Oʻzbekiston Respublikasi Vazirlar Mahkamasi huzuridagi Bosh arxiv boshqarmasi (“Oʻzbosharxiv”) toʻgʻrisidagi nizomni va respublika markaziy davlat arxivlari tarmogʻini tasdiqlash haqida (296-son)

19.06.1992

Oʻzbekiston Respublikasi Prezidenti huzuridagi Vazirlar Mahkamasining

qarori

Vazirlar Mahkamasi qaror qiladi:

1. Oʻzbekiston Respublikasi Vazirlar Mahkamasi huzuridagi Bosh arxiv boshqarmasi (“Oʻzbosharxiv”) toʻgʻrisidagi ilova qilinayotgan Nizom va respublika markaziy davlat arxivlari tarmogʻi tasdiqlansin.

2. “Oʻzbosharxiv” markaziy apparati hokimlarining cheklangan soni (binolarni qoʻriqlovchi va ularga xizmat koʻrsatuvchi xodimlarni hisobga olmagan holda) 14 kishidan iborat qilib belgilansin.

3. Oʻzbekiston SSR Ministrlar Sovetining “Oʻzbekiston SSR Ministrlar Soveti huzuridagi Bosh arxiv boshqarmasi toʻgʻrisidagi Nizomni va Oʻzbekiston SSR markaziy davlat arxivlari tarmogʻini tasdiqlash haqida” 1980-yil 18-sentabrdagi 635-son qarori hamda Oʻzbekiston SSR Ministrlar Sovetining “Respublikada arxiv ishini boshqarish sxemasi toʻgʻrisida” 1988-yil 31-oktabrdagi 398-son qarorining 3-bandi oʻz kuchini yoʻqotgan deb hisoblansin.

Oʻzbekiston Respublikasining Bosh vaziri A. MUTALOV

Toshkent sh.,

1992-yil 19-iyun,

296-son

Vazirlar Mahkamasining 1992-yil 19-iyundagi 296-son qaroriga 1-ILOVA

Oʻzbekiston Respublikasi Vazirlar Mahkamasi huzuridagi Bosh arxiv boshqarmasi toʻgʻrisida

NI3OM

1. Oʻzbekiston Respublikasi Vazirlar Mahkamasi huzuridagi Bosh arxiv boshqarmasi (“Oʻzbosharxiv”) arxiv ishi boʻyicha davlat boshqaruvining respublika organi hisoblanadi va oʻz faoliyatida bevosita Oʻzbekiston Respublikasi Vazirlar Mahkamasiga boʻysunadi.

“Oʻzbosharxiv” Oʻzbekiston Respublikasi Arxiv fondining hujjatlarini boshqaradi, respublika arxiv muassasalarining faoliyatiga rahbarlik qiladi va uni muvofiqlashtirib boradi. Unga Oʻzbekiston Respublikasi Arxiv fondini — respublika xalqlarining tarixiy oʻtmishi toʻgʻrisidagi hujjatli yodgorliklarni jamiyat va fuqarolarning manfaatlari yoʻlida butlash, saqlash va ulardan foydalanish davlat vazifalari yuklatilgan.

“Oʻzbosharxiv” respublikadagi arxiv ishining ahvoli, uni yanada rivojlantirish va takomillashtirish uchun javob beradi.

2. “Oʻzbosharxiv” Oʻzbekiston Respublikasida arxiv ishlarini tarmoq va tarmoqlararo boshqaruvni demokratik asoslarda bevosita yoki Qoraqalpogʻiston Respublikasi Vazirlar Kengashi huzuridagi Arxiv boshqarmasi, viloyatlar va Toshkent shahar hokimliklarining arxiv boʻlimlari orqali amalga oshiradi.

Oʻzbekiston Respublikasi Vazirlar Mahkamasi huzuridagi Bosh arxiv boshqarmasi, Qoraqalpogʻiston Respublikasi Vazirlar Kengashi huzuridagi Arxiv boshqarmasi, viloyatlar va Toshkent shahar hokimliklarining arxiv boʻlimlari, shuningdek, ularga qarashli davlat arxivlari va ularning filiallari Oʻzbekiston Respublikasi Vazirlar Mahkamasi huzuridagi Bosh arxiv boshqarmasining yagona tizimini tashkil etadi.

