Oʻzaro savdoga koʻmaklashish tizimi toʻgʻrisida

13.09.2018

Oʻzbekiston Respublikasi Hukumati bilan Belarus Respublikasi Hukumati oʻrtasida

Bitim

Oʻzbekiston Respublikasi Hukumati va Belarus Respublikasi Hukumati, keyingi oʻrinlarda “Tomonlar” deb ataluvchilar,

1994-yil 15-aprelda imzolangan Bojxona ishlarida hamkorlik va oʻzaro yordam toʻgʻrisidagi Bitim qoidalarini inobatga olib,

Tomonlar davlatlarining iqtisodiy va ijtimoiy manfaatlarini himoya qilish maqsadida hamkorlik darajasini oshirishga intilib,

Tomonlar davlatlari oʻrtasida olib oʻtiladigan tovarlar va transport vositalarining bojxona nazorati samaradorligini oshirish zaruriyatini tan olib,

Tomonlar davlatlari oʻrtasida olib oʻtiladigan tovarlar va transport vositalarining bojxona nazoratini soddalashtirish uchun shart-sharoitlar yaratish va uning muddatini qisqartirish maqsadida,

oʻzaro savdoga koʻmaklashish tizimini rivojlantirish va uning xavfsizligini taʼminlash maqsadida,

quyidagilar toʻgʻrisida kelishib oldilar:

1-modda

Tomonlar mazkur Bitimni amalga oshirish uchun Tomonlar davlatlarining quyidagi bojxona organlariga vakolat taqdim etadilar:

Oʻzbekiston Respublikasida — Davlat bojxona qoʻmitasi;

Belarus Respublikasida — Davlat bojxona qoʻmitasiga.

2-modda

Oʻzaro savdoga koʻmaklashish tizimi (keyingi oʻrinlarda — OʻSKT) axborot almashinuvining texnik shartlariga muvofiq tovarlar va transport vositalari olib oʻtilishi toʻgʻrisidagi maʼlumotlar almashinuviga asoslangan.

3-modda

1. Taqdim etiladigan axborotlar tarkibi mazkur Bitimning ajralmas qismi hisoblanadigan Ilovaga muvofiq shakllantiriladi.

2. Axborot almashinuvi OʻSKT qoʻllaniladigan tashqi iqtisodiy faoliyat ishtirokchilarining tovar yetkazmalariga nisbatan amalga oshiriladi.

3. Tomonlar davlatlari bojxona organlari axborot almashinuvining texnik shartlarini ishlab chiqadilar va tasdiqlaydilar.

4. OʻSKT transportlarning barcha turlari va tovarlarning barcha turlariga nisbatan qoʻllaniladigan keng tarqalgan amaliyotni oʻzida ifodalaydi.

5. OʻSKT oʻzbek va belarus tashqi iqtisodiy faoliyat qatnashchilari tarafidan ixtiyoriylik asosida qoʻllaniladi.

6. Tomonlar davlatlarining bojxona organlari OʻSKTda ishtirok etmaydigan tashqi iqtisodiy faoliyat qatnashchilariga nisbatan bunday tartibga solishning ixtiyoriylik xususiyatiga zarar yetkazishi mumkin boʻlgan mazkur Bitimga nisbatan ziddiyatlarga yoʻl qoʻymaydilar.

7. OʻSKT shaffof, oldindan bashorat qilinishi mumkin va diskriminatsiyadan xoli boʻlishi lozim. OʻSKTni qoʻllash amaliyoti nosogʻlom raqobatni keltirib chiqarmasligi lozim.

4-modda

OʻSKT tatbiq etiladigan tashqi iqtisodiy faoliyat qatnashchilari quyidagi imtiyozlarga ega boʻladilar:

a) Tomonlar davlatlari milliy qonunchiligiga muvofiq oʻtkazish va manzil punktlarida bojxona rasmiylashtiruvining ustuvor tartibi;

b) bojxona rasmiyatchiligini, imkoni mavjud hollarda, soddalashtirish, shu jumladan, rasmiylashtirish vaqtini qisqartirish maqsadida alohida yoʻlaklar ajratish;

v) oʻtkazish va manzil punktlarida bojxona koʻrigini qoʻllamaslik, Tomonlar davlatlari bojxona qonunchiligining buzilishi xavfi aniqlangan holatlar bundan mustasno.

