Zargarlik buyumlarini ishlab chiqarish, import qilish va ularning realizatsiyasi monitoringini amalga oshirish tartibi toʻgʻrisidagi nizomni tasdiqlash haqida (834-son)

02.10.2019

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Oʻzbekiston Respublikasida zargarlik tarmogʻini jadal rivojlantirish chora-tadbirlari toʻgʻrisida” 2019-yil 18-maydagi PF-5721-son Farmoni ijrosini taʼminlash hamda respublikada zargarlik buyumlarini ishlab chiqarish va ularning realizatsiyasini tartibga solish maqsadida Vazirlar Mahkamasi qaror qiladi:

1. Zargarlik buyumlarini ishlab chiqarish, import qilish va ularning realizatsiyasi monitoringini amalga oshirish tartibi toʻgʻrisidagi nizom ilovaga muvofiq tasdiqlansin.

2. Oʻzbekiston Respublikasi Davlat soliq qoʻmitasi boshqa manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — moliya vaziri J.A. Qoʻchqorov va Oʻzbekiston Respublikasi Davlat soliq qoʻmitasi raisi B.A. Musayev zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2019-yil 2-oktabr,

834-son

Vazirlar Mahkamasining 2019-yil 2-oktabrdagi 834-son qaroriga ILOVA

Zargarlik buyumlarini ishlab chiqarish, import qilish va ularning realizatsiyasi monitoringini amalga oshirish tartibi toʻgʻrisida

NIZOM

1-bob. Umumiy qoidalar

1. Ushbu Nizom zargarlik buyumlarini ishlab chiqarish, import qilish va ularning realizatsiyasi monitoringini amalga oshirish (keyingi oʻrinlarda monitoring qilish deb ataladi) tartibini belgilaydi.

2. Zargarlik buyumlarini ishlab chiqarish, import qilish va ularning realizatsiyasi monitoringi ushbu Nizomga ilovadagi sxemaga muvofiq amalga oshiriladi.

2-bob. Zargarlik buyumlarini ishlab chiqarish, import qilish va ularning realizatsiyasi boʻyicha maʼlumotlarni shakllantirish tartibi

3. Quyidagilar idoralararo axborot almashinuvi vositasi orqali:

a) Oʻzbekiston Respublikasi Markaziy banki qimmatbaho metallar sotib olgan tadbirkorlik subyektlari toʻgʻrisida;

b) Oʻzbekiston Respublikasi Iqtisodiyot va moliya vazirligi huzuridagi Davlat asillik darajasi nazorati inspeksiyasi Adliya vazirligining “Litsenziya” axborot tizimi orqali:

qimmatbaho metallar va qimmatbaho toshlardan zargarlik buyumlari hamda boshqa buyumlar ishlab chiqarish faoliyatini boshlaganlik toʻgʻrisida tasdiqnoma;

qimmatbaho metallar va qimmatbaho toshlar bilan ishlashni boshlaganlik toʻgʻrisida tasdiqnoma;

zargarlik buyumlarini hamda qimmatbaho metallar va qimmatbaho toshlardan boshqa buyumlarni sotish faoliyatini boshlaganlik toʻgʻrisida tasdiqnoma olgan tadbirkorlik subyektlari toʻgʻrisida.

v) Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi respublika hududiga olib kirilgan va “erkin muomalaga chiqarish (import)” bojxona rejimiga rasmiylashtirilgan zargarlik buyumlari (TIF TN pozitsiyasi 7113-7116), qimmatbaho metall va toshlar (TIF TN pozitsiyasi 7101-7112) toʻgʻrisida;

g) “Oʻzbekiston respublika tovar-xom ashyo birjasi” AJ va “Toshkent tovar xomashyo birjasi” AJ birja savdolari orqali qimmatbaho metallarni sotib olgan tadbirkorlik subyektlari toʻgʻrisida;

d) “Navoiy kon-metallurgiya kombinati” aksiyadorlik jamiyati va “Olmaliq kon-metallurgiya kombinati” aksiyadorlik jamiyati qimmatbaho metallar sotib olgan tadbirkorlik subyektlari toʻgʻrisidagi maʼlumotlarni real vaqt rejimida Oʻzbekiston Respublikasi Soliq qoʻmitasiga taqdim etib boradi.

4. Kelib tushgan hamda mavjud boshqa axborotlar asosida Soliq qoʻmitasida zargarlik buyumlarini ishlab chiqarish, import va realizatsiya qilish faoliyati bilan shugʻullanadigan tadbirkorlik subyektlari toʻgʻrisida maʼlumotlar bazasi shakllantiriladi.

3-bob. Monitoring qilish tartibi

5. Soliq qoʻmitasi tomonidan ushbu Nizomning 3-bandiga muvofiq shakllantirilgan maʼlumotlar tadbirkorlik subyektlarining davlat soliq xizmati organlariga topshirgan hisobotlari, shuningdek, qonun hujjatlariga muvofiq soliq toʻlovchilarning majburiyatlari paydo boʻlishi (tugatilishi) toʻgʻrisida maʼlumot taqdim etadigan tashkilotlardan olingan maʼlumotlar bilan solishtirish orqali kameral soliq tekshiruvidan oʻtkaziladiyu.