3. “Oʻzbosharxiv” oʻz faoliyatida Oʻzbekiston Respublikasi qonunlariga, Oʻzbekiston Respublikasi Oliy Kengashi qarorlariga, Oʻzbekiston Respublikasi Prezidentining farmonlariga, respublika Vazirlar Mahkamasining qarorlari va farmoyishlariga, mazkur Nizomga va boshqa normativ aktlarga amal qiladi.

“Oʻzbosharxiv” amaldagi qonunchilikning oʻz huquq doirasiga kiruvchi masalalar boʻyicha toʻgʻri qoʻllanilishini taʼminlaydi, arxiv ishi toʻgʻrisidagi qonunlarni takomillashtirish, yuzasidan takliflar ishlab chiqadi va ularni koʻrib chiqish uchun belgilangan tartibda Oʻzbekiston Respublikasi Vazirlar Mahkamasiga taqdim etadi.

4. Quyidagilar “Oʻzbosharxiv”ning asosiy vazifalari hisoblanadi:

Oʻzbekiston Respublikasi Arxiv fondini hujjatlar bilan butlashni tashkil etish, ularning saqlanishini taʼminlash, davlat tomonidan arxiv hujjatlarining hisobini yuritish va ulardan jamiyat va fuqarolarning axborotlarga boʻlgan ehtiyojlarini qondirish uchun foydalanish;

respublikada arxiv ishini yuritish va rivojlantirishning yagona siyosatini oʻtkazish, yangi xoʻjalik mexanizmi ishlab turgan sharoitlarda arxivlarning iqtisodiy mustaqillik va oʻzini oʻzi boshqarish prinsiplari asosida oʻzlariga yuklatilgan vazifalarni bajarish boʻyicha davlat arxivlarining yuqori samarali va unum bilan ishlashini taʼminlash;

arxivshunoslik, hujjatlarni yuritish, arxeografiya sohasidagi ilmiy va metodik ishlarni tashkil etish va muvofiqlashtirib borish, ilmiy tadqiqotlar va fan-texnika yutuqlari natijalarini respublika arxiv muassasalari ishiga joriy etish;

idoralarga qarashli arxivlar faoliyatiga tashkiliy-metodik rahbarlik qilish va respublika vazirliklari, idoralari, muassasalari, tashkilotlari va korxonalarining ish yuritishida hujjatlarni tashkil etish;

arxiv ishi sohasidagi vatanimiz va chet el ilgʻor tajribasini yoyish va respublika arxiv ishini yanada rivojlantirish hamda takomillashtirish yuzasidan takliflar ishlab chiqish;

Oʻzbekiston Arxivchilari jamiyati bilan birgalikda respublika arxiv muassasalari xodimlarini ijtimoiy-huquqiy himoya qilish chora-tadbirlarini amalga oshirish.

5. “Oʻzbosharxiv” oʻziga yuklatilgan vazifalarga muvofiq quyidagi vazifalarni amalga oshiradi:

a) Respublika arxiv ishlarini boshqarish organlarining va davlat arxivlarining quyidagi masalalar boʻyicha birgalikdagi ishlarini tashkil etadi va muvofiqlashtirib boradi:

Oʻzbekiston Respublikasi Arxiv fondini siyosiy, iqtisodiy, ijtimoiy, madaniy va tarixiy ahamiyatga ega boʻlgan hujjatlar bilan butlash;

Oʻzbekiston Respublikasi Arxiv fondi hujjatlarining saqlanishini taʼminlash, arxivlar ishi amaliyotiga hujjatlarni saqlash, taʼmirlash, konservatsiyalash, nusxa olish va muhofaza qilishning oqilona tizimlari va usullarini joriy qilish;

