Oʻzbekiston Respublikasi Uy-joy kommunal xizmat koʻrsatish vazirligi huzuridagi Ichimlik suvidan foydalanishni nazorat qilish inspeksiyasi toʻgʻrisidagi nizomni tasdiqlash haqida (108-son)

24.02.2020

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Aholining ichimlik suvi bilan taʼminlanganlik darajasini oshirish va uning sifatini yaxshilash uchun Oʻzbekiston Respublikasining suv resurslarini boshqarishni takomillashtirish chora-tadbirlari toʻgʻrisida” 2019-yil 26-noyabrdagi PF-5883-son Farmoni ijrosini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Uy-joy kommunal xizmat koʻrsatish vazirligi huzuridagi Ichimlik suvidan foydalanishni nazorat qilish inspeksiyasi toʻgʻrisidagi nizom ilovaga muvofiq tasdiqlansin.

2. Oʻzbekiston Respublikasi Uy-joy kommunal xizmat koʻrsatish vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari A.J. Ramatov va Oʻzbekiston Respublikasi uy-joy kommunal xizmat koʻrsatish vaziri M.X. Saliyev zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2020-yil 24-fevral,

108-son

Vazirlar Mahkamasining 2020-yil 24-fevraldagi 108-son qaroriga ILOVA

Oʻzbekiston Respublikasi Uy-joy kommunal xizmat koʻrsatish vazirligi huzuridagi Ichimlik suvidan foydalanishni nazorat qilish inspeksiyasi toʻgʻrisida

NIZOM

1-bob. Umumiy qoidalar

1. Ushbu Nizom Oʻzbekiston Respublikasi Uy-joy kommunal xizmat koʻrsatish vazirligi huzuridagi Ichimlik suvidan foydalanishni nazorat qilish inspeksiyasining (keyingi oʻrinlarda Inspeksiya deb ataladi) asosiy vazifalari, funksiyalari, huquqlari, javobgarligi va faoliyatini tashkil etish va hisobot berishi tartibini, shuningdek, uning rahbariyatining funksional majburiyatlari va javobgarligini belgilaydi.

2. Inspeksiya ichimlik suvi taʼminoti va kanalizatsiya sohasida davlat nazoratini amalga oshirish boʻyicha vakolatli organ hisoblanadi va oʻz faoliyatida Oʻzbekiston Respublikasi Uy-joy kommunal xizmat koʻrsatish vazirligiga (keyingi oʻrinlarda Uy-joy kommunal xizmat koʻrsatish vazirligi deb ataladi) hisobot beradi.

Inspeksiya oʻz vakolati doirasida Oʻzbekiston Respublikasi Vazirlar Mahkamasi huzuridagi Ichimlik suvidan foydalanishni nazorat qilish davlat inspeksiyasining huquq va majburiyatlari boʻyicha huquqiy vorisi hisoblanadi.

3. Inspeksiya oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlis palatalarining qapoplariga, Oʻzbekiston Respublikasi Prezidentining farmonlari, qarorlariga va farmoyishlariga, Vazirlar Mahkamasining qarorlari va farmoyishlariga, Uy-joy kommunal xizmat koʻrsatish vazirligi qarorlariga, shuningdek, ushbu Nizomga va boshqa qonun hujjatlariga amal qiladi.

4. Inspeksiyaning oʻz vakolatlari doirasida qabul qilingan qarorlari davlat boshqaruvi organlari, xoʻjalik birlashmalari, mahalliy ijro etuvchi hokimiyat organlari, boshqa tashkilotlar va ularning mansabdor shaxslari, shu jumladan, fuqarorlar tomonidan bajarilishi majburiy hisoblanadi.

5. Inspeksiya yuridik shaxs hisoblanadi, Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan muhrga va blankalarga, mustaqil balansga, Oʻzbekiston Respublikasi Moliya vazirligi Gʻaznachiligida shaxsiy gʻazna hisobvaraqlariga ega boʻladi.

Inspeksiyaning Qoraqalpogʻiston Respublikasi, viloyatlar va Toshkent shahar hududiy inspeksiyalari (keyingi oʻrinlarda hududiy inspeksiyalar deb ataladi) yuridik shaxs maqomiga ega emas.

6. Inspeksiya va uning hududiy inspeksiyalari faoliyati davlat budjeti va qonun hujjatlari bilan taqiqlanmagan boshqa manbalar hisobiga moliyalashtiriladi.

7. Inspeksiyaning rasmiy nomi:

a) davlat tilida:

toʻliq nomi — Oʻzbekiston Respublikasi Uy-joy kommunal xizmat koʻrsatish vazirligi huzuridagi Ichimlik suvidan foydalanishni nazorat qilish inspeksiyasi;

qisqartirilgan nomi — Suvinspeksiya;

b) rus tilida:

toʻliq nomi — Inspeksiya po kontrolyu za ispolzovaniyem pityevoy vodi pri Ministerstve jiliщno-kommunalnogo obslujivaniya Respubliki Uzbekistan;

qisqartirilgan nomi — Vodinspeksiya;

v) ingliz tilida:

toʻliq nomi — Inspectorate for Oversight over Use of Drinking Water under the Ministry of Housing and Public Utilities of Republic of Uzbekistan;

qisqartirilgan nomi — Waterinspectorate.

