Toshkent shahri aholisiga yoʻlovchi tashish transporti xizmati koʻrsatishni tubdan yaxshilash chora-tadbirlari toʻgʻrisida (291-son)
19.08.1996
Oʻzbekiston Respublikasi Vazirlar Mahkamasining
qarori
[Koʻchirma]
Vazirlar Mahkamasi qayd etadiki, “Toshshaharyoʻlovchitrans” uyushmasi korxonalarida xoʻjalik yuritishning bozor mexanizmlari sust joriy etilmoqda, davlat tasarrufidan chiqarish va xususiylashtirishning koʻplab muhim masalalari hal etilmayapti, haydovchilar tarkibini hamda xizmat koʻrsatuvchi xodimlarni moddiy ragʻbatlantirish tizimi yetarli darajada amalga oshirilmayapti.
Uyushma (R. Hikmatullayev), avtoparklar, tramvay va trolleybus depolari rahbarlari korxonalarning moddiy-texnika bazasini mustahkamlash va rivojlantirish, tegishli infrastrukturani va tuzatish bazasini, shu jumladan xorijiy sarmoyani jalb etgan holda, yaratish uchun zarur chora-tadbirlar koʻrmayaptilar. Harakatdagi sostavning texnik holati yomonlashmoqda, avtobuslar, tramvay va trolleybuslarning qatnov jadvallari tez-tez buzilmoqda, shahar aholisiga xizmat koʻrsatish madaniyati pastligicha qolmoqda.
Oʻtkazilgan tekshirishlarda yoʻnalishlarda chipta berilmasligi, naqd pullarning haydovchilar tomonidan oʻzlashtirilishi, olingan tushumning bir qismi oʻz vaqtida topshirilmasligi hollari koʻplab aniqlandi. Idoralarga qarashli va xususiy transport bilan yoʻlovchilar tashish kutilgan samarani bermayapti. Shahar transportida haqiqiy boʻlmagan guvohnomalar va oylik kartochkalar bilan yurish, shuningdek transportda imtiyozli yurish huquqini beruvchi hujjatlardan bunga huquqi boʻlmagan shaxslarning gʻayriqonuniy foydalanishi hollari koʻplab qayd etilmoqda.
Koʻrsatib oʻtilgan kamchiliklarni bartaraf etish, shahar yoʻlovchi tashish transportida iqtisodiy islohotlarni chuqurlashtirish va yoʻlovchilarga xizmat koʻrsatishni yaxshilash maqsadida Vazirlar Mahkamasi qaror qiladi:
1. “Toshshaharyoʻlovchitrans” davlat uyushmasi rahbariyati (R. Hikmatullayev) respublika Hukumati qarorlarining tarkibiy boʻlinmalarni boshqarishni takomillashtirish, xoʻjalik yuritishning yangi shakllarini joriy etish, korxonalarning moliyaviy ahvolini mustahkamlash va aholiga uzluksiz transport xizmati koʻrsatish darajasini oshirishga oid talablari hamda oʻz qarorlari toʻliq hajmda bajarilishini taʼminlamadi.
Vazirlar Mahkamasining Transport va aloqa majmui (K. Rahimov) hamda Toshkent shahar hokimligi (R.Fayzullayev) davlat uyushmasiga yuklatilgan vazifalarni hal etish, shahar transportining barcha turlari bilan yoʻlovchilar tashish masalalarini muvofiqlashtirish va topshirilgan ish sohasi uchun rahbarlarning masʼuliyatini oshirishga doir faoliyati ustidan lozim darajadagi nazoratni taʼminlamadilar.
Toshkent shahar hokimi (K. Toʻlaganov) va “Toshshaharyoʻlovchitrans” davlat uyushmasi mavjud kamchiliklarni bartaraf etish, harakatdagi sostavning, yoʻl va energetika xoʻjaligining texnik holatini yaxshilash, zarur infrastrukturani rivojlantirish, korxonalarni davlat tasarrufidan chiqarish va xususiylashtirishni amalga oshirish, naqd pul tushumini topshirish masalalarida zarur tartib oʻrnatish hamda yoʻlovchilarga xizmat koʻrsatish darajasini oshirish boʻyicha aniq chora-tadbirlarni ishlab chiqsinlar va amalga oshirsinlar.
