Oʻzbekiston Respublikasining ayrim qonun hujjatlari normalarini bir-biriga muvofiqlashtirish toʻgʻrisidagi taklifni Oliy Majlisga taqdim etish haqida

30.10.2002

Oʻzbekiston Respublikasi Konstitutsiyaviy sudining

qarori

Oʻzbekiston Respublikasi Konstitutsiyaviy sudi Rais B. Mustafoyev, sudyalar B. Mirboboyev, U. Bozorov, G. Pirjanov va S. Hakimovadan iborat tarkibda, Oʻzbekiston Respublikasi Konstitutsiyasining 82-moddasi va “Oʻzbekiston Respublikasining Konstitutsiyaviy sudi toʻgʻrisida”gi Qonunning 10-moddasiga amal qilgan holda Oʻzbekiston Respublikasining ayrim qonun hujjatlari normalarini bir-biriga muvofiqlashtirish toʻgʻrisidagi taklifni Oliy Majlisga taqdim etish haqidagi ishni ochiq sud majlisida koʻrib chiqdi.

Ishni koʻrishga Oʻzbekiston Respublikasi Konstitutsiyaviy sudi sudyalari B. Mirboboyev, U. Bozorov va G. Pirjanovning Oʻzbekiston Respublikasining Jinoyat-protsessual kodeksi 239-moddasining ikkinchi qismini va “Oʻzbekiston Respublikasining Konstitutsiyaviy sudi toʻgʻrisida”gi Qonun 16-moddasining birinchi qismini bir-biriga muvofiqlashtirish zarurligi xususida “Oʻzbekiston Respublikasining Konstitutsiyaviy sudi toʻgʻrisida”gi Qonunning 19-moddasiga muvofiq koʻrsatgan tashabbusi asos boʻldi.

Maʼruzachi-sudya G. Pirjanovning axborotini, Konstitutsiyaviy sud Raisi B. Mustafoyev, sudyalar B. Mirboboyev, U. Bozorov, S. Hakimovaning fikrlarini eshitib, Oʻzbekiston Respublikasi Konstitutsiyaviy sudi quyidagilarni aniqladi:

Oʻzbekiston Respublikasining Jinoyat-protsessual kodeksi 239-moddasining ikkinchi qismida “Qamoqqa olish tarzidagi ehtiyot chorasi... Oʻzbekiston Respublikasi Konstitutsiyaviy sudining sudyasiga nisbatan — Oʻzbekiston Respublikasi Konstitutsiyaviy sudining roziligi bilan... qoʻllanilishi mumkin” deb koʻrsatilgan.

“Oʻzbekiston Respublikasining Konstitutsiyaviy sudi toʻgʻrisida”gi Qonun 16-moddasining birinchi qismida esa “Konstitutsiyaviy sudning sudyasi Oliy Majlisning roziligisiz, sessiyalar oʻrtasidagi davrda esa Oliy Majlis Kengashining roziligisiz... hibsga olinishi... mumkin emas” deb mustahkamlangan.

Oʻzbekiston Respublikasi Konstitutsiyaviy sudi mazkur qonunlarning normalarini bir-biriga muvofiqlashtirish zarur deb hisoblaydi.

Yuqorida bayon qilinganlarga asoslanib va “Oʻzbekiston Respublikasining Konstitutsiyaviy sudi toʻgʻrisida”gi Qonunning 25 va 26-moddalariga amal qilgan holda, Konstitutsiyaviy sud qaror qildi:

Oʻzbekiston Respublikasi Jinoyat-protsessual kodeksi 239-moddasining ikkinchi qismi va “Oʻzbekiston Respublikasining Konstitutsiyaviy sudi toʻgʻrisida”gi Qonun 16-moddasining birinchi qismini bir-biriga muvofiqlashtirish toʻgʻrisidagi taklif qonunchilik tashabbusi tartibida Oʻzbekiston Respublikasi Oliy Majlisiga taqdim etilsin.

Toshkent sh.,

2002-yil 30-oktabr