8. Inspeksiyaning markaziy apparati joylashgan joy: Toshkent shahri, Niyozbek yoʻli koʻchasi, 1-uy.

9. Inspeksiya tizimiga Inspeksiyaning markaziy apparati va hududiy inspeksiyalari kiradi.

2-bob. Inspeksiyaning asosiy vazifalari va funksiyalari

10. Quyidagilar inspeksiyaning asosiy vazifalari hisoblanadi:

ichimlik suvini oqilona va samarali ishlab chiqarish, yetkazib berish va realizatsiya qilish, ichimlik suvidan foydalanish, kanalizatsiya va oqova suvlarni tozalash xizmatlari koʻrsatish sohasida texnik jihatdan tartibga solishga doir normativ hujjatlar talablariga rioya qilinishi ustidan davlat nazoratini amalga oshirish;

ichimlik suvi taʼminoti va kanalizatsiya xizmatlari koʻrsatuvchi korxonalar (keyingi oʻrinlarda suv taʼminoti va kanalizatsiya korxonalari deb ataladi) tomonidan texnologik jarayonni takomillashtirishga va energiyani tejashga yoʻnaltirilgan suv taʼminoti va kanalizatsiya tizimi obyektlari texnologik auditdan oʻtkazilishi ustidan davlat nazoratini amalga oshirish;

suv taʼminoti va kanalizatsiya tizimiga oʻzboshimchalik bilan ulanib olishga yoʻl qoʻymaslik hamda ichimlik suvi taʼminoti va kanalizatsiya tizimiga ulanishning texnik shartlari talablariga rioya etilishi ustidan davlat nazoratini amalga oshirish;

ichimlik suvi taʼminoti va kanalizatsiya tizimi obyektlarining holati va ulardan foydalanish shartlari, suv taʼminoti va kanalizatsiya tizimidagi shikastlanishlar va avariyalarning profilaktikasi hamda ularning oldini olish boʻyicha ishlab chiqilgan tadbirlarning amalga oshirilishi, ichimlik suvi yoʻqotilishining belgilangan meʼyorlariga rioya etilishi ustidan davlat nazoratini amalga oshirish;

tashkiliy-huquqiy shakllaridan qatʼi nazar yer osti ichimlik suvi quduqlarining holati va ulardan foydalanish shartlariga rioya etilishi ustidan davlat nazoratini amalga oshirish.

11. Inspeksiya oʻziga yuklangan vazifalarni bajarish uchun quyidagi funksiyalarni amalga oshiradi:

a) ichimlik suvini oqilona va samarali ishlab chiqarish, yetkazib berish va realizatsiya qilish, ichimlik suvidan foydalanish, kanalizatsiya va oqova suvlarni tozalash xizmatlari koʻrsatish sohasida texnik jihatdan tartibga solishga doir qonunlar va normativ hujjatlar talablariga rioya qilinishi ustidan davlat nazoratini amalga oshirish sohasida:

ichimlik suvi taʼminoti va kanalizatsiya korxonalari, shuningdek isteʼmolchilar tomonidan suv taʼminoti va kanalizatsiya sohasida xizmat koʻrsatish qoidalariga amal qilinishini nazorat qilish;

ichimlik suvi taʼminoti va kanalizatsiya korxonalari tomonidan inshootlarda ichimlik suvining texnologik hisobi yuritilishi taʼminlanganligini va hisoblash uskunalari ishlashini nazoratga olish;

ichimlik suvi taʼminoti va kanalizatsiya korxonalari tomonidan ichimlik suvini yoʻqotishning belgilangan meʼyorlariga rioya etilishi ustidan taʼsirchan nazorat oʻrnatish;

manfaatdor vazirliklar va idoralar bilan birgalikda tashkiliy-huquqiy shaklidan qatʼi nazar, suv taʼminoti tashkilotlari tomonidan aholiga yetkazib berilayotgan ichimlik suvining sifati, standartlar va oʻrnatilgan talablarga javob berishi yuzasidan nazorat oʻrnatish;

b) ichimlik suvi taʼminoti va kanalizatsiya xizmatlari koʻrsatuvchi korxonalar tomonidan texnologik jarayonni takomillashtirishga va energiyani tejashga yoʻnaltirilgan suv taʼminoti va kanalizatsiya tizimi obyektlari texnologik auditdan oʻtkazilishi ustidan davlat nazoratini amalga oshirish sohasida:

hududiy inspeksiyalar tomonidan suv taʼminoti va kanalizatsiya tizimi obyektlari texnologik auditdan oʻtkazilishini nazoratga olish;

ichimlik suvi taʼminoti va kanalizatsiya tizimi obyektlari samaradorligini oshirish boʻyicha texnik jarayon va energiyani tejash tadbirlari bajarilishi ustidan nazoratni taʼminlash;

v) suv taʼminoti va kanalizatsiya tizimiga oʻzboshimchalik bilan ulanib olishga yoʻl qoʻymaslik hamda ichimlik suvi taʼminoti va kanalizatsiya tizimiga ulanishning texnik shartlari talablariga rioya etilishi ustidan davlat nazoratini amalga oshirish sohasida:

ichimlik suvi taʼminoti va kanalizatsiya tizimiga ulanishda texnik shartlarga rioya etilishida qoidabuzarliklarni aniqlash tadbirlari bajarilishini nazorat qilish;

ichimlik suvi taʼminoti va kanalizatsiya tizimiga oʻzboshimchalik bilan ulanish, shuningdek, hisobga olinmagan isteʼmolchilarni aniqlashga qaratilgan tadbirlarni tashkil etish;

investitsiya dasturlari asosida ichimlik suvi taʼminoti va oqova suv obyektlarida amalga oshirilgan qurilish, rekonstruksiya va modernizatsiya ishlari natijasida isteʼmolchilarning suv taʼminoti va kanalizatsiya xizmatlari bilan qamrab olinishi hamda tashkiliy-huquqiy shaklidan qatʼi nazar, suv taʼminoti va oqova suv tashkilotlari bilan isteʼmolchilar oʻrtasida shartnomaviy munosabatlar yoʻlga qoʻyilganligi ustidan nazorat qilish;

kanalizatsiya tarmoqlariga zararli moddalarning oqizilishida belgilangan talablarga amal qilinishi ustidan nazoratni amalga oshirish.

