Respublika hududida joylashgan barcha xoʻjalik subyektlarini davlat roʻyxatiga kiritish haqida (318-son)
10.07.1992
Oʻzbekiston Respublikasi Prezidenti huzuridagi Vazirlar Mahkamasining
qarori
Barcha xoʻjalik subyektlarini roʻyxatdan oʻtkazishni taʼminlashga oid amaliy chora-tadbirlar koʻrish maqsadida Vazirlar Mahkamasi qaror qiladi:
1. Oʻzbekiston Respublikasi xoʻjalik subyektlarining davlat roʻyxati haqidagi ilova qilinayotgan Nizom tasdiqlansin.
2. Oʻzbekiston Respublikasi davlat statistika qoʻmitasiga xoʻjalik subyektlarini roʻyxatga olish, moliya-xoʻjalik faoliyatini tavsiflovchi iqtisodiy-statistik koʻrsatkichlarning doimiy tarkibini ifodalovchi xoʻjalik subyektlari roʻyxatlari bankini tashkil etish va boshqarish yuklatilsin.
3. Tadbirkorlik va yakka tartibdagi mehnat faoliyati bilan shugʻullanuvchi vazirliklar, idoralar, konsernlar, uyushmalar, kompaniyalar, birjalar, barcha tashkiliy-huquqiy shakldagi korxona va tashkilotlar rahbarlari hamda jismoniy shaxslar 1992-yilning 1-dekabrigacha davlat statistika qoʻmitasining bosh hisoblash markazi (BHM), Qoraqalpogʻiston davlat statistika qoʻmitasida, viloyatlar va Toshkent shahar statistika boshqarmalarida roʻyxat (qayta roʻyxat)dan oʻtsinlar.
4. Respublika hududida joylashgan vazirliklar, idoralar, konsernlar, uyushmalar, birlashmalar, korxona va tashkilotlar rahbarlari zimmasiga statistika organlarida xoʻjalik subyektlarini oʻz vaqtida roʻyxat (qayta roʻyxatdan oʻtkazish uchun shaxsiy javobgarlik yuklatilsin.
5. Oʻzbekiston Respublikasi Moliya vazirligi, shartnomalar va savdo boʻyicha davlat-aksionerlik uyushmasi Oʻzbekiston Respublikasi davlat statistika qoʻmitasiga xoʻjalik subyektlari roʻyxatini olib yurish uchun uning hisob-kitobiga asosan moliya mablagʻlari va zarur miqdorda qogʻoz ajratishni taʼminlasinlar.
6. Oʻzbekiston Respublikasi davlat matbuot qoʻmitasi ikki oy muddat ichida roʻyxatga olish kartochkalarini bosmadan chiqarsin, Oʻzbekiston Respublikasi davlat statistika qoʻmitasi esa mulkchilikning barcha shakllaridagi vazirliklar, idoralar, konsernlar, uyushmalar, kompaniyalar, birjalar, birlashmalar, korxonalar, tashkilotlarni va yakka tartibdagi mehnat faoliyati bilan shugʻullanuvchi xususiy shaxslarni roʻyxatga olish kartochkalari bilan taʼminlasin.
7. Mazkur qarorning bajarilishini nazorat qilish Oʻzbekiston Respublikasi Prezidenti huzuridagi Vazirlar Mahkamasi komplekslari rahbarlari zimmasiga, Qoraqalpogʻiston Respublikasi Vazirlar kengashiga, viloyatlar va Toshkent shahar hokimliklariga yuklatilsin.
Oʻzbekiston Respublikasining Bosh vaziri A. MUTALOV
Toshkent sh.,
1992-yil 10-iyul,
318-son
Vazirlar Mahkamasining 1992-yil 10-iyuldagi 318-son qarori bilan TASDIQLANGAN
Oʻzbekiston Respublikasi xoʻjalik subyektlari davlat roʻyxati haqida
NIZOM
UMUMIY QOIDALAR
1. Ushbu Nizom xoʻjalik subyektlari tarkibini va kuzatiladigan iqtisodiy koʻrsatkichlar maʼlumotlarini, axborotlarni toʻplash, qayta ishlash, yangilab turishning davriyligini va Oʻzbekiston Respublikasining turli mulkchilik shaklidagi xoʻjalik subyektlari davlat roʻyxatini olib borish tartibini belgilaydi.
