Oʻzini oʻzi band qilgan fuqarolar uchun vaqtinchalik mehnat guvohnomasini joriy etish toʻgʻrisida (566-son)

09.07.2019

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “2019-yilda aholi bandligini taʼminlash va yangi ish oʻrinlarini tashkil etish boʻyicha davlat buyurtmasi toʻgʻrisida” 2019-yil 5-martdagi PQ-4227-son qarorini ijro etish yuzasidan, shuningdek, oʻzini oʻzi band qilish hisobiga oʻzini mehnat daromadi bilan taʼminlaydigan shaxslarning mehnat faoliyatini tartibga solish maqsadida Vazirlar Mahkamasi qaror qiladi:

1. 2019-yil 1-sentabrdan boshlab oʻzini oʻzi band qilgan fuqarolarga vaqtinchalik mehnat guvohnomalari, ularning egalariga mehnat stajini hisobga olish va ragʻbatlantiruvchi imtiyozlardan foydalanish huquqi berilishini nazarda tutadigan tartib joriy qilinsin.

2. Quyidagilar:

Oʻzini oʻzi band qilgan fuqarolarga vaqtinchalik mehnat guvohnomasi berish tartibi toʻgʻrisidagi nizom 1-ilovaga muvofiq;

oʻzini oʻzi band qilgan fuqarolarga vaqtinchalik mehnat guvohnomasini berish sxemasi 2-ilovaga muvofiq;

oʻzini oʻzi band qilgan fuqarolarga vaqtinchalik mehnat guvohnomalari beriladigan faoliyat (xizmatlar, ishlar) turlari roʻyxati 3-ilovaga muvofiq tasdiqlansin.

3. Belgilab qoʻyilsinki:

mehnat daromadi olishga yoʻnaltirilgan jismoniy va yuridik shaxslarga xizmatlar koʻrsatish, ishlarni bajarish boʻyicha shaxsiy mehnati bilan ishtirok etishga asoslangan faoliyatni mustaqil amalga oshiradigan, yakka tartibdagi tadbirkor sifatida roʻyxatga olinmagan va oʻz faoliyatida yollanma xodimlar mehnatidan foydalanmaydigan jismoniy shaxslar mehnat stajini hisobga olish va ragʻbatlantiruvchi imtiyozlardan foydalanish huquqi bilan vaqtinchalik mehnat guvohnomalari (keyingi oʻrinlarda mehnat guvohnomalari deb ataladi) beriladigan oʻzini oʻzi band qilgan fuqarolar hisoblanadi;

oʻzini oʻzi band qilgan fuqarolarga mehnat guvohnomasi mehnat organlari tomonidan ularning doimiy yashash joyidan qatʼi nazar (eksterritoriallik prinsipi boʻyicha) pulli asosida beriladi, ushbu toʻlovlarni undirishdan tushgan tushumlarning bir qismi oʻzini oʻzi band qilganlarning pensiya sugʻurtasini taʼminlashga maqsadli yoʻnaltiriladi;

vaqtinchalik mehnat guvohnomalari berilgan sanadan boshlab va ular amal qilishining butun davri pensiyani hisoblab chiqarish uchun fuqarolarning mehnat stajiga hisoblanadi;

tashkilotlar tomonidan oʻzini oʻzi band qilgan maqomiga ega boʻlgan fuqarolarni shartnoma asosida xizmatlar koʻrsatish va ishlarni bajarish boʻyicha faoliyatga jalb qilishga yoʻl qoʻyiladi. Bunda koʻrsatib oʻtilgan fuqarolar mehnatiga haq toʻlash yagona ijtimoiy toʻlovni hisoblab chiqish obyekti hisoblanmaydi;

vaqtinchalik mehnat guvohnomalari berilganligi uchun toʻlov undirishdan tushgan mablagʻlarning 60 foizi Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasiga — oʻzini oʻzi band qilgan fuqaro tomonidan yagona ijtimoiy toʻlovni toʻlash hisobiga, 20 foizi Oʻzbekiston Respublikasi Bandlik va mehnat munosabatlari vazirligi huzuridagi Bandlikka koʻmaklashish davlat jamgʻarmasiga (keyingi oʻrinlarda Bandlikka koʻmaklashish davlat jamgʻarmasi deb ataladi) va 20 foizi tumanlar (shaharlar) budjetlariga yoʻnaltiriladi;

vaqtinchalik mehnat guvohnomasi amal qiladigan davrda oʻzini oʻzi band qilgan fuqaro Bandlikka koʻmaklashish davlat jamgʻarmasi mablagʻlari hisobiga ishsizga toʻlanadigan ishsizlik boʻyicha nafaqani va kasbga oʻqish davrida stipendiyani ololmaydi.

4. Oʻzbekiston Respublikasi Bandlik va mehnat munosabatlari vazirligi uch oy muddatda:

Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi bilan birgalikda Bandlikka koʻmaklashish davlat jamgʻarmasi mablagʻlari hisobiga mehnat guvohnomalarini olish uchun onlayn-maydonchani ishlab chiqsin va amaliyotga tatbiq etsin, uni Oʻzbekiston Respublikasi Prezidentining “2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini “Faol investitsiyalar va ijtimoiy rivojlanish yili”da amalga oshirishga oid Davlat dasturi toʻgʻrisida” 2019-yil 17-yanvardagi PF-5635-son Farmoniga muvofiq joriy etiladigan “Yagona mehnat milliy tizimi” axborot tizimiga integratsiyalashni nazarda tutsin;

Oʻzbekiston Respublikasi Ichki ishlar vazirligi bilan birgalikda Vaqtinchalik bir martalik ish bilan taʼminlash byurolari faoliyatini tanqidiy tahlil qilsin hamda ularning negizida oʻzini oʻzi band qilgan fuqarolar va ularning xizmatlari (ishlari) potensial buyurtmachilari oʻrtasida shartnoma tuzish uchun samarali faoliyat koʻrsatadigan maydonchalar tashkil etish orqali ular ish usullarini tubdan qayta koʻrib chiqish va natijadorligini oshirish yuzasidan takliflarni Vazirlar Mahkamasiga kiritsin;

manfaatdor vazirliklar va idoralar bilan birgalikda “Reklama toʻgʻrisida”gi Oʻzbekiston Respublikasi Qonuniga oʻzini oʻzi band qilish tartibida mehnat faoliyati bilan shugʻullanuvchi jismoniy shaxslar ish izlayotgani va taklif etiladigan xizmatlar toʻgʻrisida oʻz reklama eʼlonlarini joylashtirishda mehnat guvohnomasi borligi haqidagi maʼlumotlarni majburiy tartibda koʻrsatishni nazarda tutuvchi tegishli oʻzgartishlar kiritish boʻyicha takliflarni taqdim etsin.

