Oʻzbekiston Respublikasining Ustyurt mintaqasidagi Jel konini Mahsulot taqsimotiga oid bitim shartlari asosida oʻzlashtirish toʻgʻrisida (PQ-4376-son)
29.06.2019
Oʻzbekiston Respublikasi Prezidentining
Qarori
[Koʻchirma]
Oʻzbekiston Respublikasi Prezidentining 2018-yil 3-noyabrdagi “Oʻzbekiston Respublikasi va Rossiya Federatsiyasi oʻrtasidagi ikki tomonlama strategik hamkorlik va ittifoqchilik munosabatlarini yanada kengaytirish chora-tadbirlari toʻgʻrisida”gi PQ-3997-son qaroriga muvofiq, shuningdek Oʻzbekiston Respublikasining Ustyurt mintaqasidagi Jel konini oʻzlashtirishga toʻgʻridan-toʻgʻri xorijiy investitsiyalarni jalb qilish orqali uglevodorod xomashyosini qazib olish va eksport qilish hajmlarini yanada oshirish maqsadida:
1. Quyidagilar:
“Oʻzbekneftgaz” MXK va “Gazprom” OAJ (Rossiya Federatsiyasi) oʻrtasida 2006-yil 25-yanvarda imzolangan Oʻzbekiston Respublikasining Ustyurt mintaqasi investitsion bloklarida yer qaʼrini geologik jihatdan oʻrganishning asosiy prinsiplari toʻgʻrisidagi Bitim doirasida 2006 — 2009-yillarda Ustyurt mintaqasida geologiya-qidiruv ishlari olib borilib, “Gazprom” OAJning 371,0 mln AQSH dollari miqdorida toʻgʻridan-toʻgʻri investitsiyalari oʻzlashtirilgani;
“Gazprom” OAJ (Rossiya Federatsiyasi) tomonidan Oʻzbekiston Respublikasining Ustyurt mintaqasidagi Shaxpaxta investitsion blokida amalga oshirilgan qidirish va razvedka qilish ishlari natijasida sanoat toifasidagi umumiy tabiiy gaz zaxirasi 6,4 mlrd. m kub va gaz kondensati zaxirasi 76,0 ming tonnaga teng yangi Jel koni ochilgani;
Oʻzbekiston Respublikasi va “Gazprom” OAJning (Rossiya Federatsiyasi) xorijda qidiruv, razvedka ishlarini oʻtkazish, konlarni ishlatish va qazib chiqarish sohasidagi neft va gaz loyihalarini amalga oshirish boʻyicha yagona ixtisoslashgan kompaniyasi hisoblangan “Gazprom EP Interneshnl B.V.” (Niderlandiya) oʻrtasida Oʻzbekiston Respublikasining Ustyurt mintaqasidagi Jel koni boʻyicha mahsulot taqsimotiga oid Bitim (keyingi oʻrinlarda — Bitim) imzolangani;
foydaga qolgan mahsulotni tenglik asosida taqsimlashni mustahkamlab qoʻyish maqsadida tomonlar oʻrtasida qoʻshimcha muzokaralar oʻtkazilgani va oʻzaro manfaatlarni inobatga olgan holda Bitimga tegishli oʻzgartirishlar tayyorlangani maʼlumot uchun qabul qilinsin.
