Patent vakilligiga nomzodlarni attestatsiyadan va roʻyxatdan oʻtkazish hamda patent vakillarini attestatsiyadan oʻtkazish qoidalarini tasdiqlash haqida (3203-son)
13.12.2019
Oʻzbekiston Respublikasi Adliya vazirining
buyrugʻi
[Oʻzbekiston Respublikasi Adliya vazirligi tomonidan 2019-yil 13-dekabrda roʻyxatdan oʻtkazildi, roʻyxat raqami 3203]
Oʻzbekiston Respublikasi Vazirlar Mahkamasining 2019-yil 21-oktabrdagi 887-son “Patent vakillari toʻgʻrisidagi nizomga oʻzgartirish va qoʻshimchalar kiritish toʻgʻrisida”gi qaroriga muvofiq, buyuraman:
1. Patent vakilligiga nomzodlarni attestatsiyadan va roʻyxatdan oʻtkazish hamda patent vakillarini attestatsiyadan oʻtkazish qoidalari 1-ilovaga muvofiq tasdiqlansin.
2. Ayrim idoraviy normativ-huquqiy hujjatlar 2-ilovaga muvofiq oʻz kuchini yoʻqotgan deb topilsin.
3. Mazkur buyruq davlat roʻyxatidan oʻtkazilsin va bu haqda Hukumat bayonnoma qarorlari va idoraviy normativ hujjatlarni huquqiy ekspertizadan oʻtkazish boshqarmasi Idoraviy normativ-huquqiy hujjatlarning davlat reyestriga tegishli yozuv kiritsin.
4. Adliya vazirligi huzuridagi Intellektual mulk agentligi hamda Qonun hujjatlarini tahlil qilish va turkumlash boshqarmasi ushbu idoraviy normativ-huquqiy hujjatni barcha manfaatdor shaxslarga yetkazilishini, “Oʻzbekiston Respublikasi qonun hujjatlari toʻplami” — “Sobraniye zakonodatelstva Respubliki Uzbekistan”da hamda Oʻzbekiston Respublikasi Qonun hujjatlari maʼlumotlari milliy bazasida eʼlon qilinishini taʼminlasin.
5. Mazkur buyruq rasmiy eʼlon qilingan kundan eʼtiboran kuchga kiradi.
6. Mazkur buyruqning ijrosini nazorat qilish vazir oʻrinbosari T. Abdusattarov zimmasiga yuklansin.
Vazir R. DAVLETOV
Toshkent sh.,
2019-yil 13-dekabr,
538-mh-son
Oʻzbekiston Respublikasi adliya vazirining 2019-yil 13-dekabrdagi 538-mh-son buyrugʻiga1-ILOVA
Patent vakilligiga nomzodlarni attestatsiyadan va roʻyxatdan oʻtkazish hamda patent vakillarini attestatsiyadan oʻtkazish
QOIDALARI
Mazkur Qoidalar Oʻzbekiston Respublikasi Vazirlar Mahkamasining 2003-yil 1-iyuldagi 298-son qarori bilan tasdiqlangan Patent vakillari toʻgʻrisidagi nizomga (bundan buyon matnda Nizom deb yuritiriladi) muvofiq Oʻzbekiston Respublikasi Adliya vazirligi huzuridagi Intellektual mulk agentligida patent vakilligiga nomzodlarni attestatsiyadan va roʻyxatdan oʻtkazish hamda patent vakillarini attestatsiyadan oʻtkazish tartibini belgilaydi.
1-bob. Umumiy qoidalar
1. Ushbu Qoidalarda quyidagi asosiy tushunchalardan foydalaniladi:
Agentlik — Oʻzbekiston Respublikasi Adliya vazirligi huzuridagi Intellektual mulk agentligi;
patent vakilligiga nomzod (bundan buyon matnda nomzod deb yuritiladi) — patent vakili sifatida faoliyatni amalga oshirish istagini bildirgan jismoniy shaxs;
patent vakili — ushbu Qoidalar talablariga muvofiq yuridik yoki jismoniy shaxslar nomidan Agentlik hamda boshqa tashkilotlar oldida intellektual mulk obyektlariga huquqiy muhofaza olish va uni amalga oshirish masalalari boʻyicha vakillik qilish huquqi berilgan jismoniy shaxs;
reyestr — Oʻzbekiston Respublikasi patent vakillari davlat reyestri.