Oʻzbekiston Respublikasi Arxiv fondi hujjatlari davlat hisobini yuritish;

idoralarga qarashli arxivlardan olingan hujjatlarni davlat arxiviga topshirishning belgilangan tartibiga rioya qilishni taʼminlash;

davlat hokimiyati organlari va davlat boshqaruvining, muassasalar, jamoat tashkilotlarining axborotlarga boʻlgan ehtiyojlarini, shuningdek, fuqarolarning ijtimoiy-huquqiy soʻrovlarini qondirish maqsadida Oʻzbekiston Respublikasi Arxiv fondini eʼlon qilish va undan foydalanish;

arxivshunoslik, hujjatshunoslik, arxeografiya sohasidagi ilmiy-metodik ishlarni tashkil etish, arxiv ishlari amaliyotiga ilmiy tadqiqotlarning, arxiv ishi va hujjatshunoslik boʻyicha ilmiy-texnikaviy axborotlarning natijalarini joriy qilish;

respublika arxiv muassasalarini moddiy-texnika jihatidan taʼminlash va jihozlash;

respublika arxiv muassasalarida arxiv ishini rivojlantirishni, statistik hisobot va axborotni rejalashtirish;

respublika arxiv muassasalari va idoralariga qarashli arxivlar xodimlarining malakasini oshirish;

davlat arxivlari jamoalarini ijtimoiy rivojlantirish;

arxiv ishi va boshqarmani hujjat bilan taʼminlash sohasidagi vatanimiz va chet el ilgʻor tajribasini oʻrganish va yoyish, arxiv muassasalari ish tajribasiga mehnatni tashkil etish va boshqaruvning ilgʻor shakllarini, xoʻjalik yuritishning yangi shartlarini joriy qilish va respublika arxiv muassasalari xodimlarining ishlab chiqarish faoliyatini ragʻbatlantirish;

respublika davlat arxivlari tarmoqlarini takomillashtirish.

b) Respublika arxiv ishlarini boshqarish organlari bilan birgalikda arxiv ishining asosiy yoʻnalishlari boʻyicha kompleks dasturlarni ishlab chiqadi va ularning bajarilishini tashkil etadi.

v) Respublika davlat arxivlarida aholiga pulli xizmat koʻrsatishni rivojlantirish, arxiv ishi va hujjatlar bilan ishlash sohasida vazirliklar, idoralar, muassasalar, birlashmalar va korxonalar bilan xoʻjalik hisobi asosida shartnomalar boʻyicha ishlarni bajarish choralarini koʻradi.

Respublika davlat arxivlari tomonidan amalga oshiriladigan ishlar va xizmatlar uchun preyskurantlarni tasdiqlaydi.

g) Respublikada arxiv ishini rivojlantirishning asosiy yoʻnalishlarini, yigʻma yillik rejalarni ishlab chiqadi va ularning bajarilishi yuzasidan nazoratni amalga oshiradi, respublika davlat arxivlari faoliyatining yigʻma statistik hisobini yuritadi.

d) Hujjatlarni respublika va mahalliy ahamiyatga ega boʻlgan arxiv fondlari tarkibiga oʻtkazish toʻgʻrisidagi masalalarni xal qiladi, respublika ahamiyatiga ega boʻlgan fondlarni bir joyga toʻplash boʻyicha, shuningdek, Qoraqalpogʻiston Respublikasi va viloyatlarning bir davlat arxividan hujjatlarni respublikaning boshqa viloyatlari davlat arxiviga berish toʻgʻrisidagi tadbirlarni amalga oshiradi, zarur hollarda Oʻzbekiston Respublikasi Vazirlar Mahkamasiga hujjatlarni Mustaqil Davlatlar Hamdoʻstligidagi boshqa davlat arxivlaridan Oʻzbekiston Respublikasi davlat arxivlariga oʻtkazish (va aksincha) toʻgʻrisida taklif kiritadi.

e) Respublika xalqlari tarixiga oid arxiv hujjatlarining aslini yoki nusxalarini aniqlaydi va chet ellardan oladi, chet el arxiv muassasalari bilan birgalikda arxiv hujjatlarining koʻrgazmasini, shuningdek, hujjatlarning nusxalarini va arxivshunoslik adabiyotlarini oʻzaro almashishni tashkil etadi, arxivlarning xalqaro tashkilotlari faoliyatida qatnashadi.

