17-modda. Oliy taʼlim tashkilotlarida ilmiy faoliyat yuritish
Ilm-fan va ilmiy faoliyat toʻgʻrisida (O‘RQ-576-son) · Sana: 29.10.2019 · Amalda
Oliy taʼlim tashkilotlarida taʼlim jarayoni bilan birga ilmiy faoliyat ham yuritiladi.
Oliy taʼlim tashkilotlarining pedagog kadrlari tegishli yoʻnalishlarda ilmiy faoliyat bilan shugʻullanishlari shart.
Oliy taʼlim tashkilotlari qonunchilikda belgilangan tartibda ilmiy faoliyat natijalarini tijoratlashtirish bilan shugʻullanuvchi tashkilotlar, ilmiy asbob-uskunalardan jamoaviy foydalanish markazlari va boshqa tashkilotlarni taʼsis etish, shuningdek noyob ilmiy obyektlarni tashkil etish huquqiga egadir.
Oliy taʼlim tashkilotlari ilmiy faoliyatga milliy va xalqaro darajadagi yetuk olimlar, ilmiy tashkilotlar vakillarini jalb etish, yetakchi milliy va xorijiy ilmiy tashkilotlar hamda taʼlim muassasalarida amaliyot oʻtashni tashkil qilish huquqiga egadir.
Oliy taʼlim tashkilotlarining ilmiy salohiyatini oshirishga oliy taʼlim tashkilotlari, boʻysunuvida oliy taʼlim tashkilotlari boʻlgan vazirlik, idora va tashkilotlar, Oʻzbekiston Respublikasi Oliy taʼlim, fan va innovatsiyalar vazirligi masʼuldir.
Oliy taʼlim tashkilotining ilmiy faoliyatini baholashda uning ilmiy salohiyati, shu jumladan ilmiy ishlanmalarning natijadorligi, ilmiy maktablarning yaratilganligi, ilmiy darajali pedagog kadrlar salohiyati, shuningdek uning ilm-fan rivojiga qoʻshgan hissasi inobatga olinadi.