2-bob. Malaka va apellatsiya komissiyalarining faoliyatini tashkil etish
2. Nomzodlarni attestatsiyadan va roʻyxatdan oʻtkazish hamda patent vakillarini attestatsiyadan oʻtkazish Agentlik tomonidan amalga oshiriladi.
Nomzodlarni attestatsiyadan oʻtkazish taqdim etilgan hujjatlarni tekshirish va professional faoliyatni bajarishga tayyorlik darajasini aniqlash uchun ular arizada koʻrsatgan ixtisoslikni inobatga olgan holda malaka imtihoni oʻtkazish yoʻli bilan amalga oshiriladi.
3. Nomzodlarni attestatsiyadan va roʻyxatdan oʻtkazish hamda patent vakillarini attestatsiyadan oʻtkazish uchun Agentlik tomonidan malaka va apellatsiya komissiyalari tuziladi, ularning faoliyati mazkur Qoidalarga muvofiq amalga oshiriladi.
4. Patent vakili attestatsiyasi patent vakillarining kasbiy malaka darajasini xolisona baholash maqsadida oʻtkaziladi.
Patent vakillari attestatsiyasi har besh yilda kamida bir marta oʻtkaziladi.
5. Malaka komissiyasi:
a) malaka imtihoni savollarini tasdiqlaydi;
b) malaka imtihonini oʻtkazadi;
v) nomzod yoki patent vakilini attestatsiyadan oʻtkazish yoxud attestatsiyadan oʻtkazishni rad etish haqida qaror qabul qiladi.
6. Malaka komissiyasi Agentlik direktori buyrugʻi bilan Agentlikning eng malakali va tajribali xodimlari, shuningdek, intellektual mulk obyektlarini muhofaza qilish sohasida faoliyat yurituvchi mustaqil olimlar va mutaxassislar ishtirokida shakllantiriladi.
7. Malaka komissiyasi ishini Agentlik direktori buyrugʻi bilan tayinlangan malaka komissiyasi raisi boshqaradi.
8. Malaka komissiyasi raisi boʻlmaganda, uning vazifalari vaqtinchalik malaka komissiyasi raisi oʻrinbosari zimmasiga yuklatiladi.
9. Malaka imtihoni jarayoni audio va videoyozuvda yoziladi, shuningdek Agentlikning rasmiy veb-saytida real vaqt rejimida translatsiya qilinadi.
10. Malaka komissiyasi qarorlari majlisda qatnashayotgan barcha aʼzolarning koʻpchilik ovozi bilan qabul qilinadi. Ovozlar nisbati teng boʻlganda raisning ovozi hal qiluvchi ahamiyatga egadir.
11. Malaka komissiyasi qarorlari yozma ravishda tuziladi va malaka komissiyasi raisi hamda aʼzolari tomonidan imzolanadi.
12. Malaka komissiyasi qaroriga qoʻshilmagan komissiya aʼzosi oʻz nuqtai nazarini bayon qilishga haqlidir.
13. Malaka komissiyasi qarorlari yuzasidan apellatsiya komissiyasiga shikoyat kiritilishi mumkin.
14. Apellatsiya komissiyasi nomzodlar yoki patent vakillarining malaka komissiyasi qarori yuzasidan shikoyatlarini, shuningdek, yuridik va jismoniy shaxslarning patent vakillarining noqonuniy xatti-harakatlari yoki Patent vakillari toʻgʻrisidagi nizom talablarini buzadigan xatti-harakatlari yuzasidan shikoyatlarini koʻrib chiqadi.
15. Apellatsiya komissiyasi ham malaka komissiyasi shakllantirilgan tartibda shakllantiriladi.
16. Apellatsiya komissiyasi qarorlari yigʻilishda qatnashayotgan barcha aʼzolarning koʻpchilik ovozi bilan qabul qilinadi. Ovozlar nisbati teng boʻlganda raisning ovozi hal qiluvchi ahamiyatga egadir.
17. Apellatsiya komissiyasi qarorlari yozma ravishda tuziladi va apellatsiya komissiyasi raisi va aʼzolari tomonidan imzolanadi.
