bandida koʻrsatilgan miqdorda davlat boji va 72-bandida koʻrsatilgan miqdorda yigʻim undiriladi.

53. Litsenziyalovchi organ litsenziyani qayta rasmiylashtirishda va (yoki) oʻzgartirishda, litsenziyalar reyestriga tegishli oʻzgartirishlar kiritadi.

6-bob. Litsenziya talablari va shartlariga rioya etilishini nazorat qilish

54. Litsenziya talablari hamda shartlariga rioya etilishini litsenziyalovchi organ tomonidan nazorat qilish “xavfni tahlil qilish” tizimi natijalari hamda jismoniy va yuridik shaxslarning qonunchilik buzilishi faktlari toʻgʻrisidagi murojaatlari asosida amalga oshiriladi.

55. Litsenziya talablari va shartlariga rioya etilishi yuzasidan nazoratni amalga oshirishda litsenziyalovchi organ oʻz vakolatlari doirasida quyidagi huquqlarga ega:

litsenziat tomonidan ushbu Reglamentda belgilangan litsenziya talablari va shartlariga rioya etilishini tekshirishni Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil bilan kelishilgan, qonunchilikda belgilangan tartibda joyiga chiqqan holda oʻtkazish;

litsenziya talablari va shartlariga rioya etilishini tekshirish chogʻida paydo boʻladigan masalalar yuzasidan litsenziatdan zarur maʼlumotlarni soʻrash va olish;

tekshirishlar natijalari asosida, litsenziat tomonidan litsenziya talablari va shartlarining aniq buzilishlarini koʻrsatgan holda dalolatnomalar (maʼlumotnomalar) tuzish;

litsenziatga aniqlangan buzilishlarni bartaraf etish majburiyatini yuklovchi qarorlar chiqarish, bunday buzilishlarni bartaraf etish muddatlarini belgilash;

litsenziyaning amal qilishini toʻxtatib turish yoki litsenziyani bekor qilish toʻgʻrisida qonun hujjatlarida belgilangan tartibda qaror chiqarish yoxud sudga murojaat qilish;

Boj olinmaydigan savdo doʻkonida bojxona nazorati ostida boʻlgan tovarlarga Oʻzbekiston Respublikasi Bojxona kodeksiga muvofiq, bojxona nazorat shakllarini qoʻllash Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil bilan kelishishni talab etmaydi.

56. Litsenziya talablari va shartlariga rioya etilishi ustidan davlat nazorati “Litsenziyalash, ruxsat berish va xabardor qilish tartib-taomillari toʻgʻrisida”gi Oʻzbekiston Respublikasi Qonunida belgilangan tartibda amalga oshiriladi.

Litsenziyaning bekor qilinishiga asos boʻladigan qoʻpol qoidabuzarliklarning roʻyxati ushbu Reglamentning 5-ilovasida belgilangan boj olinmaydigan savdo doʻkoni faoliyatini litsenziyalash pasporti nazarda tutiladi.

57. Davlat yongʻin nazorati organlari tomonidan belgilangan tartibda davlat yongʻin nazorati olib borilganda, boj olinmaydigan savdo doʻkonining savdo zallari, yordamchi binolari va omborlarida yongʻin xavfsizligi talablari buzilganligi holatlari aniqlanganda, aniqlangan holatlar toʻgʻrisida litsenziyalovchi organga xabar beriladi.

58. Oʻzbekiston Respublikasi Sogʻliqni saqlash vazirligi huzuridagi Sanitariya-epidemiologik osoyishtalik va jamoat salomatligi qoʻmitasi organlari tomonidan belgilangan tartibda sanitariya-epidemiologiya xizmati olib borilganda, boj olinmaydigan savdo doʻkonining savdo zallari, yordamchi binolari va omborlarini ariza berilgan tovarlarni, shu jumladan oziq-ovqat tovarlarini saqlash shart-sharoitlarining nomuvofiqligi holati aniqlanganda, aniqlangan holatlar toʻgʻrisida litsenziyalovchi organga xabar beriladi.

7-bob. Litsenziyaning amal qilishini toʻxtatib turish, tugatish, litsenziyani bekor qilish

59. Litsenziyaning amal qilishini toʻxtatib turish, tugatish va litsenziyani bekor qilish “Litsenziyalash, ruxsat berish va xabardor qilish tartib-taomillari toʻgʻrisida”gi Oʻzbekiston Respublikasi Qonunining 32 — 34-moddalarida nazarda tutilgan holatlarda va tartibda amalga oshiriladi.

