Oʻzbekiston teleradiokompaniyasini tashkil etish va uning faoliyati masalalari (190-son)

24.05.1996

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Oʻzbekistonning ijtimoiy taraqqiyotida televideniye va radioning rolini oshirish chora-tadbirlari toʻgʻrisida”gi Farmoniga muvofiq Vazirlar Mahkamasi qaror qiladi:

1 Oʻzbekiston Teleradiokompaniyasida Teleradiokompaniya tarkibiga tarkibiy birliklar huquqlari bilan kirgan boʻlinmalarning davlat mulkini toʻliq xoʻjalik hisobi boʻyicha yuritish huquqi saqlab qolinsin. Oʻzbekiston Davlat teleradioeshittirish kompaniyasiga hamda unga qarashli korxona va tashkilotlarga tegishli asosiy fondlar, mol-mulklar va bank schyotlaridagi pul mablagʻlari Oʻzbekiston Teleradiokompaniyasi tasarrufiga oʻtkazilsin.

2. Quyidagilar tasdiqlansin:

Oʻzbekiston Teleradiokompaniyasining tashkiliy tuzilmasi, boshqaruv apparati xodimlari va ijodiy-ishlab chiqarish xodimlari soni 1, 2, 2a, 2b, 2v, 2g, 2d, 2e, 2j-ilovalarga muvofiq;

hududiy boʻlinmaning namunaviy tuzilmasi va xodimlari soni 3-ilovaga muvofiq;

Oʻzbekiston Teleradiokompaniyasi toʻgʻrisidagi Nizom 4-ilovaga muvofiq.

3. Oʻzbekiston Respublikasi Moliya vazirligi, Mehnat va aholini ijtimoiy muhofaza qilish vazirligi Oʻzbekiston Teleradiokompaniyasi bilan birgalikda har yili Teleradiokompaniyaning boshqaruv apparati xodimlari va ijodiy-ishlab chiqarish xodimlari sonini Vazirlar Mahkamasining 1994-yil 28-martdagi 167-son qarori bilan tasdiqlangan teleradioeshittirishlarni tayyorlash va translatsiya qilish uchun xarajatlar normativlari boʻyicha aniqlab borsinlar.

4. Oʻzbekiston Teleradiokompaniyasiga raisning toʻrt nafar oʻrinbosari, shu jumladan, bir nafar birinchi oʻrinbosari boʻlishiga ruxsat etilsin.

Kompaniya raisiga, uning oʻrinbosarlariga va boshqaruv aʼzolariga Oʻzbekiston Respublikasi vazirlari va vazirlarning oʻrinbosarlari, vazirliklar hayʼatlari aʼzolari uchun belgilangan moddiy-maishiy taʼminot, tibbiy va transport xizmati koʻrsatish shart-sharoitlari tatbiq etilsin.

5. Oʻzbekiston Teleradiokompaniyasi:

ikki hafta muddatda hududiy teleradiokompaniyaning namunaviy nizomini ishlab chiqsin va tasdiqlasin;

Oʻzbekiston Respublikasi Moliya vazirligi va Tashqi ishlar vazirligi bilan birgalikda belgilangan tartibda “Axborot teleradioagentligi”ni tashkil etish toʻgʻrisida taklif kiritsin.

6. Oʻzbekiston Teleradiokompaniyasining qurilayotgan va rekonstruksiya qilinayotgan obyektlari roʻyxati 5-ilovaga* muvofiq tasdiqlansin. “Toshkentuyjoyinvestqurilish” korporatsiyasi obyektlar qurilishi boʻyicha bosh pudratchi etib belgilansin.

“Oʻzistiqbolstat” davlat qoʻmitasi va Oʻzbekiston Respublikasi Moliya vazirligi Oʻzbekiston Teleradiokompaniyasiga har yilgi kapital qurilish prognozlarida 5-ilovada* koʻrsatib oʻtilgan obyektlar qurilishi uchun mablagʻlar ajratishni, shu jumladan, 1996-yilda 150 mln. soʻm ajratishni nazarda tutsinlar.

* 5-ilova berilmaydi.

7. Oʻzbekiston Teleradiokompaniyasi, Oʻzbekiston Respublikasi Aloqa vazirligi, “Oʻzistiqbolstat” davlat qoʻmitasi, Tashqi iqtisodiy aloqalar vazirligi, Moliya vazirligi, Tashqi iqtisodiy faoliyat milliy banki Oʻzbekiston Teleradiokompaniyasi tizimini “Simens” (GFR) kompaniyasini jalb etgan holda kompleks texnik qayta jihozlash yuzasidan Vazirlar Mahkamasining qarori loyihasini 20 kun muddatda tayyorlasinlar va taqdim etsinlar.