Bunda quyidagilarga ahamiyat qaratiladi:

a) zargarlik buyumlarini ishlab chiqarish sohasida:

qimmatbaho metallar va qimmatbaho toshlardan zargarlik va boshqa buyumlarni ishlab chiqarish faoliyatini boshlaganlik toʻgʻrisida tasdiqnoma mavjudligi;

tadbirkorlik subyektlari tomonidan davlat soliq xizmati organlariga taqdim etilgan soliq hisobotlarida realizatsiya qilingan mahsulotlar miqdori toʻgʻri koʻrsatilganligi;

b) zargarlik buyumlari importi amalga oshirilganda:

qimmatbaho metallar va qimmatbaho toshlar bilan ishlarni amalga oshirish va (yoki) zargarlik buyumlari va qimmatbaho metallar va qimmatbaho toshlardan yasalgan boshqa buyumlar bilan savdo qilish faoliyatini boshlaganlik toʻgʻrisida tasdiqnoma mavjudligi;

import qilingan zargarlik buyumlarining miqdori realizatsiya miqdoriga muvofiqligi;

zargarlik buyumlarining import va realizatsiya miqdorlarini tadbirkorlik subyektlari tomonidan davlat soliq xizmati organlariga taqdim etilgan soliq hisobotlaridagi koʻrsatkichlarga muvofiqligi;

v) zargarlik buyumlarini realizatsiya qilish boʻyicha:

zargarlik buyumlari va qimmatbaho metallar va qimmatbaho toshlardan yasalgan boshqa buyumlar bilan savdo qilish faoliyatini boshlaganlik toʻgʻrisida tasdiqnoma mavjudligi;

turgʻun savdo shoxobchasida faoliyat yuritilganda nazorat-kassa texnikasi va toʻlov terminallari bilan belgilangan tartibda jihozlanganligi;

sotib olingan va realizatsiya qilingan mahsulotlar summasining oʻzaro muvofiqligi;

hisobot davrida mahsulot realizatsiyasidan tushumlar miqdorining davlat soliq xizmati organlariga taqdim etilgan soliq hisobotlaridagi koʻrsatkichlarga muvofiqligi.

Qonunchilik hujjatlariga muvofiq olingan maʼlumotlar asosida davlat soliq xizmati organlari vakolatlariga taalluqli boshqa masalalar ham tahlil qilinishi mumkin.

4-bob. Monitoring natijasi boʻyicha koʻriladigan choralar

6. Ushbu Nizomning 5-bandiga muvofiq oʻtkazilgan kameral soliq tekshiruvi natijasiga koʻra tafovutlar mavjudligi aniqlansa, soliq toʻlovchiga uning hisobotlariga tegishli tuzatishlar kiritish hamda kamchiliklarni bartaraf etish yuzasidan belgilangan tartibda talabnoma yuboriladi.

7. Kameral soliq tekshiruvi natijalari boʻyicha soliq toʻlovchi tomonidan taqdim etilgan axborotning ishonchliligini tasdiqlash lozim deb topilgan hollarda, belgilangan tartibda sayyor soliq tekshiruvi yoki soliq auditi oʻtkaziladi.

8. Kameral soliq tekshiruvi, sayyor soliq tekshiruvi va soliq auditi natijasiga koʻra tadbirkorlik subyektlari tomonidan asillik darajasini belgilash yoki tamgʻalashning belgilangan tartibini buzish, shuningdek, kirim qilinmagan zargarlik buyumlarini sotish holatlari aniqlangan taqdirda, qonunchilik hujjatlarida belgilangan tartibda soliqlar va yigʻimlarni hisoblash va belgilangan tartibda javobgarlikka tortish choralari koʻriladi.

Soliq tekshiruvlari natijasiga koʻra tadbirkorlik subyektlarining faoliyatida jinoyat alomatlari mavjud deb topilgan hollarda, materiallar qonunchilik hujjatlarida belgilangan tartibda huquqni muhofaza qiluvchi organlarga yuboriladi.

9. Zargarlik buyumlarini ishlab chiqarish, import qilish va ularning realizatsiyasi bilan shugʻullanadigan tadbirkorlik subyektlari faoliyatida Davlat soliq xizmati organlari tomonidan oʻtkaziladigan soliq nazorati tadbirlariga belgilangan tartibda mutaxassislar (ekspertlar) jalb etilishi mumkin.

