Olimpiya shon-shuhrati muzeyini tashkil etish toʻgʻrisida (284-son)

14.08.1996

Oʻzbekiston Respublikasi Vazirlar Mahkamasining

qarori

Oʻzbekistonda Olimpiya harakatini keng targʻib qilish, ommaviy jismoniy tarbiya va sportni yanada rivojlantirishga koʻmaklashish, oʻsib kelayotgan jismonan sogʻlom va garmonik rivojlangan avlodni tarbiyalash maqsadida Vazirlar Mahkamasi qaror qiladi:

1. Oʻzbekiston Respublikasi Davlat sport qoʻmitasi, Milliy Olimpiya qoʻmitasi, Madaniyat ishlari vazirligi, shuningdek respublika sport jamoatchiligining Toshkent shahrida Davlat jismoniy tarbiya va sport qoʻmitasi huzurida Olimpiya shon-shuhrati muzeyi tashkil etish toʻgʻrisidagi taklifi qabul qilinsin.

2. Olimpiya va paralimpiya shon-shuhrati muzeyi toʻgʻrisidagi Nizom (ilova qilinadi) tasdiqlansin.

3. Oʻzbekiston Respublikasi Davlat sport qoʻmitasi Madaniyat ishlari vazirligi, Milliy Olimpiya qoʻmitasi, Rassomlar uyushmasi bilan birgalikda Olimpiya shon-shuhrati muzeyini tashkil etishni taʼminlovchi tashkiliy chora-tadbirlarni ishlab chiqsin va amalga oshirsin. Muzey ekspozitsiyalarini shakllantirish maqsadida:

Madaniyat ishlari vazirligi, Rassomlar uyushmasi sport mavzuyidagi eksponatlarni Olimpiya shon-shuhrati muzeyida vaqtincha saqlash va namoyish etish uchun ajratsinlar.

Oʻzbekiston Teleradiokompaniyasi Olimpiya shon-shuhrati muzeyida namoyish etish uchun Oʻzbekiston sportchilarining xalqaro musobaqalardagi ishtiroki toʻgʻrisida videofilmlar yaratsin.

Sport mavzuyidagi eksponatlarga ega boʻlgan vazirliklar, idoralar va jamoat tashkilotlari ularning amaldagi tartibga binoan Olimpiya shon-shuhrati muzeyiga berilishida koʻmaklashsinlar.

4. Oʻzbekiston Respublikasi Iqtisodiyot va moliya vazirligi Sport vazirligi talabnomalariga binoan muzey faoliyatini taʼminlash (shtatdagi xodimlarni mablagʻ bilan taʼminlash ham shunga kiradi) uchun respublika budjetidan har yili zarur mablagʻlar ajratishni nazarda tutsin.

5. Vazirlar Mahkamasining 1996-yil 6-iyundagi 239-f-son farmoyishi bilan Toshkent shahar hokimligiga Olimpiya shon-shuhrati muzeyi binosini rekonstruksiya qilishni tugallash hamda uni 1996-yil 20-avgustgacha foydalanishga topshirish vazifasi qoʻyilganligi maʼlumot uchun qabul qilinsin.

Binoni rekonstruksiya qilish va mukammal tuzatish, muzey atrofidagi hududni obodonlashtirish ishlarini bajarish boʻyicha Oʻzbekiston Respublikasi Davlat sport qoʻmitasi buyurtmachi, “Toshkentuyjoyinvestqurilish” korporatsiyasi pudratchi etib belgilansin.

Oʻzbekiston Respublikasi Moliya vazirligi taqdim etilgan hisob-kitoblarga muvofiq nazarda tutilgan maqsadlarga zarur mablagʻlar ajratsin.

6. Oʻzbekiston Respublikasi Davlat soliq qoʻmitasi Olimpiya shon-shuhrati muzeyini butlash uchun joʻnatilgan yuklarni bojxona poshlinalari toʻlashdan ozod etsin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari S.S. Saidqosimov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1996-yil 14-avgust,

284-son

Vazirlar Mahkamasining 1996-yil 14-avgustdagi 284-son qarori bilan TASDIQLANGAN

Olimpiya va paralimpiya shon-shuhrati muzeyi toʻgʻrisida

NIZOM

I. UMUMIY QOIDALAR

1. Olimpiya shon-shuhrati muzeyi Oʻzbekiston Respublikasi Vazirlar Mahkamasining 1996-yil 14-avgustdagi 284-son qaroriga muvofiq tashkil etilgan.