60. Litsenziya amal qilish muddati toʻxtatilgan yoki tugatilgan sanadan boshlab, boj olinmaydigan savdo doʻkoniga tovarlarning yangi turkumlarini joylashtirishga yoʻl qoʻyilmaydi.

61. Boj olinmaydigan savdo doʻkonini tugatish toʻgʻrisida qaror qabul qilingan sanadan boshlab boj olinmaydigan savdo bojxona rejimi ostida joylashtirilgan va bunday omborda saqlanayotgan tovarlarga vaqtincha saqlash bojxona rejimida saqlanayotgan tovarlar sifatida qaraladi.

Tugatilayotgan boj olinmaydigan savdo doʻkonida tovarlarning vaqtincha saqlash rejimida boʻlishining umumiy muddati doʻkon tugatilgan sanadan eʼtiboran oltmish kundan ortiq boʻlishi mumkin emas.

62. Litsenziat sudning litsenziya amal qilishi tugatilishi yoki uning bekor qilinishi toʻgʻrisidagi qarorini olgan sanadan boshlab, uch kun muddatda litsenziyalovchi organga litsenziya bekor qilinadigan yoki amal qilishi tugatiladigan kunda, tugatilayotgan boj olinmaydigan savdo doʻkonida saqlanayotgan tovarlar toʻgʻrisida Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi tomonidan tasdiqlangan shaklda toʻliq hisobot taqdim etadi.

63. Litsenziyalovchi organ litsenziyaning amal qilishi tugatilgan yoki litsenziya bekor qilingan sanadan boshlab yetti kun muddatdan kechikmay, tugatilayotgan boj olinmaydigan savdo doʻkonida saqlanayotgan tovarlarni xatlovdan oʻtkazadi.

64. Boj olinmaydigan savdo doʻkoni tugatilgan taqdirda, unda saqlanayotgan tovarlar boshqa bojxona omboriga yoki boj olinmaydigan boshqa savdo doʻkoniga olib oʻtilishi yoki tovarni boj olinmaydigan savdo doʻkoniga joylashtirgan shaxs yoxud uning vakolatli shaxsi tomonidan:

litsenziya bekor qilinganda — tovarlar boj olinmaydigan savdo doʻkoniga joylashtirilgan sanadan boshlab;

boshqa holatlarda — tugatilgan sanadan boshlab boshqa bojxona rejimiga joylashtirilishi kerak.

65. Litsenziyaning amal qilishi tugatilishi munosabati bilan boj olinmaydigan savdo doʻkoni tugatilgan taqdirda litsenziatdan tugatish sanasidan eʼtiboran bojxona organlari tomonidan taʼsis etilgan bojxona omborlari uchun belgilangan, tovarlar saqlanganligi uchun bojxona yigʻimlari undiriladi.

Litsenziya bekor qilinganligi munosabati bilan boj olinmaydigan savdo doʻkoni tugatilgan taqdirda litsenziat tomonidan olib kirilgan, shu jumladan chiqarib yuborilgan tovarlar turgan butun davrga bojxona organlari tomonidan taʼsis etilgan bojxona omborlari uchun belgilangan, tovarlar saqlanganligi uchun bojxona yigʻimlarini toʻlashi shart.

66. Litsenziyalovchi organning litsenziyaning amal qilishini toʻxtatib turish va litsenziyani bekor qilish toʻgʻrisidagi qarori yuzasidan sudga shikoyat qilish mumkin.

Sud litsenziyaning amal qilishini toʻxtatib turish va litsenziyani bekor qilishni asossiz deb topgan taqdirda, litsenziyalovchi organ litsenziat oldida unga yetkazilgan zarar miqdorida javob beradi.

8-bob. Litsenziyalar reyestrini yuritish

67. Litsenziyalovchi organ berilgan litsenziyalar reyestrini elektron koʻrinishda yuritadi.

Litsenziyalar reyestrida quyidagilar koʻrsatiladi:

yuridik shaxs — litsenziatning nomi, tashkiliy-huquqiy shakli, pochta manzili, STIR raqami, rahbarining F.I.Sh., telefon (faks);

amalga oshirayotgan faoliyat turi;

litsenziyaning berilgan sanasi va tartib raqami;

boj olinmaydigan savdo doʻkoni joylashgan joy;

boj olinmaydigan savdo doʻkonining savdo zallari, yordamchi binolari va ombori hajmi va maydoni hamda egalik shakli va amal qilish muddati;

bojxona toʻlovlarini taʼminlash miqdori, shakli va amal qilish muddati;

boj olinmaydigan savdo doʻkoni biriktirilgan bojxona organining tashqi iqtisodiy faoliyat bojxona posti;

litsenziyalarni qayta rasmiylashtirish, toʻxtatib turish, qayta tiklash, tugatish, ularni bekor qilish asoslari hamda sanalari;

boj olinmaydigan savdo doʻkonida yonish va portlash xavfi yuqori boʻlgan kimyoviy moddalarni (mahsulotlarni) saqlash uchun obyektning (omborning) yongʻin va sanoat xavfsizligi talablariga muvofiqligi yuzasidan olingan xulosa raqami va sanasi.

68. Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi har yarim yilda kamida bir marta rasmiy veb-saytda litsenziyalar yigʻma reyestri eʼlon qilinishini taʼminlaydi.

69. Litsenziyalarning reyestrlarida mavjud boʻlgan maʼlumotlar tanishib chiqish uchun ochiq boʻladi.

9-bob. Davlat bojini va davlat xizmati koʻrsatilgani uchun yigʻimni toʻlash tartibi

70. Faoliyat turiga litsenziya berilganligi uchun “Davlat boji toʻgʻrisida”gi Oʻzbekiston Respublikasining Qonuni bilan tasdiqlangan Davlat boji stavkalari miqdorlarining 22-bandiga muvofiq davlat boji undiriladi.

Boj olinmaydigan savdo doʻkonining savdo zallari, yordamchi binolari va omborining hajmi va (yoki) ochiq maydonchalari kengayishi, qisqarishi, uning turi, tashkil etilgan hududdagi (manzildagi) joylashgan joyi oʻzgarishi munosabati bilan litsenziya oʻzgartirilganda, davlat boji mazkur bandning birinchi xatboshisida koʻrsatilgan toʻlanadigan summaning ellik foizi miqdorida undiriladi.

Litsenziya qayta rasmiylashtirilayotganda, davlat boji undirilmaydi.

71. Litsenziat oʻzgartirilgan, uning nomi yoki joylashgan joyi (pochta manzili) oʻzgarganda litsenziat yoki uning huquqiy vorisi qayta roʻyxatdan oʻtkazilishi munosabati bilan litsenziyani qayta rasmiylashtirishda davlat boji undirilmaydi.

72. Litsenziya berish toʻgʻrisidagi arizani koʻrib chiqqanlik uchun bazaviy hisoblash miqdorining ellik foizi miqdorida yigʻim undiriladi.

Litsenziya qayta rasmiylashtirilayotganda va (yoki) oʻzgartirilayotganda, litsenziya berish toʻgʻrisidagi arizani koʻrib chiqqanlik uchun toʻlanadigan summaning ellik foizi miqdorida yigʻim undiriladi.

73. Davlat bojlari va yigʻimlar summasi quyidagi tartibda taqsimlanadi:

10 foizi — Oʻzbekiston Respublikasi Adliya vazirligining Davlat xizmatlarini rivojlantirish jamgʻarmasining shaxsiy hisobvaragʻiga;

11,25 foizi — Axborot-kommunikatsiya texnologiyalarini rivojlantirish jamgʻarmasining elektron hukumat va raqamli iqtisodiyotning idoralararo loyihalarini moliyalashtirish boʻyicha maxsus hisobvaragʻiga;

qolgan davlat boji summasi — toʻliq miqdorda Oʻzbekiston Respublikasi Davlat budjetiga;

qolgan yigʻimlar summasi — toʻliq miqdorda Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasining maxsus jamgʻarmasiga oʻtkaziladi.

74. Litsenziya berilgani uchun davlat boji va davlati xizmati koʻrsatilgani uchun yigʻim toʻlanganligini tasdiqlash axborot-kommunikatsiya tizimlari orqali amalga oshiriladi.

Litsenziya berish uchun davlat bojini va davlat xizmatlari koʻrsatish uchun yigʻimni toʻlamaslik davlat xizmati koʻrsatishni rad etish uchun asos hisoblanadi.

10-bob. Litsenziatning javobgarligi. Bojxona toʻlovlari toʻlanishini taʼminlash

75. Boj olinmaydigan savdo doʻkonida tovarlar saqlanishi talablari va shartlariga rioya etilishi uchun litsenziat, tovar boj olinmaydigan savdo doʻkonida saqlash uchun qabul qilib olingan paytdan boshlab javob beradi, bu boj olinmaydigan savdo doʻkoni hujjatini (doʻkon guvohnomasi, tovarlarni qabul qilish-topshirish dalolatnomasi va hokazolarni) rasmiylashtirish hamda tovarning boj olinmaydigan savdo doʻkoniga qabul qilib olinganligi toʻgʻrisidagi axborotni Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasining axborot tizimiga kiritish orqali tasdiqlanadi.