2. “Toshshaharyoʻlovchitrans” davlat uyushmasi tarkibiga kiruvchi korxona va tashkilotlarning, “Toshshaharyoʻlovchitrans” davlat uyushmasi boshqaruvining hamda Toshkent shahar hokimining koʻrsatib oʻtilgan uyushmani Toshkent shahar hokimligi ixtiyoriga oʻtkazish toʻgʻrisidagi takliflari qabul qilinsin.
Oʻzbekiston Respublikasi Moliya vazirligi, “Oʻzistiqbolstat” davlat qoʻmitasi va tegishli idoralar budjetga va belgilangan prognozlarga zarur tuzatishlar kiritsinlar.
4. Oʻzbekiston Respublikasi Davlat mulki qoʻmitasi Toshkent shahar hokimligi bilan birgalikda 1996-1997-yillarda 3-ilovaga* muvofiq “Toshshaharyoʻlovchitrans” davlat uyushmasi korxonalarini kelgusida davlat tasarrufidan chiqarish va xususiylashtirish chora-tadbirlari dasturini amalga oshirsin, uyushma olgan mablagʻlarni shahar yoʻlovchilar tashish transportini rivojlantirishga yoʻnaltirsin.
* Ilova berilmaydi.
6. “Toshshaharyoʻlovchitrans” davlat uyushmasi:
mulkchilik shakllaridan qatʼi nazar, yoʻlovchilar tashuvchi barcha xoʻjalik yurituvchi subyektlar uchun yagona chipta tizimi majburiy qoʻllanilishini joriy etsin;
ikki oy muddatda tasarrufidagi jamoat transportining harakatdagi sostavini konduktorlar bilan taʼminlasin;
Oʻzbekiston Respublikasi Davlat matbuot qoʻmitasi bilan birgalikda yoʻlkira chiptalarini tayyorlash masalalarini hal etsin.
Oʻzbekiston Respublikasi Markaziy banki huzuridagi “Goznak” birlashmasi “Oʻzavtotrans” korporatsiyasi, “Toshshaharyoʻlovchitrans” davlat uyushmasi, Kommunal xizmat koʻrsatish vazirligining buyurtmanomasiga binoan oylik yoʻlkira kartochkalari tayyorlashni taʼminlasin;
“Oʻzavtotrans” korporatsiyasi, “Toshshaharyoʻlovchitrans” davlat uyushmasi va Kommunal xizmat koʻrsatish vazirligi belgilangan tartibda bir oy muddatda naqd pul tushumi qabul qilib olinadigan barcha punktlarni nazorat — kassa apparatlari bilan jihozlasinlar.
Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari mazkur ishni amalga oshirishda yoʻlovchilar tashish transporti korxonalariga koʻmaklashsinlar.
7. “Toshshaharyoʻlovchitrans” davlat uyushmasi davlat uyushmasi tarkibiga kirmaydigan yuridik va jismoniy shaxslar avtotransportini tegishli yoʻnalishlar boʻyicha yoʻlovchilar tashishga shartnoma asosida jalb etsin.
Toshkent shahar hokimligi ikki hafta muddatda “Toshshaharyoʻlovchitrans” davlat uyushmasi va Adliya vazirligi bilan birgalikda aholiga transport xizmati koʻrsatishning tomonlarning oʻzaro majburiyatlarini, olingan tushumdan foydalanish, haydovchilar va konduktorlarni moddiy ragʻbatlantirish tartibini nazarda tutuvchi namunaviy kontrakti shaklini ishlab chiqsin va tasdiqlasin.
