Aviatsiya va avtomobilda tashish tariflari toʻgʻrisida (221-son)

04.05.1992

OʻZBEKISTON RESPUBLIKASI PREZIDENTI HUZURIDAGI VAZIRLAR MAHKAMASINING

qarori

Yoqilgʻi, aviatsiya va avtomobil texnikasi, asbob-uskunalar va boshqa moddiy resurslar narxlari oshgan sharoitda respublika fuqaro aviatsiyasi va avtotransport korxonalarining normal ish rejimini taʼminlash maqsadida Vazirlar Mahkamasi qaror qiladi:

1. 1992-yilning 6-mayidan boshlab aviatashishlar va fuqaro aviatsiyasi xizmatlarini, avtomobil transportida bajariladigan shaharlararo avtobus marshrutlarida yuk va yoʻlovchilar tashishni shartnomaviy (erkin) narxlarga oʻtkazish amalga oshirilsin.

2. Aviatsiya va avtomobil transporti yoʻlovchilarining alohida toifalari uchun qonunchilik bilan nazarda tutilgan, 1992-yilning 6-mayigacha amalda boʻlgan imtiyozlar saqlab qolinsin.

3. Aviatsiya va avtotransport korxonalari uchun Oʻzbekiston Respublikasi budjetiga oʻtkaziladigan ajratmalarning miqdori saqlab qolinsin.

4. Oʻzbekiston Respublikasi Prezidenti huzuridagi Vazirlar Mahkamasining 1992-yil 9-yanvardagi 4-son va 1992-yil 21-yanvardagi 20-son qarorlari bilan tasdiqlangan havo transportida tashish, yuk avtomobillarida yuk, shaharlararo avtobus marshrutlarida yoʻlovchilar tashish uchun tariflarning chegaraviy miqdorlari bekor qilinsin.

Vazirlar Mahkamasining Raisi I. KARIMOV

Toshkent sh.,

1992-yil 4-may,

221-son