2. Oʻzbekiston Respublikasining qonunchiligida belgilangan meʼyorlar bilan bir qatorda quyidagi asosiy shartlarni nazarda tutadigan Oʻzbekiston Respublikasi va “Gazprom EP Interneshnl B. V.” (Niderlandiya) (keyingi oʻrinlarda — investor) oʻrtasida 2018-yil 18-oktabrda Toshkent shahrida imzolangan Bitim hamda 2019-yil 28-iyundagi 1-son Qoʻshimcha bitim maʼqullansin:
kompensatsiya mahsulotining cheklangan darajasi — 75 foiz;
foyda soligʻining stavkasi — 12 foiz;
Bitim shartlariga muvofiq investorning qoplanishi shart boʻlgan xarajatlarining qoplanmagan qismi uchun yillik moliyalashtirish stavkasi — 8 foiz;
Bitimni amalga oshirish davrida tabiiy gazning narx konyunkturasi oʻzgarganda tabiiy gaz uchun yer qaʼridan foydalanganlik uchun soliq (royalti)ni qoʻllashni mazkur qarorning 1-ilovasiga muvofiq amalga oshirish;
Oʻzbekiston Respublikasi hamda investorning Oʻzbekiston Respublikasi Ustyurt mintaqasidagi Shaxpaxta investitsion bloki doirasidagi tarixiy sarf-xarajatlarining mustaqil auditini oʻtkazish natijalariga koʻra investorning ushbu investitsion blokda geologiya-qidiruv ishlarini olib borishda qilgan tarixiy sarf-xarajatlarini qoplash;
texnik-iqtisodiy asoslanishini ishlab chiqishda va investorning Bitimda belgilangan ichki daromadlilik normasi (IRR) saqlanishini taʼminlashda foydaga qolgan mahsulotni tenglik asosida taqsimlashni nazarda tutgan holda Bitimning ayrim texnik-iqtisodiy parametrlarini qayta koʻrib chiqish;
investor tomonidan oʻz huquq va majburiyatlarini uning “Gazprom zarubejneftegaz” AJ shuʼba kompaniyasiga topshirish imkoniyati;
Bitimni amalga oshirish boʻyicha vakolatli organ funksiyasini Oʻzbekiston Respublikasi Energetika vazirligiga oʻtkazish.
3. Belgilansinki, Bitimni amalga oshirish doirasida:
Bitimda koʻzda tutilgan soliqqa tortish, shu jumladan bojxona toʻlovlarini toʻlash tartibi Bitimning butun amal qilish davrida oʻz kuchini saqlab qoladi;
investorga taqdim etiladigan imtiyoz va preferensiyalar operatorga ham tatbiq etiladi;
“Oʻzbekneftgaz” AJ va uning tarkibiga kiruvchi tashkilotlar Bitimning butun amal qilish davrida investor (operator)ga begʻaraz asosda vaqtinchalik foydalanishga (tasarruf etish huquqisiz) beriladigan mol-mulklar uchun mol-mulk soligʻi toʻlashdan ozod etiladi;
Bitim imzolanganidan keyin Oʻzbekiston Respublikasi qonunchiligiga Bitim shartlarini yomonlashtiradigan oʻzgartirish yoki qoʻshimchalar kiritilganida (ishlarni xavfsiz olib borish, mehnat, yer osti boyliklari, atrof-muhit va fuqarolarning sogʻligʻini muhofaza qilish boʻyicha standartlar (normalar, qoidalar)ga oʻzgartirishlar bundan mustasno), Bitimda koʻzda tutilgan shartlar oʻz kuchini saqlab qoladi.
4. “Oʻzbekneftgaz” AJga Bitim shartlariga muvofiq investorga quyidagilarni:
Bitimni amalga oshirish doirasida neft-gaz ishlarini olib borish maqsadlari uchun zarur boʻlgan, Ustyurt mintaqasining Shaxpaxta investitsion blokida joylashgan obyektlar va mulkni vaqtincha foydalanish uchun begʻaraz asosda (tasarruf etish huquqisiz) topshirishga ruxsat etilsin.
5. Oʻzbekiston Respublikasi Energetika vazirligi Bitimning texnik-iqtisodiy asoslanishini ishlab chiqishda foydaga qolgan mahsulotni teng taqsimlash va loyihaning texnik-iqtisodiy parametrlarini qayta koʻrib chiqish sharti bilan ichki bozorda realizatsiya qilinadigan neft-gaz mahsulotlari narxiga chegirma qoʻllashni nazarda tutsin.