18. Apellatsiya komissiyasi qaroriga qoʻshilmagan komissiya aʼzosi oʻz nuqtai nazarini bayon qilishga haqlidir.
19. Apellatsiya komissiyasi qarorlari yuzasidan shikoyatlar sud tartibida koʻrib chiqiladi.
3-bob. Hujjatlarni qabul qilish
20. Nomzod mazkur Qoidalarning 1-ilovasida keltirilgan shakldagi oʻzini patent vakili sifatida attestatsiyadan oʻtkazish toʻgʻrisidagi arizani malaka komissiyasiga elektron shaklda topshiradi.
21. Ariza davlat tilida yoki rus tilida taqdim etiladi.
22. Arizaga quyidagi hujjatlar ilova qilinadi:
a) oliy maʼlumot toʻgʻrisidagi diplom nusxasi;
b) Oʻzbekiston Respublikasi hududida doimiy yashash joyi boʻyicha roʻyxatga olinganligi toʻgʻrisidagi belgi mavjud boʻlgan Oʻzbekiston Respublikasining fuqarolik pasporti yoki identifikatsiya ID-kartasi nusxasi;
v) attestatsiyadan oʻtkazish uchun belgilangan toʻlov toʻlanganligi haqidagi hujjat;
g) nomzodning istagiga koʻra uning malakasini tavsiflovchi boshqa hujjatlar.
23. Patent vakili mazkur Qoidalarning 2-ilovasida keltirilgan shakldagi attestatsiyadan oʻtkazish toʻgʻrisidagi arizani malaka komissiyasiga elektron shaklda topshiradi.
Arizaga Oʻzbekiston Respublikasi hududida doimiy yashash joyi boʻyicha roʻyxatga olinganligi toʻgʻrisidagi belgi mavjud boʻlgan Oʻzbekiston Respublikasining fuqarolik pasporti yoki identifikatsiya ID-kartasi nusxasi, malaka oshirish kurslarida oʻqiganlik toʻgʻrisida sertifikat nusxasi va attestatsiyadan oʻtkazish uchun belgilangan toʻlov toʻlanganligi haqidagi hujjat ilova qilinadi.
231. Elektron shaklda taqdim etilgan ariza va unga ilova qilinayotgan har bir hujjat haqiqiyligi saqlanishini taʼminlovchi (har bir dyuymga 200 nuqtadan kam boʻlmagan) alohida fayl koʻrinishida boʻlishi kerak. Har bir fayl oʻlchami 10 Mbdan oshmasligi lozim.
Hujjatlar “PDF” (portable document format) formatida skaner qilingan holda joʻnatiladi.
Hujjatlar qabul qilinganligi toʻgʻrisida nomzod yoki patent vakiliga uning arizasida koʻrsatilgan elektron pochta manzili orqali maʼlum qilinadi.
24. Nomzod yoki patent vakili Agentlik va uning tizimidagi tashkilotlar xodimi boʻlganda, shuningdek, mazkur Qoidalar 22-bandining “a” — “v” kichik bandlari va 23-bandida belgilangan hujjatlar mavjud boʻlmaganda malaka imtihoniga qoʻyish rad etiladi. Boshqa asoslar boʻyicha rad etilishiga yoʻl qoʻyilmaydi.
25. Nomzod yoki patent vakilini malaka imtihoniga qoʻyish yoki malaka imtihoniga qoʻyishni rad etish haqida qaror malaka komissiyasi raisi tomonidan qabul qilinadi.
Ariza va unga ilova qilingan hujjatlar qabul qilingan sanadan boshlab, oʻn ish kuni mobaynida nomzod yoki patent vakiliga malaka imtihoniga qoʻyilgani yoki malaka imtihoniga qoʻyish rad etilgani haqida uning arizasida koʻrsatilgan elektron pochta manzili boʻyicha bildirishnoma yoʻllanadi.
4-bob. Nomzod yoki patent vakilini attestatsiyadan oʻtkazish
26. Malaka imtihoni nomzod yoki patent vakilini imtihonga qoʻyilgani haqidagi bildirishnoma yoʻllangan sanadan eʼtiboran 2 oydan oshmagan muddatda oʻtkaziladi.
27. Nomzod yoki patent vakiliga malaka imtihoni oʻtish joyi, sanasi va vaqti haqida imtihon oʻtadigan sanadan 10 kalendar kunidan kam boʻlmagan muddat avval uning arizasida koʻrsatilgan elektron pochta manzili boʻyicha xabar beriladi.
