Toshkent viloyatining Boʻstonliq tumanida tajriba tariqasida soliq solish obyektlarini hisobga olish va soliq maʼmuriyatchiligining alohida tartibini joriy etish toʻgʻrisida (107-son)

20.02.2020

Oʻzbekiston Respublikasi Vazirlar Mahkamasining

qarori

Toshkent viloyatining Boʻstonliq tumanida soliq solish obyektlarini hisobga olishni soddalashtirish, savdo va xizmatlar koʻrsatish sifatini oshirish, aholining bandligini taʼminlash hamda isteʼmolchilar huquqlarini himoya qilish, shuningdek, mahalliy budjetga daromadlar tushumlarining qoʻshimcha manbalarini yaratish maqsadida Vazirlar Mahkamasi qaror qiladi:

1. Oʻzbekiston Respublikasi Moliya vazirligi, Davlat soliq qoʻmitasi va Toshkent viloyati hokimligining 2020-yil 1-maydan boshlab, 2021-yil 1-maygacha Boʻstonliq tumanida tajriba tariqasida soliq solish obyektlarini hisobga olish va soliq maʼmuriyatchiligining alohida tartibini (keyingi oʻrinlarda tajriba deb ataladi) joriy etish toʻgʻrisidagi taklifi maʼqullansin.

2. Belgilab qoʻyilsinki, tajriba davrida:

jismoniy shaxslar tomonidan dam olish uylari, dala hovli, yakka tartibda qurilgan uy-joylar va yashash uchun moʻljallangan boshqa turar joylar (keyingi oʻrinlarda koʻchmas mulk obyektlari deb ataladi), shuningdek, mazkur qarorga ilovada koʻrsatilgan ayrim mol-mulk turlari (keyingi oʻrinlarda ayrim mol-mulk turlari deb ataladi) soliq organlarining tayanch punktlari tomonidan soliq solish obyektlarining hisobga qoʻyilgani toʻgʻrisidagi bepul beriladigan guvohnoma asosida ijaraga beriladi;

jismoniy shaxslar tomonidan koʻchmas mulk obyektlarining ijaraga berilishi bilan bir vaqtda Davlat soliq qoʻmitasining yagona elektron platformasiga (mobil ilova yoki veb-sayt orqali) bu haqdagi maʼlumotlar kiritilishi lozim. Bunda yagona elektron platformaga tegishli maʼlumotlar kiritilgan taqdirda, koʻchmas mulk obyektlarini ijaraga berish shartnomasini tuzish va uni davlat soliq xizmati organlarida hisobga qoʻyish talab etilmaydi;

koʻchmas mulk obyekti va ayrim mol-mulk turlari soliq organlarida hisobga olingan maxsus cheklar taqdim etish orqali ijaraga beriladi hamda tegishli soliqlar toʻlangan taqdirda, ushbu faoliyatdan tushgan naqd pulni bank kassasiga topshirish ixtiyoriy hisoblanadi;

soliq solish obyektlarining hisobga qoʻyilgani toʻgʻrisidagi guvohnomasiz koʻchmas mulk obyektlari va ayrim mol-mulk turlarini ijaraga berish yoxud koʻchmas mulk obyektlarining ijaraga berilgani toʻgʻrisidagi maʼlumotlarni belgilangan tartibda yagona elektron platformaga kiritmaslik — soliqlarni toʻlashdan boʻyin tovlash deb hisoblanadi va qonunchilikda belgilangan tartibda javobgarlikka tortiladi;

soliq solish obyektlarining hisobga qoʻyilgani toʻgʻrisidagi guvohnoma asosida ayrim mol-mulk turlarini ijaraga berish bilan shugʻullanadigan jismoniy shaxslar tadbirkorlik subyektlari sifatida davlat roʻyxatidan oʻtishi shart emas hamda ularning daromadlariga belgilangan tartibda deklaratsiya asosida soliq solinadi;

tadbirkorlik subyekti sifatida belgilangan tartibda davlat roʻyxatidan oʻtgan holda oilaviy mehmon uylari xizmatlari koʻrsatayotgan va ayrim mol-mulk turlarini ijaraga berish bilan shugʻullanadigan jismoniy shaxslarga mazkur qaror talablari tatbiq etilmaydi.

3. Boʻstonliq tumanining Gʻazalkent shahri, Doʻstlik, Sijjak va Novobod mahalla fuqarolar yigʻini hududlarida 4 ta soliq tayanch punktlari tashkil etilsin va soliq organlari boshqaruv xodimlarining belgilangan umumiy soni doirasida 30 ta shtat birligi ajratilsin.

4. Toshkent viloyati hokimligi bir oy muddatda soliq tayanch punktlari uchun Boʻstonliq tumanining Gʻazalkent shahri, Doʻstlik, Sijjak va Novobod mahalla fuqarolar yigʻini hududlarida yer uchastkalari ajratish yoki ularni boʻsh binoda joylashtirish chorasini koʻrsin.

Mazkur soliq tayanch punktlari uchun ixcham binolar qurilishi hamda ularni zamonaviy axborot-kommunikatsiya tizimi bilan jihozlash Oʻzbekistan Respublikasi Davlat soliq qoʻmitasining Moddiy yordam, ijtimoiy himoya, soliq organlarini rivojlantirish va koʻzda tutilmagan xarajatlar maxsus jamgʻarmasi hamda Toshkent viloyatining mahalliy budjeti mablagʻlari hisobidan amalga oshirilsin.

