13-modda. Migratsiya va fuqarolikni rasmiylashtirish sohasidagi hujjatlarni rasmiylashtirish hamda berishda davlat bojini toʻlashdan ozod qilish

Oʻzbekiston Respublikasi fuqarolari davlat bojini toʻlashdan quyidagi hollarda ozod qilinadi:

1) Oʻzbekiston Respublikasi fuqarosining diplomatik pasportini berganlik uchun;

2) Oʻzbekiston Respublikasi fuqarosining xorijga chiqish uchun biometrik pasportini:

yaqin qarindoshlari vafot etganda yoki ular dafn etilgan joylarni ziyorat qilganda;

fuqarolik, oilaviy va jinoyat ishlari boʻyicha huquqiy yordam koʻrsatish toʻgʻrisidagi shartnomalarga (bitimlarga) muvofiq ular xorij sudlariga fuqarolik va jinoyat ishlari yuzasidan taraflar, guvohlar va ekspertlar sifatida chaqirilganda;

voyaga yetmagan shaxsga, shuningdek unga hamrohlik qiluvchi shaxsga xorijiy davlatda ixtisoslashgan tibbiy yordam koʻrsatilganda yoki jarrohlik amaliyoti oʻtkazilganda;

voyaga yetmagan shaxs ilm-fan, taʼlim, sport yoki madaniyat sohalaridan biridagi xalqaro tadbirda yoki musobaqada ishtirok etganda;

Ijtimoiy himoya yagona reyestriga kiritilgan shaxsga, shuningdek unga hamrohlik qiluvchi shaxsga xorijiy davlatda ixtisoslashgan tibbiy yordam koʻrsatilganda yoki jarrohlik amaliyoti oʻtkazilganda berganlik uchun;

3) yetim bolaga yoki ota-ona qaramogʻidan mahrum boʻlgan bolaga identifikatsiyalovchi ID-kartasini berganlik uchun;

4) toʻliq davlat taʼminotida boʻlgan shaxsga Oʻzbekiston Respublikasi fuqarosining identifikatsiyalovchi ID-kartasini va Oʻzbekiston Respublikasi fuqarosining xorijga chiqish uchun biometrik pasportini berganlik uchun.

Oʻzbekiston Respublikasining fuqarolari ushbu modda birinchi qismining 1, 2 va 3-bandlarida koʻrsatilgan hujjatlarga biron-bir oʻzgartishlar kiritilgan taqdirda ham davlat bojini toʻlashdan ozod qilinadi.

“Vatandosh” kartasining amal qilish davrida “Vatandosh” kartasi egasining oila aʼzolari (ota-onasi, eri (xotini) va voyaga yetmagan farzandlari) amaldagi viza muddatini koʻp martalik viza etib uzaytirganlik uchun davlat boji toʻlashdan ozod qilinadi.

Oʻzbekiston Respublikasi yoki chet davlatlar hududida tabiiy va texnogen xususiyatli favqulodda vaziyatlar, shu jumladan maishiy tusdagi ofatlar (turar joylarning yoki yashash uchun moʻljallanmagan joylarning yongʻini, qulashi, transport vositalarining yonishi) yuz berganligi natijasida jabrlangan jismoniy shaxslar, oʻzgalar parvarishiga muhtoj boʻlgan yolgʻiz keksalar, yolgʻiz yashovchi keksalar va nogironligi boʻlgan shaxslar Ijtimoiy himoya milliy agentligi huzuridagi Ayollarni reabilitatsiya qilish va moslashtirish hududiy markazlariga joylashtirilgan xotin-qizlar va ularning voyaga yetmagan farzandlari yoʻqolgan yoxud yaroqsiz holga kelgan Oʻzbekiston Respublikasi fuqarosining identifikatsiyalovchi ID-kartasi (biometrik pasporti), Oʻzbekiston Respublikasida doimiy yashovchi chet el fuqarosining yoki fuqaroligi boʻlmagan shaxsning identifikatsiyalovchi ID-kartasi (yashash guvohnomasi), Oʻzbekiston Respublikasi fuqarosining xorijga chiqish uchun biometrik pasporti, Oʻzbekiston Respublikasi hududida doimiy yashovchi fuqaroligi boʻlmagan shaxsning xorijga chiqish uchun harakatlanish hujjati oʻrniga tegishincha shunday identifikatsiyalovchi ID-karta, biometrik pasport berilganligi uchun, shuningdek Oʻzbekiston Respublikasi hududida vaqtincha boʻlib turgan chet el fuqarosiga yoki fuqaroligi boʻlmagan shaxsga pasportning yoki uning oʻrnini bosuvchi hujjatning hamda Oʻzbekiston Respublikasiga taklif qilish toʻgʻrisidagi hujjatning yoʻqolganligi haqida maʼlumotnoma berilganligi uchun davlat bojini toʻlashdan ozod qilinadi.