8. Shahar jamoat transportidan imtiyozli foydalanishni tartibga solish maqsadida:
1996-yil 1-sentabrdan boshlab respublika Hukumati qarorlari bilan fuqarolarning alohida toifalariga shahar jamoat transportida tekin yurish boʻyicha berilgan barcha imtiyozlar 4-ilovaga muvofiq bekor qilinsin;
Oʻzbekiston Respublikasi Oliy Majlisidan Oʻzbekiston Respublikasining qonun hujjatlari bilan shahar yoʻlovchilar tashish transportida yoʻl haqi toʻlash boʻyicha imtiyozga ega boʻlgan shaxslar toifalari roʻyxatini, mazkur toifalarni qisqartirishni nazarda tutgan holda koʻrib chiqish iltimos qilinsin.
9. “Toshshaharyoʻlovchitrans” davlat uyushmasi, “Oʻzavtotrans” korporatsiyasi va Oʻzbekiston Respublikasi Kommunal xizmat koʻrsatish vazirligi shahar yoʻlovchilar tashish transportida (taksidan tashqari) tekin yurish huquqini beruvchi hujjat (guvohnoma)ning yagona shaklini oʻn kun muddatda ishlab chiqsin va 1-oktabrdan boshlab Oʻzbekiston Respublikasi hududida joriy etsin.
Oʻzbekiston Respublikasi Markaziy banki huzuridagi “Goznak” birlashmasi bir oy muddatda “Oʻzavtotrans” korporatsiyasi, “Toshshaharyoʻlovchitrans” davlat uyushmasi, Kommunal xizmat koʻrsatish vazirligi buyurtmanomasiga binoan mazkur guvohnomalar blanklarining tayyorlanishini taʼminlasin.
10. Nazorat organlari faoliyatini muvofiqlashtirish respublika kengashi Oʻzbekiston Respublikasi Moliya vazirligi va Mehnat va aholini ijtimoiy muhofaza qilish vazirligi bilan birgalikda Vazirlar Mahkamasining xodimlarning koʻrsatilgan toifalari mehnatiga haq toʻlash fondi miqdorlarini koʻrsatilgan xizmatlar uchun tushuvchi mablagʻlar birligi normativlari boʻyicha belgilanishini nazarda tutuvchi “Kommunal xizmat koʻrsatish va yoʻlovchilar tashish transporti korxonalari maʼmuriy-boshqaruv xodimlari mehnatiga haq toʻlashni takomillashtirish toʻgʻrisida” 1995-yil 15-iyundagi 222-son qarorining bajarilishini muntazam oʻrganib borishni va nazorat qilishni taʼminlasin.
“Toshshaharyoʻlovchitrans” davlat uyushmasi tomonidan lavozim vazifalarini vijdonan bajarmaganlik, transport vositalarini shikastlaganlik, yonilgʻi-moylash materiallaridan foydalanishni buzganlik uchun tarmoq korxonalari xodimlarining javobgarligini oshirish chora-tadbirlari tizimi ishlab chiqilganligi va joriy etilganligi, unda aybdorlarga nisbatan jarima sanksiyalari belgilash va ulardan yetkazilgan moddiy zararni undirib olish nazarda tutilganligi maʼlumot uchun qabul qilinsin.
11. Maʼlumot uchun qabul qilinsinki, “Toshshaharyoʻlovchitrans” davlat uyushmasi xodimlari uchun daromadlar rejasi bajarilganligi, yonilgʻi-moylash materiallarini tejalganligi, klassi, belgilangan xizmat muddati va shu kabilar uchun ish haqiga ustamalar va boshqa toʻlovlar belgilangan.
Toshkent shahar yoʻlovchi transporti (metro, avtobuslar, mikroavtobuslar, tramvaylar, trolleybuslar) xodimlarini moddiy ragʻbatlantirishni kuchaytirish maqsadida:
1996-yil 1-sentabrdan boshlab xodimlarning koʻrsatib oʻtilgan toifalari ish haqi Oʻzbekiston Respublikasi Prezidentining “Ish haqi, pensiyalar va stipendiyalarning miqdorlarini oshirish toʻgʻrisida” 1996-yil 24-iyuldagi PF-1499-son Farmoniga muvofiq ish haqini oshirish va 5-ilovaga muvofiq miqdorlarda belgilangan xizmat muddati uchun oylik ustamalar toʻlashni joriy etish hisobiga, mehnatga haq toʻlash fondining bazaviy darajasiga tegishli tuzatish kiritgan holda, oʻrtacha 2,0 baravar oshirilsin.
umumiy foydalanishdagi shahar yoʻlovchilar transporti haydovchilariga fuqarolarga daromad soligʻi solishning qonunchilik bilan belgilangan imtiyozli tartibi belgilansin, bunda daromadlarga soliq solish darajasi 25 foizdan oshmasligi kerak.