2. Olimpiya va paralimpiya shon-shuhrati muzeyi oʻz faoliyatida Oʻzbekiston Respublikasining Konstitutsiyasi va qonunlari, Oʻzbekiston Respublikasi Oliy Majlisining qarorlari, Oʻzbekiston Respublikasi Prezidentining farmonlari, Oʻzbekiston Respublikasi Vazirlar Mahkamasining qarorlari va farmoyishlari, Oʻzbekiston Respublikasi Sport vazirligi hayʼati qarorlari va vazirning buyruqlari, mazkur Nizom va boshqa normativ hujjatlarga amal qiladi.

Olimpiya va paralimpiya shon-shuhrati muzeyi madaniy-maʼrifiy faoliyatining asosiy yoʻnalishlari Oʻzbekiston Respublikasi Sport vazirligi tomonidan belgilanadi va Olimpiya va paralimpiya shon-shuhrati muzeyi ilmiy kengashida tasdiqlanadi.

Olimpiya va paralimpiya shon-shuhrati muzeyining madaniy-maʼrifiy va moddiy-texnik negizi mavjud tarixiy jismoniy tarbiya va sport materiallari, yodgorliklar, binolar va sport inshootlarini oʻz ichiga oladi.

3. Olimpiya va paralimpiya shon-shuhrati muzeyi oʻz faoliyatini ishlab chiqilgan yillik istiqbol ish rejalari asosida amalga oshiradi.

4. Olimpiya va paralimpiya shon-shuhrati muzeyining moliyaviy mablagʻlari:

respublika budjetidan ajratmalar;

Milliy Olimpiya qoʻmitasi tomonidan ajratilgan mablagʻlar;

tashkilotlar, muassasalar, firmalar, jismoniy tarbiya va sport tashkilotlari, jamoat birlashmalari, shuningdek alohida jismoniy shaxslarning begʻaraz xayriya mablagʻlari;

oʻz moliya-xoʻjalik faoliyatidan olingan daromadlar hisobiga shakllanadi.

II. MADANIY-MAʼRIFIY VA TASHKILOTCHILIK FAOLIYATI

5. Quyidagilar Olimpiya va paralimpiya shon-shuhrati muzeyining asosiy vazifalari hisoblanadi:

jismoniy tarbiya va sport, Olimpiya oʻyinlari tarixini, Oʻzbekiston sportchilarining zamonaviy Olimpiya harakatini rivojlantirishdagi hissasini oʻrganish, shuningdek tarixiy materiallar, medallar, olimpiya timsoli tushirilgan znachoklar, pochta markalari kolleksiyalari, mashhur sportchilarning sport kiyimlari va shaxsiy anjomlarini va shu kabilarni toʻplash;

sportning milliy turlari va xalq oʻyinlariga oid tarixiy yodgorliklarni yigʻish va oʻrganish, muzeyda oʻzbek xalqining jismoniy tarbiya va sporti tarixini yorituvchi doimiy va vaqtincha ekspozitsiyalar tashkil etish;

istiqbolli tematik-ekspozitsiya rejalarini ishlab chiqish;

sportchilar, trenerlar, hakamlar, sport sohasidagi fan namoyondalari, Oʻzbekiston sport jamoatchiligi vakillarining xalqaro sport harakatidagi hissasini namoyish etuvchi eksponatlar yaratish;

muzey ekspozitsiyalari boʻylab ekskursiyalar, tashrif buyuruvchilarning mashhur sportchilar, trenerlar, olimlar, sport jamoatchiligi vakillari bilan uchrashuvlarini tashkil etishga oid ishlarni bajarish;

zamonaviy texnikaviy vositalarni Olimpiya va paralimpiya shon-shuhrati muzeyi ekspozitsiyasi va ish amaliyotiga joriy etish;

chet el tashkilotlari, muassasalari va jismoniy shaxslaridan tarixiy materiallar sotib olishga oid ishlarni tashkil etish, ularning hamkorlikdagi faoliyati toʻgʻrisida shartnomalar va kontraktlar tuzish;