Vazirlar Mahkamasining 1994-yil 28-martdagi 167-son qaroriga muvofiq Oʻzbekiston Teleradiokompaniyasining moddiy-texnika bazasini mustahkamlash uchun 5,9 mln. AQSh dollari, shuningdek 1,8 mlrd. Rossiya rubli miqdorida foizsiz kredit ajratilganligi maʼlumot uchun qabul qilinsin.

8. Oʻzbekiston Respublikasi Oliy va oʻrta maxsus taʼlim vazirligi, Madaniyat ishlari vazirligi, Aloqa vazirligi va Xalq taʼlimi vazirligi 1996 — 2000-yillarda kontrakt-shartnoma asosida turdosh mutaxassisliklarning yuqori kurslarida oʻqiyotganlar orasidan “Oʻzteleradio” ish sohalari boʻyicha kadrlar tayyorlashni tezlashtirish va uning tizimiga oliy va oʻrta maxsus taʼlim oʻquv muassasalari bitiruvchilarini 6-ilovaga* muvofiq yuborishni taʼminlasinlar.

* 6-ilova berilmaydi.

9. Vazirliklar va idoralar “Oʻzteleradio” tizimida ishlovchi xorijiy mutaxassislardan va uning taklifiga binoan keladigan xorijiy fuqarolardan mehmonxonada yashaganligi, transportdan foydalanganligi, viza xizmatlari koʻrsatilganligi uchun toʻlovlarni milliy valyutada va Oʻzbekiston Respublikasi fuqarolari uchun belgilangan miqdorlarda qabul qilsinlar.

10. Vazirlar Mahkamasining 1992-yil 11-martdagi 123-son qarori oʻz kuchini yoʻqotgan deb hisoblansin.

11. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari S.S. Saidqosimov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1996-yil 24-may,

