Respublika aholisini dorivor vositalar va tibbiyotda ishlatiladigan mahsulotlar bilan taʼminlashning kechiktirib boʻlmaydigan chora-tadbirlari toʻgʻrisida (226-son)
07.05.1992
OʻZBEKISTON RESPUBLIKASI PREZIDENTI HUZURIDAGI VAZIRLAR MAHKAMASINING
qarori
Bozor munosabatlarining shakllanishi sharoitida xalq isteʼmoli mollari narxlarining erkinlashtirilishi munosabati bilan hamda aholini dori-darmonlar va preparatlar bilan taʼminlashni yaxshilash maqsadida Vazirlar Mahkamasi qaror qiladi:
1. 1992-yil 11-maydan boshlab dori-darmonlar va tibbiyot mahsulotlariga cheklangan chakana narxlar joriy etilsin.
Hayotiy muhim preparatlarning cheklangan chakana narxlari 1-ilovaga muvofiq tasdiqlansin.
2. Aholining alohida toifasiga bepul va imtiyozli ravishda dori-darmonlar berishning amaldagi tartibi 2-ilovaga muvofiq saqlab qolinsin.
3. Oʻzbekiston Respublikasi Moliya vazirligi Sogʻliqni saqlash vazirligi bilan birgalikda oʻn kun muddat ichida ulgurji va chakana narxlar oʻrtasidagi farqlarning, shuningdek, shu munosabat bilan dorixona muassasalari koʻradigan zararlarning oʻrnini qoplashni nazarda tutgan holda, dori-darmonlar va tibbiyot mahsulotlari preyskurantlarini tasdiqlasin.
4. Oʻzbekistonning taraqqiyot istiqbolini belgilash qoʻmitasi Oʻzbekiston Respublikasi Sogʻliqni saqlash vazirligiga dori.-darmonlar va tibbiyot mahsulotlari ishlab chiqarish hajmini koʻpaytirish maqsadida va dori-darmonlar, xomashyo va materiallar sotib olish, shuningdek, ularni respublika tashqarisidan xarid qilish maqsadida valyuta mablagʻlari ajratishni nazarda tutsin.
5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari oʻrtoq M. Q. Qoraboyev zimmasiga yuklatilsin.
Vazirlar Mahkamasining Raisi . I. KARIMOV
Toshkent sh.,
1992-yil 7-may,
226-son
Vazirlar Mahkamasining 1992-yil 7-maydagi 226-son qaroriga 1-ILOVA
Hayotiy muhim dori-darmonlarning cheklangan chakana narxlari
Vazirlar Mahkamasining 1992-yil 7-maydagi 226-son qaroriga 2-ILOVA
Dori-darmonlar va tibbiyot maksadlaridagi mahsulotlar bilan taminlash boʻyicha axoliga berilgan imtiyozlar