6. Oʻzbekiston Respublikasi Geologiya va mineral resurslar davlat qoʻmitasi Bitimning amal qilish muddatiga investorga Bitimda koʻzda tutilgan shartlar asosida geologik jihatdan oʻrganish, foydali qazilmalarni qazib olish uchun yer qaʼri uchastkalaridan foydalanish huquqini beruvchi tegishli litsenziyalarni belgilangan tartibda bersin.
7. Qoraqalpogʻiston Respublikasi Vazirlar Kengashi Bitimni amalga oshirish uchun investorga zarur boʻlgan yer uchastkalarini belgilangan tartibda ajratsin.
8. Oʻzbekiston Respublikasi Energetika vazirligi huzuridagi Neft mahsulotlari va gazdan foydalanishni nazorat qilish inspeksiyasi investorga Oʻzbekiston Respublikasining Ustyurt mintaqasida joylashgan Jel konida tabiiy gaz va gaz kondensatini qazib olish faoliyatini amalga oshirish huquqini beruvchi litsenziyani belgilangan tartibda bersin.
9. Oʻzbekiston Respublikasi Markaziy banki operatorga Oʻzbekiston Respublikasining rezident banklari bilan korrespondentlik aloqalariga ega boʻlgan Oʻzbekiston Respublikasidan tashqaridagi banklarda, Bitimni amalga oshirish doirasida faqat neft-gaz operatsiyalarini amalga oshirish maqsadlarida foydalaniladigan, chet el valyutasidagi bank hisob raqamlarini ochishga belgilangan tartibda ruxsatnoma berilishini taʼminlasin.
10. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi Bitimni amalga oshirish doirasida operatorga, uning pudratchi va subpudratchi tashkilotlariga radioelektron vositalar va yuqori chastotali qurilmalardan foydalanishga belgilangan tartibda ruxsatnoma bersin.
11. Oʻzbekiston Respublikasi Ichki ishlar vazirligi operatorning Oʻzbekiston Respublikasi Energetika vazirligi tomonidan tasdiqlanadigan buyurtmanomalariga binoan Bitimni amalga oshirishda qatnashayotgan chet el mutaxassislarining davlat bojini undirmasdan Oʻzbekiston Respublikasidagi turgan joyi boʻyicha roʻyxatdan oʻtkazilishini va muddati uzaytirilishini belgilangan tartibda taʼminlasin.
12. Oʻzbekiston Respublikasi Bandlik va mehnat munosabatlari vazirligi operatorning buyurtmanomalariga koʻra Bitimni amalga oshirishda qatnashayotgan yuqori malakali xorijiy (Oʻzbekiston Respublikasi fuqarolari orasida boʻlmagan) mutaxassislarga Oʻzbekiston Respublikasi hududida mehnat faoliyati huquqiga tasdiqnomalar berilishi (uzaytirilishi)ni taʼminlasin.
13. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosari E.M. Gʻaniyev va Oʻzbekiston Respublikasi energetika vaziri A.S. Sultanov zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2019-yil 29-iyun,
PQ-4376-son
Oʻzbekiston Respublikasi Prezidentining 2019-yil 29-iyundagi PQ-4376-son qaroriga 1-ILOVA
Oʻzbekiston Respublikasining Ustyurt mintaqasidagi Jel koniga nisbatan Mahsulot taqsimotiga oid bitimni amalga oshirish davrida tabiiy gazning eksport narxlari oʻzgarganda qazib olingan tabiiy gaz uchun qoʻllaniladigan yer qaʼridan foydalanganlik uchun soliq (royalti)
STAVKALARI
Tabiiy gaz narxi (1 ming kub metr uchun AQSH dollarida) Yer qaʼridan foydalanganlik uchun soliq (royalti) stavkasi 125 dollargacha 0 foiz 125 dollardan koʻp va 135 dollargacha 6 foiz 135 dollardan koʻp va 138 dollargacha 7 foiz 138 dollardan koʻp va 150 dollargacha 17 foiz 150 dollardan koʻp va 160 dollargacha 23 foiz 160 dollardan koʻp va 170 dollargacha 25 foiz 170 dollardan koʻp 30 foiz