2019-yil paxta hosilini yigʻib-terib olish ishlarini uyushqoqlik bilan oʻtkazish chora-tadbirlari toʻgʻrisida (752-son)

09.09.2019

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Vazirlar Mahkamasining “2019-yilda gʻoʻzani navlari boʻyicha joylashtirish va paxta xomashyosi yetishtirishning prognoz hajmlari toʻgʻrisida” 2018-yil 22-dekabrdagi 1037-son qarori ijrosini taʼminlash, yetishtirilgan paxta xomashyosini yigʻib-terib olishni uyushqoqlik bilan tashkil etish, paxta yigʻim-terimida ishtirok etadigan terimchilarning moddiy manfaatdorligini taʼminlash hamda paxta yetishtiruvchi xoʻjaliklarning moliyaviy holatini yanada mustahkamlash maqsadida Vazirlar Mahkamasi qaror qiladi:

1. Oʻzbekiston Respublikasi Qishloq xoʻjaligi vazirligi, Iqtisodiyot va sanoat vazirligi, Moliya vazirligi, Bandlik va mehnat munosabatlari vazirligi, “Oʻzpaxtasanoat” aksiyadorlik jamiyati, “Oʻzagroservis” aksiyadorlik jamiyati, “Oʻztoʻqimachiliksanoat” uyushmasi, Oʻzbekiston fermer, dehqon xoʻjaliklari va tomorqa yer egalari kengashining 2019-yil hosili uchun yetishtirilgan paxta xomashyosini terib olishda:

paxta xomashyosining mashinada terilgan 1 tonnasi uchun 600 000 soʻm xizmat haqi toʻlash;

paxta xomashyosining qoʻlda terilgan 1 kilogrammi uchun birinchi terimda — 800 soʻmdan, ikkinchi terimda — 1 200 soʻmdan mehnat haqi toʻlash;

paxta yigim-terimi mavsumida (paxta-toʻqimachilik ishlab chiqarish tashkilotlari va klasterlar faoliyat yuritayotgan hududlardan tashqari) vaqtinchalik ishsiz fuqarolardan tayinlanadigan terim otryadi rahbarlariga har oyda 2 mln soʻmdan hamda tajriba tariqasida tashkil etilayotgan paxta terim markazlarining rahbarlari (menedjerlari)ga har oyda 3 mln soʻmdan istisno tariqasida fuqarolik-huquqiy shartnomalar asosida Oʻzbekiston Respublikasi Bandlik va mehnat munosabatlari vazirligi huzuridagi Jamoat ishlari jamgʻarmasi mablagʻlari hisobidan mehnat haqi toʻlash toʻgʻrisidagi takliflari maʼqullansin;

2. Paxta-toʻqimachilik ishlab chiqarish tashkilotlari va klasterlarga paxta xomashyosi yetishtiruvchi fermer xoʻjaliklarining moddiy manfaatdorligini oshirish, yetishtirilgan paxta xomashyosini oʻz vaqtida terib olishni taʼminlash maqsadida oʻzlariga biriktirilgan hududda paxta xomashyosini koʻlda terib olish uchun mehnat haqini mazkur qarorda belgilangan narxlardan kam boʻlmagan holda erkin belgilash tavsiya etilsin.

3. Oʻzbekiston Respublikasi Moliya vazirligi Oʻzbekiston Respublikasi Prezidentining “Agrar sektorni qishloq xoʻjaligi texnikalari bilan oʻz vaqtida taʼminlashga oid qoʻshimcha chora-tadbirlar toʻgʻrisida” 2019-yil 4-apreldagi PK-4262-son qarori asosida eksperiment tariqasida Jizzax, Qashqadaryo, Surxondaryo, Sirdaryo va Toshkent viloyatlaridagi qishloq xoʻjaligi korxonalari tomonidan paxta terish ishlariga jalb qilinadigan paxta terish mashinalari xizmatidan foydalanganlik uchun xarajatlarning 30 foizini qoplab berish tartibini joriy yil 15-sentabrga kadar tasdiqlasin.

