Jizzax viloyatining tadbirkorlik va investitsiya salohiyatini rivojlantirish uchun qulay sharoitlar yaratish chora-tadbirlari toʻgʻrisida (936-son)

21.11.2019

Oʻzbekiston Respublikasi Vazirlar Mahkamasining

qarori

Jizzax viloyatida yuqori texnologiyalarni, ilmiy-texnologik va innovatsion tadbirkorlikni rivojlantirish, investitsiyalarni faol jalb qilish uchun qoʻshimcha shart-sharoitlar yaratish, yangi raqobatbardosh ishlab chiqarishlarni alohida hududlarda jamlash, aholi bandligini va farovonligini oshirish maqsadida Vazirlar Mahkamasi qaror qiladi:

1. Jizzax viloyati hokimligi, Oʻzbekiston Respublikasi Prezidenti huzuridagi Loyiha boshqaruvi milliy agentligi hamda Iqtisodiyot va sanoat vazirligining Jizzax viloyatida koʻp tarmoqli texnologik parklarni (keyingi oʻrinlarda texnoparklar deb ataladi) tashkil etish hamda ularning hududida mahsulotlar, materiallar va butlovchi buyumlarning yangi turlarini ishlab chiqarish loyihalarini amalga oshirish toʻgʻrisidagi taklifiga rozilik berilsin.

2. Quyidagilar texnoparklarning asosiy vazifalari va faoliyati yoʻnalishlari etib belgilansin:

import oʻrnini bosuvchi raqobatbardosh mahsulotlar ishlab chiqarishni tashkil etishga qiziqish bildirgan mahalliy va xorijiy investorlarni jalb etish;

texnoparklar ishtirokchilariga qulay shart-sharoitlar yaratish, ularni zarur yuqori texnologik infratuzilma bilan taʼminlash;

texnoparklar ishtirokchilariga moliyaviy, marketing, huquqiy va boshqa turdagi xizmatlar koʻrsatish.

3. Texnoparklarning faoliyatini boshqarish va muvofiqlashtirish Oʻzbekiston yoshlar ittifoqi huzuridagi “Yoshlar — kelajagimiz” jamgʻarmasi (keyingi oʻrinlarda jamgʻarma deb ataladi) muassisligida masʼuliyati cheklangan jamiyat shaklida tashkil etiladigan Jizzax viloyati koʻp tarmoqli texnologik parklari yagona direksiyasi (keyingi oʻrinlarda direksiya deb ataladi) tomonidan amalga oshirilishi maʼlumot uchun qabul qilinsin.

4. Belgilansinki, texnoparklarni tashkil etish va joylashtirish uchun 1-ilovada koʻrsatilgan boʻsh turgan yer maydonlari tegishli tumanlar hokimliklari tomonidan direksiyaga bepul tarzda doimiy foydalanish huquqi bilan ajratiladi.

5. Texnoparklar hududida bino-inshootlarni qurish va yer maydonlari ajratish quyidagi tartibda amalga oshiriladi:

a) qurilish boʻyicha buyurtmachi funksiyalarini bajarish direksiyaga yuklanadi;

b) qurilish jamgʻarma mablagʻlari hisobiga amalga oshiriladi;

v) tegishli tumanlar hokimliklari:

quriladigan bino-inshootlarni muhandislik-kommunikatsiyasiga, shu jumladan elektr energiyasi, tabiiy gaz, suv taʼminoti, tashqi kanalizatsiya tarmoqlariga ulashni viloyat va tuman budjetining qoʻshimcha manbalari hisobidan taʼminlaydi;

texnoparklarga tutash hududlarni obodonlashtirishga hamda texnoparklar ishtirokchilarining muhandislik-kommunikatsiyasi bilan uzluksiz taʼminlanishiga masʼul hisoblanadi;

g) direksiya bino-inshootlarni texnoparklar ishtirokchilariga toʻgʻridan toʻgʻri muzokaralar orqali import oʻrnini bosuvchi raqobatbardosh mahsulotlar ishlab chiqarishni tashkil etish va 5 yil muddatda saqlab qolish, ishlab chiqarish jarayonida yaratiladigan ish oʻrinlarining kamida 30 foizini yoshlar bilan toʻldirish, shuningdek bino-inshootlarni qurish bilan bogʻliq xarajatlarni (tannarxidan yuqori boʻlmagan miqdorda) 5 yil muddatgacha boʻlib-boʻlib toʻlash shartlari bilan sotadi.

