Oʻzbekiston “Savdo” davlat-aksionerlik uyushmasi(“Oʻzbeksavdo”) faoliyatini tashkil etish masalalari haqida (227-son)

08.05.1992

OʻZBEKISTON RESPUBLIKASI PREZIDENTI HUZURIDAGI VAZIRLAR MAHKAMASINING

qarori

Oʻzbekiston Respublikasi “Savdo” vazirligini Oʻzbekiston “Savdo” davlat-aksionerlik uyushmasi “Oʻzbeksavdo”ga aylantirish haqida” 1992-yil 5-maydagi Farmoniga muvofiq va aholiga savdo xizmati koʻrsatishni tashkil etish saviyasini oshirish, savdo korxonalari va tashkilotlarining iqtisodiy mustaqilligini kengaytirish, savdo sohasida nodavlat tuzilmalarini jadal rivojlantirish maqsadida Vazirlar Mahkamasi qaror qiladi:

1. Xalq isteʼmoli mollari, savdo va xizmat koʻrsatish kompleksining rahbari oʻrtoq A.N.Voznenko davlat savdosi va umumiy ovqatlanish respublika va viloyat birlashmalari, korxonalariga bir oy muddat ichida Oʻzbekiston “Savdo” davlat-aksionerlik uyushmasini taʼsis etish yuzasidan zarur tadbirlarni amalga oshirishga koʻmaklashsin.

2. Oʻzbekiston “Savdo” davlat-aksionerlik uyushmasi tarkibida ilovaga muvofiq savdo korxonalari va tashkilotlari saqlab qolinsin.

“Oʻzkiyimsavdo”, “Oʻztoʻqimachiliksavdo”, “Oʻzpoyabzalsavdo”, “Oʻzulgurjigalanteriya”, “Oʻzxoʻjaliksavdo”, “Oʻzmadaniysavdo”, “Oʻzulgirjibakaleya”, “Oʻzgoʻshtsavdo”, respublika ulgurji idoralari tugatilib, ularning funksiyalari tegishli Toshkent viloyatlararo ulgurji bazalariga va “Goʻshtsutsavdo” Toshkent shahar idorasiga berilsin.

“Oʻzbeksavdo” uyushmasiga Toshkent viloyatlararo va viloyat bazalari, “Sanoat mollari” respublika ulgurji-chakana savdo birlashmasi, Toshkent markaziy universal magazini va bosh universal magazini bilan birgalikda belgilangan tartibda, mehnat jamoalarining manfaatlarini hisobga olgan holda, ixtisoslashtirilgan aksionerlik birlashmalarini tuzish tavsiya etilsin.

3. Belgilab qoʻyilsinki, Oʻzbekiston “Savdo” davlat-aksionerlik uyushmasi:

oʻz faoliyatini uyushmaning Vazirlar Mahkamasi bilan kelishilgan Ustavi haqida savdo-aksionerlik birlashmalari va jamiyatlari, hududiy — savdo ishlab chiqarish konsernlari, davlat, ijara, jamoa, kooperativ, oilaviy, xususiy hamda boshqa savdo va umumiy ovqatlanish korxonalari va tashkilotlari bilan bevosita shartnomalar asosida amalga oshiradi;

iqtisodiy, moliya-xoʻjalik va ijtimoiy faoliyat masalalarini toʻla xoʻjalik hisobi va oʻzini oʻzi mablagʻ bilan taʼminlash prinsiplari asosida mustaqil ravishda hal etadi, uyushma Kengashi qarori boʻyicha markazlashgan sugʻurta, zaxira va boshqa jamgʻarmalarni tuzadi;

uyushma tarkibiga bevosita kiruvchi savdo korxonalari va tashkilotlarining davlat mulkini boshqaradi, iqtisodiy maqsadga muvofiqligi va mehnat jamoalarining manfaatlarini hisobga olgan holda, belgilangan tartibda, savdo va umumiy ovqatlanish davlat korxonalari va tashkilotlarini mulkchilikning boshqa shakllariga aylantirish yuzasidan takliflar kiritadi;

tarmoq korxonalari va tashkilotlari uchun moddiy-texnika resurslarining fond saqlovchisi hisoblanadi.

4. Belgilab qoʻyilsinki, “Oʻzbeksavdo” uyushmasi oʻziga yuklatilgan vazifalarga koʻra quyidagi huquqlarga egadir:

hukumatlararo savdo-iqtisodiy bitimlar va import boʻyicha olinadigan xalq isteʼmoli mollariga buyurtmachi funksiyasini amalga oshirish va kvotalarni joylashtirish, tashqi iqtisodiy faoliyatda mustaqil qatnashish va tovar almashuv (barter) operatsiyalarini bajarish;

belgilangan tartibda va oʻz huquqlari doirasida vazirliklar, idoralar, uyushmalar, konsernlar, savdo va umumiy ovqatlanish korxonalari, tashkilotlari (ularning idoraviy boʻysunishi va mulkchilik shakllaridan qatʼi nazar) tomonidan bajarish majburiy boʻlgan normativ aktlarni, savdo korxonalarining ish qoidalarini, savdo qoidalarini, boshqa tarmoq normalari va normativlarini ishlab chiqish va tasdiqlash;