g) ichimlik suvi taʼminoti va kanalizatsiya tizimi obyektlarining holati va ulardan foydalanish shartlari, suv taʼminoti va kanalizatsiya tizimidagi shikastlanishlar va avariyalarning profilaktikasi hamda ularning oldini olish boʻyicha ishlab chiqilgan tadbirlarning amalga oshirilishi, ichimlik suvi yoʻqotilishining belgilangan meʼyorlariga rioya etilishi ustidan davlat nazoratini amalga oshirish sohasida:

ichimlik suvi taʼminoti va kanalizatsiya tizimlarida texnik talablarga asosan profilaktika ishlari amalga oshirilishini nazoratga olish;

ichimlik suvi taʼminoti va kanalizatsiya tizimlaridagi avariya va nosozliklar boʻyicha ogohlantirish tadbirlari oʻz vaqtida bajarilishi ustidan nazoratni amalga oshirish;

d) tashkiliy-huquqiy shakllaridan qatʼi nazar yer osti ichimlik suv quduqlarining holati va ulardan foydalanish shartlariga rioya etilishi ustidan davlat nazoratini amalga oshirish sohasida:

yer osti suvlaridan foydalanish sohasini texnik jihatdan tartibga solish sohasidagi normativ hujjatlar talablari bajarilishi ustidan taʼsirchan nazorat oʻrnatish;

tashkiliy-huquqiy shakllaridan qatʼi nazar yer osti ichimlik suv quduqlaridan foydalanishning holati va sharoitlarini nazorat qilish.

Inspeksiya qonun hujjatlariga muvofiq boshqa funksiyalarni ham amalga oshirishi mumkin.

Inspeksiya oʻziga yuklangan vazifalar va funksiyalarni bevosita hamda hududiy inspeksiyalar orqali amalga oshiradi.

3-bob. Hududiy inspeksiyalarning vazifalari va funksiyalari

12. Hududiy inspeksiyalar quyidagilar ustidan nazoratni amalga oshiradilar:

aholini ularning yashash joylarida ichimlik suviga boʻlgan ehtiyojini qondirish;

ichimlik suvi taʼminoti va kanalizatsiya tizimida nosozlik va avariyalarning oldini olish boʻyicha ishlab chiqilgan tadbirlarni bajarish;

foydalanish boʻlinmalari texnik, xizmat hujjatlari va boshqa hujjatlar bilan taʼminlanishi;

ichimlik suvining sifati, ichimlik suvi ishlab chiqaruvchi inshootlar suvni zararsizlantirish uskunalar bilan taʼminlanishi;

tashkiliy-huquqiy shakllaridan qatʼi nazar yer osti ichimlik suvi quduqlarining holati va ulardan foydalanish shartlariga rioya etilishi;

ichimlik suvi meʼyoridan ortiqcha yoʻqotilishiga yoʻl qoʻyilganligi.

13. Hududiy inspeksiyalar oʻzlariga yuklangan vazifalar doirasida quyidagi funksiyalarni amalga oshiradi:

ichimlik suvini ishlab chiqarish, yetkazib berish va realizatsiya qilish ustidan taftish va nazoratni amalga oshiradi;

yer osti ichimlik suvi quduqlardan foydalanish va ularning holatini nazorat qiladi;

yer osti ichimlik suvi quduqlarini loyihalashtirish, burgʻulash, qurish va oʻzlashtirish jarayonlari ustidan nazoratni amalga oshiradi;

ichimlik suvi taʼminoti sohasidagi xavfsizlik talablariga rioya etilishini nazoratga oladi;

ichimlik suvi sifatini hamda ichimlik suvi ishlab chiqaruvchi va oqova suvi inshootlarining suvni tozalash va zararsizlantirish uskunalari bilan taʼminlanganligini nazorat qilib boradi;

ichimlik suvi taʼminoti va kanalizatsiya tizimlaridan foydalanish, shu jumladan ichimlik suvi va kanalizatsiya tizimlariga ulanish qoidalariga rioya etilishi ustidan taʼsirchan nazoratni amalga oshiradi;

hisobga olinmagan isteʼmolchilarni (noqonuniy ulanma) aniqlashni tashkil etish, xususan investitsiya dasturlari asosida ichimlik suvi taʼminoti va oqova suv obyektlarida amalga oshirilgan qurilish, rekonstruksiya va modernizatsiya ishlari natijasida isteʼmolchilarning suv taʼminoti va kanalizatsiya xizmatlari bilan qamrab olinishi hamda tashkiliy-huquqiy shaklidan qatʼi nazar, suv taʼminoti va oqova suv tashkilotlari bilan isteʼmolchilar oʻrtasida shartnomaviy munosabatlar yoʻlga qoʻyilganligini nazorat qiladi;

manfaatdor vazirliklar va idoralar bilan birgalikda tashkiliy-huquqiy shaklidan qatʼi nazar, suv taʼminoti tashkilotlari tomonidan aholiga yetkazib berilayotgan ichimlik suvining sifati, standartlar va oʻrnatilgan talablarga javob berishi yuzasidan nazoratni amalga oshiradi;

kanalizatsiya tarmoqlariga ifloslantiruvchi moddalarning normativdan ortiqcha oqizilishida belgilangan talablarga amal qilinishi ustidan nazorat oʻrnatadi;

ichimlik suvi taʼminoti va kanalizatsiya tizimi obyektlarini texnologik auditdan oʻtkazadi;

ichimlik suvidan oqilona foydalanish hamda suv taʼminoti va kanalizatsiya sohasiga ilgʻor texnologiyalarni olib kirish boʻyicha targʻibot ishlarini amalga oshiradi.

4-bob. Inspeksiya markaziy apparatining huquqlari va javobgarligi

14. Inspeksiya oʻziga yuklangan vazifalar va funksiyalarni amalga oshirishda quyidagi huquqlarga ega:

faoliyatiga daxldor boʻlgan normativ-huquqiy hujjatlarni ishlab chiqishda ishtirok etish;

Inspeksiya vakolatiga kiradigan masalalarda davlat boshqaruvi organlari, xoʻjalik birlashmalari, mahalliy ijro etuvchi hokimiyat organlari faoliyatini belgilangan tartibda muvofiqlashtirish;

