“Oʻzbekiston ipotekani qayta moliyalashtirish kompaniyasi” aksiyadorlik jamiyatining faoliyatini tashkil etish chora-tadbirlari toʻgʻrisida (868-son)

14.10.2019

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Ipoteka krediti bozorini rivojlantirish va kengaytirishga oid qoʻshimcha chora-tadbirlar toʻgʻrisida” 2019-yil 13-maydagi PF-5715-son Farmoni ijrosini taʼminlash, respublika ipoteka bozorini bozor iqtisodiyoti tamoyillari asosida qoʻshimcha rivojlantirish va yangi moliyaviy vositalarni tatbiq etish maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Ipoteka krediti bozorini rivojlantirish va kengaytirishga oid qoʻshimcha chora-tadbirlar toʻgʻrisida” 2019-yil 13-maydagi PF-5715-son Farmonida respublikada aksiyadorlik jamiyati shaklidagi ipotekani qayta moliyalashtirish kompaniyasini tashkil qilish va 2019-yilda uning faoliyat koʻrsatishini yoʻlga qoʻyish belgilangani maʼlumot uchun qabul qilinsin.

2. Oʻzbekiston Respublikasi Moliya vazirligi, Iqtisodiyot va sanoat vazirligi, Markaziy banki va Davlat aktivlarini boshqarish agentligining boshlangʻich ustav kapitali miqdori 25,0 mlrd soʻm boʻlgan aksiyadorlik jamiyati shaklidagi qayta moliyalashtirish kredit tashkiloti — Oʻzbekiston ipotekani qayta moliyalashtirish kompaniyasini (keyingi oʻrinlarda kompaniya deb ataladi) taʼsis etish toʻgʻrisidagi taklifiga rozilik berilsin.

3. Belgilansinki:

Oʻzbekiston Respublikasi Moliya vazirligi kompaniya ustav kapitalida davlat nomidan aksiyador sifatida ishtirok etadi;

kompaniya ustav kapitalida 25 mlrd soʻm miqdordagi davlat ulushi Oʻzbekiston Respublikasining respublika budjetidan ajaratiladigan mablagʻlar hisobidan shakllantiriladi.

4. Quyidagilar kompaniyaning asosiy vazifalari etib belgilansin:

mahalliy va xalqaro kapital bozorlarida moliyaviy resurslarni, shu jumladan xalqaro moliya institutlari va xorijiy hukumat moliya tashkilotlarining mablagʻlarini jalb qilish va keyinchalik ipoteka kreditlarini qayta moliyalashtirishga yoʻnaltirish;

aholining arzon uy-joylarga ortib borayotgan ehtiyojini qanoatlantirish uchun bozor tamoyillari asosida tijorat banklariga moliyaviy resurslar taqdim etish;

qimmatli qogʻozlar, shu jumladan ipoteka qimmatli qogʻozlarni chiqarish va investorlar oʻrtasida joylashtirishni tashkil etish;

ipoteka krediti tizimini takomillashtirishga koʻmaklashish, ipoteka bozorini rivojlantirishning zamonaviy uslub va vositalarini tatbiq etish, ipoteka krediti va ipoteka qimmatli qogʻozlar bozorida likvidlilikni oshirish va tavakkalchilikni kamaytirish;

ipoteka krediti va qayta moliyalashtirish sohasidagi metodologik hamda normativ-huquqiy bazani, shu jumladan xorijiy ekspert va mutaxassislarni jalb qilgan holda ishlab chiqishda ishtirok etish.

5. Oʻzbekiston Respublikasi Moliya vazirligi Markaziy bank bilan birgalikda ikki oy muddatda:

Oʻzbekiston Respublikasi Adliya vazirligi, Davlat aktivlarini boshqarish agentligi va Kapital bozorini rivojlantirish agentligi bilan birgalikda kompaniyani davlat roʻyxatidan oʻtkazish, uning korporativ hujjatlarini tasdiqlash, shuningdek, boshqaruv va nazorat organlarini yuqori malakali mutaxassislar bilan taʼminlash boʻyicha tegishli tadbirlarni belgilangan tartibda amalga oshirsin;

tijorat banklariga ipoteka kreditlarini qayta moliyalashtirish tartibi, qayta moliyalashtirish uchun tijorat banklarini tanlash mezonlari, shuningdek, ipoteka kreditlarini qarzga oluvchilarni tanlab olish shartlari toʻgʻrisidagi nizomlarni xorijiy davlatlarning ilgʻor tajribasini inobatga olgan holda ishlab chiqish va tasdiqlashda kompaniyaga yordam koʻrsatsin.

6. Kompaniya emissiya qimmatli qogʻozlarni chiqarishni davlat roʻyxatidan oʻtkazish va qimmatli qogʻozlarni chiqarish bilan bogʻliq boʻlgan hujjatlarni koʻrib chiqish uchun yigʻimlar toʻlashdan ozod etilsin.

7. Oʻzbekiston Respublikasi Moliya vazirligi Davlat aktivlarini boshqarish agentligi va Toshkent shahar hokimligi bilan birgalikda bir oy muddatda kompaniyani joylashtirish choralarini koʻrsin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — moliya vaziri J.A. Qoʻchqorov va Oʻzbekiston Respublikasi Bosh vazirining investitsiyalar va tashqi iqtisodiy aloqalar masalalari boʻyicha oʻrinbosari E.M. Gʻaniyev zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2019-yil 14-oktabr,

868-son