Bank kollejlari tashkil etish toʻgʻrisida (272-son)

31.07.1996

Oʻzbekiston Respublikasi Vazirlar Mahkamasining

qarori

Bank, moliya, soliq tuzilmalari, bozor infrastrukturasi tashkilotlari uchun malakali kadrlar tayyorlash va Bank tizimini rivojlantirishning kompleks dasturini amalga oshirish maqsadida Vazirlar Mahkamasi qaror qiladi:

1. Oʻzbekiston Respublikasi Oliy va oʻrta maxsus taʼlim vazirligi, Davlat mulki qoʻmitasi, Banklar uyushmasi, Davlat soliq qoʻmitasi, Qoraqalpogʻiston Respublikasi Vazirlar Kengashi, bir qancha viloyatlar hokimliklarining 1996/97 oʻquv yilidan boshlab toʻliqsiz oliy maʼlumotli kichik mutaxassislar tayyorlash boʻyicha:

Toshkent shahrida — Toshkent shahar, Talabalar shaharchasi, Toshkent davlat texnika universitetining 75-yotoqxonasi binosida joylashgan Toshkent davlat moliya instituti huzuridagi bank kolleji;

Andijon viloyatida — binolar majmuini Oʻzbekbirlashuv balansidan Oliy va oʻrta maxsus taʼlim vazirligi balansiga bergan holda Oltinkoʻl tumani, Turkiston koʻchasi, 6-uyda joylashgan bank kolleji;

Samarqand shahrida — binolar majmuini Samarqand shahar hokimligi balansidan Oliy va oʻrta maxsus taʼlim balansiga tekin bergan holda Dogʻbet koʻchasi, 6-uyda joylashgan bank kolleji;

Urganch shahrida — binolar majmuini “Oʻzbekyengilsanoat” uyushmasi balansidan Oliy va oʻrta maxsus taʼlim vazirligi balansiga bergan xolda Tinchlik koʻchasi, 29-uyda joylashgan bank kolleji;

Qoraqalpogʻiston Respublikasida — binolar majmuini “Paxta-bank” balansidan Oliy va oʻrta maxsus taʼlim vazirligi balansiga bergan holda Toʻrtkoʻl shahri, Toʻrtkoʻl koʻchasi, 59-uyda joylashgan bank kolleji tashkil etish toʻgʻrisidagi takliflari qabul qilinsin.

2. Oʻzbekiston Respublikasi Oliy va oʻrta maxsus taʼlim vazirligi Andijon viloyati, Urganch shahri va Qoraqalpogʻiston Respublikasida Oʻzbekbirlashuv, “Oʻzbekyengilsanoat” uyushmasi va “Paxta-bank” tomonidan unga berilayotgan binolarning haqqini bir oy muddatda 1996-yil 1-iyuldagi holatiga koʻra qoldiq qiymat boʻyicha toʻlasin.

3. Bank operatsiyalarini kompyuterda ishlash va statistika;

buxgalterlik hisobi va audit;

moliya va kredit;

soliqlar va soliq solish;

qimmatli qogʻozlar va koʻchmas mulk bilan operatsiyalar oʻtkazish boʻyicha mutaxassislar tayyorlash bank kollejlari faoliyatining asosiy yoʻnalishlari etib belgilansin.

4. Bank kollejlarini mablagʻ bilan taʼminlash respublika budjeti va Banklar uyushmasining markazlashtirilgan fondi hisobidan tegishlicha 30:70 foiz nisbatida oshirilishi maʼlumot uchun qabul qilinsin.

5. 1996/97 oʻquv yilida Oʻzbekiston Respublikasining oʻrta maxsus oʻquv yurtlarida oʻqish uchun belgilangan davlat grantlari doirasida talabalar qabul qilish Toshkent, Andijon, Samarqand, Urganch bank kollejlarining har biriga 100 tadan, Toʻrtkoʻl bank kollejiga 60 kishi etib belgilansin.

6. Oliy va oʻrta maxsus taʼlim vazirligi Banklar uyushmasi, Oʻzbekiston Respublikasi Davlat mulki qoʻmitasi va Davlat soliq qoʻmitasi bilan birgalikda:

bir oy muddatda yangidan tashkil etilayotgan kollejlar ustavlarini va tuzilmasini ishlab chiqsin hamda tasdiqlasin;

1996/1997 oʻquv yilidan boshlab belgilangan tartibda talabalar qabul qilish va oʻquv jarayoni boshlanishini taʼminlovchi zarur chora-tadbirlarni koʻrsin;

kollejlarni yuqori malakali kadrlar bilan butlashni taʼminlasin.

7. Qoraqalpogʻiston Respublikasi Vazirlar Kengashi, Andijon, Samarqand va Xorazm viloyatlari hamda Toshkent shahar hokimliklari Oliy va oʻrta maxsus taʼlim vazirligi bilan birgalikda tashkil etilayotgan kollejlarni joylashtirish va ularning faoliyatini tashkil etish masalalarini oʻn kun muddatda hal etsinlar.

8. Banklar uyushmasi, Markaziy bank, Oʻzbekiston Respublikasi Moliya vazirligi, Davlat mulki qoʻmitasi, Davlat soliq qoʻmitasi yangi bank kollejlariga ularning oʻquv-laboratoriya bazalarini zamonaviy asbob-uskunalar, kompyuter va audio-videotexnika bilan jihozlashda muntazam moddiy va tashkiliy-texnik yordam bersinlar.

9. Belgilab qoʻyilsinki, yangidan tashkil etilgan bank kollejlari Oʻzbekiston Respublikasi Oliy va oʻrta maxsus taʼlim vazirligi tuzilmasiga kiradi.

10. Moliya vazirligi yuqorida sanab oʻtilgan kollejlar tashkil etilishi munosabati bilan Oliy va oʻrta maxsus taʼlim vazirligining budjeti parametrlariga tegishli oʻzgartirishlar kiritsin.

11. Mazkur qarorning bajarilishini nazorat qilish Bosh vazirning oʻrinbosari S.S. Saidqosimov zimmasiga yuklansin.

Oʻzbekiston Respublikasining Bosh vaziri Oʻ. SULTONOV

Toshkent sh.,

1996-yil 31-iyul,

272-son