28. Nomzodlar yoki patent vakillari imtihon topshirishda pasport yoki shaxsini tasdiqlovchi boshqa hujjatni taqdim etadi.
29. Nomzod yoki patent vakili malaka imtihoni davomida intellektual mulk obyektlariga huquqlarni himoya va muhofaza qilish boʻyicha faoliyatni amalga oshirish uchun Agentlik tomonidan tasdiqlangan dasturga mos ravishda Oʻzbekiston Respublikasi qonunchiligi, Oʻzbekiston Respublikasining xalqaro shartnomalari sohasida zarur bilimlarga ega ekanini koʻrsatishi lozim.
Malaka imtihoni suhbat shaklida oʻtkaziladi.
291. Malaka imtihoni savollari quyidagi yoʻnalishlar boʻyicha tuziladi:
intellektual mulk huquqiga oid umumiy qoidalar;
sanoat mulkiga oid Oʻzbekiston Respublikasi qonunchiligi;
sanoat mulki sohasidagi Oʻzbekiston Respublikasining xalqaro shartnomalari.
Malaka komissiyasi tomonidan tasdiqlangan savollar Agentlikning rasmiy veb-saytiga joylashtiriladi, shuningdek Oʻzbekiston Respublikasi qonunchiligiga kiritiladigan oʻzgartirish va qoʻshimchalarni inobatga olgan holda davriy ravishda qayta koʻrib chiqiladi.
292. Malaka imtihoni savollari mazkur Qoidalarning 291-bandida belgilangan yoʻnalishlardan shakllantiriladi. Bunda sanoat mulkiga oid Oʻzbekiston Respublikasi qonunchiligi hamda sanoat mulki sohasidagi Oʻzbekiston Respublikasining xalqaro shartnomalari yoʻnalishlaridagi savollar nomzod arizasida kelgusidagi faoliyati uchun koʻrsatilgan ixtisoslikka yoki patent vakilining ixtisosligiga mos boʻlishi lozim.
Agar ayrim ixtisosliklarga bevosita taalluqli Oʻzbekiston Respublikasining xalqaro shartnomalari mavjud boʻlmasa, tegishli savollar Sanoat mulkini muhofaza qilish boʻyicha Parij konvensiyasiga (1883 y.) mos boʻlishi kerak.
Ixtisoslik quyidagi intellektual mulk (sanoat mulki) obyektlari boʻyicha belgilanadi:
ixtiro va foydali modellar;
sanoat namunalari;
tovar belgilari, xizmat koʻrsatish belgilari va tovar kelib chiqqan joy nomlari;
seleksiya yutuqlari;
integral mikrosxemalar topologiyalari.
293. Nomzod yoki patent vakiliga savollarga javob berishga tayyorgarlik koʻrishlari uchun 30 daqiqa vaqt ajratiladi.
Nomzod yoki patent vakiliga ikki va undan ortiq ixtisoslik boʻyicha savollarga javob berishga tayyorgarlik koʻrishlari uchun har bir qoʻshimcha ixtisoslik uchun 15 daqiqa vaqt ajratiladi.
294. Malaka imtihonini oʻtkazish jarayonida nomzod yoki patent vakiliga quyidagilar taqiqlanadi:
aloqa va telekommunikatsiya vositalari (telefon, kompyuter, planshet va boshqalar), kitob hamda shpargalkalarni olib kirish;
boshqa nomzod yoki patent vakillari bilan suhbatlashish;
imtihon tugamasdan xonadan tashqariga chiqish.
Nomzod yoki patent vakilining mazkur qoidalarga amal qilmasligi uni imtihonda qatnashishdan chetlashtirish uchun asos boʻladi. Ushbu holatda tegishli dalolatnoma rasmiylashtiriladi va malaka komissiyasi aʼzolarining kamida uch nafari tomonidan imzolanadi.
Malaka imtihonida qatnashishdan chetlashtirilgan nomzod yoki patent vakili attestatsiyadan oʻtmagan deb topiladi.
295. Tayyorgarlik koʻrish uchun berilgan vaqt tugagandan soʻng nomzod yoki patent vakili oʻziga berilgan savollar boʻyicha komissiya aʼzolariga javob beradi.
Komissiya aʼzolari ayrim javoblarni aniqlashtirish maqsadida qoʻshimcha savollar berishi mumkin.