190-son

Vazirlar Mahkamasining 1996-yil 24-maydagi 190-son qaroriga 1-ILOVA

Oʻzbekiston teleradiokompaniyasi tuzilmasi

1. Markaziy apparat

2. Tuzilma birliklari huquqidagi boʻlinmalar

Televideniye boʻyicha dasturlar bosh direksiyasi

Respublika radiosi dasturlari bosh direksiyasi

Chet mamlakatlarga eshittirishlar direksiyasi

Badiiy jamoalar direksiyasi

Teleradioeshittirish tizimi faoliyatini taʼminlash xizmati

3. Yuridik shaxs huquqiga ega boʻlgan korxonalar

Respublika televizion markazi

Respublika radioeshittirish va ovoz yozish uyi

“Oʻzbektelefilm” studiyasi

Nukus radiotelemarkazi

Maxsus avtobaza

“Oqtosh” dam olish uyi

“Oltin uzuk” pansionati

Poliklinika

4. Hududiy teleradiokompaniyalar

Qoraqalpogʻiston Respublikasi teleradiokompaniyasi

Andijon viloyati teleradiokompaniyasi

Buxoro viloyati teleradiokompaniyasi

Jizzax viloyati teleradiokompaniyasi

Qashqadaryo viloyati teleradiokompaniyasi

Namangan viloyati teleradiokompaniyasi

Samarqand viloyati teleradiokompaniyasi

Surxondaryo viloyati teleradiokompaniyasi

Sirdaryo viloyati teleradiokompaniyasi

Navoiy viloyati teleradiokompaniyasi

Fargʻona viloyati teleradiokompaniyasi

Xorazm viloyati teleradiokompaniyasi

Vazirlar Mahkamasining 1996-yil 24-maydagi 190-son qaroriga 2-ILOVA

Oʻzbekiston teleradiokompaniyasi tashkiliy tuzilmasi

Vazirlar Mahkamasining 1996-yil 24-maydagi 190-son qaroriga 2a-ILOVA

Oʻzbekiston Teleradiokompaniyasi markaziy apparatining

TUZILMASI

Rahbariyat

Iqtisodiyot boshqarmasi

Buxgalteriya hisobi va hisoboti boshqarmasi

Texnika boshqarmasi

Kapital qurilish boshqarmasi

Kadrlar boshqarmasi

Yuridik xizmat

Maxsus qism

Ikkinchi boʻlim

Xalqaro aloqalar boʻlimi

Ishlar boshqarmasi

Vazirlar Mahkamasining 1996-yil 24-maydagi 190-son qaroriga 2b-ILOVA

“Oʻzteleradio” markaziy apparatining

TUZILMASI

Vazirlar Mahkamasining 1996-yil 24-maydagi 190-son qaroriga 2v-ILOVA

Televideniye boʻyicha dasturlar bosh direksiyasi

TUZILMASI

Vazirlar Mahkamasining 1996-yil 24-maydagi 190-son qaroriga 2g-ILOVA

Respublika radiosi dasturlari bosh direksiyasining

TUZILMASI

Vazirlar Mahkamasining 1996-yil 24-maydagi 190-son qaroriga 2d-ILOVA

Chet mamlakatlarga eshittirishlar direksiyasining

TUZILMASI

Vazirlar Mahkamasining 1996-yil 24-maydagi 190-son qaroriga 2e-ILOVA

Teleradiokompaniya badiiy jamoalari direksiyasining

TUZILMASI

Vazirlar Mahkamasining 1996-yil 24-maydagi 190-son qaroriga 2j-ILOVA

Teleradioeshittirishlar tizimi faoliyatini taʼminlash xizmati

TUZILMASI

Vazirlar Mahkamasining 1996-yil 24-maydagi 190-son qaroriga 3-ILOVA

Hududiy teleradiokompaniyaning namunaviy

TUZILMASI

Vazirlar Mahkamasining 1996-yil 24-maydagi 190-son qaroriga 4-ILOVA

Oʻzbekiston Teleradiokompaniyasi toʻgʻrisida

NIZOM

I. UMUMIY QOIDALAR

1. Oʻzbekiston Respublikasi Prezidentining 1996-yil 7-maydagi Farmoniga muvofiq tashkil etilgan Oʻzbekiston Teleradiokompaniyasi (keyingi oʻrinlarda “Oʻzteleradio” deb ataladi) konstitutsiyaviy rivojlanishni, qonunchilikka rioya etilishini, inson huquqlari va qadr-qimmati muhofaza qilinishini taʼminlovchi demokratiyaning muhim instituti, Oʻzbekiston Respublikasining davlat, jamoat va xususiy radiokompaniyalarining yagona tizimida televizion hamda radioeshittirishlarni amalga oshiruvchi tashkilot hisoblanadi.

2. “Oʻzteleradio” Oʻzbekistonda teleradioeshittirish sohasida muvofiqlashtiruvchi organ hisoblanadi va oʻz faoliyati toʻgʻrisida Vazirlar Mahkamasiga hisob beradi.

3. “Oʻzteleradio” Oʻzbekiston Davlat teleradioeshittirish kompaniyasining, shu jumladan, chet davlatlarning tashkilotlari, firmalari va korxonalari bilan tuzilgan shartnomalar va bitimlarning huquqiy vorisi hisoblanadi.

4. “Oʻzteleradio” yuridik shaxs hisoblanadi, mustaqil balansiga ega boʻladi, respublikaning butun hududida, shuningdek, uning tashqarisida zarur xoʻjalik-moliya operatsiyalarini bajaradi, bank muassasalarida oʻz hisob-kitob schyotlariga ega boʻladi, qonunchilik bilan belgilangan tartibda tashqi iqtisodiy faoliyatni amalga oshiradi.

“Oʻzteleradio” ommaviy axborot vositalarining muassisi, tahririyati, tarqatuvchisi va noshiri huquqlariga ega boʻladi.

5. Oʻzbekiston Teleradiokompaniyasining hududiy (mintaqaviy) boʻlinmalari Oʻzbekiston Teleradiokompaniyasi va tegishli ravishda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan taʼsis etiladi.

6. “Oʻzteleradio” oʻz faoliyatida Oʻzbekiston Respublikasi Konstitutsiyasiga, qonunlariga, Oʻzbekiston Respublikasi Oliy Majlisining qarorlari va boshqa hujjatlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, mazkur Nizomga va oʻz faoliyatiga tegishli boʻlgan boshqa normativ hujjatlarga amal qiladi.

7. “Oʻzteleradio” Oʻzbekiston Respublikasi Davlat gerbi tasvirlangan va oʻz nomi yozilgan muhrga, firma belgisiga, ramziga ega boʻladi.

8. “Oʻzteleradio”ning manzili: 700011, Toshkent shahri, Navoiy koʻchasi, 69.

II. OʻZBEKISTON TELERADIOKOMPANIYASINING MAQSADI VA FAOLIYAT SOHASI

1. Televizion va radio dasturlar konstitutsiyaviy tartibga boʻysunadilar.

“Oʻzteleradio” axborotlarning mafkuradan mutlaqo holi boʻlishini nazarda tutgan holda aholi hamda jamiyatning xolisona, ishonchli va xilma-xil axborotlarga boʻlgan ehtiyojlarini oʻrganish va qoniqtirishni taʼminlaydi.

Jamoatchilik fikrining xilma-xilligini aks ettiradi, insonning Oʻzbekiston Respublikasi Konstitutsiyasida mustahkamlangan eʼtiqodlari va qadr-qimmati, uning huquq va erkinliklarining hurmat qilinishini taʼminlaydi.