chet mamlakatlarning muzeylari bilan aloqalar oʻrnatish, belgilangan tartibda xalqaro muzey birlashmalari va tashkilotlariga kirish;

jahon sporti yutuqlari, chet mamlakatlarda jismoniy tarbiya va sportni tashkil etishdagi ilgʻor tajribalarni umumlashtirish, bu yutuqlarni Oʻzbekiston sport amaliyotiga tatbiq etish;

jismoniy tarbiya va sportni ommaviy axborot vositalari orqali targʻib qilish, jismoniy tarbiya va sport masalalariga oid axborot byulletenlari va ilmiy-uslubiy adabiyotlar nashr etish, sportga oid adabiyotlar nashr etishning yillik va istiqbol rejalarini ishlab chiqishda ishtirok etish.

6. Olimpiya va paralimpiya shon-shuhrati muzeyi belgilangan tartibda:

moliyaviy mablagʻlariga mustaqil ravishda egalik qiladi, muzey moddiy-texnika bazasi holatining iqtisodiy tahlilini amalga oshiradi, uning moddiy boyliklari saqlanishini, tejamkorlik tartibiga, hisob va hisobotning toʻgʻri yuritilishiga va ishonchliligiga rioya etishni, shartnomalar asosida amalga oshiriladigan ishlarning holatini tekshirishni nazorat qiladi;

Oʻzbekiston Respublikasi Sport vazirligi toʻgʻrisidagi Nizomga va mazkur Nizomga asoslanib, amaldagi qonunchilikka muvofiq Olimpiya va paralimpiya shon-shuhrati muzeyi xodimlarining boʻsh lavozimlarini toʻldirishga konkurslar oʻtkazadi, ular bilan shartnomalar (mehnat bitimlari) tuzish asosida mehnat munosabatlarini belgilaydi;

mehnat qonunchiligiga mehnatni muhofaza qilish qoidalari va normativlariga, texnika xavfsizligiga, yongʻin xavfsizligiga, davlat sugʻurtasiga, mehnat intizomiga, shuningdek oʻz mulkining saqlanishiga rioya etishni taʼminlaydi.

III. OLIMPIYA VA PARALIMPIYA SHON-SHUHRATI MUZEYI TARKIBI VA BOSHQARUVI

7. Olimpiya va paralimpiya shon-shuhrati muzeyi tarkibida Ilmiy kengash va quyidagi boʻlimlar tashkil etiladi:

ilmiy-ekspozitsiya;

tashkiliy-uslubiy;

madaniy-maʼrifiy;

maʼmuriy-xoʻjalik.

Ilmiy kengash tarkibiga, odatda, muzey direktori (kengash raisi), uning oʻrinbosari, boʻlim mudirlari, shuningdek yetakchi olimlar, trenerlar, Oʻzbekiston davlat jismoniy tarbiya va sport universiteti hamda respublika universitetlari va pedagogika oliy oʻquv yurtlarining sportga oid fakultetlari xodimlari kiradilar.

8. Ilmiy kengash tarkibi Olimpiya va paralimpiya shon-shuhrati muzeyi direktorining taqdimnomasi boʻyicha Oʻzbekiston Respublikasi Sport vazirligi hayʼati tomonidan tasdiqlanadi.

9. Muzey direktori Oʻzbekiston Respublikasi sport vaziri tomonidan tayinlanadi.

Olimpiya va paralimpiya shon-shuhrati muzeyi direktori:

amaldagi qonunchilik hujjatlariga, Sport vazirligi toʻgʻrisidagi nizomga hamda ushbu Nizomga muvofiq Oʻzbekiston Respublikasi Sport vazirligi hayʼati oldida muzey faoliyati uchun shaxsan javob beradi;

tasdiqlangan xodimlar soni va mehnatga haq toʻlash fondi doirasida tuzilmaga oʻzgartirish va qoʻshimchalar kiritadi, shtatlar jadvalini, xarajatlar smetasini, shuningdek, uning tarkibiy boʻlinmalari toʻgʻrisidagi nizomni tasdiqlaydi;

Olimpiya va paralimpiya shon-shuhrati muzeyi direktori oʻrinbosarining va tarkibiy boʻlinmalar rahbarlarining muzey faoliyatining alohida yoʻnalishlariga rahbarligi darajasini belgilaydi;

davlat organlari va muassasalari, sudlar va jamoat tashkilotlarida Olimpiya va paralimpiya shon-shuhrati muzeyi nomidan ish koʻradi.

