Qurilish uchun moʻljallangan metall prokati ishlab chiqarishni tartibga solish va sifatli metall prokatini qoʻllash chora-tadbirlari toʻgʻrisida (89-son)

17.02.2020

Oʻzbekiston Respublikasi Vazirlar Mahkamasining

qarori

Mamlakatda tegishli qurilish ishlari bilan birgalikda amalga oshirilayotgan keng koʻlamli investitsiya va infratuzilma loyihalari qurilish materiallari, metall mahsulotlari sifati va xavfsizligini taʼminlash vazifalarida zamonaviy yondashuvlarni qoʻllashni talab etadi.

Oʻzbekiston Respublikasi Vazirlar Mahkamasining “Qurilish uchun moʻljallangan metall prokatining sifati va xavfsizligini oshirish boʻyicha qoʻshimcha chora-tadbirlar toʻgʻrisida” 2019-yil 14-dekabrdagi 999-son qaroriga muvofiq tashkil etilgan idoralararo ishchi guruhlar tomonidan joylarga chiqib qurilish uchun moʻljallangan metall prokati ishlab chiqaruvchi 117 ta korxonaning faoliyati oʻrganib chiqildi.

Ushbu korxonalar faoliyatini oʻrganish tayyor mahsulot va bevosita ishlab chiqarish jarayonlari xavfsizligiga taʼsir koʻrsatuvchi kamchiliklar mavjudligini, shu jumladan, texnik reglamentlar yoʻqligini, ishlab chiqarishning ekologik ekspertizasi oʻtkazilmasligini, sinovlar oʻtkazib ishlab chiqarilayotgan mahsulotlarning sifati va xavfsizligi nazorat qilinmasligini aniqladi. Ayrim hollarda korxonalar tomonidan muvofiqlik sertifikati mavjud boʻlmagan mahsulotlar sotilmoqda, shuningdek, davriy davlat tekshiruvidan oʻtmagan oʻlchash vositalaridan foydalanilmoqda.

Qurilish meʼyorlari va qoidalari talablariga muvofiq xoʻjalik va sanoat obyektlari qurilishida xavfsizlikni taʼminlash, ular qulashining oldini olish, qurilishda ishlatilayotgan metall mahsulotlari sifatini, shuningdek, metall prokati ishlab chiqaruvchi korxonalar faoliyatini nazorat qilish maqsadida Vazirlar Mahkamasi qaror qiladi:

1. Belgilansinki, 2020-yil 1-iyundan boshlab:

sotilayotgan va ishlab chiqarishda foydalanilayotgan metall prokatining har bir toʻpiga ishlab chiqaruvchi (import qiluvchi) tomonidan texnik jihatdan tartibga solish sohasidagi normativ hujjatlar talablariga muvofiqlik yuzasidan sinovlarning ijobiy natijalari asosida rasmiylashtiriladigan sifat toʻgʻrisidagi hujjat ilova qilinishi kerak. Bunda ishlab chiqaruvchilarda tegishli ishlab chiqarish laboratoriyalari mavjud boʻlmagan taqdirda, metall prokatini boshqa sinov laboratoriyalarida (shu jumladan, tuzilgan shartnomalar asosida) sinovdan oʻtkazishga yoʻl qoʻyiladi;

Qoraqalpogʻiston Respublikasi Vazirlar Kengashi, viloyatlar, Toshkent shahri hokimliklari, vazirliklar va idoralar huzuridagi markazlashtirilgan investitsiyalar hisobiga moliyalashtiriladigan obyektlarni qurish, rekonstruksiya qilish, mukammal va joriy taʼmirlash boʻyicha buyurtmachi xizmatlari texnik jihatdan tartibga solish sohasida normativ hujjatlar talablariga muvofiqlik yuzasidan sertifikatlashtirilgan qurilish uchun moʻljallangan metall mahsulotlari xarid qilinishi va qoʻllanilishi uchun javob beradilar.

2. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari qurilish sohasida hududiy nazorat inspeksiyalari bilan birgalikda 2020-yil 1-aprelgacha boʻlgan muddatda sifati texnik jihatdan tartibga solish sohasidagi normativ hujjatlar talablariga muvofiq boʻlgan metall prokati va qurilish uchun moʻljallangan mahsulotlar ishlab chiqaruvchi tashkilotlar reyestrini shakllantirsinlar va eʼlon qilsinlar, shuningdek, reyestr har yili yangilanishini taʼminlasinlar.

3. Belgilansinki, 2020-yil 1-iyundan boshlab induksion pechlardan foydalangan holda tayyorlangan qurilish uchun moʻljallangan metall prokatini ishlab chiqarish va qoʻllash taqiqlanadi.

Bunda qurilish uchun moʻljallangan metall prokati ishlab chiqaradigan korxonalarda sanoat xavfsizligi talablariga rioya etilishini nazorat qilish boʻyicha komissiyaning xulosasiga asosan belgilangan talablarni bajargan korxonalarga qurilish uchun moʻljallangan metall prokati ishlab chiqarishga hamda qurilishdan boshqa maqsadlar uchun metall mahsulotlarini ishlab chiqarish va qoʻllashda induksion pechlardan foydalanishga yoʻl qoʻyiladi.