5. Oʻzbekiston Respublikasi Hukumatining 4-ilovaga muvofiq ayrim qarorlariga oʻzgartish va qoʻshimchalar kiritilsin.

6. Oʻzbekiston Milliy teleradiokompaniyasi, Oʻzbekiston Respublikasi Bandlik va mehnat munosabatlari vazirligi, Moliya vazirligi huzuridagi budjetdan tashqari Pensiya jamgʻarmasi, Oʻzbekiston Respublikasi Mahalla va oilani qoʻllab-quvvatlash vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari vaqtinchalik mehnat guvohnomalaridan foydalanishning, shu jumladan, mehnat stajini hisobga olish huquqi bilan rasmiy bandlik maqomini olishning va ragʻbatlantiruvchi imtiyozlar olishning ustun jihatlari haqida aholi orasida keng tushuntirish ishlarini tizimli va doimiy asosda olib borsinlar.

7. Oʻzbekiston Respublikasi Bandlik va mehnat munosabatlari vazirligi manfaatdor vazirliklar va idoralar bilan birgalikda bir oy muddatda:

Oʻzbekiston Respublikasining Maʼmuriy javobgarlik toʻgʻrisidagi kodeksiga tadbirkorlik sohasida huquqbuzarliklar uchun maʼmuriy javobgarlikni nazarda tutuvchi qoʻshimchalar kiritish haqida taklif kiritsin;

ular qabul qilgan normativ-huquqiy hujjatlarni ushbu qarorga muvofiqlashtirsin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — moliya vaziri D.A. Qoʻchqorov va bandlik va mehnat munosabatlari vaziri Sh.D. Kudbiyev zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2019-yil 9-iyul,

566-son

Vazirlar Mahkamasining 2019-yil 9-iyuldagi 566-son qaroriga 1-ILOVA

Oʻzini oʻzi band qilgan fuqarolarga vaqtinchalik mehnat guvohnomasi berish tartibi toʻgʻrisida

NIZOM

1-bob. Umumiy qoidalar

1. Ushbu Nizom oʻzini oʻzi band qilgan fuqarolarga vaqtinchalik mehnat guvohnomasini (keyingi oʻrinlarda vaqtinchalik mehnat guvohnomasi deb ataladi) berish tartibini belgilaydi.

2. Ushbu Nizomning amal qilishi mehnat maqomi Oʻzbekiston Respublikasining normativ-huquqiy hujjatlari bilan belgilangan yakka tartibdagi tadbirkorlar, hunarmandchilik faoliyati subyektlari va dehqon xoʻjaliklari aʼzolariga tatbiq etilmaydi.

3. Ushbu Nizomda quyidagi asosiy tushunchalardan foydalaniladi:

oʻzini oʻzi band qilganlarning maʼlumotlar bazasi (registr) — “Yagona mehnat milliy tizimi” axborot tizimida oʻzini oʻzi band qilganlar sifatida roʻyxatga olingan oʻzini oʻzi band qilganlar toʻgʻrisidagi oʻzaro bogʻliq axborotni saqlash, oʻzgartirish va qayta ishlash uchun moʻljallangan tizimlashtirilgan maʼlumotlar bazasi;

vaqtinchalik mehnat guvohnomasi (keyingi oʻrinlarda mehnat guvohnomasi deb ataladi) — mehnat organi tomonidan beriladigan va fuqaroning oʻzini oʻzi band qilgan fuqaro sifatidagi mehnat maqomini belgilab beradigan, mehnat staji hisobga olinishi va ragʻbatlantiruvchi imtiyozlardan foydalanish huquqini beradigan ushbu Nizomga 1-ilovaga muvofiq shakl boʻyicha hujjat;

ishlar (xizmatlar) buyurtmachilari — oʻzini oʻzi band qilgan fuqarolarni shartnoma shartlariga yoki ish muomalasi odatlariga asoslangan xizmatlar koʻrsatish va ishlarni bajarish boʻyicha faoliyatga jalb qiladigan fuqarolar va yuridik shaxslar (tashkilotlar);

“Yagona mehnat milliy tizimi” axborot tizimi (keyingi oʻrinlarda YaMMT deb ataladi) — Oʻzbekiston Respublikasi Bandlik va mehnat munosabatlari vazirligining mehnat va bandlik masalalari boʻyicha axborotni, shu jumladan, fuqarolarning shaxsga doir maʼlumotlarini birlashtiradigan, shuningdek, boshqa milliy axborot tizimlari va platformalari bilan hamkorlikni taʼminlaydigan axborot tizimi;

oʻzini oʻzi band qilgan fuqarolar — mehnat daromadi olishga yoʻnaltirilgan jismoniy va yuridik shaxslarga xizmatlar koʻrsatish, ishlarni bajarish boʻyicha shaxsiy mehnati bilan ishtirok etishga asoslangan faoliyatini mustaqil amalga oshiradigan, yakka tartibdagi tadbirkorlar sifatida roʻyxatga olinmagan va oʻz faoliyatida yollanma xodimlar mehnatidan foydalanmaydigan, mehnat staji hisobga olinishi va ragʻbatlantiruvchi imtiyozlardan foydalanish huquqi bilan vaqtinchalik mehnat guvohnomalarini belgilangan tartibda rasmiylashtirgan jismoniy shaxslar;

onlayn-maydon — oʻzini oʻzi band qilganlar bilan mehnat organlarining elektron aloqa kanallari orqali oʻzaro hamkorligini taʼminlaydigan tashkiliy, axborot va texnik yechimlarning dasturiy-apparat kompleksi.