j) Oʻzbekiston Respublikasi Arxiv fondining markaziy katalogini yuritadi, hujjatlarni, shu jumladan, elektron-hisoblash texnikasini qoʻllanish asosida ilmiy-maʼlumotnoma apparati tizimini rivojlantirishni taʼminlaydi.

z) Belgilangan tartibda Oʻzbekiston Respublikasi Arxiv fondining hujjatlarini, respublika arxiv hujjatlarining tarkibi va saqlanishi haqidagi maʼlumotnoma-axborot adabiyotlarini eʼlon qiladi, oʻzining huquq doirasiga oʻtkazilgan masalalarga oid byulletenlarni, ilmiy-ommabop adabiyotlarni, oʻquv va amaliy qoʻllanmalarni, plakatlarni nashr etadi.

i) Oʻz huquqlari doirasida davlat va idoralarga qarashli arxivlar ishlari qoidalarini, shuningdek, Oʻzbekiston Respublikasi Arxiv fondi hujjatlari bilan ishlashga oid boshqa normativ aktlarni ishlab chiqadi va tasdiqlaydi, ularning respublika davlat hamda idoralarga qarashli arxivlar, muassasalar, tashkilotlar, birlashmalar va korxonalar tomonidan bajarilishi majburiydir.

k) Respublika markaziy davlat arxivlarining faoliyatiga rahbarlik qiladi, ular toʻgʻrisidagi nizomlarni tasdiqlaydi.

l) Oʻz huquqlari doirasida kapital qurilish masalalarini hal qiladi.

m) Markaziy apparatning va oʻziga qarashli muassasalarning tuzilishini takomillashtirish choralarini koʻradi.

Markaziy apparatni va respublika markaziy davlat arxivlarini saqlash uchun respublika budjeti mablagʻlari hisobidan ajratilgan pul bilan taʼminlashni amalga oshiradi va ularning sarflanishini nazorat qiladi.

n) Markaziy apparat kadrlarini tanlaydi va joy-joyiga qoʻyadi, Oʻzbekiston Respublikasi markaziy davlat arxivlari direktorlarini va ularning oʻrinbosarlarini lavozimga tayinlaydi va lavozimdan boʻshatadi.

Qoraqalpogʻiston Respublikasi Vazirlar Kengashi huzuridagi Arxiv boshqarmasining boshligʻi, viloyatlar va Toshkent shahar hokimliklari arxiv boʻlimlarining mudirlari tegishli ravishda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan tegishli ravishda “Oʻzbosharxiv” bilan kelishilgan holda lavozimga tayinlanadilar va lavozimdan boʻshatiladilar.

o) Tegishli respublika vazirliklari, idoralari va davlat qoʻmitalari bilan birgalikda idoralarga qarashli quyidagi arxivlarning faoliyatiga tashkiliy-metodik rahbarlik qiladi:

Oʻzbekiston Respublikasi Arxiv fondining hujjatlarini doimiy saqlovchi tarmoq davlat fondlari;

Oʻzbekiston Respublikasi Arxiv fondi hujjatlarini doimiy saqlash huquqiga ega boʻlgan respublika vazirliklari, idoralari va davlat qoʻmitalarining idoralarga qarashli arxivlari;

Oʻzbekiston Respublikasi Arxiv fondi hujjatlarini doimiy saqlovchi davlat kutubxonalari va muzeylarining qoʻlyozma boʻlimlari;

Oʻzbekiston Respublikasi Arxiv fondi hujjatlarini vaqtincha, ularni davlat tomonidan saqlashga bergunga qadar, saqlovchi respublika vazirliklari, idoralari va davlat qoʻmitalarining idoralarga qarashli arxivlari.

p) Shartnoma asoslarida idoralarga qarashli arxivlarga hujjatlarni saqlashni, tartibga keltirishni va ulardan foydalanishni taʼminlash ishlarini bajarishda, shuningdek, hujjatlar nusxalarining ehtiyot fondini yaratishda yordam koʻrsatishni tashkil etadi.