76. Boj olinmaydigan savdo doʻkonida yongʻin xavfsizligi va sanitariya talablariga rioya etilishi uchun litsenziat javobgar hisoblanadi.

77. Boj olinmaydigan savdo doʻkonida saqlanayotgan tovarlarga nisbatan Oʻzbekiston Respublikasi Bojxona kodeksiga muvofiq bojxona toʻlovlarining toʻlanishi uchun litsenziat javobgar hisoblanadi.

78. Litsenziat tomonidan bojxona toʻlovlari toʻlanishini taʼminlash belgilangan talablarga muvofiq boʻlishi va quyidagi holatlarda bojxona toʻlovlari toʻlanishi taʼminlanishini nazarda tutishi kerak:

boj olinmaydigan savdo doʻkonida va uning savdo zallarida saqlanayotgan tovarlar toʻgʻrisidagi axborotni Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasining axborot tizimiga kiritilmasdan berib yuborilishi yoki yoʻqolishi;

litsenziatning xohishiga koʻra yoxud litsenziya bekor qilingach yoki litsenziyaning amal qilishi tugatilgan boj olinmaydigan savdo doʻkonining tugatilishi;

bojxona toʻlovlari toʻlanishi uchun litsenziat javobgar boʻladigan, bojxona haqidagi qonun hujjatlarida nazarda tutiladigan boshqa holatlar.

79. Boj olinmaydigan savdo doʻkoni faoliyatni amalga oshirish uchun bojxona toʻlovlari toʻlanishini taʼminlash bazaviy hisoblash miqdorining 10000 baravari miqdorida hisoblab chiqiladi.

Litsenziat boj olinmaydigan savdo doʻkoni boʻyicha taqdim etilgan bojxona toʻlovlari toʻlanishini taʼminlovchi hujjatning amal qilish muddati tugashidan bir oy oldin yoki bazaviy hisoblash miqdori oshgan taqdirda, ushbu miqdor oshgan kundan eʼtiboran bir oy muddat ichida mazkur Reglamentning 4-ilovasidagi 3-shaklga muvofiq bojxona toʻlovlari toʻlanishini taʼminlovchi hujjat kiritilgan soʻrovnomani toʻldirish orqali maxsus elektron tizim yoki YIDXP orqali bojxona toʻlovlari toʻlanishini taʼminlash summasiga tegishli tuzatishlar kiritish boʻyicha murojaat qilishi shart.

Litsenziyalovchi organ bojxona toʻlovlari toʻlanishini taʼminlovchi hujjat kiritilgan soʻrovnomani olgan kundan eʼtiboran oʻn kun muddatda ushbu hujjatni bojxona toʻlovlari toʻlanishini taʼminlash vositasi sifatida qabul qiladi yoki rad etadi va bu haqida xabarnoma yuboradi.

Quyidagi hollarda bojxona toʻlovlari toʻlanishini taʼminlovchi hujjatning bojxona toʻlovlari toʻlanishini taʼminlash vositasi sifatida qabul qilinishi rad etiladi:

bojxona toʻlovlari toʻlanishini taʼminlovchi hujjatda notoʻgʻri maʼlumotlar koʻrsatilganda;

bojxona toʻlovlari toʻlanishini taʼminlovchi hujjatni rasmiylashtirishga asos boʻlgan shartnoma taqdim etilmaganda;

bojxona toʻlovlari toʻlanishini taʼminlovchi hujjatda koʻrsatilgan summa miqdori Bojxona kodeksining 338-moddasida koʻrsatilgan miqdordan kam boʻlganda;

bojxona toʻlovlari toʻlanishini taʼminlovchi hujjat shartlari Bojxona kodeksining 344 va 345-moddalarida belgilangan, toʻlanishi lozim boʻlgan bojxona toʻlovlarining summasi va foizlar qonun hujjatlariga muvofiq bojxona organi tomonidan soʻzsiz tartibda undirib olinishi talablariga zid boʻlganda.

11-bob. Yakunlovchi qoidalar

80. Litsenziyalovchi organ oʻz faoliyatini amalga oshirishi natijasida olingan maʼlumotlarning sir saqlanishini taʼminlaydi.

