Oʻzbekiston Respublikasida Qizilmiya yetishtirishni koʻpaytirish chora-tadbirlari toʻgʻrisida (453-son)
07.12.1995
Oʻzbekiston Respublikasi Vazirlar Mahkamasining
qarori
Qizilmiya yetishtirishni qayta tiklash va koʻpaytirish, uni sanoat asosida qayta ishlashni tashkil qilish hamda oʻzboshimchalik bilan tayyorlash va sotishni bartaraf etish maqsadida Vazirlar Mahkamasi qaror qiladi;
1. Qoraqalpogʻiston Respublikasi Vazirlar Kengashi, viloyatlar hokimliklari, Oʻzbekiston Respublikasi Davlat oʻrmon qoʻmitasi, Qishloq xoʻjaligi vazirligi va Melioratsiya va suv xoʻjaligi vazirligi ikki oy muddatda:
oʻz tasarruflaridagi yerlarda qizilmiya oʻsishini tekshirib chiqsinlar, ushbu yer maydonlarini alohida hisobga olsinlar, qizilmiya yovvoyi holda oʻsadigan paykallarning saqlanishini taʼminlasinlar, qizilmiya tabiiy holda oʻsadigan yerlardan qurilish yoki boshqa maqsadlarda foydalanishga yoʻl qoʻymasinlar. Qizilmiya ildizlarining gʻayri qonuniy ravishda kavlab olinishiga va respublika tashqarisiga tashib ketilishini toʻxtatishga doir qatʼiy chora-tadbirlar koʻrsinlar;
Amudaryo, Sirdaryo, Chirchiq, Angren, Zarafshon, Sherobod daryolari sohillaridagi oʻtloqlarda, zovurlar, kanallar va koʻllar qirgʻoqlarida qizilmiya yetishtiriladigan ixtisoslashtirilgan ishlab chiqarish boʻlinmalari, uchastkalari, dehqon (fermer) xoʻjaliklari tashkil etish masalalarini ishlab chiqsinlar.
2. Qoraqalpogʻiston Respublikasi Vazirlar Kengashi:
Oʻzbekiston Respublikasi Fanlar akademiyasining Botanika instituti bilan birgalikda asosan shoʻrlangan, paxtachilik va gʻallachilik uchun yaroqsiz yerlarda qizilmiya yetishtirish maydonlarini koʻpaytirish imkoniyatini koʻrib chiqsin. Ushbu yerlarni dehqon (fermer) xoʻjaliklariga, uchastkalariga yoki boshqa ishlab chiqarish boʻlinmalariga birkitib qoʻysin;
bir oy muddatda qizilmiya yetishtirishni yanada rivojlantirish parametrlarini belgilasin, “Qoraqalpoqlakritsa” aksionerlik-ishlab chiqarish birlashmasining moddiy-texnika bazasini mustahkamlasin.
3. Oʻzbekiston Respublikasi Fanlar akademiyasining Botanika instituti Qishloq xoʻjaligi vazirligi, Oʻzbekiston Qishloq xoʻjaligi fanlari akademiyasi va Davlat oʻrmon qoʻmitasi bilan birgalikda bir oy muddatda qizilmiya oʻstirish agrotexnikasini ishlab chiqsin hamda Qoraqalpogʻiston Respublikasi va viloyatlarga metodik tavsiyalar yuborsin.
4. Oʻzbekiston Respublikasi Fanlar akademiyasi “Oʻzfarmsanoat” konserni, “Oziqovqatsanoat” va “Oʻzkimyosanoat” uyushmalari, Olmaliq kon-metallurgiya kombinati, Davlat oʻrmon qoʻmitasi va Sogʻliqni saqlash vazirligi bilan birgalikda bir oy muddatda “Qizilmiya” maqsadli dasturini ishlab chiqsin va tasdiqlasin, dasturda qizilmiya ishlab chiqarishni va uning ildizini qayta ishlashni rivojlantirish parametrlarini belgilasin.
5. Oʻzbekiston Respublikasi Davlat oʻrmon qoʻmitasi Fanlar akademiyasi, tegishli vazirliklar va idoralar, “Qoraqalpoqlakritsa” aksionerlik-ishlab chiqarish birlashmasi bilan birgalikda qizilmiya ildizini qayta ishlovchi ishlab chiqarishlarni tashkil etish haqidagi takliflarni ishlab chiqsin va 1996-yil 1-martgacha respublika Hukumatiga kiritsin.
7. Qizilmiya yetishtiriladigan yerlarni, qizilmiya ildizi yetishtirish va sotish hajmlarini hisobga olish masalalari bilan bogʻliq ishlarni tashkil etish Oʻzbekiston Respublikasi Qishloq va suv xoʻjaligi vazirligi huzuridagi Oʻrmon xoʻjaligi bosh boshqarmasiga yuklansin.
8. Mazkur qarorning bajarilishini nazorat qilish Vazirlar Mahkamasining Dehqonchilik sanoati majmui boʻlimiga yuklansin.
Vazirlar Mahkamasining Raisi I. KARIMOV
Toshkent sh.,
1995-yil 7-dekabr,
453-son