Inspeksiya vakolatiga kiradigan masalalar boʻyicha takliflarni koʻrib chiqish uchun Uy-joy kommunal xizmat koʻrsatish vazirligi, davlat boshqaruvi organlari, xoʻjalik birlashmalari va mahalliy ijro etuvchi hokimiyat organlariga kiritish;

tashkiliy-huquqiy shakllaridan qatʼi nazar barcha toifadagi suv taʼminoti va kanalizatsiya korxonalarida, jumladan, yer osti ichimlik suvi quduqlardan foydalanuvchi tashkilotlarda, ularning obyektlarida vakolati doirasiga kiruvchi masalalarda belgilangan tartibda tekshiruv oʻtkazish;

tekshirish ishlari amalga oshirilayotgan (amalga oshirilgan) tashkilotlarning tekshirishga daxldor boʻlgan hujjatlari bilan tanishish;

yuridik va jismoniy shaxslarga tegishli obyektlarda, shu jumladan, yashash joylarida, ichimlik suvi taʼminoti va kanalizatsiya tizimlariga ulanish hamda foydalanish talablariga rioya etilishini belgilangan tartibda tekshirish;

kanalizatsiya tarmoqlariga ifloslantiruvchi moddalarning normativdan ortiqcha oqizilishi aniqlanganda, bu borada belgilangan tartibda javobgarlarga nisbatan kompensatsiya toʻlovlari hisoblash va undirish;

ichimlik suvi taʼminoti va kanalizatsiya tashkilotlari ishchilarining texnik reglament hamda xavfsizlik talab va qoidalari boʻyicha bilim darajasini tekshirish;

ichimlik suvi taʼminoti va kanalizatsiya sohasida huquqbuzarliklarni bartaraf etish boʻyicha davlat boshqaruvi organlari, xoʻjalik birlashmalari va boshqa tashkilotlarga koʻrib chiqilishi majburiy boʻlgan taqdimnomalar kiritish;

vazifalar va funksiyalarni amalga oshirish jarayonida aniqlangan salbiy holatlar hamda qoidabuzarliklar boʻyicha huquqbuzarlarga belgilangan tartibda maʼmuriy jarimalar qoʻllash;

yer osti ichimlik suvi zaxiralarining kamayishi yoki yer osti suvlaridan samarasiz foydalanish holatlari aniqlanganda yer osti suvlarini olishni toʻxtatish yoki bu borada ajratilgan limitni belgilangan tartibda qisqartirish choralarini koʻrish;

zarurat boʻlganda ichimlik va oqova suvlarni, uskuna va materiallarni tegishli tashkilotlar tomonidan nazorat sinovidan va tahlildan, shuningdek, loyiha qarorlarini belgilangan tartibda ekspertizadan oʻtkazishni tayinlash;

davlat boshqaruvi organlari, xoʻjalik birlashmalari, mahalliy ijro etuvchi hokimiyat organlari va boshqa tashkilotlardan vakolati doirasiga kiruvchi masalalarda zarur axborotlarni soʻrash va olish;

Inspeksiya xodimlarining malakasini oshirish kurslarini tashkil etish.

Inspeksiya qonun hujjatlariga muvofiq boshqa huquqlarga ham ega boʻlishi mumkin.

15. Inspeksiya:

unga yuklangan vazifalar va funksiyalarni samarali bajarish, shuningdek, ichimlik suvi taʼminoti va kanalizatsiya sohasida davlat nazoratini samarali amalga oshirish;

Uy-joy kommunal xizmat koʻrsatish vazirligiga Inspeksiya tomonidan kiritiladigan normativ-huquqiy hujjatlar va boshqa hujjatlar loyihalari, shuningdek, Inspeksiya tomonidan qabul qilinadigan qarorlarning sifati va pirovard natijalari uchun javob beradi.

5-bob. Hududiy inspeksiyalarning huquqlari va javobgarligi

16. Hududiy inspeksiyalar yuklangan vazifalar va funksiyalarni bajarish uchun quyidagi huquqlarga ega:

vakolatiga kiradigan masalalarni hal qilish uchun zarur maʼlumotlarni davlat boshqaruvi organlari va xoʻjalik birlashmalarining hududiy boʻlinmalari, mahalliy ijro etuvchi hokimiyat organlaridan belgilangan tartibda soʻrash va olish;

vakolatiga kiradigan masalalar boʻyicha takliflarni davlat boshqaruvi organlari, xoʻjalik birlashmalari va mahalliy ijro etuvchi hokimiyat organlariga koʻrib chiqishi uchun taqdim etish;

tashkiliy-huquqiy shakllaridan qatʼi nazar barcha toifadagi suv taʼminoti va kanalizatsiya korxonalarida, jumladan, yer osti ichimlik suvi quduqlardan foydalanuvchi tashkilotlarda, ularning obyektlarida vakolati doirasiga kiruvchi masalalarda belgilangan tartibda tekshiruv oʻtkazish;

tekshirish ishlari amalga oshirilayotgan (amalga oshirilgan) tashkilotlarning tekshirishga daxldor boʻlgan hujjatlari bilan tanishish;

yuridik va jismoniy shaxslarga tegishli obyektlarda, shu jumladan, yashash joylarida ichimlik suvi taʼminoti va kanalizatsiya tizimlariga ulanish hamda foydalanish talablariga rioya etilishini belgilangan tartibda tekshirish;

ichimlik suvi taʼminoti va kanalizatsiya sohasida texnik jihatdan tartibga solishga oid normativ hujjatlar talablariga rioya etilishini nazorat qilish;

ichimlik suvi taʼminoti va kanalizatsiya korxonalaridan tekshirish uchun zarur boʻlgan loyiha, texnologik, ijro hujjatlarini va boshqa materiallarni olish;

ichimlik suvi taʼminoti va kanalizatsiya sohasida aniqlangan huquqbuzarliklarni bartaraf etish toʻgʻrisida ichimlik suvi taʼminoti va kanalizatsiya korxonalariga bajarilishi majburiy boʻlgan koʻrsatmalar berish;

vazifalar va funksiyalarini amalga oshirish jarayonida aniqlangan salbiy holatlar hamda qoidabuzarliklar boʻyicha huquqbuzarlarga belgilangan tartibda maʼmuriy jarimalar qoʻllash;

qonun hujjatlarida belgilangan tartibda ichimlik suvi taʼminoti va kanalizatsiya sohasida maʼmuriy huquqbuzarliklar toʻgʻrisida ishlarni yuritish.

