Akademik V. Vohidov xotirasini abadiylashtirish toʻgʻrisida (257-son)

06.07.1995

Oʻzbekiston Respublikasi Vazirlar Mahkamasining

qarori

Oʻzbekiston Tibbiyot Fani rivojlanishiga qoʻshgan ulkan hissasini hisobga olib, oʻzbek jarrohlik maktabining asoschilaridan biri akademik Vosit Vohidov xotirasini abadiylashtirish maqsadida Vazirlar Mahkamasi qaror qiladi:

1. Oʻzbekiston Respublikasi Sogʻliqni saqlash vazirligi va tibbiyot jamoatchiligining Respublika jarrohlik ilmiy markaziga akademik V.Vohidov nomini berish haqidagi taklifi maʼqullansin.

2. Toshkent shahar hokimligi va Madaniyat ishlari vazirligi, Sogʻliqni saqlash vazirligi bilan birgalikda ikki oy muddatda Respublika jarrohlik ilmiy markazi binosiga akademik V.Vohidov siymosi tushirilgan memorial lavha oʻrnatsinlar.

3. Toshkent shahar hokimligi poytaxt koʻchalaridan biriga akademik V.Vohidov nomini berish masalasini koʻrib chiqsin.

4. Oʻzbekiston Respublikasi Sogʻliqni saqlash vazirligi va Fanlar akademiyasi har yili Respublika jarrohlik ilmiy markazida jarrohlikning dolzarb masalalari boʻyicha “Vohidov oʻqishlari” — Respublika ilmiy-amaliy anjumanini oʻtkazsinlar.

5. Ushbu qarorning bajarilishini nazorat qilish Vazirlar Mahkamasining Ijtimoiy masalalar va madaniyat boʻlimiga yuklansin.

Vazirlar Mahkamasining Raisi I. KARIMOV

Toshkent sh.,

1995-yil 6-iyul,

257-son