Ish haqini oshirish bilan bogʻliq xarajatlar korxonalarning oʻz daromad manbalari, naqd tushumning toʻliq va oʻz vaqtida tushishi ustidan nazoratni kuchaytirish hisobiga amalga oshirilsin.
12. Oʻzbekiston Respublikasi Mehnat va aholini ijtimoiy muhofaza qilish vazirligi “Toshshaharyoʻlovchitrans” davlat uyushmasi, “Oʻzavtotrans” korporatsiyasi va Kommunal xizmat koʻrsatish vazirligi tomonidan zarur materiallar taqdim etilishiga koʻra respublikaning shahar yoʻlovchilar tashish transporti konduktorlariga shahar yoʻlovchilar tashish transporti haydovchilari uchun belgilangan imtiyozli shartlarda pensiyaga chiqish huquqini joriy etsinlar.
13. Oʻzbekiston Respublikasi Moliya vazirligi, Toshkent shahar hokimligi 1996-yil oxirigacha “Toshshaharyoʻlovchitrans” davlat uyushmasiga 965,1 mln. soʻm, shu jumladan:
565,1 mln. soʻm 6-ilovaga* muvofiq harakatdagi sostavni sotib olish uchun;
* Ilova berilmaydi.
400 mln. soʻm 65 ta “Mersedes-Bens” avtobusi sotib olishga avans toʻlovini amalga oshirish hamda ilgari olingan avtobuslar uchun xorijiy kreditlarni yil oxirigacha toʻlash uchun ajratsin.
Budjet loyihasini ishlab chiqishda har yili ushbu maqsadlar uchun zarur mablagʻlar nazarda tutilsin.
14. “Toshshaharyoʻlovchitrans” davlat uyushmasining harakatdagi sostavi uchun xizmat koʻrsatish boʻyicha tuzatish bazasini tashkil etish va yanada rivojlantirish maqsadida:
“Mersedes-Bens” avtobuslariga servis xizmati koʻrsatish va ularni tuzatish boʻyicha qoʻshma korxona tashkil etish tezlashtirilsin:
“Trolza-Aviaz” qoʻshma korxonasida trolleybuslarni tuzatish va yigʻish boʻyicha ishlar hajmlari koʻpaytirilsin.
Oʻzbekiston Respublikasi Moliya vazirligi va Toshkent shahar hokimligi oʻn kun muddatda:
ehtiyot qismlar sotib olish, tortuv kuchi beradigan kichik stansiyalarni, kontakt va kabel tarmoqlarini, tramvay yoʻllarini asosli tuzatish va rekonstruksiyalash, shuningdek vagon tuzatish zavodini rekonstruksiyalashni tugallash uchun mablagʻlar ajratish toʻgʻrisidagi;
yoʻlovchilar tashishdan koʻrilgan zararlarni qoplash uchun 1995-1996-yillarda “Toshshaharyoʻlovchitrans” davlat uyushmasiga ajratilgan budjet ssudalarini toʻlash toʻgʻrisidagi masalalarni koʻrib chiqsinlar.
16. “Toshshaharyoʻlovchitrans” davlat uyushmasi hamda uning tarkibiga kiruvchi korxona va tashkilotlar rahbariyatini mustahkamlash maqsadga muvofiq deb hisoblansin.
Toshkent shahar hokimligi Vazirlar Mahkamasining, Davlat mulki qoʻmitasining, Moliya vazirligining, Adliya vazirligining masʼul xodimlari ishtirokida ikki oy muddatda “Toshshaharyoʻlovchitrans” davlat uyushmasi korxonalari rahbar xodimlarini va oʻrta boʻgʻin mansabdor shaxslarini attestatsiyadan oʻtkazsin.