17. Hududiy inspeksiyalar:

oʻziga yuklangan vazifalar va funksiyalarning sifatli va oʻz vaqtida bajarilishini taʼminlash;

ichimlik suvi taʼminoti obyektlarida aniqlangan muammolarni har tomonlama va chuqur oʻrganish hamda umumlashtirish asosida hududlarda tegishli sohani rivojlantirishga doir takliflar tayyorlash uchun masʼuldir.

6-bob. Inspeksiya faoliyatini tashkil etish

18. Inspeksiya boshligʻi uy-joy kommunal xizmat koʻrsatish vaziri taqdimnomasiga asosan Vazirlar Mahkamasi tomonidan lavozimga tayinlanadi va lavozimdan ozod etiladi.

Hududiy inspeksiyalar rahbarlari Uy-joy kommunal xizmat koʻrsatish vazirligi bilan kelishgan holda Inspeksiya boshligʻi tomonidan lavozimga tayinlanadi va lavozimidan ozod etiladi.

Hududiy inspeksiyalar xodimlari hududiy inspeksiya rahbarlarining tavsiyasiga asosan Inspeksiya boshligʻi tomonidan lavozimga tayinlanadi va lavozimidan ozod etiladi.

19. Mehnatga haq toʻlash, tibbiy va transport xizmatlari koʻrsatish shartlariga koʻra:

Inspeksiya boshligʻi — vazir oʻrinbosariga;

Inspeksiya markaziy apparati xodimlari — uy-joy kommunal xizmat koʻrsatish vazirligi markaziy apparati xodimlariga;

Hududiy inspeksiyalar bosh inspektorlari — hududiy uy-joy kommunal xizmat koʻrsatish boshqarmalari boshliqlariga;

Hududiy inspeksiya inspektorlari — hududiy uy-joy kommunal xizmat koʻrsatish boshqarmalarining boʻlim boshliqlariga tenglashtiriladi.

20. Inspeksiya boshligʻi Uy-joy kommunal xizmat koʻrsatish vazirligi hayʼati tarkibiga kiritiladi.

21. Inspeksiya faoliyatiga uy-joy kommunal xizmat koʻrsatish vaziri mutasaddilik qiladi.

7-bob. Inspeksiya rahbarlarining asosiy funksional vazifalari

22. Quyidagilar Inspeksiya boshligʻining asosiy funksional vazifalari hisoblanadi:

Inspeksiya faoliyatiga umumiy rahbarlik qilish, Inspeksiyaga yuklangan vazifalar va funksiyalar bajarilishini tashkil etish;

Oʻzbekiston Respublikasi Prezidentining hujjatlari va Oʻzbekiston Respublikasi Vazirlar Mahkamasining qarorlari bilan tasdiqlangan Inspeksiya faoliyatini yanada takomillashtirish boʻyicha konsepsiyalar, kompleks dasturlar va tadbirlar ijrosini taʼminlash;

Oʻzbekiston Respublikasi Prezidenti, Oʻzbekiston Respublikasining Bosh vaziri va uning oʻrinbosarlari va maslahatchilari, shuningdek, uy-joy kommunal xizmat koʻrsatish vazirining topshiriqlari sifatli va toʻliq ijro etilishini taʼminlash;

Inspeksiya faoliyatini rejalashtirish, Inspeksiyaning choraklik ish rejalarini tasdiqlash, ular bajarilishini nazorat qilish;

Oʻzbekiston Respublikasi Prezidenti, Vazirlar Mahkamasi va Uy-joy kommunal xizmat koʻrsatish vazirligining qarorlari va topshiriqlari ijrosi taʼminlanishi va monitoring olib borilishining amaliy tizimini tashkil etish;

Inspeksiya faoliyatida ijro intizomini mustahkamlash boʻyicha kompleks amaliy chora-tadbirlarni amalga oshirish, qonun hujjatlari talablariga muvofiq topshiriqlar oʻz vaqtida va sifatli ijro etilishi uchun markaziy apparatning mansabdor shaxslari va hududiy inspeksiyalar rahbarlarining shaxsiy javobgarligini oshirish chora-tadbirlarini koʻrish;

Inspeksiya markaziy apparati va hududiy inspeksiyalar xodimlarini qayta tayyorlash va malakasini oshirish tizimini tashkil etish;

qonun hujjatlariga muvofiq Inspeksiya tizimida lavozimga tayinlash va lavozimdan ozod qilish, shuningdek, kadrlarni tanlash va joy-joyiga qoʻyish, ularning samarali faoliyati uchun zarur shart-sharoitlar yaratish, kadrlar zaxirasini shakllantirish;

normativ-huquqiy hujjatlar loyihalarini keyinchalik qonun hujjatlarida belgilangan tartibda Oʻzbekiston Respublikasi Vazirlar Mahkamasiga kiritish uchun sifatli ishlab chiqishni tashkil etish va Uy-joy kommunal xizmat koʻrsatish vazirligiga kiritish;

Inspeksiya rahbarlari va xodimlarining xizmat safarlarini Oʻzbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish choralari toʻgʻrisida” 2014-yil 5-martdagi PQ-2142-son va “Xorijiy xizmat safarlarida samarali boʻlish va Oʻzbekiston Respublikasiga xorijiy delegatsiyalar tashrifini tashkil etishda mansabdor shaxslarning shaxsiy javobgarligini yanada oshirish chora-tadbirlari toʻgʻrisida” 2017-yil 3-avgustdagi PQ-3170-son qarorlari talablariga muvofiq amalga oshirish va tashkil qilish, xizmat safarlari asoslanganligi, samaradorligi va natijadorligini, xizmat safariga ajratiladigan mablagʻlardan maqsadli va oqilona foydalanishni taʼminlash;

hududiy inspeksiyalar faoliyatining samaradorligi va natijadorligining tanqidiy tahlilini muntazam ravishda oʻtkazish, ularning hisobotlarini Inspeksiya majlislarida eshitish, yakunlari boʻyicha zarur hollarda ularni belgilangan tartibda intizomiy javobgarlikka tortish choralarini koʻrish;