5. Oʻzbekiston Respublikasi Davlat soliq qoʻmitasi:

Axborot texnologiyalari va kommunikatsiyalarini rivojlantirish vazirligi hamda Turizmni rivojlantirish davlat qoʻmitasi bilan birgalikda ikki oy muddatda mazkur qarorning 2-bandida koʻrsatilgan yagona elektron platforma va mobil ilovaning yaratilishini va Davlat soliq qoʻmitasi maʼlumotlar bazasiga integratsiya qilinishini taʼminlasin;

Moliya vazirligi bilan birgalikda Boʻstonliq tumanida tashkil etiladigan soliq tayanch punktlari xodimlari uchun mazkur qarorda nazarda tutilgan soliq solish obyektlarini hisobga olish va soliq maʼmuriyatchiligining alohida tartibi boʻyicha oʻquv kurslarini tashkil etsin;

mazkur qarorning mazmun-mohiyatini aholiga yetkazish maqsadida tajriba jarayoniga bagʻishlangan mavzuli audio va videoroliklar, bannerlar, plakatlar, stendlar hamda innovatsion axborot-targʻibot materiallaridan foydalangan holda kampaniyalar oʻtkazsin.

Yagona elektron platforma va mobil ilovani yaratish bilan bogʻliq boʻlgan mablagʻlar Vazirlar Mahkamasining zaxira jamgʻarmasi hisobidan ajratilsin.

6. Oʻzbekiston Respublikasi Moliya vazirligi Davlat soliq qoʻmitasiga 2020-yil 1-aprelga qadar Boʻstonliq tumani davlat soliq inspeksiyasining qoʻshimcha 5 ta xizmat avtotransport vositalarini saqlashga limit va ularni xarid qilishga zarur pul mablagʻlari ajratilishini taʼminlasin.

7. Oʻzbekiston Respublikasi Davlat soliq qoʻmitasi bir oy muddatda Moliya vazirligi hamda boshqa manfaatdor idoralar bilan birgalikda jismoniy shaxslarning soliq solish obyektlari hisobga qoʻyilganligi toʻgʻrisida guvohnoma berish, yagona elektron platformani yuritish, unga koʻchmas mulk obyektlari ijaraga berilgani toʻgʻrisidagi maʼlumotlarni kiritish tartibi haqida vaqtincha nizom ishlab chiqsin va tasdiqlasin.

8. Oʻzbekiston Respublikasi Moliya vazirligi Davlat soliq qoʻmitasi bilan birgalikda 2021-yil 1-mayga qadar tajriba natijalariga koʻra, uni yanada kengaytirish maqsadga muvofiqligi yuzasidan tahliliy maʼlumotnoma va takliflarni Vazirlar Mahkamasiga kiritsin.

9. Mazkur qarorning ijrosi quyidagi tartibda amalga oshirilsin:

Oʻzbekiston Respublikasi Bosh vazirining oʻrinbosari — moliya vaziri J.A. Quchqorov — mazkur qaror ijrosini sifatli, toʻliq va oʻz vaqtida taʼminlash, belgilangan vazifalarni amalga oshirish yuzasidan masʼul vazirlik, idora va tashkilotlar faoliyatini samarali tashkil qilsin hamda muvofiqlashtirsin;

Oʻzbekiston Respublikasi Davlat soliq qoʻmitasi raisi B.A. Musayev — mazkur tajribaning muvaffaqiyatli va samarali amalga oshirilishi yuzasidan barcha zarur choralar koʻrilishini va unda belgilangan vazifalarning soliq organlari tomonidan bajarilishi jarayonini axborot-kommunikatsiya texnologiyalari orqali nazorat qilishni taʼminlasin;

Toshkent viloyati hokimi R.Q. Xolmatov — soliq tayanch punktlarining samarali faoliyati uchun tegishli shart-sharoitlarni taʼminlasin hamda zarur mablagʻlarni oʻz vaqtida ajratsin;

Oʻzbekiston Milliy axborot agentligi bosh direktori A.K. Koʻchimov, Oʻzbekiston Milliy teleradiokompaniyasi raisi v.b. A.D. Xadjayev — mazkur qarorning mazmun-mohiyati va amaliy ahamiyatini yoritishga oid maqolalar, brifinglar, press-konferensiyalar, mavzuga doir telekoʻrsatuvlar tashkil etsin.

Oʻzbekiston Respublikasining Bosh vaziri A. ARIPOV

Toshkent sh.,

2020-yil 20-fevral,

107-son

Vazirlar Mahkamasining 2020-yil 20-fevraldagi 107-son qaroriga ILOVA

Jismoniy shaxslarning daromad manbai sifatida soliq organlarida hisobga qoʻyiladigan mol-mulklari

ROʻYXATI*

1. Suv transporti (motorli va motorsiz, shu jumladan shishiriladigan).

2. Suv mototsikllari (skuterlar va boshqalar).

3. Qorda yuradigan texnika vositalari (qor avtoulovi).

4. Kvadratsikllar.

5. Paraplanlar va deltaplanlar.

6. Supa, soʻri, topchanlar va shunga oʻxshash dam olish uchun joylar.

* Mazkur roʻyxatga Oʻzbekiston Respublikasi Davlat soliq qoʻmitasi tomonidan Vazirlar Mahkamasi bilan kelishgan holda, oʻzgartirish va qoʻshimchalar kiritish mumkin.