Qarashlar tengligini taʼminlaydi, materiallar mazmunining mustaqilligi va xolisligini, Oʻzbekiston hududida Oʻzbekiston Respublikasi qonun hujjatlariga muvofiq oʻz faoliyatini amalga oshiruvchi partiya va harakatlarning konsepsiyalari va dasturiy qoidalarini efirda bir xilda taqdim etilishini kafolatlaydi.

Reportajlar, sharhlar va boshqa axborot eshittirishlari jurnalistik etikaning umumiy eʼtirof etilgan qoidalariga monand boʻlishi lozim. Yangiliklar efirga uzatilishigacha tegishli tarzda mazmuni, ishonchliligi va kelib chiqishi nuqtai nazaridan batafsil tekshirilishi zarur. Sharhlar axborotlarning oʻzidan aniq ajralib turishi lozim va shunday ekanligi sifatida belgilanishi zarur.

Aholini demokratik jamiyat qurilishiga faol jalb etishga, fuqarolarni umuminsoniy qadriyatlarga, boy milliy merosga hurmat ruhida tarbiyalashga, oʻsib kelayotgan avlodda yuksak maʼnaviy fazilatlar, milliy oʻz-oʻzini anglash, Vatanga mehr-muhabbat va sadoqatni shakllantirishga yordam beradi.

Millatlararo sabr-bardosh, totuvlik va tinchlik prinsiplarini tasdiqlaydi. Oʻzbekiston xalqining jipsligiga hamda xalqaro hamfikrlikka yordam beradi.

Mamlakatdagi konstitutsion normalar va qonunchilikning tushuntirilishini, ularning hayotga tatbiq etilishi hamda huquqiy jamiyat shakllanishida har tomonlama yordamni; mamlakat aholisini, shuningdek chet el jamoatchiligini Oʻzbekistonning siyosiy, iqtisodiy va ijtimoiy-madaniy hayotida sodir boʻlayotgan oʻzgarishlar toʻgʻrisida keng xabardor qilinishini taʼminlaydi.

Quyidagi televizion va radio eshittirishlar:

amaldagi davlat tuzumini oʻzgartirishning nokonstitutsiyaviy shakllariga chaqirsa (Oʻzbekiston JKning 159-moddasi);

irqiy va milliy nizolarni avj oldirishga yordam bersa (Oʻzbekiston JKning 156-moddasi);

insoniyatning qadr-qimmatini oyoqosti qiladigan, uning ustidan shafqatsizlarcha zoʻravonlikni aks ettirsa (Oʻzbekiston JKning 140-moddasi);

militeristik yoʻnalishga ega boʻlsa (Oʻzbekiston JKning 150-moddasi);

sharm-hayosiz boʻlsa (JKning 130-moddasi, Oʻzbekiston ommaviy axborot vositalari toʻgʻrisidagi Qonunning 4-moddasi);

aholi ayrim qatlamlarining, ularning diniy, milliy va madaniy kelib chiqishi bilan bogʻliq manfaatlarini cheklasa;

bolalar va oʻsmirlarning jismoniy, axloqiy yoki ruhiy salomatligiga zarar keltirsa ularning tarqatilishiga yoʻl qoʻyilmaydi.

2. “Oʻzteleradio” oʻziga yuklangan vazifalarga muvofiq xolislik, tezkorlik va oʻz axborotlarining mutlaqo yangi boʻlishi prinsiplariga asoslanib:

mamlakat hududida va uning tashqarisida teleradioeshittirishlarni amalga oshiradi;

Oʻzbekiston Respublikasi, uning ichki va tashqi siyosati toʻgʻrisida, respublikada roʻy berayotgan jarayonlar, shu voqealarga nisbatan uning tashqarisidagi munosabatlar haqida, shuningdek, xorijdagi voqealar va jarayonlar toʻgʻrisida har tomonlama axborot beradi;

Oʻzbekiston Respublikasi davlat hokimiyati va boshqaruv organlari faoliyati toʻgʻrisidagi rasmiy xabarlarni tarqatadi, ular tomonidan qabul qilinadigan qarorlarni tushuntiradi, ular yuzasidan bildirilayotgan fikr-mulohazalarni tahlil qiladi;

oʻz nashrlarini eʼlon qiladi, xalqaro koʻrgazmalar, simpoziumlar, telebozorlar, konferensiyalar va festivallar tashkil etadi va ularda qatnashadi;

telekoʻrsatuvlar va radioeshittirishlar uchun teleradio dasturlari, telefilmlar, adabiy va musiqiy asarlar, sahna asarlari yaratishning ijodiy-ishlab chiqarish jarayonlarini taʼminlaydi;