81. Oʻzbekiston Respublikasi Adliya vazirligi huzuridagi Davlat xizmatlari agentligi Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi bilan hamkorlikda ushbu Reglament talablari ijrosi boʻyicha davlat organlari va boshqa tashkilotlarning faoliyati yuzasidan, shu jumladan, maxsus elektron tizim yoki YIDXP orqali, doimiy nazoratni amalga oshiradi va monitoring olib boradi.

82. Litsenziya daʼvogari davlat organlari va boshqa tashkilotlar xodimlarining xatti-harakatlari yuzasidan qonun hujjatlarida belgilangan tartibda shikoyat qilishlari mumkin.

83. Mazkur Reglament talablarining buzilishida aybdor boʻlgan shaxslar qonun hujjatlarida belgilangan tartibda javob beradilar.

Boj olinmaydigan savdo doʻkoni faoliyatini litsenziyalash yuzasidan davlat xizmatlarini koʻrsatishning maʼmuriy reglamentiga 1-ILOVA

(1-ilovaning matni Oʻzbekiston Respublikasi Vazirlar Mahkamasining 2023-yil 4-sentabrdagi 443-sonli qarori tahririda — Qonunchilik maʼlumotlari milliy bazasi, 05.09.2023-y., 09/23/443/0677-son — 2023-yil 6-dekabrdan kuchga kiradi)

Boj olinmaydigan savdo doʻkoni faoliyatini litsenziyalash yuzasidan davlat xizmatlarini koʻrsatishning maʼmuriy reglamentiga 2-ILOVA

Boj olinmaydigan savdo doʻkoni faoliyatini litsenziyalash yuzasidan davlat xizmatlarini koʻrsatishning maʼmuriy reglamentiga 3-ILOVA

Boj olinmaydigan savdo doʻkoni faoliyatini litsenziyalash jarayonida axborot-kommunikatsiya texnologiyalarini qoʻllagan holda, litsenziyani elektron shaklda rasmiylashtirish ishlarini amalga oshirish

SXEMASI

Bosqichlar Subyektlar Tadbirlar Bajarish muddatlari 1-bosqich Talabgor Litsenziya olish uchun maxsus elektron tizim yoki Yagona interaktiv davlat xizmatlari portali orqali soʻrovnoma toʻldiradi. Xohishiga koʻra 2-bosqich Maxsus elektron tizim yoki Yagona interaktiv davlat xizmatlari portali Soʻrovnomani litsenziyalovchi organga (Iqtisodiyot va moliya vazirligi huzuridagi Bojxona qoʻmitasining Qoraqalpogʻiston Respublikasi, viloyatlar, Toshkent shahar boʻyicha boshqarmalari, “Toshkent-AERO” ixtisoslashtirilgan bojxona kompleksiga) yuboradi. Avtomatik tarzda 3-bosqich Litsenziyalovchi organ Hujjatlarni koʻrib chiqish uchun ekspert komissiyasiga kiritadi. Hujjatlar qabul qilingan kunda 4-bosqich Ekspert komissiyasi Hujjatlarni litsenziyalash talablari va shartlariga rioya etilishini oʻrganish uchun bevosita bojxona omborini tashkil etish joyiga chiqqan holda koʻrib chiqadi, talabgorning litsenziyalash talablari va shartlariga mosligi toʻgʻrisida ekspert xulosasini tayyorlaydi. 1. Hujjatlar qabul qilingan kundan boshlab 15 ish kunidan ortiq boʻlmagan muddatda 2. Hujjat takroran taqdim etilganda, 2 ish kuni ichida 5-bosqich Litsenziyalovchi organ 1. Ekspert komissiyasining xulosasi asosida litsenziya berish yoki litsenziya berishni rad etish toʻgʻrisida qaror qabul qiladi. 2. Qabul qilingan qaror toʻgʻrisida talabgorga maxsus elektron tizim yoki Yagona interaktiv davlat xizmatlari portali orqali: litsenziya berish toʻgʻrisida qaror qabul qilinganda, davlat bojini amalga oshirish toʻgʻrisida; litsenziya berishni rad etish toʻgʻrisida qaror qabul qilinganda, rad etishning sabablari va talabgor koʻrsatilgan sabablarni bartaraf qilib, hujjatlarni koʻrib chiqish uchun takroran taqdim etishi mumkin boʻlgan muddat koʻrsatilgan xabarnomani yuboradi. 1. 3 ish kuni ichida 2. Qaror qabul qilingandan soʻng 1 ish kun ichida 6-bosqich Talabgor Litsenziya berish haqidagi xabarnoma kelib tushgandan soʻng litsenziya uchun davlat bojini toʻlaydi. 30 kun mobaynida 7-bosqich Litsenziyalovchi organ 1. Davlat boji toʻlanmagan taqdirda, litsenziyalovchi organ litsenziyani bekor qilish toʻgʻrisida qaror qabul qilishga haqlidir. 1. Litsenziya berish toʻgʻrisidagi xabarnoma yuborilgan paytdan eʼtiboran 30 kun oʻtgach 2. Ijobiy qaror mavjudligi va litsenziya berish uchun davlat boji toʻlangandan soʻng QR-kod bilan himoyalangan litsenziyani elektron raqamli imzo bilan tasdiqlab rasmiylashtiradi va litsenziyani talabgorga maxsus elektron tizim yoki Yagona interaktiv davlat xizmatlari portali orqali yuboradi. 2. 3 ish kunida