4. Belgilansinki:

otryad rahbarlari terilgan paxta xomashyosi miqdoridan kelib chiqqan holda Oʻzbekiston Respublikasi Bandlik va mehnat munosabatlari vazirligi huzuridagi Jamoat ishlari jamgʻarmasi mablagʻlari hisobidan mehnat haqini oshirib borish asosida ragʻbatlantiriladi;

paxta yigim-terimida ish kuchi yetishmovchiligi mavjud boʻlganda, tumanlar hokimliklari, paxta-toʻqimachilik ishlab chiqarish tashkilotlari va klasterlar hamda tuman hokimliklari buyurtmalariga asosan tuman (shahar) bandlikka koʻmaklashish markazlari va xususiy bandlik agentliklari tomonidan qoʻshimcha terimchilar ixtiyoriy ravishda jalb etiladi;

ish kuchi yetishmovchiligi mavjud boʻlgan hududlarga xususiy bandlik agentliklari xizmatlari tomonidan har bir ish bilan band boʻlmagan aholini paxta yigim-terimiga ixtiyoriy ravishda jalb qilganligi uchun bazaviy hisoblash miqdorining ikki baravari miqdorigacha xizmat haqi mehnat organlari tomonidan Bandlikka koʻmaklashish davlat jamgʻarmasi mablagʻlari hisobidan toʻlanadi.

Mazkur band bilan toʻlanadigan mablagʻlar paxta-toʻqimachilik ishlab chiqarish tashkilotlari va klasterlar faoliyat yuritayotgan hududlarga tatbiq etilmaydi.

5. “Oʻzpaxtasanoat” aksiyadorlik jamiyati, “Oʻztoʻqimachiliksanoat” uyushmasi, paxta-toʻqimachilik ishlab chiqarish tashkilotlari va klasterlar:

paxta yigim-terimini mexanizatsiyalash darajasini oshirish, paxta terish mashinalaridan keng koʻlamda foydalanishni ragʻbatlantirish, paxta xomashyosi yetishtiruvchi xoʻjaliklarning manfaatdorligini oshirish uchun koʻlda va mashinada terilgan paxta xomashyosining navlari va sinflari boʻyicha davlat tomonidan kafolatlangan narxlarda xarid qilinishini;

paxta xomashyosini qabul qilib olishda axborot-kommunikatsiya texnologiyalaridan va elektron tarozilardan foydalangan holda paxta qabul qilish jarayoni shaffofligini taʼminlasin.

6. Oʻzbekiston Respublikasi Vazirlar Mahkamasi huzuridagi Agrosanoat majmui ustidan nazorat qilish inspeksiyasi Oʻzbekiston fermer, dehqon xoʻjaliklari va tomorqa yer egalari kengashi bilan birgalikda “Oʻzpaxtasanoat” aksiyadorlik jamiyati tizimidagi paxta tozalash tashkilotlari hamda paxta-toʻqimachilik ishlab chiqarish tashkilotlari va klasterlar tomonidan paxta xomashyosini qabul qilish maskanlaridagi laboratoriyalarda paxta xomashyosini qabul qilishda sof (fizik) vazn bilan konditsion vazn oʻrtasidagi farqlarning haqqoniyligi va chegirmalarning adolatli qoʻllanilishi yuzasidan tizimli nazorat oʻrnatsin.

7. Oʻzbekiston Respublikasi Moliya vazirligi paxta-toʻqimachilik ishlab chiqarish tashkilotlariga va klasterlarga paxta xomashyosini terib olish uchun banklar tomonidan yillik 16 foiz stavkada kredit ajratish maqsadida joriy yil 15-sentabrgacha uch oy muddatda qaytarish sharti bilan tijorat banklariga 1 trln soʻm depozit joylashtirilishini taʼminlasin.