2. Oʻzbekiston Respublikasi xoʻjalik subyektlari davlat roʻyxatini tuzish va olib borishdan maqsad jahon standartlari talablariga javob beruvchi, korxonalar va tashkilotlarning davriy statistik hisobotini qayta ishlashni keskin qisqartirish imkonini beruvchi, bir yoʻla axborotning toʻliqligini taʼminlovchi statistik maʼlumotlarni qayta ishlashning ilgʻor usullarini joriy qilish uchun Oʻzbekiston Respublikasi hududida xoʻjalik subyektlarini davlat tomonidan hisobga olishning yagona negizi asosida yalpi statistik kuzatuvni tashkil qilishning ishonchli asosini taʼminlashdir.
3. Xoʻjalik subyektlarining davlat roʻyxati Respublika hududida joylashgan xoʻjalik subyektlari haqidagi maʼlumotlarning yaxlit banki (maʼlumotlar yigʻindisi) boʻlib, u moliya, adliya organlari, markaziy banklar va boshqa respublika organlarining avtomatlashtirilgan respublika reyestrlari bilan birgalikda harakat qilishini taʼminlaydi. Xoʻjalik subyektlarining davlat roʻyxati xoʻjalik subyektlarining hududiy roʻyxatlari yigʻindisini oʻzida namoyon etadi.
4. Xoʻjalik subyektlarining hududiy roʻyxati — bu mazkur hududda (Qoraqalpogʻiston Respublikasi, viloyatlar, Toshkent sh.) joylashgan xoʻjaliklar birliklari haqidagi maʼlumotlar bankidir.
5. Roʻyxatlarni saqlovchilar quyidagilar hisoblanadilar:
Respublika boʻyicha — Oʻzbekiston Respublikasi davlat statistika qoʻmitasining bosh hisoblash markazi;
hududiylari boʻyicha — Qoraqalpogʻiston Davlat statistika qoʻmitasi, viloyatlar, Toshkent shahar statistika boshqarmalari
6. Xoʻjalik subyektlari davlat roʻyxatining asosi boʻlib, korxonalar va tashkilotlarning umumiy klassifikatori (KTUK)dir davlat roʻyxatida roʻyxatga olinuvchi va kuzatiluvchi har bir obyektga oʻxshash (identifikatsion) xos raqam (kod) berilib, turli foydalanuvchilar tomonidan axborotlarni ishlashda hamda moliyaviy va iqtisodiy amallarni bajarishda, tijorat sirlarini taʼminlashda foydalaniladi.
7. Xoʻjalik subyektlari roʻyxatiga har bir xoʻjalik subyekti boʻyicha ilovada keltirilgan roʻyxat kartochkalarining maʼlumotlari kiritiladi.
Respublika va hududiy roʻyxat maʼlumotlari tarkibiga oʻzgartish (kamaytirish yoki kengaytirish)larni Oʻzbekiston Respublikasi davlat statistika qoʻmitasi kiritishi mumkin.
8. Xoʻjalik subyektlari davlat roʻyxati maʼlumotlaridan belgilangan tartibda foydalanuvchilar hamkorlik qilishi mumkin boʻlgan sheriklar haqida axborot olishdan manfaatdor boʻlganlar boshqaruv organlari, korxonalar, shuningdek, xorijiy ishbilarmonlar, jamoatchilik, ommaviy axborot vositalari, alohida fuqarolardir.
9. Dastlabki statistik axborotdan, statistika organlaridan tashqari, faqat xoʻjalik subyektlarining davlat roʻyxati obyektlarigina oʻz obyektini tavsiflovchi axborot qismida foydalanishi mumkin.
10. Roʻyxat kartochkalarida sanab oʻtilgan statistik koʻrsatkichlarning belgilangan tarkibi boʻyicha maʼlumotlar yillik davriylikda taqdim etiladi.
11. Roʻyxatning belgilab qoʻyilmagan maʼlumotlarini berish xoʻjalik subyektlari davlat roʻyxatini saqlovchilar tomonidan oʻrnatiladi va belgilangan tartibda ruxsat etiladi.
XOʻJALIK SUBYEKTLARI MAʼLUMOTLARI TARKIBI VA ROʻYXATGA OLISh TARTIBI
12. Oʻzbekiston Respublikasi hududida joylashgan, respublika qonunchilik aktlariga muvofiq davlat roʻyxatidan oʻtgan va yuridik shaxs maqomiga ega boʻlgan davlat va xoʻjalik boshqaruvi organlari, vazirliklar, idoralar, konsernlar, uyushmalar, kompaniyalar, birjalar, barcha tashkiliy-huquqiy shakldagi korxona va tashkilotlar, ishbilarmonlik va yakka tartibda mehnat faoliyati bilan shugʻullanuvchi jismoniy shaxslar, jamoat va diniy birlashmalar hisobga olinishi va kuzatilishi lozim boʻlgan xoʻjalik subyektlari boʻlib hisoblanadilar undan tashqari, respublikadan tashqarida kapital qoʻyilmalari boʻlgan xoʻjalik subyektlari kuzatiladi.
