“Toshkent” aeroportini rekonstruksiya qilish toʻgʻrisida (303-son)

31.07.1995

Oʻzbekiston Respublikasi Vazirlar Mahkamasining

qarori

“Toshkent” aeroportini rekonstruksiya qilish ishlarini jadallashtirish maqsadida Vazirlar Mahkamasi qaror qiladi:

1. Quyidagilar:

Germaniya Federativ Respublikasi bilan Oʻzbekiston Respublikasi oʻrtasida 1994-yil 13-mayda tuzilgan Moliyaviy va texnik hamkorlik sohasida hukumatlararo Bitimni amalga oshirish doirasida “Oʻzbekiston havo yoʻllari” milliy aviakompaniyasi Germaniyaning “Shtrabag”, “Simens” va “Alkatel” firmalari bilan “Toshkent” aeroportining aerodrom inshootlarini rekonstruksiya qilish ishlarini bajarishga doir shartnomalar tuzganligi;

“Shtrabag” firmasi Janubiy uchish-qoʻnish maydonini shu yilning sentyabrigacha ishga tushirgan holda kuchaytirishni birinchi navbatda amalga oshirish va Shimoliy uchish-qoʻnish maydonini rekonstruksiya qilishni 1995-yil dekabrda toʻliq tugallashni zimmasiga olganligi;

“Toshkent” aeroportini rekonstruksiya qilish ishlarini mablagʻ bilan taʼminlash uchun KFW banki, Tashqi iqtisodiy aloqalar vazirligi, “Oʻzbekiston havo yoʻllari” milliy aviakompaniyasi oʻrtasida 31,3 mln Germaniya markasi miqdorida imtiyozli kredit berilishi toʻgʻrisida shartnoma tuzilganligi maʼlumot uchun qabul qilinsin.

2. “Toshkent” aeroporti uchish-qoʻnish maydonlarini rekonstruksiya qilish ishlarini amalga oshirishning ilovaga* muvofiq jadvaliga rozilik bildirilsin.

* Ilova berilmaydi.

“Oʻzbekiston havo yoʻllari” milliy aviakompaniyasi, Tashqi iqtisodiy aloqalar vazirligi bir hafta muddatda KFW banki bilan birgalikda “Toshkent aeroporti” yordam dasturini uchish-qoʻnish maydonlarining ustuvorligini va ularda bajariladigan ishlarning hajmlarini aniqlash qismini qayta koʻrib chiqsin.

3. Davlat soliq qoʻmitasi, “Oʻzbekiston temir yoʻllari” kompaniyasi, “Oʻzavtotrans” davlat korporatsiyasi “Shtrabag” firmasi va “Oʻzbekiston havo yoʻllari” milliy aviakompaniyasining buyurtmanomalariga muvofiq keltirilayotgan asbob-uskuna va moddiy resurslarning bojxona hujjatlari oʻz vaqtida (koʻpi bilan uch kunda) rasmiylashtirilishini va moʻljallangan joyga yetkazib berilishini taʼminlasinlar.

4. Subpudrat ishlarini bajarishni va mahalliy qurilish materiallarini yetkazib berishni amalga oshirayotgan “Oʻzqurilishmateriallari” davlat konserni, “Oʻzbektransqurilish” davlat uyushmasi, “Oʻzbekiston temir yoʻllari” kompaniyasi, “Oʻzsanoatxoʻjalikqurilish” davlat korporatsiyasi, “Oʻzdavneftmahsulot” birlashmasi “Shtrabag” firmasi bilan tuzilgan shartnoma majburiyatlarining kelishilgan muddatlarda soʻzsiz bajarilishini taʼminlasinlar.

5. Moliya vazirligi va Davlat soliq qoʻmitasi “Oʻzbekiston havo yoʻllari” milliy aviakompaniyasi bilan birgalikda ikki hafta muddatda rekonstruksiya qilish va aviakompaniyaning kreditni qaytarishi davrida “Toshkent” aeroportiga soliq imtiyozlari berish toʻgʻrisida Vazirlar Mahkamasiga taklif kiritsinlar.

6. “Oʻzbekiston havo yoʻllari” milliy aviakompaniyasi, Tashqi iqtisodiy aloqalar vazirligi KFW banki bilan birgalikda mustaqil ekspertlarni jalb qilgan holda zarur tadqiqotlarni amalga oshirsinlar va Janubiy uchish-qoʻnish maydonini kengaytirish hamda uni IKAO Xalqaro fuqaro aviatsiya tashkiloti normalari boʻyicha ikkinchi toifagacha yetkazishning maqsadga muvofiqligini tahlil qilsinlar.

7. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari I.H. Joʻrabekov va Bosh vazir oʻrinbosari R.R. Yunusov zimmalariga yuklansin.

Vazirlar Mahkamasining Raisi I. KARIMOV

Toshkent sh.,

1995-yil 31-iyul,

303-son