kompaniya barcha tuzilmalari va boʻlinmalari uchun majburiy normativ hujjat hisoblanuvchi istiqboldagi (kamida 3 oylik) eshittirishlar setkasini (“Oʻzteleradio” boshqaruvi) tasdiqlaydi. Ommaviy axborot vositalari orqali eʼlon qilingan koʻrsatuv va eshittirishlar dasturi faqat umumdavlat ahamiyatiga ega boʻlgan favqulodda holatlarda “Oʻzteleradio” raisining koʻrsatmasi bilan oʻzgartiriladi. Qolgan barcha hollarda oʻzgartirishlar kompaniya boshqaruvi tomonidan tasdiqlanadi;

telefilmlarni ishlab chiqarishga tushirish, ularni koʻpaytirish tartibini belgilaydi, tele, radio va kino mahsulotlari ishlab chiqarish uchun moddiy xarajatlarning normativlarini ishlab chiqadi va tasdiqlaydi;

ijodiy-ishlab chiqarish va ijtimoiy rivojlantirish fondlarini zarur valyuta va oʻz faoliyatini amalga oshirish uchun zarur boʻlgan boshqa fondlarni mustaqil shakllantiradi va ulardan foydalanadi. Koʻrsatuv va eshittirishlarning amaldagi hajmi, sifati, janri va reytingiga qarab ularni tayyorlash va translatsiya qilish xarajatlari normativlariga asosan teleradiokompaniyaning barcha xodimlari mehnatini normalashning va ular mehnatiga haq toʻlashning rivojlangan shakllarini joriy etadi. Mukofotlar va ragʻbatlantiruvchi tusdagi boshqa toʻlovlar, shu jumladan rahbarlar va apparat xodimlariga ham, miqdorlarini, shuningdek turli toifalar xodimlari soni nisbatlarini hisobga olmagan holda, koʻrsatilgan maqsadlarga ajratilgan mablagʻlar doirasida shtat va tuzilmani belgilaydi;

televideniye va radio uchun barcha turdagi asarlarni yaratganlik uchun mualliflik, sahnaga qoʻyganlik hamda ijrochilik toʻlovlari toʻlanishi tartibi va ular miqdorini, shuningdek, adabiy-badiiy asarlar, ssenariylar, telefilmlarga, televizion koʻrsatuvlarga va radioeshittirishlarga musiqa yaratganlik uchun stavkalarni belgilaydi;

xalqning milliy maʼnaviy boyligi va madaniy merosining bir qismi sifatida telekoʻrsatuv va radio asarlari “Oltin fondi”ni tanlash, butlash hamda saqlash vazifasini amalga oshiradi;

mehnat munosabatlarining tanlov-shartnoma tizimi asosida kadrlarni tanlaydi hamda joy-joyiga qoʻyish ishlarini olib boradi, “Oʻzteleradio” xodimlarini Respublika va xorijiy oliy oʻquv yurtlari bazasida tayyorlash va qayta tayyorlashni amalga oshiradi;

badiiy, artistik ishlab chiqarish texnikasi xodimlarini tarifikatsiyadan oʻtkazish tartibini belgilaydi;

teleradio dasturlarining reytingini aniqlash hamda uni oshirish maqsadida teletomoshabinlar va radioeshituvchilarning fikr-mulohazalarini sotsiologik oʻrganishni amalga oshiradi;

telekoʻrsatuv hamda radioeshittirishlarning maqsadli efir vaqtini vazirliklar, idoralar, korxonalar, tashkilotlar va jismoniy shaxslarga hamda jamoat birlashmalariga va xorijiy tashkilotlarga tijorat asosida ajratadi;

telekoʻrsatuv va radioeshittirishlarning xalqaro va xususiy organlari bilan teleradio dasturlari, ilmiy-uslubiy, huquqiy, texnikaviy, tijorat va boshqa axborotlarni oʻzaro almashish masalalari yuzasidan ikki tomonlama hamda koʻp tomonlama shartnomalar tuzadi;

Oʻzbekiston Respublikasi Aloqa vazirligi korxonalari va organlari bilan birgalikda telekoʻrsatuv va radioeshittirishlar dasturlarini respublika hududida va uning tashqarisida shakllantirish hamda tarqatish yagona tarmoqlarining faoliyat koʻrsatishlarini taʼminlovchi texnik vositalarni oqilona joylashtirish va samarali rivojlantirishni amalga oshiradi;

davlat aloqa organlarining oʻzlashtirilgan radiochastotalar, chastota kanallari bilan telekoʻrsatuv va radioeshittirishlarning texnika vositalaridan samarali foydalanishini taʼminlaydi;