Inspeksiya xodimlarini ragʻbatlantirish va intizomiy javobgarlikka tortish masalalarini belgilangan tartibda hal qilish, ularning egallab turgan lavozimlariga muvofiqligi masalasini koʻrib chiqish, ularning shaxsiy javobgarligini oshirish choralarini koʻrish;

Inspeksiya xodimlarining Odob-axloq qoidalarini tasdiqlash, shuningdek, ularga rioya qilinishini taʼminlash;

“Korrupsiyaga qarshi kurashish toʻgʻrisida”gi Oʻzbekiston Respublikasi Qonuni talablariga muvofiq Inspeksiya tizimida korrupsiya va boshqa huquqbuzarliklarning oldini olish choralarini qabul qilish, shuningdek, huquqiy amaliyot va qonun hujjatlarini takomillashtirish choralarini ishlab chiqish va amalga oshirish yoʻli bilan ularning yuzaga kelishiga yordam beruvchi sabablar va shart-sharoitlarni aniqlash, tahlil qilish, bartaraf qilish;

Inspeksiya va uning tarkibiy boʻlinmalari ishini tashkil qilishning zamonaviy shakllarini joriy qilishni taʼminlash;

“Elektron hukumat toʻgʻrisida”gi Oʻzbekiston Respublikasi Qonunini amalga oshirish doirasida zamonaviy axborot-kommunikatsiya texnologiyalaridan foydalanish, shu jumladan, Inspeksiyaning axborot tizimi samaradorligi va sifatini oshirish;

“Jismoniy va yuridik shaxslarning murojaatlari toʻgʻrisida”gi Oʻzbekiston Respublikasi Qonuni, Oʻzbekiston Respublikasi Vazirlar Mahkamasining 2018-yil 7-maydagi 341-son qarori bilan tasdiqlangan Davlat organlarida, davlat muassasalarida va davlat ishtirokidagi tashkilotlarda jismoniy va yuridik shaxslarning murojaatlari bilan ishlash tartibi toʻgʻrisidagi namunaviy nizomda belgilangan muddatlar va tartibda jismoniy va yuridik shaxslarning murojaatlarini koʻrib chiqish boʻyicha samarali ishni tashkil qilish, aholi bilan toʻgʻridan-toʻgʻri va ochiq muloqotni yoʻlga qoʻyish, shaxsan qabul qilishni tizimli ravishda oʻtkazish, shu jumladan, jismoniy shaxslar va yuridik shaxslarning vakillarini joyning oʻziga chiqib qabul qilish;

jismoniy va yuridik shaxslarning Oʻzbekiston Respublikasi Prezidentining Virtual qabulxonasidan tushayotgan murojaatlarini oʻz vaqtida va toʻlaqonli koʻrib chiqishni taʼminlash maqsadida Oʻzbekiston Respublikasi Prezidentining Xalq qabulxonalari bilan samarali ishlashni tashkil qilish, ularning faoliyatida Inspeksiya xodimlari va rahbarlarining faol ishtirokini taʼminlash;

davlat siri va maxfiy maʼlumotlar sirasiga kiradigan maʼlumotlar bilan ishlashda qonun hujjatlari talablariga rioya qilish;

markaziy apparatning tarkibiy boʻlinmalari va hududiy inspeksiyalar toʻgʻrisidagi nizomlarni, lavozim yoʻriqnomalarini va Inspeksiyaning boshqa lokal hujjatlarini belgilangan tartibda tasdiqlash;

Inspeksiya xodimlari tomonidan bajarilishi majburiy boʻlgan buyruqlar chiqarish va koʻrsatmalar berish, shuningdek, ularning ijrosi ustidan belgilangan tartibda nazorat qilish;

Inspeksiya markaziy apparatining tasdiqlangan tuzilmasiga belgilangan shtatdagi xodimlar soni va mehnatga haq toʻlash fondi doirasida oʻzgartirishlar kiritish toʻgʻrisida Uy-joy kommunal xizmat koʻrsatish vazirligiga takliflar kiritish.

Inspeksiya boshligʻi qonun hujjatlarida nazarda tutilgan boshqa funksional vazifalarni ham amalga oshiradi.

23. Quyidagilar Inspeksiya markaziy apparati tarkibiy boʻlinmalari rahbarlarining asosiy funksional vazifalari hisoblanadi:

Oʻzbekiston Respublikasi Konstitutsiyasi va qonunlariga, shuningdek, boshqa normativ-huquqiy hujjatlarga rioya etish;

tarkibiy boʻlinmalar faoliyatiga bevosita rahbarlik qilish, tarkibiy boʻlinmalarga yuklangan vazifalar va funksiyalar bajarilishini tashkil etish;

oʻz vakolatlari doirasida hududiy inspeksiyalarning faoliyatini muvofiqlashtirish;

Oʻzbekiston Respublikasi Prezidenti va Vazirlar Mahkamasi qarorlari va topshiriqlari ijrosini taʼminlash, Inspeksiya tarkibiy boʻlinmalari xodimlarining ijro intizomini mustahkamlash boʻyicha kompleks amaliy chora-tadbirlarni amalga oshirish, shuningdek, Oʻzbekiston Respublikasi Prezidentining “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek, ijro intizomi mustahkamlanishi uchun Oʻzbekiston Respublikasi Prezidenti Davlat maslahatchilarining, Oʻzbekiston Respublikasi Vazirlar Mahkamasi va uning kotibiyatlari, davlat va xoʻjalik boshqaruvi organlari, shuningdek, barcha darajalardagi hokimliklar rahbarlarining shaxsiy javobgarligi toʻgʻrisida” 2017-yil 11-apreldagi PQ-2881-son va “Davlat organlari va tashkilotlarida ijro intizomini yanada mustahkamlash chora tadbirlari toʻgʻrisida” 2018-yil 5-oktabrdagi PQ-3962-son qarorlariga, shuningdek, Vazirlar Mahkamasining “Ijro intizomini mustahkamlash chora-tadbirlari toʻgʻrisida” 1999-yil 12-yanvardagi 12-son qaroriga muvofiq topshiriqlarning oʻz vaqtida va sifatli bajarilishi uchun tarkibiy boʻlinmalar xodimlarining shaxsiy masʼuliyatini oshirish choralarini koʻrish;

