Toshkent-Andijon-Oʻsh-Saritosh-Irkeshtam avtomobil yoʻlini loyihalash, rekonstruksiya qilish va foydalanish toʻgʻrisida

25.04.1997

Oʻzbekiston Respublikasi Hukumati va Qirgʻiziston Respublikasi Hukumati oʻrtasida

Bitim

Bundan keyin Ahdlashuvchi Tomonlar deb ataluvchi Oʻzbekiston Respublikasi Hukumati va Qirgʻiziston Respublikasi Hukumati, teng huquqlilik va oʻzaro hurmat prinsiplariga asoslanib,

avtomobil trassasining texnologik birligini yaratishni maqsadga muvofiq deb hisoblab, ikki tomonlama savdo-iqtisodiy munosabatlarning qulay rivojlanishini taʼminlash nihoyat darajada muhim ekanligini tan olib,

Ahdlashuvchi Tomonlarning xalqaro avtomobil transportini rivojlantirish sohasida yagona va kelishilgan siyosat olib borishga muhim ahamiyat berib,

quyidagilar toʻgʻrisida kelishib oldilar:

1-modda

Ahdlashuvchi Tomonlar oʻz hududlarida Toshkent-Andijon-Oʻsh-Saritash-Irkeshtam avtomobil yoʻlini loyihalash, rekonstruksiya qilish, qurish, taʼmirlash va keyinchalik undan foydalanish boʻyicha ishlarni bajaradilar.

2-modda

Ushbu Bitim boʻyicha ishlar bajarish jarayonida Ahdlashuvchi Tomonlar quyidagi masalalarni hal qilishga zarur boʻlgan chora-tadbirlarni koʻradilar:

asosiy texnik parametrlarni va muhim texnik yechimlarni aniqlash va tanlash;

rekonstruksiya qilinayotgan avtomobil yoʻli boʻyicha yuklar va yoʻlovchilar tashish hajmini belgilash;

avtomobil yoʻlining qurilishi va ishlashi uchun sarmoya qoʻyilmasi, moddiy resurslar va texnika vositalarining zarur hajmini belgilash.

3-modda

Ishlarni va ular bilan bogʻliq boʻlgan xarajatlarni taqsim qilishni, shu jumladan yoʻl texnikasi, moddiy-texnik resurslar va yonilgʻi-moylash materiallari ajratishni, Ahdlashuvchi Tomonlar alohida bitimlar bilan belgilaydilar.

4-modda

Ahdlashuvchi Tomonlarning vakolatli organlari ilmiy-texnik ishlamalar va ushbu Bitimning bajarilishiga koʻmaklashuvchi boshqa axborot bilan almashib turadilar.

5-modda

Oʻzbekiston Respublikasi uchun — “Oʻzavtoyoʻl” davlat-aksionerlik konserni;

Qirgʻiziston Respublikasi uchun — Transport va aloqa vazirligi;

Ahdlashuvchi Tomonlarning ushbu Bitim boʻyicha vakolatli organlari hisoblanadi.

6-modda

Ushbu Bitimning bajarilishini taʼminlash maqsadida Ahdlashuvchi Tomonlar bir-birlariga tashkiliy, moddiy-texnik, moliyaviy va boshqa zarur yordam beradilar.

7-modda

1. Ushbu Bitimning qoidalarini bajarish maqsadida Ahdlashuvchi Tomonlar xalqaro moliyaviy institutlar va shaxsiy mablagʻ qoʻyuvchilar bilan hamkorlikka koʻmaklashishga rozilik bildiradilar.

2. Ahdlashuvchi Tomonlar 1997-yilning birinchi yarmi davomida korxonalar va tashkilotlarning (xalqaro, davlat yoki xususiy) Toshkent-Andijon-Oʻsh-Saritosh-Irkeshtam avtomobil yoʻlini loyihalash, rekonstruksiya qilishda ishtirok etish tartibi va shartlarini belgilab beradilar.

8-modda

Ahdlashuvchi Tomonlar oʻzlarining vakolatli organlariga ushbu Bitimning bajarilishi bilan bogʻliq boʻlgan ishlarga tegishli shartnomalar tuzishni topshiradilar.

9-modda

1. Ahdlashuvchi Tomonlar ushbu Bitim qoidalarini bajarishga koʻmaklashadigan Ahdlashuvchi Tomonlarning vakolatli organlari vakillaridan iborat boʻlgan Qoʻshma komissiya tuzish toʻgʻrisida kelishib oldilar.

2. Bitimning bajarilishi masalalarini koʻrish uchun Qoʻshma komissiya zaruratga qarab, navbati bilan Toshkent, Bishkek, Oʻshda yigʻilish oʻtkazib turadi.

10-modda

Ushbu Bitimni bajarish va talqin qilish boʻyicha har qanday bahslar muzokara va maslahatlashuvlar yoʻli bilan hal qilinadi.

Muzokaralar yoʻli bilan hal qilinmaydigan yoki boshqa bir usul bilan kelishib boʻlmaydigan har qanday bahs Ahdlashuvchi Tomonlardan birining iltimosiga koʻra Qoʻshma komissiyaga koʻrib chiqish uchun beriladi.

11-modda

Ushbu Bitim Ahdlashuvchi Tomonlarning oʻzlari ishtirokchi hisoblangan boshqa xalqaro shartnomalar boʻyicha huquq va majburiyatlariga dahl qilmaydi.

12-modda

Rus tili ish tili hisoblanadi.

13-modda

Ushbu Bitimga Ahdlashuvchi Tomonlarning yozma shakldagi roziligi bilan oʻzgartishlar va qoʻshimchalar kiritilishi mumkin, bular ushbu Bitimning ajralmas qismi hisoblanadigan protokollar bilan rasmiylashtiriladi.

14-modda

1. Ushbu Bitim imzolangan vaqtdan boshlab kuchga kiradi.

2. Ushbu Bitim besh yillik muddatga tuziladi va har safar, agar Ahdlashuvchi Tomonlardan biri boshqa Ahdlashuvchi Tomonni ushbu Bitimning tegishli amal muddati oʻtishidan kamida 6 oy ilgari uning amalini toʻxtatish niyati borligi toʻgʻrisida yozma shaklda xabarnoma bermasa, oʻz-oʻzidan keyingi besh yilga choʻzilaveradi.

Toshkent shahrida 1997-yil 25-aprelda ikki nusxada, har biri oʻzbek, qirgʻiz va rus tillarida tuzildi, hamma matnlar bir xil kuchga ega.

Ushbu Bitimning qoidalarini talqin qilish maqsadida rus tilidagi matndan foydalaniladi.

(imzolar)