13. Roʻyxatdan oʻtishi va kuzatilishi lozim boʻlgan yangi tuzilgan xoʻjalik subyektlari roʻyxatdan oʻtish kartochkasini toʻldiradilar va Qoraqalpogʻiston Respublikasi Davlat statistika qoʻmitasi, viloyatlar, Toshkent shahar statistika boshqarmalarining xizmat koʻrsatish boʻlinmalariga tegishli hokimiyat va boshqaruv organlarida roʻyxatdan oʻtkazilgan kundan boshlab 10 kun muddatda topshiradilar.
Xoʻjalik subyektlari davlat roʻyxati vujudga kelgan vaqtdan beri mavjud boʻlgan xoʻjalik subyektlari roʻyxat kartochkasining oʻtgan yil uchun yillik statistik maʼlumotlar qismini toʻldiradilar va belgilangan tartibda xoʻjalik subyektlari davlat roʻyxatini olib boruvchi xizmat koʻrsatish boʻlinmalariga topshiradilar.
14. Roʻyxatdan oʻtkazish kartochkasi rahbar tomonidan yoki axborotning ishonchliligi, shuningdek, qonun bilan belgilangan intizomga, moddiy va jinoiy javobgarlikka rioya qilinishi uchun masʼul boʻlgan roʻyxatga olinayotgan obyekt egasi tomonidan imzolanadi.
15. Tegishli statistika organlarining roʻyxatni olib boruvchi xizmati roʻyxatga olish kartochkasi maʼlumotlarini nazorat qiladi, tegishli klassifikatorlar bilan ularga xos raqam beradi.
MAʼLUMOTLARNI TOʻPLASh, IShLASh, ROʻYXATNING DAVRIYLIGI VA UNI YURITISh
16. Roʻyxatga kiritiladigan xoʻjalik subyektlari haqida maʼlumotlarni toʻplash korxona va tashkilotlarning umumiy klassifikatori asosida hisobga olinishi jarayonida amalga oshiriladi.
17. Muayyan hududdagi (Qoraqalpogʻiston Respublikasi, viloyatlar va Toshkent shahri) xoʻjalik subyektlarini hisobga olishning toʻlaligini nazorat qilish tegishli statistika organlari tomonidan, obyektlarni taqqoslash yoʻli bilan amalga oshiriladi.
18. Hisobot yili uchun xoʻjalik subyektlarining yillik iqtisodiy faoliyatini tavsiflovchi (xarakterlovchi) dastlabki statistik maʼlumotlarning har yilgi yangilanishi joriy yilning 30-yanvarida roʻyxat kartochkasi asosida (33 — 126-bandlar), “Xoʻjalik subyektlarini roʻyxatga olish va kuzatish tartibi haqidagi yoʻriqnomaga muvofiq amalga oshiriladi.
19. Roʻyxatni olib borishda unga hamma oʻzgartishlar va aniqlangan maʼlumotlar mazkur Nizomda belgilangan tartibda kiritiladi. Roʻyxatga (1 dan 32-bandgacha) kiritilishi lozim boʻlgan oʻzgartishlar haqidagi maʼlumotlarni xoʻjalik subyektlari oʻzgartish amalga oshirilgan paytdan boshlab 10 kun muddat ichida taqdim etishga majburdirlar, roʻyxatni olib boruvchi xizmatga xoʻjalik subyektlarining ruxsatisiz oʻzgartishlar kiritish man etiladi.
20. Xoʻjalik subyektini qayta tashkil etish yoki tugatishda tugatish komissiyasi yoxud uni tugatishga vakolatli boshqa organ 10 kun muddatda, oʻz navbatida, roʻyxatni olib boruvchi xizmatni bu haqda ogohlantiradi.
21. Roʻyxatga olish xizmatini olib boruvchi har oyning 7-sanasigacha xoʻjalik subyektlari davlat roʻyxatida roʻyxatdan oʻtgan yangi tuzilganlar roʻyxatini, shuningdek, oʻtgan oyda tugatilgan xoʻjalik subyektlarining roʻyxatini mahalliy boshqaruv organlariga, bu organlar tomonidan xoʻjalik subyektlari xususiyatlarining toʻlaligini nazorat qilish maqsadida, aniqlangan nomuvofiqliklar haqida xoʻjalik subyektlarining davlat roʻyxati xizmatini keyinchalik xabardor etadi.