4. Oʻzbekiston Respublikasi Qurilish va uy-joy kommunal xoʻjaligi vazirligi huzuridagi Qurilish va uy-joy kommunal xoʻjaligi sohasida nazorat qilish inspeksiyasi va qurilish va uy-joy kommunal xoʻjaligi sohasida hududiy nazorat inspeksiyalari metall prokati texnik jihatdan tartibga solish sohasidagi normativ hujjatlar talablariga muvofiq emasligi hamda obyektlarda binolar va inshootlarning zilzilaga bardoshligiga taʼsir koʻrsatuvchi hamda insonning hayoti va sogʻligʻiga xavf soluvchi sifatsiz qurilish materiallari va buyumlar qoʻllanilishi aniqlangan hollarda metall prokati va undan tayyorlangan mahsulotlar ishlab chiqarilishi, sotilishi va qoʻllanilishini toʻxtatish boʻyicha zarur chora-tadbirlar koʻrsinlar.

5. Belgilansinki:

xavfli ishlab chiqarish obyektlarini, shu jumladan, qora va rangli metallar eritmalari va ushbu eritmalar asosida qotishmalar olinadigan obyektlarni identifikatsiyalash faqat akkreditatsiya qilingan ekspert tashkiloti tomonidan amalga oshiriladi;

qora va rangli metallar eritmalari va ushbu eritmalar asosida qotishmalar olinadigan ishlab chiqarish obyektlari ular foydalanishga topshirilgunga qadar qonunchilik hujjatlariga muvofiq xavfli ishlab chiqarish obyektlari sifatida majburiy identifikatsiyadan oʻtkazilishi kerak.

Oʻzbekiston Respublikasi Sanoat xavfsizligi davlat qoʻmitasi:

metallurgiya mahsulotlarini tayyorlash va metallurgiya ishlab chiqarishlarini ishlatish bilan shugʻullanuvchi korxonalar va tashkilotlarga xavfli ishlab chiqarish obyektlarini identifikatsiyalashda belgilangan tartibda koʻmaklashsin;

Vazirlar Mahkamasining 2008-yil 10-dekabrdagi 271-son qarori bilan tasdiqlangan Xavfli ishlab chiqarish obyektlarini identifikatsiyalash tartibi toʻgʻrisidagi nizomga ushbu qaror talablarini hisobga olgan holda oʻzgartirish va qoʻshimchalar kiritish boʻyicha ikki oy muddatda Oʻzbekiston Respublikasi Vazirlar Mahkamasiga takliflar kiritsin.

6. Oʻzbekiston Respublikasi Qurilish vazirligi “Oʻzstandart” agentligi, “Oʻzsanoatqurilishmateriallari” uyushmasi, manfaatdor vazirliklar va idoralar bilan birgalikda ikki oy muddatda “Ruhli va polimer qoplamali sovutib yoyilgan listdan ishlab chiqariladigan qurilish mahsulotlari toʻgʻrisida”gi maxsus texnik reglamentni ishlab chiqsin va belgilangan tartibda tasdiqlasin;

amaldagi standartlarni qayta koʻrib chiqsin hamda ular ruhlangan va polimer qoplamali sovutib yoyilgan listdan ishlab chiqariladigan qurilish mahsulotlariga, shuningdek, qurilish armaturasiga qoʻllaniladigan eʼtirof etilgan xalqaro standartlarga muvofiqlashtirilishini taʼminlaydigan chora-tadbirlar koʻrsin.

7. Oʻzbekiston texnik jihatdan tartibga solish agentligi metall prokatini majburiy sertifikatlash va sinashda ishtirok etadigan obyektlar faoliyati xavf-tahlil asosida davlat nazoratidan oʻtkazilishini belgilangan tartibda taʼminlasin.

8. Oʻzbekiston Respublikasi Sanoat xavfsizligi davlat qoʻmitasi, “Oʻzstandart” agentligi, Qurilish vazirligi Bosh prokuratura va Adliya vazirligi bilan birgalikda ikki oy muddatda Oʻzbekiston Respublikasi Vazirlar Mahkamasiga obyektlarning sanoat xavfsizligi, shaharsozlik toʻgʻrisidagi qonunchilik talablari buzilganligi, texnik reglamentlarga va standartlarning majburiy talablariga rioya qilinmaganligi uchun javobgarlikni kuchaytirishni nazarda tutadigan qonun loyihasini kiritsinlar.

9. 2020-yil 1-iyundan boshlab Oʻzbekiston Respublikasi Hukumatining ilovaga muvofiq ayrim qarorlariga oʻzgartirish va qoʻshimchalar kiritilsin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari A.J. Ramatov va Oʻzbekiston Respublikasi qurilish vaziri B.I. Zakirov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2020-yil 17-fevral,

89-son

Vazirlar Mahkamasining 2020-yil 17-fevraldagi 89-son qarorigaILOVA

Oʻzbekiston Respublikasi Hukumatining ayrim qarorlariga 2020-yil 1-iyundan boshlab kiritilayotgan oʻzgartirish va qoʻshimchalar

2. Vazirlar Mahkamasining “Qurilish uchun moʻljallangan metall prokatining sifati va xavfsizligini oshirish boʻyicha qoʻshimcha chora-tadbirlar toʻgʻrisida” 2019-yil 14-dekabrdagi 999-son qarorining 7-bandida:

a) uchinchi xatboshi quyidagi tahrirda bayon qilinsin:

“2020-yil 1-iyulgacha boʻlgan muddatda “Oʻzbekiston” ilmiy sinovlar va metall prokati, shuningdek, ruhlangan va polimer qoplamali sovutib yoyilgan listning sifati va xavfsizligini nazorat qilish boʻyicha markazi” davlat korxonasining sinov laboratoriyalarini modernizatsiya qilish chora-tadbirlarini koʻrsin”;

b) toʻrtinchi xatboshiga “viloyatlaridagi” soʻzidan keyin “Oʻzbekiston” ilmiy sinovlar va sifat nazorati” davlat korxonasining” soʻzlari qoʻshilsin.