4. Mehnat guvohnomasi ariza beruvchining xohishiga koʻra jismoniy shaxsning murojaati asosida 1 oydan 12 oygacha boʻlgan muddatga beriladi.

5. Mehnat guvohnomasi berilgan sanadan boshlab va mehnat guvohnomasida koʻrsatilgan muddatning amal qilishi tamom boʻlgunga qadar butun davrga amal qiladi.

6. Mehnat guvohnomasining amal qilish muddati tamom boʻlgunga qadar oʻzini oʻzi band qilgan fuqaro yangi mehnat guvohnomasi olish uchun takroran murojaat qilishi mumkin, bunda takroriy murojaatlar soni cheklanmagan.

7. Mehnat guvohnomasini berish uchun oʻzini oʻzi band qilgan fuqaro tanlagan amal qilish muddatiga qarab ushbu Nizomga 2-ilovaga muvofiq miqdorlarda haq undiriladi.

8. Mehnat guvohnomasi berilganligi uchun toʻlov ariza beruvchi tomonidan mehnat guvohnomasi olish uchun ariza berilgan vaqtda biryoʻla toʻlanadi.

9. Mehnat guvohnomasini berish toʻgʻrisidagi axborot YaMMTga kiritiladi, oʻzini oʻzi band qilganlar toʻgʻrisida maʼlumotlar bazasi (registr) yaratiladi va parallel ravishda YaMMTda shakllantiriladigan jismoniy shaxsning shaxsiy ishga joylashishi tarixiga integratsiya qilinadi.

10. Mehnat guvohnomasining asl nusxasi oʻzini oʻzi band qilgan fuqaroda u pensiya yoshiga toʻlguniga qadar saqlanadi, nusxasi esa uni bergan mehnat organida saqlanadi.

11. Tashkilotlar tomonidan oʻzini oʻzi band qilgan maqomiga ega fuqarolarni shartnoma asosida xizmatlar koʻrsatish va ishlarni bajarish boʻyicha faoliyatga jalb qilishga yoʻl qoʻyiladi. Bunda oʻzini oʻzi band qilgan fuqarolar mehnatiga haq toʻlash yagona ijtimoiy toʻlovni hisoblab chiqish obyekti hisoblanmaydi.

12. Mehnat organlari bilan Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi hududiy organlari oʻrtasida axborot ayirboshlash elektron raqamli imzo (ERI) majburiy tartibda qoʻllangan holda faqat idoralararo elektron hamkorlik orqali amalga oshiriladi.

13. Mehnat guvohnomalari berilganligi uchun toʻlov undirishdan tushgan mablagʻlarning:

60 foizi Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasiga — oʻzini oʻzi band qilgan fuqaro tomonidan yagona ijtimoiy toʻlovni toʻlash hisobiga;

20 foizi mehnat guvohnomasini berish va ragʻbatlantiruvchi imtiyozlar berish bilan bogʻliq xarajatlarni qoplash uchun Oʻzbekiston Respublikasi Bandlik va mehnat munosabatlari vazirligi huzuridagi Bandlikka koʻmaklashish davlat jamgʻarmasiga (keyingi oʻrinlarda Bandlikka koʻmaklashish davlat jamgʻarmasi deb ataladi);

20 foizi — tegishli ravishda Qoraqalpogʻiston Respublikasi respublika budjetiga, viloyatlar va Toshkent shahri mahalliy budjetlariga yoʻnaltiriladi.

14. Mehnat guvohnomasi amal qiladigan davrda oʻzini oʻzi band qilgan fuqaro Bandlikka koʻmaklashish davlat jamgʻarmasi mablagʻlari hisobiga ishsizga toʻlanadigan ishsizlik boʻyicha nafaqani va kasbga tayyorlash, qayta tayyorlash va malaka oshirish davrida stipendiyani ololmaydi.

15. Mehnat guvohnomalari blankalari Oʻzbekiston Respublikasi Markaziy banki huzuridagi “Davlat belgisi” davlat ishlab chiqarish birlashmasi tomonidan Bandlik va mehnat munosabatlari vazirligining mehnat organlari buyurtmanomalari boʻyicha shakllantiriladigan buyurtmasi boʻyicha Bandlikka koʻmaklashish jamgʻarmasi mablagʻlari hisobiga tayyorlanadi.

16. Oʻzini oʻzi band qilish tartibida mehnat faoliyatini amalga oshirish natijasida olingan daromadlarga jismoniy shaxslardan olinadigan daromad soligʻi tatbiq etilmaydi.

2-bob. Mehnat guvohnomasini berish tartibi

17. Mehnat guvohnomasi mehnat organlari tomonidan fuqarolarning arizasi asosida ushbu Nizomga 3-ilovaga muvofiq shakl boʻyicha beriladi.

Oʻzini oʻzi band qilgan fuqarolarga mehnat guvohnomasi mehnat organlari tomonidan ular doimiy yashash joyidan qatʼi nazar (eksterritoriallik prinsipi boʻyicha) ushbu Nizomda belgilangan tartibda beriladi.

Mehnat guvohnomasini berish uchun ariza oʻzini oʻzi band qilgan fuqaro tomonidan mehnat organiga shaxsan taqdim etilishi, vakili orqali, buyurtma xat bilan yoxud elektron shaklda mehnat guvohnomalarini olish uchun onlayn-maydoncha (keyingi oʻrinlarda onlayn-maydoncha deb ataladi) orqali yuborilishi mumkin.

18. Arizada:

ariza beruvchining familiyasi, ismi va otasining ismi;

pasport seriyasi va raqami;

soliq toʻlovchining identifikatsiya raqami (STIR);

ariza beruvchi mehnat guvohnomasini olishni xohlagan muddat (oylar soni);

oʻzini oʻzi band qilgan fuqarolarga ular boʻyicha vaqtinchalik mehnat guvohnomalari beriladigan tasdiqlangan Faoliyat (xizmatlar, ishlar) turlari roʻyxatidan xizmatlar (ishlar) turlari (ariza beruvchining xohishiga koʻra) koʻrsatiladi;

oʻzini oʻzi band qilish tartibida mehnat faoliyatini yuritishning moʻljallanayotgan joyi (hudud) (ariza beruvchining xohishiga koʻra koʻrsatiladi);

ariza beruvchining pochta manzili, mobil telefon raqami va u bilan bogʻlanish mumkin boʻlgan boshqa maʼlumotlar;

ariza beruvchi olishdan manfaatdor boʻlgan mehnat organi tomonidan taqdim etiladigan imtiyozli xizmat(lar) tur(lar)i koʻrsatiladi (ariza beruvchining xohishiga koʻra koʻrsatiladi).