ROʻYXATNI OLIB BORIShDA IShTIROK ETUVChI TAShKILOTLARNING VAZIFALARI
22. Qoraqalpogʻiston Respublikasi Davlat statistika qoʻmitasi, viloyatlar va Toshkent shahar statistika boshqarmalari:
oʻxshash (identifikatsiya) xos raqamlarni korxona va tashkilotlarning umumiy klassifikatori (KTUK) boʻyicha yangi xoʻjalik subyektlariga berilishini, roʻyxat kartochkalarida sanab oʻtilgan texnik-iqtisodiy axborotning umumiy klassifikatorining boshqa xos raqamlarini berish (oʻzgartirish)ni taʼminlaydilar;
korxona va tashkilotlarning umumiy klassifikatori asosida mahalliy hokimiyat va boshqaruv organlarida davlat roʻyxatidan oʻtgan xoʻjalik subyektlarining davlat hisobini taʼminlaydilar;
korxona va tashkilotlar umumiy klassifikatorining avtomatlashtirilgan usulda olib borilishini va korxonalar hamda tashkilotlar umumiy klassifikatorining respublika boʻlimi bilan birga harakat qilishini amalga oshiradilar;
hududiy roʻyxatdagi oʻzgartishlar haqida axborotlar toʻplashni amalga oshiradilar;
hududiy roʻyxatga oʻzgartishlar kiritadilar va bu oʻzgartishlarni har oʻn kunda Oʻzbekiston Respublikasi Davlat statistika qoʻmitasining bosh hisoblash markaziga yuboradilar;
xoʻjalik subyektlari boʻyicha statistik maʼlumotlarning har yilgi yangilanishini amalga oshiradilar;
respublikada belgilangan tartibda axborot xizmatini bajaradilar.
23. Oʻzbekiston respublikasi davlat statistika qoʻmitasining bosh hisoblash markazi:
Respublika qonunchiligiga muvofiq roʻyxatdan oʻtishi lozim boʻlgan xoʻjalik subyektlariga korxona va tashkilotlarning umumiy klassifikatorining identifikatsiya kodlarini berishni taʼminlaydi (masalan, Adliya, Moliya vazirliklari va bank hamda boshqa respublika organlari roʻyxatdan oʻtkazadigan yangi respublika jamoat tashkilotlariga);
roʻyxat kartochkalarida sanab oʻtilgan maʼlumotlar boʻyicha texnika-iqtisodiy axborotlarning umumiy klassifikatori boshqa xos raqamlarini berishni (oʻzgartishni) taʼminlaydi;
respublika hududida korxona va tashkilotlarning umumiy klassifikatori tarkibida davlat roʻyxatidan oʻtgan xoʻjalik subyektlarining davlat hisobini taʼminlaydi;
mahalliy statistika organlari boshqarmalaridan hududiy roʻyxatga oʻzgartishlarni toʻplashni bajaradi;
korxona va tashkilotlarning umumiy klassifikatori respublika boʻlimini olib borishni amalga oshiradi va korxona, tashkilotlar umumiy klassifikatorining davlat etaloni bilan oʻzaro harakatni taʼminlaydi;
respublika roʻyxatiga oʻzgartishlar kiritadi;
roʻyxatga kiritiladigan oʻzgartishlar haqidagi maʼlumotnomani roʻyxatdan oʻtkazuvchi tashkilotlarga yuboradi;
xoʻjalik subyektlari boʻyicha statistik maʼlumotlarni yangilashni amalga oshiradi;
xoʻjalik subyektlari davlat roʻyxatini saqlovchi belgilagan tartibda roʻyxat maʼlumotlaridan foydalanuvchilarga axborot-maʼlumotnoma xizmatini amalga oshiradilar.
XOʻJALIK SUBYEKTLARI DAVLAT ROʻYXATINI TUZISh VA OLIB BORIShNI MOLIYAVIY TAʼMINLASh
24. Xoʻjalik subyektlari davlat roʻyxatini tuzish va olib borish, shuningdek, foydalanuvchilarga reglament xizmati koʻrsatish xarajatlari budjetdan moliyaviy taʼminlash orqali amalga oshiriladi.
XOʻJALIK SUBEKTLARI DAVLAT ROʻYXATINING TUGATILIShI
25. Oʻzbekiston Respublikasi xoʻjalik subyektlari davlat roʻyxatini tugatish qonun bilan belgilangan tartibda amalga oshiriladi.
ILOVA
ROʻYXAT KARTOChKASI