Bunda, har bir bino-inshootning 25 foizdan kam boʻlmagan qismi direksiya tasarrufida qoldiriladi va texnoparklar ishtirokchilariga ijaraga beriladi;

d) direksiya sotilmagan bino-inshootlarni texnoparklar ishtirokchilariga import oʻrnini bosuvchi raqobatbardosh mahsulotlar ishlab chiqarishni tashkil etish va saqlab qolish shartlari asosida ijaraga berishi mumkin;

e) texnoparklar ishtirokchilarining bino-inshootlarga mulk huquqi direksiya xarajatlari toʻliq qoplangandan soʻng rasmiylashtiriladi;

j) direksiyaga bino-inshootlarni sotishdan kelib tushgan mablagʻlar Jizzax viloyatida yangi texnoparklarni tashkil qilish uchun sarflanadi yoki jamgʻarma hisobiga oʻtkaziladi.

6. Belgilab qoʻyilsinki:

direksiya tomonidan bino-inshootlarni texnoparklar ishtirokchilariga ijaraga berish ortib boradigan koeffitsiyentlarni qoʻllamasdan, ijara toʻlovining eng kam stavkasi boʻyicha amalga oshiriladi;

jamgʻarma texnoparklar ishtirokchilariga texnoparklar hududida loyihalarni amalga oshirish doirasida zamonaviy va yuqori texnologik asbob-uskunalar, texnik vositalar, dasturiy mahsulotlar, inventar va boshqa moddiy-texnika resurslarini xarid qilish uchun tijorat banklari orqali yillik 7 foiz stavka bilan imtiyozli kreditlar berilishini taʼminlaydi;

direksiya texnoparklar ishtirokchilari uchun imtiyozli kreditlar olish maqsadida kafil sifatida ishtirok etishi mumkin;

texnoparklar hududida, birinchi navbatda, Oʻzbekiston Respublikasi Prezidentining 2019-yil 1-maydagi PQ-4302-son qarori bilan tasdiqlangan 2019-yilda tadbirkorlik subyektlari tomonidan oʻzlashtirilishi tavsiya etiladigan tayyor mahsulotlar, butlovchi buyumlar, xomashyo va materiallarning yangi turlari roʻyxatida koʻrsatib oʻtilgan mahsulotlar ishlab chiqarilishi yoʻlga qoʻyiladi.

7. Jizzax viloyati koʻp tarmoqli texnologik parklarida amalga oshirish tavsiya etilayotgan loyihalar roʻyxati 2-ilovaga muvofiq maʼqullansin.

8. Texnoparklarni tashkil etish doirasida direksiyaga, istisno tariqasida:

texnoparklar hududidagi bino-inshootlarni qurish va rekonstruksiya qilishni belgilangan shaharsozlik normalari va qoidalariga rioya etgan holda bir vaqtda loyihalash va moliyalashtirish shartlari asosida bajarishga;

texnoparklar faoliyatini tashkil etish uchun loyihalash va pudrat tashkilotlarini, shuningdek asbob-uskunalar, texnik vositalar, dasturiy mahsulotlar, inventar va boshqa moddiy-texnika resurslarini yetkazib beruvchilarni tender (tanlov) savdolari oʻtkazmasdan, eng yaxshi takliflarni tanlab olish asosida aniqlashga ruxsat berilsin.

9. Belgilansinki:

a) quyidagilar texnoparklar faoliyatini tashkil etish va amalga oshirish bilan bogʻliq choralarni moliyalashtirish manbalari hisoblanadi:

xoʻjalik shartnomalari asosida texnoparklarning faoliyati ixtisosligiga tegishli ishlar bajarilishidan olingan mablagʻlar;

bino-inshootlarni ijaraga berishdan olingan tushumlar;

b) direksiya taʼminoti:

texnoparklar hududida tijorat faoliyatini amalga oshirayotgan texnoparklar ishtirokchilari sof foydasining 1 foizi miqdoridagi har choraklik ajratmalar;

texnoparklar ishtirokchilariga xizmatlar koʻrsatishdan olingan daromadlar;

qonun hujjatlarida taqiqlanmagan boshqa manbalar hisobiga amalga oshiriladi.

10. Jamgʻarma oʻn kun muddatda:

direksiya ustavini tasdiqlasin, bunda texnoparklar ishtirokchilarini roʻyxatga olish, istiqbolli loyihalarni tanlash va moliyalashtirish tartibini nazarda tutsin;

direksiyaning belgilangan tartibda davlat roʻyxatidan oʻtkazilishini taʼminlasin.

11. Jizzax viloyati hokimligi:

oʻn kun muddatda direksiyani joylashtirish choralarini koʻrsin;

tegishli tumanlar hokimliklari bilan birgalikda texnoparklar va direksiya faoliyatini tashkil etishga har tomonlama koʻmaklashsin.