8. Oʻzbekiston Respublikasi Moliya vazirligi huzuridagi Qishloq xoʻjaligini davlat tomonidan koʻllab-quvvatlash jamgʻarmasi, Markaziy bank, “Agrobank” ATB va tijorat banklari, “Oʻzpaxtasanoat” aksiyadorlik jamiyati, “Oʻztoʻqimachiliksanoat” uyushmasi, paxta-toʻqimachilik ishlab chiqarish tashkilotlari va klasterlar, Qoraqalpogʻiston Respublikasi Vazirlar Kengashi va viloyatlar hokimliklari paxta xomashyosi uchun terimchilarga mehnat haqini ushbu qarorda belgilangan tarif stavkalaridan kelib chiqqan holda har besh kunda, zarurat boʻlganda har kuni toʻlashni tashkil etsin.

9. Oʻzbekiston Respublikasi Moliya vazirligi Oʻzbekiston Respublikasi Prezidentining “Paxta xomashyosi va boshoqli don yetishtirishni moliyalashtirish tizimini tubdan takomillashtirish chora-tadbirlari toʻgʻrisida” 2018-yil 28-fevraldagi PQ-3574-son qarori talablaridan kelib chiqib, 2019-yil paxta hosilini uyushqoqlik bilan qisqa muddatda yigʻib-terib olishni tashkil etish, terimchilar bilan hisob-kitoblarni oʻz vaqtida amalga oshirishni taʼminlash maqsadida Qishloq xoʻjaligini davlat tomonidan qoʻllab-quvvatlash jamgʻarmasiga 2020-yilda qaytarish sharti bilan foizsiz ssuda ajratsin.

10. Oʻzbekiston Respublikasi Moliya vazirligi huzuridagi Qishloq xoʻjaligini davlat tomonidan koʻllab-quvvatlash jamgʻarmasi, “Oʻzpaxtasanoat” aksiyadorlik jamiyati, paxta-toʻqimachilik ishlab chiqarish tashkilotlari va klasterlar yetkazib berilgan paxta xomashyosi va urugʻlik paxta uchun toʻlanadigan ustamalar uchun fermer xoʻjaliklari va boshqa qishloq xoʻjaligi korxonalari bilan joriy yil 31-dekabrga qadar toʻliq hisob-kitob qilinishini taʼminlasin.

11. Paxta xomashyosi yetishtiruvchi xoʻjaliklar bilan hisob-kitoblar toʻgʻri va oʻz vaqtida amalga oshirilishi hamda ajratilgan mablagʻlardan maqsadli foydalanilishi uchun “Oʻzpaxtasanoat” aksiyadorlik jamiyati, “Oʻztoʻqimachiliksanoat” uyushmasi va “Agrobank” aksiyadorlik tijorat banki rahbarlari shaxsan masʼul etib belgilab qoʻyilsin.

12. Oʻzbekiston Respublikasi Moliya vazirligi, Qoraqalpogʻiston Respublikasi Vazirlar Kengashi va viloyatlar hokimliklarining paxta yigʻim-terimi mavsumida terimchilar joylashgan yotoq joylarida sarflanadigan elektr energiyasi, tabiiy gaz, ichimlik suvi xarajatlarini mahalliy budjet hisobidan qoplab berish toʻgʻrisidagi takliflari maʼqullansin.

13. Qoraqalpogʻiston Respublikasi Vazirlar Kengashi va viloyatlar hokimliklari uch kun muddatda 2019-yil paxta hosilini nes-nobud qilmasdan uyushqoqlik bilan yigʻib-terib olishni tashkil etish, mavsumda qatnashayotgan terimchilarga mehnat haqi toʻlash hamda ish kuchi yetishmovchiligi mavjud tumanlarga qoʻshimcha terimchilarni jalb qilish va ularga kafolatlangan haq toʻlash boʻyicha tegishli chora-tadbirlarni tasdiqlasin.

14. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosari J.A. Qoʻchqorov, Bosh vazir maslahatchilari A.D. Vaxabov, N.S. Otajonov, Oʻzbekiston fermer, dehqon xoʻjaliklari va tomorqa yer egalari kengashi raisi A.A. Xaitov, Qoraqalpogʻiston Respublikasi Vazirlar Kengashi Raisi va viloyatlar hokimlari zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2019-yil 9-sentabr,

752-son