Nomzod yoki patent vakili savollarga javob berib boʻlganidan soʻng, unga xonadan chiqishiga ruxsat beriladi.
30. Malaka komissiyasi suhbat natijasiga koʻra nomzod yoki patent vakilini attestatsiyadan oʻtkazish yoki attestatsiyadan oʻtkazishni rad etish toʻgʻrisida qaror qabul qiladi.
Nomzod yoki patent vakili ikki va undan ortiq ixtisoslik boʻyicha imtihon topshirgan taqdirda barcha ixtisosliklar boʻyicha umumiy suhbat natijasi aniqlanadi va yagona qaror qabul qilinadi.
Malaka imtihoniga qoʻyish rad etilgan taqdirda malaka komissiyasi tomonidan nomzod yoki patent vakilini attestatsiyadan oʻtkazishni rad etish toʻgʻrisida qaror qabul qilinadi.
31. Malaka komissiyasi qarori ikki nusxada tuziladi. Qarorning bir nusxasi malaka imtihoni oʻtkazish jarayoni qayd etilgan audio va videoyozuvlar yozilgan saqlash qurilmalari bilan birga attestatsiyadan oʻtkazishga oid hujjatlar yigʻma jildiga tikiladi, ikkinchi nusxasi esa, nomzod yoki patent vakiliga uning arizasida koʻrsatilgan elektron pochta manzili boʻyicha joʻnatiladi.
Qarorda quyidagilar koʻrsatiladi:
raqami va qabul qilingan sanasi;
ishtirok etgan komissiya aʼzolari roʻyxati;
attestatsiyadan oʻtkazilgan yoki attestatsiyadan oʻtkazish rad etilgan nomzod yoki patent vakilining roʻyxati;
komissiya qarori ustidan shikoyat qilish huquqining mavjudligi.
Qaror malaka imtihoni oʻtkazilgan kunning oʻzida imtihonda ishtirok etgan nomzod yoki patent vakillariga oʻqib eshittiriladi.
32. Nomzod yoki patent vakili attestatsiyadan oʻtkazishning, shu jumladan malaka imtihoniga qoʻyishning rad etilgani yuzasidan u attestatsiyadan oʻtkazish rad etilgani toʻgʻrisidagi qarorni olgan sanadan boshlab 3 oy muddatda apellatsiya komissiyasiga shikoyat qilishi mumkin.
Apellatsiya komissiyasi shikoyat boʻyicha u olingan sanadan boshlab 1 oy muddatda qaror qabul qiladi va bunda:
malaka komissiyasining qarorini oʻzgarishsiz qoldirish va shikoyatni qanoatlantirishni rad qilish;
malaka komissiyasining qarorini oʻzgartirish va yangi qaror qabul qilishga haqli.
5-bob. Patent vakilini roʻyxatdan oʻtkazish
33. Patent vakilini roʻyxatdan oʻtkazish va uni reyestrga kiritish quyidagi hujjatlar mazkur Qoidalarning 231-bandi talablariga muvofiq elektron shaklda taqdim etilganda amalga oshiriladi:
a) mazkur Qoidalarning 3-ilovasida keltirilgan shakldagi patent vakili sifatida roʻyxatdan oʻtkazish haqida ariza;
v) roʻyxatdan oʻtkazilganlik uchun, roʻyxatdan oʻtkazilganligi toʻgʻrisidagi maʼlumotlar eʼlon qilinganligi va patent vakili guvohnomasi berilganligi uchun belgilangan toʻlov toʻlangani toʻgʻrisidagi toʻlov hujjati nusxasi.
34. Roʻyxatdan oʻtkazish toʻgʻrisida ariza berilgan sanadan boshlab, 3 ish kuni mobaynida patent vakili Agentlik tomonidan reyestrda roʻyxatdan oʻtkaziladi, reyestrda roʻyxatdan oʻtkazilgan sanadan boshlab 10 kun mobaynida mazkur Qoidalarning 4-ilovasida keltirilgan shaklda patent vakiliga guvohnoma beriladi va roʻyxatdan oʻtkazilganlik toʻgʻrisidagi maʼlumotlar Agentlikning rasmiy axborotnomasida eʼlon qilinadi. Koʻrsatilgan maʼlumotlar reyestrda roʻyxatdan oʻtkazilgan kunda Agentlikning rasmiy veb-saytida joylashtiriladi.