Uy-joy kommunal xizmat koʻrsatish vazirligi va Inspeksiya bayonnoma qarorlari, uy-joy kommunal xizmat koʻrsatish vazirining va Inspeksiya rahbariyatining buyruqlari va topshiriqlari oʻz vaqtida va sifatli bajarilishini taʼminlash;

tarkibiy boʻlinmalarning ish rejalari ishlab chiqilishini, ularda koʻrsatilgan vazifalar va chora-tadbirlarning oʻz vaqtida va sifatli bajarilishini taʼminlash;

tarkibiy boʻlinmalarga yuklangan vazifalarni nazorat qilish va muvofiqlashtirish, Inspeksiyaning hududiy boʻlinmalari faoliyatida amaliy va uslubiy yordam koʻrsatish;

mutasaddilik qilinadigan tarkibiy boʻlinmalarda kadrlarni tanlash va joy-joyiga qoʻyish boʻyicha Inspeksiya boshligʻiga takliflar kiritish, ularning kasbiy mahorati, layoqati, amaliy tajribasi, ishchanlik va maʼnaviy-axloqiy sifatlari yuqori darajasining kafolatlanganligini taʼminlash, ularning kasbiy malakasini oshirish chora-tadbirlarini qabul qilish;

tarkibiy boʻlinmalarning xodimlari faoliyati samaradorligini tanqidiy tahlil qilib borish, yigʻilishlarda ularning hisobotlarini eshitish, natijalar boʻyicha zarur chora-tadbirlarni qabul qilish;

xizmat safarlarini Oʻzbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish chora-tadbirlari toʻgʻrisida” 2014-yil 5-martdagi PQ-2142-son va “Xorijiy xizmat safarlarida boʻlishning samaradorligi va xorijiy delegatsiyalarning Oʻzbekiston Respublikasiga tashrifini tashkil etish uchun mansabdor shaxslarning shaxsiy javobgarligini yanada oshirish chora-tadbirlari toʻgʻrisida” 2017-yil 3-avgustdagi PQ-3170-son qarorlari talablariga toʻliq muvofiq ravishda amalga oshirish, xizmat safarlari asoslanganligi, samaradorligi va natijadorligini, xizmat safarlari xarajatlari uchun ajratiladigan mablagʻlardan maqsadli va oqilona foydalanishni taʼminlash;

Inspeksiya xodimlari tomonidan odob-axloq qoidalari talablariga rioya qilishini taʼminlash;

“Korrupsiyaga qarshi kurash toʻgʻrisida”gi Oʻzbekiston Respublikasi Qonuni talablariga muvofiq Inspeksiyada korrupsiya va boshqa huquqbuzarliklarning oldini olish chora-tadbirlarini qabul qilish, huquqiy amaliyot va qonunchilikni takomillashtirish chora-tadbirlarini ishlab chiqish va tatbiq etish yoʻli bilan ularning sodir etilishiga koʻmaklashuvchi sabablar va sharoitlarni aniqlash, tahlil qilish va bartaraf etish;

“Jismoniy va yuridik shaxslarning murojaatlari toʻgʻrisida”gi Oʻzbekiston Respublikasi Qonuni bilan belgilangan muddatda va tartibda jismoniy va yuridik shaxslarning murojaatlarini koʻrib chiqish;

davlat siri va boshqa maxfiy maʼlumotlar bilan ishlashda qonun hujjatlari talablariga rioya qilish;

vakolati doirasiga kiradigan masalalar yuzasidan faoliyatni takomillashtirish boʻyicha amaliy chora-tadbirlarni qabul qilish, qonun hujjatlarini takomillashtirish haqida takliflar ishlab chiqish va Inspeksiya boshligʻiga kiritish.

24. Quyidagilar hududiy inspeksiyalar rahbarlarining asosiy funksional vazifalari hisoblanadi:

Oʻzbekiston Respublikasi Konstitutsiyasi va qonunlariga, shuningdek, boshqa normativ-huquqiy hujjatlarga amal qilish;

hududiy inspeksiyalar faoliyatiga umumiy rahbarlik qilish, Oʻzbekiston Respublikasi Prezidentining Farmonlari va qarorlari, Vazirlar Mahkamasining qarorlari va boshqa qonun hujjatlari hamda Uy-joy kommunal xizmat koʻrsatish vazirligi va Inspeksiya hujjatlari va qarorlari bilan ushbu inspeksiyalarga yuklangan vazifalar va funksiyalar bajarilishini tashkil etish;

Oʻzbekiston Respublikasi Prezidentining, Vazirlar Mahkamasi va Uy-joy kommunal xizmat koʻrsatish vazirligining topshiriqlari va hujjatlari ijrosini taʼminlash, ijro intizomini mustahkamlash boʻyicha kompleks amaliy chora-tadbirlarni amalga oshirish, shuningdek, Oʻzbekiston Respublikasi Prezidentining “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek, ijro intizomi mustahkamlanishi uchun Oʻzbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat va xoʻjalik boshqaruvi organlari hamda barcha darajadagi hokimliklar rahbarlarining shaxsiy javobgarligi toʻgʻrisida” 2017-yil 11-apreldagi PQ-2881-son va “Davlat organlari va tashkilotlarida ijro intizomini yanada mustahkamlash chora-tadbirlari toʻgʻrisida” 2018-yil 5-oktabrdagi PQ-3962-son qarorlari hamda Vazirlar Mahkamasining “Ijro intizomini mustahkamlash chora-tadbirlari toʻgʻrisida” 1999-yil 12-yanvardagi 12-son qaroriga muvofiq topshiriqlarning oʻz vaqtida va sifatli bajarilishi uchun hududiy inspeksiyalar xodimlarining shaxsiy javobgarligini oshirish choralarini koʻrish;