Boj olinmaydigan savdo doʻkoni faoliyatini litsenziyalash yuzasidan davlat xizmatlarini koʻrsatishning maʼmuriy reglamentiga 4-ILOVA

(4-ilovaning matni Oʻzbekiston Respublikasi Vazirlar Mahkamasining 2022-yil 5-sentabrdagi 487-sonli qarori tahririda — Qonunchilik maʼlumotlari milliy bazasi, 05.09.2022-y., 09/22/487/0794-son)

Boj olinmaydigan savdo doʻkoni faoliyatini litsenziyalash yuzasidan davlat xizmatlarini koʻrsatishning maʼmuriy reglamentiga 5-ILOVA

Boj olinmaydigan savdo doʻkoni faoliyatini litsenziyalash

PASPORTI*

1. Litsenziya nomi Boj olinmaydigan savdo doʻkoni faoliyatini amalga oshirish uchun litsenziya. 2. Litsenziyalanadigan faoliyat turlari Boj olinmaydigan savdo doʻkoni faoliyati. 3. Amalga oshirish mexanizmini tartibga soluvchi normativ-huquqiy hujjat Oʻzbekiston Respublikasi Vazirlar Mahkamasining “Bojxona ombori, erkin ombor va boj olinmaydigan savdo doʻkoni faoliyatini litsenziyalash yuzasidan davlat xizmatlarini koʻrsatishning maʼmuriy reglamentlarini tasdiqlash toʻgʻrisida” 2020-yil 9-apreldagi 210-son qarori. 4. Ariza beruvchilar toifasi Yuridik shaxs — Oʻzbekiston Respublikasi rezidenti. 5. Litsenziyalovchi organ Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasining Qoraqalpogʻiston Respublikasi, viloyatlar, Toshkent shahar boʻyicha boshqarmalari, “Toshkent-AERO” ixtisoslashtirilgan bojxona kompleksi. 6. Hujjatlarni topshirish tartibi “Litsenziya” axborot tizimi yoki Yagona interaktiv davlat xizmatlari portali orqali. 7. Litsenziyani olish uchun taqdim qilinadigan hujjatlar Litsenziya olish uchun quyidagi hujjatlar taqdim etiladi: talabgorning egaligida boʻlgan va boj olinmaydigan savdo doʻkoni sifatida foydalanish uchun moʻljallangan savdo zallari, yordamchi binolari va omborlari, ularning oʻlchamlari, hajmi va (yoki) maydoni, ular joylashgan joy, ularning jihozlanishi, videokuzatuv tizimi, asbob-uskunalar va moddiy-texnika bilan taʼminlanganligi hamda mulk huquqi, ashyoviy huquqlar yoki muddatlarini koʻrsatgan holda ijara asosida tegishliligi toʻgʻrisidagi maʼlumotlar; bojxona nazorati zonasi, aniq oʻlchamlari koʻrsatilgan holda boj olinmaydigan savdo doʻkonining savdo zallari, yordamchi binolari hamda omborlarining (shuningdek, yondosh hududlarning) sifatli chizmasi va kadastr yigʻma jildidagi tarhi; boj olinmaydigan savdo doʻkonida sotilishi moʻljallanayotgan tovarlar roʻyxati; Oʻzbekiston Respublikasi Bojxona kodeksiga muvofiq bojxona toʻlovlari toʻlanishi taʼminlanganligini tasdiqlovchi hujjat. 8. Arizani koʻrib chiqish uchun toʻlanadigan yigʻim miqdori Koʻrib chiqqanlik uchun bazaviy hisoblash miqdorining 50 foizi. Litsenziya qayta rasmiylashtirilayotganda va (yoki) oʻzgartirilayotganda, litsenziya berish toʻgʻrisidagi arizani koʻrib chiqqanlik uchun toʻlanadigan summaning 50 foizi miqdorida. 9. Litsenziya berilganligi uchun davlat boji miqdori Bazaviy hisoblash miqdorining 5 baravari. Litsenziya oʻzgartirilganda, litsenziya berilganligi uchun toʻlanadigan bojning ellik foizi miqdorida. Litsenziya qayta rasmiylashtirilayotganda, davlat boji undirilmaydi. 