IV. MUZEYNING SHTATLAR JADVALI

10. Olimpiya va paralimpiya shon-shuhrati muzeyi xodimlarining shtatlar jadvali muzey faoliyatining asosiy yoʻnalishlari va vazifalari hamda ajratilgan mehnatga haq toʻlash fondi bilan belgilanadi.

11. Boʻsh lavozimlarga xodimlarni ishga olish va ularni ishdan boʻshatish Oʻzbekiston Respublikasining amaldagi qonunchiligi, boshqa normativ hujjatlar va mazkur Nizomga muvofiq amalga oshiriladi.

V. OLIMPIYA VA PARALIMPIYA SHON-SHUHRATI MUZEYINING HUQUQLARI

12. Olimpiya va paralimpiya shon-shuhrati muzeyiga oʻz oldida turgan vazifalarni hal etishi hamda unga yuklangan funksiyalarni bajarishi uchun quyidagi huquqlar beriladi:

vazirliklar, idoralar, konsernlar, uyushmalar va jamoat tashkilotlaridan Olimpiya va paralimpiya shon-shuhrati muzeyi vakolatiga kiruvchi masalalarga oid maʼlumotlarni olish;

ekspozitsiya rejalari, jismoniy tarbiya va sportga oid koʻrgazmalar tayyorlash, tarixiy materiallar boʻyicha maslahatlashuvlar oʻtkazish uchun ularning rahbarlari bilan kelishgan holda vazirliklar, idoralar, muassasalar, tashkilotlar va oʻquv yurtlarining olimlari va mutaxassislarini jalb etish;

muzokaralarda qatnashish va Oʻzbekiston Respublikasi Sport vazirligi topshiriqlariga binoan Olimpiya va paralimpiya shon-shuhrati muzeyi uchun eksponatlar sotib olish, ilmiy-uslubiy hamkorlik masalalari boʻyicha shartnomalar va bitimlarni imzolash, tashkilotlar, sport federatsiyalari va MOQning chet el muzey tashkilotlari bilan toʻgʻridan-toʻgʻri aloqalar oʻrnatishiga koʻmaklashish, muzeyning ilmiy va boshqa toifa mutaxassislarini chet elga oʻqish va malaka oshirish uchun joʻnatish toʻgʻrisida takliflar kiritish;

madaniy-maʼrifiy ishlar rejalarini ishlab chiqish;

jismoniy tarbiya va sportni targʻib qilish boʻyicha maʼrifiy ishlar yuritish, jismoniy tarbiya va sport tarixi yodgorliklarini oʻrganish, bezash ishlariga olimlar, rassomlar, boshqa mutaxassislarni jalb etgan holda tematik ekspozitsiyalar tashkil etish;

respublika va chet mamlakatlarning ilmiy-tadqiqot muassasalari, muzeylari bilan hamkorlikda tijorat asosida tadqiqotlar va koʻrgazmalar tashkil etish.

13. Olimpiya va paralimpiya shon-shuhrati muzeyi unda aholidan noyob tarixiy materiallar va ashyolarni sotib olish, ularni taʼmirlash, shuningdek muzey xodimlarini mukofotlash uchun mablagʻlarni jamlagan holda maxsus fond ochishi mumkin.

14. Olimpiya va paralimpiya shon-shuhrati muzeyi yuridik shaxs hisoblanadi va Oʻzbekiston Respublikasi Davlat gerbi tasviri tushirilgan va oʻz nomi oʻzbek hamda ingliz tillarida yozilgan muhriga egadir.

VI. OLIMPIYA VA PARALIMPIYA SHON-SHUHRATI MUZEYI FAOLIYATINI TOʻXTATISH

15. Olimpiya va paralimpiya shon-shuhrati muzeyi faoliyati Oʻzbekiston Respublikasi Sport vazirligi hayʼatining taqdimnomasiga binoan Oʻzbekiston Respublikasi Vazirlar Mahkamasining qaroriga asosan toʻxtatiladi.