Uy-joy kommunal xizmat koʻrsatish vazirligi va Inspeksiyaning buyruqlari, qarorlari va topshiriqlarining oʻz vaqtida va sifatli bajarilishini taʼminlash;

Inspeksiyaning faoliyati doirasiga kiradigan masalalar boʻyicha mahalliy ijro etuvchi hokimiyat organlari va boshqa mahalliy tashkilotlar bilan hamkorlik qilish;

hududiy inspeksiya xodimlari tomonidan odob-axloq qoidalari talablariga rioya qilishini taʼminlash;

“Korrupsiyaga qarshi kurash toʻgʻrisida”gi Oʻzbekiston Respublikasi Qonuni talablariga muvofiq Inspeksiyada korrupsiya va boshqa huquqbuzarliklarning oldini olish chora-tadbirlarini koʻrish, huquqiy amaliyot va qonunchilikni takomillashtirish chora-tadbirlarini ishlab chiqish va tatbiq etish yoʻli bilan ularning sodir etilishiga koʻmaklashuvchi sabablar va sharoitlarni aniqlash, tahlil qilish va bartaraf etish;

jismoniy va yuridik shaxslarning murojaatlarini “Jismoniy va yuridik shaxslarning murojaatlari toʻgʻrisida”gi Oʻzbekiston Respublikasi Qonuni bilan belgilangan muddatda va tartibda koʻrib chiqish;

qonun hujjatlarida nazarda tutilgan holatlarda huquqbuzarliklar boʻyicha dalolatnomalar tuzish va koʻrsatmalar berish;

ushbu Nizomga muvofiq majburiyatlarni taqsimlashga koʻra boshqa vakolatlarni amalga oshirish.

8-bob. Inspeksiya rahbarlarining javobgarligi

25. Inspeksiya boshligʻi:

Inspeksiyaga yuklangan vazifalar va funksiyalarni, shuningdek, ushbu Nizomning 15-bandida nazarda tutilgan masalalar boʻyicha;

ushbu Nizomning 22-bandida koʻrsatilgan oʻz funksional vazifalari sifatli bajarilishi uchun shaxsan javob beradi.

26. Markaziy apparatning tarkibiy boʻlinmalari rahbarlari:

tegishli tarkibiy boʻlinmalarga yuklangan vazifalar va funksiyalar bajarilishi uchun;

ushbu Nizomning 15-bandida nazarda tutilgan Inspeksiya markaziy apparatining javobgarlik sohalari boʻyicha;

ushbu Nizomning 23-bandida koʻrsatilgan oʻz funksional vazifalarini sifatli bajarish uchun shaxsan masʼuldir.

27. Hududiy inspeksiyalarning rahbarlari:

hududiy inspeksiyalarga yuklangan vazifalar va funksiyalarning bajarilishi uchun;

ushbu Nizomning 17-bandida nazarda tutilgan hududiy inspeksiyalarning javobgarlik sohalari boʻyicha;

ushbu Nizomning 24-bandida koʻrsatilgan oʻz funksional vazifalari sifatli bajarilishi uchun shaxsan masʼuldir.

9-bob. Inspeksiyaning hisobot berishi hamda faoliyati samaradorligi va natijadorligini baholash mezonlari

28. Inspeksiya boshligʻi Inspeksiya faoliyati toʻgʻrisida Uy-joy kommunal xizmat koʻrsatish vazirligi oldida muntazam ravishda hisobot beradi.

Uy-joy kommunal xizmat koʻrsatish vazirligi Inspeksiya boshligʻi faoliyatining unga yuklangan vazifalar samarali bajarilishi boʻyicha doimiy monitoringini olib boradi hamda Inspeksiya faoliyati samaradorligiga xolisona baho beradi.

29. Inspeksiya faoliyatining samaradorligi va natijadorligi muntazam ravishda baholab boriladi.

30. Inspeksiya faoliyatining samaradorligi va natijadorligini baholash Uy-joy kommunal xizmat koʻrsatish vazirligi tomonidan tasdiqlanadigan Inspeksiya faoliyati samaradorligi va natijadorligini baholash mezonlari va indikatorlarga asoslanadi.

31. Inspeksiya faoliyatining samaradorligi va natijadorligini baholash yakunlari boʻyicha quyidagi choralar koʻriladi:

Inspeksiya rahbarlari va xodimlarini ragʻbatlantirish (mukofotlash) yoki intizomiy javobgarlikka tortish;

Inspeksiya faoliyatida aniqlangan kamchiliklarni bartaraf qilish va uning faoliyatini yanada takomillashtirish.

32. Inspeksiya faoliyatining samaradorligi va natijadorligini baholash tartibi qonun hujjatlari bilan belgilanadi.

91-bob. Inspeksiya faoliyatini moliyalashtirish va moddiy-texnik taʼminlash

33. Inspeksiya budjet tashkiloti hisoblanadi va Oʻzbekiston Respublikasi Davlat budjetidan, Uy-joy kommunal xoʻjaligini rivojlantirish jamgʻarmasi hamda qonunchilikda taqiqlanmagan boshqa manbalar hisobidan moliyalashtiriladi.

34. Uy-joy kommunal xoʻjaligini rivojlantirish jamgʻarmasidan Vazirlar Mahkamasining 2017-yil 22-iyundagi 409-son qarori bilan tasdiqlangan Uy-joy kommunal xizmat koʻrsatish sohasi xodimlari mehnatiga haq toʻlash va ularni moddiy ragʻbatlantirish tartibi toʻgʻrisidagi nizomga asosan Inspeksiya xodimlariga qoʻshimcha toʻlov va moddiy yordam koʻrsatiladi.

10-bob. Yakunlovchi qoidalar

35. Inspeksiya va uning hududiy inspeksiyalari oʻz vazifalari hamda funksiyalarini amalga oshirishda davlat boshqaruvi organlari, xoʻjalik birlashmalari, mahalliy ijro etuvchi hokimiyat organlari va boshqa tashkilotlar bilan oʻzaro hamkorlik qiladi.

36. Inspeksiyani qayta tashkil etish va tugatish qonunchilik hujjatlarida belgilangan tartibda amalga oshiriladi.