“Oʻzteleradio” dasturlarini tuzish va tarqatish sifatini nazorat qilishni tashkil egadi;

budjetdan ajratilgan mablagʻlar va oʻz mablagʻlari doirasida buyurtmalarni joylashtiradi, telekoʻrsatuv hamda radioeshittirish uchun texnika, texnologiya hamda asbob-uskunalarning yangi turlarini ishlab chiqishni mablagʻ bilan taʼminlaydi, xususiy texnologik infrastrukturani yaratish uchun telekoʻrsatuv va radioeshittirishlarga asbob-uskunalar ishlab chiqaruvchi korxonalar va firmalar, ilmiy-tadqiqot tashkilotlari bilan bevosita aloqalar oʻrnatadi;

telekoʻrsatuv va radioeshittirishlar dasturlarini namoyish qilishning texnik shartlariga muvofiq keluvchi binolar hamda inshootlar qurish uchun texnik vazifalarning loyihalarini kelishib oladi;

Oʻzbekiston Respublikasida telekoʻrsatuv va radioeshittirishlarni tashkil etish va boshqarishning huquqiy asoslarini ishlab chiqishda qatnashadi;

belgilangan tartibda tegishli respublika hamda xalqaro huquqiy tashkilotlarda “Oʻzteleradio” manfaatlarini himoya qiladi;

Oʻzbekiston Respublikasining telekoʻrsatuv va radioeshittirishlar sohasidagi xalqaro aloqalarini amalga oshiradi;

chet mamlakatlarning teleradiokompaniyalari va tashkilotlari bilan hamkorlik toʻgʻrisida bitimlar, protokollar va boshqa hujjatlarni ishlab chiqadi, tashqi iqtisodiy faoliyat sohasida shartnomalar tuzadi, telekoʻrsatuv va radioeshittirishlar sohasida eksport-import operatsiyalarini, vakillikni, vositachilik faoliyatini amalga oshiradi;

chet ellik sheriklar bilan qoʻshma korxonalar tashkil etadi, audio va video kassetalarga yozilgan dasturlarni, kino mahsulotlarini ishlab chiqaradi, koʻpaytiradi va sotadi, shuningdek uning moddiy-texnika bazasini rivojlantirishga, moliyaviy-iqtisodiy ahvolini mustahkamlashga yordam beruvchi faoliyatning boshqa turlarini amalga oshiradi;

mulkchilikning turli shakllaridagi efirga uzatish tuzilmalarini tuzishga oid loyihalarni ishlab chiqadi va sotadi.

III. OʻZBEKISTON TELERADIOKOMPANIYASINING HUQUQLARI

1. Oʻzbekiston Teleradiokompaniyasi quyidagi huquqlarga ega:

telekoʻrsatuvlar va radioeshittirishlar tayyorlash uchun davlat organlari, jamoat birlashmalari va mansabdor shaxslardan zarur axborotlar olish;

“Oʻzteleradio” xodimlarining xizmat vazifasini bajarishlari uchun talab etilgan vaqtda davlat organlari va jamoat tashkilotlaridan yordam olish;

xodimlarni ommaviy tadbirlarga, shuningdek, tabiiy ofatlar, halokatlar boʻlgan, harbiy oʻqishlar va jangovar harakatlar, kosmik tadqiqotlar oʻtkazilayotgan, ekologik ofatlar va jinoyatlar boʻlgan, ozodlikdan mahrum etish joylariga (tegishli organlar bilan kelishgan holda) telekoʻrsatuvlar va radioeshittirishlar tashkil etish uchun yuborish;

Oʻzbekiston Respublikasi qonunlari asosida, respublika teleradioeshittirishlar tizimida yagona davlat siyosatini amalga oshirish bilan bogʻliq masalalar boʻyicha, telekoʻrsatuv va radioeshittirishlarning barcha organlari hamda tashkilotlari uchun, ularning idoraviy mansubligidan va mulkchilik shakllaridan qatʼi nazar, majburiy normativ hujjatlar nashr etish;

tegishli organlarga telekoʻrsatuvlar va radioeshittirishlarni translatsiya qilishning texnik talablariga rioya qilinmagan holda amalga oshirilayotgan binolar va inshootlar qurilishini toʻxtatib qoʻyish toʻgʻrisida takliflar yuborish;

“Oʻzteleradio” dasturlarini tarqatish va namoyish qilish maqsadida foydalaniladigan “Oʻzteleradio”ga biriktirib qoʻyilgan telekoʻrsatuv va radioeshittirishlarning barcha texnik vositalarining ular oʻzlashtirgan radiochastotalar, chastota kanallari, sim orqali (kabel orqali) uzatish va aloqa kanallari bilan faoliyat koʻrsatishi (koʻrsatuvlar va eshittirishlar hajmi va tartibi) rejimini belgilash;

eshittirishlar setkasini mustaqil shakllantirish va maqsadga muvofiqligiga amal qilgan holda efir vaqtidan foydalanish shakllarini modellashtirish;

ommaviy axborot vositalari muassisi, tahririyati, tarqatuvchisi va noshiri huquqlariga ega boʻlish, umumrespublika telekoʻrsatuvlari va radioeshittirishlari tashkilotlari hamda matbuot organlarini taʼsis etish, taʼsis etiladigan organlarning dasturlari, ustavlari (nizomlari)ni tasdiqlash, ularga moliyaviy va moddiy-texnika yordami berish;

