Meteorologiya sohasida hamkorlik toʻgʻrisida

30.04.2018

Oʻzbekiston Respublikasi Hukumati bilan Turkiya Respublikasi Hukumati oʻrtasida

Bitim

Oʻzbekiston Respublikasi Hukumati va Turkiya Respublikasi Hukumati, keyingi oʻrinlarda “Tomonlar” deb ataluvchilar,

Tomonlar oʻrtasidagi doʻstlik aloqalarini mustahkamlash jarayoniga hissasini qoʻshib,

Tomonlar oʻrtasida meteorologiya sohasidagi hamkorlikni yanada rivojlantirish maqsadida,

meteorologiya sohasida yaqin hamkorlik natijasida keladigan foyda va oʻzaro manfaatdorlikni inobatga olib,

quyidagilar toʻgʻrisida kelishib oldilar:

1-modda

Meteorologik faoliyatni takomillashtirish uchun hamda har bir Tomon davlatining milliy qonunchiligiga muvofiq, Tomonlar tenglik, oʻzarolik va oʻzaro foyda prinsiplari asosida maʼlumot, tajriba va texnologiyalar bilan almashish orqali hamkorlik qiladilar.

2-modda

Tomonlar quyidagi sohalarda hamkorlik qiladilar:

a) qisqa muddatli prognoz va dastlabki ob-havo prognozi;

b) atrof-muhit va iqlim oʻzgarishi masalalari boʻyicha maʼlumotni baholash va tahlil qilish;

c) zamonaviy texnologiyalarni qoʻllash, jumladan, ob-havo prognozida raqamli modellardan foydalanish hamda ob-havo prognozi uchun sunʼiy yoʻldoshlar va meteorologik radarlarning maʼlumotlaridan foydalanish;

d) barvaqt ogohlantirish tizimlarini ishlab chiqish va tabiiy ofatlar xavfini kamaytirish;

e) meteorologik asboblarni kalibrlash;

3-modda

Mazkur Bitimning 2-moddasida sanab oʻtilgan sohalarda hamkorlikni amalga oshirish uchun Tomonlar quyidagi usullarda hamkorlik qiladilar:

a) meteorologiya sohasidagi har bir Tomon davlati milliy qonunchiligida taqiqlanmagan ilmiy-texnikaviy maʼlumotlar hamda ilmiy-tadqiqot va tajriba-konstruktorlik ishlari boʻyicha hujjatlar bilan almashish;

b) mutaxassislar, tadqiqotchilar va maslahatchilar bilan almashish;

c) qoʻshma ishchi majlislar, uchrashuvlar, seminarlar, oʻquv dasturlari va oʻquv safarlarini tashkil etish;

d) qoʻshma ilmiy-texnikaviy loyihalarni tayyorlash va amalga oshirish.

4-modda

Quyidagi organlar mazkur Bitim qoidalarini amalga oshirishda vakolatli hisoblanadi:

Oʻzbekiston tomonidan — Oʻzbekiston Respublikasi Favqulodda vaziyatlar vazirligi huzuridagi Gidrometeorologiya xizmati markazi (Oʻzgidromet);

Turkiya tomonidan — Turkiya Respublikasi Oʻrmon xoʻjaligi va suv ishlari vazirligi huzuridagi Meteorologiya bosh direktorati.

Tomonlar oʻzlarining vakolatli organlari toʻgʻrisidagi har qanday oʻzgarish haqida bir-birlarini darhol diplomatik kanal orqali xabardor qiladilar.

5-modda

Tomonlar, oʻz davlatining tegishli milliy qonunchiligi va oʻzlari ishtirokchi boʻlgan xalqaro shartnomalarga muvofiq, mazkur Bitim doirasida taqdim etilgan yoki yaratilgan intellektual mulk huquqini samarali himoya qilishni taʼminlaydilar. Mazkur Bitim maqsadi uchun intellektual mulk tushunchasi 1967-yil 14-iyulda Stokgolmda imzolangan Butunjahon intellektual mulk tashkilotini tashkil etish toʻgʻrisidagi Konvensiyaning 2-moddasida bayon qilingan mazmunda tushuniladi.

6-modda

Mazkur Bitim doirasida amalga oshiriladigan hamkorlik faoliyati bilan bogʻliq xarajatlar Tomonlarning har bir alohida holat boʻyicha oʻzaro kelishuvlariga binoan qoplanadi.

7-modda

Tomonlar mazkur Bitim doirasidagi hamkorlik faoliyatida ishtirok etish uchun hukumatga oid va ilmiy (akademik) muassasalar, xususiy korxonalar va nohukumat tashkilotlarni taklif etishlari mumkin.

8-modda

Tomonlarning oʻzaro yozma kelishuviga asosan mazkur Bitimga uning ajralmas qismi hisoblanadigan tegishli bayonnomalar bilan rasmiylashtiriladigan va mazkur Bitimning 12-moddasiga muvofiq kuchga kiradigan oʻzgartirish va qoʻshimchalar kiritilishi mumkin.

9-modda

Mazkur Bitim qoidalarini talqin qilish yoki qoʻllashda yuzaga keladigan har qanday nizo Tomonlar tarafidan muzokaralar va maslahatlashuvlar orqali hal etiladi.

10-modda

Oʻzaro yozma kelishuvga asosan, Tomonlar har bir Tomon davlati milliy qonunchiligiga muvofiq, mazkur hamkorlik natijalarini uchinchi tomonlarga taqdim etishga kelishishlari mumkin.

11-modda

Mazkur Bitim Tomonlarning davlatlari ishtirokchi boʻlgan boshqa xalqaro bitimlardan kelib chiqadigan majburiyatlariga daxl qiladigan tarzda talqin etilmasligi lozim.

12-modda

Mazkur Bitim Tomonlar uning kuchga kirishi uchun zarur boʻlgan davlat ichki protseduralarini bajarganliklari toʻgʻrisida bir-birlariga yuborgan soʻnggi yozma xabarnoma diplomatik kanallar orqali olingan sanadan boshlab kuchga kiradi.

Mazkur Bitim bir (1) yillik muddat davomida amal qiladi. Basharti Tomonlardan biri boshqa Tomonni mazkur Bitimning amal qilish muddati tugallanishiga olti (6) oy qolgunga qadar uning amal qilishini tugatish niyati toʻgʻrisida diplomatik kanallar orqali yozma xabardor qilmasa, uning amal qilishi oʻz-oʻzidan keyingi bir (1) yillik davrlarga uzayaveradi.

Mazkur Bitimning tugatilishi Bitimga muvofiq kelishilgan va u tugatilishiga qadar boshlangan loyihalar va tadbirlarning amal qilish muddati va davomiyligiga daxl qilmaydi.

Toshkent shahrida 2018-yil 30-aprelda ikki (2) asl nusxada, har biri oʻzbek, turk va ingliz tillarida tuzildi, bunda barcha matnlar teng autentikdir. Talqin qilishda kelishmovchiliklar yuzaga kelganda, ingliz tilidagi matn ustuvor hisoblanadi.

(imzolar)