Arizaga:

ariza beruvchining 3x4 oʻlchamli bitta fotosurati;

mehnat guvohnomasini berish uchun ariza berishda ariza beruvchi tomonidan koʻrsatilgan muddatga mos miqdorda (oylar soni) mehnat guvohnomasi berilganligi uchun belgilangan toʻlov toʻlanganligini tasdiqlovchi toʻlov hujjatining nusxasi ilova qilinadi.

19. Oʻzini oʻzi band qilgan fuqaro onlayn-maydoncha orqali ariza bergan boʻlsa, uni tasdiqlash oʻz mobil aloqa vositasiga qisqa xabar (keyingi oʻrinlarda SMS-xabar deb ataladi) olish orqali olingan tegishli kodni kiritish yoʻli bilan tasdiqlanadi.

Bunda arizaga quyidagi fayllar biriktiriladi:

ariza beruvchining 3x4 oʻlchamli fotosuratlari;

ariza beruvchi mehnat guvohnomasini olishni xohlagan muddatga (oylar soniga) muvofiq miqdorda mehnat guvohnomasi berilganligi uchun belgilangan toʻlov toʻlanganligini tasdiqlovchi skanerlangan toʻlov hujjati. Toʻlovni onlayn-maydoncha orqali amalga oshirishga yoʻl qoʻyiladi.

20. Mehnat organi uch kun muddatda arizani koʻrib chiqadi va ariza beruvchini SMS-xabar, yozma murojaat, telefon yoki faks orqali quyidagilar haqida ogohlantiradi:

mehnat guvohnomasini berish toʻgʻrisida qaror qabul qilishda — mehnat guvohnomasi beriladigan sana va vaqt toʻgʻrisida;

mehnat guvohnomasi berishni rad etish toʻgʻrisida qaror qabul qilinganda — rad etish sababi toʻgʻrisida.

Ariza berishda (fotosurat biriktirilgan holda) va onlayn-maydoncha orqali toʻlovni amalga oshirishda mehnat organi ariza beruvchini mehnat guvohnomasi beriladigan sana va joy toʻgʻrisida avtomatik ravishda xabardor qiladi.

21. Mehnat guvohnomasini berishni rad etish toʻgʻrisidagi qaror quyidagi hollarda qabul qilinishi mumkin:

arizada koʻrsatilgan ishonchsiz yoki toʻliq boʻlmagan maʼlumotlar aniqlanganda;

arizada koʻrsatilgan faoliyat turining oʻzini oʻzi band qilgan fuqarolarga ular boʻyicha vaqtinchalik mehnat guvohnomalari beriladigan tasdiqlangan Faoliyat (xizmatlar, ishlar) turlari roʻyxatiga muvofiq emasligi;

mehnat guvohnomasi berish uchun ariza berilganda ariza beruvchi tomonidan koʻrsatilgan muddatga (oylar soniga) muvofiq miqdorda mehnat guvohnomasi berilganligi uchun belgilangan toʻlov toʻlanganligini tasdiqlaydigan toʻlov hujjati nusxasining, yoxud pul mablagʻlari tushganligining tasdigʻi mavjud emasligi.

Tuzatilishi mumkin boʻlgan xatolar aniqlanishi oqibatida mehnat guvohnomasini berish rad etilgan taqdirda, ariza beruvchiga uch ish kuni mobaynida tegishli tuzatishlarni amalga oshirish imkoniyati beriladi.

Mehnat guvohnomasini berish uzil-kesil rad etilganda mehnat guvohnomasini berish uchun toʻlangan pul mablagʻlari tegishli qaror qabul qilingan paytdan boshlab oʻn ish kuni mobaynida ariza beruvchi tomonidan koʻrsatilgan hisob raqamiga qaytarilishi kerak.

22. Yoʻqotilgan yoki yaroqsiz holga kelib qolgan mehnat guvohnomasi oʻrniga oʻzini oʻzi band qiluvchining mehnat organiga bergan arizasi boʻyicha mehnat guvohnomasining dublikati berilishi mumkin. Bunda mehnat guvohnomasi dublikati tayyorlanganligi uchun belgilangan bazaviy hisob-kitob miqdorining oʻn foizi miqdorida xarajatlarni qoplash uchun toʻlov undiriladi.

3-bob. Oʻzini oʻzi band qilganlar va ularning xizmatlaridan (ishlaridan) foydalanuvchilar oʻrtasidagi fuqarolik- huquqiy munosabatlar

23. Oʻzini oʻzi band qilgan fuqarolar va ularni xizmatlar koʻrsatish hamda ishlarni bajarish boʻyicha faoliyatga jalb qiluvchi tashkilotlar (keyingi oʻrinlarda xizmatlar va ishlar buyurtmachilari deb ataladi) oʻrtasidagi fuqarolik-huquqiy munosabatlar shartnoma shartlariga yoki ish muomalasi odatlariga asoslanadi.

24. Oʻzini oʻzi band qilgan fuqaro bilan xizmatlar va ishlar buyurtmachisi oʻrtasidagi:

ish muomalasi odatlariga asoslangan oʻzaro munosabatlarda — ogʻzaki shaklda bitim (shartnoma) tuzishga yoʻl qoʻyiladi;

shartnoma shartlariga asoslangan oʻzaro munosabatlarda — yozma shaklda shartnoma tuzish talab etiladi.

25. Bitim (shartnoma) tuzishda tomonlar uning shartlarini, shu jumladan, undan kelib chiqadigan majburiyatlarni bajarish va uni tugatish shartlarini mustaqil belgilab oladilar.

26. Bitim (shartnoma) ishtirokchilari uning tomonlari hisoblanadilar, majburiyatlar qabul qiladilar va Oʻzbekiston Respublikasi Fuqarolik kodeksiga muvofiq javob beradilar.