oʻzining toʻla iqtisodiy mustaqilligini va yuridik shaxs huquqlarini saqlab qolgan holda davlat, kooperativ va aralash assotsiatsiyalar, uyushmalar, konsernlar, birlashmalar va boshqa xoʻjalik yurituvchi subyektlar bilan ixtiyoriy ravishda birlashish, xorijiy investitsiyalarni qoʻshgan holda qoʻshma korxonalar barpo etish;

respublikadan tashqarida va chet mamlakatlarda savdo uylari hamda boshqa savdo va umumiy ovqatlanish korxonalari ochish;

respublika hududida xalq isteʼmoli mollari va asbob-uskunalarini ulgurji sotish boʻyicha yarmarkalar tashkil etish;

loyiha-konstruktorlik ishlarini bajarish va Oʻzbekiston Respublikasi Davlat qurilish ishlari qoʻmitasi bilan kelishgan holda chakana savdo va umumiy ovqatlanish, umumtovar omborlari, taqsimlash xolodilniklarining tipovoy loyihalarini tasdiqlash.

5. Oʻzbekiston “Savdo” davlat-aksionerlik uyushmasining yuqori boshqaruv organi Kengashdir. U boshqaruvni saylaydi, apparat tuzilmasini, mehnatga haq toʻlash fondini va xodimlarni moddiy ragʻbatlantirish shartlarini belgilaydi.

“Oʻzbeksavdo” uyushmasi boshqaruv apparati xodimlarining cheklangan soni 100 kishidan iborat qilib (xizmat koʻrsatuvchi xodimlardan tashqari) belgilansin.

Uyushma boshqaruvi raisi va uning oʻrinbosarlari uyushma Kengashi tomonidan saylanadi va Oʻzbekiston Respublikasi Prezidenti huzuridagi Vazirlar Mahkamasi tomonidan tasdiqlanadi. “Oʻzbeksavdo”da raisning besh oʻrinbosariga, shu jumladan, bir nafar birinchi oʻrinbosariga ega boʻlish tavsiya etilsin.

Uyushma boshqaruvining raisi maqomi, maishiy taʼminot, tibbiy va transport xizmati koʻrsatish sharoitlari boʻyicha Oʻzbekiston Respublikasi vaziriga,

raisning birinchi oʻrinbosari — vazirning birinchi oʻrinbosariga,

rais oʻrinbosarlari — vazir oʻrinbosarlariga tenglashtirilsin.

6. Aholini tovarlar bilan barqaror taʼminlashni tashkil etish va savdo xizmati koʻrsatish saviyasini oshirish boshqaruv mahalliy organlarining eng muhim vazifasi hisoblansin.

Qoraqalpogʻiston Respublikasi Vazirlar Kengashi, viloyatlar, shaharlar va nohiyalar hokimliklarining oʻz huquqlari doirasida qabul qiladigan qarorlari tegishli hududda joylashgan barcha savdo-ishlab chiqarish konsernlari, savdo-aksionerlik birlashmalari va jamiyatlari, savdo va umumiy ovqatlanish korxonalari tomonidan, ularning mulkchilik shakllaridan qatʼi nazar, bajarish uchun majburiydir.

7. Qoraqalpogʻiston Respublikasi Vazirlar Kengashi viloyatlar, shaharlar va nohiyalar hokimliklari:

“Oʻzbeksavdo” uyushmasi, hududiy savdo-ishlab chiqarish konsernlari va boshqa savdo tashkilotlari bilan oʻzaro yaqin aloqada bozor munosabatlariga oʻtish sharoitlarida chakana savdoni takomillashtirish, isteʼmol bozorini tovar resurslari bilan boyitish yuzasidan samarali chora-tadbirlar oʻtkazishni taʼminlasinlar;

oʻziga qarashli hududda joylashgan savdo-ishlab chiqarish konsernlari, savdo-aksionerlik jamiyatlari, savdo va umumiy ovqatlanish korxonalari, ularning mulkchilik shakllaridan qatʼi nazar, faoliyatini muvofiqlashtirib borsinlar;

mulkchilikning barcha shakllaridagi savdo va umumiy ovqatlanish korxonalari tarmoqlarini rivojlantirishga, ularning moddiy-texnika bazasini mustahkamlashga koʻmaklashsinlar;

mulkchilikning barcha shakllaridagi savdo tashkilotlarining kundalik ehtiyoj tovarlarini talonlar boʻyicha norma bilan berish va tovarlarni kuponlar boʻyicha sotish yuzasidan belgilangan tartibga, savdo qoidalariga va ish rejimiga rioya etishlari ustidan qattiq nazorat oʻrnatsinlar.

8. Qoraqalpogʻiston Respublikasi Vazirlar Kengashiga Oʻzbekiston Respublikasi Prezidentining tegishli Farmoniga va mazkur qarorga muvofiq respublikada savdo va umumiy ovqatlanishni boshqarishning tashkiliy tuzilmasini takomillashtirish haqidagi masalani koʻrib chiqish tavsiya etilsin.