Agentlik attestatsiyadan oʻtmagan shaxs tomonidan roʻyxatdan oʻtkazish toʻgʻrisida ariza berilgan, roʻyxatdan oʻtkazish uchun belgilangan toʻlov toʻlanmagan, shuningdek, Nizomning 3 — 5-bandlariga muvofiq patent vakilini roʻyxatdan oʻtkazishga toʻsqinlik qiluvchi holatlar paydo boʻlgan hollarda roʻyxatdan oʻtkazishni rad etadi.
35. Reyestrdagi qayd quyidagi maʼlumotlarni oʻz ichiga oladi:
a) roʻyxat raqami, ushbu raqam guvohnomaga ham qoʻyiladi;
b) patent vakilining familiyasi, ismi, otasining ismi;
v) patent vakilining doimiy turar joyi;
g) malaka komissiyasi qarori raqami va sanasi;
d) patent vakili tomonidan koʻrsatilgan faoliyat ixtisosligi;
e) patent vakilining yollanish boʻyicha ishi toʻgʻrisida maʼlumotlar;
j) yozishma uchun manzil (Oʻzbekiston Respublikasi hududida), shuningdek, telefon raqami hamda elektron pochta manzili;
z) patent vakili roʻyxatdan oʻtkazilgan sana;
i) guvohnoma berilgan yoki joʻnatilgani toʻgʻrisida maʼlumotlar. Reyestrga boshqa maʼlumotlar ham kiritilishi mumkin.
36. Patent vakili sifatida roʻyxatdan oʻtmagan yoxud reyestrdan oʻchirilgan shaxsning oʻz faoliyatida “patent vakili” maqomidan foydalanishi mumkin emas.
37. Guvohnoma patent vakiliga shaxsan topshiriladi yoki buyurtma pochta yoʻllanmasi tarzida joʻnatiladi.
6-bob. Patent vakillari toʻgʻrisida maʼlumotlarni eʼlon qilish
38. Patent vakilining roʻyxatdan oʻtkazilgani toʻgʻrisidagi maʼlumotlar u reyestrda roʻyxatdan oʻtkazilgan taqdirdagina eʼlon qilinishi mumkin.
39. Agentlikning rasmiy axborotnomasi va veb-saytida patent vakili toʻgʻrisida quyidagi maʼlumotlar eʼlon qilinadi:
a) familiyasi, ismi, otasining ismi;
b) guvohnoma roʻyxat raqami;
g) yozishma uchun manzili;
d) koʻrsatilgan faoliyat ixtisosligi;
e) ish joyi va lavozimi yoki boshqa yollanish boʻyicha ishi toʻgʻrisida maʼlumotlar.
40. Agentlik rasmiy axborotnomada va veb-saytida, shuningdek, patent vakillarini roʻyxatdan oʻtkazishga doir oʻzgarishlar toʻgʻrisidagi maʼlumotlarni, shu jumladan, patent vakillari faoliyatida aniqlangan kamchiliklarni tuzatishga qaratilgan chora-tadbirlar, patent vakili reyestrdan oʻchirilgani haqidagi va boshqa maʼlumotlarni eʼlon qiladi.
41. Reyestr maʼlumotlari bilan har qanday shaxs tanishishi mumkin.
411. Nomzod va patent vakillarini attestatsiyadan oʻtkazish, patent vakillarini roʻyxatdan oʻtkazish, roʻyxatdan oʻtkazilgan patent vakillari toʻgʻrisidagi maʼlumotlarni eʼlon qilish, guvohnomalar berish, qoʻshimcha attestatsiya oʻtkazish, reyestrga oʻzgartirish va qoʻshimchalar kiritish uchun toʻlovlar miqdori mazkur Qoidalarning 5-ilovasiga muvofiq belgilanadi.
7-bob. Yakuniy qoida
42. Mazkur Qoidalarni buzilishida aybdor boʻlgan shaxslar qonunchilik hujjatlarida belgilangan tartibda javobgar boʻladilar.