27. Bitimni (shartnomani) bajarish bilan bogʻliq nizolar tomonlarning oʻzaro roziligi bilan yoki sud tartibida hal etiladi.

4-bob. Mehnat guvohnomasini rasmiylashtirgan oʻzini oʻzi band qilgan fuqarolarga ragʻbatlantiruvchi imtiyozlar berish tartibi

1-§. Mehnat guvohnomasining amal qilish davrini mehnat stajida hisobga olish

28. Mehnat guvohnomasida koʻrsatilgan oʻzini oʻzi band qilish tartibidagi mehnat faoliyatini amalga oshirish davri “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonuniga muvofiq pensiya olish huquqiga ega boʻlingan paytdan boshlab yoshga doir, nogironlik va boquvchisini yoʻqotganlik pensiyasini hisoblash uchun qabul qilinadigan ish stajiga hisoblanadi.

29. Mehnat guvohnomasi berilgan sana pensiya tayinlash uchun mehnat stajiga yoziladigan davrning birinchi kuni, mehnat guvohnomasida koʻrsatilgan amal qilish muddati tugaydigan sana ushbu davrning oxirgi kuni hisoblanadi.

30. Oʻzini oʻzi band qilish tartibida mehnat faoliyati amalga oshirilishi davrlarini tasdiqlash uchun Pensiya jamgʻarmasining tegishli boʻlimi uch kun muddatda oʻzini oʻzi band qiluvchining roʻyxatdan oʻtkazilganligi toʻgʻrisidagi maʼlumotlarni YaMMTdan soʻraydi va oladi.

31. YaMMTda jamlanadigan, oʻzini oʻzi band qilgan fuqaroning maʼlumotlar bazasidan (registridan) va jismoniy shaxsni ishga joylashtirish shaxsiy tarixidan olingan maʼlumotlar ham oʻzini oʻzi band qilish tartibida ishga joylashishning tegishli davrini pensiya hisoblab chiqarish uchun jismoniy shaxsning mehnat stajida hisobga olish uchun asos hisoblanadi. Bunda berilgan mehnat guvohnomalarini taqdim etish orqali bu maʼlumotlarni tasdiqlash talab etilmaydi.

32. Mehnat guvohnomasining amal qilish davri bu davrda oʻzini oʻzi band qilish tartibida mehnat faoliyati amalda bajarilganligi yoki bajarilmaganligidan qatʼi nazar pensiyani hisoblab chiqarish uchun mehnat stajiga hisoblanadi.

33. Oʻzini oʻzi band qilganlarga pensiya Oʻzbekiston Respublikasi Vazirlar Mahkamasining 2011-yil 8-sentabrdagi 252-son qarori bilan tasdiqlangan Davlat pensiyalarini tayinlash va toʻlash tartibi toʻgʻrisidagi nizomda belgilangan tartibda tayinlanadi.

2-§. Mehnat guvohnomalarini rasmiylashtirgan oʻzini oʻzi band qilgan fuqarolarga Bandlikka koʻmaklashish davlat jamgʻarmasi mablagʻlaridan imtiyozli mikrokreditlar berish

34. Tijorat banklari tomonidan oʻzini oʻzi band qilgan fuqarolarga Bandlikka koʻmaklashish davlat jamgʻarmasi mablagʻlari hisobiga imtiyozli mikrokreditlar Oʻzbekiston Respublikasi Prezidentining “Aholi bandligini taʼminlash borasidagi ishlarni takomillashtirish va samaradorligini oshirish chora-tadbirlari toʻgʻrisida” 2018-yil 14-iyuldagi PQ-3856-son qarorida va boshqa qonun hujjatlarida belgilangan tartibda ajratiladi.

35. Mehnat organlari kamida olti oy amal qiladigan muddatga mehnat guvohnomasini rasmiylashtirgan oʻzini oʻzi band qilgan fuqarolarga imtiyozli mikrokreditlar ajratish uchun tijorat banklariga tavsiyalar beradilar.

36. Oʻzini oʻzi band qilganlarga imtiyozli mikrokredit bozor iqtisodiyoti prinsiplaridan kelib chiqib, texnik-iqtisodiy asoslarni va kreditni qaytarish salohiyatini hisobga olib, oʻzini oʻzi band qilgan fuqarolarga vaqtinchalik mehnat guvohnomalari berish uchun tasdiqlangan Faoliyat (xizmatlar, ishlar) turlari roʻyxatida nazarda tutilgan faoliyat (ishlar, xizmatlar) tur(lar)ini amalga oshirish va rivojlantirish maqsadlarida ajratiladi.

37. Oʻzini oʻzi band qilganlarga mikrokreditlar mehnat guvohnomasi amal qiladigan davrda ajratiladi.

3-§. Oʻzini oʻzi band qilganlarni oʻqitishni tashkil etish

38. Mehnat guvohnomasini rasmiylashtirgan oʻzini oʻzi band qilgan fuqarolar ishsizlar va band boʻlmagan shaxslarni kasbga oʻqitish markazlarida, kasb-hunar kollejlarida hamda Oʻzbekiston Respublikasi Bandlik va mehnat munosabatlari vazirligi huzuridagi “Ishga marhamat” band boʻlmagan aholiga xizmat koʻrsatish monomarkazida, boshqa kasbga oʻqitish markazlarida, shu jumladan, nodavlat kasbga oʻqitish markazlarida (keyingi oʻrinlarda kasbga oʻqitish markazlari deb ataladi) uch oygacha davom etadigan qisqa muddatli kasbga oʻqitish, qayta oʻqitish va malaka oshirish, shuningdek, tadbirkorlik koʻnikmalarini oʻrgatish kurslarida (keyingi oʻrinlarda kasbga oʻqitish deb ataladi) bepul oʻqitiladi.

39. Kasbga oʻqitish markazlarida oʻzini oʻzi band qilganlarni kasbga oʻqitishni tashkil etish va oʻqitish uchun xarajatlar Bandlikka koʻmaklashish jamgʻarmasi mablagʻlari hisobiga moliyalashtiriladi.