17. Oʻzbekiston Respublikasi Adliya vazirligi, “Oʻzavtotrans” korporatsiyasi, “Toshshaharyoʻlovchitrans” davlat uyushmasi, Oʻzbekiston Respublikasi Kommunal xizmat koʻrsatish vazirligi va Moliya vazirligi ikki oy muddatda “Shahar yoʻlovchilar tashish transporti toʻgʻrisida” Qonun loyihasini puxta ishlab chiqsinlar va belgilangan tartibda Vazirlar Mahkamasiga kiritsinlar.
19. Mazkur qarorning bajarilishini nazorat qilish Bosh vazirning oʻrinbosari K.R. Rahimov zimmasiga yuklansin.
Vazirlar Mahkamasining Raisi I. KARIMOV
Toshkent sh.,
1996-yil 19-avgust,
291-son
Vazirlar Mahkamasining 1996-yil 19-avgustdagi 291-son qaroriga 4-ILOVA
Oʻzbekiston Respublikasi Hukumatining oʻz kuchini yoʻqotgan qarorlari
ROʻYXATI
1. Oʻzbekiston Kompartiyasi Markaziy Komiteti va Oʻzbekiston SSR Ministrlar Sovetining “Oʻzbekiston SSR aloqa organlari ishini yanada yaxshilash chora-tadbirlari toʻgʻrisida” 1964-yil 3-iyuldagi 398-son qarori 11-bandining “v” kichik bandi.
2. SSSR Ministrlar Sovetining “Sudlar, prokuratura organlari va notarial kontoralarining ish sharoitlarini va moddiy-texnik taʼminlashni yaxshilashga oid chora-tadbirlar toʻgʻrisida” 1970-yil 11-avgustdagi 653-son qarori yuzasidan Oʻzbekiston SSR Ministrlar Sovetining 1970-yil 23-sentabrdagi 486-son qarorining 11-bandi.
3. Oʻzbekiston Kompartiyasi Markaziy Komiteti va Oʻzbekiston SSR Ministrlar Sovetining 1974-yil 20-maydagi 235-son qarori bilan tasdiqlangan Jamoat tartibini saqlash boʻyicha koʻngilli xalq drujinalari toʻgʻrisidagi nizom 22-bandining “j” kichik bandi.
4. Oʻzbekiston Respublikasi Vazirlar Mahkamasining 1992-yil 5-oktabrdagi 458-son qarori 11-bandining uchinchi xatboshi.
5. Oʻzbekiston Respublikasi Vazirlar Mahkamasining “Yosh mualliflarning eng yaxshi asarlari va ilmiy ishlanmalari uchun Oʻzbekiston Respublikasi Davlat mukofotini taʼsis etish toʻgʻrisida” 1993-yil 11-maydagi 218-son qarori 7-bandining ikkinchi xatboshi.
6. Oʻzbekiston Respublikasi Vazirlar Mahkamasining 1994-yil 8-fevraldagi 61-son qarori bilan tasdiqlangan “Sogʻlom avlod uchun” hukumatga qarashli boʻlmagan Xalqaro xayriya jamgʻarmasi markaziy apparati xodimlari tomonidan jamoat transportidan (taksidan tashqari) bepul foydalanish huquqi toʻgʻrisidagi nizom 4-bandining yettinchi xatboshi.
7. Oʻzbekiston Respublikasi Vazirlar Mahkamasining “Sogʻlom avlod uchun” jurnalini tashkil etish toʻgʻrisida” 1995-yil 13-apreldagi 127-son qarori 6-bandining shahar yoʻlovchilar tashish transportining barcha turlaridan foydalanish huquqini beruvchi qismi.
Vazirlar Mahkamasining 1996-yil 19-avgustdagi 291-son qaroriga 5-ILOVA
Toshkent shahar umumiy foydalanishdagi shahar yoʻlovchi transporti xodimlariga belgilangan xizmat muddati uchun oylik ustamalar
MIQDORI