Davlat arxivlari bilan birgalikda idoralarga qarashli arxivlarni tekshiradi va vazirliklar, idoralar, muassasalar, tashkilotlar hamda korxonalarning ish yuritishdagi hujjatlarini tashkil etadi.

r) Respublika davlat arxivlarining zarur uskunalar va materiallarga boʻlgan ehtiyojlarini aniqlaydi, oʻzlariga qarashli arxiv muassasalarini moddiy-texnikaviy taʼminlashga koʻmaklashadi; respublika markaziy davlat arxivlari binolari qurilishini va ularni kapital tuzatishni tashkil etadi.

s) Oʻzbekiston Respublikasi davlat muassasalari xodimlari kasaba uyushmalari tegishli qoʻmitalari bilan birgalikda respublika arxiv muassasalarining ilgʻor jamoalari va xodimlarini Faxriy yorliqlar bilan mukofotlaydi va ragʻbatlantirishning boshqa turlaridan foydalanadi.

t) Fuqarolarning takliflari, arizalari va shikoyatlarining oʻz vaqtida va puxta koʻrib chiqilishini tashkil etadi, ularda koʻtarilgan masalalarning toʻgʻri hal etilishiga erishadi; konsullik soʻrovlarning ijrosini taʼminlaydi; oʻzlariga qarashli muassasalar faoliyatidagi kamchiliklarni bartaraf etish choralarini koʻradi.

u) Arxiv ishi sohasida Mustaqil Davlatlar Hamdoʻstligiga kiruvchi davlatlar va chet mamlakatlarning arxiv muassasalari, shuningdek, Arxivlarning Xalqaro Kengashlari hamda boshqa xalqaro tashkilotlar bilan hamkorlikni amalga oshiradi.

f) Muassasalarga, tashkilotlarga va fuqarolarga belgilangan tartibda respublika hududida hujjatli yodgorliklarni toʻplash uchun maxsus ruxsatnomalar beradi.

6. “Oʻzbosharxiv”ga oʻziga yuklatilgan majburiyatlarni va vazifalarni bajarish uchun quyidagi huquqlar beriladi:

respublika arxiv muassasalarining arxiv ishining asosiy masalalari boʻyicha ishini oʻrganish va bu muassasalarning mehnat jamoalari bilan birgalikda ularning faoliyatlarini yanada takomillashtirish yuzasidan aniq chora-tadbirlar ishlab chiqish va ularning ijrosini tekshirish;

respublika markaziy davlat arxivlaridan, Qoraqalpogʻiston Respublikasi, viloyatlar va Toshkent shahar arxiv ishi organlaridan belgilangan va tarmoqda qabul qilingan statistika hisob-kitoblarini, shuningdek, arxiv ishini rivojlantirish rejalarining bajarilishi toʻgʻrisidagi, davlat va idoralarga qarashli arxivlarning faoliyati haqidagi, ular tomonidan yuklatilgan arxivlar ishining aniq yoʻnalishi boʻyicha majburiyatlarning bajarilishi toʻgʻrisidagi tegishli axborotlarni olish;

tarmoq davlat fondlarining, kutubxonalar va muzeylarning, arxivlar va vazirliklar hamda boshqa davlat boshqaruvi markaziy organlarining, respublika ahamiyatiga molik muassasalar, tashkilotlar va korxonalarning ish yuritish xizmatlari ishini oʻrganish, belgilangan tartibda ulardan zarur axborotlarni soʻrash, arxiv xizmatlari ishlari masalalari va ish yuritishda hujjatlarni tashkil etish boʻyicha koʻrsatilgan tashkilotlar vakillarining hisobotlarini tinglash; bu tashkilotlarga Oʻzbekiston Respublikasi Arxiv fondi hujjatlarining saqlanishini tashkil etishni yaxshilash boʻyicha, idoralarga qarashli arxivlar ishidagi aniqlangan kamchiliklarni bartaraf etish boʻyicha bajarish majburiy boʻlgan koʻrsatmalar berish va boshqarmani hujjat bilan taʼminlash boʻyicha koʻrsatmalar berish;