5-modda

1. Tomonlar davlatlari bojxona organlari mazkur Bitim doirasida olingan axborotlarni Tomonlar davlatlari oʻrtasida olib oʻtiladigan tovarlar va transport vositalariga nisbatan bojxona operatsiyalarini (bojxona rasmiylashtiruvini) takomillashtirish va bojxona nazorati oʻtkazish maqsadlarida qoʻllanilishini kafolatlaydilar.

2. Tomonlar davlatlari bojxona organlari tarafidan olingan axborotlar faqatgina bojxona maqsadlarida foydalaniladi va axborot taqdim etgan Tomon davlati bojxona organining yozma roziligisiz uchinchi shaxslarga taqdim etilmaydi.

6-modda

Tomonlar davlatlari bojxona organlari Tomonlar davlatlari oʻrtasida olib oʻtiladigan tovarlar va transport vositalari toʻgʻrisidagi elektron axborot almashinuvini tashkillashtirishda Birlashgan Millatlar Tashkiloti, Butunjahon bojxona tashkiloti normalari, standartlari va tavsiyalariga, Tomonlar davlatlarining milliy qonunchiligiga rioya etishlari hamda axborot almashinuvi boʻyicha xalqaro ilgʻor tajribani inobatga olishlari lozim.

7-modda

Tomonlar davlatlari bojxona organlari mazkur Bitim qoidalari buzilgan taqdirda, Tomonlar davlatlari milliy qonunchiligiga muvofiq barcha zarur choralarni koʻrishlari hamda bir-birlarini bunday qonunbuzarliklar, shuningdek, Tomonlar davlatlari oʻrtasida olib oʻtiladigan tovarlar va transport vositalari toʻgʻrisida axborot almashinuvi natijasida olingan maʼlumotlardagi tafovutlar va (yoki) ularni qalbakilashtirish holatlari yuzasidan xabardor qilishlari lozim.

8-modda

Tomonlar davlatlari bojxona organlari quyidagi maqsadlarda bevosita aloqalarni oʻrnatishga vakolatli boʻlgan bojxona organlarining masʼul shaxslar roʻyxatini belgilaydilar:

a) axborot almashinuvi texnik shartlari hamda axborotni qayta ishlash va uzatish texnologiyalari, shuningdek, axborotni himoya qilish boʻyicha talablarni ishlab chiqish va kelishish;

b) mazkur Bitimni qoʻllash jarayonida yuzaga kelgan texnik muammolarni hal etish.

9-modda

1. Tomonlar davlatlari bojxona organlari mazkur Bitim imzolangan sanadan boshlab oʻn ikki oy muddatli Tomonlar davlatlari bojxona organlarining oʻzaro yozma kelishuviga koʻra muddatlari uzaytirilishi mumkin boʻlgan pilot loyihasi oʻtkazilishini va amalga oshirilishini tashkil qiladilar.

2. Pilot loyihasini amalga oshirishning birinchi uch oyi davomida Tomonlar davlatlari bojxona organlari OʻSKT doirasida quyidagilarni kelishadilar:

a) axborot almashinuvining texnik shartlari;

b) taqdim etiladigan axborotning roʻyxati, tarkibi va formati;

v) axborotni himoyalashga boʻlgan talablar;

g) Tomonlar davlatlari bojxona organlari oʻrtasida oʻzaro hamkorlikni tashkil etishning tartibi;

d) OʻSKT doirasida olib oʻtiladigan tovarlar va transport vositalarga nisbatan bojxona operatsiyalari (bojxona rasmiylashtiruvi) amalga oshiriladigan Tomonlar davlatlari bojxona organlari roʻyxati.

3. Tomonlar davlatlari bojxona organlari pilot loyihasini oʻtkazishga tayyor ekanliklari toʻgʻrisida hamda unda ishtirok etuvchi bojxona organlari roʻyxati haqida bir-birlarini yozma ravishda xabardor qiladilar.

4. Pilot loyihasini amalga oshirishning keyingi toʻqqiz oyi davomida Tomonlar davlatlari bojxona organlari OʻSKTni amaliy roʻyobga chiqaradilar.

10-modda

Mazkur Bitim qoidalarini talqin qilish va (yoki) amalga oshirish bilan bogʻliq boʻlgan Tomonlar oʻrtasidagi kelishmovchiliklar muzokaralar va maslahatlashuvlar oʻtkazish orqali hal etiladi.

