24-modda. Vazirlar Mahkamasi aʼzolari

Vazirlar Mahkamasi aʼzolari:

Vazirlar Mahkamasi va uning Rayosati majlislarida masalalarni koʻrib chiqishda ishtirok etadi, shuningdek Vazirlar Mahkamasi majlislarining kun tartibi boʻyicha takliflar kiritadi;

Vazirlar Mahkamasi koʻrib chiqishi uchun masalalar tayyorlashni amalga oshiradi;

Vazirlar Mahkamasining vakolatiga kiruvchi masalalarni koʻrib chiqish toʻgʻrisida Vazirlar Mahkamasiga takliflar kiritadi;

normativ-huquqiy hujjatlar loyihalarini ishlab chiqish tashabbusi bilan chiqadi;

tegishli vazirliklarning, davlat qoʻmitalarining yoki boshqa davlat boshqaruvi organlarining faoliyatini tashkil etadi va muvofiqlashtiradi;

Qonunchilik palatasiga taqdim etilgan harakatlar rejasini roʻyobga chiqarishga, shuningdek vazirliklar va davlat qoʻmitalari faoliyati samaradorligini hamda maqsadli vazifalarning bajarilishini baholashning asosiy mezonlarini hisobga olgan holda, maqsadli vazifalarni bajarishga doir choralarni amalga oshiradi;

Vazirlar Mahkamasi tomonidan tashkil etiladigan Vazirlar Mahkamasining komissiyalari va boshqa ishchi organlariga Vazirlar Mahkamasining qaroriga koʻra rahbarlikni amalga oshiradi.

Vazirlar Mahkamasi aʼzolari oʻzi rahbarlik qilayotgan vazirlikning, davlat qoʻmitasining yoki boshqa davlat boshqaruvi organining faoliyati samaradorligi uchun shaxsan javobgar boʻladi.

Vazirlar Mahkamasi aʼzolari ilmiy va pedagogik faoliyatdan tashqari haq toʻlanadigan boshqa turdagi faoliyat bilan shugʻullanishi mumkin emas.