respublika davlat arxivlaridan, tarmoq davlat fondlaridan, vazirliklar, idoralar, muassasalar, tashkilotlar, korxonalardan, kutubxonalar va muzeylarning qoʻlyozma boʻlimlaridan, siyosiy, jamoatchilik, diniy tashkilotlar va birlashmalardan, kooperativlar, qoʻshma korxonalar va boshqa yuridik shaxslardan, shuningdek, Oʻzbekiston Respublikasi Arxiv fondi hujjatlarini doimiy saqlovchi fuqarolardan Oʻzbekiston Respublikasi Arxiv fondining markaziy katalogi uchun tegishli maʼlumotlarni olish;

prokuratura va sud organlari oldiga oʻz xatti-harakatlari yoki faoliyatsizliklari tufayli Oʻzbekiston Respublikasi Arxiv fondi hujjatlarining oʻgʻirlanishiga, buzilishiga, ularni yashirishga yoki noqonuniy yoʻq qilishga sharoit yaratishga yoʻl qoʻygan mansabdor shaxslarni va fuqarolarni Oʻzbekiston Respublikasi qonunchiligi aktlari bilan belgilangan tartibda jinoiy, maʼmuriy, intizomiy, moddiy va boshqa xil javobgarlikka tortish toʻgʻrisida masala qoʻyish;

arxiv ishi va ish yuritishda hujjatlarni tashkil etish masalalarini koʻrib chiqish uchun doimiy va vaqtinchalik idoralararo komissiyalar va kengashlar tuzish;

respublika vazirliklari va idoralari tomonidan ishlab chiqiladigan arxiv ishi va ish yuritishdagi hujjatlarni tashkil etish masalalari boʻyicha qoidalarni va oʻquv dasturlarini kelishib olish;

oʻz huquqlari doirasida xalqaro tashkilotlar, korxonalar, mansabdor shaxslar va xususiy shaxslar bilan hamda Mustaqil Davlatlar Hamdoʻstligidagi boshqa davlatlar hamda chet davlatlar bilan aloqalarni amalga oshirish.

7. “Oʻzbosharxiv” oʻzining respublika arxiv muassasalari ustidan davlat boshqaruvi funksiyalarini respublika arxiv ishlari boshqaruvi organlari, davlat va idoralarga qarashli arxivlar, jamoat tashkilotlari ishtirokida demokratiya, kollegiallik va oshkoralik asosida bajaradi.

8. Arxiv ishi masalalari boʻyicha puxta va sifatli takliflar hamda tavsiyanomalar tayyorlash maqsadida Bosh arxiv boshqarmasida quyidagilar tuziladi:

Ilmiy kengash — respublikada arxiv ishlarining ilmiy-metodik masalalarini koʻrib chiqish uchun;

Markaziy ekspert-tekshiruv komissiyasi — Oʻzbekiston Respublikasi Arxiv fondining sifat tarkibini oshirish va qiymatini ekspertiza qilish masalalarini koʻrib chiqish uchun.

Ilmiy kengash toʻgʻrisidagi nizom, Markaziy ekspert — tekshiruv komissiyalari va ularning tarkibi “Oʻzbosharxiv” boshligʻi tomonidan tasdiqlanadi.

9. “Oʻzbosharxiv”ga boshqarma boshligʻi (rais), uning oʻrinbosarlari, shuningdek, “Oʻzbosharxiv” tizimining boshqa rahbar xodimlari boʻlgan hayʼat tuziladi.

Hayʼat tarkibining soni va uning aʼzolari Oʻzbekiston Respublikasi Vazirlar Mahkamasi tomonidan tasdiqlanadi.

