Oʻzbekiston Respublikasi Ichki ishlar vazirligining maktabgacha taʼlim tashkilotlari faoliyatini takomillashtirish chora-tadbirlari toʻgʻrisida (769-son)

13.09.2019

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Ichki ishlar vazirligining maktabgacha taʼlim tashkilotlari faoliyatini takomillashtirish yoʻli bilan ichki ishlar organlari xodimlari va harbiy xizmatchilari uchun qulay shart-sharoitlar yaratish hamda bolalarni davlat maktabgacha taʼlimi bilan keng qamrab olish maqsadida Vazirlar Mahkamasi qaror qiladi:

1. Oʻzbekiston Respublikasi Ichki ishlar vazirligi va Maktabgacha va maktab taʼlimi vazirligining:

Oʻzbekiston Respublikasi Ichki ishlar vazirligining tasarrufidagi maktabgacha taʼlim tashkilotlarini, istisno tariqasida, uning idoraviy mansubligida qoldirish;

Oʻzbekiston Respublikasi Ichki ishlar vazirligi tasarrufidagi maktabgacha taʼlim tashkilotlarini (keyingi oʻrinlarda — IIV MTT) Oʻzbekiston Respublikasi Maktabgacha va maktab taʼlimi vazirligining davlat maktabgacha taʼlim tashkilotlari (keyingi oʻrinlarda — DMTT) tizimiga kiritish toʻgʻrisidagi takliflariga rozilik berilsin.

2. Belgilansinki:

Oʻzbekiston Respublikasi IIV MTTning taʼlim-tarbiya jarayonini muvofiqlashtirish va metodik boshqarish Oʻzbekiston Respublikasi Maktabgacha va maktab taʼlimi vazirligi tomonidan amalga oshiriladi;

Oʻzbekiston Respublikasi IIV MTT oʻz faoliyatini davlat maktabgacha taʼlim tashkilotlari faoliyatini tartibga soluvchi normativ-huquqiy hujjatlarga muvofiq amalga oshiradi;

Oʻzbekiston Respublikasi IIV MTT direktori Oʻzbekiston Respublikasi Maktabgacha va maktab taʼlimi vazirligi bilan kelishilgan holda Ichki ishlar vaziri tomonidan lavozimga tayinlanadi va lavozimidan ozod etiladi;

Oʻzbekiston Respublikasi IIV MTT xodimlariga davlat maktabgacha taʼlim tashkilotlari xodimlari uchun qonunchilikka muvofiq belgilangan mehnatga haq toʻlash shartlari va imtiyozlar qoʻllaniladi;

Oʻzbekiston Respublikasi IIV MTTni saqlash xarajatlari Ichki ishlar vazirligiga har yili ajratiladigan budjet mablagʻlari va Vazirlikning budjetdan tashqari mablagʻlari hamda qonunchilikda taqiqlanmagan boshqa manbalar hisobidan amalga oshiriladi.

3. 2019-yil 1-oktabrdan quyidagi tartib joriy etilsin, unga koʻra:

Oʻzbekiston Respublikasi IIV MTT tarbiyalanuvchilari umumiy oʻrinlari sonining 80 foizi ichki ishlar organlari xodimlari va harbiy xizmatchilarining farzandlari uchun ajratiladi;

Oʻzbekiston Respublikasi IIV MTT tarbiyalanuvchilari umumiy oʻrinlari sonining 20 foizi Bolalarni davlat maktabgacha taʼlim tashkilotlariga qabul qilish boʻyicha davlat xizmatlari koʻrsatishning maʼmuriy reglamentiga muvofiq jamlanadi;

idoraviy maktabgacha taʼlim tashkilotlariga bolalarni qabul qilish kvotasiga oʻzgartirishlar kiritish, Oʻzbekiston Respublikasi Ichki ishlar vazirligi ehtiyojidan kelib chiqib, Oʻzbekiston Respublikasi Maktabgacha va maktab taʼlimi vazirligi bilan kelishilgan holda amalga oshiriladi.

4. Oʻzbekiston Respublikasi Ichki ishlar vaziriga budjetdan tashqari mablagʻlar hisobiga:

Oʻzbekiston Respublikasi IIV MTT xodimlariga, qonunchilikda belgilangan qoʻshimcha haq va toʻlovlardan qatʼi nazar, ragʻbatlantiruvchi ustamalar belgilash;

Oʻzbekiston Respublikasi IIV MTTga mutaxassis-psixologlarni, ular mehnatiga haq toʻlash miqdorini belgilashda mehnat bozorining amaldagi konyunkturasini hisobga olgan holda, shartnoma asosida jalb etish;

Oʻzbekiston Respublikasi IIV MTTni taʼmirlash, kapital va joriy taʼmirlash, shuningdek moddiy-texnik taʼminlashni amalga oshirish;

ehtiyojlardan kelib chiqib, keyinchalik davlat maktabgacha taʼlim tashkilotlari tizimiga kiritish hamda Oʻzbekiston Respublikasi Davlat budjeti hisobidan taʼminlanishga oʻtkazishni nazarda tutgan holda, Oʻzbekiston Respublikasi IIVning yangi MTTni qurish va moddiy-texnik jihozlash huquqi berilsin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari A.A. Abduxakimov, Oʻzbekiston Respublikasi ichki ishlar vaziri P.R. Bobojonov va Oʻzbekiston Respublikasi maktabgacha taʼlim vaziri A.V. Shin zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2019-yil 13-sentabr,

769-son