Aloqa vazirligi bilan kelishgan holda umumrespublika teleradio dasturlarini Oʻzbekiston Respublikasining barcha hududiga va uning tashqarisiga tarqatish tartibini belgilash;

teleradio mahsulotlari tayyorlash uchun budjet, jalb etilgan va oʻz mablagʻlari hisobidan yuridik va jismoniy shaxslarda texnikalar xarid qilish va xizmatlar olish boʻyicha, shuningdek teleradio mahsulotlarini sotish hamda efir vaqtini ajratish boʻyicha kontraktlar tuzish;

badiiy qadr-qimmati, kasbiy darajasi va teleradio dasturlarining reytingiga qarab barcha toifa xodimlariga yakka tartibdagi ustamalar, qoʻshimcha haqlar, mukofotlar va ragʻbatlantirish tusidagi boshqa toʻlovlarni aniqlash va belgilash;

xorijiy mutaxassislarni kontrakt asosida ishga qabul qilish;

buyurtma asosida yaratiladigan teleradio mahsulotlariga baholarni, koʻrsatilgan xizmatlar uchun soʻmda va chet el valyutasida tariflarni mustaqil belgilash;

“Oʻzteleradio”ning faoliyat koʻrsatayotgan ijodiy-ishlab chiqarish tuzilmalarini oʻzini-oʻzi mablagʻ bilan taʼminlash asosida, shu jumladan xorijiy sheriklarni jalb etgan holda, ishlashga oʻtkazish hamda ana shunday tartibda ishlaydigan yangi tuzilmalarni tashkil etish;

teleradio dasturlarini shartnoma asosida respublika va mahalliy gazetalarga eʼlon qilish uchun berish;

respublika hududida va uning tashqarisida belgilangan tartibda firmalar, tashkilotlar, vakolatxonalar, boʻlimlar, agentliklar, muxbirlik punktlari va ularning filiallarini taʼsis etish, qayta tashkil qilish va tugatish;

mavjud mablagʻlar doirasida axborot, madaniyat, xayriya, insonparvarlik hamda boshqa xil fondlar, teleradiolotereyalar taʼsis etish, banklar tashkil qilish, mamlakatimizda va xorijda faoliyat koʻrsatayotgan shunga oʻxshash fondlar tarkibiga kirish; eng yaxshi asarlar va axborot materiallari uchun mualliflarni ragʻbatlantirish maqsadida maxsus mukofotlar taʼsis etish;

tijorat faoliyatini amalga oshirish va olingan valyuta tushumlaridan mustaqil ravishda foydalanish;

telekoʻrsatuvlar, radioeshittirishlar, filmlar yaratish sohasidagi muammolarni tahlil qilish va ularni hal etishning oqilona yoʻllarini topish maqsadida yuqori malakali mutaxassislar va ekspertlarni, shu jumladan ularni respublika tashqarisidan ham jalb qilish;

tanlovlar, festivallar, viktorinalar oʻtkazish, delegatsiyalarni, mamlakatimizning va chet ellar teleradio tashkilotlari vakillarini qabul qilish, shuningdek, “Oʻzteleradio” faoliyati bilan bogʻliq tadbirlarni oʻtkazish uchun sarf-xarajatlar normasini ishlab chiqish va tasdiqlash;

respublika rahbariyatining qarorlari va farmoyishlarini respublika vazirliklari va davlat boshqa boshqaruv organlari uchun belgilangan tartibda olish.

2. “Oʻzteleradio” zimmasiga yuklangan vazifalar va ishlarni bajarishda u respublika birlashmalariga hamda Oʻzbekiston Respublikasining davlat boshqaruv organlariga berilgan boshqa huquqlardan ham foydalanadi.

3. “Oʻzteleradio” vakolati doirasiga kiruvchi yoki uning manfaatlariga daxldor masalalar qonunda nazarda tutilgan hollarda davlat organlari va xoʻjalik tashkilotlari tomonidan “Oʻzteleradio” ishtirokida hal etiladi.

IV. OʻZBEKISTON TELERADIOKOMPANIYASI BOShQARUVI

1. Oʻzbekiston Teleradiokompaniyasiga rais boshchilik qiladi.

“Oʻzteleradio” raisining toʻrt nafar oʻrinbosari, shu jumladan, bir nafar birinchi oʻrinbosari boʻladi.