10. Arizani koʻrib chiqish va qaror qabul qilish muddatlari Talabgorning soʻrovnomasi barcha zarur hujjatlar bilan birgalikda kelib tushgan kundan boshlab, 20 ish kuni. 11. Litsenziya talablari va shartlari a) Boj olinmaydigan savdo doʻkoni hududi savdo zallari hududini, yordamchi binolar va doʻkon omborini oʻz ichiga oladi hamda bojxona nazorati zonasi hisoblanadi. b) Boj olinmaydigan savdo doʻkonining savdo zali, yordamchi binosi va ombori: boj olinmaydigan savdo doʻkonining normal faoliyat koʻrsatishi uchun yetarli boʻlgan maydonga ega boʻlishi; bir-biriga bevosita yaqin joyga (bojxona nazorati zonasida) joylashtirilishi kerak; quyidagilar bilan: tovarlar faqat boj olinmaydigan savdo doʻkonining savdo zallarida sotilishini hamda ularga nisbatan bojxona nazorati oʻtkazish imkoniyatini taʼminlaydigan tarzda jihozlanishi; bojxona organlarining dasturiy taʼminoti bilan mos keladigan tovarlar hisobini yuritadigan avtomatlashtirilgan tizim; aloqa vositalari (shu jumladan telefon, maʼlumot uzatish tarmogʻi, Internet); savdo zallari hududini, yordamchi binolar va doʻkon omborini toʻliq nazorat qilish hamda bojxona organlariga videomaʼlumotlarni uzatish, shuningdek, ushbu maʼlumotlarni uch oy davomida saqlash imkoniga ega boʻlgan uzluksiz ishlovchi videokuzatuv tizimi hamda litsenziyalovchi organ tomonidan belgilangan joylarda oʻrnatilgan, kunu-tun ishlaydigan videokuzatuv vositalari bilan jihozlanishi kerak. v) Oʻzbekiston Respublikasi Davlat chegarasi orqali oʻtkazish punktlaridan tashqarida joylashgan boj olinmaydigan savdo doʻkonining ombori qonun hujjatlarida bojxona omborlari uchun nazarda tutilgan tartibga muvofiq jihozlanishi kerak. g) Boj olinmaydigan savdo doʻkonining savdo zallari shunday joylashishi va jihozlanishi kerakki, ular tovarlarni but holatda saqlanishini taʼminlashi hamda quyidagilarni: Oʻzbekiston Respublikasi Davlat chegarasini kesib oʻtadigan jismoniy shaxslar uchun boj olinmaydigan savdo doʻkonidan sotib olingan tovarlar Oʻzbekiston Respublikasi bojxona hududida, shu jumladan ushbu hududda qolayotgan jismoniy shaxslarga berish yoʻli bilan qoldirilishini; tovarlarning bojxona nazoratidan tashqari tushishi va olib qoʻyilishini; tovarlarga begona shaxslarning yaqinlashishini istisno etadigan boʻlishi kerak. d) Oʻzbekiston Respublikasi Davlat chegarasini kesib oʻtadigan jismoniy shaxslar uchun boj olinmaydigan savdo doʻkonining savdo zallari bojxona nazorati zonasida joylashtirilishi kerak (pasport nazorati chizigʻi tashqarisida bojxona nazorati chizigʻigacha alohida — Oʻzbekiston Respublikasi hududiga kirib keladigan jismoniy shaxslar uchun, shuningdek, pasport nazorati chizigʻi tashqarisida — Oʻzbekiston Respublikasi hududidan chiqib ketayotgan jismoniy shaxslar uchun). Koʻrsatib oʻtilgan boj olinmaydigan savdo doʻkonining savdo zallari Oʻzbekiston Respublikasi Davlat chegarasini kesib oʻtmaydigan jismoniy shaxslarning ushbu zallarga kirishini istisno etadigan tarzda joylashtirilishi kerak. Oʻzbekiston Respublikasi Tashqi ishlar vazirligida akkreditatsiya qilingan xorijiy shaxslar uchun boj olinmaydigan savdo doʻkonining savdo zallari boj olinmaydigan savdo doʻkoni joylashgan bojxona organi faoliyati zonasida boʻlishi kerak. e) Bojxona nazorati va bojxona rasmiylashtiruvini amalga oshirish uchun, zarurat boʻlganda, litsenziat tomonidan bojxona organining mansabdor shaxslariga boj olinmaydigan savdo doʻkoni omborida jihozlangan bino va aloqa vositalari beriladi. Litsenziat tomonidan ushbu Reglament va qonunchilik hujjatlari talablarining buzilishi natijasida bojxona nazorati ostida boʻlgan tovarlarning yoʻqolishiga yoki boshqacha tarzda shikast yetkazilishiga olib kelsa yoxud boshqa shaxslarga berib yuborilsa, bunday hollarda qoʻpol qoidabuzarlik sodir etilgan deb hisoblanadi. 