40. Oʻzini oʻzi band qilgan fuqaro oʻqishdan oʻtish uchun oldin mehnat guvohnomasini bergan mehnat organiga oʻqish yoʻnalishini va oʻqish boshlanadigan taxminiy sanani koʻrsatgan holda murojaat qiladi.

41. Mehnat organi oʻzini oʻzi band qilgan fuqaroning murojaati asosida tegishli oʻqitish dasturlarini tanlaydi va zarur dasturlar boʻlganda oʻzini oʻzi band qilgan fuqaroga tegishli kasbga oʻqitish markaziga yoʻllanma beradi.

42. Oʻzini oʻzi band qilgan fuqaro(lar)ni oʻz(lar)i tanlagan yoʻnalish(lar) va muddatlar boʻyicha kasbga oʻqitish markaziga kasbga oʻqitish uchun yuborish imkoniyati boʻlmaganda mehnat organi kasbga oʻqitish markazlarida oʻqitishning tegishli yoʻnalishlari boʻyicha oʻquv guruhlari tashkil etish uchun buyurtmanomani shakllantiradi.

4-§. Oʻzini oʻzi band qilganlarni jamoat ishlariga jalb qilish va mehnat qurollarini ijaraga berish

43. Oʻzini oʻzi band qilgan fuqaro oʻz xohishiga koʻra jamoat ishlariga belgilangan tartibda jalb qilinishi mumkin.

44. Mehnat organlari oʻzini oʻzi band qilganlarga mehnat qurollarini (motokultivatorlar, oʻt oʻrish oʻroq mashinalari, perforatorlar, payvandlash apparatlari, oʻsimliklarga ishlov berish qurilmalari, duradgorlik, chilangarlik va qurilish uskunalari va hokazolarni), shaxsiy himoya vositalarini va ish kiyimini imtiyozli asosda berish punktlarini tashkil etadi.

45. Oʻzini oʻzi band qilganlarga imtiyozli asosida berish uchun mehnat qurollari va shaxsiy himoya vositalari Bandlik va mehnat munosabatlari vazirligi huzuridagi Jamoat ishlari jamgʻarmasi mablagʻlari hisobiga xarid qilinadi.

5-bob. Yakunlovchi qoidalar

46. Vaqtinchalik mehnat guvohnomalari butun Oʻzbekiston Respublikasi hududida amal qiladi.

47. Vaqtinchalik mehnat guvohnomasi amal qiladigan davrda oʻzini oʻzi band qilgan fuqaro mehnat shartnomasida koʻrsatilgan faoliyat (xizmatlar, ishlar) tur(lar)idan tashqari oʻzini oʻzi band qilgan fuqarolarga ular boʻyicha vaqtinchalik mehnat guvohnomalari beriladigan tasdiqlangan Faoliyat (xizmatlar, ishlar) turlari roʻyxatiga kiritilgan istalgan boshqa faoliyat (xizmatlar, ishlar) turlarini amalga oshirishga haqlidir.

48. Oʻzini oʻzi band qilganlar tomonidan kimyoviy va oson portlaydigan moddalarni qoʻllashni talab qiladigan xizmatlar (ishlar) bajarilishiga yoʻl qoʻyilmaydi.

49. Oʻzini oʻzi band qilish tartibida ishlarni bajaruvchi shaxslar bilan yoki ular ishtirokida yuz bergan baxtsiz hodisalar va sogʻliqqa yetkazilgan boshqa zararlar “Mehnatni muhofaza qilish toʻgʻrisida”gi Oʻzbekiston Respublikasi Qonuniga muvofiq tekshirilishi va hisobga olinishi lozim.

50. Buyurtmachi — yuridik shaxs oʻzini oʻzi band qilgan shaxsga mehnat faoliyatini amalga oshirish uchun mehnatga doir qonun hujjatlarida nazarda tutilgan tartibda xavfsiz shart-sharoitlarni taʼminlashi shart.

51. Oʻzini oʻzi band qilgan fuqaro sifatida roʻyxatga olishni va mehnat guvohnomasi berishni rad qilish bilan bogʻliq yuzaga keladigan nizolar qonun hujjatlarida belgilangan tartibda hal etiladi.

52. Ushbu Nizom talablari buzilishida aybdor boʻlgan shaxslar qonun hujjatlariga muvofiq javob beradilar.

Oʻzini oʻzi band qilgan fuqarolarga vaqtinchalik mehnat guvohnomasi berish tartibi toʻgʻrisidagi nizomga 1-ILOVA

NAMUNA

Oʻzini oʻzi band qilgan fuqaroning vaqtinchalik mehnat guvohnomasi

Oʻzini oʻzi band qilgan fuqaroning vaqtinchalik mehnat guvohnomasi tavsifi

Guvohnoma oʻlchami 102 mm x 62 mm boʻlgan, zichligi bir kvadrat metrga 140+/-5 grammli toʻgʻri burchakli 100 foiz paxtadan yasalgan maxsus qogʻozda* tayyorlanadi. Qogʻoz qatlami orasiga joylashgan, ultrabinafsha nurda koʻrinadigan koʻk va och yashil rangli tola hamda nurda yaxshi ajralib turadigan “paxta chanogʻi” koʻrinishidagi umumiy “suv belgi”si mavjud.

Ofsetli yozuv, hudud kodi, seriyasi ikki harfli, tartib raqami olti sonli.

Blanka quyidagi maxsus himoyalarga ega:

kimyoviy taʼsirga bardoshli matbaa boʻyogʻidan foydalanilgan, yuza qismidagi kataklarda nusxa olishga va skaner qilishga qarshi ingichka chiziqlar mavjud. Bir rangdan boshqa rangga rasm chiziqlari buzilmasdan ohista qoʻshilib ketishi taʼminlangan. Juda kattalashtirilganda ultrabinafsha nurda koʻrinmaydigan mikromatn koʻrinadi. Maxsus qabariq va oʻyiqlar mavjud.

Lotin alifbosida davlat tilida yozilgan matndan foydalaniladi.

Guvohnomadagi yozuvlar guvohnomani bergan Maxsus xizmatlar markazining mansabdor shaxsi tomonidan amalga oshiriladi hamda uning imzosi va maxsus shtampi bilan tasdiqlanadi.

Guvohnoma pasport yoki shaxsni tasdiqlovchi boshqa hujjat koʻrsatilganda haqiqiydir.

