Korxonalar, tashkilotlar va muassasalarga bozor jamgʻarmasi tovarlarini mayda ulgurji savdo boʻyicha sotishni tartibga solish toʻgʻrisida (314-son)

08.07.1992

Oʻzbekiston Respublikasi Prezidenti huzuridagi Vazirlar Mahkamasining

qarori

Pul muomalasining holati ustidan nazoratni kuchaytirish va respublika aholisini xalq isteʼmoli mollari bilan taʼminlashni yaxshilash, bozordan tashqari boʻlgan isteʼmolchilarga bozor jamgʻarmasi tovarlarini sotishni tartibga solish va Oʻzbekiston Respublikasi Davlat banki kassalariga naqd pul tushishini koʻpaytirish maqsadida Vazirlar Mahkamasi qaror qiladi:

1. “Oʻzbeksavdo” uyushmasi, Oʻzbekbirlashuv va Oʻzbekiston Respublikasi Davlat banki bir oy muddat ichida korxonalarga, tashkilotlarga, muassasalarga, kolxozlarga va sovxozlarga Qoraqalpogʻiston Respublikasi, viloyatlar va Toshkent shahri uchun yagona mayda ulgurji tartibda bozor jamgʻarmasi tovarlarini sotish qoidasini ishlab chiqsinlar.

2. “Oʻzbeksavdo” uyushmasi va Oʻzbekbirlashuv birgalikda 10 kun muddat ichida respublika uchun mayda ulgurji savdo boʻyicha sotilishi taqiqlangan oziq-ovqat tovarlarining roʻyxatini belgilasinlar.

3. “Oʻzbeksavdo” uyushmasi va Oʻzbekbirlashuv birgalikda umuman respublika boʻyicha mayda ulgurji savdo limitining har kvartal uchun hajmini belgilasinlar va Qoraqalpogʻiston Respublikasi, viloyatlar va Toshkent shahri boʻyicha ularni taqsimlasinlar.

4. “Oʻzbeksavdo” uyushmasi, Oʻzbekbirlashuv, savdo tarmogʻiga ega boʻlgan vazirliklar va idoralar:

chakana savdo va umumiy ovqatlanish korxonalari tarmoqlaridan bozor jamgʻarmasiga qarashli oziq-ovqat tovarlarini aholining tegishli toifalarini ovqatlantirishni tashkil etish uchun ijtimoiy-madaniy soha muassasalari va tashkilotlariga (bolalar, davolash, davolash-profilaktika muassasalari, dam olish uylari, keksalar internatlari, nogironlar uylari, oʻquv muassasalari va boshqalar) mayda ulgurji limitlarni cheklamagan holda sotsinlar;

chakana savdo tarmogʻidagi va umumiy ovqatlanish korxonalaridagi bozor jamgʻarmasiga qarashli oziq-ovqat tovarlarini boshqa muassasalar va tashkilotlarga Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining ana shu tovarlarga boʻlgan ehtiyojini hisobga olgan holda, qabul qilingan qarorlar boʻyicha yuqorida koʻrsatilgan tartibda, ushbu tovarlarni sotib olishga moʻljallangan mablagʻlar va pullariga qarab sotsinlar.

Chakana savdo tarmogʻidan bozor jamgʻarmasining nooziq-ovqat tovarlarini sotish “Oʻzbeksavdo” uyushmasi va Oʻzbekbirlashuv tomonidan belgilangan mayda ulgurji savdoning qatʼiy limiti boʻyicha amalga oshirilsin.

Oʻrnatilgan mayda ulgurji savdo limiti hisobiga nooziq-ovqat tovarlarini sotib olishda ijtimoiy-madaniy xizmat koʻrsatuvchi muassasalarga (bolalar uylari, davolash, sogʻlomlashtirish, oʻquv muassasalari va boshqalar) birinchi galda imkon yaratilsin.

5. Belgilab qoʻyilsinki, chakana savdo va umumiy ovqatlanish tarmoqlaridan bozor jamgʻarmasiga qarashli tovarlarning korxonalarga, tashkilotlarga va muassasalarga sotilish hajmi chakana tovar oborotiga kiritiladi.

6. Oʻzbekiston Respublikasi Davlat banki bir oy muddat ichida bank muassasalari tomonidan korxonalar, tashkilotlar va kolxozlarga mayda ulgurji tartibda bozor jamgʻarmasi tovarlarini sotish qoidalariga rioya etilishi ustidan nazorat tartibini belgilasin.

7. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, “Oʻzbeksavdo” uyushmasi, Oʻzbekbirlashuv va savdo tarmogʻiga ega boʻlgan vazirliklar, idoralar va Oʻzbekiston Respublikasi Davlat banki mayda ulgurji savdo boʻyicha korxonalar, tashkilotlar, muassasalar, kolxoz va sovxozlarda bozor jamgʻarmasi tovarlaridan toʻgʻri foydalanish ustidan doimiy nazorat oʻrnatsinlar, tartibni buzish hollariga barham bersinlar.

8. Oʻzbekiston SSR Ministrlar Sovetining 1988-yil 25-martdagi 119-son qarori oʻz kuchini yoʻqotgan deb hisoblansin.

9. Ushbu qarorning bajarilishi ustidan nazorat Oʻzbekiston Respublikasi Bosh vazirining oʻrinbosari oʻrtoq A. N. Voznenko zimmasiga yuklatilsin.

Oʻzbekiston Respublikasining Bosh vaziri A. MUTALOV

Toshkent sh.,

1992-yil 8-iyul,

314-son