Viloyat hokimining 2013-yil 29-noyabr kunidagi “Surxondaryo viloyatidagi barcha shahar va tumanlarda obodonlashtirish boshqarmalarini tashkil etish haqida”gi 220-sonli qarori haqida (721-son)

07.12.2013

Surxondaryo viloyati Jarqoʻrgʻon tumani hokimining

qarori

Tumanda obodonlashtirish ishlarini tashkil etish va boshqarishni takomillashtirish, shuningdek mahalliy budjet harajatlarini maqbullashtirish hamda Vazirlar Mahkamasining 2013-yil 10-yanvar kunidagi 4-son qarori ijrosini taʼminlash maqsadida, qaror qilaman:

1. Viloyat hokimining 2013-yil 29-noyabr kunidagi “Surxondaryo viloyatidagi barcha shahar va tumanlarda obodonlashtirish boshqarmalarini tashkil etish haqida”gi 220-sonli qarori maʼlumot va ijro uchun qabul qilinsin.

2. Tumanda faoliyat koʻrsatib turgan obodonlashtirish tashkiloti (boʻlimi) qayta tashkil etilsin xamda uning negizida namunaviy tuzilmaga muvofiq obodonlashtirishning tegishli boshqarmasi tashkil etilsin.

3. Quyidagilar obodonlashtirish boshqarmasining asosiy vazifalari etib belgilansin:

arxitektura-qurilish meʼyorlari hamda sanitariya normalari va qoidalariga muvofiq obodonlashtirish obyektini saqlash, ulardan foydalanish ishlarini oʻz vaqtida tashkil etish va sifatli bajarish;

koʻchalar, xiyobonlar, yodgorlik majmualari va umumiy foydalaniladigan boshqa zonalarni koʻkalamzorlashtirish, daraxtzorlarni saqlash (parvarish kilish), sugʻorish boʻyicha agrotexnika tadbirlarini amalga oshirish, zararkunandalar va kasalliklarga qarshi kurashish;

yoʻl-koʻprik xoʻjaligini, xoʻjaliklararo qishloq avtomobil yoʻllarini saqlash va joriy taʼmirlash;

drenaj xoʻjaligini va favvoralarni saqlash, mukammal, joriy taʼmirlash va ulardan foydalanish;

mavsumiy talablarni hisobga olgan holda obodonlashtirish obyektlarini sanitariya jihatdan tozalash.

4. Tuman hokimining birinchi oʻrinbosari (P. Jurayev)ga:

tuman obodonlashtirish boshqarmasi toʻgʻisidagi namunaviy nizom asosida obodonlashtirish boshqarmasining nizomlari tasdiqlanishi;

obodonlashtirish boshqarmasiga joy ajratilishini va zarur hollarda ularni maʼmuriy va ishlab chiqarish binolariga joylashtirish;

obodonlashtirish boshqarmasini malakali mutaxassislar, muhandis-texnik va ishlab chiqarish xodimlari bilan butlashni taʼminlasinlar.

5. Mazkur qarorning bajarilishini nazorat qilish tuman hokimining birinchi oʻrinbosari P. Jurayev zimmasiga yuklatilsin.

Tuman hokimi U. TURAPOV

Jarqoʻrgʻon t.,

2013-yil 7-dekabr,

721-son