12. Oʻzbekiston Respublikasi Iqtisodiyot va sanoat vazirligi manfaatdor vazirlik va idoralar bilan birgalikda bir oy muddatda qonun hujjatlariga ushbu qarordan kelib chiqadigan oʻzgartish va qoʻshimchalar toʻgʻrisida Vazirlar Mahkamasiga takliflar kiritsin.

13. Mazkur qarorning ijrosini nazorat qilish Oʻzbekiston Respublikasi Bosh vazirining investitsiya va tashqi iqtisodiy aloqalar masalalari boʻyicha oʻrinbosari E.M. Ganiyev hamda Jizzax viloyati hokimi E.A. Saliyev zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2019-yil 21-noyabr,

936-son

Vazirlar Mahkamasining 2019-yil 21-noyabrdagi 936-son qaroriga 1-ILOVA

Jizzax viloyatida tashkil etilayotgan koʻp tarmoqli texnologik parklar

roʻyxati

T/r Tuman nomi Manzil Yer maydoni 1. Zomin “Gʻallakor” QFY 2,5 gektar 2. Doʻstlik “A. Navoiy” MFY 1,5 gektar 3. Sharof Rashidov “Toqchilik” MFY 2 gektar

Vazirlar Mahkamasining 2019-yil 21-noyabrdagi 936-son qaroriga 2-ILOVA

Jizzax viloyatining koʻp tarmoqli texnologik parklarida amalga oshiriladigan istiqbolli investitsiya loyihalari

ROʻYXATI*

T/r Loyiha tashabbuskori Loyiha tavsifi Loyiha qiymati (mln soʻm) shundan: Ish oʻrni Ishga tushirish muddati oʻz mablagʻi (mln soʻm) bank krediti (mln soʻm) xorijiy investitsiya (ming doll) Viloyat boʻyicha jami: 14 ta loyiha 53 mlrd soʻm 12 mlrd soʻm 33,4 mlrd soʻm 900 282 Zomin tumani Jami: 4 ta loyiha 17 955 3 555 11 850 300 77 1. “Zomin kamalak” OK Meva sabzavotlarni quritish va qadoqlash 4 420 1 020 3 400 15 01.12.2019 2. “Don barakat invest” MChJ QK Oʻsimlik yogʻi ishlab chiqarish va qadoqlash 4 760 510 1 700 300 20 01.12.2019 3. “Turkiston matlubot invest” MChJ Kovul mahsulotini konservalash 5 525 1 275 4 250 12 01.12.2019 4. Doʻmonov Xudoyor Non va qandolat mahsulotlari ishlab chiqarish 3 250 750 2 500 30 01.12.2019 Doʻstlik tumani Jami: 5 ta loyiha 3 560 1 110 2 450 70 5. “Azizbektexxizmat” MChJ Paypoq ishlab chiqarish 750 150 600 10 01.12.2019 6. “Mubina — Maftuna” MChJ Tayyor trikotaj mahsulotlari ishlab chiqarish 500 200 300 25 01.12.2019 7. “Orzular quyoshi” MChJ Mebel ishlab chiqarish 1 500 500 1 000 10 01.12.2019 8. “Egamov Kamoliddin” YTT Poyabzal ishlab chiqarish 500 200 300 15 01.12.2019 9. “Islom — Aziz” XK Salfetka ishlab chiqarish 310 60 250 10 01.12.2019 Sharof Rashidov tumani Jami: 5 ta loyiha 31 500 7 400 19 100 600 135 10. Nuritdinov Bekzod Farmonovich Shampun va kir yuvish vositalari ishlab chiqarish 10 000 5 000 600 40 01.01.2020 11. “Fayz Baraka Dizayn Tekstil” MChJ Bolalar oyoq kiyimi ishlab chiqarish 7 000 2 500 4 500 35 01.01.2020 12. “Alfa almaz” MChJ Elektrotexnika mahsulotlari ishlab chiqarish 8 500 3 000 5 500 30 01.01.2020 13. “Galaksi Puls” MChJ Goʻsht mahsulotlari ishlab chiqarish 3 000 1 000 2 000 15 01.01.2020 14. “Madrid Real” MChJ Meva mahsulotlarini eksportbop “shok” muzlatish usulida quritish va olma chipsini ishlab chiqarish 3 000 900 2 100 15 01.01.2020

* Jizzax viloyati hokimligi tomonidan mazkur roʻyxatga oʻzgartish va qoʻshimchalar kiritilishi mumkin.