11-modda

Tomonlarning oʻzaro kelishuviga koʻra mazkur Bitimga alohida bayonnomalar bilan rasmiylashtiriladigan oʻzgartirish va (yoki) qoʻshimchalar kiritilishi mumkin. Bunday oʻzgartirish va (yoki) qoʻshimchalar mazkur Bitimning ajralmas qismi hisoblanadi hamda mazkur Bitimning 12-moddasida nazarda tutilgan tartibda kuchga kiradi.

12-modda

1. Mazkur Bitim imzolangan sanadan boshlab vaqtincha qoʻllaniladi va Tomonlar uning kuchga kirishi uchun zarur boʻlgan ichki davlat protseduralarini bajarganliklari toʻgʻrisida diplomatik kanallar orqali soʻnggi xabarnoma olingan sanadan boshlab kuchga kiradi.

2. Mazkur Bitim nomuayyan muddatga tuziladi va Tomonlardan biri diplomatik kanallar orqali uning amal qilishini tugatish niyati toʻgʻrisida yozma xabarnoma yuborish orqali uni tugatishi mumkin. Mazkur holatda ushbu Bitimning amal qilishi bunday xabarnoma olingan sanadan boshlab uch oy oʻtgach tugatiladi. Bitim amal qilishining tugatilishi boshlangan tranzit operatsiyalariga daxl qilmaydi. Bitim amal qilishining tugatilishi amalga oshirilayotgan protseduralarga ham daxl qilmaydi. Bunday protseduralar mazkur Bitim qoidalariga muvofiq tugallanadi.

Toshkent shahrida 2018-yil 13-sentabrda ikki asl nusxada, har biri oʻzbek va rus tillarida tuzildi, barcha matnlar teng autentikdir. Mazkur Bitim qoidalarini talqin qilishda kelishmovchiliklar yuzaga kelgan taqdirda, rus tilidagi matn ustuvor hisoblanadi.

(imzolar)

Oʻzbekiston Respublikasi Hukumati bilan Belarus Respublikasi Hukumati oʻrtasida oʻzaro savdoga koʻmaklashish tizimi toʻgʻrisidagi Bitimga ILOVA

Taqdim etiladigan maʼlumotlar

tarkibi *

Deklaratsiya turi (olib oʻtishning yoʻnalishi/eksport protseduralari).

Deklaratsiyaning roʻyxat raqami.

Deklaratsiyani amalga oshiradigan bojxona organi kodi.

Deklaratsiyaning roʻyxatga olish/rasmiylashtirish sanasi.

Xalqaro yuk tashish kitobchasining raqami.

Chegara oʻtkazish/chiqib ketish organi punkti tavsiflagichi.

Joʻnatuvchining STIR.

Joʻnatuvchining nomi.

Joʻnatuvchining manzili.

Qabul qiluvchining STIR.

Qabul qiluvchining nomi.

Qabul qiluvchining manzili.

Tovarning umumiy miqdori.

Joyning miqdori.

Joʻnatish davlati (nomi/kodi).

Borish moʻljallangan davlat (nomi/kodi).

Savdo qilayotgan davlat (nomi/kodi).

Tovarning kelib chiqish davlati (nomi/kodi).

Tovar raqami.

Tovarning TIF TN boʻyicha kodi.

Deklaratsiyaga muvofiq tovarning nomi.

Tovarning brutto ogʻirligi, kg.

Tovarning netto ogʻirligi, kg.

Valyuta nomi.

Tovarning faktura qiymati/tovarning narxi.

Tovarning bojxona qiymati.

Tovarning yuk joylari soni.

Konteynyerlar soni.

Konteynyerlar raqamlari.

Qoʻshimcha oʻlchov birligining nomi (kodi).

Qoʻshimcha oʻlchov birligi soni.

Deklaratsiyada koʻrsatilgan hujjatlar toʻgʻrisida maʼlumot:

deklaratsiyada koʻrsatilgan hujjatlar raqamlari;

deklaratsiyada koʻrsatilgan hujjatlarning tuzilishi sanasi.

Transport vositasi/konteynerning raqami (joʻnatishda).

Transport vositasi/konteynerining raqami (chegarada).

Transport vositasi turi (chegarada).

Tovarlarni yetkazib berish shartlari nomi.

Tovarni yetkazib berish joyining geografik nomi.

*Tomonlar davlatlari milliy qonunchiligi talablariga muvofiq Tomonlar davlatlari bojxona organlari axborot tizimlarida shunday maʼlumotlar mavjud boʻlgan taqdirda.