9. Viloyatlar va Toshkent shahar hokimliklari “Oʻzbeksavdo” uyushmasi bilan birgalikda 20 kun muddat ichida viloyatlarning savdo va umumiy ovqatlanish boshqarmalari, Toshkent shahar hokimligining savdo, umumiy ovqatlanish bosh boshqarmalari bazasida tegishli hududiy savdo-ishlab chiqarish konsernlarini tuzish yuzasidan tadbirlarni amalga oshirsinlar.

Belgilab qoʻyilsinki, hududiy savdo-ishlab chiqarish konsernlari oʻz faoliyatini toʻla xoʻjalik hisobi va oʻz-oʻzini boshqarish prinsiplari, tipovoy Nizomga muvofiq ishlab chiqilgan va “Oʻzbeksavdo” uyushmasining Kengashi bilan kelishilgan konsern Ustavi asosida amalga oshiradi.

Konsern tarkibiga kiruvchi savdo korxonalari va tashkilotlari rahbarlari, shuningdek, boshqaruv aʼzolaridan iborat boʻladigan Kengash hududiy savdo-ishlab chiqarish konserni boshqaruvining yuqori organi hisoblanadi, boshqaruv raisi viloyat (Toshkent shahar) hokimining taklifi boʻyicha konsern Kengashi tomonidan saylanadi va “Oʻzbeksavdo” uyushmasi boshqaruvi tomonidan tasdiqlanadi.

10. Oʻzbekiston “Savdo” davlat-aksionerlik uyushmasi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Oʻzbekiston Respublikasi Davlat mulki qoʻmitasi bilan birgalikda respublika qonunchiligi tomonidan belgilangan tartibda Toshkent viloyatlararo va viloyat ulgurji bazalarini, savdo boshqarmalarini umumiy ovqatlanish trestlarini hamda boshqa yirik savdo korxonalari va tashkilotlarini aksionerlik jamiyatlariga aylantirish masalalarini ishlab chiqsinlar.

11. Oʻzbekiston “Savdo” davlat-aksionerlik uyushmasi Namoyishlar xiyoboni koʻchasidagi 5-uyda, Oʻzbekiston Respublikasi Savdo vazirligi egallab kelgan binoda joylashtirilsin.

12. Oʻzbekiston Respublikasi Moliya, Aloqa vazirliklari “Oʻzbeksavdo” uyushmasi uchun 1992-yilda Oʻzbekiston Respublikasi Savdo vazirligi uchun belgilangan transport vositalari, aloqa turlari va telefonlardan foydalanish limitlarini saqlab qolsinlar.

13. Oʻzbekiston SSR Ministrlar Sovetining 1959-yil 29-yanvardagi 6-son qarori 2-bandining “Uzbektekstiltorg”, “Uztorgodejda”, “Uzobuvtorg” respublika ulgurji idoralarini tashkil etish haqidagi qismi, Oʻzbekiston SSR Ministrlar Sovetining 1965-yil 3-iyuldagi 412-son qarori 12-bandining “a” kichik bandi, Oʻzbekiston SSR Ministrlar Sovetining 1981-yil 29-yanvardagi 16-son qarorining 3-bandi, shuningdek, Oʻzbekiston SSR Ministrlar Sovetining 1988-yil 25-dekabrdagi 153-son farmoyishi oʻz kuchini yoʻqotgan deb hisoblansin.

14. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari oʻrtoq A. N. Voznenkoga yuklatilsin.

Qarorning qanday bajarilayotgani 1992-yilning iyul oyida koʻrib chiqilsin.

Vazirlar Mahkamasining Raisi I. KARIMOV

Toshkent sh.,

1992-yil 8-may,

227-son

Vazirlar Mahkamasining 1992-yil 8-maydagi 227-son qaroriga ILOVA

Oʻzbekiston “Savdo” davlat-aksionerlik uyushmasi (“Oʻzbeksavdo”) tarkibiga bevosita kiradigan korxona va tashkilotlar

ROʻYXATI

Respublika “Uzxladotorgmontaj” tresti

“Uztorgoborudovaniye” kombinati

Respublika moddiy-texnika taʼminoti bazasi

Savdo va umumiy ovqatlanish korxonalarini loyihalash instituti (“Gipratorg”)

Ishlab chiqarish qurilish-montaj birlashmasi

Oʻzbekiston isteʼmol bozori va marketing ilmiy-tadqiqot instituti

Malaka oshirish instituti

Respublika hunar-texnika bilim yurti

Respublika axborot-hisoblash markazi

Tovarlar sifati boʻyicha davlat inspeksiyasi

Mehnatni ilmiy tashkil qilish va xususiylashtirish respublika laboratoriyasi

“Oʻzsavdobank”

Respublika “Olmos” ulgurji chakana savdo birlashmasi

Oziq-ovqatlarni tayyorlash texnologiyasi va umumiy ovqatlanish iqtisodiyoti respublika laboratoriyasi

Respublika “Tijorat” savdo-ishlab chiqarish firmasi