* Ariza beruvchining xohishiga koʻra va texnik imkoniyatlar boʻlganda belgilangan namunadagi guvohnoma xalqaro standartlar tavsiyalari asosida oʻlchami 102 mm x 62 mm boʻlgan plastikdan tayyorlanishi mumkin. Guvohnomaning rangi — oq. Lotin alifbosidagi davlat tilidan foydalaniladi.

Oʻzini oʻzi band qilgan fuqarolarga vaqtinchalik mehnat guvohnomasi berish tartibi toʻgʻrisidagi nizomga 2-ILOVA

Oʻzini oʻzi band qilgan fuqarolarga vaqtinchalik mehnat guvohnomasi berilganligi uchun undiriladigan

TOʻLOV MIQDORLARI

Vaqtinchalik mehnat guvohnomasi quyidagi muddatga beriladi (oylar) Toʻlov miqdori (bazaviy hisoblash miqdori baravari) 1 0,5 3 1,4 6 2,6 9 3,7 12 4,5

Oʻzini oʻzi band qilgan fuqarolarga vaqtinchalik mehnat guvohnomasi berish tartibi toʻgʻrisidagi nizomga 3-ILOVA

Vazirlar Mahkamasining 2019-yil 9-iyuldagi 566-son qaroriga 2-ILOVA

Oʻzini oʻzi band qilgan fuqarolarga vaqtinchalik mehnat guvohnomasini berish

SXEMASI

Bosqichlar Subyekt Tadbirlar Ijro muddati 1-bosqich Oʻzini oʻzi band qilgan fuqaro Oʻzini oʻzi band qilgan fuqaroning vaqtinchalik mehnat guvohnomasini olish uchun tegishli mehnat organiga 3x4 oʻlchamli fotosuratni ilova qilgan holda ariza (qogʻoz yoki elektron shaklda) beradi. Ariza beruvchining xohishiga koʻra 2-bosqich Mehnat organi 1. Arizada koʻrsatilgan maʼlumotlarning toʻliqligini tekshiradi. 2. “Yagona mehnat milliy tizimi” axborot tizimiga maʼlumotlarni kiritadi va arizani roʻyxatga oladi. 3. Ariza beruvchiga: guvohnoma berish toʻgʻrisida qaror qabul qilinganda — guvohnoma beriladigan sana va joy; guvohnoma berishni rad etish toʻgʻrisida qaror qabul qilinganda — rad etish sababi toʻgʻrisida sms-xabar yuboradi. Ariza tushganidan keyin 3 ish kuni mobaynida 3-bosqich Oʻzini oʻzi band qilgan fuqaro 1. Pasportning raqami va seriyasini hamda STIRni koʻrsatgan holda belgilangan miqdorda toʻlov toʻlaydi. 2. Mehnat organida shaxsan oʻzi yoki vakili orqali oʻzini oʻzi band qilgan fuqaroning rasmiylashtirilgan vaqtinchalik mehnat guvohnomasini oladi. Ariza berilgan sanadan boshlab 3 ish kuni mobaynida

Vazirlar Mahkamasining 2019-yil 9-iyuldagi 566-son qaroriga 3-ILOVA

Oʻzini oʻzi band qilgan fuqarolarga vaqtinchalik mehnat guvohnomalari beriladigan faoliyat (xizmatlar, ishlar) turlari

ROʻYXATI

T/r Faoliyat (xizmatlar, ishlar) turining nomi Faoliyat (xizmatlar, ishlar) turi kodi* 1. Uyda repetitorlik qilish — bolalar va kattalar bilan taʼlim fanlari boʻyicha yakka tartibda va guruh boʻlib mashgʻulotlar oʻtkazish OʼOʼB — 1.1.1 2. Bolalarga qarab turish va ularni parvarish qilish boʻyicha jismoniy shaxslarga koʻrsatiladigan xizmatlar OʼOʼB — 1.1.2 3. Bemorlar va oʻzgalar parvarishiga muhtoj keksa shaxslarga qarab turish va ularni parvarish qilish boʻyicha jismoniy shaxslarga koʻrsatiladigan xizmatlar OʼOʼB — 1.1.3 4. Uy xoʻjaligini yuritish va uy ishlarini bajarish, shu jumladan, turar joylarni tozalash, ovqat pishirish boʻyicha uy xoʻjaliklariga xizmat koʻrsatish OʼOʼB — 1.1.4 5. Xizmat binolarini tozalash, yuridik shaxs hududini obodonlashtirish va koʻkalamzorlashtirish OʼOʼB — 2.1.1 6. Uyda mebellarni taʼmirlash va yigʻish OʼOʼB — 1.1.5 7. Murakkab boʻlmagan umumiy qurilish, taʼmirlash-qurilish ishlari (beton quyish, boʻyoqchilik, suvoqchilik, gʻisht va kafel terish, perforatsiya, duradgorlik, chilangarlik va boshqa umumiy qurilish ishlari) OʼOʼB — 1.2.1 8. Santexnika uskunasini mayda taʼmirlash va oʻrnatish OʼOʼB — 1.2.2 9. Kvartira ichida (shaxsiy qurilish ishlarida — uy ichida) elektr montaj ishlari (elektr xavfsizligi boʻyicha ruxsat boʻlganda) OʼOʼB — 1.2.3 10. Dehqon va fuqarolarning tomorqa uchastkalarida yer chopish va rekultivatsiya ishlari OʼOʼB — 1.3.1 11. Fermer xoʻjaliklari egalari buyurtmasi boʻyicha qishloq xoʻjaligi ishlari (qishloq xoʻjaligi oʻsimliklari va hayvonlarga qarab turish, qishloq xoʻjaligi ekinlarini yigʻish va boshqa qishloq xoʻjaligi ishlari) OʼOʼB — 1.3.2 12. Fuqarolarning dala-hovli va tomorqa uchastkalari landshaftini tuzish ishlari OʼOʼB — 1.3.3 13. Qishloq xoʻjaligi oʻsimliklarini ekish va parvarish qilishda, qishloq xoʻjaligi ekinlari hosilini yigʻib olishda dehqon va tomorqa uchastkalari egalariga yordam berish OʼOʼB — 1.3.4 14. Chorva mollarini oʻtlatish, ularga qarab turish OʼOʼB — 1.3.5 15. Kompyutyerlarni taʼmirlash va sozlash, litsenziyalangan dasturiy taʼminot oʻrnatish, saytlarni, kompyuter di�aynini ishlab chiqish, tizim maʼmuri xizmatlari OʼOʼB — 1.4.1 16. Buyurtmachining uyida bajariladigan maishiy texnikani taʼmirlash OʼOʼB — 1.4.2 17. Avtomobillarni mayda taʼmirlash OʼOʼB — 1.4.3 18. Avtomobil yuvish, avtomobillar kuzovlarini silliqlash OʼOʼB — 1.4.4 19. Mexanizatsiya vositalarini qoʻllamay bajariladigan yuk ortish-yuk tushirish ishlari OʼOʼB — 1.5.1 20. Makulatura, plastik idish, temir-tersak va qoʻshimcha xomashyo toʻplash OʼOʼB — 1.5.2 21. Xalq tabobati (litsenziyasi boʻlganda) OʼOʼB — 1.6.1 22. Bosh xizmatkor va konsyerj xizmatlarini koʻrsatish OʼOʼB — 1.7.1 23. Tovarlarni yetkazib berish, ekspeditorlik xizmatlari koʻrsatish, shu jumladan, shaxsiy transportdan foydalanib yetkazib berish (yuk tashish bundan mustasno) OʼOʼB — 1.8.1 24. Xizmat binolarini tozalash, yuridik shaxs hududini obodonlashtirish va koʻkalamzorlashtirish OʼOʼB — 2.1.1 25. Gid (gid-tarjimon), ekskursiya yetakchisi va yoʻriqchi-yoʻl boshlovchilarning xizmatlari‎