12. Nazorat tartibi Litsenziya talablari hamda shartlariga rioya etilishini litsenziyalovchi organ tomonidan nazorat qilish ushbu Reglament boʻyicha “xavfni tahlil qilish” tizimi natijalari hamda jismoniy va yuridik shaxslarning qonunchilik buzilishi faktlari toʻgʻrisidagi murojaatlari asosida amalga oshiriladi. Litsenziya talablari va shartlariga rioya etilishi yuzasidan nazoratni amalga oshirishda litsenziyalovchi organ oʻz vakolatlari doirasida quyidagi huquqlarga ega: litsenziat tomonidan ushbu Reglamentda belgilangan litsenziya talablari va shartlariga rioya etilishini tekshirishni Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil bilan kelishilgan, qonunchilikda belgilangan tartibda joyiga chiqqan holda oʻtkazish; litsenziya talablari va shartlariga rioya etilishini tekshirish davomida paydo boʻladigan masalalar yuzasidan litsenziatdan zarur maʼlumotlarni soʻrash va olish; tekshirishlar natijalari asosida litsenziat tomonidan litsenziya talablari va shartlarining aniq buzilishlarini koʻrsatgan holda, dalolatnomalar (maʼlumotnomalar) tuzish; litsenziatga aniqlangan buzilishlarni bartaraf etish majburiyatini yuklovchi qarorlar chiqarish, bunday buzilishlarni bartaraf etish muddatlarini belgilash; litsenziyaning amal qilishini toʻxtatib turish yoki litsenziyani bekor qilish toʻgʻrisida qonun hujjatlarida belgilangan tartibda qaror chiqarish yoxud sudga murojaat qilish. Boj olinmaydigan savdo doʻkonida bojxona nazorati ostida boʻlgan tovarlarga Oʻzbekiston Respublikasi Bojxona kodeksiga muvofiq, bojxona nazorat shakllarini qoʻllash Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil bilan kelishishni talab etmaydi. 13. Bojxona toʻlovlari toʻlanishini taʼminlash Boj olinmaydigan savdo doʻkoni faoliyatni amalga oshirish uchun bojxona toʻlovlari toʻlanishini taʼminlash bazaviy hisoblash miqdorining 10 000 baravari miqdorida hisoblab chiqiladi. Litsenziat taqdim etilgan bojxona toʻlovlari toʻlanishini taʼminlovchi hujjatning amal qilish muddati tugashidan bir oy oldin yoki BHM oshgan kundan bir oy muddatda bojxona toʻlovlari toʻlanishini taʼminlash summasiga tegishli tuzatishlar kiritish boʻyicha murojaat qilishi shart. 14. Litsenziya berishda kelishiladigan organlar 1. Oʻzbekiston Respublikasi Favqulodda vaziyatlar vazirligidan: boj olinmaydigan savdo doʻkonining hududi yongʻin xavfsizligi talablariga muvofiqligi toʻgʻrisidagi xulosa (10 ish kuni ichida); agar boj olinmaydigan savdo doʻkonida yonish va portlash xavfi yuqori boʻlgan kimyoviy moddalarni (mahsulotlarni) saqlash koʻzda tutilsa, obyektning (omborning) yongʻin va sanoat xavfsizligi talablariga muvofiqligi yuzasidan xulosa (10 ish kuni ichida). 2. Oʻzbekiston Respublikasi Sogʻliqni saqlash vazirligi huzuridagi Sanitariya-epidemiologik osoyishtalik va jamoat salomatligi qoʻmitasidan — boj olinmaydigan savdo doʻkonining hududi sanitariya-epidemiologik normalariga muvofiqligi toʻgʻrisidagi xulosa (10 ish kuni ichida). 15. Litsenziyaning amal qilish muddati Cheklanmagan.

https://neolex.uz/uz/laws/law-4788459