5-bob. Yakunlovchi qoida

10. Mazkur Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

Zargarlik buyumlarini ishlab chiqarish, import qilish va ularning realizatsiyasi monitoringini amalga oshirish tartibi toʻgʻrisidagi nizomga ILOVA

Zargarlik buyumlarini ishlab chiqarish, import qilish va ularning realizatsiyasi monitoringini amalga oshirish

SXEMASI

BosqichlarSubyektlarTadbirlarIjro muddati1-bosqichOʻzbekiston Respublikasi Markaziy bankiQimmatbaho metallar sotib olgan tadbirkorlik subyektlari toʻgʻrisidagi maʼlumotlarni Oʻzbekiston Respublikasi Soliq qoʻmitasiga taqdim etish.Real vaqt rejimidaOʻzbekiston Respublikasi Iqtisodiyot va moliya vazirligi huzuridagi Davlat asillik darajasi nazorati inspeksiyasiAdliya vazirligining “Litsenziya” axborot tizimi orqali qimmatbaho metallar va qimmatbaho toshlardan zargarlik buyumlari ishlab chiqarish, qimmatbaho metallar va qimmatbaho toshlar bilan ishlashni, zargarlik buyumlarini hamda qimmatbaho toshlardan boshqa buyumlarni sotish faoliyatini boshlaganlik toʻgʻrisida tasdiqnoma olgan tadbirkorlik subyektlari toʻgʻrisidagi maʼlumotlarni Oʻzbekiston Respublikasi Soliq qoʻmitasiga taqdim etish.Real vaqt rejimidaOʻzbekiston Respublikasi Iqtisodiyot va moliya vazirligi huzuridagi Bojxona qoʻmitasiRespublika hududiga olib kirilgan va “erkin muomalaga chiqarish (import)” bojxona rejimiga rasmiylashtirilgan zargarlik buyumlari (TIF TN pozitsiyasi 7113-7116), qimmatbaho metall va toshlar (TIF TN pozitsiyasi 7101-7112) toʻgʻrisidagi maʼlumotlarni Oʻzbekiston Respublikasi Soliq qoʻmitasiga taqdim etish.Real vaqt rejimida“Oʻzbekiston respublika tovar-xom ashyo birjasi” AJ va “Toshkent tovar xomashyo birjasi” AJBirja savdolari orqali qimmatbaho metallarni sotib olgan tadbirkorlik subyektlari toʻgʻrisidagi maʼlumotlarni Oʻzbekiston Respublikasi Soliq qoʻmitasiga taqdim etish.Real vaqt rejimida“Navoiy kon-metallurgiya kombinati” davlat aksiyadorlik jamiyati va “Olmaliq kon-metallurgiya kombinati” aksiyadorlik jamiyatiQimmatbaho metallar sotib olgan tadbirkorlik subyektlari toʻgʻrisidagi maʼlumotlarni Oʻzbekiston Respublikasi Soliq qoʻmitasiga taqdim etish.Real vaqt rejimida2-bosqichDavlat soliq xizmati organlariZargarlik mahsulotlarini ishlab chiqarish, import qilish va ularni realizatsiya qilish faoliyati bilan shugʻullanadigan tadbirkorlik subyektlari toʻgʻrisida maʼlumotlar bazasini shakllantirish.Dasturiy mahsulot orqali elektron shaklda3-bosqichDavlat soliq xizmati organlariShakllantirilgan maʼlumotlar asosida tadbirkorlik subyektlarining davlat soliq xizmati organlariga topshirgan hisobotlari, shuningdek, qonunchilik hujjatlariga muvofiq soliq toʻlovchilarning majburiyatlari paydo boʻlishi (tugatilishi) toʻgʻrisida maʼlumot taqdim etadigan tashkilotlardan olingan maʼlumotlar bilan solishtirish orqali kameral soliq tekshiruvidan oʻtkazish.Qonunchilik hujjatlarida belgilangan hollarda4-bosqichDavlat soliq xizmati organlariKameral soliq tekshiruvi natijalari boʻyicha soliq toʻlovchi tomonidan taqdim etilgan axborotning ishonchliligini tasdiqlash lozim deb topilgan hollarda, belgilangan tartibda sayyor soliq tekshiruvi yoki soliq auditi oʻtkazish.Qonunchilik hujjatlarida belgilangan hollarda5-bosqichDavlat soliq xizmati organlariKameral soliq tekshiruvi, sayyor soliq tekshiruvi va soliq auditi natijasiga koʻra tadbirkorlik subyektlari tomonidan asillik darajasini belgilash yoki tamgʻalashning belgilangan tartibini buzish, shuningdek, kirim qilinmagan zargarlik buyumlarini sotish holatlari aniqlangan taqdirda, qonunchilik hujjatlarida belgilangan tartibda soliqlar va boshqa toʻlovlarni hisoblash va oʻrnatilgan tartibda javobgarlikka tortish choralarini koʻrish.Holatlar aniqlanganda6-bosqichDavlat soliq xizmati organlariOʻtkazilgan tekshiruvlar natijasida tadbirkorlik subyektlari faoliyatida jinoyat alomatlari mavjud deb topilgan hollarda, materiallarni qonunchilik hujjatlarida belgilangan tartibda huquqni muhofaza qiluvchi organlarga yuborish.Holatlar aniqlanganda