* Faoliyat (xizmatlar, ishlar) turi kodi oʻzini oʻzi band qilgan fuqaroning vaqtinchalik mehnat guvohnomasida koʻrsatiladi.

Vazirlar Mahkamasining 2019-yil 9-iyuldagi 566-son qaroriga 4-ILOVA

Oʻzbekiston Respublikasi Hukumatining ayrim qarorlariga kiritilayotgan oʻzgartish va qoʻshimchalar

1. Vazirlar Mahkamasining 2010-yil 19-fevraldagi 30-son qarori bilan tasdiqlangan Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi toʻgʻrisidagi nizomning 10-bandi “b” kichik bandida:

a) quyidagi mazmundagi sakkizinchi xatboshi qoʻshilsin:

“oʻzini oʻzi band qilgan fuqarolar uchun vaqtinchalik mehnat guvohnomalari berilganligi uchun olingan mablagʻlarning 60 foizi”;

b) sakkizinchi xatboshi tegishli ravishda toʻqqizinchi xatboshi deb hisoblansin.

2. Vazirlar Mahkamasining 2011-yil 8-sentabrdagi 252-son qarori bilan tasdiqlangan Davlat pensiyalarini tayinlash va toʻlash tartibi toʻgʻrisidagi nizomning 12-bandiga quyidagi mazmundagi kichik band qoʻshilsin:

“r) oʻzini oʻzi band qilgan fuqarolar uchun vaqtinchalik mehnat guvohnomasining asli yoki dublikati”.

3. Vazirlar Mahkamasining “Ishga joylashtirishga muhtoj aholi sonini aniqlash, shu jumladan, uy xoʻjaliklarini mehnat bilan bandlik masalalari boʻyicha oʻrganishlar oʻtkazish, shuningdek, mehnat resurslari, bandlik va aholini ishga joylashtirish balansini shakllantirish metodikasini takomillashtirish toʻgʻrisida” 2017-yil 22-dekabrdagi 1011-son qarorida:

a) 2-ilovaning 4-pozitsiyasi “Maʼlumotlar mazmuni” ustuniga quyidagi mazmundagi xatboshi qoʻshilsin:

“oʻzini oʻzi band qilgan fuqarolar uchun amaldagi vaqtinchalik mehnat guvohnomasiga ega boʻlgan fuqarolarining oʻrtacha yillik soni”;

b) 4-ilova 9-bandining toʻrtinchi xatboshiga “dehqon xoʻjaligi aʼzolari” soʻzlaridan keyin “oʻzini oʻzi band qilgan fuqarolar uchun vaqtinchalik mehnat guvohnomasiga ega boʻlgan fuqarolar” soʻzlari qoʻshilsin.

4. Vazirlar Mahkamasining “Oʻzbekiston Respublikasi Bandlik va mehnat munosabatlari vazirligi faoliyatini takomillashtirish chora-tadbirlari toʻgʻrisida” 2018-yil 31-dekabrdagi 1066-son qarorida (Oʻzbekiston Respublikasi QT, 2018-y., 12-son, 320-modda):

a) 1-ilovaning 10-bandi 2-kichik bandiga quyidagi mazmundagi xatboshi qoʻshilsin:

“oʻzini oʻzi band qilish tartibida mehnat faoliyatini amalga oshirishda fuqarolarga koʻmaklashadi, ularning roʻyxatga olinishini va ularga vaqtinchalik mehnat guvohnomalari berilishini belgilangan tartibda taʼminlaydi, oʻzini oʻzi band qilgan fuqarolarga ragʻbatlantiruvchi imtiyozlar berish choralarini koʻradi”;

b) 2-ilovada:

6-bandning yettinchi xatboshi quyidagi tahrirda bayon qilinsin:

“qonun hujjatlarida belgilangan tartibda mehnat daftarchalari blankalarini realizatsiya qilishdan va oʻzini oʻzi band qilgan fuqarolarga vaqtinchalik mehnat guvohnomalari berishdan tushgan daromadlar”;

8-bandda:

quyidagi mazmundagi oʻttiz toʻrtinchi xatboshi qoʻshilsin:

“oʻzini oʻzi band qilgan fuqarolar uchun vaqtinchalik mehnat guvohnomasini olgan fuqarolarga ragʻbatlantiruvchi imtiyozlar berish”;

oʻttiz toʻrtinchi xatboshi oʻttiz beshinchi xatboshi deb hisoblansin.