Patent vakilligiga nomzodlarni attestatsiyadan va roʻyxatdan oʻtkazish hamda patent vakillarini attestatsiyadan oʻtkazish qoidalariga 1-ILOVA
(1-ilova Oʻzbekiston Respublikasi adliya vazirining 2021-yil 29-martdagi 4-mh-sonli buyrugʻi (roʻyxat raqami 3203-1, 29.03.2021-y.) tahririda — Qonun hujjatlari maʼlumotlari milliy bazasi, 29.03.2021-y., 10/21/3203-1/0253-son)
Patent vakilligiga nomzodlarni attestatsiyadan va roʻyxatdan oʻtkazish hamda patent vakillarini attestatsiyadan oʻtkazish qoidalariga 2-ILOVA
(2-ilova Oʻzbekiston Respublikasi adliya vazirining 2021-yil 29-martdagi 4-mh-sonli buyrugʻi (roʻyxat raqami 3203-1, 29.03.2021-y.) tahririda — Qonun hujjatlari maʼlumotlari milliy bazasi, 29.03.2021-y., 10/21/3203-1/0253-son)
Patent vakilligiga nomzodlarni attestatsiyadan va roʻyxatdan oʻtkazish hamda patent vakillarini attestatsiyadan oʻtkazish qoidalariga 3-ILOVA
(3-ilova Oʻzbekiston Respublikasi adliya vazirining 2021-yil 29-martdagi 4-mh-sonli buyrugʻi (roʻyxat raqami 3203-1, 29.03.2021-y.) tahririda — Qonun hujjatlari maʼlumotlari milliy bazasi, 29.03.2021-y., 10/21/3203-1/0253-son)
Patent vakilligiga nomzodlarni attestatsiyadan va roʻyxatdan oʻtkazish hamda patent vakillarini attestatsiyadan oʻtkazish qoidalariga 4-ILOVA
(4-ilova Oʻzbekiston Respublikasi adliya vazirining 2021-yil 29-martdagi 4-mh-sonli buyrugʻi (roʻyxat raqami 3203-1, 29.03.2021-y.) tahririda — Qonun hujjatlari maʼlumotlari milliy bazasi, 29.03.2021-y., 10/21/3203-1/0253-son)
Patent vakilligiga nomzodlarni attestatsiyadan va roʻyxatdan oʻtkazish hamda patent vakillarini attestatsiyadan oʻtkazish qoidalariga 5-ILOVA
Patent vakilligiga nomzod va patent vakillarini attestatsiyadan, patent vakillarini roʻyxatdan oʻtkazish, roʻyxatdan oʻtkazilgan patent vakillari toʻgʻrisidagi maʼlumotlarni eʼlon qilish, guvohnomalar berish, qoʻshimcha attestatsiya oʻtkazish, reyestrga oʻzgartirish va qoʻshimchalar kiritish uchun toʻlovlar MIKDORI
Toʻlov nomi Toʻlov miqdori (bazaviy hisoblash miqdorida belgilanadi) 1. Patent vakilligiga nomzodlarni va patent vakillarini attestatsiyadan oʻtkazish 4 2. Patent vakillarini roʻyxatdan oʻtkazish, roʻyxatdan oʻtkazilgan patent vakillari toʻgʻrisidagi maʼlumotlarni eʼlon qilish, guvohnomalar berish 1 3. Patent vakillarini qoʻshimcha attestatsiyadan oʻtkazish 4 4. Oʻzbekiston Respublikasi Patent vakillari davlat reyestriga oʻzgartirish va qoʻshimchalar kiritish 1
Oʻzbekiston Respublikasi adliya vazirining 2019-yil 13-dekabrdagi 538-mh-son buyrugʻiga2-ILOVA
Oʻz kuchini yoʻqotgan deb topilayotgan idoraviy normativ-huquqiy hujjatlar
ROʻYXATI
1. Oʻzbekiston Respublikasi Davlat patent idorasi direktorining 2003-yil 11-noyabrdagi 66-son “Patent vakillarini attestatsiyadan va roʻyxatdan oʻtkazish qoidalarini tasdiqlash toʻgʻrisida”gi buyrugʻi (roʻyxat raqami 1294, 2003-yil 24-dekabr).
2. Oʻzbekiston Respublikasi Intellektual mulk agentligi bosh direktorining 2011-yil 26-avgustdagi 31-son “Patent vakillarini attestatsiyadan va roʻyxatdan oʻtkazish qoidalarini tasdiqlash toʻgʻrisida”gi buyruqqa oʻzgartirishlar kiritish haqida”gi buyrugʻi (roʻyxat raqami 1294-1, 2011-yil 30-sentabr).