Hayʼat respublikada arxiv ishini rivojlantirish, rahbar kadrlarni tanlash va ularning malakasini oshirish, qarorlar, buyruqlar, yoʻriqnomalarni bajarish boʻyicha muhim masalalarni koʻrib chiqadi, respublika arxiv muassasalari va “Oʻzbosharxiv” tarkibiy boʻlinmalari rahbarlarining hisobotlarini tinglaydi, shuningdek, respublika vazirliklari, idoralari va davlat qoʻmitalari, ularning huquq doiralari va vazifalariga kiruvchi masalalar boʻyicha tarmoq fondlari rahbarlarining axborotlarini tinglaydi.

10. “Oʻzbosharxiv”ga boshliq rahbarlik qiladi. “Oʻzbosharxiv” boshligʻi va uning oʻrinbosari Oʻzbekiston Respublikasi Prezidenti huzuridagi Vazirlar Mahkamasi tomonidan tayinlanadi.

“Oʻzbosharxiv” boshligʻi:

“Oʻzbosharxiv” zimmasiga yuklatilgan majburiyatlar va vazifalarning bajarilishi uchun shaxsan javob beradi;

boshqarma boshligʻi oʻrinbosarining, boʻlimlar va boshqa tuzilma boʻlinmalari rahbarlarining “Oʻzbosharxiv” faoliyatini nazorat qilish masalalari boʻyicha ishlarning ahvoli uchun, shuningdek, markaziy davlat arxivlari va respublikaning oʻzlariga qarashli boshqa arxiv muassasalari ishi uchun javobgarlik darajasini belgilaydi;

“Oʻzbosharxiv” markaziy apparati xodimlarini va markaziy davlat arxivlari rahbarlarini lavozimga tayinlaydi va lavozimdan boʻshatadi;

boʻlimlar va boshqa boʻlinmalar toʻgʻrisidagi nizomlarni, shuningdek, “Oʻzbosharxiv”ning alohida xodimlari va mutaxassislarining lavozim yoʻriqnomalarini tasdiqlaydi;

oʻz huquqlari doirasida respublikaning amaldagi qonunchiligi asosida va ijro etish boʻyicha buyruqlar va yoʻriqnomalar chiqaradi, “Oʻzbosharxiv” tizimi arxiv muassasalari bajarishi majburiy boʻlgan koʻrsatmalar beradi va ularning ijrosini tekshiradi;

zarur hollarda respublika vazirliklari, idoralari va davlat qoʻmitalari rahbarlari bilan birgalikda arxiv ishlari masalalari boʻyicha buyruqlar va boshqa normativ hujjatlar chiqaradi.

Oʻzbekiston Respublikasi Prezidenti huzuridagi Vazirlar Mahkamasi va uning Rayosati majlislarida masalalarni koʻrib chiqishda qatnashadi.

11. “Oʻzbosharxiv” markaziy apparatining tuzilishi va xodimlarining soni Oʻzbekiston Respublikasi Prezidenti huzuridagi Vazirlar Mahkamasi tomonidan tasdiqlanadi.

Shtat jadvali, lavozim maoshlari va ularga qoʻshimchalar, “Oʻzbosharxiv” markaziy apparati xodimlarini mukofotlash toʻgʻrisidagi nizom uning boshligʻi tomonidan tasdiqlanadi.

12. “Oʻzbosharxiv” yuridik shaxs hisoblanadi, u respublika budjetida turadi, Davlat banki muassasalarida mustaqil balansga, hisob-kitob va boshqa schyotlarga ega boʻladi, uning tarkibiga kiruvchi respublika markaziy davlat arxivlarining balanslarini hisobga olgan holda yigʻma balanslar tuzadi.

13. “Oʻzbosharxiv” Oʻzbekiston Respublikasi Davlat gerbi tasvirlangan va oʻz nomi oʻzbek va rus tillarida yozilgan muhrga ega boʻladi.

Vazirlar Mahkamasining 1992-yil 19-iyundagi 296-son qaroriga 2-ILOVA

Respublika Markaziy davlat arxivlari tarmogʻi

Oʻzbekiston Respublikasi Markaziy davlat arxivi

Oʻzbekiston Respublikasi ilmiy-texnikaviy va tibbiy hujjatlar Markaziy davlat arxivi

Oʻzbekiston Respublikasi kino, rasm va ovozli hujjatlar Markaziy davlat arxivi