2. Oʻzbekiston Teleradiokompaniyasi raisi kompaniya faoliyatiga rahbarlik qiladi, “Oʻzteleradio”ga yuklangan vazifalar va funksiyalarning bajarilishi uchun shaxsan javob beradi, rais oʻrinbosarlarining, tarkibiy boʻlinmalar rahbarlarining, shuningdek, oʻz tarkibiga kiruvchi birlashmalar, korxonalar hamda tashkilotlar rahbarlarining javobgarlik darajalarini belgilaydi.

3. Oʻzbekiston Teleradiokompaniyasida rais, uning oʻrinbosarlari va “Oʻzteleradio”ning boshqa xodimlari tarkibida 15 kishidan iborat boshqaruv tuziladi.

Boshqaruvga Oʻzbekiston Teleradiokompaniyasi raisi boshchilik qiladi. Boshqaruv aʼzolari Oʻzbekiston Respublikasi Vazirlar Mahkamasi tomonidan tasdiqlanadi.

Boshqaruv qarorlari Oʻzbekiston Teleradiokompaniyasi raisining buyruqlari bilan hayotga tatbiq etiladi.

V. MOL-MULK VA FONDLAR

1. Oʻzbekiston Respublikasining tugatilgan Davlat teleradioeshittirish kompaniyasining va unga qarashli mahalliy teleradiokompaniyalar hamda tashkilotlar ixtiyorida boʻlgan asosiy fondlar va boshqa davlat mol-mulki Oʻzbekiston Teleradiokompaniyasining mol-mulkini tashkil qiladi. “Oʻzteleradio” koʻrsatilgan davlat mulkini boshqarish uchun vakolatli boʻlgan davlat organi funksiyasini bajaradi. Oʻzbekiston Teleradiokompaniyasi mol-mulkining qiymati uning mustaqil balansida aks etadi.

2. Oʻzbekiston Teleradiokompaniyasining pul mablagʻlari texnika vositalaridan foydalanish, texnikaviy bazani mustahkamlash, maqsadli dasturlarni amalga oshirish, respublika tashqarisidagi vakilliklarni mablagʻ bilan taʼminlash va boshqa ishlab chiqarish ehtiyojlari uchun belgilangan normativlar hamda hisob-kitoblarga muvofiq davlat buyurtmasini bajarish uchun davlat budjetidan ajratiladi.

Tijorat faoliyatidan, pulli xizmatlar koʻrsatish, vazirliklar, idoralar, korxonalar va tashkilotlar, ayrim fuqarolar bilan tuzilgan shartnomalar boʻyicha koʻrsatilgan xizmatlar va bajarilgan ishlardan, homiylardan, tashqi iqtisodiy faoliyatdan, shuningdek, korxonalar, muassasalar, tashkilotlar va fuqarolar oʻtkazgan begʻaraz va xayriya badallaridan, aksiyalar va qimmatli qogʻozlar, Oʻzbekiston Respublikasi qonunchiligi bilan man etilmagan boshqa manbalardan olinadigan mablagʻlar Oʻzbekiston Teleradiokompaniyasini moliyaviy taʼminlashning qoʻshimcha manbalari hisoblanadi.

3. Oʻzbekiston Teleradiokompaniyasi teleradiokompaniyani rivojlantirish fondini, shuningdek, mehnatga haq toʻlash, ijodiy-ishlab chiqarish va ijtimoiy rivojlantirish fondlarini, kompaniya vazifalarini amalga oshirish uchun zarur boʻlgan valyuta hamda boshqa fondlarni tashkil etadi.

4. Oʻzbekiston Teleradiokompaniyasi oʻz majburiyatlari boʻyicha qonunchilikka muvofiq undirib olinishi mumkin boʻlgan oʻziga biriktirib qoʻyilgan mol-mulk uchun javob beradi.

5. Oʻzbekiston Teleradiokompaniyasi buxgalteriya, tezkorlik va statistika hisobini yuritadi, belgilangan tartibda ishlab chiqarish-xoʻjalik faoliyatining barcha turlari boʻyicha hisobot tayyorlaydi va taqdim etadi, hisobotlar va balanslarning ishonchliligini taʼminlaydi.

6. Oʻzbekiston Teleradiokompaniyasi oʻziga boʻysunuvchi mahalliy teleradiokompaniyalar, korxonalar va tashkilotlar moliya-xoʻjalik faoliyatlarining qonunchilikka muvofiq tematik tekshirishlardan va kompleks taftishlardan oʻtkazilishini taʼminlaydi.

7. Oʻzbekiston Teleradiokompaniyasini qayta tashkil etish va tugatish belgilangan tartibda amalga oshiriladi.